ଭୁବନେଶ୍ବର: ଆଜି ସିକ୍କିମରୁ ଓଡିଆ ଶହୀଦ ସରୋଜ ଦାସଙ୍କ ମରଶରୀର ଗାଁକୁ ଆସିବ। ଗତକାଲିଠାରୁ ତାଙ୍କ ଗାଁ କାମାକ୍ଷାନଗର କେନ୍ଦୁଢିପରେ ଶୋକାକୂଳ ପରିବେଶ ସୃଷ୍ଟି ହୋଇଯାଇଛି। ପୁରା ଗ୍ରାମବାସୀ ଶୋକରେ ଭାଙ୍ଗି ପଡିଛନ୍ତି। ସରୋଜ ଟ୍ରେନିଂ ସାରି କ୍ୟାମ୍ପକୁ ଫେରୁଥିଲେ। ଏହି ସମୟରେ ପ୍ରବଳ ବର୍ଷା ହେବାରୁ ସେଥିରେ ଭାସିଯାଇଥିଲେ ସରୋଜ। ତାଙ୍କ ସହିତ 23 ଜଣ ଯବାନ ମଧ୍ୟ ଭାସିଯାଇଥିଲେ।
ଏ ନେଇ ଶୋକ ପ୍ରକାଶ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଏକ ବାର୍ତ୍ତାରେ କହିଛନ୍ତି ଯେ, ସିକ୍କିମରେ ବନ୍ୟା ଯୋଗୁଁ ଘଟିଥିବା ଅଘଟଣରେ ଓଡ଼ିଆ ଯବାନ ସରୋଜ କୁମାର ଦାସଙ୍କ ଶହୀଦ ଖବର ବିଷୟରେ ଜାଣି ମୁଁ ଦୁଃଖିତ। ଦେଶ ସେବାରେ ତାଙ୍କର ବଳିଦାନ ସର୍ବଦା ସ୍ମରଣୀୟ ରହିବ। ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାର ସଦସ୍ୟଙ୍କ ପ୍ରତି ମୋର ସମବେଦନା ଜଣାଉଛି।
