ଭୁବନେଶ୍ବର: ଆସନ୍ତା ମଙ୍ଗଳବାର ଦିନ ନୂଆପଡା ଉପନିର୍ବାଚନ ପାଇଁ ହେବ ଭୋଟ ଗ୍ରହଣ। ଆଜି ଅପରାହ୍ନରେ ଶେଷ ହୋଇଛି ପ୍ରଚାର। ତେବେ ପ୍ରଚାରର କିଛି ସମୟ ପୂର୍ବରୁ ବିଜେଡି ସୁପ୍ରିମୋ ନବୀନ ପଟ୍ଟନାୟକ ନୂଆପଡା ଭୋଟରଙ୍କୁ ପୁଣି ନବେଦନ କରିଛନ୍ତି। ସେ ଏକ ଭିଡିଓ ବାର୍ତ୍ତା ଜାରୀ କରି ସେଥିରେ ନୂଆପଡାବାସୀଙ୍କପ ପ୍ରଥମେ ଧନ୍ୟବାଦ ଅର୍ପଣ କରିଛନ୍ତି।
ସେ କହିଛନ୍ତି ଯେ, ମୁଁ ଦୁଇଥର ନୂଆପଡା ପ୍ରଚାର ଗସ୍ତରେ ଯାଇଥିଲେ। ଏଥିରେ ବହୁ ସଂଖ୍ୟାରେ ଆପଣମାନେ ଯୋଗଦେଇଥିବାରୁ ବହୁ ଧନ୍ୟବାଦ। ସେହିପରି ବିଜେପି ସରକାରଙ୍କୁ ତୀବ୍ର ସମାଲୋଚନା କରିଛନ୍ତି ନବୀନ। ସେ କହିଛନ୍ତି ଯେ, ନୂଆପଡାରୁ ବିଜେପିର ପରାଜୟ ଯାତ୍ରା ଆରମ୍ଭ ହେବ। ସେମାନେ ସରକାରକୁ ଆସିବା ପରେ ଯାହା ପ୍ରତିଶୃତି ଦେଇଥିଲେ ତାହା ପାଳନ କରିପାରୁ ନାହାଁନ୍ତି।
ବିଏସକେୱାଇ କାର୍ଡ ବନ୍ଦ କରି ସେମାନେ ଆୟୁଶ୍ମାନ କାର୍ଡ ପ୍ରଚଳନ କଲେ। ହେଲେ ତାହା ଫେଲ ମାରିଲା। ରୋଗୀମାନେ ଡାକ୍ତରଖାନାରେ ହନ୍ତସନ୍ତ ହେଉଛନ୍ତି। ସେହିପରି ରାଜ୍ୟରେ ମହିଳାମାନେ ବର୍ତ୍ତମାନ ଅସୁରକ୍ଷିତ। ରାଜ୍ୟରେ ନିର୍ଯ୍ୟାତନା ବୃଦ୍ଧି ପାଇବାରେ ଲାଗିଛି। ସେହିପରି ମିଶନ ଶକ୍ତି ମହିଳାମାନଙ୍କୁ ଏହି ସରକାର ଶକ୍ତିହୀନ କରିଦେଲା। ତେଣୁ ନୂଆପଡାବାସୀ ଏହାର ଉଚିତ ଜବାବ ଦେବେ ବୋଲି ନବୀନ ଏହି ବାର୍ତ୍ତାରେ କହିଛନ୍ତି।
ଅନ୍ୟପଟେ ବିଜେପି ରାଜ୍ୟ ସଭାପତି ମନମୋହନ ସାମଲ ସାମ୍ବାଦିକ ସମ୍ମିଳନୀ କରି ବିଜେଡିକୁ ଓ ନବୀନଙ୍କୁ ଟାର୍ଗେଟ କରିଛନ୍ତି। ସେ କହିଛନ୍ତି ଯେ, ୨୦୦୯ ମାର୍ଚ୍ଚ ୭ ତାରିଖ କଥା ମନେପକାନ୍ତୁ। ପ୍ରକୃତରେ ବେଇମାନୀ କିଏ ତାହା ସମସ୍ତେ ଜାଣପାରିବେ। ବିଜେଡି ଏହାର ଆତ୍ମସମୀକ୍ଷା କରୁ ବୋଲି ସାମଲ କହିଛନ୍ତି।