ଭୁବନେଶ୍ୱର: ସାମ୍ପ୍ରତିକ ପରିସ୍ଥିତିରେ ଜାରି ରହିଥିବା ବିଶ୍ୱସ୍ତରୀୟ ଅନିଶ୍ଚିତତା ସବୁ ତୈଳ ଏବଂ ଗ୍ୟାସ କ୍ଷେତ୍ରକୁ ପ୍ରଭାବିତ କରୁଥିବା ସତ୍ତ୍ୱେ, ଦେଶର ସରକାରୀ ତୈଳ ବିପଣନ କମ୍ପାନୀ ଇଣ୍ଡିଆନ ଓଏଲ୍, ବିପିସିଏଲ୍ ଏବଂ ଏଚପିସିଏଲ୍ ପକ୍ଷରୁ ସାରା ଓଡ଼ିଶାରେ ବିନା କୌଣସି ବାଧା ବିଘ୍ନ ଓ କଟକଣାରେ ଇନ୍ଧନ ଯୋଗାଣ ଜାରି ରହିଛି। କାର୍ଯ୍ୟକ୍ଷମ ସମସ୍ତ ପେଟ୍ରୋଲ ପମ୍ପରେ ପେଟ୍ରୋଲ, ଡିଜେଲ ବିତରଣ କରାଯାଉଛି। ସେହିପରି ଏଲପିଜି ଯୋଗାଣ ମଧ୍ୟ ନିରବଚ୍ଛିନ୍ନ ଭାବେ ଜାରି ରହିଥିବା ସରକାରୀ ଭାବେ ସୂଚନା ଦିଆଯାଇଛି।
ଟର୍ମିନାଲ୍, ଡିପୋ, ଏଲପିଜି ବୋଟଲିଂ ପ୍ଲାଣ୍ଟ ଏବଂ ଖୁଚୁରା ଆଉଟଲେଟ୍ (ପେଟ୍ରୋଲ ପମ୍ପ) କୁ ନେଇ ଗଠିତ ଏହାର ବ୍ୟାପକ ଯୋଗାଣ ନେଟୱାର୍କ ମାଧ୍ୟମରେ ଜାଳେଣିର ସହଜ ଉପଲବ୍ଧତା ସୁନିଶ୍ଚିତ କରିବା ପାଇଁ ତୈଳ ଶିଳ୍ପ ସମ୍ପୂର୍ଣ୍ଣ ପ୍ରସ୍ତୁତ ରହିଛି। ସମସ୍ତ ଆଉଟଲେଟ୍ରେ ଜାଳେଣି ବିତରଣ କାର୍ଯ୍ୟ ସୁରୁଖୁରୁରେ ଚାଲିଛି ଏବଂ ନିର୍ଦ୍ଧାରିତ ସୁରକ୍ଷା ଓ କାର୍ଯ୍ୟକ୍ଷମ ନିୟମାବଳୀ ଅନୁଯାୟୀ ବିନା କୌଣସି କଟକଣାରେ ଯୋଗାଣ ବଜାୟ ରଖାଯାଉଛି।
ଯୋଗାଣ ଶୃଙ୍ଖଳାରେ ପେଟ୍ରୋଲିୟମ ଦ୍ରବ୍ୟର ପର୍ଯ୍ୟାପ୍ତ ମହଜୁଦ୍ ରହିଛି ଏବଂ ପ୍ରକୃତ ଗ୍ରାହକଙ୍କ ଚାହିଦାକୁ ଦକ୍ଷତାର ସହ ପୂରଣ କରିବା ପାଇଁ କ୍ରମାଗତ ଭାବେ ଷ୍ଟକ୍ ପୂରଣ କରାଯାଉଛି। ଘରୋଇ ଗ୍ରାହକମାନଙ୍କୁ ଏଲପିଜି ଯୋଗାଣ ମଧ୍ୟ ସ୍ୱାଭାବିକ ଭାବେ ବଜାୟ ରଖାଯାଉଛି ଏବଂ ସାରା ରାଜ୍ୟରେ ବିତରଣ କାର୍ଯ୍ୟ ସୁରୁଖୁରୁରେ ଆଗକୁ ବଢ଼ୁଛି।
ନାଗରିକମାନଙ୍କ ପାଇଁ ନିରବଚ୍ଛିନ୍ନ ଶକ୍ତି ଉପଲବ୍ଧତା ନିଶ୍ଚିତ କରିବାକୁ ଯାଇ ସରକାରୀ ତୈଳ ବିପଣନ କମ୍ପାନୀଗୁଡ଼ିକ ପରିବହନ (ଲଜିଷ୍ଟିକ୍ସ), ଷ୍ଟକ୍ ସ୍ଥିତି ଏବଂ ବିତରଣ ଯୋଜନା ଉପରେ ନିବିଡ଼ ସମନ୍ୱୟ ରକ୍ଷା କରୁଛନ୍ତି। ସାମଗ୍ରିକ ଯୋଗାଣ ସ୍ଥିତି ସ୍ଥିର ରହିଛି ଏବଂ ଏହା ଉପରେ କ୍ରମାଗତ ନଜର ରଖାଯାଇଛି।
ନାଗରିକମାନଙ୍କୁ ସ୍ୱାଭାବିକ ଭାବେ କ୍ରୟ ଜାରି ରଖିବାକୁ ଏବଂ ଅନାବଶ୍ୟକ ଭାବେ ଆତଙ୍କିତ ହୋଇ କିଣାକିଣି ନକରିବାକୁ ଅନୁରୋଧ କରାଯାଇଛି। ଜାଳେଣି ଉପଲବ୍ଧତା ସମ୍ପର୍କରେ ପ୍ରାମାଣିକ ଏବଂ ଯାଞ୍ଚ ହୋଇଥିବା ସୂଚନା ପାଇବାକୁ କେବଳ ତୈଳ ବିପଣନକାରୀ କମ୍ପାନୀଗୁଡ଼ିକ ଦ୍ୱାରା ସମୟ ସମୟରେ ଜାରି କରାଯାଉଥିବା ସରକାରୀ ସୂଚନା ଉପରେ ଭରସା କରିବାକୁ ଜନସାଧାରଣଙ୍କୁ ପରାମର୍ଶ ଦିଆଯାଇଛି।