ବ୍ରହ୍ମପୁର: ଚାଷ ଜମିକୁ ପାଣି ଛାଡ଼ିବାକୁ କେନ୍ଦ୍ର କରି ସାନଖେମୁଣ୍ଡି ବ୍ଲକ ଖଣ୍ଡଦେଉଳି ଗ୍ରାମରେ ଏକ ଅଭାବନୀୟ ଘଟଣା ଘଟିଯାଇଛି। ଦିଅରଙ୍କ ଆକ୍ରମଣରେ ଭାଉଜଙ୍କ ହାତ ଭାଙ୍ଗିଯାଇଥିବା ନେଇ ପାଟପୁର ଥାନାରେ ଅଭିଯୋଗ ହୋଇଛି। ଅଭିଯୋଗ ଅନୁସାରେ, ଖଣ୍ଡଦେଉଳି ଗ୍ରାମର ବନିତା ପ୍ରଧାନ ଓ ତାଙ୍କ ଦିଅର ପଦ୍ମଲୋଚନ ପ୍ରଧାନଙ୍କ ମଧ୍ୟରେ ଜମିକୁ ପାଣି ମାଡ଼ାଇବା ବିଷୟକୁ ନେଇ କଥା କଟାକଟି ଓ ଧସ୍ତାଧସ୍ତି ହୋଇଥିଲା। ଏଥିରେ ଉତ୍ତେଜିତ ହୋଇ ପଦ୍ମଲୋଚନ ଭାଉଜ ବନିତାଙ୍କୁ ଆକ୍ରମଣ କରିବାରୁ ତାଙ୍କ ବାମ ହାତ ଭାଙ୍ଗି ଯାଇଥିଲା।
ଏନେଇ ବନିତା ପାଟପୁର ଥାନାରେ ଏତଲା ଦେବା ପରେ ଆଇଆଇସି ଦୀପ୍ତି ରଞ୍ଜନ ବେହେରାଙ୍କ ନିର୍ଦ୍ଦେଶକ୍ରମେ ମାମଲା ନଂ ୨୮୦/୨୬ ରୁଜୁ କରାଯାଇଛି। ତଦନ୍ତକାରୀ ଅଧିକାରୀ ଏଏସଆଇ ରମାକାନ୍ତ ଶବର ଅଭିଯୁକ୍ତ ଦିଅର ପଦ୍ମଲୋଚନଙ୍କୁ ଗିରଫ କରିଥିଲେ। ପରେ ଭାରତୀୟ ନାଗରିକ ସୁରକ୍ଷା ସଂହିତାର ଧାରା ୩୫(୩) ଅନୁଯାୟୀ କୋର୍ଟରେ ହାଜର ହେବା ପାଇଁ ସର୍ତ୍ତମୂଳକ ନୋଟିସ ଦେଇ ଜାମିନରେ ଛାଡ଼ିଛନ୍ତି। ଏହି ଘଟଣାକୁ ନେଇ ଦୁଇ ପରିବାର ମଧ୍ୟରେ ଚାପା ଉତ୍ତେଜନା ପ୍ରକାଶ ପାଇଛି।