ଭୁବନେଶ୍ୱର: ପିଏସୟୁ କର୍ମଚାରୀଙ୍କ ପାଇଁ ରାଜ୍ୟ ସରକାର ଆଣିଦେଇଛନ୍ତି ଖୁସି ଖବର। ରାଜ୍ୟର ସରକାରୀ ଉଦ୍ୟୋଗ ବା ପିଏସ୍ୟୁ କର୍ମଚାରୀଙ୍କ ମହଙ୍ଗା ଭତ୍ତା (ଡିଏ) ୨ ପ୍ରତିଶତ ବୃଦ୍ଧି କରିଛନ୍ତି ରାଜ୍ୟ ସରକାର। ସଂଶୋଧିତ ଦରମା ହାର ୨୦୧୭ ଅନୁସାରେ, ଦରମା ପାଉଥିବା ଯୋଗ୍ୟ ପିଏସ୍ୟୁ କର୍ମଚାରୀଙ୍କ ପାଇଁ ଡିଏ ୫୮ ପ୍ରତିଶତରୁ ୬୦ ପ୍ରତିଶତକୁ ବୃଦ୍ଧି କରାଯାଇଛି। ଏହି ବର୍ଦ୍ଧିତ ଡିଏ ୨୦୨୬ ଜାନୁଆରୀ ୧ ତାରିଖରୁ ପିଛିଲା ଭାବେ ଲାଗୁ ହେବ। ପବ୍ଲିକ ଏଣ୍ଟରପ୍ରାଇଜେସ୍ ବିଭାଗର କମିଶନର ତଥା ସଚିବଙ୍କ ପକ୍ଷରୁ ଏନେଇ ବିଜ୍ଞପ୍ତି ପ୍ରକାଶ ପାଇଛି।
ଅର୍ଥ ବିଭାଗର ୨୦୨୬ ମେ’ ୧୮ ତାରିଖର ନିର୍ଦ୍ଦେଶକୁ ଆଧାର କରି ରାଜ୍ୟ ସରକାରୀ ଉଦ୍ୟୋଗର କର୍ମଚାରୀଙ୍କ ପାଇଁ ଅତିରିକ୍ତ ୨ ପ୍ରତିଶତ ଡିଏ ମଞ୍ଜୁର କରାଯାଇଛି। ସମସ୍ତ ରାଜ୍ୟ ସରକାରୀ ଉଦ୍ୟୋଗର କର୍ମଚାରୀଙ୍କୁ ସ୍ୱୟଂଚାଳିତ ଭାବେ ଏହି ବର୍ଦ୍ଧିତ ଡିଏ ମିଳିବ ନାହିଁ। ସରକାରଙ୍କ ନିର୍ଦ୍ଦେଶ ଅନୁସାରେ, ସମ୍ପୃକ୍ତ ସରକାରୀ ଉଦ୍ୟୋଗଗୁଡ଼ିକୁ ନିର୍ଦ୍ଦିଷ୍ଟ ଯୋଗ୍ୟତା ମାନଦଣ୍ଡ ପୂରଣ କରିବାକୁ ପଡ଼ିବ। ଏହି ମାନଦଣ୍ଡଗୁଡ଼ିକ ଆଧାରରେ ପ୍ରସ୍ତାବଗୁଡ଼ିକୁ ମାମଲା ଅନୁସାରେ ବିଚାର କରାଯିବ।
ଡିଏ ବୃଦ୍ଧି ପାଇଁ ରାଜ୍ୟ ସରକାରୀ ଉଦ୍ୟୋଗଗୁଡ଼ିକୁ ୧୦ଟି ସର୍ତ୍ତ ପୂରଣ କରିବାକୁ ହେବ। ସେଗୁଡ଼ିକ ହେଲା ୨୦୨୫-୨୬ ଆର୍ଥିକ ବର୍ଷ ପର୍ଯ୍ୟନ୍ତ ବୈଧାନିକ ଅଡିଟ ସମ୍ପୂର୍ଣ୍ଣ ହୋଇଥିବା ଆବଶ୍ୟକ। କୌଣସି ବ୍ୟାଙ୍କ, ଆର୍ଥିକ ସଂସ୍ଥା କିମ୍ବା ରାଜ୍ୟ ସରକାରଙ୍କ ଋଣ ପରିଶୋଧରେ ଡିଫଲ୍ଟ ଥିବା ଉଚିତ ନୁହେଁ। ପ୍ରୋଭିଡେଣ୍ଟ ଫଣ୍ଡ ବା ପିଏଫ୍ ଓ ଇଏସ୍ଆଇ ଭଳି କର୍ମଚାରୀଙ୍କ ବୈଧାନିକ ଦେୟ ପ୍ରଦାନରେ କୌଣସି ବକେୟା ରହିବ ନାହିଁ। ପ୍ରଶାସନିକ କିମ୍ବା ପ୍ରତିଷ୍ଠାନଗତ ଖର୍ଚ୍ଚ ପୂରଣ ପାଇଁ ରାଜ୍ୟ ସରକାରଙ୍କ ବଜେଟ ଅନୁଦାନ କିମ୍ବା ସବସିଡି ଉପରେ ନିର୍ଭରଶୀଳ ହୋଇଥିବା ଉଚିତ ନୁହେଁ। ବର୍ଦ୍ଧିତ ଡିଏ ଯୋଗୁଁ ହେବାକୁ ଥିବା ଅତିରିକ୍ତ ଆର୍ଥିକ ବୋଝକୁ ନିଜସ୍ୱ ଉତ୍ସରୁ ବହନ କରିବା ପାଇଁ ପର୍ଯ୍ୟାପ୍ତ ସମ୍ବଳ ଥିବା ଆବଶ୍ୟକ।
୨୦୨୬-୨୭ ଆର୍ଥିକ ବର୍ଷ ପାଇଁ ସମ୍ପୃକ୍ତ ପ୍ରଶାସନିକ ବିଭାଗ ସହିତ ବୁଝାମଣାପତ୍ର ସ୍ୱାକ୍ଷର କରିଥିବା ଆବଶ୍ୟକ। କର୍ପୋରେଟ ଗଭର୍ଣ୍ଣାନ୍ସ ମାନୁଆଲ୍ ଅନୁସାରେ, ବୋର୍ଡରେ ଆବଶ୍ୟକ ସ୍ୱାଧୀନ ନିର୍ଦ୍ଦେଶକ ନିଯୁକ୍ତ କରାଯାଇଥିବା ଦରକାର। କେବଳ ଲାଭ କରୁଥିବା ରାଜ୍ୟ ସରକାରୀ ଉଦ୍ୟୋଗଗୁଡ଼ିକ ହିଁ ୨ ପ୍ରତିଶତ ଅତିରିକ୍ତ ଡିଏ ଜାରି କରିପାରିବେ। ଏହା ଫଳରେ ଡିଏ ୫୮ରୁ ୬୦ ପ୍ରତିଶତକୁ ବୃଦ୍ଧି ପାଇବ। ବର୍ଦ୍ଧିତ ଡିଏ ପ୍ରଦାନ ପାଇଁ ହେବାକୁ ଥିବା ଅତିରିକ୍ତ ଖର୍ଚ୍ଚ ସମ୍ପୃକ୍ତ ସରକାରୀ ଉଦ୍ୟୋଗ ନିଜସ୍ୱ ସମ୍ବଳରୁ ବହନ କରିବେ। ଏଥିପାଇଁ ସରକାରୀ ରାଜକୋଷରୁ କୌଣସି ଆର୍ଥିକ ସହାୟତା ମିଳିବ ନାହିଁ। ଅର୍ଥ ବିଭାଗର ୨୦୨୫ ନଭେମ୍ବର ୭ ତାରିଖର ଅଫିସ୍ ମେମୋରାଣ୍ଡମ ଅନୁସାରେ ସରକାରୀ ଉଦ୍ୟୋଗ ଗୁଡ଼ିକୁ ସରକାରଙ୍କୁ ଡିଭିଡେଣ୍ଡ ପ୍ରଦାନ କରିବାକୁ ହେବ। ଉପରୋକ୍ତ ମାନଦଣ୍ଡ ପୂରଣ କରୁଥିବା ଏବଂ କାଟାଗୋରାଇଜେସନ ଫ୍ରେମୱାର୍କ ଅଧୀନରେ ବର୍ଗୀକୃତ ସରକାରୀ ଉଦ୍ୟୋଗଗୁଡ଼ିକ ସେମାନଙ୍କ ବୋର୍ଡ ଅଫ ଡାଇରେକ୍ଟର୍ସଙ୍କ ଅନୁମୋଦନ ପରେ ନିଜ ନିଜ ପ୍ରଶାସନିକ ବିଭାଗ ନିକଟରେ ପ୍ରସ୍ତାବ ପଠାଇବେ। ଅନ୍ୟପକ୍ଷରେ କାଟାଗୋରାଇଜେସନ୍ ଫ୍ରେମୱାର୍କ ଅଧୀନରେ ନଥିବା ସରକାରୀ ଉଦ୍ୟୋଗଗୁଡ଼ିକ ବୋର୍ଡ ଅନୁମୋଦନ ପରେ ସେମାନଙ୍କ ପ୍ରଶାସନିକ ବିଭାଗ ମାଧ୍ୟମରେ ପବ୍ଲିକ ଏଣ୍ଟରପ୍ରାଇଜେସ୍ ବିଭାଗ ନିକଟକୁ ପ୍ରସ୍ତାବ ପଠାଇବେ। ଏହି ପ୍ରସ୍ତାବଗୁଡ଼ିକୁ ମାମଲା ଅନୁସାରେ ବିଚାର କରାଯାଇ ବର୍ଦ୍ଧିତ ଡିଏ ପ୍ରଦାନ ସମ୍ପର୍କରେ ଆବଶ୍ୟକ ଅନୁମୋଦନ ଦିଆଯିବ।