ଭୁବନେଶ୍ୱର: ଓଡ଼ିଶା ସରକାରଙ୍କ ମହିଳା ଓ ଶିଶୁ ବିକାଶ ବିଭାଗ ଅଧୀନସ୍ଥ ଓଡ଼ିଶା ରାଜ୍ୟ ଶିଶୁ ସୁରକ୍ଷା ସମିତି ଆନୁକୂଲ୍ୟରେ ଆୟୋଜିତ ରାଜ୍ୟସ୍ତରୀୟ ଶିଶୁ କ୍ରୀଡ଼ା ମହୋତ୍ସବ “ଉତ୍ସାହ-୨୦୨୬” ର ଉଦ୍ଯାପନୀ ଓ ଭବ୍ୟ ପୁରସ୍କାର ବିତରଣ ସମାରୋହ ଆଜି ଭୁବନେଶ୍ୱରସ୍ଥିତ କଳିଙ୍ଗ ଷ୍ଟାଡିୟମର ଅଭ୍ୟାସ ପଡ଼ିଆଠାରେ ସଫଳତାର ସହ ସମ୍ପନ୍ନ ହୋଇଯାଇଛି। ନିର୍ଦ୍ଧାରିତ କାର୍ଯ୍ୟସୂଚୀ ଅନୁଯାୟୀ, ଅତିଥିମାନଙ୍କର ଭାବପୂର୍ଣ୍ଣ ସମ୍ବର୍ଦ୍ଧନା ପରେ ଏହି ସୁନ୍ଦର କାର୍ଯ୍ୟକ୍ରମର ଆନୁଷ୍ଠାନିକ ଶୁଭାରମ୍ଭ ହୋଇଥିଲା।
ଏହି ଅବସରରେ ମହିଳା ଓ ଶିଶୁ ବିକାଶ ବିଭାଗର ସମାଜ ମଙ୍ଗଳ ନିର୍ଦ୍ଦେଶିକା ମୋନିଷା ବାନାର୍ଜୀ ସ୍ୱାଗତ ଭାଷଣ ପ୍ରଦାନ କରି ସମସ୍ତ ଅଂଶଗ୍ରହଣକାରୀ ଶିଶୁ, ବିଜେତା ଓ ଆମନ୍ତ୍ରିତ ଅତିଥିମାନଙ୍କୁ ଆନ୍ତରିକ ସ୍ୱାଗତ ଜଣାଇଥିଲେ। ଏହି ସମାରୋହରେ ଶିକ୍ଷକତା, ଇଞ୍ଜିନିୟରିଂ ଏବଂ ଚିକିତ୍ସା ସେବା ଆଦି ବିଭିନ୍ନ ଗୁରୁତ୍ୱପୂର୍ଣ୍ଣ କ୍ଷେତ୍ରରେ ନିଯୁକ୍ତି ପାଇ ନିଜର ଲକ୍ଷ୍ୟ ସାଧନ କରିଥିବା ଶିଶୁ ଯତ୍ନ ଅନୁଷ୍ଠାନର ୫ ଜଣ ଶ୍ରେଷ୍ଠ ପୂର୍ବତନ ଅନ୍ତେବାସୀଙ୍କୁ ସେମାନଙ୍କର ଅସାଧାରଣ ସଫଳତା ପାଇଁ ସ୍ୱତନ୍ତ୍ର ଭାବେ ସମ୍ବର୍ଦ୍ଧିତ କରାଯାଇଥିଲା। ଏହା ସହିତ କ୍ରୀଡ଼ା ମହୋତ୍ସବକୁ ସୁଚାରୁରୂପେ ସମ୍ପାଦନ କରିବାରେ ସମର୍ଥ ହୋଇଥିବା ୫ ଜଣ ଶ୍ରେଷ୍ଠ ସ୍ୱେଚ୍ଛାସେବୀ ଓ ସହଯୋଗୀଙ୍କୁ ସେମାନଙ୍କର ନିଷ୍ଠାପର ସେବା ପାଇଁ ପୁରସ୍କୃତ କରାଯାଇଥିବା ବେଳେ ଅବସରପ୍ରାପ୍ତ କର୍ଣ୍ଣେଲ ତଥା ମୁଖ୍ୟ ସୁରକ୍ଷା ଅଧିକାରୀ ସୁଭେନ୍ଦ୍ର କୁମାର ପୃଷ୍ଟିଙ୍କୁ ମଧ୍ୟ ବିଶେଷ ଭାବେ ସମ୍ବର୍ଦ୍ଧନା ପ୍ରଦାନ କରାଯାଇଥିଲା।
ଏହି ଭବ୍ୟ ସମାରୋହରେ ସମ୍ମାନିତ ଅତିଥି ଭାବେ ଯੋଗଦେଇ ପର୍ଯ୍ୟଟନ ବିଭାଗର କମିଶନର-ତଥା-ଶାସନ ସଚିବ ବାଲୱନ୍ତ ସିଂହ ଉପସ୍ଥିତ ଶିଶୁମାନଙ୍କୁ ଅତ୍ୟନ୍ତ ପ୍ରେରଣାଦାୟୀ ଉଦ୍ବୋଧନ ଦେଇଥିଲେ। ମହିଳା ଓ ଶିଶୁ ବିକାଶ ବିଭାଗର କମିଶନର-ତଥା-ଶାସନ ସଚିବ ଡ. ମୃଣାଳିନୀ ଦରସ୍ୱାଲ ନିଜର ସ୍ୱତନ୍ତ୍ର ଅଭିଭାଷଣରେ ଶିଶୁମାନଙ୍କର ଶାରୀରିକ ବିକାଶ ତଥା କ୍ରୀଡ଼ା କ୍ଷେତ୍ରରେ ଆଗକୁ ବଢ଼ିବା ପାଇଁ ଉତ୍ସାହିତ କରିବା ସହ ସେମାନଙ୍କ ଅନ୍ତର୍ନିହିତ ପ୍ରତିଭାକୁ ନିର୍ଭୟରେ ପ୍ରଦର୍ଶନ କରିବାକୁ ଆହ୍ୱାନ ଦେଇଥିଲେ। ସେହିପରି ଅନ୍ତର୍ଜାତୀୟ ସଂସ୍ଥାର ମୁଖ୍ୟ କ୍ଷେତ୍ର ଅଧିକାରୀ ପ୍ରଶାନ୍ତ କୁମାର ଦାସ ଶିଶୁମାନଙ୍କ ପ୍ରତିଭା ଓ ସୃଜନଶୀଳତାର ବିକାଶ ଉଦ୍ଦେଶ୍ୟରେ ମୂଲ୍ୟବାନ ଆଲୋକପାତ କରିଥିଲେ।
ଏହି ଉତ୍ସବର ସବୁଠାରୁ ବଡ଼ ଆକର୍ଷଣ ଥିଲା ପୁରସ୍କାର ବିତରଣୀ କର୍ମସୂଚୀ, ଯେଉଁଥିରେ “ଉତ୍ସାହ-୨୦୨୬” ଅନ୍ତର୍ଗତ ଅନୁଷ୍ଠିତ ବିଭିନ୍ନ ରାଜ୍ୟସ୍ତରୀୟ କ୍ରୀଡ଼ା ପ୍ରତିଯୋଗିତାରେ କୃତିତ୍ୱ ହାସଲ କରିଥିବା ବିଜେତା ଶିଶୁମାନଙ୍କୁ ସମ୍ମାନିତ ଅତିଥି ଓ ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତିମାନଙ୍କ ଦ୍ୱାରା ଆକର୍ଷଣୀୟ ପୁରସ୍କାର ପ୍ରଦାନ କରାଯାଇଥିଲା। କାର୍ଯ୍ୟକ୍ରମର ଶେଷ ପର୍ଯ୍ୟାୟରେ ମହିଳା ଓ ଶିଶୁ ବିକାଶ ବିଭାଗର ଅତିରିକ୍ତ ଶାସନ ସଚିବ ଶ୍ରୀମତୀ ସୁମିତ୍ରା ପଟ୍ଟନାୟକ ଉପସ୍ଥିତ ସମସ୍ତ କ୍ରୀଡ଼ାବିତ୍, ଆୟୋଜକ, ସହଯୋଗୀ କର୍ମକର୍ତ୍ତା ଏବଂ ଗଣମାଧ୍ୟମର ପ୍ରତିନିଧିମାନଙ୍କୁ ଆନ୍ତରିକ ଧନ୍ୟବାଦ ଅର୍ପଣ କରିଥିଲେ।