ନୂଆଦିଲ୍ଲୀ: ଭାରତ ଓ ପାକିସ୍ତାନ ମଧ୍ୟରେ ଉପୁଜିଥିବା ହ୍ୟାଣ୍ଡ୍ସେକ୍ (ହାତ ମିଳାଇବା) ବିବାଦକୁ ନେଇ କ୍ରିକେଟ୍ ରେ ଚର୍ଚ୍ଚା ଜୋର୍ ଧରିଥିବା ବେଳେ ଏହା ଉପରେ ନିଜର ସ୍ପଷ୍ଟ ଆଭିମୁଖ୍ୟ ପ୍ରକାଶ କରିଛନ୍ତି ପୂର୍ବତନ ଭାରତୀୟ ଅଧିନାୟକ କପିଳ ଦେବ। ଭାରତ-ପାକ୍ କ୍ରିକେଟ୍ରେ ରାଜନୈତିକ ଉତ୍ତେଜନାର ପ୍ରଭାବକୁ ସ୍ୱୀକାର କରି ସେ କହିଛନ୍ତି ଯେ, ଏଭଳି ସମ୍ବେଦନଶୀଳ ପ୍ରସଙ୍ଗରେ ଖେଳାଳିମାନେ ସରକାରୀ ନୀତି ଓ ନିଷ୍ପତ୍ତିକୁ ମାନିବାକୁ ବାଧ୍ୟ । ସେ ଏକ ସାକ୍ଷାତକାରରେ କହିଛନ୍ତି ଯେ, ଯଦି ସରକାର ପାକିସ୍ତାନୀ ଖେଳାଳିଙ୍କ ସହ ହାତ ନ ମିଳାଇବାକୁ ନିଷ୍ପତ୍ତି ନେଇଛନ୍ତି, ତେବେ ଖେଳାଳିଙ୍କ ପାଖରେ ଅନ୍ୟ କୌଣସି ବିକଳ୍ପ ନଥାଏ। ଏଭଳି ସମ୍ବେଦନଶୀଳ ମାମଲାରେ ଖେଳାଳିମାନେ ସରକାରଙ୍କ ଦେଶାତ୍ମବୋଧକ ନୀତି ଏବଂ ନିର୍ଦ୍ଦେଶକୁ ପାଳନ କରିବା ଉଚିତ।
ଏହା ସହିତ କପିଳ ଦେବ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ତଥା କ୍ରିକେଟ୍ ଅଧିନାୟକ ଇମରାନ୍ ଖାନ୍ଙ୍କ ସମ୍ପର୍କରେ ମଧ୍ୟ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ ଇମରାନ୍ଙ୍କୁ ଉଚିତ ମାନବୀୟ ବ୍ୟବହାର ମିଳିବା ତାଙ୍କର ମୌଳିକ ଅଧିକାର। ୨୦୨୬ ଅଗଷ୍ଟରେ କପିଳ ଦେବଙ୍କ ସମେତ ୨୧ ଜଣ ପୂର୍ବତନ ବିଶ୍ୱ କ୍ରିକେଟ୍ ଅଧିନାୟକ ପାକିସ୍ତାନ ପ୍ରଧାନମନ୍ତ୍ରୀ ଶାହବାଜ ଶରିଫ୍ଙ୍କୁ ପତ୍ର ଲେଖି ଇମରାନ୍ ଖାନ୍ଙ୍କୁ ଉଚିତ ଡାକ୍ତରୀ ସେବା, ମେଡିକାଲ୍ ଆସେସ୍ମେଣ୍ଟ୍ ଏବଂ ପରିବାର ସହ ସାକ୍ଷାତର ସୁଯୋଗ ଦେବାକୁ ନିବେଦନ କରିଥିଲେ। ଏହା ପୂର୍ବରୁ ଫେବୃଆରୀ ମାସରେ ମଧ୍ୟ କପିଳ ଦେବ ଓ ସୁନୀଲ ଗାଭାସ୍କରଙ୍କ ଭଳି ଦିଗ୍ଗଜ ଖେଳାଳିମାନେ ଇମରାନ୍ଙ୍କ ପାଇଁ ନିରପେକ୍ଷ ଆଇନ ପ୍ରକ୍ରିୟା ଏବଂ ମାନବୀୟ ସୁବିଧା ଦାବି କରିଥିଲେ।