ନୂଆଦିଲ୍ଲୀ: ଆଗାମୀ ଏସିଆନ୍ ଚାମ୍ପିଅନ୍ସ ଟ୍ରଫି ୨୦୨୬ ପାଇଁ ହକି ଇଣ୍ଡିଆ ପକ୍ଷରୁ ଭାରତୀୟ ପୁରୁଷ ଟିମ୍ ଘୋଷଣା କରାଯାଇଛି। ପଞ୍ଜାବର ଜଳନ୍ଧର ଓ ମୋହାଲୀରେ ଅକ୍ଟୋବର ୨୭ରୁ ନଭେମ୍ବର ୫ ପର୍ଯ୍ୟନ୍ତ ଅନୁଷ୍ଠିତ ହେବାକୁଥିବା ଏହି ଟୁର୍ଣ୍ଣାମେଣ୍ଟ୍ ପାଇଁ ତାରକା ଖେଳାଳି ହରମନପ୍ରୀତ୍ ସିଂହଙ୍କୁ ଟିମ୍ର କ୍ୟାପ୍ଟେନ୍ ଦାୟିତ୍ୱ ଦିଆଯାଇଛି। ଏହି ସ୍କ୍ୱାଡ୍ରେ ଗୋଲ୍କିପର୍ କୃଷ୍ଣ ପାଠକ ପ୍ରତ୍ୟାବର୍ତ୍ତନ କରିଥିବା ବେଳେ ଅଭିଜ୍ଞ ଡିଫେଣ୍ଡର୍ ସୁମିତ୍ଙ୍କୁ ଟିମ୍ରୁ ବାଦ୍ ଦିଆଯାଇଛି।
ଏସିଆନ୍ ଗେମ୍ସରେ ସ୍ୱର୍ଣ୍ଣ ପଦକ ଜିତାଇଥିବା ଟିମ୍ର ଖେଳାଳିଙ୍କୁ ବଜାୟ ରଖାଯାଇଛି। ଗୋଲ୍କିପର୍ କୃଷ୍ଣ ବାହାଦୁର ପାଠକଙ୍କର ଟିମ୍କୁ ପ୍ରତ୍ୟାବର୍ତ୍ତନ ଘଟିଛି। ସେ ମୋହିତ ଏଚ୍ଏସ୍ଙ୍କ ସ୍ଥାନରେ ଟିମ୍ରେ ସାମିଲ ହୋଇଛନ୍ତି। ଯୁବ ଡିଫେଣ୍ଡର୍ ଅମନଦୀପ୍ ଲାକ୍ରା ଓ ମିଡ୍ଫିଲ୍ଡର୍ ଆଦିତ୍ୟା ଅର୍ଜୁନ ଲାଲାଗେଙ୍କୁ ସିନିୟର୍ ଟିମ୍ରେ ନିଜ ସ୍ଥାନ ମଜଭୁତ କରିବାର ଆଉ ଏକ ସୁଯୋଗ ମିଳିଛି। ତେବେ ସିନିୟର୍ ଡିଫେଣ୍ଡର୍ ସୁମିତ ଓ ୟଶଦୀପ୍ ସିୱାଚ୍ଙ୍କୁ ଟିମ୍ରୁ ବାଦ୍ ଦିଆଯାଇଛି। ସେହିପରି ବିବେକ ସାଗର ପ୍ରସାଦ ଓ ରାଜ କୁମାର ପାଲ୍ ଟିମ୍ରେ ସ୍ଥାନ ହାସଲ କରିବାରେ ବିଫଳ ହୋଇଛନ୍ତି।
୧୮ ଜଣିଆ ଖେଳାଳି ସ୍କ୍ୱାଡ୍ ବ୍ୟତୀତ ମିଡ୍ଫିଲ୍ଡର୍ ବିଷ୍ଣୁକାନ୍ତ ସିଂହ ଏବଂ ଫରୱାର୍ଡ ଅଙ୍ଗଦ ବୀର ସିଂହଙ୍କୁ ଦୁଇ ରିଭର୍ଜ ଖେଳାଳି ଭାବେ ଚୟନ କରାଯାଇଛି। ମୁଖ୍ୟ କୋଚ୍ କ୍ରେଗ୍ ଫୁଲ୍ଟନ୍ କହିଛନ୍ତି, ଏହି ଟିମ୍ରେ ଯୁବ ଉତ୍ସାହ ଏବଂ ଅନୁଭବର ମିଶ୍ରଣ ରହିଛି। ଆମେ ଘରୋଇ ଦର୍ଶକଙ୍କ ସମର୍ଥନର ଲାଭ ଉଠାଇବାକୁ ବ୍ୟାକୁଳ। ଟୁର୍ଣ୍ଣାମେଣ୍ଟ୍ରେ ଆୟୋଜକ ଭାରତ ବ୍ୟତୀତ ମାଲେସିଆ, ଜାପାନ, କୋରିଆ, ଚୀନ୍ ଏବଂ ବାଂଲାଦେଶ ଭାଗନେବେ। ଭାରତ ଅକ୍ଟୋବର ୨୭ରେ ବାଂଲାଦେଶ ବିପକ୍ଷରୁ ନିଜ ଅଭିଯାନ ଆରମ୍ଭ କରିବ। ଏହି ମ୍ୟାଚ୍ ଜଳନ୍ଧରରେ ଖେଳାଯିବ।
ଭାରତୀୟ ଟିମ୍: ଗୋଲ୍କିପର୍- ସୂରଜ କେରକେରା, କୃଷ୍ଣ ବାହାଦୁର ପାଠକ; ଡିଫେଣ୍ଡର୍- ସଞ୍ଜୟ, ହରମନପ୍ରୀତ୍ ସିଂହ (କ୍ୟାପ୍ଟେନ୍), ଅମିତ ରୋହିଦାସ, ଜୁଗରାଜ ସିଂହ, ଜରମନପ୍ରୀତ୍ ସିଂହ, ଅମନଦୀପ୍ ଲାକ୍ରା; ମିଡ୍ଫିଲ୍ଡର- ରାଜିନ୍ଦର ସିଂହ, ଆଦିତ୍ୟ ଅର୍ଜୁନ ଲାଲାଗେ, ନୀଳକଣ୍ଠ ଶର୍ମା, ହାର୍ଦ୍ଦିକ ସିଂହ, ମନପ୍ରୀତ୍ ସିଂହ; ଫରୱାର୍ଡ – ଶିଳାନନ୍ଦ ଲାକ୍ରା, ଅଭିଷେକ, ସୁଖଜିତ ସିଂହ, ମନଦୀପ୍ ସିଂହ।
ରିଜର୍ଭ/ବଦଳ ଖେଳାଳି: ବିଷ୍ଣୁକାନ୍ତ ସିଂହ, ଅଙ୍ଗଦ ବୀର ସିଂହ।