Tag: ଉତ୍ତରପ୍ରଦେଶ

ଲକ୍ଷ୍ନୌ: ଉତ୍ତରପ୍ରଦେଶ ବିଜେପି ରାଜ୍ୟ ସଭାପତି ସ୍ଵତନ୍ତ୍ର ଦେବ ସିଂ ଦଳର କର୍ମୀଙ୍କୁ ପରାମର୍ଶ ଦେଇ କହିଛନ୍ତି ଯେ, ଲୋକଙ୍କ ଭଲପାଇବାରୁ ଜଣେ ନେତା ହୋଇପାରେ। ହେଲେ ଆମେ ଫର୍ଚ୍ୟୁନର ଗାଡି ଦ୍ଵାରା କାହାର ଜୀବନ ନଷ୍ଟ କରିବାକୁ ଆସିନାହେଁ। ସେ କାର୍ଯ୍ଯକର୍ତ୍ତାମାନଙ୍କୁ କହିଥିଲେ ଯେ, କେବଳ ଆପଣଙ୍କର ଆଚରଣ ଦ୍ଵାରା ଭୋଟ୍ ମିଳିବ। ରବିବାର ଦିନ ସଂଖ୍ୟାଲଘୁ ମୋର୍ଚ୍ଚାର ରାଜ୍ୟ କାର୍ଯ୍ୟକାରିଣୀ ବୈଠକର ଉଦଘାଟନୀ ଅଧିବେଶନକୁ ସମ୍ବୋଧିତ କରିବାବେଳେ ସ୍ଵତନ୍ତ୍ର ଦେବ ସିଂ କହିଛନ୍ତି ଯେ, ଆମେ କାହାକୁ ଲୁଟିବା ପାଇଁ ନେତା ହୋଇନାହେଁ।

ସ୍ଵତନ୍ତ୍ର ଦେବ ସିଂଙ୍କ ବିବୃତ୍ତି ଏପରି ଏକ ସମୟରେ ଆସିଛି ଯେତେବେଳେ ଗୃହମନ୍ତ୍ରୀ ଅଜୟ ମିଶ୍ର ଟେନିଙ୍କ ପୁଅ ଆଶିଷ ମିଶ୍ର ଲକ୍ଷ୍ମୀପୁର ଖେରୀ ହିଂସା ମାମଲାରେ ଆଇନଗତ କାର୍ଯ୍ୟାନୁଷ୍ଠାନର ସମ୍ମୁଖୀନ ହେଉଛନ୍ତି। ପ୍ରାୟ ୧୨ ଘଣ୍ଟା ପଚରାଉଚରା ପରେ ଆଶିଷ ମିଶ୍ରଙ୍କୁ ଗତକାଲି ଗିରଫ କରାଯାଇଛି। ତାଙ୍କୁ ମଧ୍ୟରାତ୍ରି ପରେ କୋର୍ଟରେ ହାଜର କରାଯାଇଥିଲା, ଯେଉଁଠାରୁ ତାଙ୍କୁ ନ୍ୟାୟିକ ହେପାଜତରେ ଜେଲକୁ ପଠାଯାଇଛି। ନ୍ୟାୟିକ ମାଜିଷ୍ଟ୍ରେଟ ଆଶିଷଙ୍କୁ ଲକ୍ଷ୍ମୀପୁର ଖେରୀ ଜିଲ୍ଲା ଜେଲରେ ୧୪ ଦିନିଆ ନ୍ୟାୟିକ ହେପାଜତକୁ ପଠାଇଛନ୍ତି।

ନୂଆଦିଲ୍ଲୀ: ଉତ୍ତରପ୍ରଦେଶର ଲକ୍ଷ୍ମୀପୁର ଖେରୀ ଘଟଣାକୁ ନେଇ ବିଜେପି ସରକାର ଉପରେ ସର୍ବଦଳୀୟ ଆକ୍ରମଣ ହେଉଛି। ଏହି ସମୟରେ କଂଗ୍ରେସ ନେତା ନବଜୋତ ସିଂ ସିଦ୍ଧୁ ହରିୟାଣା ମୁଖ୍ୟମନ୍ତ୍ରୀ ମନୋହର ଲାଲ ଖଟ୍ଟରଙ୍କୁ ଟାର୍ଗେଟ କରି ତାଙ୍କ ବିରୋଧରେ ଦେଶଦ୍ରୋହ ମାମଲା ପଞ୍ଜିକରଣ କରିବାକୁ ଦାବି କରିଛନ୍ତି। ମୁଖ୍ୟମନ୍ତ୍ରୀ ଖଟ୍ଟରଙ୍କ ବିବୃତ୍ତି ପାଇଁ ତାଙ୍କ ବିରୋଧରେ ଏକ ଦେଶଦ୍ରୋହ ମାମଲା ରୁଜୁ କରାଯାଉ ବୋଲି ସିଦ୍ଧୁ କହିଛନ୍ତି।

ମନୋହର ଲାଲ ଖଟ୍ଟର କ’ଣ କହିଥିଲେ?:

ରବିବାର ଦିନ ଭାରତୀୟ ଜନତା ପାର୍ଟି (ବିଜେପି) କିସାନ ମୋର୍ଚ୍ଚାର ଏକ ବୈଠକରେ ମନୋହର ଲାଲ ଖଟ୍ଟର “ଜେସାକୁ ତେସା” ଭଳି ମନ୍ତବ୍ୟ ଦେଇଥିବାର ଅଭିଯୋଗ ହୋଇଥିଲା। ଉପସ୍ଥିତ ଲୋକଙ୍କୁ ଜେଲ ଯିବାକୁ ପ୍ରସ୍ତୁତ ରହିବାକୁ ମଧ୍ୟ ମନୋହର ଲାଲ କହିଥିଲେ।

ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଆଜି ତାଙ୍କ କ୍ୟାବିନେଟକୁ ବିସ୍ତାର କରିଛନ୍ତି। ଯୋଗୀ କ୍ୟାବିନେଟରେ ୭ ଜଣ ନୂତନ ମନ୍ତ୍ରୀ ସ୍ଥାନ ପାଇଛନ୍ତି। କଂଗ୍ରେସ ଛାଡି ବିଜେପିରେ ଯୋଗ ଦେଇଥିବା ଜିତିନ ପ୍ରସାଦଙ୍କୁ ମଧ୍ୟ ମନ୍ତ୍ରୀ କରାଯାଇଛି। ପଲ୍ଟୁ ରାମ, ଛତ୍ରପାଲ ଗଙ୍ଗୱାର, ସଂଗୀତ ବଲୱନ୍ତ ବିନ୍ଦ, ଧର୍ମବୀର ପ୍ରଜାପତି, ସଂଗୀତ କୁମାର ଗୋଣ୍ଡ ଏବଂ ଦୀନେଶ ଖଟିକଙ୍କୁ ମନ୍ତ୍ରୀ କରାଯାଇଛି। ୟୁପିର ତିନିଜଣ ମନ୍ତ୍ରୀ କରୋନାରେ ମୃତ୍ୟୁ ବରଣ କରିଥିଲେ। ସେହି ତିନୋଟି ପଦବୀ ବ୍ୟତୀତ ଅନ୍ୟାନ୍ୟ ପଦବୀ ମଧ୍ୟ ଖାଲି ରହିଥିଲା, ​​ଯାହା ଆଜି ପୂରଣ ହୋଇଛି।

କ୍ୟାବିନେଟ ବିସ୍ତାରରେ ଜାତି ସନ୍ତୁଳନ ଉପରେ ବିଜେପି ଧ୍ୟାନ ଦେଇଛି। ସୂଚନାନୁସାରେ, କ୍ୟାବିନେଟ ବିସ୍ତାରରେ ଜାତି ଏବଂ ସମ୍ପ୍ରଦାୟର ସର୍ବାଧିକ ପ୍ରତିନିଧିତ୍ୱ ନିଶ୍ଚିତ କରିବାକୁ ଉଦ୍ୟମ କରାଯାଇଛି।

ୟୁପି ବିଧାନସଭା ନିର୍ବାଚନ ପୂର୍ବରୁ ଅଧିକରୁ ଅଧିକ ପଛୁଆ ଜାତି, ବିଶେଷକରି ଅଣ ଯାଦବ ଜାତିସଂଘକୁ ଏକାଠି କରିବାକୁ ବିଜେପିର ଉଦ୍ୟମ ଭାବରେ ଏହି କ୍ୟାବିନେଟର ସମ୍ପ୍ରସାରଣ ଦେଖାଯାଉଛି। ୟୁପିରେ ଏସପି ସରକାର ଥିବା ବେଳେ, ଯାଦବମାନଙ୍କୁ ମନ୍ତ୍ରୀମଣ୍ଡଳରେ ଅଧିକ ସ୍ଥାନ ଦିଆଯାଉଥିବା କୁହାଯାଉଥିଲା।

ନୂଆଦିଲ୍ଲୀ: ଉତ୍ତରପ୍ରଦେଶରେ ବିଜେପି ଏବଂ ନିଶାଦ ପାର୍ଟି ମଧ୍ୟରେ ବୁଝାମଣା ହୋଇଛି। ଧର୍ମେନ୍ଦ୍ର ପ୍ରଧାନ ଆଜି ସଞ୍ଜୟ ନିଶାଦଙ୍କୁ ଭେଟିଛନ୍ତି। ଏହା ପରେ ଉଭୟ ଦଳ ଏକ ସାମ୍ବାଦିକ ସମ୍ମିଳନୀ କରିଛନ୍ତି। ଏହି ସମୟରେ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ୟୁପି ନିର୍ବାଚନ ପାଇଁ ବିଜେପି ଏବଂ ନିଶାଦ ପାର୍ଟିର ଏକ ଆନୁଷ୍ଠାନିକ ମେଣ୍ଟ ହୋଇଛି। ଆପ୍ନା ଦଳ ମଧ୍ୟ ବିଜେପି ସହ ମିଳିତ ଭାବେ ନିର୍ବାଚନ ଲଢିବ।

ଉତ୍ତରପ୍ରଦେଶର ଆଗାମୀ ବିଧାନସଭା ନିର୍ବାଚନ ପାଇଁ ବିଜେପି ଦାୟିତ୍ୱରେ ଥିବା ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ୨୦୨୨ ୟୁପି ବିଧାନସଭା ନିର୍ବାଚନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଉପରେ ଲୋକଙ୍କ ବିଶ୍ୱାସ ରହିଛି। ୨୦୨୨ ନିର୍ବାଚନରେ ​​ବିଜେପି ସଫଳ ହେବ।

ଧର୍ମେନ୍ଦ୍ର ପ୍ରଧାନ ଆହୁରି କହିଛନ୍ତି ଯେ, ମୋର ବିଶ୍ୱାସ ୨୦୨୨ ନିର୍ବାଚନରେ ​​ପ୍ରତ୍ୟେକ ସମାଜକୁ ସାଥିରେ ନେବା ପାଇଁ ବିଜେପି ସଫଳ ହେବ।

ନୂଆଦିଲ୍ଲୀ: ୟୁପିରେ ହେବାକୁ ଥିବା ବିଧାନସଭା ନିର୍ବାଚନକୁ ନେଇ ରାଜନୈତିକ ବାତାବରଣ ଗରମ ହୋଇଛି। ନେତାଙ୍କ ମଧ୍ୟରେ ଆରୋପ ପ୍ରତ୍ୟାରୋପ ମଧ୍ୟ ଆରମ୍ଭ ହୋଇଯାଇଛି। ଏହି ସମୟରେ, ‘ଅବା ଜାନ’ ଶବ୍ଦ ପରେ ବର୍ତ୍ତମାନ ‘ଚାଚା ଜାନ’ ଆଲୋଚନା ହେଉଛି। ଭାରତ କିଷାନ ୟୁନିଅନ ମୁଖପାତ୍ର ରାକେଶ ଟିକାଏତ ‘ଚାଚା ଜାନ’ ଶବ୍ଦ ବ୍ୟବହାର କରିଛନ୍ତି। ବାଗପତରେ ଏକ ସଭାରେ ସମ୍ବୋଧିତ କରିବା ଅବସରରେ ଏଆଇଏମ୍ଆଇଏମ୍ ମୁଖ୍ୟ ଅସଦୁଦ୍ଦିନ ଓୱାଇସିଙ୍କୁ ବିଜେପିର ଚାଚା ବୋଲି ଟିକାଏତ କହିଥିଲେ।

ଏହି ସମୟରେ ଟିକାଏତ ବିଜେପି ଉପରେ ଜବରଦସ୍ତ ଆକ୍ରମଣ କରିଥିଲେ। “ବିଜେପିର ଚାଚା ଜାନ ଅସଦୁଦ୍ଦିନ ଓୱାଇସି ୟୁପି ଆସିଛନ୍ତି। ଓୱାଇସି ବିଜେପିକୁ ଦୁର୍ବ୍ୟବହାର କଲେ ମଧ୍ୟ ତାଙ୍କ ବିରୋଧରେ କୌଣସି ମାମଲା ପଞ୍ଜିକୃତ ହେବ ନାହିଁ। କାରଣ ବିଜେପି ଏବଂ ଓୱାଇସି ଗୋଟିଏ ଦଳ।

ସୂଚନାଯୋଗ୍ୟ ଯେ ମୁଖ୍ୟମନ୍ତ୍ରୀ ଯୋଗୀ ପୂର୍ବରୁ ‘ଅବା ଜାନ’ ଶବ୍ଦ ବ୍ୟବହାର କରିଥିଲେ। ରବିବାର ଦିନ, କୁଶୀନଗରରେ ଏକ କାର୍ଯ୍ୟକ୍ରମକୁ ମୁଖ୍ୟମନ୍ତ୍ରୀ ଯୋଗୀ ସମ୍ବୋଧିତ କରିଥିଲେ। ଏହି ସମୟରେ ସେ ଲୋକଙ୍କୁ ପଚରାଯାଇଥିଲା କି, “କଣ ଆପଣମାନେ ରାସନ ପାଉଥିଲେ?” ୨୦୧୭ ମସିହା ପୂର୍ବରୁ ଆପଣମାନଙ୍କୁ ଏହି ରାସନ କେଉଁଠୁ ମିଳୁଥିଲା? କାରଣ ସେତେବେଳେ ‘ଅବା ଜାନ’ ନାମକ ଲୋକମାନେ ରାସନ ଖାଉଥିଲେ। କୁଶିନଗରର ରାସନ ନେପାଳ ଏବଂ ବାଂଲାଦେଶ ଯାଉଥିଲା। ଆଜି ଯଦି କେହି ଗରିବଙ୍କ ରାସନକୁ ହାତ ଲଗାଇବାକୁ ଚେଷ୍ଟା କରିବ, ତେବେ ସେ ନିଶ୍ଚିତ ଭାବରେ ଜେଲ ଯିବ।

ନୂଆଦିଲ୍ଲୀ: ଆଜି ଉତ୍ତରପ୍ରଦେଶର ମୁଜାଫରନଗରରେ କିଷାନ ମହାପଞ୍ଚାୟତ ଆୟୋଜନ କରାଯାଇଥିଲା। ବହୁ ସଂଖ୍ୟାରେ କୃଷକ ଏହି ମହାପଞ୍ଚାୟତରେ ପହଞ୍ଚିଥିଲେ। ବହୁ ସଂଖ୍ୟାରେ ଏକାଠି ହୋଇଥିବା କୃଷକମାନେ ଏହି ତିନୋଟି କୃଷି ଆଇନ ରଦ୍ଦ କରିବାକୁ ଦାବି କରିଥିଲେ। ଏହି ଅବସରରେ ଭାରତୀୟ କିଷାନ ୟୁନିଅନର ନେତା ରାକେଶ ଟିକାଏତ ବିଜେପିକୁ କଡ଼ା ଟାର୍ଗେଟ କରିଥିଲେ।

ମୁଜାଫରନଗରରେ ଆୟୋଜିତ କିଷାନ ମହାପଞ୍ଚାୟତରେ ପ୍ରଧାନମନ୍ତ୍ରୀ ମୋଦୀ ଏବଂ ଗୃହମନ୍ତ୍ରୀ ଅମିତ ଶାହାଙ୍କୁ ଟାର୍ଗେଟ କରି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ୟୁପିର ଜଣେ ବାହାର ଲୋକ ବୋଲି ରାକେଶ ଟିକାଏତ କହିଛନ୍ତି। ସେ କହିଛନ୍ତି ଯେ, ୟୁପି ଆସିଥିବା ତିନି ନେତାଙ୍କ ଗୁଜୁରାଟ ଏବଂ ଉତ୍ତରାଖଣ୍ଡ ସହ ଲିଙ୍କ ରହିଛି। ଏଥି ସହ କିଷାନ ମହାପଞ୍ଚାୟତର କୃଷକ ମଞ୍ଚରୁ ବିଜେପି ବିରୋଧରେ ସ୍ଲୋଗାନ ମଧ୍ୟ ଉଠିଥିଲା।

କିଷାନ ମହାପଞ୍ଚାୟତରେ ରାକେଶ ଟିକାଏତ କହିଛନ୍ତି ଯେ, ଆମେ ସଂକଲ୍ପ ନେଇଛୁ କି ଆମେ ଧାରଣାସ୍ଥଳ ଛାଡ଼ିବୁ ନାହିଁ, ଯଦିବା ଆମ ପାଇଁ କବର ସ୍ଥାନ ସେଠାରୁ ନିର୍ମାଣ ହେଉ। ଆବଶ୍ୟକ ହେଲେ ଆମେ ଆମର ଜୀବନ ଦେବୁ, କିନ୍ତୁ ଆମେ ଜିତିବା ପର୍ଯ୍ୟନ୍ତ ଆମେ ଧାରଣାସ୍ଥଳ ଛାଡିବୁ ନାହିଁ।

ରାକେଶ ଟିକାଏତ କହିଛନ୍ତି ଯେ, ଯେତେବେଳେ ଭାରତ ସରକାର ଆମକୁ ଆଲୋଚନା ପାଇଁ ଆମନ୍ତ୍ରଣ କରନ୍ତି, ଆମେ ଯିବା। ସରକାର ଆମର ଦାବି ପୂରଣ ନକରିବା ପର୍ଯ୍ୟନ୍ତ ଚାଷୀଙ୍କ ଆନ୍ଦୋଳନ ଜାରି ରହିବ। ସ୍ୱାଧୀନତା ସଂଗ୍ରାମ ୯୦ ବର୍ଷ ଧରି ଚାଲିଥିଲା, ତେଣୁ ମୁଁ ଜାଣେ ନାହିଁ ଏହି ଆନ୍ଦୋଳନ କେତେ ଦିନ ଚାଲିବ।

ନୂଆଦିଲ୍ଲୀ: କଂଗ୍ରେସର ବରିଷ୍ଠ ନେତା ସଲମାନ ଖୁରସିଦ ମେରଠରେ ପହଞ୍ଚି ନିର୍ବାଚନୀ ଇସ୍ତାହାରରେ ଲୋକଙ୍କ ମତ ଜାଣିଥିଲେ। ଏହି ସମୟରେ ସେ ବିଜେପି ସରକାରଙ୍କୁ କଡ଼ା ଟାର୍ଗେଟ କରିଥିଲେ। ସେ କହିଥିଲେ ଯେ, ମାତା ଗଙ୍ଗା ପାଣିରେ ମୃତ ଦେହ ଭାଷିବା ଏକ ଦୁଃଖଦ ଘଟଣା। ଗଙ୍ଗାରେ ମୃତଦେହ ମିଳିଥିଲା ​​କିନ୍ତୁ କିଛି ଲୋକ ଏହାକୁ ଗ୍ରହଣ କରିବାକୁ ପ୍ରସ୍ତୁତ ନୁହଁନ୍ତି। ଗଙ୍ଗାରେ ଭାସୁଥିବା ମୃତଦେହ ବିଷୟରେ କେହି କୌଣସି ପ୍ରସଙ୍ଗ କରିନାହାଁନ୍ତି। ଯଦି ଏହାକୁ ଦେଖିବା ପରେ କାହାର ମନରେ କ୍ରୋଧ କିମ୍ବା ଦୁଃଖ ଆସେନାହିଁ, ଯଦି କାହାର ମନ ତାହା ଦେଖିବା ପରେ ବିଚଳିତ ହୁଏ ନାହିଁ, ତେବେ ଏହା ଏକ ବହୁତ ବଡ ପ୍ରସଙ୍ଗ।

ଖୁରସିଦ ଏହା ମଧ୍ୟ କହିଛନ୍ତି ଯେ ଲୋକଙ୍କୁ କୌଣସି ବିଷୟରେ ଭାବପ୍ରବଣ କରିବା ରାଜନୈତିକ ଦଳର କାମ ନୁହେଁ। ବରଂ ଲୋକଙ୍କ ପାଇଁ ସଠିକ୍ ରାସ୍ତା ଦେଖାଇବା ଏବଂ ଆତ୍ମବିଶ୍ୱାସ ସୃଷ୍ଟି କରିବା ମଧ୍ୟ ରାଜନୈତିକ ଦଳର କର୍ତ୍ତବ୍ୟ। ତେଣୁ ଆମେ ଏହା କରି ଦେଖାଇବାକୁ ପ୍ରସ୍ତୁତ ଅଛୁ।

ଉତ୍ତରପ୍ରଦେଶରେ ଥିବା ଆଗାମୀ ବିଧାନସଭା ନିର୍ବାଚନରେ କଂଗ୍ରେସ ପକ୍ଷରୁ କିଏ ମୁଖ୍ୟମନ୍ତ୍ରୀ ପ୍ରାର୍ଥୀ ହେବ, ପ୍ରଶ୍ନରେ ଉତ୍ତର ରାଖୀ ଖୁରସିଦ କହିଛନ୍ତି ଯେ, ପ୍ରିୟଙ୍କା ଗାନ୍ଧୀ ଏହାର ନିଷ୍ପତ୍ତି ନେବେ। ଯାହା ଶୀଘ୍ର ସମସ୍ତଙ୍କ ସାମ୍ନାରେ ରହିବ। ସେ କହିଛନ୍ତି ଯେ, କଂଗ୍ରେସ ୨୦୨୨ ନିର୍ବାଚନକୁ ସମ୍ପୂର୍ଣ୍ଣ ଶକ୍ତିର ସହିତ ଲଢେଇ କରିବ।

କଂଗ୍ରେସ ଲୋକଙ୍କ ସମସ୍ୟାକୁ ଘୋଷଣା ପତ୍ର କମିଟି ସମ୍ମୁଖରେ ଆଣିଛି। ଏଥିରେ ବେକାରୀ ସମସ୍ୟା ବିଷୟରେ କୁହାଯାଇଛି। କଂଗ୍ରେସ ଏହାର ଘୋଷଣା ପତ୍ରକୁ ଏପରି ଭାବରେ ପ୍ରସ୍ତୁତ କରିବ ଯେ, ଏହା ପ୍ରତ୍ୟେକ ଶ୍ରେଣୀ ଏବଂ ଲୋକଙ୍କ ସହ ଜଡିତ ହେବ। ବିଧାନସଭା ନିର୍ବାଚନରେ ​​କଂଗ୍ରେସ ଏକ ମେଣ୍ଟ ଗଠନ କରିବ କି ନାହିଁ ପ୍ରଶ୍ନରେ ଖୁରସିଦ କହିଛନ୍ତି ଯେ, ଏହି ବିଷୟରେ ଏବେ କିଛି କହିପାରିବେ ନାହିଁ। ବର୍ତ୍ତମାନ ଆମେ ପ୍ରତ୍ୟେକ ସ୍ଥାନକୁ ଯାଇ ଲୋକଙ୍କୁ ଭେଟି ଏକ ଘୋଷଣା ପତ୍ର ପ୍ରସ୍ତୁତ କରୁଛୁ।

ଖୁରସିଦ କହିଛନ୍ତି ଯେ, ସରକାର ଆଫଗାନିସ୍ତାନ ଏବଂ ତାଲିବାନର ସତ୍ୟତାକୁ ଲୁଚାଉଛନ୍ତି। ଯଦି ସରକାର ଆଫଗାନିସ୍ତାନ ପ୍ରସଙ୍ଗରେ କଂଗ୍ରେସ ସହିତ କଥାବାର୍ତ୍ତା କରନ୍ତି, ତେବେ ଆମେ ନିଶ୍ଚିତ ଭାବେ ଆମର ମତାମତ ଦେବୁ। ଏଥି ସହ ଦଳର ସଭାପତିଙ୍କ ପ୍ରଶ୍ନରେ ସେ ରାହୁଲ ଗାନ୍ଧୀଙ୍କୁ ତାଙ୍କ ନେତା ବୋଲି କହିଛନ୍ତି। ସଲମାନ ଖୁରସିଦ କହିଛନ୍ତି ଯେ, ସୋନିଆ ଗାନ୍ଧୀଙ୍କ ନିର୍ଦ୍ଦେଶରେ ଦଳ ଆଗକୁ ବଢୁଛି ଏବଂ ଆଗକୁ ମଧ୍ୟ ବଢିବ।

ନୂଆଦିଲ୍ଲୀ: ଉତ୍ତରଭାରତର ଉତ୍ତରପ୍ରଦେଶ, ରାଜସ୍ଥାନ ସମେତ କେତୋଟି ରାଜ୍ୟରେ ଗତକାଲି ବଜ୍ରପାତ ଯୋଗୁଁ ଅନେକ ଲୋକଙ୍କ ଜୀବନ ଚାଲିଯାଇଛି। ଉତ୍ତରପ୍ରଦେଶର ଭିନ୍ନ ଭିନ୍ନ ସ୍ଥାନରେ ବଜ୍ରପାତ ଯୋଗୁଁ ୪୦ ଲୋକଙ୍କ ମୃତ୍ୟୁ ହୋଇଯାଇଛି। କାନପୁର ଏବଂ ଏହାର ଆଖପାଖ ଜିଲ୍ଲାରେ ବଜ୍ରପାତ ଯୋଗୁଁ ୧୮ ଜଣ ଙ୍କ ଜୀବନ ଚାଲିଯାଇଥିବା ବେଳେ ପ୍ରୟାଗରାଜରେ ୧୪ ଜଣ, କୌଶାମ୍ବୀରେ ୪ ଜଣ, ଆଗ୍ରାରେ ୩ ଜଣ, ଉନ୍ନାବରେ ୨ ଜଣଙ୍କ ମୃତ୍ୟୁ ହୋଇଛି।

ସେହିଭଳି ପ୍ରତାପଗଡ଼, ବାରଣାସୀ ଏବଂ ରାୟବରେଲୀରେ ଜଣେ ଲେଖାଏଁ ଲୋକଙ୍କ ବଜ୍ରପାତ ଯୋଗୁଁ ପ୍ରାଣହାନୀ ଘଟିଛି। ଅନେକ ସ୍ଥାନରେ ଏହି ବଜ୍ରପାତ ଯୋଗୁଁ ପଶୁମାନଙ୍କ ମଧ୍ୟ ଜୀବନ ଚାଲିଯାଇଛି। ଏହି ଘଟଣାରେ ମୃତକଙ୍କ ପରିବାରକୁ କ୍ଷତିପୂରଣ ବାବଦକୁ ଯୋଗୀ ସରକାର ୪-୪ ଲକ୍ଷ ଟଙ୍କା ଅନୁକମ୍ପା ରାଶି ପ୍ରଦାନ କରିବେ ବୋଲି ଘୋଷଣା କରିଛନ୍ତି।

ଅପରପକ୍ଷେ ରାଜସ୍ଥାନର ଆମେର କିଲ୍ଲା ନିକଟସ୍ଥ ଏକ ଟାୱାରରେ ଚଢି ସେଲ୍ଫି ଫଟୋ ନେଉଥିବା ବେଳେ ୮ ଜଣ ଲୋକଙ୍କ ଘଟଣା ସ୍ଥଳରେ ମୃତ୍ୟୁ ହୋଇଛି।

ଲକ୍ଷ୍ନୌ: ସମାଜବାଦୀ ପାର୍ଟି ସଭାପତି ତଥା ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଲେଶ ଯାଦବ ରାଜ୍ୟର ଅଧିକାରୀମାନଙ୍କୁ ଚେତାବନୀ ଦେଇଛନ୍ତି। ବିଧାନସଭା ନିର୍ବାଚନ ପରେ ତାଙ୍କ ଦଳ ସରକାର ଗଠନ କରିବା ପରେ କୋଭିଡ-୧୯ ରିପୋର୍ଟର ତଦନ୍ତ କରିବ ବୋଲି ଅଖିଲେଶ କହିଛନ୍ତି। ତଦନ୍ତ ପରେ କରୋନା ସମ୍ବଧୀୟ ତଥ୍ୟ ଲୁଚାଉଥିବା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ସେ ଚେତାବନୀ ଦେଇଛନ୍ତି।

ଏକ ସାମ୍ବାଦିକ ସମ୍ମିଳନୀରେ ଅଖିଲେଶ କହିଛନ୍ତି ଯେ, ତଥ୍ୟ ଲୁଚାଇବା ଦ୍ଵାରା ସଂକ୍ରମଣ ବୃଦ୍ଧି ପାଇଛି। ଯାହା ଫଳରେ ଅନେକ ଲୋକଙ୍କ ଜୀବନ ଚାଲିଯାଇଛି। କିନ୍ତୁ ରାଜ୍ୟରେ ସଠିକ ଭାବେ କେତେ ଲୋକ କରୋନାରେ ମୃତ୍ୟୁ ହୋଇଛି, ତାହା ସରକାର ଲୁଚାଇବାକୁ ଚେଷ୍ଟା କରୁଛି। ତେଣୁ ମୃତକଙ୍କ ସମ୍ପର୍କୀୟମାନଙ୍କୁ କ୍ଷତିପୂରଣ ଦେବା ପାଇଁ ଯୋଗୀ ସରକାର ଚାହୁଁ ନହିଁ ବୋଲି ଅଖିଲେଶ ଅଭିଯୋଗ କରିଛନ୍ତି।

ନୂଆଦିଲ୍ଲୀ: ଆସନ୍ତାକାଲି ହେଉଛି ଅନ୍ତରାଷ୍ଟ୍ରୀୟ ଜନସଂଖ୍ୟା ଦିବସ। ଏହି ଉପଲକ୍ଷେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟାନାଥ ଏକ ବଡ ଘୋଷଣା କରିପାରନ୍ତି। ଉତ୍ତରପ୍ରଦେଶରେ “ଟୁ ଚାଇଲ୍ଡ ପଲିସି” ର ଘୋଷଣା କରିପାରନ୍ତି। ତେଣୁ ଏଥିପାଇଁ ଉତ୍ତରପ୍ରଦେଶ ରାଜ୍ୟ ଆଇନ ଆୟୋଗ ଦ୍ଵାରା ପ୍ରସ୍ତାବିତ ଜନସଂଖ୍ୟା ନିୟନ୍ତ୍ରଣ ବିଧେୟକର ପ୍ରଥମ ଡ୍ରାଫ୍ଟ ଜାରି କରିଛନ୍ତି। ଏଥିରେ ଦୁଇରୁ ଅଧିକ ସନ୍ତାନ ରଖିଥିବା ବ୍ୟକ୍ତିଙ୍କୁ ସରକାରୀ ଚାକିରୀ ଏବଂ ସରକାରୀ ଯୋଜନାରୁ ବଞ୍ଚିତ ରଖିବାକୁ ନିର୍ଦ୍ଦେଶ ହୋଇଛି।

ଏହାସହିତ ସ୍ଥାନୀୟ ନିର୍ବାଚନ ଲଢିବା ପାଇଁ ମଧ୍ୟ ସୁଯୋଗ ମିଳିବ ନାହିଁ। ସରକାରୀ ଚାକିରୀ ପାଇଁ ଆବେଦନ କରିବା ଉପରେ ମଧ୍ୟ କଟକଣା ଲାଗିବ। ରାସନ କାର୍ଡରେ କେବଳ ୪ ଜଣ ସଦସ୍ୟଙ୍କୁ ରାସନ ମିଳିବା ପାଇଁ ପ୍ରବଧାନ ରହିବ। ଯେଉଁମାନେ ଦୁଇରୁ ଅଧିକ ସନ୍ତାନ ରଖିଛନ୍ତି, ସେମାନଙ୍କର ପଦୋନ୍ନତି ଲାଗିବା ନେଇ ଡ୍ରାଫ୍ଟରେ ଉଲ୍ଲେଖ ଅଛି।

ଡ୍ରାଫ୍ଟ ଅନୁଯାୟୀ, ଯଦି ରାଜ୍ୟରେ ଏହି ନିୟମ ଲାଗୁ ହୁଏ, ତେବେ ଏକ ବର୍ଷ ଭିତରେ ସରକାରୀ କର୍ମଚାରୀମାନେ, ସ୍ଥାନୀୟ ନିର୍ବାଚନରେ ନିର୍ବାଚିତ ପ୍ରତିନିଧୀମାନଙ୍କୁ ଏହାର ଶପଥ ପତ୍ର ଦେବାକୁ ପଡିବ। ସେମାନେ ସମସ୍ତେ ଦୁଇରୁ ଅଧିକ ସନ୍ତାନ ନକରିବା ପାଇଁ ଶପଥ ପତ୍ର ଦେବେ। ଯଦି ଏହାର ଉଲ୍ଲଂଘନ କରନ୍ତି, ତେବେ ସରକାରୀ କର୍ମଚାରୀଙ୍କ ପଦୋନ୍ନତି ବନ୍ଦ ହୋଇପାରେ ଏବଂ ନିର୍ବାଚିତ ପ୍ରତିନିଧିମାନଙ୍କ ପାଇଁ ନିର୍ବାଚନ ରଦ୍ଦ ହୋଇପାରେ।

ଅନୁରୂପ ଭାବେ, ଯେଉଁ ବ୍ୟକ୍ତି ଏହି ନିୟମର ପାଳନ କରନ୍ତି, ସେମାନଙ୍କୁ ଅନେକ ପ୍ରକାରର ସରକାରୀ ସୁବିଧା ଉପଲବ୍ଧ ହେବା ନେଇ ଡ୍ରାଫ୍ଟରେ ଉଲ୍ଲେଖ ଅଛି। ସେମାନଙ୍କୁ ରାଷ୍ଟ୍ରୀୟ ପେନସନ ଯୋଜନା ଅନୁଯାୟୀ ଚାକିରୀ ସମୟରେ ଅତିରିକ୍ତ ଦରମା ବୃଦ୍ଧି, ଜମି କିମ୍ବା ଘର କିଣିବା ପାଇଁ ସବସିଡି ବ୍ୟବସ୍ଥା ଇତ୍ୟାଦି କରାଯିବ ବୋଲି ଡ୍ରାଫ୍ଟରେ ଉଲ୍ଲେଖ ଅଛି।

ନୂଆଦିଲ୍ଲୀ: ଉତ୍ତରପ୍ରଦେଶରେ ଆସନ୍ତା ବର୍ଷ ବିଧାନସଭା ନିର୍ବାଚନ ହେବ। ହେଲେ ସେଠାରେ ଏବେଠାରୁ ରାଜନୀତି ହଲଚଲ ଆରମ୍ଭ ହୋଇଯାଇଛି। ଏହି ପ୍ରରିପ୍ରେକ୍ଷୀରେ ବହୁଜନ ସମାଜବାଦୀ ପାର୍ଟିର ୯ ଜଣ ବିଧାୟକ ପୂର୍ବତନ ମୁଖ୍ୟମନ୍ତ୍ରୀ ତଥା ସମାଜବାଦୀ ପାର୍ଟିର ମୁଖ୍ୟ ଅଖିଳେଶ ଯାଦବଙ୍କୁ ସାକ୍ଷାତ କରିବାକୁ ଯାଇଥିବା ସୂଚନା ମିଳିଛି।

ଖବର ମୁତାବକ, ବିଏସପିର ଏହି ୯ ବିଧାୟକ ଦଳ ପ୍ରତି ଅସନ୍ତୋଷ ଥିଲେ। ତେବେ ଅଖିଳେଶଙ୍କ ସହ ଏହି ବିଧାୟଙ୍କ ସାକ୍ଷାତ ଖବର ଶୁଣି ରାଜନୈତିକ ମହଲରେ ଅନେକ କଳ୍ପନାଜଳ୍ପନା ଆରମ୍ଭ ହୋଇଯାଇଛି। ବିଏସପିର ଏହି ଅସନ୍ତୋଷ ବିଧାୟକମାନେ ହାତୀ ଛାଡି ସାଇକେଲରେ ବସିବେ ବୋଲି ଅନୁମାନ କରାଯାଉଛି। ଯଦି ଏହା ସତ ହୁଏ, ତେବେ ବିଏସପି ସୁପ୍ରିମୋ ମାୟାବତୀଙ୍କୁ ବଡ ଝଟକା ଲାଗିବ ବୋଲି କୁହାଯାଉଛି।

ନୂଆଦିଲ୍ଲୀ: ପୂର୍ବତନ କେନ୍ଦ୍ର ମନ୍ତ୍ରୀ ତଥା ରାହୁଲ ଗାନ୍ଧୀଙ୍କ ବିଶ୍ଵସ୍ତ କୁହାଯାଉଥିବା କଂଗ୍ରେସ ନେତା ଜିତିନ୍ ପ୍ରସାଦ ବିଜେପିରେ ସାମିଲ ହୋଇଛନ୍ତି। ବିଜେପି ମୁଖ୍ୟାଳୟରେ ଜିତିନ୍ ଦଳର ସଦସ୍ୟତା ଗ୍ରହଣ କରିଛନ୍ତି।

ଆସନ୍ତା ଉତ୍ତରପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ଜିତିନଙ୍କ ବିଜେପିରେ ସାମିଲ ହେବା କଂଗ୍ରେସ ପାଇଁ ବଡ ଝଟକା ବୋଲି କୁହାଯାଉଛି। କଂଗ୍ରେସରେ ୨୦ ବର୍ଷ ପର୍ଯ୍ୟନ୍ତ କାର୍ଯ୍ୟ କରିଥିବା ଜିତିନ୍ ପ୍ରସାଦଙ୍କ ଅସନ୍ତୋଷ କାହାକୁ ଅଜଣା ନଥିଲା। ଜି-୨୩ ତଥା କଂଗ୍ରେସର ପରିବର୍ତ୍ତନ ଚାହୁଁଥିବା ୨୩ ଜଣ ବରିଷ୍ଠ ନେତାଙ୍କ ମଧ୍ୟରେ ସେ ସାମିଲ ଥିଲେ। ପୂର୍ବରୁ ଏହି ଜି-୨୩ ନେତା ଦଳରେ ବ୍ୟାପକ ପରିବର୍ତ୍ତନ ପାଇଁ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଚିଠି ଲେଖିଥିଲେ। ଜିତିନଙ୍କୁ ପଶ୍ଚିମବଙ୍ଗ ନିର୍ବାଚନରେ ଦଳ ଦାୟିତ୍ଵ ଦେଇଥିଲେ ମଧ୍ୟ ସେ ସନ୍ତୋଷ ବ୍ୟକ୍ତ କରିନଥିଲେ। ଇଣ୍ଡିଆନ ସେକୁଲାର ଫ୍ରଣ୍ଟ ମେଣ୍ଟକୁ ନେଇ ସେ କଂଗ୍ରେସକୁ ସମାଲୋଚନା କରିଥିଲେ।

ନୂଆଦିଲ୍ଲୀ: ଗ୍ୟାସ ସିଲିଣ୍ଡର ବିସ୍ଫୋରଣରେ ୭ ଜଣଙ୍କ ମୃତ୍ୟୁ ହୋଇଛି। ଯେଉଁଥିରେ ୭ ଜଣ ଲୋକ ଆହତ ହୋଇଛନ୍ତି। ଉତ୍ତରପ୍ରଦେଶର ଗୋଣ୍ଡା ଜିଲ୍ଲାରେ ଏଭଳି ଏକ ଅଭାବନୀୟ ଘଟଣା ଘଟିଛି।

ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ ଗୋଣ୍ଡା ଜିଲ୍ଲାରେ ଏକ ଗ୍ୟାସ ସିଲିଣ୍ଡର ବିସ୍ଫୋରଣ ହୋଇଥିଲା। ବିସ୍ଫୋରଣଟି ଏତେ ଶକ୍ତିଶାଳୀ ଥିଲା ଯେ, ଦୁଇଟି ଘର ଧରାଶାୟୀ ହୋଇପଡିଥିଲା। ଏଥିରେ ୭ ଜଣ ଲୋକଙ୍କ ମୃତ୍ୟୁ ହୋଇଥିବା ବେଳେ ୭ ଜଣ ଆହାତ ହୋଇଛନ୍ତି। ଆହାତଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି। ହେଲେ ଆଉ ଜଣେ ବ୍ୟକ୍ତି ଭଙ୍ଗା ଘର ଭିତରେ ଫାଶୀ ରହିଥିବା ଜଣା ପଡିଛି। ନୁରୁଲ ହାସନ ନାମକ ଜଣେ ବ୍ୟକ୍ତିଙ୍କ ଘରେ ବିସ୍ଫୋରଣ ହୋଇଥିବା ଜଣାପଡିଛି।

ନୂଆଦିଲ୍ଲୀ: ଉତ୍ତରପ୍ରଦେଶରେ କରୋନା ସଂକ୍ରମଣ ଯୋଗୁଁ ଲୋକଙ୍କ ସମସ୍ୟାକୁ ନେଇ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ବାଡ୍ରା ଚିନ୍ତା ପ୍ରକଟ କରିଛନ୍ତି। ଏହି ମହାମାରୀ ସମୟରେ ଲୋକଙ୍କ ସମସ୍ୟା ବୁଝିବା ପାଇଁ ମୁଖ୍ୟମନ୍ତ୍ରୀ ଆଦିତ୍ୟନାଥଙ୍କୁ ଅନୁରୋଧ କରିଛନ୍ତି। ଘରୋଇ ହସ୍ପିଟାଲରେ ହେଉଥିବା କରୋନା ରୋଗୀଙ୍କଚିକିତ୍ସା ଖର୍ଚ୍ଚ ପ୍ରସ୍ତୁତ କରିବା, ଦର ବୃଦ୍ଧି ଉପରେ ନିୟନ୍ତ୍ରଣ କରିବା, ବିଦ୍ୟୁତ ବିଲ ଦର ବଢାଇବା ଉପରେ ରୋକ୍ ଲଗାଇବାକୁ ସେ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି।

ପ୍ରିୟଙ୍କା ଏକ ଚିଠି ମାଧ୍ୟମରେ କହିଛନ୍ତି ଯେ, କରୋନାର ଦ୍ଵିତୀୟ ଲହରୀରେ ପାଇଁ ଯୋଗୀ ସରକାର କୌଣସି ପ୍ରସ୍ତୁତ ନଥିଲେ। ଯେଉଁମାନେ ସଚ୍ଚା ଉପାୟରେ ପରିଶ୍ରମ କରି ନିଜ ପରିବାର ପ୍ରତିପୋଷଣ କରୁଥିଲେ, ଏଭଳି ମାହାମାରୀ ସମୟରେ ସେମାନଙ୍କର ସ୍ଥିତିକୁ ଦେଖି କିଛି ଜନମଙ୍ଗଳକାରୀ ପଦକ୍ଷେପ ଉଠାଇବା ଉଚିତ୍। ଯେଉଁଥିରେ ସେମାନଙ୍କୁ କିଛି ଉପଶମ ମିଳିବ।

ସେହିଭଳି କରୋନାରୁ ସୁସ୍ଥ ହେବା ପାଇଁ ଲୋକେ କରଜ କରୁଛନ୍ତି। ତେଣୁ ଘରୋଇ ହସ୍ପିଟାଲରେ ଚିକିତ୍ସା ପାଇଁ ଲୋକଙ୍କୁ ସୁହାଇଲା ଭଳି ଏକ ମୂଲ୍ୟ ନିର୍ଦ୍ଧାରଣ କରାଯାଉ। ଯାହାଙ୍କ ଠାରୁ ଆବଶ୍ୟକତା ଠାରୁ ଅଧିକ ଟଙ୍କା ନିଆଯାଉଛି, ସେମାନଙ୍କୁ ସରକାର ପକ୍ଷରୁ ଉଚିତ ସହାୟତା ରାଶି ପ୍ରଦାନ କରାଯାଉ ବୋଲି ପ୍ରିୟଙ୍କା ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି।