Categories
ଅନ୍ତରାଷ୍ଟ୍ରୀୟ ଆଜିର ଖବର ଖେଳ

ଜିମ୍ବାୱେର ଐତିହାସିକ ବିଜୟ, ବିଦେଶରେ ପ୍ରଥମ ଥର ପାଇଁ ଅଷ୍ଟ୍ରେଲିଆକୁ ପରାସ୍ତ କଲା ଭ୍ରମଣକାରୀ ଦଳ

ନୂଆଦିଲ୍ଲୀ: ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜର ଶେଷ ମ୍ୟାଚରେ ଅଷ୍ଟ୍ରେଲିଆ ବିପକ୍ଷରେ ଜିମ୍ବାୱେ ଏକ ଐତିହାସିକ ବିଜୟ ପଞ୍ଜିକରଣ କରିଛି। ଜିମ୍ବାୱେ ଟାଉନ୍ସଭିଲର ରିଭରୱେ ଷ୍ଟାଡିୟମରେ ଅଷ୍ଟ୍ରେଲିଆକୁ ୩ ୱିକେଟରେ ପରାସ୍ତ କରିଛି। ଜିମ୍ବାୱେ ପ୍ରଥମ ଥର ପାଇଁ ଅଷ୍ଟ୍ରେଲିଆକୁ ନିଜ ମାଟିରେ ପରାସ୍ତ କରିଛି। ଏଠାରେ ପ୍ରଥମେ ବ୍ୟାଟିଂ କରି ଅଷ୍ଟ୍ରେଲିଆ ମାତ୍ର ୧୪୧ ରନ୍ ସଂଗ୍ରହ କରିଥିଲା। ଜବାବରେ ଜିମ୍ବାୱେ ୩୯ ଓଭରରେ ୭ ୱିକେଟ୍ ହରାଇ ଲକ୍ଷ୍ୟ ହାସଲ କରିଥିଲା।

ଅଷ୍ଟ୍ରେଲିଆର ଏହି ଗ୍ରାଉଣ୍ଡରେ ଜିମ୍ବାୱେ ଅଧିନାୟକ ରେଗିସ୍ ଚକାବାୱା ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ରେଗିସ୍ ଙ୍କ ଏହି ନିଷ୍ପତ୍ତି ତାଙ୍କ ବୋଲରଙ୍କ ଦ୍ଵାରା ଠିକ୍ ପ୍ରମାଣିତ ହୋଇଥିଲା ଏବଂ ଆରମ୍ଭରୁ ଅଷ୍ଟ୍ରେଲିଆର ୱିକେଟ୍ ପତନ ଘଟିଥିଲା। ଅଷ୍ଟ୍ରେଲିଆ ୯ ରନରେ ପ୍ରଥମ ୱିକେଟ୍ ହରାଇଥିଲା। ଏହା ପରେ ଗୋଟିଏ ପରେ ଗୋଟିଏ ୱିକେଟ୍ ପତନ ହୋଇଥିଲା ଏବଂ ୭୨ ରନ୍ ବେଳକୁ ଅଷ୍ଟ୍ରେଲିଆ ୫ ୱିକେଟ୍ ହରାଇଥିଲା। ଏଠାରେ ଡେଭିଡ ୱାର୍ଣ୍ଣର ଗୋଟିଏ ମୁଣ୍ଡରେ ଜମି ରହିଥିଲେ। କିନ୍ତୁ ଅନ୍ୟ ପ୍ରାନ୍ତରୁ ତାଙ୍କୁ କୌଣସି ସମର୍ଥନ ମିଳିଲା ନାହିଁ। ସମଗ୍ର ଅଷ୍ଟ୍ରେଲିୟ ଦଳର କେବଳ ଦୁଇଜଣ ଖେଳାଳି ଡବଲ୍ସ ମାର୍କ ଛୁଇଁ ପାରିଥିଲେ।

ଡେଭିଡ ୱାର୍ନର ୯୬ ବଲରୁ ୯୪ ରନ ସଂଗ୍ରହ କରିଥିବାବେଳେ ଗ୍ଲେନ ମ୍ୟାକ୍ସୱେଲ ୨୨ ବଲରୁ ୧୯ ରନ ସ୍କୋର କରିଥିଲେ। ଅବଶିଷ୍ଟ ୮ ବ୍ୟାଟ୍ସମ୍ୟାନ୍ ୦ ରୁ ୫ ମଧ୍ୟରେ ପ୍ୟାଭିଲିୟନକୁ ଫେରିଥିଲେ। ଏହିପରି ୩୧ ଓଭରରେ ୧୪୧ ରନ୍ ସ୍କୋର କରିବା ପରେ ସମଗ୍ର କଙ୍ଗାରୁ ଦଳ ଆଉଟ୍ ହୋଇଥିଲେ। ଜିମ୍ବାୱେ ପାଇଁ ୩ ଓଭରରେ ୧୦ ରନ୍ ଦେଇ ରିଆନ୍ ବର୍ଲ ୫ ୱିକେଟ୍ ନେଇଥିଲେ।

ଜିମ୍ବାୱେ ୧୪୨ ରନ୍ କୁ ପିଛା କରି ବ୍ୟାଟିଂ ଆରମ୍ଭ କରିଥିଲା। ପ୍ରଥମ ୱିକେଟ୍ ପାଇଁ ଓପନିଂ ଯୋଡି ୩୮ ରନ୍ ଯୋଡିଥିଲେ। ତେବେ ପ୍ରଥମ ୱିକେଟ୍ ଖସିଯିବା ମାତ୍ରେ ଗୋଟିଏ ପରେ ଗୋଟିଏ ୱିକେଟ ଖସି ଯାଇଥିଲା ଏବଂ ଗୋଟିଏ ସମୟରେ ଜିମ୍ବାୱେ ମଧ୍ୟ ୭୭ ରନରେ ୫ ୱିକେଟ୍ ହରାଇଥିଲା। ଏଠାରୁ ଅଧିନାୟକ ରେଗିସ୍ ଚକାବାୱା (୩୭) ଅଧିନାୟକ ଇନିଂସ ଖେଳି ଜିମ୍ବାୱେକୁ ପରବର୍ତ୍ତୀ ଦୁଇଟି ୱିକେଟ୍ ପାଇଁ ଛୋଟ ଭାଗିଦାରୀ କରି ଏକ ଐତିହାସିକ ବିଜୟ ପ୍ରଦାନ କରିଥିଲେ। ଜିମ୍ବାୱେ ୩୯ ଓଭରରେ ୭ ୱିକେଟ୍ ହରାଇ ଲକ୍ଷ୍ୟ ହାସଲ କରିଥିଲା। ରିଆନ୍ ବର୍ଲଙ୍କୁ ‘ପ୍ଲେୟାର ଅଫ୍ ଦି ମ୍ୟାଚ୍’ ଭାବରେ ସମ୍ମାନିତ କରାଯାଇଥିଲା।

Categories
ଖେଳ ବିଶେଷ ଖବର

‘ଏହା ଭାରତର ଶ୍ରେଷ୍ଠତମ କ୍ରୀଡ଼ା ବିଜୟ’: ଥୋମାସ କପ୍‌ ୨୦୨୨ ବିଜେତାମାନଙ୍କୁ କହିଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ଥୋମାସ କପରେ ଆଜି ଐତିହାସିକ ବିଜୟ ହାସଲ କରିଥିବା ଭାରତୀୟ ବ୍ୟାଡମିଣ୍ଟନ ଦଳ ସହିତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଫୋନ ଯୋଗେ କଥା ହୋଇଛନ୍ତି।

ପ୍ରଧାନମନ୍ତ୍ରୀ ବିଜେତା ଦଳକୁ ଅଭିନନ୍ଦନ ଜଣାଇବା ସହିତ କହିଥିଲେ ଯେ, ଏହି ସଫଳତାକୁ କ୍ରୀଡ଼ା ବିଶ୍ଳେଷକମାନେ ଭାରତର ଶ୍ରେଷ୍ଠତମ କ୍ରୀଡ଼ା ବିଜୟ ଭାବେ ବିବେଚନା କରିବେ। ଭାରତୀୟ ଦଳ କୌଣସି ରାଉଣ୍ଡରେ ପରାଜିତ ହୋଇନଥିବାରୁ ସେ ବିଶେଷ ଭାବେ ଆନନ୍ଦିତ ଥିବା ପ୍ରଧାନମନ୍ତ୍ରୀ କହିଥିଲେ।

କେଉଁ ପର୍ଯ୍ୟାୟରେ ସେମାନେ ଜିତିବାକୁ ଯାଉଥିବା ଅନୁଭବ କଲେ ବୋଲି ଖେଳାଳୀମାନଙ୍କୁ ପ୍ରଧାନମନ୍ତ୍ରୀ  ପ୍ରଶ୍ନ କରିଥିଲେ। କିଦାମ୍ବୀ  ଶ୍ରୀକାନ୍ତ ଏ ସମ୍ପର୍କରେ ତାଙ୍କୁ ସୂଚନା ଦେଇ କହିଥିଲେ ଯେ କ୍ବାର୍ଟର ଫାଇନାଲ ପରେ, ଟୁର୍ଣ୍ଣାମେଣ୍ଟ ଶେଷ ପର୍ଯ୍ୟନ୍ତ ଦଳର ମନୋବଳ ଅଧିକ ସୁଦୃଢ଼ ହୋଇଥିଲା। ପ୍ରଧାନମନ୍ତ୍ରୀଙ୍କୁ ସେ କହିଥିଲେ ଯେ ଦଳଗତ ଭାବନା ବିଶେଷ ସହାୟକ ହୋଇଥିଲା ଏବଂ ଦଳର ସବୁ ସଦସ୍ୟ ଶତପ୍ରତିଶତ ପ୍ରଦର୍ଶନ କରିବାରେ ସକ୍ଷମ ହୋଇପାରିଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ କୋଚ୍‌ମାନେ ସବୁ ଶ୍ରେୟ ପାଇବାର ହକ୍‌ଦାର।

ଲକ୍ଷ୍ୟ ସେନଙ୍କୁ ପ୍ରଧାନମନ୍ତ୍ରୀ କହିଥିଲେ ଯେ, ତାଙ୍କୁ ଏବେ ଆଲମୋଡ଼ାର ‘ବାଲ ମିଠାଇ’ ଦେବାକୁ ପଡ଼ିବ। ଏହି ଅଗ୍ରଣୀ ବ୍ୟାଡମିଣ୍ଟନ ତାରକା ଦେବଭୂମି ଉତ୍ତରାଖଣ୍ଡର ପ୍ରତିନିଧିତ୍ବ କରିଥାନ୍ତି। ପ୍ରଧାନମନ୍ତ୍ରୀ କହିଥିଲେ ଯେ ଲକ୍ଷ୍ୟ ହେଉଛନ୍ତି ତୃତୀୟ ପିଢ଼ିର ଖେଳାଳୀ । ଲକ୍ଷ୍ୟ ସେନ୍‌ ପ୍ରଧାନମନ୍ତ୍ରୀଙ୍କୁ ସୂଚନା ଦେଇ କହିଥିଲେ ଯେ, ଟୁର୍ଣ୍ଣାମେଣ୍ଟ ସମୟରେ ତାଙ୍କ ବାପା ଉପସ୍ଥିତ ଥିଲେ। ସେ ମଧ୍ୟ ଶ୍ରୀକାନ୍ତଙ୍କ ଯୋଗଦାନକୁ ପ୍ରଶଂସା କରିଥିଲେ ଏବଂ କହିଥିଲେ ଯେ କ୍ବାର୍ଟର ଫାଇନାଲ୍ସ ପରେ, ବିଜୟ ପ୍ରତି ବିଶ୍ବାସ ଆହୁରି ସୁଦୃଢ଼ ହୋଇଥିଲା। ଏଚଏସ ପ୍ରଣୟ ମଧ୍ୟ କହିଥିଲେ ଯେ କ୍ବାର୍ଟର ଫାଇନାଲ ଜିତିବା ଅତ୍ୟନ୍ତ ଗୁରୁତ୍ବପୂର୍ଣ୍ଣ ଥିଲା। ସେହି ମୁକାବିଲା ଜିତିବା ପରେ ଭାରତୀୟ ଦଳ ଯେକୌଣସି ଦଳ ସହ ଦୃଢ଼ ଭାବେ ପ୍ରତିଦ୍ବନ୍ଦ୍ବିତା କରିବା ଲାଗି ମଜବୁତ ସ୍ଥିତିକୁ ଚାଲି ଆସିଥିଲା। ଦଳଗତ ସମର୍ଥନ କାରଣରୁ ମାଲେସିଆ ଭଳି ଦଳକୁ ହରାଇବାରେ ସହାୟତା ମିଳି ପାରିଥିଲା ବୋଲି ସେ କହିଥିଲେ। ସାତ୍ତ୍ବିକ ସାଇରାଜ ରାଙ୍କି ରେଡ୍ଡୀ ଓ ଚିରାଗ ସେଟ୍ଟୀଙ୍କୁ ମଧ୍ୟ ବିଜୟ ପାଇଁ ପ୍ରଧାନମନ୍ତ୍ରୀ ଅଭିନନ୍ଦନ ଜଣାଇଥିଲେ। ଚିରାଗ ସେଟ୍ଟୀଙ୍କ ସହିତ ପ୍ରଧାନମନ୍ତ୍ରୀ ମରାଠୀ ଭାଷାରେ କଥା ହୋଇଥିଲେ । ଚିରାଗ ଏହି ଅବସରରେ କହିଥିଲେ ଯେ ଭାରତ ପକ୍ଷରୁ ଖେଳି ବିଶ୍ବ ଚାମ୍ପିଅନ ହେବା ଠାରୁ ବଡ଼ ସଫଳତା ଆଉ କିଛି ନାହିଁ। ପ୍ରଧାନମନ୍ତ୍ରୀ କହିଥିଲେ ଯେ, ‘‘ଆପଣମାନେ ଏକ ସ୍ମରଣୀୟ ସଫଳତା ହାସଲ କରିଛନ୍ତି। ଏଥିପାଇଁ ଦଳର ସବୁ ସଦସ୍ୟ ପ୍ରଶଂସାର ପାତ୍ର।’’ ଭାରତକୁ ଫେରିବା ପରେ ସେମାନଙ୍କର ଅଭିଜ୍ଞତା ବିଷୟରେ ଜାଣିବା ଓ ସେମାନଙ୍କ ସହିତ କଥା ହେବା ଲାଗି ପ୍ରଧାନମନ୍ତ୍ରୀ ଆଗ୍ରହ ପ୍ରକାଶ କରିବା ସହିତ କୋଚ୍‌ଙ୍କ ସମେତ ଦଳର ସବୁ ସଦସ୍ୟମାନଙ୍କୁ ପ୍ରଧାନମନ୍ତ୍ରୀଙ୍କ ଆବାସକୁ ଆସିବା ଲାଗି ନିମନ୍ତ୍ରଣ କରିଥିଲେ।

ପ୍ରତିଭାବାନ କ୍ରୀଡ଼ାବିତ୍‌ ଏବଂ ବ୍ୟାଡ଼ମିଣ୍ଟନ, ଟେବୁଲ ଟେନିସ ଓ ସନ୍ତରଣ ଭଳି କ୍ରୀଡ଼ାକୁ ଗ୍ରହଣ କରିବାକୁ ଚାହୁଁଥିବା ଛୋଟ ଛୋଟ ପିଲାଙ୍କୁ ବାର୍ତ୍ତା ଦେବା ଲାଗି ପ୍ରଧାନମନ୍ତ୍ରୀ ବିଜେତା ଦଳକୁ ପରାମର୍ଶ ଦେଇଥିଲେ। ଶ୍ରୀକାନ୍ତ ଦଳ ପାଇଁ କଥା ହୋଇଥିଲେ ଏବଂ କହିଥିଲେ ଯେ, ଆଜି ଭାରତରେ କ୍ରୀଡ଼ା ପାଇଁ ଭାରତରେ ଏବେ କ୍ରୀଡ଼ା ପ୍ରତି ଚମତ୍କାର ସମର୍ଥନ ରହିଛି। ଭାରତୀୟ କ୍ରୀଡ଼ା ପ୍ରାଧିକରଣ, ଭାରତ ସରକାର, କ୍ରୀଡ଼ା ସଂଘମାନଙ୍କ ପ୍ରୟାସ ଏବଂ ଶୀର୍ଷ ସ୍ତରରେ ଟାର୍ଗେଟ ଅଲିମ୍ପିକ୍ସ ପୋଡ଼ିୟମ ଯୋଜନା (ଟିଓପିଏସ) ଦ୍ବାରା କ୍ରୀଡ଼ାବିତମାନେ ଅଧିକ ସମର୍ଥନ ପାଉଥିବାରୁ ସେମାନଙ୍କର ମନୋବଳ ବୃଦ୍ଧି ପାଉଛି। ଏପରି ଜାରି ରହିଲେ, ଆମେ ଭାବୁଛୁ, ଭାରତରେ ଆହୁରି ଅନେକ ଚାମ୍ପିଅନ ସୃଷ୍ଟି ହେବେ। କ୍ରୀଡ଼ାକୁ ନିଜ ଇଚ୍ଛାରେ ଗ୍ରହଣ କରିବା ଲାଗି ଚାହୁଁଥିବା ଯୁବ ପ୍ରତିଭାମାନଙ୍କୁ ସେ ପରାମର୍ଶ ଦେଇଥିଲେ ଯେ, ଯଦି ସେମାନେ ଶତପ୍ରତିଶତ ସମର୍ପଣ ଦେବାକୁ ଚାହୁଁଛନ୍ତି ତା’ହେଲେ କ୍ରୀଡ଼ା କ୍ଷେତ୍ରରେ ସେମାନଙ୍କ ପାଇଁ ଯଥେଷ୍ଟ ସମର୍ଥନ ରହିଛି। ଯଦି ସେମାନେ ସଂକଳ୍ପବଦ୍ଧ ଅଛନ୍ତି, ସେମାନଙ୍କ ପାଇଁ ଭଲ ପ୍ରଶିକ୍ଷକ ଓ ଭିତ୍ତିଭୂମି ରହିଛି, ଯାହାର ସହାୟତାରେ ସେମାନେ ଅନ୍ତର୍ଜାତୀୟ ସ୍ତରରେ ଭଲ କରିପାରିବେ। ଶତପ୍ରତିଶତ ସମର୍ପଣର ସହ କାର୍ଯ୍ୟ କରିପାରିଲେ, ସେମାନେ ନିଶ୍ଚିତ ଭାବେ ସଫଳ ହେବେ ବୋଲି ଶ୍ରୀକାନ୍ତ କହିଥିଲେ।

କ୍ରୀଡ଼ା କ୍ଷେତ୍ରରେ ଯିବା ପାଇଁ ପିଲାମାନଙ୍କୁ ଉତ୍ସାହିତ କରିବା ଓ ଶେଷ ପର୍ଯ୍ୟନ୍ତ ସେମାନଙ୍କ ସହ ରହିବା ଏକ ଆହ୍ବାନପୂର୍ଣ୍ଣ କାର୍ଯ୍ୟ ହୋଇଥିବାରୁ ପ୍ରଧାନମନ୍ତ୍ରୀ ଖେଳାଳୀଙ୍କ ମାତାପିତାଙ୍କୁ ପ୍ରଶଂସା କରିଥିଲେ ଓ ସେମାନଙ୍କ ପ୍ରତି ନିଜର  ସମ୍ମାନ ଜଣାଇଥିଲେ। ଫୋନ୍‌ କଲ ଶେଷରେ ପ୍ରଧାନମନ୍ତ୍ରୀ ଖେଳାଳୀ ମାନଙ୍କର ଆନନ୍ଦ ଉଲ୍ଲାସରେ ସାମିଲ ହୋଇ ‘ଭାରତ ମାତା କୀ ଜୟ’ କହିଥିଲେ।

Categories
ଆଜିର ଖବର ଖେଳ ଜାତୀୟ ଖବର

ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଦ୍ୱିତୀୟ ଟେଷ୍ଟ: ମ୍ୟାଚ୍ କେବେ ଏବଂ କେଉଁଥିରେ ଦେଖିବେ ଦର୍ଶକ

ନୂଆଦିଲ୍ଲୀ: ସେଞ୍ଚୁରିଅନରେ ଦକ୍ଷିଣ ଆଫ୍ରିକା ବିପକ୍ଷରେ ଏକ ଐତିହାସିକ ବିଜୟ ପଞ୍ଜିକୃତ କରିଥିବା ଭାରତୀୟ ଦଳ ବର୍ତ୍ତମାନ ଦ୍ୱିତୀୟ ଟେଷ୍ଟ ପାଇଁ ପ୍ରସ୍ତୁତ ହେଉଛି। ତିନି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ଦ୍ୱିତୀୟ ମ୍ୟାଚ୍ ଜୋହାନ୍ସବର୍ଗରେ ଖେଳାଯିବ। କ୍ୟାପଟେନ ବିରାଟଙ୍କ ନେତୃତ୍ୱରେ ଦକ୍ଷିଣ ଆଫ୍ରିକାର ପ୍ରଥମ ଟେଷ୍ଟ ସିରିଜ ବିଜୟ ଉପରେ ଭାରତୀୟ ଦଳର ନଜର ରହିଛି। ଆଜି ପର୍ଯ୍ୟନ୍ତ ଭାରତୀୟ ଦଳ ଏଠାରେ ଟେଷ୍ଟ ସିରିଜ୍ ଜିତିବାରେ ସକ୍ଷମ ହୋଇନାହିଁ। କରୋନାର ଓମିକ୍ରନ୍ ଭାରିଆଣ୍ଟର ଭୟ ମଧ୍ୟରେ ଏହି ସିରିଜ୍ ଆରମ୍ଭ ହେଉଛି। ଷ୍ଟାଡିୟମରେ ଦର୍ଶକଙ୍କ ପ୍ରବେଶ ଉପରେ ଏକ ନିଷେଧାଦେଶ ରହିଛି। ଏଭଳି ପରିସ୍ଥିତିରେ କ୍ରିକେଟ୍ ପ୍ରଶଂସକମାନେ ଏହି ସିରିଜ୍ ଅନଲାଇନରେ ଏବଂ କେବଳ ପ୍ରସାରଣ ଚ୍ୟାନେଲରେ ଦେଖିପାରିବେ। ତେବେ ଏହି ମ୍ୟାଚ କେବେ ଏବଂ କେଉଁଠାରେ ଦେଖିପାରିବେ? ପଢନ୍ତୁ…

୧- ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଦ୍ୱିତୀୟ ଟେଷ୍ଟ ମ୍ୟାଚ୍ କେଉଁଠାରେ ଖେଳାଯିବ?:

ତିନି ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜର ଦ୍ୱିତୀୟ ମ୍ୟାଚ୍ ଜୋହାନ୍ସବର୍ଗର ୱାଣ୍ଡର୍ସ ଷ୍ଟାଡିୟମରେ ଖେଳାଯିବ।

୨- ମ୍ୟାଚ୍ କେଉଁ ସମୟ ଆରମ୍ଭ ହେବ?:

ଏହି ମ୍ୟାଚ ଜାନୁଆରୀ ୩ ତାରିଖରୁ ଅପରାହ୍ନ ୧.୩୦ ରେ ଆରମ୍ଭ ହେବ।

୩- କେଉଁ ଚ୍ୟାନେଲରେ ମ୍ୟାଚ୍ ସିଧା ପ୍ରସାରଣ ହେବ?:

ଏହି ମ୍ୟାଚ୍ ଷ୍ଟାର୍ ସ୍ପୋର୍ଟସ୍ ନେଟୱାର୍କରେ ସିଧା ପ୍ରସାରଣ ହେବ। ଏହି ମ୍ୟାଚ୍ ହିନ୍ଦୀ, ଇଂରାଜୀ ଏବଂ ଅନ୍ୟାନ୍ୟ ଭାରତୀୟ ଭାଷାରେ ଷ୍ଟାର୍ ସ୍ପୋର୍ଟସର ବିଭିନ୍ନ ଚ୍ୟାନେଲରେ ସିଧା ପ୍ରସାରଣ ହେବ।

୪- ଅନଲାଇନରେ ଦର୍ଶକ ମ୍ୟାଚ୍ ଦେଖିପାରିବେ:

ଡିସନି-ହଟଷ୍ଟାର ଆପରେ ଏହି ମ୍ୟାଚ୍ ଲାଇଭ୍ ଷ୍ଟ୍ରିମିଂ ହେବ। ଏଠାରେ ଲାଇଭ୍ ଦେଖିବା ପାଇଁ, ଆପ୍ ର ଏକ ସଦସ୍ୟତା ଆବଶ୍ୟକ ହେବ।

୫- ଉଭୟ ଦଳର ଖେଳାଳି:

ଭାରତର ଟେଷ୍ଟ ଦଳ:

ବିରାଟ କୋହଲି (ଅଧିନାୟକ), ପ୍ରିୟାଙ୍କ ପଞ୍ଚଲ, କେ.ଏଲ୍ ରାହୁଲ, ମୟଙ୍କ ଅଗ୍ରୱାଲ, ଚେତେଶ୍ୱର ପୂଜାରା, ଅଜିଙ୍କ୍ୟ ରାହାନେ, ଶ୍ରେୟାସ ଆୟର, ହନୁମା ବିହାରୀ, ଋଷଭ ପନ୍ତ (ୱିକି), ରିଦ୍ଧିମାନ ସାହା (ୱିକି), ଆର ଅଶ୍ୱିନ, ଜୟନ୍ତ ଯାଦବ, ଇଶାନ୍ତ ଶର୍ମା, ମହମ୍ମଦ ଶାମି, ଉମେଶ ଯାଦବ, ଜସପ୍ରୀତ ବୁମ୍ରା, ଶାର୍ଦ୍ଦୁଲ ଠାକୁର, ମହମ୍ମଦ ସିରାଜ।

ଦକ୍ଷିଣ ଆଫ୍ରିକାର ଟେଷ୍ଟ ଦଳ:

ଡିନ୍ ଏଲଗାର୍ (ଅଧିନାୟକ), ଟେମ୍ବା ବାଭୁମା, କାଗିସୋ ରାବାଡା, ସରେଲ୍ ଇରଭି, ବେରୁନ୍ ହେଣ୍ଡ୍ରିକ୍ସ, ଜର୍ଜ ଲିଣ୍ଡେ, କେଶବ ମହାରାଜ, ଲୁଙ୍ଗି ନିଗିଡି, ଆଡେନ ମାର୍କ୍ରାମ, ଭିଆନ ମଲଡର, ଏନ୍ରିକ ନୋର୍କିଆ, କିଗାନ ପିଟରସେନ, ରାସି ଭାନ ଡେର୍ ଡୁସେନ୍, କାଇଲ୍ ଭର୍ନେ, ମାର୍କୋ ଜେନସେନ୍, ଡୁଏନ୍ ଅଲିଭର, ଗ୍ଲେଣ୍ଟନ୍ ଷ୍ଟୁରମ୍ୟାନ୍, ପ୍ରେନେଲାନ୍ ସୁବ୍ରାୟାନ୍, ସିସଣ୍ଡା ମାଗାଲା, ରିଆନ୍ ରିକେଲଟନ୍।

Categories
ଆଜିର ଖବର

ବିଜୟ ମଶାଲକୁ ସମ୍ମାନ ଜଣାଇ ଗୋପାଳପୁର ସାମରିକ ଷ୍ଟେସନ ଠାରେ ବିଭିନ୍ନ କାର୍ଯ୍ୟକ୍ରମ ଆୟୋଜିତ

ଗୋପାଳପୁର: ୧୯୭୧ ଯୁଦ୍ଧରେ ପାକିସ୍ତାନ ବିପକ୍ଷରେ ଭାରତର ଐତିହାସିକ ବିଜୟକୁ ୫୦ ବର୍ଷ ପୂର୍ତ୍ତି ଉପଲକ୍ଷେ ଦେଶବ୍ୟାପୀ ସ୍ବର୍ଣ୍ଣିମ ବିଜୟ ବର୍ଷ ପାଳନ କରାଯାଉଛି। ଏହି ଉପଲକ୍ଷେ ସାରା ଦେଶରେ ପରିକ୍ରମା କରୁଥିବା ସ୍ବର୍ଣ୍ଣିମ ବିଜୟ ମଶାଲ ବର୍ତ୍ତମାନ ଗୋପାଳପୁରସ୍ଥିତ ଭାରତୀୟ  ସେନା ଷ୍ଟେସନରେ ରହିଛି। ୧୯୭୧ ଯୁଦ୍ଧରେ ଅଦମ୍ୟ ସାହସ ଓ ଦେଶପ୍ରେମର ପ୍ରଦର୍ଶନ କରିଥିବା ସେନାବାହିନୀର ଯବାନମାନଙ୍କ ସ୍ମୃତିରେ ତଥା ବିଜୟ ମଶାଲକୁ ସମ୍ମାନ ଜଣାଇ ଆଜି ମିଲିଟାରୀ ଷ୍ଟେସନ ଠାରେ ଏକ ‘ରନ୍ ଫର ଫନ – ଭିକ୍ଟରୀ ରନ୍’ ଆୟୋଜନ କରାଯାଇଥିଲା। ଗୋପାଳପୁର ସେନା ଷ୍ଟେସନର ବାୟୁ ପ୍ରତିରକ୍ଷା ବେଳାଭୂମିର ସୁଦୃଶ୍ୟ ପ୍ରାଙ୍ଗଣରେ ଏହି ବିଜୟ ଦୌଡ଼କୁ ସବୁଜ ପତାକା ଦେଖାଇ ଶୁଭାରମ୍ଭ କରାଯାଇଥିଲା। ଏହି କାର୍ଯ୍ୟକ୍ରମରେ ୧୯୭୧ ଯୁଦ୍ଧରେ ଭାଗ ନେଇଥିବା ପୂର୍ବତନ ସେନା ଯବାନ ଏବଂ ତାଙ୍କର ପରିବାରବର୍ଗ ସାମିଲ ହୋଇଥିଲେ। ଏକବର୍ଷ ବ୍ୟାପୀ ପାଳନ କରାଯାଉଥିବା ସ୍ବର୍ଣ୍ଣିମ ବିଜୟ ବର୍ଷ ସମ୍ପର୍କରେ ଜନସାଧାରଣଙ୍କୁ ସାମିଲ କରିବା ଲାଗି କାର୍ଯ୍ୟକ୍ରମରେ ସଚେତନତା ସୃଷ୍ଟି କରାଯାଇଥିଲା।

ବିଜୟ ମଶାଲର ସମ୍ମାନରେ ଆୟୋଜିତ ବିଭିନ୍ନ କାର୍ଯ୍ୟକ୍ରମ ମଧ୍ୟରେ ବ୍ରହ୍ମପୁରସ୍ଥିତ ପୁଲିସ ଗ୍ରାଉଣ୍ଡରେ ଏକ ବିଶେଷ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ରାଜ୍ୟ ପୁଲିସ ପକ୍ଷରୁ ବିଜୟ ମଶାଲକୁ ରାଷ୍ଟ୍ରୀୟ ସମ୍ମାନ ପ୍ରଦର୍ଶନ କରାଯାଇଥିଲା। ଏହାଛଡ଼ା ସ୍କୁଲ ଛାତ୍ରଛାତ୍ରୀମାନେ ନୃତ୍ୟ ଓ ସଙ୍ଗୀତ ପରିବେଷଣ କରିଥିଲେ। ସ୍ଥଳସେନା ବାୟୁ ପ୍ରତିରକ୍ଷା କେନ୍ଦ୍ରର ସାମରିକ ସାଂସ୍କୃତିକ ଦଳ ଦେଶାତ୍ମବୋଧ ସଙ୍ଗୀତ ଧ୍ବନି ପରିବେଷଣ କରିଥିଲେ। କାର୍ଯ୍ୟକ୍ରମରେ ଅତିଥି ଭାବେ ଗୋପାଳପୁର ସାମରିକ ଷ୍ଟେସନର କମାଣ୍ଡର ବ୍ରିଗେଡିୟର ସୁମିତ ମାଥୁର, ବ୍ରହ୍ମପୁର ସାଂସଦ ଚନ୍ଦ୍ରଶେଖର ସାହୁ, ବ୍ରହ୍ମପୁର ମହାନଗର ନିଗମ କମିଶନର ଶିଦ୍ଧେଶ୍ବର ବଳିରାମ ବୋନ୍ଦାରଙ୍କ ସମେତ ଅନ୍ୟ ମାନ୍ୟଗଣ୍ୟ ବ୍ୟକ୍ତିବିଶେଷ ଅଂଶଗ୍ରହଣ କରିଥିଲେ। ସେନାବାହିନୀର ବରିଷ୍ଠ ଅଧିକାରୀ, ବିଭିନ୍ନ ଶିକ୍ଷାନୁଷ୍ଠାନର ସମରଶିକ୍ଷାର୍ଥୀ ବାହିନୀର ଛାତ୍ରଛାତ୍ରୀ ବିପୁଳ ଉତ୍ସାହ, ଉଦ୍ଦୀପନା ଓ ରାଷ୍ଟ୍ରଭକ୍ତି ସହିତ ଏହି କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ।

Categories
ଆଜିର ଖବର ରାଜ୍ୟ ଖବର

ଆସନ୍ତାକାଲି ଗୋପାଳପୁରରେ ପହଞ୍ଚିବ ସ୍ବର୍ଣ୍ଣିମ ବିଜୟ ମଶାଲ

ଭୁବନେଶ୍ବର: ୧୯୭୧ ଯୁଦ୍ଧରେ ପାକିସ୍ତାନ ସେନା ବିପକ୍ଷରେ ଭାରତୀୟ ସେନାର ଐତିହାସିକ ବିଜୟକୁ ୫୦ ବର୍ଷ ପୂରଣ ହୋଇଛି। ଏହି ଉପଲକ୍ଷେ ଦେଶବ୍ୟାପୀ ସ୍ବର୍ଣ୍ଣିମ ବିଜୟ ବର୍ଷ ପାଳନ କରାଯାଉଛି। ଭାରତୀୟ ସେନାର ବୀର ଯବାନମାନଙ୍କୁ ସମ୍ମାନ ଜଣାଇବା ଉଦ୍ଦେଶ୍ୟରେ ସାରା ଦେଶରେ ‘ବିଜୟ ମଶାଲ’ ପରିକ୍ରମା କରାଯାଉଛି।

ଆସନ୍ତାକାଲି ଏହି ବିଜୟ ମଶାଲ ଛତିଶଗଡ଼ର ରାୟପୁରରୁ ଆସି ଗଞ୍ଜାମ ଜିଲ୍ଲାର ଗୋପାଳପୁର ମିଲିଟାରୀ ଷ୍ଟେସନ ଠାରେ ପହଞ୍ଚିବ। ଏଠାରେ ବିଜୟ ମଶାଲ ରହଣି କାଳରେ ବିଭିନ୍ନ ପ୍ରକାରର ସ୍ମାରକୀ କାର୍ଯ୍ୟକ୍ରମ ଆୟୋଜନ କରାଯିବ। ବୀର ସୈନିକମାନଙ୍କୁ କୃତଜ୍ଞତା ପ୍ରକଟ କରିବା ଉଦ୍ଦେଶ୍ୟରେ ସେମାନଙ୍କୁ ସମ୍ମାନିତ କରାଯିବ। ୧୯୭୧ ଯୁଦ୍ଧ କାଳରେ  ମୂଲ୍ୟବାନ ଯୋଗଦାନ ଏବଂ ନିଃସ୍ବାର୍ଥପର ସେବା ପାଇଁ ବୀରନାରୀ ଏବଂ ପୁରସ୍କାର ବିଜେତାମାନଙ୍କୁ ମଧ୍ୟ ସମ୍ମାନିତ କରାଯିବ।

ଏହି ଅବସରରେ ପୁଷ୍ପମାଲ୍ୟ ଅର୍ପଣ, ସାମରିକ ସଙ୍ଗୀତ ପରିବେଷଣ, ଯୁଦ୍ଧରେ ଅଂଶଗ୍ରହଣ କରିଥିବା ଅବସରପ୍ରାପ୍ତ ଯବାନଙ୍କ ସହିତ ଆଲୋଚନା କରାଯିବାର କାର୍ଯ୍ୟକ୍ରମ ରହିଛି। ଏହାଛଡ଼ା ଏହି ବିଜୟ ମଶାଲ ଯୁବପିଢ଼ି ଏବଂ ସମର ଶିକ୍ଷାର୍ଥୀ ବାହିନୀଙ୍କ ପାଇଁ ପ୍ରଦର୍ଶିତ କରାଯିବ। ଏଥିସହିତ ‘ସ୍ବର୍ଣ୍ଣିମ ବିଜୟ ମଶାଲ’ ସମ୍ମାନରେ ସ୍ଥାନୀୟ ପ୍ରଶାସନ ଏବଂ ରାଜ୍ୟ ପୁଲିସ ବିଭାଗ ପକ୍ଷରୁ ବିଭିନ୍ନ କାର୍ଯ୍ୟକ୍ରମ ଆୟୋଜନ କରାଯିବ। ବିଜୟ ମଶାଲ ଆସନ୍ତା ୨୭ ତାରିଖରେ ଗୋପାଳପୁରରୁ ବାହାରି ଆଇଏନଏସ ଚିଲିକା ଠାରେ ପହଞ୍ଚିବ।