ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ରାଜ୍ୟ ସରକାରଙ୍କ ଏକ ଅଭାବନୀୟ ନିଷ୍ପତ୍ତି କ୍ରମେ ସରକାରୀ ସ୍କୁଲଗୁଡ଼ିକ ବନ୍ଦ ଏବଂ ମିଶ୍ରଣ ପ୍ରକ୍ରିୟା ଆରମ୍ଭ ହୋଇଛି। ଏନେଇ ସାରା ରାଜ୍ୟରେ ଜନଅସନ୍ତୋଷ ବୃଦ୍ଧି ପାଇବାରେ ଲାଗିଛି। ବିଭିନ୍ନ ସ୍ଥାନରେ ଆଇନଶୃଙ୍ଖଳା ପରିସ୍ଥିତି ମଧ୍ୟ ସୃଷ୍ଟି ହେଉଛି। ସୂଚନାଯୋଗ୍ୟ ରାଜ୍ୟ ସରକାର ନିଷ୍ପତ୍ତି କ୍ରମେ ରାଜ୍ୟରେ ପ୍ରାଥମିକ ବିଦ୍ୟାଳୟ କ୍ଷେତ୍ରରେ ୨୦ରୁ କମ୍ ଛାତ୍ରଛାତ୍ରୀ ଥିଲେ ସ୍କୁଲ ବନ୍ଦ ହେବ। ଯଦି ୨୦ରୁ ସାମାନ୍ୟ ଅଧିକ ପିଲା ଥିବେ ଓ ନିକଟସ୍ଥ ବିଦ୍ୟାଳୟରେ ମିଶ୍ରଣ ହେବ।
ସେହିପରି ଉଚ୍ଚ ପ୍ରାଥମିକ ବିଦ୍ୟାଳୟ କଥା କହିଲେ ୫୦ରୁ କମ୍ ଛାତ୍ରଛାତ୍ରୀ ଥିଲେ ତାହାକୁ ବନ୍ଦ କରିବା ବା ଅନ୍ୟ ସ୍କୁଲ ସହ ମିଶ୍ରଣ ପ୍ରସ୍ତାବ ରହିଛି। ଏହି ନିର୍ଦ୍ଦେଶ ସରକାର ମାର୍ଚ୍ଚ ମାସଠାରୁ ଦେଇଥିଲେ ମଧ୍ୟ କରୋନା ଯୋଗୁଁ ଏହା ସାମୟିକ ପାଇଁ ସ୍ଥଗିତ ଥିବାବେଳେ ବର୍ତ୍ତମାନ ଏହା ଜୋର୍ସୋର୍ରେ ଆରମ୍ଭ ହେବାରେ ଲାଗିଛି। ଏହିକ୍ରମରେ ଗଂଜାମ ଜିଲ୍ଲାରେ ପ୍ରାୟ ୪୩୩ ବିଦ୍ୟାଳୟ ବନ୍ଦ ହେବାକୁ ଯାଉଥିବା ଡ଼ିଇଓ ଅମୂଲ୍ୟ ପ୍ରଧାନ ସୂଚନା ଦେଇଛନ୍ତି।
ତେବେ ଏଠାରେ ଗୋଟିଏ କଥା ଲକ୍ଷ୍ୟ କରାଯାଏ ଗତ ୫ ବର୍ଷ ମଧ୍ୟରେ ୧୬୫ ସ୍କୁଲ ବନ୍ଦ ହୋଇଥିବାବେଳେ ଚଳିତ ବର୍ଷ ୪୩୩ ସ୍କୁଲ ବନ୍ଦ କରିବାକୁ ସରକାର ନିଷ୍ପତ୍ତି ନେଇଛନ୍ତି। ଏହାକୁ ନେଇ ଗଂଜାମ ଜିଲ୍ଲାରେ ଜନ ଅସନ୍ତୋଷ ତେଜିବାରେ ଲାଗିଲାଣି। ଅଭିଭାବକ ତଥା ବୁଦ୍ଧିଜୀବୀଙ୍କ କହିବା କଥା ସରକାରୀ ସ୍କୁଲରେ ପିଲା କାହିଁକି କମୁଛନ୍ତି ତାହାର ତର୍ଜମା ନ କରି ସରକାର ସ୍କୁଲ ବନ୍ଦକୁ ପ୍ରତ୍ସୋହନ ଦେବା ଦୁର୍ଭାଗ୍ୟଜନକ। କେତେକ ସ୍କୁଲରେ କେବଳ ଗୋଟିଏ ଶିକ୍ଷକ ଥିବାବେଳେ ବିଷୟ ଭିତ୍ତିକ ଶିକ୍ଷକ ଅଭାବ ରହୁଛନ୍ତି। ଯଦି ଉକ୍ତ ଶିକ୍ଷକଙ୍କ ଦେହ ଖରାପ ହୁଏ ତେବେ ପିଲାମାନଙ୍କ ପାଠପଢ଼ା ଠପ୍। ଏପଟେ ଯଦି ଜଣେ ଶିକ୍ଷକ ସରକାରୀ କାର୍ଯ୍ୟ, ମଧ୍ୟାହ୍ନ ଭୋଜନ ଏବଂ ଅନ୍ୟାନ୍ୟ କାର୍ଯ୍ୟକଳାପ କରନ୍ତି ତେବେ ପିଲାଙ୍କ ପାଠପଢ଼ା ବାଧା ହେବା ନିଶ୍ଚୟ। ତେଣୁ ପିଲା କମିବାର ମୁଖ୍ୟ କାରଣ ଶିକ୍ଷକ ଅଭାବ।
ଅନ୍ୟ କେତେକ କଥାକୁ ଦେଖିଲେ କିଛି ବେସରକାରୀ ବିଦ୍ୟାଳୟର ଭିତ୍ତିଭୂମି ନଥିବା, ଏନ୍ଓସି ଓ ସିଓଆର୍ ନଥିବାବେଳେ ସେମାନେ ଅଭିଭାବକମାନଙ୍କୁ ଆକୃଷ୍ଟ କରି ସେମାନଙ୍କ ପିଲାଛୁଆକୁ ସେମାନଙ୍କ ସ୍କୁଲରେ ପଢ଼ାଇବାକୁ ଏକରକମ ଚେଷ୍ଟିତ ଥାଆନ୍ତି। ଅଭିଭାବକମାନେ ମଧ୍ୟ ସରକାରୀ ସ୍କୁଲରେ ଶିକ୍ଷକ ଅଭାବକୁ ଦେଖି ସେମାନଙ୍କ ପିଲାଙ୍କୁ ବେସରକାରୀ ସ୍କୁଲରେ ପଢ଼ାଇବାକୁ ବାଧ୍ୟ ହୁଅନ୍ତି। କେତେକ ସ୍କୁଲର କୋଠା ଜରାଜୀର୍ଣ୍ଣ ଅବସ୍ଥାରେ ଥିବାବେଳେ କେଉଁଠି ଶୌଚାଳୟ ନାହିଁ, କେଉଁଠି ପାନୀୟ ଜଳର ସୁବିଧା ନାହିଁ, କେତେକ ସ୍ଥାନରେ ବିଦ୍ୟୁତ ସଂଯୋଗ ନାହିଁ।
ଗଂଜାମ ଜିଲ୍ଲାରେ ପାତ୍ରପୁର ବ୍ଲକ୍ର କେତେକ ତେଲୁଗୁ ଅଂଚଳରେ ତେଲୁଗୁ ଜାଣିଥିବା ଶିକ୍ଷକ ନାହାନ୍ତି। ତେଣୁ ଉକ୍ତ ଅଂଚଳର ୪ଟି ବିଦ୍ୟାଳୟ ବନ୍ଦ ହେବ। ଏହିଭଳି ବିଭିନ୍ନ ଅଂଚଳରେ ବିଭିନ୍ନ ସମସ୍ୟା ଯୋଗୁଁ ଛାତ୍ରଛାତ୍ରୀ ସଂଖ୍ୟା ଦିନକୁ ଦିନ କମିବାରେ ଲାଗିଛି। ସରକାର ଏହି ସମସ୍ୟାଗୁଡ଼ିକୁ ସମାଧାନ ନ କରି କେବଳ ପିଲା ଅଭାବର ଆଳ ଦେଖାଇ ସ୍କୁଲ ବନ୍ଦ କରିବା କେତେଦୂର ଯୁକ୍ତିଯୁକ୍ତ ବୋଲି ବୁଦ୍ଧିଜୀବୀ ପ୍ରଶ୍ନ କରିଛନ୍ତି। ଏପଟେ କେତେକ ଅଭିଭାବକ ନିଜର ଆର୍ଥିକ ଅବସ୍ଥା ଖରାପ କାରଣରୁ ସେମାନଙ୍କ ପିଲାଛୁଆଙ୍କୁ ବେସରକାରୀ ବିଦ୍ୟାଳୟରେ ପଢ଼ାଇପାରିବେ ନାହିଁ। ଏପଟେ ସରକାରୀ ସ୍କୁଲ ବନ୍ଦ ହୋଇଯାଇଥିବ। ବିଚରା ଦଳିତ, ଆଦିବାସୀ, ଆର୍ଥିକ ଅନଗ୍ରସର ପିଲାଟିର ପାଠପଢ଼ାରେ ଡ଼ୋରି ବନ୍ଧା ହେବ।
ଗଂଜାମ ଜିଲ୍ଲାର ପାତ୍ରପୁର ବ୍ଲକ୍ରେ ୪୨, ପୋଲସରାରେ ୧୨, ପୁରୁଷୋତ୍ତମପୁରରେ ୯, ରଙ୍ଗେଇଲୁଣ୍ଡାରେ ୧୭, ସାନଖେମୁଣ୍ଡିରେ ୧୧, ଶେରଗଡ଼ରେ ୧୧, ସୋରଡ଼ାରେ ୫, ଆସିକାରେ ୧୭, ବେଗୁନିଆପଡ଼ାରେ ୧୧, ବେଲଗୁଣ୍ଠାରେ ୨୨, ବ୍ରହ୍ମପୁରରେ ୧୨, ଭଂଜନଗରରେ ୪୧, ବୁଗୁଡ଼ାରେ ୧୫, ଛତ୍ରପୁରରେ ୧୫, ଚିକିଟିରେ ୩୨, ଧରକୋଟରେ ୨୨, ଦିଗପହଣ୍ଡିରେ ୩୪, ଗଂଜାମରେ ୧୨, ହିଂଜିଳିକାଟୁରେ ୮, ଜଗନ୍ନାଥପ୍ରସାଦରେ ୨୭, କବିସୂର୍ଯ୍ୟନଗରରେ ୧୧, ଖଲିକୋଟରେ ୨୨ ଏବଂ କୁକୁଡ଼ାଖଣ୍ଡିରେ ୨୨ ଗୋଟି ସ୍କୁଲ ବନ୍ଦ ହେବାକୁ ନିର୍ଦ୍ଦେଶ ହୋଇଛି। ଚଳିତବର୍ଷ ଏହି ସ୍କୁଲଗୁଡ଼ିକରେ ନାମଲେଖା ହେବ ନାହିଁ। ଏହି ପରିପ୍ରେକ୍ଷୀରେ ଗଂଜାମ ଜିଲ୍ଲାର ବିଭିନ୍ନ ବ୍ଲକ୍ରେ ଆନ୍ଦୋଳନ ତେଜିବାରେ ଲାଗିଲାଣି।
ଗତ କିଛି ଦିନ ତଳେ ବୁଗୁଡ଼ା ବ୍ଲକ୍ର ୮ଟି ବିଦ୍ୟାଳୟ ବନ୍ଦ ନେଇ ନିଷ୍ପତ୍ତି ହୋଇଥିବାବେଳେ ଗୋଟିଏ ସ୍କୁଲର ଅଭିଭାବକ ଏବଂ ପିଲାମାନେ ଶିକ୍ଷକଙ୍କୁ ଅଟକ ରଖିବା ସହ ସ୍କୁଲରେ ତାଲା ପକାଇ ଦେଇଥିଲେ। ସେହିପରି ଚିକିଟି ବ୍ଳକ୍ର ଆମ୍ବଗାଁ ପ୍ରାଥମିକ ବିଦ୍ୟାଳୟ ବନ୍ଦ ହେବା ଶୁଣି ଅଭିଭାବକ ମାନେ ଉତ୍ତ୍ୟକ୍ତ ହୋଇ ବିଦ୍ୟାଳୟ ଶିକ୍ଷକ ପୀତାମ୍ବର ମଳିଙ୍କୁ ଅଟକ ରଖିଥିଲେ। ଏହାପରେ ଏବିଇଓ ଆର୍ତ୍ତତ୍ରାଣ ବେହେରା, ସିଆର୍ସିସି ଭବାନୀ ଶଙ୍କର ମହାପାତ୍ର ମଧ୍ୟ ସେଠାରେ ପହଞ୍ଚିବାରୁ ତାଙ୍କୁ ମଧ୍ୟ ଅଟକ ରଖିଥିଲେ।
ବ୍ରହ୍ମପୁରରେ ମଧ୍ୟ ସୁକୁଣ୍ଡା ବାଉରୀ ସାହିରେ ସ୍କୁଲ ବନ୍ଦ ତଥା ମିଶ୍ରଣକୁ ନେଇ ଜନଅସନ୍ତୋଷ ଉଠିଥିବା ରଙ୍ଗେଇଲୁଣ୍ଡା ବିଇଓ ଡ. ପ୍ରଭାତୀ ମହାପାତ୍ର କହିଛନ୍ତି। ସେହିପରି ଗଂଜାମ ବ୍ଲକ୍ରେ ମଧ୍ୟ ଏକ ସ୍କୁଲ ବନ୍ଦ ହେବାକୁ ଯାଉଥିବାରୁ ସେଠାର ଅଭିଭାବକମାନେ ଉତ୍ତ୍ୟକ୍ତ ହୋଇ ସ୍କୁଲ ବନ୍ଦ ନ କରିବାକୁ ଜିଲ୍ଲାପାଳଙ୍କୁ ଦାବିପତ୍ର ଦେଇଛନ୍ତି। ସବୁ ବ୍ଲକ୍ର ଅଭିଭାବକଙ୍କ କହିବା କଥା ପିଲାମାନେ ଦୂର ସ୍କୁଲକୁ ଗଲେ ମୁଖ୍ୟରାସ୍ତା ପାର ହୋଇ ଯିବାକୁ ହେବ। ଏ ମଧ୍ୟରେ ଯଦି ପିଲାଙ୍କ କୌଣସି ଅସୁବିଧା ହେବ ତେବେ ସରକାର କ’ଣ ଦାୟୀ ରହିବେ।
ଏନେଇ ଆମ ପ୍ରତିନିଧି ଗଂଜାମ ଡ଼ିଇଓ ଶ୍ରୀ ପ୍ରଧାନଙ୍କ ସହ ଯୋଗଯୋଗ କରିବାରୁ ସେ କହିଥିଲେ ପୂର୍ବରୁ ଗଂଜାମ ଜିଲ୍ଲାରେ ପ୍ରାୟ ୯୩୩ ସ୍କୁଲ ବନ୍ଦ ପାଇଁ ନିର୍ଦ୍ଦେଶ ଥିଲା। କିନ୍ତୁ ସେଥିରୁ କେବଳ ୪୩୩ ସ୍କୁଲ ବନ୍ଦ ହେବ। ଯଦି ଗ୍ରାମବାସୀ ତଥା ଅଭିଭାବକଙ୍କ କୌଣସି ଆପତ୍ତି ଅଭିଯୋଗ ଥାଏ ତେବେ ସରକାରଙ୍କ ପ୍ରଦତ୍ତ ଫର୍ମରେ ଆବେଦନ କରିପାରିବେ। ଜିଲ୍ଲା କମିଟି ଗଠନ କରି ଆସିଥିବା ଆପତ୍ତିଗୁଡ଼ିକର ବିଚାର କରାଯିବ। ଅଭିଯୋଗ ଯଦି ପ୍ରକୃତ ତେବେ ଜିଲ୍ଲାପାଳ ସଠିକ୍ ନିଷ୍ପତ୍ତି ନେବେ। କିନ୍ତୁ ଲୋକେ ଆନ୍ଦୋଳନ ନ କରି ଆଇନଶୃଙ୍ଖଳା ପରିସ୍ଥିତି ରକ୍ଷା କରିବାକୁ ସେ ଅନୁରୋଧ କରିଥିଲେ। ତେବେ ଏହି ୪୩୩ ବିଦ୍ୟାଳୟରେ ଥିବା ଶିକ୍ଷକମାନେ ଅନ୍ୟ ସ୍କୁଲକୁ ଯିବେ।
ସୂଚନାଯୋଗ୍ୟ ରାଜ୍ୟରେ ଗତ ୨୦୧୬ ଡ଼ିସେମ୍ବର ମାସରୁ କନିଷ୍ଠ ଶିକ୍ଷକ ନିଯୁକ୍ତି ନେଇ ବିଜ୍ଞାପନ ବାହାରିନି। ପ୍ରତିବର୍ଷ ସରକାର ପ୍ରାୟ ୭ ହଜାର ସି.ଟି. ଏବଂ ବି.ଇଡ଼ି ପିଲାଙ୍କୁ ଟ୍ରେନିଂ ଦେଉଛନ୍ତି। ଏହାସହ ବାହାର ରାଜ୍ୟରୁ ହଜାର ହଜାର ପିଲା ବି.ଇଡ଼ି କରି ଅଛନ୍ତି। ପ୍ରତିବର୍ଷ ସରକାର ଓ.ଟି.ଇ.ଟି. ପରୀକ୍ଷା ମଧ୍ୟ କରୁଛନ୍ତି। ବର୍ତ୍ତମାନ ପ୍ରାୟ ୬୦ ରୁ ୭୦ ହଜାର ଶିକ୍ଷକ ଆଶାୟୀ ଯେଉଁମାନେ ସି.ଟି. ବି.ଇଡ଼ି. ଏବଂ ଓଟିଇଟି ପାସ୍ କରି ବେକାର ହୋଇ ଘରେ ବସିଛନ୍ତି। ପାଠ ପଢ଼ିବାକୁ ବହୁ ଟଙ୍କା ବାକି କରିଛନ୍ତି। ସେମାନଙ୍କ ଭବିଷ୍ୟତ ବର୍ତ୍ତମାନ ଅନ୍ଧାରକୁ ଚାଲିଯାଇଛି। ଏଭଳି ସ୍କୁଲ ବନ୍ଦ ହେବା ଯୋଗୁଁ ଶିକ୍ଷକ ନିଯୁକ୍ତିରେ ବିଳମ୍ବ ହେବ। ବେକାରୀ ସଂଖ୍ୟା ମଧ୍ୟ ବଢ଼ିବ। ଶିକ୍ଷକ ନିଯୁକ୍ତି ନେଇ ମଧ୍ୟ ବହୁବାର ଆଶାୟୀ ମାନେ ଲୋୟର ପିଏମ୍ଜିରେ ଧାରଣା ଦେଇସାରିଲେଣି। ସ୍କୁଲ ବନ୍ଦର ନିର୍ଦ୍ଦେଶ ପ୍ରତ୍ୟାହାର ପାଇଁ ହାଇକୋର୍ଟରେ ମଧ୍ୟ ଜନସ୍ୱାର୍ଥ ମାମଲା ରୁଜୁ ହୋଇଛି।
ତେଣୁ ଏହି ପରିପ୍ରେକ୍ଷୀରେ ସରକାର ନିଜ ନିଷ୍ପତ୍ତି ବଦଳାଇ ସ୍କୁଲଗୁଡ଼ିକର ମୌଳିକ ସମସ୍ୟା ସମାଧାନ ସହ ବିଷୟଭିତ୍ତିକ ଶିକ୍ଷକ ତଥା କ’ଣ କଲେ ପିଲାସଂଖ୍ୟା ବୃଦ୍ଧି ହେବ ସେ ନେଇ ବିଚାର କରିବାକୁ ବୁଦ୍ଧିଜୀବୀ ତଥା ଅଭିଭାବକମାନେ ଦାବି କରିଛନ୍ତି।
