Tag: ନବୀନ ପଟ୍ଟନାୟକ

ଭୁବନେଶ୍ବର: ଗତ ବୁଧବାର ଦିନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମୁମ୍ବାଇରେ ବିଭିନ୍ନ ଶିଳ୍ପପତିଙ୍କ ସହିତ ୱାନ ଟୁ ୱାନ ବୈଠକ କରିଥିଲେ। ଗୋଟିଏ ଦିନରେ ସେ ପ୍ରାୟ 18ଟି ବୈଠକ କରିଥିଲେ। ଏପରି ବୈଠକ ଦେଖି ସେଠାରେ ଥିବା ଓଡିଶା ଅଧିକାରୀମାନେ ମଧ୍ୟ ଆଶ୍ଚର୍ଯ୍ୟ ହୋଇ ଯାଇଥିଲେ।

ଗୁରୁବାର ଦିନ ହୋଟେଲରେ ମୁଖ୍ୟମନ୍ତ୍ରୀ ଏକ ରିଲାକ୍ସ ମୁଡରେ ଥିବା ବେଳେ ତାଙ୍କର ବ୍ୟକ୍ତିଗତ ସଚିବ ତଥା 5ଟି ସଚିବ ଭି କେ ପାଣ୍ଡିୟାନ ଏକ ପ୍ରଶ୍ନ କଲେ। ଯାହାର ଓଡିଆ ହେଲା, ‘ଆପଣ ଗତକାଲି ଏକାଥରେ 18ଟି ବୈଠକ କଲେ, ଆପଣ କ୍ଲାନ୍ତ ଅନୁଭବ କଲେ ନାହିଁ ?’ ମୁଖ୍ୟମନ୍ତ୍ରୀ ଏହାର ଉତ୍ତର ଗୋଟିଏ ବାକ୍ୟରେ ଦେଲେ, ତାହା ହେଲା ‘ଲୋକଙ୍କ କାମ କରିବାରେ କ୍ଲାନ୍ତ ଲାଗେ ନାହିଁ। ‘

ଏହି ଭିଡିଓକୁ ଖୋଦ ପାଣ୍ଡିୟାନ୍ ତାଙ୍କର ଇନଷ୍ଟାଗ୍ରାମରେ ପୋଷ୍ଟ କରିଛନ୍ତି। ଯାହା ସାଧାରଣରେ ବେଶ ଆଲୋଚନା ହେଉଛି। ଏଥିରେ ବିଭିନ୍ନ ଲୋକେ ନିଜର ମତ ମଧ୍ୟ ପ୍ରଦାନ କରିଛନ୍ତି। ସେମାନେ ନବୀନ ପଟ୍ଟନାୟକଙ୍କ କାର୍ଯ୍ୟକୁ ବେଶ ପ୍ରଶଂସା କରିଛନ୍ତି। କେତେକ ଓଡିଶାରେ ନବୀନ ସୁନାମୀ ଚାଲିଛି, ଏଥିରେ ଅନ୍ୟ ଦଳ ଧରାଶାୟୀ ହୋଇପଡିଛନ୍ତି ବୋଲି କହିଛନ୍ତି।

ଇନଭେଷ୍ଟର ମିଟ ପାଇଁ ନବୀନ ପଟ୍ଟନାୟକ ଗତ ମଙ୍ଗଳବାର ଦିନ ମୁମ୍ବାଇ ଗସ୍ତ କରିଥିଲେ। ସେଦିନ ସେ ମୁମ୍ବାଇରେ ରାତ୍ରୀ ଯାପନ କରି ବୁଧବାର ସକାଳୁ ବିଭିନ୍ନ ଶିଳ୍ପପତିଙ୍କୁ ସାକ୍ଷାତ କରିଥିଲେ। ସେଥିରେ ଥିଲେ ଶିଳ୍ପପତି ଅନୀଲ ଅଗ୍ରୱାଲା, ଆନନ୍ଦ ମହିନ୍ଦ୍ରା, ବିମଲ ଖଣ୍ଡେଲୱାଲା, ଅରବିନ୍ଦ ଭୋରା, ରାକେଶ ଝା ଏବଂ ଧ୍ରୁବ କୋଟାକ ପ୍ରମୁଖ ଶିଳ୍ପପତି। ଏମାନଙ୍କ ସହିତ ମୁଖ୍ୟମନ୍ତ୍ରୀ ବୁଧବାର ଦିନ ତମାମ ୱାନ ଟୁ ୱାନ ସାକ୍ଷାତ କରିଥିଲେ।

ଏହାପରେ ସଂଧ୍ୟାରେ ଏକ ସମ୍ମିଳନୀରେ ମୁଖ୍ୟମନ୍ତ୍ରୀ ଯୋଗଦେଇ ଓଡିଶାର ଭିତ୍ତିଭୂମି ସଂପର୍କରେ ଉପସ୍ଥିତ ଶିଳ୍ପପତିମାନଙ୍କୁ ଅବଗତ କରାଇଥିଲେ। ସେଦିନ ସକାଳୁ ପୁରା ରାତ୍ରୀ ପର୍ଯ୍ୟନ୍ତ ନବୀନ ଶିଳ୍ପପତିଙ୍କ ଗହଣରେ କାମ କରି ଶେଷରେ ବିଶ୍ରାମ ନେଇଥିଲେ। ଏହି ବୟସରେ ଏପରି କାମ ଦେଖି ଖୋଦ ଭି କେ ପାଣ୍ଡିୟାନ ମଧ୍ୟ ଆଶ୍ଚର୍ଯ୍ୟ ହୋଇଯାଇଥିଲେ।

ସେଦିନ ମୁଖ୍ୟମନ୍ତ୍ରୀଙ୍କ ଏପରି କାର୍ଯ୍ୟ ବା ପରିଶ୍ରମ ଦେଖି ପାଣ୍ଡିୟାନ କୌଣସି ଆଲୋଚନା କରି ନ ଥିଲେ। ହେଲେ ସକାଳେ ସେ ମୁଖ୍ୟମନ୍ତ୍ରୀଙ୍କୁ ଏହି କଥା ପଚାରିଥିଲେ। ସେ କହିଥିଲେ ଯେ, ଆପଣ ଦିନ ତମାମ ଏପରି ପରିଶ୍ରମ କରୁଛନ୍ତି ହାଲିଆ ହୋଇଯିବା କଥା। ହେଲେ ମୁଖ୍ୟମନ୍ତ୍ରୀ ଯୁବ ସୁଲଭରେ କହିଥିଲେ ଲୋକଙ୍କ କାମ କରିବାରେ ହାଲିଆ ହେବାର ନାହିଁ।

ଭୁବନେଶ୍ବର: ଆଜି ସଂଧ୍ୟାରେ ନବୀନ ନିବାସଠାରେ ଢେଙ୍କାନାଳ, ମୟୁରଭଞ୍ଜ, ଭଦ୍ରକ ଓ ବାଲେଶ୍ୱର ଜିଲ୍ଲାର ମିଶନ ଶକ୍ତି ଗୋଷ୍ଠୀର ମା’ ମାନେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକଙ୍କୁ ଭେଟି ଥିଲେ।

ଏହି ଅବସରରେ ଗତ ଅଗଷ୍ଟ ୧୫ ତାରିଖ ୭୫ତମ ସ୍ବାଧୀନତା ଦିବସ ପାଳନ ଅବସରରେ ମା ମାନେ ଜାତୀୟ ପତାକା ତିଆରି ଦାୟିତ୍ବ ପରି ଗୁରୁ ଦାୟିତ୍ୱ କୁ ସୁନ୍ଦର ଭାବରେ ନିର୍ବାହ କରି ଥିବାରୁ ମୁଖ୍ୟମନ୍ତ୍ରୀ ସମସ୍ତଙ୍କୁ ଧନ୍ୟବାଦ ଜଣାଇଥିଲେ।

ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଶ୍ରୀ ଭି.କେ. ପାଣ୍ଡିଆନ ମିଶନ ଶକ୍ତି ମା ମାନଙ୍କ କାର୍ଯ୍ୟର ଉଚ୍ଚପ୍ରଶଂସା କରିବା ସହ ଭଲକାମ ଜାରି ରଖିବାକୁ ପରାମର୍ଶ ଦେଇଥିଲେ।

ମୁଖ୍ୟମନ୍ତ୍ରୀ ସେମାନଙ୍କ ଉପରେ ମୁଖ୍ୟମନ୍ତ୍ରୀଙ୍କ ଆସ୍ଥା ସେମାନଙ୍କୁ ଉତ୍ସାହିତ କରିବା ସହ ସେମାନଙ୍କ ଜୀବନରେ ବହୁତ ବଡ ପରିବର୍ତନ ଆଣିଛି ବୋଲି କହିଥିଲେ. ମିଶନ ଶକ୍ତି କାର୍ଯ୍ୟକ୍ରମ ଜରିଆରେ ସେମାନେ କିପରି ସଫଳ ହୋଇପାରିଛନ୍ତି ତାହା ବର୍ଣନା କରିବା ସହ ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇ ଥିଲେ।

ସୂଚନାଯୋଗ୍ୟ ଯେ ଚଳିତ ବର୍ଷ ସ୍ବାଧୀନତାର ୭୫ତମ ପୂର୍ତ୍ତି ଅବସରରେ ରାଜ୍ୟ ସରକାର ମିଶନ ଶକ୍ତି ମା ମାନଙ୍କୁ ୩୦ ଲକ୍ଷ ଜାତୀୟ ପତାକା ପ୍ରସ୍ତୁତି ଓ ବଣ୍ଟନ ଦାୟିତ୍ବ ଦେଇଥିଲେ।

ଭୁବନେଶ୍ବର: ଆସନ୍ତାକାଲି ମଙ୍ଗଳବାରରେ ସାରା ଭୁବନେଶ୍ବର ଦୁଲୁକିବ। ବିଭିନ୍ନ ସ୍ଥାନରୁ ବିମାନବନ୍ଦରରେ ଏକଜୁଟ ହେବେ ପ୍ରାୟ ଲକ୍ଷେ ଲୋକ। ଏହାକୁ ନେଇ ପୋଲିସ ନାକେଦନ ହେବ। ସେଥିପାଇଁ କରାଯାଇଛି କଡା ସୁରକ୍ଷା ବ୍ୟବସ୍ଥା। ଲୋକମାନଙ୍କ ଗାଡି ରଖିବା ପାଇଁ ମଧ୍ୟ ତିନୋଟି ସ୍ଥାନରେ ହୋଇଛି ବ୍ୟବସ୍ଥା।

ଏହା ହେଉଛି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସ୍ବାଗତ କରିବା ପାଇଁ ବିଜେଡିର ଏକ ବଡ ପ୍ରସ୍ତୁତି। ମୁଖ୍ୟମନ୍ତ୍ରୀ ନୂଆଦିଲ୍ଲୀରେ ଜୀବନବ୍ୟାପି ଲୋକସେବା ପାଇଁ ପୁରସ୍କୃତ ହେବା ପରେ ତାଙ୍କୁ ବିମାନ ବନ୍ଦରରେ ସ୍ବାଗତ କରିବା ପାଇଁ ବିଜେଡି କରିଛି ଏକ ବଡ ପ୍ରୟାସ। ବିମାନ ବନ୍ଦର ନିକଟରେ ଥିବା ବିଜୁପଟ୍ଟନାୟକଙ୍କ ପ୍ରତିମୂର୍ତ୍ତି ନିକଟରେ କରାଯାଇଛି ଏକ ମଞ୍ଚ।

ମୁଖ୍ୟମନ୍ତ୍ରୀ ବିମାନ ବନ୍ଦରରେ ପହଁଞ୍ଚିବା ପରେ ତାଙ୍କୁ ସେଠାରୁ ନବୀନ ନିବାସ ପର୍ଯ୍ୟନ୍ତ ଏକ ଶୋଭାଯାତ୍ରାରେ ନିଆଯିବ। ତା ପୂର୍ବରୁ ବିଜୁ ପଟ୍ଟନାୟକ ପ୍ରତିମୂର୍ତ୍ତି ନିକଟରେ କିଛି ସମୟ ପାଇଁ କର୍ମିମାନେ ମୁଖ୍ୟମନ୍ତ୍ରୀଙ୍କୁ ସ୍ବାଗତ କରିବେ। ସେଠାରେ ଏକ ମଞ୍ଚ କରାଯିବା ସହିତ ବଡ କଟଆଉଟ ଲାଗିଛି। ଏହାପରେ ଏକ ବିରାଟ ପଟୁଆର କରାଯାଇ ନବୀନ ପଟ୍ଟନାୟକଙ୍କୁ ବିମାନ ବନ୍ଦରରୁ ନବୀନ ନିବାସ ନିଆଯିବ।

ମଙ୍ଗଳବାର ଦିନ ଏପରି ଲୋକ ସମାଗମକୁ ନଜରରେ ରଖି ପୋଲିସ ପ୍ରଶାସନ ତରଫରୁ ମଧ୍ୟ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଛି। ସ୍ୱାଗତ ସମାରୋହ କାର୍ଯ୍ୟକ୍ରମ ପ୍ରାୟ ୧ ଘଣ୍ଟା ଧରି ଚାଲିବ। ସେଥିପାଇଁ କମିସନରେଟ୍ ପୁଲିସ ତରଫରୁ ସବୁ ଛକରେ ପୁଲିସ ଫୋର୍ସ ମୂତୟନ ରହିବେ। ଏହାର ସୁରକ୍ଷା ପାଇଁ ୧୦୦ରୁ ଅଧିକ ବରିଷ୍ଠ ପୁଲିସ ଅଧିକାରୀ ଏବଂ ୩୦ ପ୍ଲାଟୁନ୍ ଫୋର୍ସ ନିଯୋଜିତ ରହିବେ।

ଏହି ସ୍ବାଗତ କାର୍ଯ୍ୟକ୍ରମକୁ ସଫଳ କରିବା ପାଇଁ ବିଜେଡି ତରଫରୁ ବ୍ୟାପକ ପ୍ରସ୍ତୁତି କରାଯାଇଛି। ମୁଖ୍ୟତଃ ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସଙ୍କ ନେତୃତ୍ବରେ ଏହି କାର୍ଯ୍ୟକୁ ତଦାରଖ କରାଯାଉଛି। ସାଧାରଣ ନିର୍ବାଚନ ପୂର୍ବରୁ ବିଜେଡିର ଏହା ଏକ ଶକ୍ତି ପରୀକ୍ଷା ବୋଲି ସାଧାରଣରେ କୁହାଯାଉଛି।

ନୂଆଦିଲ୍ଲୀ: ଆଜି ଏକ ବର୍ଣ୍ଣାଢ୍ୟ ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଜୀବନବ୍ୟାପି ଲୋକସେବା ପାଇଁ ସମ୍ମାନିତ କରାଯାଇଛି। ନୂଆଦିଲ୍ଲୀର ଇଣ୍ଡିଆ ଇଣ୍ଟରନ୍ୟାସନଲ ସେଣ୍ଟର ପ୍ରେକ୍ଷାଳୟରେ ତାଙ୍କୁ ଏହି ସମ୍ମାନ ପ୍ରଦାନ କରାଯାଇଛି। ଭାରତର ପୂର୍ବତ୍ତନ ମୁଖ୍ୟ ବିଚାରପତି ଏମ ଭି ରମଣା ନବୀନଙ୍କୁ ଏହି ପୁରସ୍କାର ପ୍ରଦାନ କରିଛନ୍ତି।

ଏହି ଉତ୍ସବରେ ବିଚାରପତି ଏ କେ ପଟ୍ଟନାୟକ ଅଧ୍ୟକ୍ଷତା କରିଥିଲେ। ସେ ମୁଖ୍ୟମନ୍ତ୍ରୀଙ୍କ ସମ୍ମାନ ପୂର୍ବକ ତାଙ୍କ ସଂପର୍କରେ ବିସ୍ତୁତ ତଥ୍ୟ ପ୍ରଦାନ କରିଥିଲେ। ଓଡିଶାରେ ମହିଳାମାନଙ୍କ ରୋଜଗାର, ସଂରକ୍ଷଣ, ହେଲଥକାର୍ଡ, ଘରେଘରେ ପାଇପ ପାଣି ପ୍ରଭୃତି ଯୋଜନାର ଉଚ୍ଚ ପ୍ରଶଂସା କରିଥିଲେ। ସେ ହଲଥ କାର୍ଡର କିପରି ବିନିଯୋଗ ହେଉଛି ତାହା ଜାଣିବା ପାଇଁ ତିନୋଟି ଜିଲ୍ଲା ଗସ୍ତ କରିଥିଲେ।

ନବୀନ ପଟ୍ଟନାୟକଙ୍କ ବିଭିନ୍ନ ଐତିହାସିକ ପଦକ୍ଷେପ ଆଜି ସାରା ବିଶ୍ବ ପ୍ରଶଂସା କରୁଛି ବୋଲି ସେ ଏହି ଉତ୍ସବରେ କହିଥିଲେ। ସେହିପରି ପୁରସ୍କାର ପ୍ରଦାନ କରି ପୂର୍ବତନ ମୁଖ୍ୟ ବିଚାରପତି ରମଣା ମଧ୍ୟ ନବୀନଙ୍କ କାର୍ଯ୍ୟକୁ ବେଶ ପ୍ରଶଂସା କରିଥିଲେ। ତାଙ୍କୁ ଓଡିଶାର ଲୋକେ ଭଲ ପାଉଥିବାରୁ ସେ ଆଜି ଦେଶରେ ଅନ୍ୟତମ ଦୀର୍ଘ ସମୟର ମୁଖ୍ୟମନ୍ତ୍ରୀ ହେବାର ସୌଭାଗ୍ୟ ହାସଲ କରିଛନ୍ତି।

ପୁରସ୍କାର ଗ୍ରହଣ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆୟୋଜକ କ୍ୟାପିଟାଲ ଫାଉଣ୍ଡେସନ ସୋସାଇଟକୁ ଧନ୍ୟବାଦ ପ୍ରଦାନ କରିଥିଲେ। ଏଥିସହିତ ଏହି ପୁରସ୍କାରକୁ ସେ ଓଡିଶା ସାଢେ ଚାରି କୋଟି ଲୋକଙ୍କୁ ସମର୍ପଣ କଲେ ବୋଲି ଘୋଷଣା କରିଥିଲେ। କାରଣରେ ସେ କହିଥିଲେ ଯେ, ଆଜି ଓଡିଶାର ଲୋକେ ମୋତେ 22 ବର୍ଷ ଧରି ଆର୍ଶିବାଦ ଦେଇଆସିଛନ୍ତି। ସେହିମାନଙ୍କ ବିଶ୍ବାସ ଆଜି ଓଡିଶାକୁ ସଶକ୍ତ କରିବା ମୋ ପାଇଁ ବଡ ଅସ୍ତ୍ର ବୋଲି ନବୀନ କହିଥିଲେ।

ମୁଖ୍ୟମନ୍ତ୍ରୀ ଆହୁରି କହିଥିଲେ ଯେ, ଓଡିଶା ବର୍ତ୍ତମାନ ବିଶ୍ବବାସୀଙ୍କ ପାଇଁ ଏକ ଉଦାହରଣ ପାଲଟିଛି। ପ୍ରାକୃତିକ ବିପର୍ଯ୍ୟୟ ମୁକାବିଲାରେ ଓଡିଶା ବିଶ୍ବରେ ଏକ ନୂଆ ଇତିହାସ ସୃଷ୍ଟି କରିଛି। ଏକଦା ଖାଦ୍ୟ ଅଭାବ ରାଜ୍ୟ ଆଜି ଖାଦ୍ୟ ବଳକା ରାଜ୍ୟ ଭାବେ ବିଶ୍ବ ନିକଟରେ ପରିଚିତ ହୋଇପାରିଛି ବୋଲି ମୁଖ୍ୟମନ୍ତ୍ରୀ କହିଥିଲେ। ସେହିପରି ସ୍ବାସ୍ଥ୍ୟ, ଶିକ୍ଷା ଗମାନଗମନ ଏବଂ ଶିଳ୍ପ କ୍ଷେତ୍ରରେ ଓଡିଶା ବେଶ ଆଗକୁ ଯାଇଛି ବୋଲି ମୁଖ୍ୟମନ୍ତ୍ରୀ କହିଥିଲେ।

ନୂଆଦିଲ୍ଲୀର କ୍ୟାପିଟାଲ ଫାଉଣ୍ଡେସନ ସୋସାଇଟ ଦ୍ବାରା ଆୟୋଜିତ ଏହି କାର୍ଯ୍ୟକ୍ରମରେ ବିଭିନ୍ନ କ୍ଷେତ୍ରରେ ପ୍ରତିଷ୍ଠା ଅର୍ଜନ କରିଥିବା କେତେକ ବ୍ୟକ୍ତିଙ୍କୁ ମଧ୍ୟ ପୁରସ୍କୃତ କରାଯାଇଥିଲା।