Tag: ନବୀନ ପଟ୍ଟନାୟକ

ଭୁବନେଶ୍ବର: ସାଧାରଣତନ୍ତ୍ର ଦିବସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସକାଳେ ପତାକା ଉତ୍ତୋଳନରେ ଯୋଗଦେବା ପାଇଁ  ଭୁବନେଶ୍ବରର ଗାନ୍ଧୀମାର୍ଗରେ ପହଁଚିଥିଲେ। ସେଠାରେ ସେ ରାଜ୍ୟପାଳଙ୍କ ସହିତ ମଞ୍ଚ ଉପରେ ରହିଥିଲେ। ପତାକା ଉତ୍ତୋଳନ ସହିତ ପରେଡରେ ସେ ରାଜ୍ୟପାଳଙ୍କ ସହିତ ଅଭିବାଦନ ମଧ୍ୟ ଗ୍ରହଣ କଲେ।

ସବୁ କାର୍ଯ୍ୟ ସରିବା ପରେ ରାଜ୍ୟପାଳ ଯିବାକୁ ବାହାରିଲେ। ଏହାପରେ ପରେ ମୁଖ୍ୟମନ୍ତ୍ରୀ ମଧ୍ୟ ଯିବାକୁ ବାହାରିଲେ। ମୁଖ୍ୟମନ୍ତ୍ରୀଙ୍କ କାରକେଡ ରାଜମାର୍ଗ ଦେଇ ନବୀନ ନିବାସ ଆଡକୁ ଯିବା କଥା। ହେଲେ କଣ ହେଲା କେଜାଣି ତାଙ୍କର କାରକେଡ ଲୋକସେବା ଭବନ ଆଡକୁ ଗଲା। ସମସ୍ତେ ଆଶ୍ଚର୍ଯ୍ୟ ମଧ୍ୟ ହୋଇପଡିଲେ।

ସେଠାରେ ଥିବା ସୁରକ୍ଷା କର୍ମି ମଧ୍ୟ ଚକିତ ହେଲେ। ସେମାନେ ଜାଣିପାରେ ନାହିଁ ଆଜି ଛୁଟି ଦିନରେ ଅଫିସ ବନ୍ଦ ଥିବା ବେଳେ ମୁଖ୍ୟମନ୍ତ୍ରୀ କଣ ପାଇଁ ଭିତରକୁ ଆସିଲେ। ନିୟମ ଅନୁସାରେ ସୁରକ୍ଷା କର୍ମି ଅଭିନନ୍ଦନ କରି ତାଙ୍କୁ ଭିତରକୁ ଛାଡିଲେ। ହେଲେ ଭିତରେ ତ ତାଲା ପଡିଛି। ସେମାନେ କଣ କରିବେ କିଛି ଜାଣିପାରିଲେ ନାହିଁ।

ମୁଖ୍ୟମନ୍ତ୍ରୀଙ୍କ କାର ପୂର୍ବରୁ ଯେପରି ଲୋକସେବା ଭବନର ଭିତରେ ଥିବା ମୁଖ୍ୟ ଫାଟକରେ ଲାଗେ ସେହିପରି ଲାଗିଲା। ମୁଖ୍ୟମନ୍ତ୍ରୀ କାରରୁ ଓହ୍ଲାଇଲେ। ତାଙ୍କ ସହିତ ତାଙ୍କର ବ୍ୟକ୍ତିଗତ ସଚିବ ଭି କେ ପାଣ୍ଡିୟାନ ମଧ୍ୟ ଓହ୍ଲାଇଲେ।

ହେଲେ ସେ ଲୋକସେବା ଭବନ ଭିତରକୁ ଗଲେ ନାହିଁ। ଲୋକସେବା ଭବନ ଆଗରେ ଥିବା ପାର୍କରେ ସେ ବୁଲିବା ଆରମ୍ଭ କଲେ। ତାଙ୍କ ଦେଖାଦେଖି ତାଙ୍କର ବ୍ୟକ୍ତିଗତ ସଚିବ ମଧ୍ୟ ତାଙ୍କ ସାଥୀରେ ବୁଲିଲେ। ଏପରିକି ସୁରକ୍ଷା କର୍ମି ମଧ୍ୟ ଅଳ୍ପ ବାଟ ପର୍ଯ୍ୟନ୍ତ ତାଙ୍କ ସାଥିରେ ଗଲେ। ମୁଖ୍ୟମନ୍ତ୍ରୀ କିଛି ସମୟ ସେହି ପାର୍କରେ ଏକା ଏକା ବୁଲିବାକୁ ଲାଗିଲେ। କେଉଁଠି କି ଫୁଲ ଫୁଟିଛି ତାହା ଦେଖିଲେ। ଏହାପରେ କାର ପାଖକୁ ଆସି ନବୀନ ନିବାସ ଗଲେ।

ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦେହ ଭାରି ଖରାପ, ସେ ଭେଣ୍ଟିଲେଟରରେ ଅଛନ୍ତି। ନିକଟରେ ଏପରି ଏକ ଖବରକୁ ନେଇ ସାରା ରାଜ୍ୟରେ ବେଶ୍ ଚହଳ ପକାଇଥିଲା। ଅନେକ ଡିଜିଟାଲ ଗଣମାଧ୍ୟମରେ ମଧ୍ୟ ଏହି ଖବର ପ୍ରଚାର କରାଗଲା। ଅନେକ ଦଳୀୟ କର୍ମି ମଧ୍ୟ ସେମାନଙ୍କର ସାମାଜିକ ଗଣମାଧ୍ୟମରେ ମଧ୍ୟ ଏହି ଖବର ପୋଷ୍ଟିଂ କଲେ। ଏହି ଖବରକୁ ନେଇ ଅନେକ ସାମ୍ବାଦିକ ଖୋଲତାଡ ମଧ୍ୟ ଆରମ୍ଭ କଲେ। ହେଲେ ଜଣାପଡିଲା ତାହା ସଂପୂର୍ଣ୍ଣ ମିଛ ଓ ଗୁଜବ ଥିଲା।

ଏହି ଖବର ଏପରି ପ୍ରଚାର କରାଯାଇଥିଲା ଯେ, ଯେ କେହି ତାହାକୁ ପଢିବ ସେ ସତ ବୋଲି ଭାବିବ। କାରଣ ଏଥର ଏହି ଖବରରେ କୁହାଯାଇଥିଲା ଯେ, ସେ ଆଉ ଘରୁ ଉଠିପାରୁ ନାହାଁନ୍ତି। ପାଞ୍ଚ ସାତ ଜଣ ଡାକ୍ତର ନବୀନ ନିବାସରେ ଅଛନ୍ତି। ସେଥିପାଇଁ ଗଣତନ୍ତ୍ର ଦିବସ ପତାକା ଉତ୍ତୋଳନରେ ମୁଖ୍ୟମନ୍ତ୍ରୀ ନାମ ରଖାଯାଇ ନାହିଁ ବୋଲି କହିଲେ। ଏହିପରି ଭିନ୍ନ ଭିନ୍ନ ଢଙ୍ଗରେ ନବୀନ ବିରୋଧୀମାନେ ବିଭିନ୍ନ ଅପ୍ରଚାର କରିବା ଆରମ୍ଭ କରିଦେଲେ।

ହେଲେ ଆଜି ସାଧାରଣତନ୍ତ୍ର ଦିବସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯେତେବେଳେ ରାଜରାସ୍ତାରେ ବୀର ଦର୍ପରେ ଚାଲିଚାଲି ସଭାମଞ୍ଚକୁ ଗଲେ, ସେତେବେଳେ ସେମାନଙ୍କ ମୁହଁ ଚୁପ। ନିର୍ବାଚନ କଟକଣା ପାଇଁ ନବୀନ କିଛିଦିନ କୌଣସି ବୈଠକ କରି ନ ଥିଲେ। ଯାହାକୁ ଏକ ବଡ ଅସ୍ତ୍ର କଲେ ନବୀନ ବିରୋଧୀ। ଆଉ ତାହା ସତ ବୋଲି ଅପ୍ରଚାର ଆରମ୍ଭ କରିଦେଲେ। ହେଲେ ଗାନ୍ଧୀମାର୍ଗରେ ମୁଖ୍ୟମନ୍ତ୍ରୀ ବୀର ଦର୍ପରେ ଚାଲିବା ସେମାନଙ୍କୁ ହତବାକ କରି ଦେଇଛି।

ତେବେ ଏବେ ନୁହେଁ ଦୀର୍ଘ ବର୍ଷ ଧରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦେହ ଖରାପ ବୋଲି ଏକ ଅପ୍ରଚାରର ନବୀନ ବିରୋଧୀ ଚଳାଇଛନ୍ତି। ଏପରିକି ବିଜେପି ନେତା ବୈଜୟନ୍ତ ପଣ୍ଡାଙ୍କ ପରିବାର ପରିଚାଳିତ ଇଲଟ୍ରୋନିକ ଗଣମାଧ୍ୟମ ଓଟିଭିରେ ମଧ୍ୟ ଏହି ଖବର ସେତେବେଳେ ପ୍ରଚାର କରାଯାଇଥିଲା। ମୁଖ୍ୟମନ୍ତ୍ରୀ ଦେହ ଗୁରୁତର ବୋଲି କହି ସେହି ଚ୍ୟାନେଲ ସେତେବେଳେ ବାରମ୍ବାର ପ୍ରଚାର କରିଥିଲା। ପରିସ୍ଥିତି ଏପରି ହେଲା ଯେ, ମୁଖ୍ୟମନ୍ତ୍ରୀ ନିଜେ ମୁଁ ସୁସ୍ଥ ଅଛି ବୋଲି ସଫେଇ ଦେବାକୁ ବାଧ୍ୟ ହୋଇଥିଲେ।

ସେମିତି କିଛିବର୍ଷ ତଳେ ଜଣେ ଆରଟିଆଇ କର୍ମି ଭିନ୍ନ ଏକ ପ୍ରସଂଗରେ ସାମ୍ବାଦିକ ସମ୍ମିଳନୀ କରିଥିଲେ। ସେହି ସାମ୍ବାଦିକ ସମ୍ମିଳନୀରେ ସେ ତାଙ୍କ ପ୍ରସଂଗ ଉପରେ ଯେତିକି ଗୁରୁତ୍ବ ଦେଇ ନ ଥିଲେ ମୁଖ୍ୟମନ୍ତ୍ରୀଙ୍କ ଦେହ ଖରାପ ଖବରଟି ବାରମ୍ବାର ପ୍ରଚାର କରିଥିଲେ। ସେ ଏପରି କହିଥିଲେ ଯେ, ସେତେ ଯେମିତି ସେ ନବୀନ ନିବାସ ଯାଇ ମୁଖ୍ୟମନ୍ତ୍ରୀଙ୍କୁ ଦେଖି ଆସିଛନ୍ତି। ତାଙ୍କର ଏହି ଖବର ନବୀନ ବିରୋଧୀଙ୍କୁ ବେଶ୍ ଖୋରାକ ଯୋଗାଇଥିଲା। ଆଉ ସେମାନେ ବିଭିନ୍ନ ସାମାଜିକ ଗଣମାଧ୍ୟମରେ ଏହାର ପ୍ରଚାର କରାଇଥିଲେ। ଏହାର ଠିକ ଅଳ୍ପଦିନ ପରେ ମୁଖ୍ୟମନ୍ତ୍ରୀ ପୁରୀ ଯାଇ ଚାରିପଟେ ଚାଲିଚାଲି ବୁଲି ଆସିଲେ।

ବୋଧହୁଏ ବିରୋଧୀମାନେ ଜାଣିସାରିଲେଣି ଯେ, ନବୀନଙ୍କୁ ହରାଇବାକୁ ଆଉ କୌଣସି ଅସ୍ତ୍ର କାମ ଦେଉ ନାହିଁ। ଫଳରେ ହତାସ ହୋଇ ସେମାନେ ନବୀନଙ୍କ ଦେହ ଖରାପ ଖବରଟି ଅପ୍ରଚାର କରାଇବାରେ ଲାଗିଛନ୍ତି। ହେଲେ ସେମାନେ ଡାଳରେ ଡାଳରେ ଯାଉଥିବା ବେଳେ ନବୀନ ପତରରେ ପତରରେ ଯାଇ ତାଙ୍କୁ ମୁହଁ ତୋଡ ଜବାବ ଦେଉଛନ୍ତି। ତେବେ ଏପରି ଅପ୍ରଚାରରେ ନବୀନ ବିରୋଧୀଙ୍କର ଯେଉଁ ଉଦ୍ଦେଶ୍ୟ ରହୁଛି ତାହା ଫଳପ୍ରଦ ହୋଇପାରୁ ନାହିଁ।ଅନ୍ୟପଟେ ବିରୋଧୀଙ୍କ ଏପରି ଅପ୍ରଚାର ଯୋଗୁଁ ନବୀନଙ୍କ ପ୍ରତି ଲୋକଙ୍କର ଶ୍ରଦ୍ଧା ଆହୁରି ବଢିବାରେ ଲାଗିଛି।

(ଏଥିରେ ସଂଲଗ୍ନ ଫଟୋଟି ଆଜି ଗଣତନ୍ତ୍ର ଦିବସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଯୋଗ ଦେବାକୁ ଯାଉଥିବା ସମୟରେ ଉତ୍ତୋଳନ କରାଯାଇଛି।)

ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ସୁନ୍ଦରଗଡ ସଦର ବ୍ଲକ୍ ଅନ୍ତର୍ଗତ କୋପସିଂଗା ଓ କୁଡାବଙ୍ଗା ଠାରେ ୪୯୩ କୋଟି ଟଙ୍କା ବ୍ୟୟ ଅଟକଳରେ ଇବ୍ ନଦୀ ଉପରେ ନିର୍ମାଣ ହେବାକୁ ଥିବା ଦୁଇଟି ବ୍ୟାରେଜର ଶିଳାନ୍ୟାସ କରିଛନ୍ତି । ଏହି ଦୁଇଟି ପ୍ରକଳ୍ପ କାର୍ଯ୍ୟ ଆଗାମୀ ୨ ବର୍ଷରେ ଶେଷ ହେବ ଏବଂ ଏହାଦ୍ବାରା ସୁନ୍ଦରଗଡ ମ୍ୟୁନିସପାଲଟି, ସୁନ୍ଦରଗଡ ସଦର ବ୍ଲକ୍, ଲେଫ୍ରିପଡା, ବାଲିଶଂକରା ଓ ଟାଙ୍ଗରପାଲି ଆଦି ବ୍ଲକ୍ର ୪୭ ହଜାର ଲୋକ ଉପକାର ପାଇବେ।

ଏହାସହିତ ୪୮୮ ହେକ୍ଟର ଜମିକୁ ଜଳସେଚନ ସୁବିଧା ମିଳିବ। ଉପରୋକ୍ତ ବ୍ଲକ୍ଗୁଡିକରେ ଘରେ ଘରେ ପାନୀୟ ଜଳଯୋଗାଣ ସୁବିଧା ହୋଇପାରିବ ଓ ମତ୍ସ୍ୟଜୀବୀ ମାନେ ଏହି ବ୍ୟାରେଜରେ ମାଛ ଚାଷ କରି ଜୀବିକା ଉପର୍ଜନ କରିପାରିବେ। ଏହି ଦୁଇଟି ବ୍ୟାରେଜ ଉପରେ ବ୍ରିଜ କରାଯାଉଥିବାରୁ ଲେଫ୍ରିପଡା ଓ ଟାଙ୍ଗରପଲ୍ଲୀ ବ୍ଲକ୍ର ଲୋକମାନେ ରାଉରକେଲା ସହିତ ସିଧାସଳଖ ଯୋଗାଯୋଗ ସୁବିଧା ପାଇବେ ।

ମୁଖ୍ୟମନ୍ତ୍ରୀ କହିଥିଲେ ଯେ ସୁନ୍ଦରଗଡ ହେଉଛି ଓଡିଶାର ବିକାଶର ବତୀ ଘର । ରାଉରକେଲା ସହର, ରାଉରକେଲା ଷ୍ଟିଲ୍‌ ପ୍ଲାଣ୍ଟ ଓ ରାଉରକେଲାର NIT ଓଡିଶାର ଗୌରବ ବୃଦ୍ଧି କରିଛି । ଏହି ତିନୋଟିଯାକ ଗୁରୁତ୍ବପୁର୍ଣ୍ଣ ପ୍ରକଳ୍ପରେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ସ୍ମୃତି ଜଡିତ ବୋଲି ମୁଖ୍ୟମନ୍ତ୍ରୀ କହିଥିଲେ । ମୁଖ୍ୟମନ୍ତ୍ରୀ କହିଥିଲେ ଯେ ସୁନ୍ଦରଗଡ ସାରା ଦେଶକୁ ବହୁତ କିଛି ଦେଇଛି । ସୁନ୍ଦରଗଡର କୋଇଲା, ଦେଶକୁ ଶକ୍ତି ଯୋଗାଉଛି । ସୁନ୍ଦରଗଡ ରେ ଏସିଆର ସବୁଠୁ ବଡ ହକି ଷ୍ଟାଡିୟମ ହେବାକୁ ଯାଉଛି ।

ସୁନ୍ଦରଗଡର ହକି ଖେଳାଳୀମାନେ ଦେଶ ପାଇଁ ଗୌରବ ଆଣିଛନ୍ତି ଓ ଗର୍ବିତ କରିଛନ୍ତି । ତେଣୁ ସୁନ୍ଦରଗଡରେ AIIMS ସୁନ୍ଦରଗଡବାସୀଙ୍କର ହକ୍‌ ବୋଲି ମୁଖ୍ୟମନ୍ତ୍ରୀ କହିଥିଲେ। ସୁନ୍ଦରଗଡରେ ୫-ଟି ସ୍କୁଲ ଟ୍ରାନ୍ସଫରମେସନ୍‌ ଠାରୁ ଆରମ୍ଭ କରି ମିଶନ ଶକ୍ତି ପର୍ଯ୍ୟନ୍ତ ବିଭିନ୍ନ କାର୍ଯ୍ୟକ୍ରମର ସଫଳ କାର୍ଯ୍ୟକାରୀତା ପାଇଁ ମୁଖ୍ୟମନ୍ତ୍ରୀ ଆନନ୍ଦ ପ୍ରକାଶ କରିବା ସହିତ ଜିଲ୍ଲାର ବହୁ ଲୋକ ବିଜୁ ସ୍ବାସ୍ଥ୍ୟ କଲ୍ୟାଣ ସ୍ମାର୍ଟ ହେଲ୍‌ଥ କାର୍ଡର ସୁଯୋଗ ନେଇ ଉନ୍ନତ ଚିକିତ୍ସା ସୁବିଧା ପାଉଥିବାରୁ ମୁଖ୍ୟମନ୍ତ୍ରୀ ସନ୍ତୋଷ ପ୍ରକାଶ କରିଥିଲେ ।

ରାଜ୍ୟ ସରକାର ବିଭିନ୍ନ ବିକାଶ ଓ କଲ୍ୟାଣ କାର୍ଯ୍ୟକ୍ରମର ସୁଯୋଗ ନେଇ ନୂଆ ଓଡିଶା ଗଠନରେ ନିଜ ନିଜର ଅବଦାନ ରଖିବା ପାଇଁ ସମସ୍ତଙ୍କୁ ମୁଖ୍ୟମନ୍ତ୍ରୀ ଆହ୍ବାନ ଜଣାଇଥିଲେ। କାର୍ଯ୍ୟକ୍ରମରେ ଯୋଗ ଦେଇ ବିଧାୟକ ତଥା ସୁନ୍ଦରଗଡ ଜିଲ୍ଲା ଯୋଜନା କମିଟିର ଅଧ୍ୟକ୍ଷ ସାରଦା ନାୟକ ଜିଲ୍ଲାର ବିଭିନ୍ନ ବିକାଶ ପାଇଁ ମୁଖ୍ୟମନ୍ତ୍ରୀ ଯେଭଳି ପଦକ୍ଷେପ ନେଇଛନ୍ତି, ସେଥିପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଥିଲେ।

ଜଳସଂପଦ ବିଭାଗର ପ୍ରମୁଖ ସଚିବ ଶ୍ରୀମତୀ ଅନୁ ଗର୍ଗ ତାଙ୍କ ସ୍ବାଗତ ଭାଷଣରେ Construction of in-stream Storage Structure ସଂପର୍କରେ ଅବତାରଣା କରିଥିଲେ । ବିଭାଗୀୟ ଯନ୍ତ୍ରୀମୁଖ୍ୟ ଧନ୍ୟବାଦ ଅର୍ପଣ କରିଥିଲେ। ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଶ୍ରୀ ଭି.କେ. ପାଣ୍ଡିଆନ କାର୍ଯ୍ୟକ୍ରମ ପରିଚାଳନା କରିଥିଲେ। ବୈଠକରେ ମୁଖ୍ୟଶାସନ ସଚିବ ଓ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।

ଭୁବନେଶ୍ବର: ମିଶନ ଶକ୍ତି ଆନ୍ଦୋଳନର ଗୁରୁତ୍ବ ତଥା ଗୋଷ୍ଠୀ ସହାୟକ କର୍ମଚାରୀମାନଙ୍କ ଅନୁରୋଧ କ୍ରମେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟରେ ବିଭିନ୍ନ ପଞ୍ଚାୟତରେ ସେବା ଯୋଗାଉଥିବା ୫୦ ହଜାର ଗୋଷ୍ଠୀ ସହାୟକ କର୍ମଚାରୀ ମାନଙ୍କ ପାଇଁ ଏକ ଆର୍ଥିକ ପ୍ୟାକେଜ ଘୋଷଣା କରିଛନ୍ତି । ତାହା ହେଲା…

୧. ସମସ୍ତ ଗୋଷ୍ଠୀ ସହାୟକ କର୍ମଚାରୀ ମାନଙ୍କୁ ବାର୍ଷିକ ପୋଷାକ ଭତ୍ତା ଭାବରେ ୧୦୦୦ ଟଙ୍କା ମିଳିବ ।

୨. ସମସ୍ତଙ୍କୁ ପରିଚୟ ପତ୍ର ଯୋଗାଇ ଦିଆଯିବ।

୩. ସେମାନଙ୍କ ପସନ୍ଦର ସ୍ମାର୍ଟ ଫୋନ କିଣିବା ପାଇଁ ଗୋଷ୍ଠୀ ସହାୟକ କର୍ମାଚାରୀମାନଙ୍କୁ ଏକକାଳୀନ ୫୦୦୦ ଟଙ୍କା ସହାୟତା ଯୋଗାଇ ଦିଆଯିବ।

୪. ସବୁ CRP- CM ମାନଙ୍କୁ ପାରିଶ୍ରମିକ ଭାବରେ ମାସିକ ୩୦୦୦ ଟଙ୍କା ପ୍ରଦାନ କରାଯିବ ।

୫. ସବୁ CRP- CM ମାନଙ୍କୁ ଗସ୍ତ ଖର୍ଚ୍ଚ ବାବଦ ମାସିକ ୩୫୦ ଟଙ୍କା ପ୍ରଦାନ କରାଯିବ ।

୬. ଟେଲିଫୋନ ଭତ୍ତା ବାବଦରେ CRP- CM ମାନଙ୍କୁ ମାସିକ ୧୫୦ ଟଙ୍କା ପ୍ରଦାନ କରାଯିବ । ଯାହାଫଳରେ ଏହା ବୃଦ୍ଧି ପାଇ ୨୫୦ ଟଙ୍କାରେ ପହଞ୍ଚିବ ।

ଏହି ପ୍ୟାକେଜକୁ ତୁରନ୍ତ କାର୍ଯ୍ୟକାରୀ କରିବା ପାଇଁ ରାଜ୍ୟ ସରକାର ଆବଶ୍ୟକ ଆର୍ଥିକ ବ୍ୟବସ୍ଥା କରିଛନ୍ତି ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।

ମିଶନ ଶକ୍ତି ଆନ୍ଦୋଳନକୁ ଆହୁରି ଆଗକୁ ନେବାରେ ପଞ୍ଚାୟତ ସ୍ତରରେ କାମ କରୁଥିବା ଏହି ଗୋଷ୍ଠୀ ସହାୟକ କର୍ମଚାରୀ ମାନଙ୍କର ମହତ୍ତ୍ବପୂର୍ଣ୍ଣ ଭୂମିକା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସେମାନଙ୍କୁ ଧନ୍ୟବାଦ ଜଣାଇଛନ୍ତି। ରୂପାନ୍ତରିତ ଓଡ଼ିଶା ଗଠନ ଦିଗରେ ଅଧିକ ପରିଶ୍ରମ କରିବାକୁ ଏହି ଆର୍ଥିକ ପ୍ୟାକେଜ ସେମାନଙ୍କୁ ଉତ୍ସାହିତ କରିବ ବୋଲି ମୁଖ୍ୟମନ୍ତ୍ରୀ ଆଶା ପୋଷଣ କରିଛନ୍ତି ।

ମିଶନ ଶକ୍ତି ଆନ୍ଦୋଳନ ଆଜି ଓଡିଶାର ୭୦ ଲକ୍ଷ ମହିଳାମାନଙ୍କ ଜୀବନରେ ଏକ ବଡ ଧରଣର ପରିବର୍ତ୍ତନ ଆଣିଛି । ଚଳିତ ବର୍ଷ ମିଶନ ଶକ୍ତି ମା ମାନଙ୍କୁ ରେକର୍ଡ ୬୦୦୦ କୋଟି ଟଙ୍କାର ବ୍ୟାଙ୍କ ଋଣ ପ୍ରଦାନ କରାଯାଇଛି। ତା ସହିତ ସୁଧ ରିହାତି ବାବଦରେ ମଧ୍ୟ ୨୦୦ କୋଟି ଟଙ୍କା ମା ମାନଙ୍କ ବ୍ୟାଙ୍କ ଖାତାରେ ଜମା କରାଯାଇଛି ।

ରାଜ୍ୟ କ୍ୟାବିନେଟର ନିଷ୍ପତ୍ତି କ୍ରମେ ଧାନ ସଂଗ୍ରହ ଠାରୁ ଆରମ୍ଭ କରି ଡାକ୍ତରଖାନାରେ ରୋଗୀଙ୍କୁ ଖାଦ୍ୟ ଯୋଗାଣ, ଆହର କେନ୍ଦ୍ର ପରିଚାଳନା, ମାଛ ଚାଷ ଆଦି ବିଭିନ୍ନ ସରକାରୀ କାମ ମଧ୍ୟ ମିଶନ ଶକ୍ତି ମା ମାନଙ୍କୁ ଯୋଗାଇ ଦିଆଯାଇଛି ।

ମିଶନ ଶକ୍ତି କାର୍ଯ୍ୟକ୍ରମକୁ ଅଧିକ ଶକ୍ତି ତଥା ଗତି ଯୋଗାଇ ଦେବା ସହିତ ସୁସମନ୍ବୟ ପ୍ରତିଷ୍ଠା ପାଇଁ ରାଜ୍ୟ ସରକାର ମିଶନ ଶକ୍ତି ନାମରେ ଏକ ସ୍ବତନ୍ତ୍ର ବିଭାଗ ସୃଷ୍ଟି କରିଛନ୍ତି । ବର୍ତ୍ତମାନ ସମସ୍ତ ସ୍ବୟଂ ସହାୟକ ଗୋଷ୍ଠୀ ମହାସଂଘ ମାନେ ଗୋଟିଏ ପ୍ଲାଟଫର୍ମରେ କାମ କରୁଛନ୍ତି । ଗ୍ରାମପଞ୍ଚାୟତ ସ୍ତରୀୟ ମହାସଂଘ ଗୁଡିକ ହେଉଛି – ସ୍ବୟଂ ସହାୟକ ଗୋଷ୍ଠୀ ମାନଙ୍କର ତୃଣମୂଳ ଅନୁଷ୍ଠାନ । ଏହି ମହାସଂଘ ମାନେ ସ୍ବୟଂ ସହାୟକ ଗୋଷ୍ଠୀ ଗୁଡିକୁ ସେମାନଙ୍କ ନିଷ୍ପତ୍ତି ଗ୍ରହଣ ପ୍ରକ୍ରିୟା ସହିତ ଆର୍ଥିକ ଅନ୍ତର୍ଭୁକ୍ତୀକରଣ, ଜୀବିକା ଓ ଦକ୍ଷତାର ବିକାଶ ତଥା ସେମାନଙ୍କର ଆନୁଷ୍ଠାନିକ ଦକ୍ଷତା ବିକାଶ ଦିଗରେ ସହାୟକ ଭୂମିକା ଗ୍ରହଣ କରିଆସୁଛି ।

ଏହି ଗ୍ରାମପଞ୍ଚାୟତସ୍ତରୀୟ ମହାସଂଘ ଗୁଡିକୁ ମାଷ୍ଟର ବୁକ୍‌ କିପର, ବ୍ୟାଙ୍କ ମିତ୍ର, କୃଷି ମିତ୍ର, ପ୍ରାଣୀ ମିତ୍ର, Community Resource Person – Community Mobiliser (CRP-CM) ଆଦି ଗୋଷ୍ଠୀ ସହାୟକ କର୍ମଚାରୀମାନେ ସହାୟତା ଯୋଗାଇ ଦେଉଛନ୍ତି। ରାଜ୍ୟରେ ମିଶନ ଶକ୍ତି ଆନ୍ଦୋଳନକୁ ସୁଦୃଢ କରିବାରେ ଏହି ସହାୟକ କର୍ମଚାରୀ ମାନଙ୍କର ଗୁରୁତ୍ବପୂର୍ଣ୍ଣ ଭୂମିକା ରହିଛି ।

ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଭିଡିଓ କନ୍‌ଫରେସନ୍‌ସିଂ ମାଧ୍ୟମରେ କଟକ ସହର ପାଇଁ ୨୪ ଘଣ୍ଟିଆ ପାନୀୟ ଜଳ ଯୋଗାଣ ବ୍ୟବସ୍ଥାର ଲୋକାର୍ପଣ କରିଛନ୍ତି। ମୁଖ୍ୟମନ୍ତ୍ରୀ ଉଦ୍‌ଘାଟନ କରିଥିବା ପାନୀୟ ଜଳ କାର୍ଯ୍ୟକ୍ରମ ଦ୍ବାରା କଟକ ସହରର ସବୁ ପରିବାର ୨୪ ଘଣ୍ଟିଆ ପାଇପ ପାଣିର ସୁବିଧା ପାଇପାରିଛନ୍ତି। ଏହାଦ୍ବାରା ସହରର ୧ ଲକ୍ଷ ୪୦ ହଜାର ପରିବାରର ୭ ଲକ୍ଷ ଲୋକ ଉପକୃତ ହୋଇଛନ୍ତି । ଏଥିପାଇଁ ୭୯୦ କୋଟି ଟଙ୍କା ଖର୍ଚ୍ଚ କରାଯାଇଛି।

ଏହି ଅବସରରେ ମୁଖ୍ୟମନ୍ତ୍ରୀ ଖୁସି ପ୍ରକାଶ କରି କହିଲେ ଯେ କଟକ ସହିତ ରାଜ୍ୟର ୬୦ଟି ସହରର ସବୁ ପରିବାରକୁ ୨୪ ଘଣ୍ଟିଆ ପାଇପ ପାଣିର ସୁବିଧା ଦିଆଯାଇଛି। ଖୁବଶୀଘ୍ର ରାଜ୍ୟର ସମସ୍ତ ୧୧୪ଟି ସହରରେ ସବୁ ପରିବାରକୁ ୨୪ ଘଣ୍ଟିଆ ପାଇପ ପାଣିର ସୁବିଧା ଯୋଗାଇ ଦିଆଯିବ।

ଏହି ଅବସରରେ ମୁଖ୍ୟମନ୍ତ୍ରୀ କଟକର ଦୁଇଟି ଜୋନ୍‌ରେ Drink from Tap କାର୍ଯ୍ୟକ୍ରମର ଉଦ୍‌ଘାଟନ କରିବା ସହିତ ସାରା ସହର ପାଇଁ Drink from Tap କାର୍ଯ୍ୟକ୍ରମ ପାଇଁ ଭିତ୍ତିସ୍ଥାପନ କରିଥିଲେ । ଏହି କାର୍ଯ୍ୟକ୍ରମ ପାଇଁ ୩୬୦ କୋଟି ଟଙ୍କା ବିନିଯୋଗ କରାଯିବ। ଡିସେମ୍ବର ୨୦୨୩ ସୁଦ୍ଧା ପୁରା ସହରକୁ Drink from Tap କାର୍ଯ୍ୟକ୍ରମ ଜରିଆରେ ବିଶୁଦ୍ଧ ପାନୀୟ ଜଳ ଯୋଗାଇ ଦିଆଯିବ ବୋଲି ମୁଖ୍ୟମନ୍ତ୍ରୀ କହିଥିଲେ।

ସେ କହିଥିଲେ ଯେ, ରାଜ୍ୟ ସରକାରଙ୍କ ୫-ଟି ଆଭିମୁଖ୍ୟରେ ଆରମ୍ଭ ହୋଇଥିବା ଆମର ଏହି କାର୍ଯ୍ୟକ୍ରମ କେବଳ ସାରା ଦେଶ ନୁହେଁ, ସାରା ପୃଥିବୀର ବିକାଶଶୀଳ ରାଷ୍ଟ୍ରମାନଙ୍କ ପାଇଁ ଏକ ରୋଲ ମଡେଲ ହୋଇପାରିଛି। ଏହି କାର୍ଯ୍ୟକ୍ରମ ପାନୀୟ ଜଳ ଯୋଗାଣ ପାଇଁ ହୋଇଥିବା ଜାତୀୟ ନୀତିରେ ମଧ୍ୟ ଅନୁସୃତ ହୋଇଛି ଏବଂ ଅମୃତ ୨.୦ରେ ସାମିଲ ମଧ୍ୟ ହୋଇଛି ବୋଲି ସେ କହିଥିଲେ।

ଏହାସହିତ ମୁଖ୍ୟମନ୍ତ୍ରୀ ୪୩୦ କୋଟି ଟଙ୍କାରେ ନିର୍ମିତ ୩ଟି Water Treatment Plantର ଉଦ୍‌ଘାଟନ ମଧ୍ୟ କରିଥିଲେ । ମୁଖ୍ୟମନ୍ତ୍ରୀ କହିଥିଲେ ଯେ ଭଲ ପିଇବା ପାଣି ଆମ ସମସ୍ତଙ୍କ ପାଇଁ ଗୁରୁତ୍ବପୂର୍ଣ୍ଣ । ବିଶୁଦ୍ଧ ଓ ନିରାପଦ ପାନୀୟ ଜଳ ଯୋଗାଇ ଦେବାରେ ଆମର ଉଦ୍ୟମ ଜନସାଧାରଣଙ୍କ ଉତ୍ତମ ସ୍ବାସ୍ଥ୍ୟ ପାଇଁ ମଧ୍ୟ ବହୁତ ଗୁରୁତ୍ବପୂର୍ଣ୍ଣ ବୋଲି ସେ କହିଥିଲେ ।ଏହି ଅବସରରେ କରୋନାର ନୂଆ ଭାରିଏଣ୍ଟ ଓମିକ୍ରନ ସଂପର୍କରେ ଜନସାଧାରଣଙ୍କୁ ସତର୍କ କରି ମୁଖ୍ୟମନ୍ତ୍ରୀ ସେମାନଙ୍କୁ କୋଭିଡ ନିୟମ ମାନିବା ପାଇଁ ଅନୁରୋଧ କରିଥିଲେ ।

କାର୍ଯ୍ୟକ୍ରମରେ ଯୋଗ ଦେଇ ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ଶ୍ରୀ ପ୍ରତାପ ଜେନା କହିଲେ ଯେ ମୁଖ୍ୟମନ୍ତ୍ରୀ କଟକ ସହରର ବିକାଶ ପାଇଁ ସବୁବେଳେ ଗୁରୁତ୍ବ ଦେଇଆସିଛନ୍ତି ଏବଂ ସବୁ କାର୍ଯ୍ୟକ୍ରମ ପାଇଁ ତୁରନ୍ତ ବ୍ୟବସ୍ଥା କରିଆସିଛନ୍ତି । ୨୦୨୨ରେ କଟକରେ ୪ଟି ଗୁରୁତ୍ବପୂର୍ଣ୍ଣ ପ୍ରକଳ୍ପ ଲୋକାର୍ପିତ ହେବ ଏବଂ କଟକ ସହରର ବିକାଶ କ୍ଷେତ୍ରରେ ଏକ ନୂଆ ଯୁଗ ଆରମ୍ଭ ହେବ ବୋଲି ସେ କହିଥିଲେ ।

ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଶ୍ରୀ ଭି.କେ. ପାଣ୍ଡିଆନ କାର୍ଯ୍ୟକ୍ରମ ପରିଚାଳନା କରିଥିଲେ।ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ପ୍ରମୁଖ ସଚିବ ଜି. ମାଥିଭାତନନ୍ ସ୍ବାଗତ ଭାଷଣ ଦେଇଥିଲେ ଏବଂ କଟକ ମ୍ୟୁନିସପାଲ କମିଶନର ଅନନ୍ୟା ଦାସ ଧନ୍ୟବାଦ ଅର୍ପଣ କରିଥିଲେ । କାର୍ଯ୍ୟକ୍ରମରେ ସାଂସଦ ସୁବାସ ସିଂହ, ବିଧାୟକ ଚନ୍ଦ୍ରସାରଥୀ ବେହେରା, ମୁଖ୍ୟ ଶାସନ ସଚିବ ଓ ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।

ଭୁବନେଶ୍ବର: ନୂଆବର୍ଷ ଉପଲକ୍ଷେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସରକାରୀ କର୍ମଚାରୀଙ୍କୁ ଦେଇଛନ୍ତି ନୂଆ ଭେଟି। ରାଜ୍ୟ ସରକରୀ କର୍ମଚାରୀଙ୍କ ମହଙ୍ଗା ଭତ୍ତାରେ ତିନି ପ୍ରତିଶତ ବୃଦ୍ଧି କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଆଜି ଏ ନେଇ ସେ ଏକ ବଡ ଘୋଷଣା କରିଛନ୍ତି।

ଏହା ଫଳରେ ସରକାରୀ କର୍ମଚାରୀଙ୍କ ମହଙ୍ଗା ଭତ୍ତା ୨୮ ପ୍ରତିଶତରୁ ୩୧ ପ୍ରତିଶତକୁ ବୃଦ୍ଧି ପାଇଲା। ଏହା ୨୦୨୧ ଜୁଲାଇ ଏକ ତାରିଖରୁ ପିଚ୍ଛିଲା ଭାବରେ ଲାଗୁ ହେବ। ସଂଶୋଧିତ ହାରରେ ପେନ୍‌ସନ ପାଉଥିବା ପେନ୍‌ସନଭୋଗୀମାନଙ୍କ ଟି.ଆଇ ରେ ମଧ୍ୟ ତିନି ପ୍ରତିଶତ ବୃଦ୍ଧି କରାଯାଇଛି। ଏହାଦ୍ବାରା ରାଜ୍ୟର ସାଢେ ସାତ ଲକ୍ଷ ସରକାରୀ କର୍ମଚାରୀ ତଥା ପେନ୍‌ସନଭୋଗୀ ଉପକୃତ ହେବେ ।

ଏହା ସହିତ ସପ୍ତମ ବେତନ କମିଶନ ବାବଦ ୩୦ ପ୍ରତିଶତ ବକେୟା ଅର୍ଥ ପ୍ରଦାନ କରିବା ପାଇଁ ମଧ୍ୟ ମୁଖ୍ୟମନ୍ତ୍ରୀ ନିଷ୍ପତ୍ତି ନେଇଛନ୍ତି । ସୂଚନାଯୋଗ୍ୟ ଯେ କର୍ମଚାରୀମାନେ ସପ୍ତମ ବେତନ କମିସନ ଅନୁଯାୟୀ ଜାନୁଆରୀ ୨୦୧୬ରୁ ଅଗଷ୍ଟ ୨୦୧୭ ମଧ୍ୟରେ ବର୍ଦ୍ଧିତ ଦରମାର ୫୦ ପ୍ରତିଶତ ପାଇ ସାରିଛନ୍ତି। ଏହାଦ୍ବାରା ରାଜ୍ୟର ୪ ଲକ୍ଷ ସରକାରୀ କର୍ମଚାରୀ ଉପକୃତ ହେବେ ।

ଭୁବନେଶ୍ବର: ଡିସେମ୍ବର 26 ତାରିଖ, ଠିକ 1997 ମସିହା ଆଜିର ଦିନରେ ଓଡିଶାରେ ପ୍ରତିଷ୍ଠା ହୋଇଥିଲା ଏକ ଆଞ୍ଚଳିକ ରାଜନୈତିକ ଦଳ, ଯାହାର ନାମ ବିଜୁ ଜନତା ଦଳ। ଏହାର ପ୍ରତିଷ୍ଠାତା ହେଲେ ନବୀନ ପଟ୍ଟନାୟକ। ଆଜି ଏହି ଦଳକୁ 25 ବର୍ଷ ପୁରିଲା। ଗୋଟିଏ ଆଞ୍ଚଳିକ ଦଳ ଭାବେ 25 ବର୍ଷ ସଫଳତାର ସହ ବିତାଇବା କିଛି କମ କଥା ନୁହେଁ। ଏହି 25 ବର୍ଷ ଭିତରେ ବିଜେଡି 21 ବର୍ଷ ଧରି ଓଡିଶାର ଶାସନ ଗାଦୀରେ ରହିଆସୁଛି। ଏତେ ବର୍ଷ ଧରି ନବୀନ ମୁଖ୍ୟମନ୍ତ୍ରୀ ରହିବା, ତାହା ପୁଣି ସଫଳତାର ସହ, ଭାରତ ରାଜନୈତିକ ଇତିହାସରେ ଏକ ବିରଳ ଉଦାହରଣ ବୋଲି କହିଲେ ଅତ୍ୟୁକ୍ତି ହେବ ନାହିଁ।

ତେବେ ସାଧାରଣରେ ପ୍ରଶ୍ନ ଉଠେ ଯେ, ନବୀନ ପଟ୍ଟନାୟକଙ୍କ ପାଖରେ କଣ ଏପରି ଯାଦୁ ରହିଛି ଯେ, ଓଡିଶା ଜନସାଧାରଣ ତାଙ୍କୁ ପାଞ୍ଚଥର ମୁଖ୍ୟମନ୍ତ୍ରୀ କରାଇଛନ୍ତି। ଏହି ପ୍ରସଂଗକୁ ନେଇ ଚାରିଆଡେ ଚର୍ଚ୍ଚା। କାରଣ 2014 ଏବଂ 2019 ରେ ସାରା ଦେଶରେ ମୋଦି ଲହର ଖେଳୁଥିବା ବେଳେ ଓଡିଶାରେ ନବୀନଙ୍କ ପାଖରେ ସେହି ଲହର କାମ ଦେଲା ନାହିଁ। ରାଜ୍ୟରେ ବିରୋଧୀ ବିଜେପି ଆକ୍ରମଣାତ୍ମକ ରାଜନୀତି କରୁଥିଲେ ମଧ୍ୟ ନବୀନଙ୍କୁ ଦୋହଲାଇପାରୁ ନାହିଁ।

ସାଧାରଣତଃ ଲୋକମାନେ ପାଞ୍ଚ ବର୍ଷ ଗୋଟିଏ ଦଳକୁ ସରକାର ଗଠନ ପାଇଁ ସୁଯୋଗ ଦେଇ ପରବର୍ତ୍ତି ସମୟରେ ବଦଳାଇ ଦିଅନ୍ତି। ହେଲେ ନୀବନଙ୍କ ପାଖରେ ତାହା ଲାଗୁ ହୋଇପାରୁ ନାହିଁ। ନବୀନ 2000 ମସିହା ମାର୍ଚ୍ଚ 5 ତାରିଖରେ ପ୍ରଥମେ ମୁଖ୍ୟମନ୍ତ୍ରୀ ଭାବେ ଶପଥ ନେଲେ। ସେବେଠାରୁ ତାଙ୍କୁ ଓଡିଶାର ଲୋକେ ଶାସନ ଗାଦୀରେ ବସାଇଛନ୍ତି। ଆଶ୍ଚର୍ଯ୍ୟର କଥା ଏବେ ବି ମଧ୍ୟ ସେ ଲୋକପ୍ରିୟ ମୁଖ୍ୟମନ୍ତ୍ରୀ ଭାବେ ପରିଚିତ ଅଛନ୍ତି। ଦିନକୁ ଦିନ ତାଙ୍କ ଲୋକପ୍ରିୟତା ବଢୁଛି ସିନା କେବେ ବି ତାହା ହ୍ରାସ ପାଉ ନାହିଁ।

ତେବେ ବିଜେଡି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଏତେ ବର୍ଷ ଶାସନ ଗାଦିରେ ବସିବାର କାରଣ କଣ ହୋଇପାରେ। ସେ ନେଇ ଅନେକ ଆଲୋଚନା ତଥା ଚର୍ଚ୍ଚା ଜାରୀ ରହିଛି। ତେବେ ଗୋଟିଏ ଧାଡିରେ ନବୀନଙ୍କ ସଫଳତା କଥା ଯଦି କୁହାଯାଏ ତେବେ ତାହା ହେବ ସେ ଜଣେ ସାଧାସିଧା ଶାନ୍ତ ମଣିଷଟିଏ, କଥା କମ କାମ ବେଶୀକୁ ବିଶ୍ବାସ କରନ୍ତି।

ଶାନ୍ତ କହିବାର କାରଣ ହେଲା, ନବୀନ ତାଙ୍କ ରାଜନୈତିକ କ୍ୟାରିୟର ଭିତରେ କେବେ ବି ହିଂସାତ୍ମକ କାର୍ଯ୍ୟ କରି ନାହାଁନ୍ତି। ବିରୋଧୀଙ୍କ ପ୍ରତି ଆର୍କମଣାତ୍ମକ ଭାବ ପରିପ୍ରକାଶ କରି ନାହାଁନ୍ତି। ଓଡିଶାର ଲୋକେ ସାଧାରଣତଃ ଶାନ୍ତ ସ୍ବଭାବକୁ ବେଶୀ ପସନ୍ଦ କରୁଥିବାରୁ ତାହାର ଲାଭ ନବୀନ ହିଁ ନେଉଛନ୍ତି। କାରଣ ବିରୋଧୀ ଦଳରେ ସେପରି ନେତା ଏ ପର୍ଯ୍ୟନ୍ତ କେହି ନାହାଁନ୍ତି। ଆଶ୍ଚର୍ଯ୍ୟର କଥା ବିରୋଧୀ ନେତାମାନେ ମଧ୍ୟ ନବୀନଙ୍କ ଏହି ରହସ୍ୟକୁ ଆଜି ପର୍ଯ୍ୟନ୍ତ ଠଉରାଇପାରୁ ନାହାନ୍ତି।

ନବୀନଙ୍କୁ ଯେ କେବଳ ଶାନ୍ତ କହିବା ତାହା ଭୁଲ ହେବ। କାରଣ ସେ ମଧ୍ୟ ଅନେକ ସମୟରେ କୋଠର ପଦକ୍ଷେପ ଗ୍ରହଣ କରିଛନ୍ତି। ବିଜେଡି ଗଠନଠାରୁ ଆରମ୍ଭ କରି ଆଜି ପର୍ଯ୍ୟନ୍ତ ଅନେକ ଟାଣୁଆ ନେତାଙ୍କୁ ଦଳରୁ ବହିସ୍କାର କରିଦେଇ ତାଙ୍କୁ ଧରାଶାୟୀ କରିଦେଇଛନ୍ତି। ତେଣୁ କହିବାକୁ ଗଲେ ନବୀନ ଲୋକଙ୍କ ପାଇଁ ଶାନ୍ତ, ହେଲେ ତାଙ୍କ ନେତାଙ୍କ ପାଇଁ କଠୋର।

ସେ ଯେତେବେଳେ ବିଜେଡି ଦଳ ଗଠନ କରି ସାଧାରଣ ନିର୍ବାଚନକୁ ଓହ୍ଲାଇଲେ ସେତେବେଳେ ତାଙ୍କୁ ନେଇ ବିରୋଧୀ ଅନେକ କୁତ୍ସାରଟନା କଲେ। ନବୀନ ଓଡିଆ ଜାଣି ନାହାଁନ୍ତି, ଓଡିଶାର ଜିଲ୍ଲା କେତେ କହିପାରିବେ ନାହିଁ, ଓଡିଆ ଜାଣି ନ ଥିବାରୁ ଓଡିଶା ଲୋକକଙ୍କ କଥା କେମିତି ବୁଝିବେ..ଏହିପରି ଅନେକ। ପ୍ରାୟ ତିନୋଟି ନିର୍ବାଚନରେ ନବୀନ ଓଡିଆ ଜାଣି ନାହାଁନ୍ତି ବୋଲି ପ୍ରସଂଗକୁ ବିରୋଧୀ ଅସ୍ତ୍ର ଭାବେ ବ୍ୟବହାର କରିଥିଲେ। ହେଲେ ତାହା ମଧ୍ୟ କାମ ଦେଇ ନ ଥିଲା। ପୁଣି ଲୋକେ ସେହି ନବୀନଙ୍କୁ ମୁଖ୍ୟମନ୍ତ୍ରୀ ଗାଦିରେ ବସାଇବାକୁ ଲାଗିଲେ। ଫଳରେ ଆଜିକାଲି ଆଉ କେହି ନବୀନ ଓଡିଆ ଜାଣି ନାହାଁନ୍ତି ବୋଲି କହୁ ନାହାଁନ୍ତି।

ନବୀନ ଓଡିଶାରେ ନ ଥିଲେ ସତ, ଓଡିଆ ଜାଣି ନ ଥିଲେ ସତ, ହେଲେ ଓଡିଆଙ୍କ ନାଡିକୁ ସେ ଭଲ ଭାବେ ଚିପି ପାରିଛନ୍ତି। ଅନ୍ୟପକ୍ଷରେ ଯେଉଁମାନେ ଓଡିଶାରେ ଅଛନ୍ତି, ସ୍ପଷ୍ଟ ଓଡିଆ କହୁଛନ୍ତି ସେହି ନେତାମାନେ କିନ୍ତୁ ଓଡିଆ ଲୋକଙ୍କ ମନ କଣ ତାହା ଏ ପର୍ଯ୍ୟନ୍ତ ଜାଣିପାରୁ ନାହାଁନ୍ତି। କେନ୍ଦ୍ର ସରକାରଙ୍କଠାରୁ ଅଖଣ୍ଡ ଶକ୍ତି ହାସଲ କରିଥିଲେ ମଧ୍ୟ ଓଡିଆ ଲୋକଙ୍କ ମନ ଜିଣିବାରେ ସେମାନେ ସକ୍ଷମ ହୋଇପାରି ନାହାଁନ୍ତି। ଫଳରେ ସେମାନଙ୍କ ପାଇଁ ବାରମ୍ବାର ନିର୍ବାଚନ ହାରିବା ଶ୍ରେୟ ହେଉଛି।

କହିବାକୁ ଗଲେ ଯାହାର ପ୍ରକୃତି ଯାହା ତାହା କିପରି କିଏ ପରିବର୍ତ୍ତନ କରାଯାଇପାରିବ। ସେମାନେ ଭାବନ୍ତି ହିଂସାତ୍ମକ କାର୍ଯ୍ୟ କରି ନବୀନଙ୍କୁ ବଦନାମ କରି ନିଜେ ମୁଖ୍ୟମନ୍ତ୍ରୀ ହୋଇଯିବେ। ହେଲେ ଓଡିଶାବାସୀ ସେମାନଙ୍କର ସେହି ସ୍ବପ୍ନକୁ ସାକାର କରାଇ ଦେଉ ନାହାଁନ୍ତି। ଭବିଷ୍ୟତରେ ମଧ୍ୟ ସେମାନେ ଯେ ନିର୍ବାଚନ ଜିଣିବେ ତାହା ମଧ୍ୟ ସନ୍ଦେହ ଜନକ। ଫଳରେ ଓଡିଶାରେ ନବୀନ ଅପରାଜୟ ନେତା ଭାବେ ପ୍ରତିଷ୍ଠିତ ହୋଇ ଆସୁଛନ୍ତି।