Tag: ନରେନ୍ଦ୍ର ମୋଦୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି (୧୯-୦୯-୨୦୨୩) ସ୍ବତନ୍ତ୍ର ଅଧିବେଶନ ଅବସରରେ କେନ୍ଦ୍ରୀୟ କକ୍ଷରେ ସଂସଦ ସଦସ୍ୟମାନଙ୍କୁ ସମ୍ବୋଧିତ କରିଛନ୍ତି।

ଗଣେଶ ଚତୁର୍ଥୀ ଅବସରରେ ସମସ୍ତଙ୍କୁ ଶୁଭେଚ୍ଛା ଜଣାଇ ପ୍ରଧାନମନ୍ତ୍ରୀ ତାଙ୍କ ଅଭିଭାଷଣ ଆରମ୍ଭ କରିଥିଲେ। ସଂସଦର ନୂତନ ଭବନରେ ଗୃହର କାର୍ଯ୍ୟ ଆରମ୍ଭ ହେବା ନେଇ ସେ ଅବତାରଣା କରିଥିଲେ। “ଭାରତକୁ ଏକ ଉନ୍ନତ ଦେଶରେ ପରିଣତ କରିବାର ଅଙ୍ଗୀକାରବଦ୍ଧତା ଓ ସଂକଳ୍ପ ନେଇ ଆମେ ନୂତନ ସଂସଦ ଭବନକୁ ଯାଉଛୁ” ବୋଲି ପ୍ରଧାନମନ୍ତ୍ରୀ କହିଥିଲେ।

ସଂସଦ ଭବନ ଓ କେନ୍ଦ୍ରୀୟ କକ୍ଷ ସମ୍ପର୍କରେ ପ୍ରଧାନମନ୍ତ୍ରୀ କହିଥିଲେ ଯେ ଏହାର ଏକ ପ୍ରେରଣାଦାୟୀ କାହାଣୀ ରହିଛି। ପ୍ରଥମେ ପ୍ରଥମେ ସଂସଦ ଭବନର ଏହି ଅଂଶ କିପରି ଗ୍ରନ୍ଥାଳୟ ଭାବେ ବ୍ୟବହୃତ ହେଉଥିଲା ତାହାର ସେ ସ୍ମୃତିଚାରଣ କରିଥିଲେ। ଏହି ଅଂଶରେ ହିଁ ଆମର ସମ୍ବିଧାନ ପୂର୍ଣ୍ଣାଙ୍ଗ ରୂପ ନେଇଥିଲା ଓ ସ୍ବାଧୀନତା ପରେ କ୍ଷମତା ହସ୍ତାନ୍ତର ମଧ୍ୟ ହୋଇଥିଲା।

ଏହି କେନ୍ଦ୍ରୀୟ କକ୍ଷରେ ହିଁ ଆମର ଜାତୀୟ ପତାକା ଓ ଜାତୀୟ ସଂଗୀତ ଗୃହୀତ ହୋଇଥିଲା। ବିଶ୍ବର ୪୧ଟି ଦେଶର ରାଷ୍ଟ୍ର ଓ ସରକାର ମୁଖ୍ୟ ଭାରତୀୟ ସଂସଦରେ ସେମାନଙ୍କର ଅଭିଭାଷଣ ରଖିଥିଲେ। ୮୬ ଥର ବିଭିନ୍ନ ରାଷ୍ଟ୍ରପତିଗଣ କେନ୍ଦ୍ରୀୟ କକ୍ଷରେ ସଂସଦର ମିଳିତ ଅଧିବେଶନକୁ ସମ୍ବୋଧିତ କରିଛନ୍ତି। ଗତ ସାତ ଦଶନ୍ଧି ମଧ୍ୟରେ ଲୋକସଭା ଓ ରାଜ୍ୟସଭା ପ୍ରାୟ ଚାରି ହଜାର ଆଇନ ସଂସଦର ଯୁଗ୍ମ ଅଧିବେଶନ ଜରିଆରେ ପାସ କରାଇଛନ୍ତି। ଯୌତୁକ ନିରୋଧୀ ଆଇନ, ବ୍ୟାଙ୍କିଂ ସେବା ଆୟୋଗ ବିଲ୍ ଓ ଆତଙ୍କବାଦ ବିରୁଦ୍ଧ ସଂଗ୍ରାମ ପାଇଁ ଆଇନ ମଧ୍ୟ ପାସ୍ ହୋଇଛି। ସେ ମଧ୍ୟ ତିନି ତଲାକ୍ ଉଚ୍ଛେଦ ଆଇନ ସହ ଟ୍ରାନ୍ସଜେଣ୍ଡର ଓ ଦିବ୍ୟାଙ୍ଗଙ୍କ ପାଇଁ ଆଇନ ଉପରେ ମଧ୍ୟ ଆଲୋକପାତ କରିଥିଲେ।

ଧାରା ୩୭୦ ଉଚ୍ଛେଦର ଜନ ପ୍ରତିନିଧିମାନଙ୍କ ଅବଦାନ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଆମ ପୂର୍ବ ପୁରୁଷଗଣ ଆମକୁ ଦେଇଥିବା ସମ୍ବିଧାନ ବର୍ତ୍ତମାନ ଜମ୍ମୁ ଓ କଶ୍ମୀରରେ ତ୍ବରାନ୍ବିତ ହେଉଛି। “ଆଜି ଜମ୍ମୁ ଓ କଶ୍ମୀର ବିକାଶ ପଥରେ ଅଗ୍ରଗତି କରୁଛି ଓ ଏହାର ଜନସାଧାରଣ ଏହି ସୁଯୋଗ ସେମାନଙ୍କ ହାତରୁ ଆଉ ଖସିଯିବାକୁ ଚାହୁଁନାହାନ୍ତି” ବୋଲି ଶ୍ରୀ ମୋଦୀ କହିଥିଲେ।

୨୦୨୩ ସ୍ବାଧୀନତା ଦିବସରେ ଲାଲକିଲାର ପ୍ରାଚୀର ଉପରୁ ଦେଇଥିବା ସମ୍ବୋଧନର ସ୍ମୃତିଚାରଣ କରି ପ୍ରଧାନମନ୍ତ୍ରୀ କହିଥିଲେ ଯେ ବର୍ତ୍ତମାନ ହିଁ ଠିକ୍ ସମୟ ଓ ଏକ ପୁନଃ ଜାଗରିତ ଚେତନା ସହ ଭାରତ ପୁଣି ମୁଣ୍ଡ ଟେକୁଛି। “ଭାରତ ଏକ ଶକ୍ତିରେ ଭରପୂର”, ଶ୍ରୀ ମୋଦୀ ଏହି ଜାଗରିତ ଚେତନା ଉପରେ କହି ପ୍ରତ୍ୟେକ ନାଗରିକ ଏହାକୁ ଭିତ୍ତିକରି କଠିନ ପରିଶ୍ରମ ଓ ଉତ୍ସର୍ଗ ସହ ସେମାନଙ୍କ ସ୍ବପ୍ନକୁ ସାକାର କରିବାରେ ସମର୍ଥ ହେବେ ବୋଲି କହିଥିଲେ। ଭାରତ ନିଶ୍ଚିତ ଭାବେ ଏହି ବାଛିଥିବା ପଥରେ ପହଂଚିବ। “ଦ୍ରୁତ ଫଳାଫଳ ଦ୍ରୁତ ପ୍ରଗତି ଦ୍ବାରା ହିଁ ହାସଲ କରିହେବ” ବୋଲି ସେ କହିଥିଲେ। ପଞ୍ଚମ ଅର୍ଥ ବ୍ୟବସ୍ଥା ସମ୍ପନ୍ନ ରାଷ୍ଟ୍ରକୁ ନେଇ ପ୍ରଧାନମନ୍ତ୍ରୀ କହିଥିଲେ ଯେ ଭାରତ ପଞ୍ଚମ ସ୍ଥାନକୁ ଉଠିଥିଲେ ମଧ୍ୟ ଏବେ ଶ୍ରେଷ୍ଠ ତିନି ସ୍ଥାନକୁ ଉନ୍ନୀତ ହେବା ନେଇ ସେ ନିଶ୍ଚିତ। ସେ ଭାରତୀୟ ବ୍ୟାଙ୍କିଂ କ୍ଷେତ୍ରର ଶକ୍ତି ନେଇ କହିଥିଲେ। ସମଗ୍ର ବିଶ୍ବ ଭାରତର ଡିଜିଟାଲ ଭିତ୍ତିଭୂମି, ୟୁପିଆଇ ଓ ଡିଜିଟାଲ ଉଚ୍ଚତା ନେଇ ଜାଣିବାକୁ ଉତ୍ସୁକ। ହଜାର ବର୍ଷ ମଧ୍ୟରେ ଭାରତର ଆକାଂକ୍ଷା ସବୁଠାରୁ ଉଚ୍ଚରେ ଥିବାରୁ ପ୍ରଧାନମନ୍ତ୍ରୀ ବର୍ତ୍ତମାନ ସମୟର ଗୁରୁତ୍ବ ଉପରେ ଅବତାରଣା କରିଥିଲେ। ହଜାର ହଜାର ବର୍ଷ ଭାରତର ଆଶା ଆକାଂକ୍ଷା ଶୃଙ୍ଖଳ ଦ୍ବାରା ବନ୍ଧା ହୋଇଥିଲେ ମଧ୍ୟ ଏବେ ଆମ ଦେଶ ଅପେକ୍ଷା କରିବା ପାଇଁ ପ୍ରସ୍ତୁତ ନୁହଁ। ନୂତନ ଆକାଂକ୍ଷା ନୂତନ ଆଇନ ତିଆରି ସହ ଯୁଗ ସହ ଖାପ ଖୁଆଇବାକୁ ଅନୁପଯୁକ୍ତ ଆଇନଗୁଡ଼ିକ ପରିହାର କରିବା ବର୍ତ୍ତମାନ ସାଂସଦମାନଙ୍କ ଗୁରୁଦାୟିତ୍ବ ବୋଲି ସେ କହିଥିଲେ।

ପ୍ରତ୍ୟେକ ଭାରତୀୟର ଆଶା ଓ ପ୍ରତ୍ୟେକ ସାଂସଦଙ୍କ ବିଶ୍ବାସ ଯେ ପାସ୍ ହେଉଥିବା ସମସ୍ତ ଆଇନ, ଆଲୋଚନା ଓ ସମ୍ବାଦ ଦ୍ବାରା ସଂସଦରୁ ପ୍ରଚାର ହେଉଛି ତାହା ଭାରତୀୟମାନଙ୍କ ଆକାଂକ୍ଷାକୁ ପୂରଣ କରିବ। “ସଂସଦରେ ପ୍ରବର୍ତ୍ତିତ ହେଉଥିବା ପ୍ରତ୍ୟେକ ସଂସ୍କାର ନିମନ୍ତେ ଭାରତ ଆକାଂକ୍ଷାର ମୂଳ ପ୍ରତିଫଳିତ ହେବା ଆବଶ୍ୟକ” ବୋଲି ସେ ଗୁରୁତ୍ବର ସହ କହିଥିଲେ।

ଗୋଟିଏ ବଡ଼ ଚିତ୍ର କ’ଣ ଛୋଟ କାନଭାସରେ ଅଙ୍କାଯାଇ ପାରିବ କି ବୋଲି ସେ ପ୍ରଶ୍ନ କରିଥିଲେ। ଆମ କଳ୍ପନାର କାନଭାସକୁ ସମ୍ପ୍ରସାରିତ ନ କରି ଆମେ ସ୍ବପ୍ନର ଭବ୍ୟ ଭାରତ ଗଠନ କରିପାରିବା ନାହିଁ। ଭାରତର ଭବ୍ୟ ଐତିହ୍ୟର ଅବତାରଣା କରି ସେ କହିଥିଲେ, ଯଦି ଆମ ଚିନ୍ତାଧାରା ଆମର ମହାନ ଐତିହ୍ୟ ସହ ସଂଯୋଗ ହୁଏ, ତେବେ ଏକ ଭବ୍ୟ ଭାରତର ଚିତ୍ର ଆଙ୍କିପାରିବା। “ଭାରତକୁ ଏକ ବଡ଼ କାନଭାସରେ କାର୍ଯ୍ୟ କରିବାକୁ ହେବ। ଏକ ଛୋଟ ପରିସର ମଧ୍ୟରେ ଗୋଳେଇ ଘାଣ୍ଟି ହେବାର ସମୟ ଅତିକ୍ରାନ୍ତ ହୋଇଛି” ବୋଲି ଶ୍ରୀ ମୋଦୀ କହିଥିଲେ।

ଏକ ଆତ୍ମନିର୍ଭର ଭାରତ ସୃଷ୍ଟିର ପ୍ରାଥମିକତା ଉପରେ ସେ କହିଥିଲେ, ପୁରୁଣା ଆଶଙ୍କାର ପ୍ରତ୍ୟାଖାନ କରି ସାରା ବିଶ୍ବ ଏବେ ଭାରତର ଆତ୍ମନିର୍ଭର ମଡେଲ କଥା ଆଲୋଚନା କରୁଛି। ପ୍ରତିରକ୍ଷା, ନିର୍ମାଣ, ଶକ୍ତି ଓ ଖାଇବା ତେଲ କ୍ଷେତ୍ରରେ କିଏ ବା ଆତ୍ମନିର୍ଭର ହେବାକୁ ନ ଚାହିଁବ ବୋଲି କହି ଏଥିପାଇଁ ରାଜନୀତି ଏକ ପ୍ରତିବନ୍ଧକ ହେବା ଅନୁଚିତ୍ ବୋଲି ସେ କହିଥିଲେ। ନିର୍ମାଣ କ୍ଷେତ୍ରରେ ଭାରତ ନୂତନ ଶିଖର ପହଂଚିବା ଉପରେ ଗୁରୁତ୍ବ ଆରୋପ କରି ପ୍ରଧାନମନ୍ତ୍ରୀ ‘ଜିରୋ ଡିଫେକ୍ଟ, ଜିରୋ ଇଫେକ୍ଟ’ର ମଡେଲ ଉପରେ ଆଲୋକପାତ କରିଥିଲେ। ଯେତେବେଳେ ଭାରତୀୟ ସାମଗ୍ରୀ ତ୍ରୁଟିଯୁକ୍ତ ନ ହେବ ଓ ନିର୍ମାଣ ପଦ୍ଧତିର ମଧ୍ୟ ପରିବେଶ ଉପରେ ଶୂନ୍ୟ ପ୍ରତିକ୍ରିୟା ଦେଖାଦେବ ତେବେ ଯାଇ ଏହା ଗ୍ରହଣଯୋଗ୍ୟ ହେବ। ଦେଶର ନିର୍ମାଣ କ୍ଷେତ୍ର ଯଥା କୃଷି ସାମଗ୍ରୀ, ପରିପାଟୀ ବିକାଶ, ସଫ୍ଟଓ୍ବର, ହସ୍ତକଳା ଇତ୍ୟାଦି କ୍ଷେତ୍ରରେ ଏକ ନୂତନ ବୈଶ୍ବିକ ବେଞ୍ଚମାର୍କ ପ୍ରତିଷ୍ଠା ଲକ୍ଷ୍ୟ ନେଇ ଚାଲିବା ଉପରେ ସେ ଗୁରୁତ୍ବ ଆରୋପ କରିଥିଲେ। ‘ଦେଶକୁ ନିଶ୍ଚିତ ହେବାକୁ ପଡ଼ିବ ଯେ ଆମର ସାମଗ୍ରୀ କେବଳ ଆମ ଗ୍ରାମ, ସହର, ଜିଲ୍ଲା ଓ ରାଜ୍ୟରେ ସର୍ବଶ୍ରେଷ୍ଠ ହେବ ନାହିଁ ଏହା ବିଶ୍ବରେ ସର୍ବଶ୍ରେଷ୍ଠ ହେବ”।

ପ୍ରଧାନମନ୍ତ୍ରୀ ନୂତନ ଶିକ୍ଷା ନୀତିର ମୁକ୍ତ ପଦ୍ଧତି ଉପରେ ଆଲୋକପାତ କରି ଏହା ସର୍ବଜନାଦୃତ ବୋଲି କହିଥିଲେ। ନାଳନ୍ଦା ବିଶ୍ବବିଦ୍ୟାଳୟର ଚିତ୍ର ଜି-୨୦ ଶିଖର ବୈଠକରେ ଦେଖି ବିଦେଶରୁ ଆସିଥିବା ଗଣ୍ୟମାନ୍ୟ ଅତିଥିଗଣ ଭାରତରେ ଏଭଳି ଅନୁଷ୍ଠାନ ୧୫ ଶହ ବର୍ଷ ପୂର୍ବରୁ ଥିଲା ବୋଲି ବିଶ୍ବାସ କରିପାରି ନ ଥିଲେ। “ଆମକୁ ଲକ୍ଷ୍ୟ ହାସଲ ନିମନ୍ତେ ଏଥିରୁ ପ୍ରେରଣା ନେବାକୁ ପଡ଼ିବ” ବୋଲି ଶ୍ରୀ ମୋଦୀ କହିଥିଲେ।

ଦେଶରେ ବୃଦ୍ଧି ପାଉଥିବା କ୍ରୀଡ଼ା କ୍ଷେତ୍ରର ସଫଳତା ନେଇ ଦେଶରେ ଟୁ ଓ ଥ୍ରୀ ଟାୟାର ସହରରେ ଏହା ଲୋକପ୍ରିୟତା ହାସଲ କରୁଛି। “ଦେଶର ଏହା ସଂକଳ୍ପ ହେବା ଉଚିତ ଯେ ପ୍ରତ୍ୟେକ କ୍ରୀଡ଼ା ମଞ୍ଚରେ ଭାରତୀୟ ତ୍ରିରଙ୍ଗା ଶୋଭା ପାଇବା ଦରକାର” ବୋଲି ଶ୍ରୀ ମୋଦୀ କହିଥିଲେ। ସାଧାରଣ ନାଗରିକଙ୍କ ଉନ୍ନତ ଜୀବନମାନ ଆକାଂକ୍ଷା ପାଇଁ ଗୁଣାତ୍ମକ ଦିଗ ଉପରେ ଧ୍ୟାନ ଦେବାକୁ ହେବ।

ଗୋଟିଏ ଦେଶର ଜନସଂଖ୍ୟାରେ ଯୁବକ-ଯୁବତୀଙ୍କ ବହୁଳତାର ଗୁରୁତ୍ବ ରହିଛି। ଯେପରି ଅଗ୍ରଭାଗରେ ଭାରତୀୟ ଯୁବାଗୋଷ୍ଠୀ ସବୁବେଳେ ରହିବେ, ସେଥିପାଇଁ ଆମକୁ ଏକ ବାତାବରଣ ସୃଷ୍ଟି କରିବାକୁ ପଡ଼ିବ। ବିଶ୍ବସ୍ତରରେ କୌଶଳ ବିକାଶକୁ ଆଖି ଆଗରେ ରଖି ଭାରତ ଏହାର ଯୁବପିଢ଼ିକୁ କୁଶଳୀ କରୁଛି, ନିକଟରେ ୧୫୦ଟି ସେବିକା ମହାବିଦ୍ୟାଳୟ ଦେଶରେ ଯୁବିପିଢ଼ିକୁ ପେଶାଦାର ସ୍ବାସ୍ଥ୍ୟ ସେବକ-ସେବିକା କରି ଗଢ଼ି ତୋଳିବା ପାଇଁ ପ୍ରତିଷ୍ଠା ହୋଇଛି। ସମୟାନୁସାରେ ସଠିକ୍ ନିଷ୍ପତ୍ତି ଉପରେ ଶ୍ରୀ ମୋଦୀ କହିଥିଲେ ଯେ “ନିଷ୍ପତ୍ତି ଗ୍ରହଣ କଦାପି ବିଳମ୍ବିତ ହେବା ଅନୁଚିତ” ଓ ଲୋକ ପ୍ରତିନିଧିଗଣ ରାଜନୀତିକ ଲାଭ ବା କ୍ଷତିରେ ବନ୍ଧା ନୁହନ୍ତି। ଦେଶର ସୌର ଶକ୍ତିକୁ ନେଇ ସେ କହିଥିଲେ ଯେ, ଏହା ବର୍ତ୍ତମାନ ଦେଶର ଶକ୍ତି ସଙ୍କଟ ନ ହେବା ଉପରେ ଗ୍ୟାରେଣ୍ଟି ଦେଉଛି। ସେ ମଧ୍ୟ ଦେଶର ଉଦଜାନ ମିଶନ, ସେମି କଣ୍ଡକ୍ଟର ମିଶନ ଓ ଜଳ ଜୀବନ ମିଶନ ଉପରେ ଆଲୋକପାତ କରି ଏହା ଉନ୍ନତ ଭବିଷ୍ୟତ ପାଇଁ ବାଟ କଢ଼ାଉଛି ବୋଲି କହିଛନ୍ତି। ଭାରତୀୟ ସାମଗ୍ରୀ ବିଶ୍ବର ଅନ୍ୟାନ୍ୟ ସ୍ଥାନରେ ପହଂଚିବାକୁ ପ୍ରଧାନମନ୍ତ୍ରୀ ଦେଶର ରଣନୀତିକ କ୍ଷେତ୍ରର ବିକାଶ ଦ୍ରବ୍ୟର ମୂଲ୍ୟ ହ୍ରାସ କରିବା ସହ ପ୍ରତ୍ୟେକ ନାଗରିକଙ୍କ ନିକଟରେ ଏହା ଉପଲବ୍ଧ ହେବ ବୋଲି କହିଥିଲେ। ଜ୍ଞାନ ଓ ନବୋନ୍ମେଷ ଉପରେ ପ୍ରଧାନମନ୍ତ୍ରୀ ନିକଟରେ ପାସ୍ ହୋଇଥିବା ଗବେଷଣା ଓ ନବୋନ୍ମେଷ ଆଇନର ଉଦାହରଣ ଦେଇଥିଲେ। ଚନ୍ଦ୍ରଯାନର ସଫଳତା ନେଇ ଦେଶରେ ଯେଉଁ ଉତ୍ସାହର ଗତି ବୃଦ୍ଧି ପାଇଛି ତାହା ବେକାର ଯିବା ଅନୁଚିତ ବୋଲି ମଧ୍ୟ ସେ ପ୍ରକାଶ କରିଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ “ସାମାଜିକ ନ୍ୟାୟ ହେଉଛି ଆମର ପ୍ରାଥମିକତା” ଓ ସାମାଜିକ ନ୍ୟାୟ ଉପରେ ଆଲୋଚନା ଖୁବ୍ ସୀମିତ ହୋଇଥିବାରୁ ଏହା ଆହୁରି ବ୍ୟାପକ ହେବା ଆବଶ୍ୟକ। ସାମାଜିକ ନ୍ୟାୟ ମଧ୍ୟରେ ଅବହେଳିତ ଗୋଷ୍ଠୀଙ୍କୁ ସଂଯୋଗୀକରଣ ଜରିଆରେ ସଶକ୍ତ କରିବା, ସ୍ବଚ୍ଛ ଜଳ, ବିଦ୍ୟୁତ, ଡାକ୍ତରୀ ଚିକିତ୍ସା ଓ ଅନ୍ୟାନ୍ୟ ମୌଳିକ ଆବଶ୍ୟକତା ଉପଲବ୍ଧ କରାଇବା ଦରକାର। ବିକାଶରେ ଅସାମାଞ୍ଜସ୍ୟତା ମଧ୍ୟ ସାମାଜିକ ନ୍ୟାୟର ବିରୁଦ୍ଧାଚରଣ କରୁଥିବାରୁ ସେ ଏହି ପରିପ୍ରେକ୍ଷୀରେ ଦେଶର ପୂର୍ବାଞ୍ଚଳର ଅନଗ୍ରସରତା ଉପରେ ଦର୍ଶାଇଥିଲେ। “ଆମକୁ ପୂର୍ବାଞ୍ଚଳକୁ ମଜଭୁତ କରି ସେଠାରେ ସାମାଜିକ ନ୍ୟାୟର ଶକ୍ତି ପ୍ରଦର୍ଶନ କରିବା ଦରକାର” ବୋଲି ଶ୍ରୀ ମୋଦୀ କହିଥିଲେ। ଆକାଂକ୍ଷିତ ଜିଲ୍ଲା ଯୋଜନା ଏକ ସନ୍ତୁଳିତ ବିକାଶକୁ ଜୀବନ ଦେଇଛି ବୋଲି କହିବା ସହ ଏହା ଦେଶର ୫୦୦ ବ୍ଲକକୁ ସମ୍ପ୍ରସାରିତ ହୋଇଛି ବୋଲି ସେ ପ୍ରକାଶ କରିଥିଲେ।

“ସମଗ୍ର ପୃଥିବୀ ଭାରତକୁ ଦେଖୁଛି” ବୋଲି କହି ସେ କହିଥିଲେ ଯେ ଭାରତ ଶୀତଳ ଯୁଦ୍ଧ ଯୁଗରେ ଏକ ନିରପେକ୍ଷ ଦେଶ ଭାବେ ବିବେଚନା କରାଯାଉଥିଲା। ମାତ୍ର ଭାରତ ଆଜି ‘ବିଶ୍ବମିତ୍ର’ ଭାବେ ପରିଚିତି ଲାଭ କରିଛି ଓ ଭାରତ ଅନ୍ୟ ଦେଶଗୁଡ଼ିକ ସହ ମିତ୍ରତା ସ୍ଥାପନ କରୁଥିବା ବେଳେ ସେମାନେ ମଧ୍ୟ ଭାରତକୁ ବନ୍ଧୁ ରାଷ୍ଟ୍ର ଭାବେ ବିବେଚନା କରୁଛନ୍ତି। ଭାରତ ଏପରି ବୈଦେଶିକ ନୀତିରୁ ଯଥେଷ୍ଟ ଲାଭ ଉଠାଇ ବିଶ୍ବରେ ସ୍ଥିର ଉତ୍ପାଦନ ଓ ବଣ୍ଟନର ଏକ ଉଦାହରଣ ସାଜିଛି।

ପ୍ରଧାନମନ୍ତ୍ରୀ କହିଥିଲେ ଯେ ଜି-୨୦ ଶିଖର ସମ୍ମିଳନୀ ଗ୍ଲୋବଲ ସାଉଥ୍ ଆବଶ୍ୟକତା ପୂରଣ ଦିଗରେ ଏକ ମାଧ୍ୟମ ପାଲଟିଛି ଓ ଭବିଷ୍ୟତ ପିଢ଼ି ଏହି ଗୁରୁତ୍ବପୂର୍ଣ୍ଣ ସଫଳତା ନିମନ୍ତେ ଖୁବ୍ ଗର୍ବିତ ହେବ। “ଜି-୨୦ ଶିଖର ସମ୍ମିଳନୀ ବପନ କରିଥିବା ବୀଜ ବିଶ୍ବ ପାଇଁ ଏକ ବିଶାଳ ବଟବୃକ୍ଷର ଆସ୍ଥା ଭଳି ହେବ” ବୋଲି ଶ୍ରୀ ମୋଦୀ କହିଥିଲେ। ସେ ଜି-୨୦ ଶିଖର ସମ୍ମିଳନୀରେ ଜୈବ ଇନ୍ଧନ ଆନ୍ଦୋଳନ ଭାରତ ନେତୃତ୍ବରେ ବୈଶ୍ବିକ ସ୍ତରରେ ସ୍ଥାନ ନେଉଛି ବୋଲି ପ୍ରକାଶ କରିଥିଲେ।

ପ୍ରଧାନମନ୍ତ୍ରୀ ଉପରାଷ୍ଟ୍ରପତି ଓ ବାଚସ୍ପତିଙ୍କୁ ନୂତନ ସଂସଦ ଭବନର ଗୌରବ ଓ ମର୍ଯ୍ୟାଦା ସୁରକ୍ଷିତ ରଖି ଏହାର ସ୍ଥିତି ଯେପରି ପୁରୁଣା ସଂସଦ ଭବନ ଭଳି ନ ହେବ ସେଥିପାଇଁ ଅନୁରୋଧ କରିଥିଲେ। ଏହି ଭବନର ନାମ ସମ୍ବିଧାନ ସଦନ ହେବ। “ସମ୍ବିଧାନ ସଦନକୁ ପୁରୁଣା ଭବନ ମାର୍ଗଦର୍ଶନ ଦେବ ଓ କିପରି ମହାନ ବ୍ୟକ୍ତିତ୍ବଗଣ ଆମ ସାମ୍ବିଧାନିକ ସଭାରେ ଅଂଶବିଶେଷ ଥିଲେ, ତାହା ମନେ ପକାଇ ଦେଉଥିବ” ବୋଲି କହି ପ୍ରଧାନମନ୍ତ୍ରୀ ତାଙ୍କ ଭାଷଣର ଅନ୍ତ ଘଟାଇଥିଲେ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ନୂଆ ସଂସଦ ଭବନରେ ରାଜ୍ୟସଭାକୁ ସମ୍ବୋଧିତ କରିଛନ୍ତି ।

ଗୃହକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ, ଆଜିର ଅବସର ଐତିହାସିକ ଏବଂ ସ୍ମରଣୀୟ । ସେ ଲୋକସଭାରେ ତାଙ୍କ ଅଭିଭାଷଣକୁ ମନେ ପକାଇଥିଲେ ଏବଂ ଏହି ସ୍ୱତନ୍ତ୍ର ଅବସରରେ ରାଜ୍ୟସଭାକୁ ସମ୍ବୋଧିତ କରିବାର ସୁଯୋଗ ପାଇଥିବାରୁ ଅଧ୍ୟକ୍ଷଙ୍କୁ କୃତଜ୍ଞତା ଜଣାଇଥିଲେ ।

ରାଜ୍ୟସଭାକୁ ସଂସଦର ଉଚ୍ଚ ସଦନ ବୋଲି ବିବେଚନା କରାଯାଏ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ସମ୍ବିଧାନ ନିର୍ମାତାଙ୍କ ଉଦ୍ଦେଶ୍ୟ ଉପରେ ଆଲୋକପାତ କରିଥିଲେ ଯେ ଦେଶକୁ ଏକ ଦିଗ ଦେବା ସହିତ ରାଜନୈତିକ ଆଲୋଚନାର ପ୍ରବାହ ଓ ପ୍ରବାହରୁ ଉପରକୁ ଉଠି ଗୃହ ଗମ୍ଭୀର ବୌଦ୍ଧିକ ଆଲୋଚନାର କେନ୍ଦ୍ର ପାଲଟିବ । “ଏହା ଦେଶର ସ୍ୱାଭାବିକ ଆଶା”, ବୋଲି ଉଲ୍ଲେଖ କରିବା ସହ ପ୍ରଧାନମନ୍ତ୍ରୀ କହିଥିଲେ ଯେ ଦେଶ ପାଇଁ ଏଭଳି ଅବଦାନ କାର୍ଯ୍ୟବାହୀର ମୂଲ୍ୟ ବୃଦ୍ଧି କରିଥାଏ ।

ପ୍ରଧାନମନ୍ତ୍ରୀ ସର୍ବପଲ୍ଲୀ ରାଧାକ୍ରିଷ୍ଣନଙ୍କ ମତକୁ ଉଦାହରଣ ଦେଇ କହିଥିଲେ ଯେ ସଂସଦ କେବଳ ଏକ ବିଧାନ ସଭା ନୁହେଁ ବରଂ ଏକ ବିଚାର ବିମର୍ଶକାରୀ ସଂସ୍ଥା । ଶ୍ରୀ ମୋଦୀ କହିଥିଲେ ଯେ ରାଜ୍ୟସଭାରେ ଗୁଣାତ୍ମକ ବିତର୍କ ଶୁଣିବା ସବୁବେଳେ ଆନନ୍ଦଦାୟକ ହୋଇଥାଏ । ନୂଆ ସଂସଦ କେବଳ ଏକ ନୂଆ କୋଠା ନୁହେଁ ବରଂ ଏହା ଏକ ନୂଆ ଆରମ୍ଭର ପ୍ରତୀକ ବୋଲି ସେ କହିଛନ୍ତି । ଅମୃତ କାଳର ସକାଳ ସମୟରେ ଏହି ନୂତନ କୋଠା ୧୪୦ କୋଟି ଭାରତୀୟଙ୍କ ଠାରେ ଏକ ନୂତନ ଶକ୍ତି ସୃଷ୍ଟି କରିବ ବୋଲି ସେ କହିଛନ୍ତି ।

ଦେଶ ଆଉ ଅପେକ୍ଷା କରିବାକୁ ପ୍ରସ୍ତୁତ ନଥିବାରୁ ନିର୍ଦ୍ଧାରିତ ସମୟ ସୀମା ମଧ୍ୟରେ ଲକ୍ଷ୍ୟ ହାସଲ କରିବାର ଆବଶ୍ୟକତା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ଲୋକଙ୍କ ଆକାଂକ୍ଷା ପୂରଣ କରିବା ପାଇଁ ନୂତନ ଚିନ୍ତାଧାରା ଓ ଶୈଳୀ ସହିତ ଆଗକୁ ବଢ଼ିବାର ସମୟ ଆସିଛି ଏବଂ ଏଥିପାଇଁ କାର୍ଯ୍ୟ ଓ ବିଚାର ପ୍ରକ୍ରିୟାର ପରିସରକୁ ବିସ୍ତାର କରିବାକୁ ପଡ଼ିବ ବୋଲି ସେ କହିଛନ୍ତି ।

ପ୍ରଧାନମନ୍ତ୍ରୀ କହିଥିଲେ ଯେ ସଂସଦୀୟ ସଚ୍ଚୋଟତାକୁ ନେଇ ଗୃହ ସମଗ୍ର ଦେଶର ବିଧାନ ସଭାଗୁଡ଼ିକ ପାଇଁ ପ୍ରେରଣାର ଉତ୍ସ ହୋଇ ପାରିବ ।

ବିଗତ ୯ ବର୍ଷ ମଧ୍ୟରେ ନିଆ ଯାଇଥିବା ନିଷ୍ପତ୍ତି ଉପରେ ଆଲୋକପାତ କରି ପ୍ରଧାନମନ୍ତ୍ରୀ ସେହି ପ୍ରସଙ୍ଗଗୁଡ଼ିକ ଉପରେ ଆଲୋଚନା କରିଥିଲେ ଯାହା ଅନେକ ଦଶନ୍ଧି ଧରି ପଡି ରହିଛି ଏବଂ ସ୍ମରଣୀୟ ଭାବରେ ବିବେଚନା କରାଯାଏ ।

“ରାଜନୈତିକ ଦୃଷ୍ଟିକୋଣରୁ ଏଭଳି ପ୍ରସଙ୍ଗକୁ ସ୍ପର୍ଶ କରିବା ଏକ ବଡ଼ ଭୁଲ୍ ବୋଲି ବିବେଚନା କରାଯାଏ”, କିନ୍ତୁ ରାଜ୍ୟସଭାରେ ଆବଶ୍ୟକ ସଂଖ୍ୟକ ସଂଖ୍ୟା ନଥିଲେ ମଧ୍ୟ ସରକାର ଏ ଦିଗରେ ବଡ଼ ପଦକ୍ଷେପ ନେଇଛନ୍ତି ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ ଏହା କହିଥିଲେ । ଦେଶର ଉନ୍ନତି ପାଇଁ ଏହି ପ୍ରସଙ୍ଗ ଗୁଡ଼ିକୁ ଗ୍ରହଣ କରାଯାଇ ସମାଧାନ କରାଯାଇଥିବାରୁ ସେ ସନ୍ତୋଷ ବ୍ୟକ୍ତ କରିବା ସହ ସଦସ୍ୟ ମାନଙ୍କର ପରିପକ୍ୱତା ଓ ବୁଦ୍ଧିକୁ ଏଥିପାଇଁ ଶ୍ରେୟ ଦେଇଥିଲେ । ରାଜ୍ୟସଭାର ମର୍ଯ୍ୟାଦା ଗୃହରେ ସଂଖ୍ୟା ଗରିଷ୍ଠତା ଯୋଗୁଁ ନୁହେଁ ବରଂ ଦକ୍ଷତା ଓ ବୁଝାମଣା ଯୋଗୁଁ ବଜାୟ ରଖାଯାଇଛି ବୋଲି ସେ କହିଛନ୍ତି । ଏହି ସଫଳତା ପାଇଁ ଗୃହର ସମସ୍ତ ସଦସ୍ୟଙ୍କୁ ପ୍ରଧାନମନ୍ତ୍ରୀ ଧନ୍ୟବାଦ ଜଣାଇଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଗଣତାନ୍ତ୍ରିକ ବ୍ୟବସ୍ଥାରେ ସରକାର ପରିବର୍ତ୍ତନ ସତ୍ତ୍ୱେ ଜାତୀୟ ସ୍ୱାର୍ଥକୁ ସର୍ବୋଚ୍ଚ ରଖିବା ପାଇଁ ପ୍ରୟାସ କରାଯାଇଛି ।

ରାଜ୍ୟସଭାର ଭୂମିକା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ସମବାୟ ସଂଘବାଦ ଉପରେ ଗୁରୁତ୍ୱ ଦେବା ସମୟରେ ଦେଶ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ବହୁତ ସହଯୋଗ ସହ ଆଗେଇ ଚାଲିଛି । ସେ କେନ୍ଦ୍ର – ରାଜ୍ୟ ସହଯୋଗର ଏକ ଉଦାହରଣ ଆକାରରେ କରୋନା ମହାମାରୀର ମୁକାବିଲା କରିବା ପ୍ରସଙ୍ଗକୁ ଉଲ୍ଲେଖ କରିଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ କେବଳ ବିପର୍ଯ୍ୟୟ ସମୟରେ ନୁହେଁ ବରଂ ଉତ୍ସବ ସମୟରେ ମଧ୍ୟ ଭାରତ ବିଶ୍ୱକୁ ପ୍ରଭାବିତ କରିଛି । ସେ କହିଥିଲେ ଯେ ୬୦ ରୁ ଅଧିକ ସହରରେ ଜି – ୨୦ କାର୍ଯ୍ୟକ୍ରମ ଏବଂ ଦିଲ୍ଲୀରେ ଶିଖର ସମ୍ମିଳନୀରେ ଏହି ମହାନ ରାଷ୍ଟ୍ରର ବିବିଧତା ପ୍ରଦର୍ଶିତ ହୋଇଥିଲା । ଏହା ସମବାୟ ସଂଘବାଦର ଶକ୍ତି ବୋଲି ସେ କହିଛନ୍ତି । ସେ ଆହୁରି ମଧ୍ୟ ଉଲ୍ଲେଖ କରିଥିଲେ ଯେ ନୂତନ କୋଠାଟି ସଂଘୀୟ ଭାବନାକୁ ମଧ୍ୟ ପ୍ରତିନିଧିତ୍ୱ କରେ କାରଣ ନୂତନ କୋଠାର ଯୋଜନାରେ ରାଜ୍ୟମାନଙ୍କର କଳାକୃତି ଗୁଡିକ ପ୍ରାଧାନ୍ୟ ପାଇଛନ୍ତି ।

ଦୈନନ୍ଦିନ ଜୀବନରେ ପ୍ରଯୁକ୍ତି ବିଦ୍ୟାର ବୃଦ୍ଧି ପାଉଥିବା ପ୍ରଭାବ ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଯେଉଁ ଅଗ୍ରଗତି ହାସଲ କରିବାକୁ ୫୦ ବର୍ଷରୁ ଅଧିକ ସମୟ ଲାଗିଥିଲା ତାହା ବର୍ତ୍ତମାନ କିଛି ସପ୍ତାହ ମଧ୍ୟରେ ଅନୁଭବ କରାଯାଇପାରିବ । ବୃଦ୍ଧି ପାଉଥିବା ବୈଷୟିକ ଉନ୍ନତି ସହିତ ଖାପ ଖୁଆଇବା ପାଇଁ ନିଜକୁ ଏକ ଗତିଶୀଳ ଉପାୟରେ ଗଢି ତୋଳିବାର ଆବଶ୍ୟକତା ଉପରେ ସେ ଗୁରୁତ୍ୱାରୋପ କରିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ସମ୍ବିଧାନ ସଦନରେ ଆମେ ସ୍ୱାଧୀନତାର ୭୫ ବର୍ଷ ପୂର୍ତ୍ତି ପାଳନ କରିଛୁ, ଯେତେବେଳେ ୨୦୪୭ରେ ନୂତନ ଭବନରେ ସ୍ୱାଧୀନତାର ଶତାବ୍ଦୀ ପାଳନ କରାଯିବ, ଏହା ବିକଶିତ ଭାରତରେ ଏକ ଉତ୍ସବ ହେବ । ସେ ଆହୁରି ମଧ୍ୟ କହିଛନ୍ତି ଯେ ପୁରୁଣା କୋଠାରେ ଆମେ ବିଶ୍ୱର ଅର୍ଥନୀତି ଦୃଷ୍ଟିରୁ ପଞ୍ଚମ ସ୍ଥାନରେ ପହଞ୍ଚି ଯାଇଥିଲେ । ମୋର ବିଶ୍ୱାସ ଯେ ନୂଆ ସଂସଦରେ ଆମେ ବିଶ୍ୱର ଶ୍ରେଷ୍ଠ ତିନୋଟି ଅର୍ଥନୀତିରେ ସାମିଲ ହେବୁ । ଗରିବଙ୍କ କଲ୍ୟାଣ ପାଇଁ ଆମେ ଅନେକ ପଦକ୍ଷେପ ନେଇଥିବା ବେଳେ ନୂଆ ସଂସଦରେ ଆମେ ସେହି ସବୁ ଯୋଜନାର କଭରେଜ୍ ହାସଲ କରିବୁ ବୋଲି ସେ ଉଲ୍ଲେଖ କରିଥିଲେ ।

ଗୃହ ଅତ୍ୟାଧୁନିକ ଜ୍ଞାନକୌଶଳରେ ସଜ୍ଜିତ ହୋଇ ଥିବାରୁ ନୂତନ ସଂସଦ ଭବନ ସହିତ ନୂତନ ଜ୍ଞାନକୌଶଳ ଗ୍ରହଣ କରିବାର ଆବଶ୍ୟକତା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ଗୃହରେ ଉପଲବ୍ଧ ନୂତନ ଜ୍ଞାନକୌଶଳରେ ଅଭ୍ୟସ୍ତ ହେବା ପାଇଁ ପରସ୍ପରକୁ ସହଯୋଗ କରିବାକୁ ସେ ସାଂସଦ ମାନଙ୍କୁ ଅନୁରୋଧ କରିଥିଲେ ।

ଏହି ଡିଜିଟାଲ ଯୁଗରେ ଆମେ ଟେକ୍ନୋଲୋଜିକୁ ଆମ ଜୀବନର ଏକ ଅଂଶ କରିବା ଦରକାର ବୋଲି ପ୍ରଧାନମନ୍ତ୍ରୀ କହିଥିଲେ । ମେକ୍ ଇନ୍ ଇଣ୍ଡିଆ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ନୂତନ ଶକ୍ତି ଏବଂ ଉତ୍ସାହ ସହିତ ଦେଶ ଏହି ପଦକ୍ଷେପର ଭରପୂର ଫାଇଦା ଉଠାଉଛି ।

ଲୋକ ସଭାରେ ଉପସ୍ଥାପିତ ନାରୀଶକ୍ତି ବନ୍ଦନ ଅଧିନିୟମ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଯେତେବେଳେ ଆମେ ଜୀବନର ସହଜତା ବିଷୟରେ କହିଥାଉ, ସେତେବେଳେ ସେହି ସହଜତାର ପ୍ରଥମ ଦାବି ମହିଳାଙ୍କର ହୋଇଥାଏ । ସେ କହିଥିଲେ ଯେ ଅନେକ କ୍ଷେତ୍ରରେ ମହିଳା ମାନଙ୍କର ଅଂଶଗ୍ରହଣ ସୁନିଶ୍ଚିତ କରାଯାଉଛି । ମହିଳାଙ୍କ ସାମର୍ଥ୍ୟକୁ ସୁଯୋଗ ମିଳିବା ଦରକାର । ସେମାନଙ୍କ ଜୀବନରେ ‘ଯଦି ଏବଂ କିନ୍ତୁ’ ର ସମୟ ଶେଷ ହୋଇଛି ବୋଲି ପ୍ରଧାନମନ୍ତ୍ରୀ କହିଥିଲେ ।

ସେ କହିଛନ୍ତି ଯେ ବେଟି ବଚାଓ ବେଟି ପଢ଼ାଓ କାର୍ଯ୍ୟକ୍ରମ ଏକ ଜନକାର୍ଯ୍ୟକ୍ରମରେ ପରିଣତ ହୋଇଛି । ସେ ଜନ ଧନ ଏବଂ ମୁଦ୍ରା ଯୋଜନାରେ ମହିଳା ମାନଙ୍କର ଅଂଶଗ୍ରହଣ ବିଷୟରେ ମଧ୍ୟ ଉଲ୍ଲେଖ କରିଥିଲେ । ସେ ଉଜ୍ଜ୍ୱଳା ଯୋଜନା ସମ୍ପର୍କରେ ଏବଂ ତିନି ତଲାକ ଉଚ୍ଛେଦ ଏବଂ ମହିଳାଙ୍କ ସୁରକ୍ଷା ପାଇଁ ଦୃଢ଼ ଆଇନ ବିଷୟରେ ଉଲ୍ଲେଖ କରିଥିଲେ । ଜି – ୨୦ ରେ ମହିଳା ମାନଙ୍କ ନେତୃତ୍ୱାଧୀନ ବିକାଶ ସବୁଠୁ ବଡ଼ ଆଲୋଚନାର ବିଷୟ ବୋଲି ସେ କହିଛନ୍ତି ।

ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ସଂସଦରେ ମହିଳାଙ୍କ ପାଇଁ ସଂରକ୍ଷଣ ପ୍ରସଙ୍ଗ ଦଶନ୍ଧି ଧରି ବିଚାରାଧୀନ ରହିଛି ଏବଂ ସମସ୍ତେ ନିଜ ନିଜ ସାମର୍ଥ୍ୟରେ ଏଥିରେ ଯୋଗଦାନ ଦେଇଛନ୍ତି । ୧୯୯୬ ମସିହାରେ ଏହି ବିଲ୍ ପ୍ରଥମେ ଆଗତ ହୋଇଥିଲା ଏବଂ ଅଟଳ ଜୀଙ୍କ କାର୍ଯ୍ୟକାଳରେ ଅନେକ ଆଲୋଚନା ଓ ପର୍ଯ୍ୟାଲୋଚନା ହୋଇଥିଲା, କିନ୍ତୁ ସଂଖ୍ୟା ଗରିଷ୍ଠତା ଅଭାବରୁ ଏହି ବିଲ୍ ପାରିତ ହୋଇ ପାରିନଥିଲା ବୋଲି ଦର୍ଶାଇ ପ୍ରଧାନମନ୍ତ୍ରୀ ବିଶ୍ୱାସ ବ୍ୟକ୍ତ କରିଥିଲେ ଯେ ଏହି ବିଲ୍ ଶେଷରେ ଆଇନରେ ପରିଣତ ହେବ ଏବଂ ନୂତନ କୋଠାର ନୂତନ ଶକ୍ତି ସହିତ ରାଷ୍ଟ୍ର ନିର୍ମାଣ ଦିଗରେ ‘ନାରୀ ଶକ୍ତି’ ସୁନିଶ୍ଚିତ କରିବ । ସେ ଆଜି ଲୋକସଭାରେ ନାରୀ ଶକ୍ତି ବନ୍ଦନା ଅଧିନିୟମକୁ ସମ୍ବିଧାନ ସଂଶୋଧନ ବିଲ୍ ଭାବେ ଉପସ୍ଥାପନ କରିବାକୁ କେନ୍ଦ୍ର ସରକାରଙ୍କ ନିଷ୍ପତ୍ତି ସମ୍ପର୍କରେ ସୂଚନା ଦେଇଛନ୍ତି ଯାହା ଉପରେ ଆସନ୍ତାକାଲି ବିତର୍କ ହେବ । ପ୍ରଧାନମନ୍ତ୍ରୀ ବକ୍ତବ୍ୟ ଶେଷ କରି ରାଜ୍ୟସଭାର ସଦସ୍ୟ ମାନଙ୍କୁ ସର୍ବସମ୍ମତି କ୍ରମେ ଏହି ବିଲ୍‌କୁ ସମର୍ଥନ କରିବାକୁ ଅନୁରୋଧ କରିଥିଲେ, ଯାହା ଦ୍ୱାରା ଏହାର ଶକ୍ତି ଏବଂ ପହଞ୍ଚକୁ ସମ୍ପୂର୍ଣ୍ଣ ରୂପେ ବୃଦ୍ଧି କରା ଯାଇପାରିବ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସୋମବାର ସଂସଦର ସ୍ବତନ୍ତ୍ର ଅଧିବେଶନ ଅବସରରେ ଲୋକସଭାରେ ନିଜର ଅଭିଭାଷଣ ରଖିଛନ୍ତି। ସେପ୍ଟେମ୍ବର ୧୮ରୁ ୨୨, ୨୦୨୩ ପର୍ଯ୍ୟନ୍ତ ସ୍ବତନ୍ତ୍ର ଅଧିବେଶନ ବସୁଛି। ଗୃହରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଆଜି ସଂସଦୀୟ ଯାତ୍ରାର ୭୫ ବର୍ଷର ସ୍ମୃତି ରୋମନ୍ଥନର କ୍ଷଣ। ପୁରୁଣା ସଂସଦ ଭବନକୁ ନେଇ ପ୍ରଧାନମନ୍ତ୍ରୀ କହିଥିଲେ, ଏହା ଭାରତର ସ୍ବାଧୀନତା ପୂର୍ବରୁ ରାଜକୀୟ ଆଇନ ପ୍ରଣୟନ ପରିଷଦ ଥିବାବେଳେ, ସ୍ବାଧୀନତା ପରେ ଏହା ଭାରତର ସଂସଦ ଭାବେ ପରିଚୟ ଲାଭ କରିଥିଲା। ବିଦେଶୀ ଶାସକଙ୍କ ଦ୍ବାରା ଏହି ଭବନ ନିର୍ମାଣ ପାଇଁ ନିଷ୍ପତ୍ତି ହୋଇଥିଲେ ମଧ୍ୟ ଭାରତୀୟଙ୍କ କଠିନ ପରିଶ୍ରମ ଓ ଅର୍ଥ ଖର୍ଚ୍ଚ ପାଇଁ ଏହାର ବିକାଶ ଘଟିଥିଲା। ୭୫ ବର୍ଷର ଯାତ୍ରାରେ ଏହି ସଦନ ଅତ୍ୟନ୍ତ ଉତ୍ତମ ପ୍ରଥା ଓ ପରମ୍ପରା ସୃଷ୍ଟି କରିଛି ଯାହା ଅନ୍ୟମାନଙ୍କ ଅବଦାନ ଓ ଉପସ୍ଥିତି ଯୋଗୁ ସମ୍ଭବପର ହୋଇଛି। “ଆମେ ନୂତନ ଭବନକୁ ସ୍ଥାନାନ୍ତରିତ ହେଉଛୁ ସତ, ହେଲେ ଏହି ଭବନ ଭବିଷ୍ୟତ ପିଢ଼ି ନିମନ୍ତେ ପ୍ରେରଣାର ଉତ୍ସ ହୋଇ ରହିବ, କାରଣ ଭାରତୀୟ ଗଣତନ୍ତ୍ରର ଯାତ୍ରାରେ ଏହା ଏକ ସ୍ବର୍ଣ୍ଣିମ ଅଧ୍ୟାୟ” ବୋଲି ପ୍ରଧାନମନ୍ତ୍ରୀ କହିଥିଲେ।

ଅମୃତ କାଳର ପ୍ରଥମ ଆଲୋକରେ ନୂତନ ବିଶ୍ବାସ, ସଫଳତା ଓ ସାମର୍ଥ୍ୟ ପ୍ରତିଭାତ ହେଉଛି ଏବଂ କିପରି ଭାରତର ସଫଳତାକୁ ବିଶ୍ବ ଆଲୋଚନା କରୁଛି ପ୍ରଧାନମନ୍ତ୍ରୀ ତାହାର ଅବତାରଣା କରିଥିଲେ। “ଆମର ୭୫ ବର୍ଷର ସଂସଦୀୟ ଗଣତନ୍ତ୍ରରେ ସମୂହ ଉଦ୍ୟମର ଏହା ଫଳ” ବୋଲି ସେ କହିଥିଲେ।

ଚନ୍ଦ୍ରଯାନ-୩ର ସଫଳତା ଉପରେ ମନ୍ତବ୍ୟ ଦେଇ ସେ କହିଥିଲେ ଯେ ଭାରତୀୟ ସାମର୍ଥ୍ୟର ଏହା ଆଉ ଏକ ଗତି, ଯାହା ଆଧୁନିକତା, ବିଜ୍ଞାନ, ବୈଷୟିକ ଜ୍ଞାନ, ଆମ ବୈଜ୍ଞାନିକମାନଙ୍କ କ୍ଷମତା ଓ ୧୪୦ କୋଟି ଭାରତୀୟଙ୍କ ଶକ୍ତି ଯୋଡ଼ି ହୋଇ ରହିଛି। ବୈଜ୍ଞାନିକମାନଙ୍କ ସଫଳତା ନିମନ୍ତେ ସେ ଗୃହ ଓ ଦେଶ ପକ୍ଷରୁ ସେମାନଙ୍କୁ କୃତଜ୍ଞତା ଜଣାଇଥିଲେ।

ପ୍ରଧାନମନ୍ତ୍ରୀ ନାମ ଶିଖର ସମ୍ମିଳନୀ ପାଇଁ ଗୃହ କିପରି ଅତୀତରେ ଦେଶର ଉଦ୍ୟମର ପ୍ରଶଂସା କରିଥିଲା ତା’ର ସ୍ମୃତିଚାରଣ କରିବା ସହ ଜି-୨୦ର ସଫଳତା ୧୪୦ କୋଟି ଭାରତୀୟଙ୍କର, ଏହା କୌଣସି ବ୍ୟକ୍ତି ବା ଦଳର ନୁହେଁ ବୋଲି ସେ କହିଥିଲେ। ଦେଶର ୬୦ରୁ ଅଧିକ ସ୍ଥାନରେ ୨୦୦ରୁ ଅଧିକ ବୈଠକ ଭାରତୀୟ ବିବିଧତାର ସଫଳତା ଓ ଏହି ସଫଳତା ହିଁ ଜି-୨୦ର ସଫଳତା। ଜି-୨୦ ଅଧ୍ୟକ୍ଷତା କାଳରେ ଆଫ୍ରିକୀୟ ସଂଘର ସାମିଲ ଘଟଣା ପାଇଁ ଭାରତ ସବୁବେଳେ ନିଜକୁ ଗର୍ବିତ ମନେ କରିବ। ଆଫ୍ରିକୀୟ ଅର୍ନ୍ତଭୁକ୍ତୀକରଣ ଏକ ଭାବଗତ କ୍ଷଣ ବୋଲି ସେ କହିଥିଲେ।

ଭାରତୀୟ ସାମର୍ଥ୍ୟ ନେଇ କେତେକ ବ୍ୟକ୍ତିଙ୍କ ନକାରାତ୍ମକ ମନୋଭାବ ସନ୍ଦେହ ସୃଷ୍ଟି କରୁଥିବା ନେଇ ସେ କହିଥିଲେ ଯେ ଜି-୨୦ର ଘୋଷଣାପତ୍ରରେ ସହମତି ପ୍ରକାଶ ପାଇବା ସହ ଏହାର ଭବିଷ୍ୟତ ରୋଡ୍ ମ୍ୟାପ୍ ମଧ୍ୟ ଅଙ୍କାଯାଇଛି। ଭାରତୀୟ ଜି-୨୦ ଅଧ୍ୟକ୍ଷତା ନଭେମ୍ବର ଶେଷ ପର୍ଯ୍ୟନ୍ତ ଥିବାବେଳେ, ଦେଶ ଏହାର ସମ୍ପୂର୍ଣ୍ଣ ଉପଯୋଗ କରିବା, ଏଥିସହ ସେ ବାଚସ୍ପତିଙ୍କ ଅଧ୍ୟକ୍ଷତାରେ ପି-୨୦ ସମ୍ମିଳନୀ (ସଂସଦୀୟ-୨୦) ଆୟୋଜନ କରିବାକୁ ମଧ୍ୟ ସେ ସମର୍ଥନ ଜଣାଇଥିଲେ।

“ଭାରତ ନିଜକୁ ‘ବିଶ୍ବମିତ୍ର ଭାବେ’ ଆସୀନ କରିପାରି ଥିବାରୁ ଏହା ଏକ ଗର୍ବର ବିଷୟ ଓ ସମଗ୍ର ବିଶ୍ବ ଭାରତକୁ ବନ୍ଧୁ ଭାବେ ପାଇବାକୁ ବ୍ୟଗ୍ର। ବେଦ ଠାରୁ ଆରମ୍ଭ କରି ବିବେକାନନ୍ଦ ପର୍ଯ୍ୟନ୍ତ ଆମେ ପାଇଥିବା ଆମର ସଂସ୍କାର ଏହାର କାରଣ। ସବକା ସାଥ, ସବକା ବିକାଶ ମନ୍ତ୍ର ବିଶ୍ବକୁ ଆମ ସହ ଚାଲିବାକୁ ଆମକୁ ଏକାଠି କରିଛି” ବୋଲି ସେ କହିଥିଲେ।

ଗୋଟିଏ ପରିବାର ନୂଆ ଘରକୁ ଯିବା ସହ ତୁଳନା କରି ପ୍ରଧାନମନ୍ତ୍ରୀ କହିଥିଲେ ଯେ ସଂସଦ ଭବନରୁ ବିଦାୟ ନେବା ନିଶ୍ଚିତ ଭାବେ ଏକ ଭାବପ୍ରବଣ ମୁହୂର୍ତ୍ତ। ଗୃହର ବିଭିନ୍ନ ଘଟଣା ପ୍ରବାହକୁ ନେଇ ସେ କହିଥିଲେ ଯେ ଏହି ସଦନ ମୂକ ସାକ୍ଷୀ ଥିବା ଅନେକ ଘଟଣାବଳୀ ଗୃହର ରହିଛି। “ଏହାର ଗୌରବ ମଧ୍ୟ ଆମର’” ବୋଲି ସେ କହିଥିଲେ। ନବ ଭାରତ ଗଠନ ନିମନ୍ତେ ଦେଶ ଅସଂଖ୍ୟ ଘଟଣାର ସାକ୍ଷୀ ରହିଛି। ସଂସଦ ଭବନର ଏହି ୭୫ ବର୍ଷର ଇତିହାସ ଆଜି ସାଧାରଣ ନାଗରିକଙ୍କ ପାଇଁ ସମ୍ମାନ ଜଣାଇବାର ଏକ ସୁଯୋଗ।

ପ୍ରଧାନମନ୍ତ୍ରୀ ଯେତେବେଳେ ପ୍ରଥମ ଥର ସଂସଦ ସଦସ୍ୟ ବନିଲେ, ସେ କିପରି ଭବନକୁ ନତମସ୍ତକ ହୋଇ ତାଙ୍କର ଭକ୍ତି ଅର୍ଘ୍ୟ ଅର୍ପଣ କରିଥିଲେ ତା’ର ସ୍ମୃତିଚାରଣ କରିଥିଲେ। ଏହା କିପରି ଏକ ଭାବପ୍ରବଣତାର ମୁହୂର୍ତ୍ତ ଥଲା ସେ ତାହା କଳ୍ପନା କରିପାରୁ ନ ଥିଲେ ମଧ୍ୟ କହିଥିଲେ ଯେ “ଭାରତୀୟ ଗଣତନ୍ତ୍ରର ଏହା ହେଉଛି ଶକ୍ତି, ଯେତେବେଳେ ଗୋଟେ ଗରିବ ପିଲା ରେଳ ଷ୍ଟେସନରେ ଜୀବନ ଜୀବିକା ନିମନ୍ତେ ଚାହା ବିକ୍ରି କରୁଥିଲା ସେ ସଂସଦରେ ପହଂଚିପାରିଛି। ଦେଶ ମତେ ଏତେ ସ୍ନେହ, ସମ୍ମାନ ଓ ଆଶୀର୍ବାଦ ଦେବ ତାହା ମୁଁ କେବେ ମଧ୍ୟ ଭାବି ନ ଥିଲି” ବୋଲି ସେ କହିଥିଲେ।

ସଂସଦର ଫାଟକରେ ଖୋଦିତ ହୋଇଥିବା ଉପନିଷଦର ବାକ୍ୟକୁ ଉଦ୍ଧାର କରି ଶ୍ରୀ ମୋଦୀ କହିଥିଲେ ଯେ ମୁନିଋଷିଗଣ କହିଛନ୍ତି ଯେ ଜନସାଧାରଣଙ୍କ ନିମନ୍ତେ କବାଟ ଖୋଲି ଦିଅ ଓ ଦେଖ କିପରି ସେମାନେ ନିଜର ଅଧିକାର ପାଉଛନ୍ତି। ଏଭଳି ଦୃଢ଼ୋକ୍ତିର କ’ଣ ଯଥାର୍ଥତା ରହିଛି, ବର୍ତ୍ତମାନ ଓ ଅତୀତର ସଦସ୍ୟମାନେ ତା’ର ସାକ୍ଷୀ ରହିଛନ୍ତି।

ସମୟ ଗତି ସହ ତାଳ ଦେଇ କିପରି କିପରି ପରିବର୍ତ୍ତନ ଘଟୁଛି ଓ ସମାଜର ପ୍ରତ୍ୟେକ ଗୋଷ୍ଠୀର ଲୋକ କିପରି ପ୍ରତିନିଧିତ୍ବ କରୁଛନ୍ତି ତା’ ଉପରେ ଆଲୋକପାତ କରିଥିଲେ। “ସମୂହ ବାତାବରଣ ଜନସାଧାରଣଙ୍କ ପୂର୍ଣ୍ଣ କ୍ଷମତା ସହ ସେମାନଙ୍କ ଆକାଂକ୍ଷା ପୂରଣ କରୁଛି ବୋଲି ସେ କହିଥିଲେ। ମହିଳା ସାଂସଦମାନଙ୍କ ଅବଦାନ ଗୃହ ମର୍ଯ୍ୟାଦା ବୃଦ୍ଧି କରୁଛି ବୋଲି ସେ କହିଥିଲେ।

ଏକ ହାରାହାରି ହିସାବ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ଉଭୟ ଗୃହକୁ ୭୫୦୦ରୁ ଅଧିକ ଲୋକ ପ୍ରତିନିଧିତ୍ବ କରିଥିବା ବେଳେ ସେମାନଙ୍କ ମଧ୍ୟରେ ହାରାହାରି ୬୦୦ ଜଣ ମହିଳା ପ୍ରତିନିଧି ଅଛନ୍ତି। ଶ୍ରୀ ଇନ୍ଦ୍ରଜିତ୍ ଗୁପ୍ତାଜୀ ଏହି ଗୃହରେ ପ୍ରାୟ ୪୩ ବର୍ଷ ଧରି ପ୍ରତିନିଧି ଥିବାବେଳେ, ଶ୍ରୀ ସାଫିକୁର ରହେମାନ ୯୩ ବର୍ଷରେ ମଧ୍ୟ ସାଂସଦ ରହିଥିଲେ। କୁମାରୀ ଚନ୍ଦ୍ରାଣୀ ମୁର୍ମୁ ମାତ୍ର ୨୫ ବର୍ଷ ବୟସରେ ଗୃହକୁ ନିର୍ବାଚିତ ହୋଇଥିବା ସେ ପ୍ରକାଶ କରିଥିଲେ।

ଗୃହଟି ଯୁକ୍ତିତର୍କ ଓ ବ୍ୟଙ୍ଗ ସତ୍ତ୍ବେ ଗୋଟିଏ ପରିବାର ଭଳି ହୋଇଥିବା ବେଳେ, ତିକ୍ତତା ଗୃହରେ ବେଶୀଦିନ ନ ରହିବା ଗୋଟିଏ ବଡ଼ ଗୁଣ ବୋଲି ଶ୍ରୀ ମୋଦୀ କହିଥିଲେ। କିପରି ଭୟଙ୍କର ଦେହ ଖରାପ ସତ୍ତ୍ବେ ଓ ବୈଶ୍ବିକ ମହାମାରୀ କାଳରେ ମଧ୍ୟ ସଦସ୍ୟମାନେ ଗୃହରେ ଉପସ୍ଥିତ ରହି ନିଜର କର୍ତ୍ତବ୍ୟ ତୁଲାଇଛନ୍ତି।

ସ୍ବାଧୀନତାର ପ୍ରାରମ୍ଭରେ ନୂତନ ଦେଶ ଯୋଗୁ କେତେକ ସଂଶୟବାଦ ଥିଲେ ମଧ୍ୟ ସଂସଦର ଶକ୍ତି ଯୋଗୁ ସମସ୍ତ ସନ୍ଦେହ ଭୁଲ ପ୍ରମାଣିତ ହୋଇଛି।

୨ ବର୍ଷ ୧୧ ମାସ ଧରି ଚାଲିଥିବା ସମ୍ବିଧାନ ସଭା ଏହି ସଦନରେ ବସିଥିବା ବେଳେ, ସମ୍ବିଧାନ ଗୃହୀତ ହୋଇ ଲାଗୁ ମଧ୍ୟ ହୋଇଥିଲା। “ଗତ ୭୫ ବର୍ଷ ମଧ୍ୟରେ ସବୁଠାରୁ ବଡ଼ ସଫଳତା ସାଧାରଣ ଜନତାଙ୍କ ଆସ୍ଥା ସଂସଦ ଉପରେ ନିରବଚ୍ଛିନ୍ନ ଭାବେ ବୃଦ୍ଧି ପାଇଛି” ବୋଲି ସେ କହିଥିଲେ। ଡକ୍ଟର ରାଜେନ୍ଦ୍ର ପ୍ରସାଦ, ଡକ୍ଟର କଲାମ, ଡକ୍ଟର ରାମନାଥ କୋବିନ୍ଦଙ୍କ ଠାରୁ ଦ୍ରୌପଦୀ ମୁର୍ମୁଙ୍କ ପର୍ଯ୍ୟନ୍ତ ରାଷ୍ଟ୍ରପତିମାନଙ୍କ ଅଭିଭାଷଣ ଯୋଗୁ ଗୃହ ବେଶ ଲାଭବାନ ହୋଇଛି।

ପଣ୍ଡିତ ନେହେରୁ, ଲାଲ ବାହାଦୂର ଶାସ୍ତ୍ରୀଙ୍କ ଠାରୁ ଅଟଳ ବିହାରୀ ବାଜପେୟୀ ଓ ଡକ୍ଟର ମନମୋହନ ସିଂହ ପ୍ରଧାନମନ୍ତ୍ରୀ ଭାବେ ନେତୃତ୍ବ ନେଇ ଦେଶକୁ ଦିଗଦର୍ଶନ ଦେଇଛନ୍ତି ଓ ଏହି ଅବସରରେ ସେ ସେମାନଙ୍କ ସଫଳତାର କାହାଣୀ ଉପରେ ଆଲୋକପାତ ପ୍ରଯୁଜ୍ୟ ବୋଲି କହିଥିଲେ। ସେ ମଧ୍ୟ ସର୍ଦ୍ଦାର ବଲ୍ଲଭଭାଇ ପଟେଲ, ରାମ ମନୋହର ଲୋହିଆ, ଚନ୍ଦ୍ରଶେଖର, ଲାଲକୃଷ୍ଣ ଆଡଭାନୀ ପ୍ରମୁଖ କିପରି ଆଲୋଚନାକୁ ସମୃଦ୍ଧ କରିବା ସହ ସାଧାରଣ ନାଗରିକଙ୍କ ସ୍ବରକୁ ଉପସ୍ଥାପିତ କରିଥିଲେ ତା’ର ବର୍ଣ୍ଣନା କରିଥିଲେ। କେତେକ ବିଦେଶାଗତ ନେତାଙ୍କ ଭାଷଣ କିପରି ସେମାନଙ୍କ ଭାରତ ପ୍ରତି ସମ୍ମାନକୁ ପ୍ରତିପାଦିତ କରିଛି ତାହାର ମଧ୍ୟ ସେ ଆଲୋଚନା କରିଥିଲେ। ନେହୁରୀ ଜୀ, ଶାସ୍ତ୍ରୀ ଜୀ ଓ ଇନ୍ଦିରା ଜୀଙ୍କୁ କିପରି ଦେଶ ସେମାନଙ୍କ ପ୍ରଧାନମନ୍ତ୍ରୀତ୍ବ କାଳରେ ହରାଇଛି ସେଭଳି କଷ୍ଟକର ସମୟର ମଧ୍ୟ ସେ ସ୍ମୃତିଚାରଣ କରିଥିଲେ।

ଅନେକ ଆହ୍ବାନ ସତ୍ତ୍ବେ ବାଚସ୍ପପତିଗଣ ଖୁବ୍ ନିପୁଣତାର ସହ ଗୃହକୁ ଚଳାଇଛନ୍ତି। ନିଜର ନିଷ୍ପତ୍ତିରେ ସେମାନେ ଅନେକ ବିଷୟର ନଜିରମାନ ଦେଇଥିଲେ। ଦୁଇ ଜଣ ମହିଳାଙ୍କ ସମେତ ୧୭ ଜଣ ବାଚସ୍ପତି, ଶ୍ରୀ ମାଭଲକରଙ୍କ ଠାରୁ ଶ୍ରୀମତୀ ସୁମିତ୍ରା ମହାଜନ ଓ ଶ୍ରୀ ଓମ୍ ବିର୍ଲା ପର୍ଯ୍ୟନ୍ତ ସମସ୍ତେ କିପରି ସବୁ ଦଳକୁ ଧରି ଗୃହ ଚଳାଇଥିଲେ ତଥା କର୍ମଚାରୀଙ୍କ ମଧ୍ୟ କୁଶଳତାକୁ ସେ ପ୍ରଶଂସା କରିଥିଲେ।

ସଂସଦ ଉପରେ ଆତଙ୍କବାଦୀ ଆକ୍ରମଣକୁ ମନେ ପକାଇ ଏହା କେବଳ ଭବନ ଉପରେ ନୁହେଁ, ବରଂ ଗଣତନ୍ତ୍ରର ଜନନୀ ଉପରେ ଆକ୍ରମଣ ଥିଲା ବୋଲି ସେ କହିଥିଲେ। “ଏହା ଭାରତର ଆତ୍ମା ଉପରେ ଆକ୍ରମଣ ଥିଲା” ବୋଲି ପ୍ରଧାନମନ୍ତ୍ରୀ ମନ୍ତବ୍ୟ ମଝିରେ କହିଥିଲେ। ଆତଙ୍କବାଦୀ ଓ ଗୃହ ମଧ୍ୟରେ ଯେଉଁମାନେ ଠିଆ ହୋଇ ସଦସ୍ୟମାନଙ୍କୁ ରକ୍ଷା କରିଛନ୍ତି ସେହି ବୀରମାନଙ୍କ ପ୍ରତି ସେ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ।

ଅତ୍ୟାଧୁନିକ ପ୍ରଯୁକ୍ତିବିଦ୍ୟା ଉପଯୋଗ ନ କରି ମଧ୍ୟ ଯେଉଁ ଉତ୍ସର୍ଗୀ ଭାବାପନ୍ନ ସାମ୍ବାଦିକମାନେ ସଂସଦର ଘଟଣାବଳୀର ବିବରଣୀ ସଂଗ୍ରହ କରୁଥିଲେ ପ୍ରଧାନମନ୍ତ୍ରୀ ସେମାନଙ୍କୁ ମଧ୍ୟ ମନେ ପକାଇଥିଲେ। ପୁରୁଣା ସଂସଦ ଭବନକୁ ବିଦାୟ ଦେବା ସେମାନଙ୍କ ନିମନ୍ତେ ଆହୁରି କଷ୍ଟକର କାରଣ ସେହି ସାମ୍ବାଦିକଗଣ ଏଥିସହ ସଦସ୍ୟମାନଙ୍କ ତୁଳନାରେ ଅଧିକ ଯୋଡ଼ି ହୋଇଥିଲେ ବୋଲି କହିଥିଲେ।

ନାଦବ୍ରହ୍ମର ପୂଜାବିଧି ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଏହି ଅଞ୍ଚଳ ଏକ ତୀର୍ଥସ୍ଥଳୀ ପାଲଟି ଯାଇଛି, ସେତେବେଳେ ୭୫୦୦ ପ୍ରତିନିଧିଙ୍କ ସ୍ବର ସଂସଦରେ ଗୁଞ୍ଜରି ଉଠିଛି। ଏଥିପାଇଁ ଭବନ ତୀର୍ଥସ୍ଥଳ ପାଲଟିଯାଇଛି। “ସଂସଦରେ ଭଗତ ସିଂ ଓ ବଟୁକେଶ୍ବର ଦତ୍ତ ବ୍ରିଟିଶମାନଙ୍କ ମଧ୍ୟରେ ସେମାନଙ୍କ କାର୍ଯ୍ୟ ଓ ପରାକ୍ରମ ବଳରେ ଆତଙ୍କ ଖେଳାଇଥିଲେ। ଯେତେବେଳେ ‘ମଧ୍ୟରାତ୍ରୀ ଉପନୀତ’ ପଣ୍ଡିତ ଜବାହରଲାଲ ନେହେରଙ୍କୁ ସେହି ଗୁଞ୍ଜରଣ ଭାରତର ପ୍ରତ୍ୟେକ ନାଗରିକଙ୍କୁ ଅନୁପ୍ରାଣିତ କରିବ ବୋଲି ସେ କହିଥିଲେ। ସେ ମଧ୍ୟ ଅଟଳ ବିହାରୀ ବାଜପେୟୀଙ୍କ ପ୍ରସିଦ୍ଧ ଭାଷଣକୁ ଉଦ୍ଧାର କରି କହିଥିଲେ, “ସରକାର ଆସିବେ ଓ ଯିବେ, ଦଳ ଗଠିତ ହେବ ଓ ଭାଙ୍ଗିବ। ଦେଶ ବଂଚିବା ଉଚିତ ଓ ଗଣତନ୍ତ୍ର ବଞ୍ଚି ରହିବା ଉଚିତ।”

ପ୍ରଥମ ମନ୍ତ୍ରିମଣ୍ଡଳର ସ୍ମୃତିଚାରଣ କରି ଶ୍ରୀ ମୋଦୀ କହିଥିଲେ ଯେ ବାବା ସାହେବ ଆମ୍ବେଦକର ବିଶ୍ବର ବିଭିନ୍ନ ଦେଶ ଭଲ ଭଲ ନୀତିକୁ ସ୍ଥାନ ଦେଇଥିଲେ। ନେହେରୁ ମନ୍ତ୍ରିମଣ୍ଡଳରେ ବାବା ସାହେବ ଆମ୍ବେଦକରଙ୍କ ଚମତ୍କାର ଜନନୀତି ବିଷୟରେ ସେ କହିଥିଲେ। ପ୍ରଧାନମନ୍ତ୍ରୀ ଦଳିତମାନଙ୍କ ଉତଥାନ ପାଇଁ ବାବା ସାହେବ କିପରି ଶିଳ୍ପାୟନ ପ୍ରତି ଗୁରୁତ୍ବ ଦେଉଥିଲେ ଓ ଡକ୍ଟର ଶ୍ୟାମା ପ୍ରସାଦ ମୁଖାର୍ଜୀ ଦେଶର ପ୍ରଥମ ଶିଳ୍ପମନ୍ତ୍ରୀ ଭାବେ କିପରି ପ୍ରଥମ ଶିଳ୍ପ ନୀତି ଆଣିଥିଲେ ତା’ର ସେ ଉଦାହରଣ ଦେଇଥିଲେ।

ଏ ସେହି ଗୃହ ଯେଉଁଠି ଲାଲ ବାହାଦୂର ଶାସ୍ତ୍ରୀ ୧୯୬୫ ଯୁଦ୍ଧରେ ଭାରତର ସୈନିକମାନଙ୍କ ପରାକ୍ରମ ସମ୍ପର୍କରେ କହିଥିଲେ। ଶାସ୍ତ୍ରୀଜୀଙ୍କ ଦ୍ବାରା ସବୁଜ ବିପ୍ଳବର ନିଅଁ ମଧ୍ୟ ଏହି ଗୃହରେ ପଡ଼ିଥିଲା। ଶ୍ରୀମତୀ ଇନ୍ଦିରା ଗାନ୍ଧୀଙ୍କ ନେତୃତ୍ବରେ ବାଂଲାଦେଶ ସ୍ବାଧୀନତା ସଂଗ୍ରାମ ମଧ୍ୟ ଏହି ଗୃହରେ ଆଲୋଚିତ ହୋଇଥିଲା। ଗଣତନ୍ତ୍ର ଉପରେ ଜରୁରୀକାଳୀନ ପରିସ୍ଥିତି ସମୟରେ କିପରି ଆକ୍ରମଣ ହୋଇ ପରେ ପୁଣି ଜନତାଙ୍କ ଶକ୍ତି ଯୋଗୁ ଜୁରୁରୀ ପରିସ୍ଥିତି ପ୍ରତ୍ୟାହୃତ ହୋଇଥିଲା ତା’ ଉପରେ ମଧ୍ୟ ଶ୍ରୀ ମୋଦୀ ଆଲୋକପାତ କରିଥିଲେ।

ପ୍ରଧାନମନ୍ତ୍ରୀ ଚରଣ ସିଂଙ୍କ ନେତୃତ୍ବରେ ଗ୍ରାମ ଉନ୍ନୟନ ମନ୍ତ୍ରଣାଳୟ ସୃଷ୍ଟି ନେଇ ସେ ପ୍ରକାଶ କରିଥିଲେ। ମତାଧିକାର ବୟସ ସୀମା ୨୧ରୁ ୧୮କୁ ହ୍ରାସ ନିଷ୍ପତ୍ତି ଏହି ଗୃହରେ ହୋଇଥିଲା। ଦେଶ ଯେତେବେଳେ ଆର୍ଥିକ ବିପତ୍ତି ଆଡ଼କୁ ଗତି କରୁଥିଲା ପ୍ରଧାନମନ୍ତ୍ରୀ ପି.ଭି. ନରସିଂହ ରାଓଙ୍କ ନେତୃତ୍ବ ଆର୍ଥିକ ନୀତି ମଧ୍ୟ ଦେଶ ଏହି ଗୃହରେ ଗ୍ରହଣ କରିଥିଲା। ସେ ମଧ୍ୟ ଅଟଳ ଜୀଙ୍କ ସର୍ବଶିକ୍ଷା ଅଭିଯାନ ଉପରେ ଆଲୋକପାତ କରିଥିଲେ। ଆଦବାସୀ ବ୍ୟାପାର ମନ୍ତ୍ରଣାଳୟ ମଧ୍ୟ ତାଙ୍କ ସମୟରେ ହୋଇଥିଲା। “ଭୋଟ ପାଇଁ ନୋଟ” ହେରଫେର ମଧ୍ୟ ଗୃହରେ ଆଲୋପାତ ହୋଇଥିଲା।

ଯୁଗ ଯୁଗ ଧରି ବାକି ପଡ଼ିଥିବା ଐତିହାସିକ ନିଷ୍ପତ୍ତି ଯେପରିକି ଧାରା ୩୭୦, ଜିଏସଟି, ଓଆରଓପିଓ ଗରୀବଙ୍କ ନିମନ୍ତେ ଶତକଡ଼ା ୧୦ ଭାଗ ସ୍ଥାନ ସଂରକ୍ଷଣ ଏହି ଭବନରେ ନିଆ ଯାଇଥିଲା।

ପ୍ରଧାନମନ୍ତ୍ରୀ କହିଥିଲେ ଯେ ଏହି ଗୃହ ଗଣତନ୍ତ୍ରର ଅନେକ ଉତଥାନ ପତନ ସତ୍ତ୍ବେ ଜନସାଧାରଣଙ୍କ ଆସ୍ଥାର କେନ୍ଦ୍ର ହୋଇ ରହିଆସିଛି। ଯେତେବେଳେ ଅଟଳ ବିହାରୀଙ୍କ ସରକାର ମାତ୍ର ଗୋଟିଏ ଭୋଟରେ ହାରି ଯାଇଥିଲା, ସେ ତା’ର ସ୍ମରଣ କରିଥିଲେ।

ପ୍ରଧାନମନ୍ତ୍ରୀ ମଧ୍ୟ ତିନିଟି ନୂତନ ରାଜ୍ୟ ଛତିଶଗଡ଼, ଉତ୍ତରାଖଣ୍ଡ ଓ ଝାଡ଼ଖଣ୍ଡ ଅଟଳ ଜୀଙ୍କ ସମୟରେ ସୃଷ୍ଟି ହୋଇଥିଲା ତା’ ଉପରେ ଆଲୋକପାତ କରିଥିଲେ ଓ କ୍ଷମତା ହାସଲ ନିମନ୍ତେ ତେଲେଙ୍ଗାନା ସୃଷ୍ଟି କିପରି ହୋଇଥିଲା ତା’ର ସମାଲୋଚନା କରିଥିଲେ। ଉଦ୍ଦେଶ୍ୟ ପ୍ରଣୋଦିତ ଭାବେ ଏହା କରାଯାଇଥିବାରୁ କୌଣସି ରାଜ୍ୟରେ ଏହାର ଉତ୍ସବ ମଧ୍ୟ ପାଳିତ ହୋଇ ନ ଥିଲା।

ସମ୍ବିଧାନ ସଭା କିପରି ଏହାର ସଦସ୍ୟମାନଙ୍କ ଭତ୍ତା ହ୍ରାସ କରିବା ସହ ଗୃହ କ୍ୟାଣ୍ଟିନ ରିହାତି କିପରି ଉଚ୍ଛେଦ କରାଗଲା ତା’ ଉପରେ ଶ୍ରୀ ମୋଦୀ ସ୍ମରଣ କରିଥିଲେ। ବୈଶ୍ବିକ ମହାମାରୀ କାଳରେ କିପରି ସଦସ୍ୟମାନେ ସେମାନଙ୍କ ସ୍ଥାନୀୟ ଅଞ୍ଚଳ ଉନ୍ନୟନ ପାଣ୍ଠି ଖର୍ଚ୍ଚ କରିବା ସହ ଶତକଡ଼ା ୩୦ ଭାଗ ଦରମା କାଟ ପାଇଁ ଆଗେଇ ଥିଲେ, ପ୍ରଧାନମନ୍ତ୍ରୀ ତାହାର ଉଦାହରଣ ଦେଇଥିଲେ। ଲୋକ ପ୍ରତିନିଧି ଆଇନରେ ପରିବର୍ତ୍ତନ ପାଇଁ କିପରି ସଦସ୍ୟଗଣ ଶୃଙ୍ଖଳିତ ଉପାୟ କାର୍ଯ୍ୟ କରିଥିଲେ ସେ ବିଷୟ ମଧ୍ୟ ସେ କହିଥିଲେ।

ବର୍ତ୍ତମାନ ସଦସ୍ୟଗଣ ପୁରୁଣା ସଂସଦ ଭବନକୁ ବିଦାୟ ଦେଇ କିପରି ନୂଆ ଭାବନାକୁ ଯାଉଥିବାରୁ ସେମାନେ ଅତ୍ୟନ୍ତ ଭାଗ୍ୟବାନ ବୋଲି ପ୍ରଧାନମନ୍ତ୍ରୀ କହିଥିଲେ। “ଆଜିର ଏହି ପଦକ୍ଷେପ ୭୫୦୦ ପ୍ରତିନିଧିଙ୍କ ନିମନ୍ତେ ଗର୍ବର ମୁହୂର୍ତ୍ତ କାରଣ ସେ ସଂସଦର ଚାରିକାନ୍ଥ ମଧ୍ୟରୁ ହିଁ ପ୍ରେରଣା ଲାଭ କରିଛନ୍ତି” ବୋଲି ଶ୍ରୀ ମୋଦୀ କହିଥିଲେ।

ଉଦବୋଧନ ଶେଷରେ ପ୍ରଧାନମନ୍ତ୍ରୀ ସଦସ୍ୟଗଣ ବିପୁଳ ଉତ୍ସାହ ଓ ଉଦ୍ଦୀପନାର ସହ ନୂତନ ଭବନକୁ ଯିବେ ବୋଲି ଆଶା ପ୍ରକଟ କରିବା ସହ ଏଭଳି ଐତିହାସିକ ସ୍ମୃତିକୁ ଉଜ୍ଜୀବିତ କରିବା ପାଇଁ ତାଙ୍କୁ ସୁଯୋଗ ଦେଇଥିବାରୁ ବାଚସ୍ପତିଙ୍କୁ ଧନ୍ୟବାଦ ଜଣାଇଥିଲେ।

ନୂଆଦିଲ୍ଲୀ: ସଂସଦର ସ୍ୱତନ୍ତ୍ର ଅଧିବେଶନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଲୋକସଭାରେ କହିଛନ୍ତି ଯେ, ନୂତନ ପରିସରକୁ ଯିବା ପୂର୍ବରୁ ଏହି ସଂସଦ ଗୃହ ସହିତ ଜଡିତ ପ୍ରେରଣାଦାୟକ ମୂହୁର୍ତ୍ତଗୁଡ଼ିକୁ ମନେ ରଖିବାର ସମୟ ଆସିଛି। ଦେଶର ୭୫ ବର୍ଷର ସଂସଦୀୟ ଯାତ୍ରା ବିଷୟରେ ମନେ ପକାଇବା ଏବଂ ନୂତନ ଗୃହକୁ ଯିବା ପୂର୍ବରୁ ଇତିହାସର ସେହି ପ୍ରେରଣାଦାୟକ ମୂହୁର୍ତ୍ତଗୁଡ଼ିକୁ ମନେ ପକାଇ ଆଗକୁ ବଢିବା ପାଇଁ ଏହା ଏକ ସୁଯୋଗ। ସେ କହିଛନ୍ତି ଯେ, ଜି -୨୦ ଶିଖର ସମ୍ମିଳନୀକୁ ସଫଳତାର ସହ ଆୟୋଜନ କରିଥିବାରୁ ଭାରତର ଗର୍ବ ସାରା ବିଶ୍ୱରେ ଚର୍ଚ୍ଚା ହେଉଛି। ଏହାପୂର୍ବରୁ ଲୋକସଭା ବାଚସ୍ପତି ଓମ ବିର୍ଲା ଜି -୨୦ ଶିଖର ସମ୍ମିଳନୀର ସଫଳତା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱକୁ ପ୍ରଶଂସା କରିଥିଲେ।

ଏହି ଗୃହକୁ ବିଦାୟ ଦେବା ଅତ୍ୟନ୍ତ ଭାବପ୍ରବଣ ମୁହୂର୍ତ୍ତ …

ପ୍ରଧାନମନ୍ତ୍ରୀ ମୋଦୀ ଲୋକସଭାରେ ତାଙ୍କ ଅଭିଭାଷଣରେ କହିଛନ୍ତି ଯେ, ଏହା ସତ୍ୟ ଯେ ଏହି କୋଠା ନିର୍ମାଣ ନିଷ୍ପତ୍ତି ବିଦେଶୀ ଶାସକଙ୍କ ଅଟେ, କିନ୍ତୁ ଆମେ କଦାପି ଭୁଲି ପାରିବୁ ନାହିଁ ଯେ ମୋର ଦେଶବାସୀ ଏହି କୋଠା ନିର୍ମାଣ ପାଇଁ କଠିନ ପରିଶ୍ରମ, ଝାଳ ଏବଂ ଟଙ୍କା ଲଗାଇଛନ୍ତି। ଏହି ଗୃହକୁ ବିଦାୟ ଦେବା ପାଇଁ ଏକ ଅତ୍ୟନ୍ତ ଭାବପ୍ରବଣ ମୁହୂର୍ତ୍ତ। ଆମେ ଏହି ଘରୁ ବାହାରିବାବେଳେ ଆମର ମନ ଅନେକ ଭାବନା ଏବଂ ଅନେକ ସ୍ମୃତିରେ ପରିପୂର୍ଣ୍ଣ। ଗତ ୭୫ ବର୍ଷର ଆମର ଯାତ୍ରା ଅନେକ ଗଣତାନ୍ତ୍ରିକ ପରମ୍ପରା ଏବଂ ପ୍ରକ୍ରିୟା ଆଣିଦେଇଛି। ସର୍ବୋତ୍ତମ ସୃଷ୍ଟି ହୋଇଛି ଏବଂ ଏହି ଗୃହର ସମସ୍ତ ସଦସ୍ୟ ଏଥିରେ ଏକ ବିଶେଷ ଅବଦାନ ରଖିଛନ୍ତି। ସମୟ ଏହାର ସାକ୍ଷୀ ହୋଇଛି। ଯଦିଓ ଆମେ ଏକ ନୂତନ କୋଠାକୁ ଯିବା, ଏହି ପୁରୁଣା କୋଠା ସର୍ବଦା ଆଗାମୀ ପିଢିକୁ ପ୍ରେରଣା ଯୋଗାଇବ।

ମୁଁ ଯେତେବେଳେ ସାଂସଦ ଭାବରେ ପ୍ରଥମ ଥର ଏହି ବିଲଡିଂରେ ପ୍ରବେଶ କଲି …
ସଂସଦ ଭବନରେ ତାଙ୍କର ପ୍ରଥମ ଦିନର ସ୍ମୃତି ବାଣ୍ଟି ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, “ଯେତେବେଳେ ମୁଁ ସାଂସଦ ଭାବରେ ପ୍ରଥମ ଥର ପାଇଁ ଏହି ପବିତ୍ର ଭବନରେ ପ୍ରବେଶ କଲି, ସେତେବେଳେ ମୁଁ ଏହି ଗଣତନ୍ତ୍ରକୁ ସ୍ୱାଗତ କରିବା ପାଇଁ ଏହି ଘରର ଦ୍ୱାରରେ ମୁଣ୍ଡ ନୁଆଁଇଲି। ସେହି ମୁହୂର୍ତ୍ତଟି ଥିଲା ମୋ ପାଇଁ ଅତ୍ୟନ୍ତ ସ୍ଵତନ୍ତ୍ର, ସେହି ମୁହୂର୍ତ୍ତଟି ମୋ ପାଇଁ ଭାବନାରେ ପରିପୂର୍ଣ୍ଣ ଥିଲା ମୁଁ ଭାବୁଛି ସଂସଦ ସହିତ ଜଡିତ ପ୍ରତ୍ୟେକ ସମ୍ମାନଜନକ ବ୍ୟକ୍ତିଙ୍କ ପ୍ରତି ସମ୍ମାନର ଭାବନା ଅଛି। ଏହା ମଧ୍ୟ ସ୍ୱାଭାବିକ।

୬୦୦ ମହିଳା ସାଂସଦ ଉଭୟ ଗୃହର ସମ୍ମାନ ବୃଦ୍ଧି କରିଛନ୍ତି:

ସଂସଦରେ ମହିଳାଙ୍କ ଉପସ୍ଥିତି ସମ୍ପର୍କରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ପ୍ରଥମେ ଏଠାରେ ମହିଳାଙ୍କ ସଂଖ୍ୟା କମ୍ ଥିଲା। କିନ୍ତୁ ଧୀରେ ଧୀରେ ମା ଏବଂ ଭଉଣୀମାନେ ମଧ୍ୟ ଏହି ଘରର ସମ୍ମାନ ବୃଦ୍ଧି କରିଛନ୍ତି। ଉଭୟ ଗୃହରେ ଏପର୍ଯ୍ୟନ୍ତ ୭,୫୦୦ ରୁ ଅଧିକ ଜନ ପ୍ରତିନିଧୀ ସହଯୋଗ କରିଛନ୍ତି। ଏହି ଅବଧିରେ ପ୍ରାୟ ୬୦୦ ମହିଳା ସାଂସଦ ଉଭୟ ଗୃହର ସମ୍ମାନ ବୃଦ୍ଧି କରିଛନ୍ତି।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ନୂଆଦିଲ୍ଲୀର ଦ୍ୱାରକାଠାରେ ଭାରତ ଅନ୍ତର୍ଜାତୀୟ ସମ୍ମିଳନୀ ଓ ପ୍ରଦର୍ଶନୀ କେନ୍ଦ୍ରର ପ୍ରଥମ ପର୍ଯ୍ୟାୟ ‘ଯଶୋଭୂମି’କୁ ରାଷ୍ଟ୍ର ଉଦ୍ଦେଶ୍ୟରେ ସମର୍ପିତ କରିଛନ୍ତି। ‘ଯଶୋଭୂମି’ରେ ଏକ ଭବ୍ୟ ସମ୍ମିଳନୀ କେନ୍ଦ୍ର, ଏକାଧିକ ପ୍ରଦର୍ଶନୀ ହଲ୍ ଏବଂ ଅନ୍ୟାନ୍ୟ ସୁବିଧା ରହିଛି। ବିଶ୍ୱକର୍ମା ଜୟନ୍ତୀ ଅବସରରେ ପାରମ୍ପରିକ କାରିଗରମାନଙ୍କ ପାଇଁ ‘ପିଏମ୍ ବିଶ୍ୱକର୍ମା ଯୋଜନା’ର ଶୁଭାରମ୍ଭ ମଧ୍ୟ ପ୍ରଧାନମନ୍ତ୍ରୀ କରିଛନ୍ତି । ପ୍ରଧାନମନ୍ତ୍ରୀ ବିଶ୍ୱକର୍ମା ଲୋଗୋ, ଟ୍ୟାଗ୍ ଲାଇନ୍ ଏବଂ ପୋର୍ଟାଲକୁ ଉନ୍ମୋଚନ କରିଥିଲେ । ଏହି ଅବସରରେ ସେ ଏକ ସ୍ୱତନ୍ତ୍ର ଡାକ ଟିକେଟ, ଟୁଲ୍ କିଟ୍ ଇ-ପୁସ୍ତିକା ଏବଂ ଭିଡିଓ ଉନ୍ମୋଚନ କରିଥିଲେ। ପ୍ରଧାନମନ୍ତ୍ରୀ ୧୮ ଜଣ ହିତାଧିକାରୀଙ୍କୁ ବିଶ୍ୱକର୍ମା ପ୍ରମାଣପତ୍ର ବଣ୍ଟନ କରିଥିଲେ।
ସଭାସ୍ଥଳରେ ପହଞ୍ଚିବା ପରେ ପ୍ରଧାନମନ୍ତ୍ରୀ ଗୁରୁ-ଶିଷ୍ୟ ପରମ୍ପରା ଓ ନୂଆ ପ୍ରଯୁକ୍ତି ପ୍ରଦର୍ଶନୀ ବୁଲି ଦେଖିଥିଲେ। ଯଶୋଭୂମିର ଥ୍ରୀଡି ମଡେଲକୁ ମଧ୍ୟ ସେ ଯାଞ୍ଚ କରିଥିଲେ। ଏହା ପୂର୍ବରୁ ପ୍ରଧାନମନ୍ତ୍ରୀ ଦ୍ୱାରକା ସେକ୍ଟର ୨୧ରୁ ନୂଆ ମେଟ୍ରୋ ଷ୍ଟେସନ ‘ଯଶୋଭୂମି ଦ୍ୱାରକା ସେକ୍ଟର ୨୫’ ପର୍ଯ୍ୟନ୍ତ ଦିଲ୍ଲୀ ଏୟାରପୋର୍ଟ ମେଟ୍ରୋ ଏକ୍ସପ୍ରେସ ଲାଇନର ସଂପ୍ରସାରଣକୁ ଉଦଘାଟନ କରିଥିଲେ ।

ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ ସମସ୍ତଙ୍କୁ ବିଶ୍ୱକର୍ମା ଜୟନ୍ତୀ ଅବସରରେ ଶୁଭେଚ୍ଛା ଜଣାଇବା ସହ ଏହାକୁ ପାରମ୍ପରିକ କାରିଗର ଓ ଶିଳ୍ପୀ ମାନଙ୍କୁ ସମର୍ପିତ କରିଥିଲେ। ଦେଶର ଲକ୍ଷ ଲକ୍ଷ ବିଶ୍ୱକର୍ମୀଙ୍କ ସହ ଯୋଡ଼ି ହେବାର ସୁଯୋଗ ମିଳିଥିବାରୁ ସେ ଖୁସି ବ୍ୟକ୍ତ କରିଥିଲେ । ଏହି ଅବସରରେ ଶ୍ରୀ ମୋଦୀ ପ୍ରଦର୍ଶନୀ ପରିଦର୍ଶନ କରିବା ଏବଂ କାରିଗର ଓ ଶିଳ୍ପୀମାନଙ୍କ ସହ ବାର୍ତ୍ତାଳାପ କରିବାର ଚମତ୍କାର ଅନୁଭୂତି ଉପରେ ଆଲୋକପାତ କରିଥିଲେ। ପ୍ରଧାନମନ୍ତ୍ରୀ ନାଗରିକମାନଙ୍କୁ ଏହି ସମ୍ମିଳନୀ ବୁଲି ଆସିବାକୁ ଅନୁରୋଧ କରିଥିଲେ । ଲକ୍ଷ ଲକ୍ଷ କାରିଗର ଏବଂ ସେମାନଙ୍କ ପରିବାର ପାଇଁ ପ୍ରଧାନମନ୍ତ୍ରୀ ବିଶ୍ୱକର୍ମା ଯୋଜନା ଆଶାର କିରଣ ରୂପେ ଆସିଛି ବୋଲି ପ୍ରଧାନମନ୍ତ୍ରୀ କହିଥିଲେ ।

ଅନ୍ତର୍ଜାତୀୟ ସମ୍ମିଳନୀ ଓ ପ୍ରଦର୍ଶନୀ କେନ୍ଦ୍ର ‘ଯଶୋଭୂମି’ ସମ୍ପର୍କରେ ପ୍ରଧାନମନ୍ତ୍ରୀ କହିଥିଲେ, ଏହି ଭବ୍ୟ ସୁବିଧା ନିର୍ମାଣରେ ଶ୍ରମିକ ଏବଂ ବିଶ୍ୱକର୍ମାଙ୍କ ଗୁରୁତ୍ୱପୂର୍ଣ୍ଣ ଅବଦାନ ରହିଛି । ସେ କହିଥିଲେ, ‘‘ଆଜି ମୁଁ ‘ଯଶୋଭୂମି’କୁ ଦେଶର ପ୍ରତ୍ୟେକ ଶ୍ରମିକଙ୍କୁ, ପ୍ରତ୍ୟେକ ବିଶ୍ୱକର୍ମାଙ୍କୁ ସମର୍ପିତ କରୁଛି।’’ ଆଜିର କାର୍ଯ୍ୟକ୍ରମ ସହ ଜଡ଼ିତ ବିଶ୍ୱକର୍ମାମାନଙ୍କୁ ପ୍ରଧାନମନ୍ତ୍ରୀ କହିଥିଲେ ଯେ, ‘ଯଶୋଭୂମି’ ସେମାନଙ୍କ ରଚନାକୁ ବିଶ୍ୱ ଏବଂ ବିଶ୍ୱ ବଜାର ସହିତ ଯୋଡ଼ିବା ପାଇଁ ଏକ ଜୀବନ୍ତ କେନ୍ଦ୍ର ହେବାକୁ ଯାଉଛି।
ପ୍ରଧାନମନ୍ତ୍ରୀ ଦେଶର ଦୈନନ୍ଦିନ ଜୀବନରେ ବିଶ୍ୱକର୍ମାଙ୍କ ଅବଦାନ ଏବଂ ଗୁରୁତ୍ୱ ଉପରେ ଆଲୋକପାତ କରିଥିଲେ । ବୈଷୟିକ ଜ୍ଞାନକୌଶଳରେ ଯେତେ ଉନ୍ନତି ହେଉ ନା କାହିଁକି ବିଶ୍ୱକର୍ମାମାନେ ସମାଜରେ ସର୍ବଦା ଗୁରୁତ୍ୱପୂର୍ଣ୍ଣ ହୋଇ ରହିବେ ବୋଲି ପ୍ରଧାନମନ୍ତ୍ରୀ କହିଥିଲେ । ବିଶ୍ୱକର୍ମାଙ୍କୁ ସ୍ୱୀକୃତି ଓ ସମର୍ଥନ ମିଳିବା ସମୟର ଆବଶ୍ୟକତା ବୋଲି ସେ କହିଥିଲେ।

ଶ୍ରୀ ମୋଦୀ କହିଥିଲେ, “ସରକାର ବିଶ୍ୱକର୍ମାଙ୍କ ସମ୍ମାନ ବୃଦ୍ଧି, ସାମର୍ଥ୍ୟ ବୃଦ୍ଧି ଏବଂ ସମୃଦ୍ଧି ବୃଦ୍ଧି ପାଇଁ ଏକ ସହଯୋଗୀ ଭାବରେ ଆଗେଇ ଆସିଛନ୍ତି। ଶିଳ୍ପୀ ଓ କାରିଗରମାନଙ୍କର ୧୮ଟି କୌଳିକ ବୃତ୍ତି ଉପରେ ଆଲୋକପାତ କରି ପ୍ରଧାନମନ୍ତ୍ରୀ ସୂଚନା ଦେଇଥିଲେ ଯେ ପ୍ରଧାନମନ୍ତ୍ରୀ ବିଶ୍ୱକର୍ମା ଯୋଜନାରେ ବଢ଼େଇ, କମାର, ବଣିଆ, ମୂର୍ତ୍ତିଶିଳ୍ପୀ, କୁମ୍ଭାର, ମୋଚି, ଦରଜି, ରାଜମିସ୍ତ୍ରୀ, ଭଣ୍ଡାରୀ, ରଜକ ପ୍ରମୁଖକୁ ଅନ୍ତର୍ଭୁକ୍ତ କରାଯାଇଛି ଏବଂ ଏହି ଯୋଜନା ପାଇଁ ୧୩,୦୦୦ କୋଟି ଟଙ୍କା ଖର୍ଚ୍ଚ ହେବ।

ବିଦେଶ ଗସ୍ତ ସମୟରେ ଶିଳ୍ପୀଙ୍କ ସହ କଥାବାର୍ତ୍ତା ବେଳେ ନିଜର ବ୍ୟକ୍ତିଗତ ଅନୁଭୂତିକୁ ମନେ ପକାଇ ପ୍ରଧାନମନ୍ତ୍ରୀ କହିଥିଲେ, ହାତ ତିଆରି ସାମଗ୍ରୀର ବଢୁଥିବା ଚାହିଦା ବଢ଼ୁଛି । ସେ କହିଥିଲେ ଯେ, ବିଶ୍ୱର ବଡ଼ ବଡ଼ କମ୍ପାନୀମାନେ କ୍ଷୁଦ୍ର ଉଦ୍ୟୋଗମାନଙ୍କୁ ସେମାନଙ୍କ କାମ ଦିଅନ୍ତି। ଏହି ଆଉଟସୋର୍ସ କାମ ଆମ ବିଶ୍ୱକର୍ମା ବନ୍ଧୁମାନଙ୍କ ପାଖକୁ ଆସିବା ଦରକାର ଏବଂ ସେମାନେ ଯେପରି ବିଶ୍ୱ ଯୋଗାଣ ଶୃଙ୍ଖଳାର ଏକ ଅଂଶ ପାଲଟିଯିବେ ସେଥିପାଇଁ ଆମେ କାମ କରୁଛୁ । ସେଥିପାଇଁ ବିଶ୍ୱକର୍ମା ବନ୍ଧୁମାନଙ୍କୁ ଆଧୁନିକ ଯୁଗରେ ପହଞ୍ଚାଇବା ପାଇଁ ଏହି ଯୋଜନା ଏକ ପ୍ରୟାସ ବୋଲି ପ୍ରଧାନମନ୍ତ୍ରୀ କହିଥିଲେ ।

ଦକ୍ଷ କାରିଗର ଏବଂ ବୃତ୍ତିକୁ ପ୍ରଶିକ୍ଷଣ ଦେବା ଲାଗି ନିଆଯାଇଥିବା ପଦକ୍ଷେପ ବିଷୟରେ ବର୍ଣ୍ଣନା କରି ପ୍ରଧାନମନ୍ତ୍ରୀ କହିଥିଲେ, “ଏହି ପରିବର୍ତ୍ତିତ ସମୟରେ ବିଶ୍ୱକର୍ମା ବନ୍ଧୁମାନଙ୍କ ପାଇଁ ପ୍ରଶିକ୍ଷଣ, ପ୍ରଯୁକ୍ତି ବିଦ୍ୟା ଏବଂ ଉପକରଣ ଗୁରୁତ୍ୱପୂର୍ଣ୍ଣ।”। ପ୍ରଶିକ୍ଷଣ ସମୟରେ ବିଶ୍ୱକର୍ମା ବନ୍ଧୁମାନଙ୍କୁ ଦୈନିକ ୫୦୦ ଟଙ୍କା ଭତ୍ତା ପ୍ରଦାନ କରାଯିବ ବୋଲି ସେ ସୂଚନା ଦେଇଥିଲେ । ଆଧୁନିକ ଟୁଲକିଟ୍ ପାଇଁ ୧୫ ହଜାର ଟଙ୍କାର ଟୁଲକିଟ୍ ଭାଉଚର ଦିଆଯିବ ଏବଂ ଉତ୍ପାଦର ବ୍ରାଣ୍ଡିଂ, ପ୍ୟାକେଜିଂ ଓ ମାର୍କେଟିଂରେ ସରକାର ସାହାଯ୍ୟ କରିବେ ବୋଲି ସେ କହିଥିଲେ। କେବଳ ଜିଏସଟି ପଞ୍ଜିକୃତ ଦୋକାନରୁ ଟୁଲକିଟ୍ କିଣାଯିବା ସହ ଏହି ଉପକରଣଗୁଡ଼ିକ ମେଡ୍ ଇନ୍ ଇଣ୍ଡିଆ ହେବା ଦରକାର ବୋଲି ସେ କହିଛନ୍ତି।

ବିଶ୍ୱକର୍ମାମାନଙ୍କ ପାଇଁ ବିନା ବନ୍ଧକରେ ଋଣ ସୁବିଧା ଯୋଗାଇ ଦେବା ସମ୍ପର୍କରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଯେତେବେଳେ ଋଣ ପାଇଁ ବନ୍ଧକ ମଗାଯାଏ, ସେହି ଗ୍ୟାରେଣ୍ଟି ମୋଦୀ ଦେଇଥାନ୍ତି । ବିଶ୍ୱକର୍ମା ସାଥୀମାନେ ଅତି କମ୍ ସୁଧରେ କୌଣସି ବନ୍ଧକ ନରଖି ୩ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ପାଇ ପାରିବେ ବୋଲି ସେ ସୂଚନା ଦେଇଥିଲେ ।

କେନ୍ଦ୍ରରେ ସରକାର ବଞ୍ଚିତ ବର୍ଗଙ୍କ ବିକାଶକୁ ପ୍ରାଥମିକତା ଦେଉଛନ୍ତି” ବୋଲି ପ୍ରଧାନମନ୍ତ୍ରୀ କହିଥିଲେ । ‘ଗୋଟିଏ ଜିଲ୍ଲା, ଗୋଟିଏ ଉତ୍ପାଦ’ ଯୋଜନା ଉପରେ ଆଲୋକପାତ କରି ସେ କହିଥିଲେ ଯେ ଏହା ପ୍ରତ୍ୟେକ ଜିଲ୍ଲାରୁ ଏକ ଅଭିନବ ଉତ୍ପାଦକୁ ପ୍ରୋତ୍ସାହିତ କରିଥାଏ। ପ୍ରଧାନମନ୍ତ୍ରୀ ସ୍ୱନିଧି ଯୋଜନା ମାଧ୍ୟମରେ ରାସ୍ତାକଡ଼ ଦୋକାନୀଙ୍କ ପାଇଁ ବ୍ୟାଙ୍କ ଦ୍ୱାର ଖୋଲିବା ଏବଂ ଦିବ୍ୟାଙ୍ଗମାନଙ୍କ ପାଇଁ ସ୍ୱତନ୍ତ୍ର ସୁବିଧା ସୃଷ୍ଟି କରିବା ବିଷୟରେ ମଧ୍ୟ ଶ୍ରୀ ମୋଦୀ ଉଲ୍ଲେଖ କରିଥିଲେ ।

“ମୋଦୀ ସେମାନଙ୍କ ସହଯୋଗ ପାଇଁ ଅଛନ୍ତି ଯେଉଁମାନଙ୍କର ଯତ୍ନ ନେବାକୁ କେହି ନାହାନ୍ତି”, ପ୍ରଧାନମନ୍ତ୍ରୀ କହିଥିଲେ । ଶ୍ରୀ ମୋଦୀ କହିଥିଲେ ଯେ, ଏଠାରେ ସେବା କରିବାକୁ, ସମ୍ମାନର ଜୀବନ ଦେବାକୁ ଏବଂ ସେବା ପ୍ରଦାନକୁ ସୁନିଶ୍ଚିତ କରିବା ପାଇଁ ସେ ଆସିଛନ୍ତି । ଏହା ମୋଦୀଙ୍କ ଗ୍ୟାରେଣ୍ଟି ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ ଜି-୨୦ ହସ୍ତଶିଳ୍ପ ବଜାରରେ ପ୍ରଯୁକ୍ତି ବିଦ୍ୟା ଏବଂ ପରମ୍ପରା ମିଶ୍ରଣର ପରିଣାମ ବିଶ୍ୱ ଦେଖିଛି । ଏପରିକି ଅତିଥିଙ୍କ ପାଇଁ ଉପହାରରେ ବିଶ୍ୱକର୍ମା ବନ୍ଧୁଙ୍କ ଉତ୍ପାଦ ମଧ୍ୟ ରହିଥିଲା। “ଭୋକାଲ୍ ଫର୍ ଲୋକାଲ ପ୍ରତି ଏହି ସମର୍ପଣ ସମଗ୍ର ଦେଶର ଦାୟିତ୍ୱ। ପ୍ରଥମେ ଆମକୁ ଭୋକାଲ୍ ଫର୍ ଲୋକାଲ (ସ୍ଥାନୀୟ ଉତ୍ପାଦର ପ୍ରୋତ୍ସାହନ) ହେବାକୁ ପଡ଼ିବ ଏବଂ ତା’ପରେ ଆମକୁ ସ୍ଥାନୀୟ ଉତ୍ପାଦକୁ ଗ୍ଲୋବାଲ୍ ବା ବିଶ୍ୱ ସ୍ତର ଆଡ଼କୁ ନେବାକୁ ପଡ଼ିବ,’’ ବୋଲି ସେ କହିଛନ୍ତି।
ଗଣେଶ ଚତୁର୍ଥୀ, ଧନତେରସ, ଦୀପାବଳି ଭଳି ଦେଶରେ ଆଗାମୀ ପର୍ବ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ଦେଶର ପ୍ରତ୍ୟେକ ନାଗରିକଙ୍କୁ ସ୍ଥାନୀୟ ଉତ୍ପାଦ କିଣିବାକୁ ଅନୁରୋଧ କରିଥିଲେ, ବିଶେଷକରି ସେହି ଉତ୍ପାଦ ଯେଉଁଥିରେ ଦେଶର ବିଶ୍ୱକର୍ମାମାନେ ଯୋଗଦାନ ଦେଇଛନ୍ତି ।

ସମଗ୍ର ବିଶ୍ୱରେ ଚର୍ଚ୍ଚାର ବିଷୟ ପାଲଟିଥିବା ଭାରତ ମଣ୍ଡପମ୍ ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ, “ଆଜିର ବିକଶିତ ଭାରତ ପ୍ରତ୍ୟେକ କ୍ଷେତ୍ରରେ ନିଜର ଏକ ନୂତନ ପରିଚୟ ସୃଷ୍ଟି କରୁଛି ।” ଯଶୋଭୂମିର ବାର୍ତ୍ତା ସ୍ପଷ୍ଟ ଓ ସ୍ୱର ଦୃଢ଼ । ଏଠାରେ ଯେ କୌଣସି କାର୍ଯ୍ୟକ୍ରମ ଆୟୋଜନ ହେଲେ ତାହା ସଫଳତା ଓ ଖ୍ୟାତି ହାସଲ କରିବ ବୋଲି ଶ୍ରୀ ମୋଦୀ ଜୋର୍ ଦେଇ କହିଥିଲେ। ସେ ଆହୁରି ମଧ୍ୟ କହିଥିଲେ ଯେ ଭବିଷ୍ୟତର ଭାରତକୁ ପ୍ରଦର୍ଶନ କରିବା ପାଇଁ ଯଶୋଭୂମି ଏକ ମାଧ୍ୟମ ହେବ ।

ଭାରତର ଶ୍ରେଷ୍ଠ ଆର୍ଥିକ ଦକ୍ଷତା ଏବଂ ବାଣିଜ୍ୟିକ ଶକ୍ତି ପ୍ରଦର୍ଶନ କରିବା ପାଇଁ ଏହା ଦେଶର ରାଜଧାନୀରେ ଏକ ଉପଯୁକ୍ତ କେନ୍ଦ୍ର ବୋଲି ସେ କହିଥିଲେ । ଏହା ଉଭୟ ବହୁମୁଖୀ ଯୋଗାଯୋଗ ଏବଂ ପ୍ରଧାନମନ୍ତ୍ରୀ ଗତିଶକ୍ତିକୁ ପ୍ରତିଫଳିତ କରୁଛି ବୋଲି ସେ କହିଛନ୍ତି। ମେଟ୍ରୋ ରେଳ ଜରିଆରେ କେନ୍ଦ୍ରକୁ ପ୍ରଦାନ କରାଯାଇଥିବା ପରିବହନ ସଂଯୋଗ ଏବଂ ଆଜି ମେଟ୍ରୋ ଟର୍ମିନାଲର ଉଦଘାଟନ ବିଷୟରେ ସେ ଏହା ସ୍ପଷ୍ଟ କରିଛନ୍ତି । ସେ ଏହା ମଧ୍ୟ ଆଲୋକପାତ କରିଥିଲେ ଯେ ଯଶୋଭୂମିର ଇକୋସିଷ୍ଟମ ଏହାର ବ୍ୟବହାରକାରୀଙ୍କ ଯାତ୍ରା, ଯୋଗାଯୋଗ, ରହିବା ଏବଂ ପର୍ଯ୍ୟଟନ ଆବଶ୍ୟକତାକୁ ପୂରଣ କରିବ ।

ପରିବର୍ତ୍ତିତ ସମୟ ସହିତ ବିକାଶ ଏବଂ ନିଯୁକ୍ତିର ନୂତନ କ୍ଷେତ୍ର ଉଭା ହେଉଛି ବୋଲି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ । ସେ କହିଥିଲେ, ପଚାଶରୁ ୬୦ ବର୍ଷ ପୂର୍ବେ ଭାରତରେ ଏତେ ପରିମାଣର ଆଇଟି କ୍ଷେତ୍ର ବିସ୍ତାର ଲାଭ କରିବ ବୋଲି କେହି କଳ୍ପନା କରିନଥିବେ । ଏପରିକି ସାମାଜିକ ଗଣମାଧ୍ୟମ ମଧ୍ୟ ୩୦ରୁ ୩୫ ବର୍ଷ ପୂର୍ବେ କାଳ୍ପନିକ ଥିଲା । ସମ୍ମିଳନୀ ପର୍ଯ୍ୟଟନର ଭବିଷ୍ୟତ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଏହି କ୍ଷେତ୍ର ଭାରତ ପାଇଁ ପ୍ରଚୁର ସମ୍ଭାବନା ରଖିଛି ଏବଂ ଏହାର ମୂଲ୍ୟ ୨୫,୦୦୦ କୋଟି ଟଙ୍କାରୁ ଅଧିକ । ବିଶ୍ୱରେ ପ୍ରତିବର୍ଷ ୩୨ ହଜାରରୁ ଅଧିକ ବଡ଼ ପ୍ରଦର୍ଶନୀ ଓ ପ୍ରଦର୍ଶନୀ ଆୟୋଜନ କରାଯାଏ, ଯେଉଁଠାରେ ସମ୍ମିଳନୀ ପର୍ଯ୍ୟଟନ ପାଇଁ ଆସୁଥିବା ଲୋକମାନେ ସାଧାରଣ ପର୍ଯ୍ୟଟକଙ୍କ ତୁଳନାରେ ଅଧିକ ଟଙ୍କା ଖର୍ଚ୍ଚ କରିଥାନ୍ତି। ଶ୍ରୀ ମୋଦୀ ଆହୁରି ମଧ୍ୟ ଦର୍ଶାଇଥିଲେ ଯେ ଏତେ ବଡ଼ ଶିଳ୍ପରେ ଭାରତର ଅଂଶ ମାତ୍ର ଏକ ପ୍ରତିଶତ ଏବଂ ଭାରତର ଅନେକ ବଡ଼ କମ୍ପାନୀ ପ୍ରତିବର୍ଷ ସେମାନଙ୍କ କାର୍ଯ୍ୟକ୍ରମ ଆୟୋଜନ କରିବାକୁ ବିଦେଶକୁ ଯାଆନ୍ତି । ସେ ଆହୁରି ମଧ୍ୟ ଗୁରୁତ୍ୱାରୋପ କରିଥିଲେ ଯେ ଭାରତ ବର୍ତ୍ତମାନ ସମ୍ମିଳନୀ ପର୍ଯ୍ୟଟନ ପାଇଁ ମଧ୍ୟ ନିଜକୁ ପ୍ରସ୍ତୁତ କରୁଛି ।

ପ୍ରଧାନମନ୍ତ୍ରୀ କହିଥିଲେ ଯେ ଯେଉଁଠାରେ କାର୍ଯ୍ୟକ୍ରମ, ସଭା ଏବଂ ପ୍ରଦର୍ଶନୀ ପାଇଁ ଆବଶ୍ୟକ ସମ୍ବଳ ଅଛି ସେଠାରେ ସମ୍ମିଳନୀ ପର୍ଯ୍ୟଟନ ମଧ୍ୟ ପ୍ରଗତି କରିବ। ତେଣୁ ଭାରତ ମଣ୍ଡପମ୍ ଏବଂ ଯଶୋଭୂମି କେନ୍ଦ୍ର ବର୍ତ୍ତମାନ ଦିଲ୍ଲୀକୁ ସମ୍ମିଳନୀ ପର୍ଯ୍ୟଟନର ସର୍ବବୃହତ କେନ୍ଦ୍ରରେ ପରିଣତ କରିବାକୁ ଯାଉଛନ୍ତି । ଏହାଦ୍ୱାରା ଲକ୍ଷ ଲକ୍ଷ ଯୁବକଯୁବତୀଙ୍କୁ ରୋଜଗାର ମିଳିବାର ସମ୍ଭାବନା ରହିଛି। ଭବିଷ୍ୟତରେ ଯଶୋଭୂମି ଏପରି ଏକ ସ୍ଥାନରେ ପରିଣତ ହେବ ଯେଉଁଠାରେ ବିଶ୍ୱର ବିଭିନ୍ନ ଦେଶରୁ ଲୋକମାନେ ଅନ୍ତର୍ଜାତୀୟ ସମ୍ମିଳନୀ, ସଭା ଏବଂ ପ୍ରଦର୍ଶନୀ ପାଇଁ ଆସିବେ ବୋଲି ଶ୍ରୀ ମୋଦୀ କହିଛନ୍ତି।

ପ୍ରଧାନମନ୍ତ୍ରୀ ଅଂଶୀଦାରମାନଙ୍କୁ ଯଶୋଭୂମିକୁ ନିମନ୍ତ୍ରଣ କରିଥିଲେ । ସେ କହିଛନ୍ତି, ‘‘ଆଜି ମୁଁ ବିଶ୍ୱର ବିଭିନ୍ନ ଦେଶରୁ ପ୍ରଦର୍ଶନୀ ଏବଂ ଇଭେଣ୍ଟ ଶିଳ୍ପ ସହ ଜଡ଼ିତ ଲୋକଙ୍କୁ ଦିଲ୍ଲୀ ଆସିବାକୁ ନିମନ୍ତ୍ରଣ କରୁଛି। ମୁଁ ଦେଶର ପ୍ରତ୍ୟେକ ଅଞ୍ଚଳ, ପୂର୍ବ-ପଶ୍ଚିମ-ଉତ୍ତର-ଦକ୍ଷିଣର ଚଳଚ୍ଚିତ୍ର ଉଦ୍ୟୋଗ ଏବଂ ଟିଭି ଉଦ୍ୟୋଗକୁ ନିମନ୍ତ୍ରଣ କରିବି । ଆପଣ ଏଠାରେ ଆପଣଙ୍କ ପୁରସ୍କାର ସମାରୋହ, ଚଳଚ୍ଚିତ୍ର ମହୋତ୍ସବ ଆୟୋଜନ କରନ୍ତୁ, ଏଠାରେ ପ୍ରଥମ ଚଳଚ୍ଚିତ୍ର ଶୋ ଆୟୋଜନ କରନ୍ତୁ । ଭାରତ ମଣ୍ଡପମ୍ ଏବଂ ଯଶୋଭୂମିରେ ଯୋଗ ଦେବା ପାଇଁ ମୁଁ ଅନ୍ତର୍ଜାତୀୟ ଇଭେଣ୍ଟ କମ୍ପାନୀ, ପ୍ରଦର୍ଶନୀ କ୍ଷେତ୍ର ସହ ଜଡ଼ିତ ଲୋକଙ୍କୁ ନିମନ୍ତ୍ରଣ କରୁଛି।’’

ଭାରତ ମଣ୍ଡପମ୍ ଏବଂ ଯଶୋଭୂମି ଭାରତର ଆତିଥେୟତା, ଶ୍ରେଷ୍ଠତା ଏବଂ ଭବ୍ୟତାର ପ୍ରତୀକ ହେବ ବୋଲି ପ୍ରଧାନମନ୍ତ୍ରୀ ବିଶ୍ୱାସ ବ୍ୟକ୍ତ କରିଥିଲେ । “ଉଭୟ ଭାରତ ମଣ୍ଡପମ୍ ଏବଂ ଯଶୋଭୂମି ଭାରତୀୟ ସଂସ୍କୃତି ଏବଂ ଅତ୍ୟାଧୁନିକ ସୁବିଧାର ସଂଗମ ଏବଂ ଏହି ଭବ୍ୟ ପ୍ରତିଷ୍ଠାନଗୁଡ଼ିକ ଭାରତର କାହାଣୀକୁ ବିଶ୍ୱ ସମ୍ମୁଖରେ ପ୍ରକାଶ କରନ୍ତି”, ପ୍ରଧାନମନ୍ତ୍ରୀ କହିଥିଲେ । ସେ କହିଥିଲେ ଯେ ଏହା ନୂତନ ଭାରତର ଆକାଂକ୍ଷାକୁ ପ୍ରତିଫଳିତ କରେ ଯିଏ ନିଜ ପାଇଁ ସର୍ବୋତ୍ତମ ସୁବିଧା ଚାହୁଁଛି । ୨୦୪୭ ସୁଦ୍ଧା ଭାରତକୁ ଏକ ବିକଶିତ ରାଷ୍ଟ୍ରରେ ପରିଣତ କରିବା, ନୂଆ ଲକ୍ଷ୍ୟ ସୃଷ୍ଟି କରିବା, ସେମାନଙ୍କ ପାଇଁ ପ୍ରୟାସ କରିବା ଏବଂ ଭାରତକୁ ଏକ ବିକଶିତ ରାଷ୍ଟ୍ରରେ ପରିଣତ କରିବା ପାଇଁ ସେ ନାଗରିକମାନଙ୍କୁ ଅନୁରୋଧ କରିବା ସହ ‘ଭାରତ ଏବେ ଅଟକିବ ନାହିଁ’ ବୋଲି କହିଥିଲେ। ଅଭିଭାଷଣ ଶେଷରେ, ପ୍ରଧାନମନ୍ତ୍ରୀ ସମସ୍ତ ନାଗରିକମାନେ କଠିନ ପରିଶ୍ରମ କରିବା ଏବଂ ଏକଜୁଟ ହେବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ । “ଆମର ବିଶ୍ୱକର୍ମା ସହଯୋଗୀମାନେ ମେକ୍ ଇନ୍ ଇଣ୍ଡିଆର ଗର୍ବ ଏବଂ ଏହି ଅନ୍ତର୍ଜାତୀୟ ସମ୍ମିଳନୀ କେନ୍ଦ୍ର ବିଶ୍ୱକୁ ଏହି ଗୌରବ ଦେଖାଇବାର ଏକ ମାଧ୍ୟମ ହେବ”, ଶ୍ରୀ ମୋଦୀ ଶେଷରେ କହିଥିଲେ ।

ଅନ୍ୟମାନଙ୍କ ମଧ୍ୟରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ, କେନ୍ଦ୍ର ବାଣିଜ୍ୟ ଓ ଶିଳ୍ପ ମନ୍ତ୍ରୀ ଶ୍ରୀ ପୀୟୂଷ ଗୋୟଲ, କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟୋଗ ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ ମନ୍ତ୍ରୀ ଶ୍ରୀ ନାରାୟଣ ରାଣେ ଏବଂ କେନ୍ଦ୍ର ଅଣୁ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ ରାଷ୍ଟ୍ରମନ୍ତ୍ରୀ ଶ୍ରୀ ଭାନୁ ପ୍ରତାପ ସିଂ ବର୍ମା ଉପସ୍ଥିତ ଥିଲେ ।

ପୃଷ୍ଠଭୂମି

ଯଶୋଭୂମି

ଦ୍ୱାରକାଠାରେ ‘ଯଶୋଭୂମି’ କାର୍ଯ୍ୟକ୍ଷମ ହେବା ପରେ ଦେଶରେ ସଭା, ସମ୍ମିଳନୀ ଏବଂ ପ୍ରଦର୍ଶନୀ ଆୟୋଜନ ପାଇଁ ଏକ ବିଶ୍ୱସ୍ତରୀୟ ଭିତ୍ତିଭୂମି ରହିବା ପାଇଁ ପ୍ରଧାନମନ୍ତ୍ରୀଙ୍କ ସଂକଳ୍ପ ସାକାର ହେବ। ସମୁଦାୟ ୮.୯ ଲକ୍ଷ ବର୍ଗ ମିଟରରୁ ଅଧିକ ପ୍ରକଳ୍ପ କ୍ଷେତ୍ରଫଳ ଏବଂ ସମୁଦାୟ ୧.୮ ଲକ୍ଷ ବର୍ଗ ମିଟରରୁ ଅଧିକ ନିର୍ମିତ ଅଞ୍ଚଳ ସହିତ ‘ଯଶୋଭୂମି’ ବିଶ୍ୱର ସର୍ବବୃହତ ଏମ୍ ଆଇସିଇ (ମିଟିଂ, ପ୍ରଚାର, ସମ୍ମିଳନୀ ଏବଂ ପ୍ରଦର୍ଶନୀ) ସୁବିଧା ମଧ୍ୟରେ ସ୍ଥାନ ପାଇବ।

ପାଖାପାଖି ୫୪୦୦ କୋଟି ଟଙ୍କା ବ୍ୟୟରେ ନିର୍ମିତ ‘ଯଶୋଭୂମି’ରେ ଏକ ଭବ୍ୟ ସମ୍ମିଳନୀ କେନ୍ଦ୍ର, ଏକାଧିକ ପ୍ରଦର୍ଶନୀ କକ୍ଷ ଓ ଅନ୍ୟାନ୍ୟ ସୁବିଧା ରହିଛି। ୭୩ ହଜାର ବର୍ଗ ମିଟରରୁ ଅଧିକ ଅଞ୍ଚଳରେ ନିର୍ମିତ ଏହି ସମ୍ମିଳନୀ କେନ୍ଦ୍ରରେ ମୁଖ୍ୟ ପ୍ରେକ୍ଷାଳୟ, ବିଶାଳ୍ ବଲ୍ ରୁମ୍ ସମେତ ୧୫ଟି ସମ୍ମିଳନୀ କକ୍ଷ ଏବଂ ମୋଟ ୧୧,୦୦୦ ପ୍ରତିନିଧି ବସିବାର କ୍ଷମତା ଥିବା ୧୩ଟି ବୈଠକ କକ୍ଷ ରହିଛି। ସମ୍ମିଳନୀ କେନ୍ଦ୍ରରେ ଦେଶର ସବୁଠାରୁ ବଡ ଏଲଇଡି ମିଡିଆ ସୁବିଧା ରହିଛି । ସମ୍ମିଳନୀ କେନ୍ଦ୍ରରେ ଥିବା ପୂର୍ଣ୍ଣାଙ୍ଗ କକ୍ଷରେ ପ୍ରାୟ ୬ ହଜାର ଅତିଥି ବସିବାର ବ୍ୟବସ୍ଥା ରହିଛି। ପ୍ରେକ୍ଷାଳୟରେ ସବୁଠାରୁ ଅଭିନବ ସ୍ୱୟଂଚାଳିତ ବସିବା ରହିଛି ଯାହା ଫ୍ଲୋରକୁ ଏକ ଫ୍ଲାଟ ଫ୍ଲୋର କିମ୍ବା ବିଭିନ୍ନ ପ୍ରକାରର ବସିବା ସୁବିଧା ପାଇଁ ପ୍ରେକ୍ଷାଳୟ ଶୈଳୀରେ ବସିବା ବ୍ୟବସ୍ଥା କରିବାକୁ ଅନୁମତି ଦେଇଥାଏ । ଅଡିଟୋରିୟମରେ ବ୍ୟବହୃତ କାଠ ଚଟାଣ ଏବଂ ଆକୋଷ୍ଟିକ୍ ୱାଲ୍ ପ୍ୟାନେଲ୍ ପର୍ଯ୍ୟଟକଙ୍କ ପାଇଁ ଏକ ବିଶ୍ୱସ୍ତରୀୟ ଅନୁଭୂତି ସୁନିଶ୍ଚିତ କରିବ। ଏକ ଅନନ୍ୟ ପାଖୁଡ଼ା ଭଳି ଛାତ ଥିବା ବିଶାଳ ବଲ୍ ରୁମରେ ପ୍ରାୟ ୨,୫୦୦ ଅତିଥି ରହିପାରିବେ। ଏଥିରେ ଏକ ବିସ୍ତାରିତ ଖୋଲା ସ୍ଥାନ ମଧ୍ୟ ରହିଛି ଯେଉଁଠାରେ ୫୦୦ ଲୋକ ବସିପାରିବେ । ୮ ମହଲା ବିଶିଷ୍ଟ ଏହି ୧୩ଟି ମିଟିଂ ରୁମ୍ ରେ ବିଭିନ୍ନ ସ୍ତରର ବୈଠକ ଅନୁଷ୍ଠିତ ହେବ ବୋଲି ପରିକଳ୍ପନା କରାଯାଇଛି।
‘ଯଶୋଭୂମି’ରେ ବିଶ୍ୱର ସବୁଠାରୁ ବଡ଼ ପ୍ରଦର୍ଶନୀ କକ୍ଷ ମଧ୍ୟ ରହିଛି। ୧.୦୭ ଲକ୍ଷ ବର୍ଗ ମିଟରରୁ ଅଧିକ ପରିମିତ ଏହି ପ୍ରଦର୍ଶନୀ ହଲ୍ ଗୁଡ଼ିକ ପ୍ରଦର୍ଶନୀ, ବାଣିଜ୍ୟ ମେଳା ଏବଂ ବ୍ୟବସାୟିକ କାର୍ଯ୍ୟକ୍ରମ ଆୟୋଜନ ପାଇଁ ବ୍ୟବହୃତ ହେବ ଏବଂ ଏକ ଭବ୍ୟ ଫୋୟାର ସ୍ପେସ୍ ସହିତ ସଂଯୁକ୍ତ ହେବ ଯାହା ଏକ ତମ୍ବା ଛାତ ସହିତ ସ୍ୱତନ୍ତ୍ର ଭାବରେ ଡିଜାଇନ୍ କରାଯାଇଛି ଯାହା ବିଭିନ୍ନ ସ୍କାଏଲାଇଟ୍ ମାଧ୍ୟମରେ ଆକାଶର ଆଲୋକକୁ ଫିଲ୍ଟର କରିଥାଏ । ଏଥିରେ ମିଡିଆ ରୁମ୍, ଭିଭିଆଇପି ଲାଉଞ୍ଜ୍, କ୍ଲୋକ୍ ସୁବିଧା, ଆଗନ୍ତୁକ ସୂଚନା କେନ୍ଦ୍ର, ଟିକେଟିଂ ଭଳି ବିଭିନ୍ନ ସପୋର୍ଟ ଏରିଆ ରହିବ।
‘ଯଶୋଭୂମି’ର ସମସ୍ତ ସାର୍ବଜନୀନ ପ୍ରସାରଣ କ୍ଷେତ୍ରକୁ ଏପରି ଭାବରେ ଡିଜାଇନ୍ କରାଯାଇଛି ଯେ ସେଗୁଡ଼ିକ ସମ୍ମିଳନୀ କକ୍ଷର ବାହ୍ୟ ସ୍ଥାନ ସହିତ ନିରନ୍ତରତାକୁ ପ୍ରତିନିଧିତ୍ୱ କରନ୍ତି । ଏହା ଭାରତୀୟ ସଂସ୍କୃତି ଦ୍ୱାରା ଅନୁପ୍ରାଣିତ ସାମଗ୍ରୀ ଏବଂ ବସ୍ତୁରେ ନିର୍ମିତ ହୋଇଥିବା ବେଳେ ବ୍ରେସ୍ ଇନ୍ଲେ ରଙ୍ଗୋଲିସ୍ ଢାଞ୍ଚା, ନିଲମ୍ବିତ ଶବ୍ଦ ଶୋଷଣକାରୀ ଧାତୁ ସିଲିଣ୍ଡର ଏବଂ ଆଲୋକିତ ଢାଞ୍ଚାଯୁକ୍ତ କାନ୍ଥକୁ ପ୍ରତିନିଧିତ୍ୱ କରିଥାଏ ।

ଶତ ପ୍ରତିଶତ ବର୍ଜ୍ୟଜଳ ପୁନଃବ୍ୟବହାର, ବର୍ଷା ଜଳ ସଂରକ୍ଷଣ ବ୍ୟବସ୍ଥା ସହିତ ଏକ ଅତ୍ୟାଧୁନିକ ବର୍ଜ୍ୟଜଳ ବିଶୋଧନ ବ୍ୟବସ୍ଥା ସହିତ ସଜ୍ଜିତ ‘ଯଶୋଭୂମି’ ସ୍ଥାୟିତ୍ୱ ପ୍ରତି ଏକ ଦୃଢ଼ ପ୍ରତିବଦ୍ଧତା ପ୍ରଦର୍ଶନ କରେ ଏବଂ ଏହାର କ୍ୟାମ୍ପସକୁ ସିଆଇଆଇର ଇଣ୍ଡିଆନ୍ ଗ୍ରୀନ୍ ବିଲ୍ଡିଂ କାଉନସିଲ୍ (ଆଇଜିବିସି) ଠାରୁ ପ୍ଲାଟିନମ୍ ସାର୍ଟିଫିକେଟ୍ ମିଳିଛି।

ପର୍ଯ୍ୟଟକଙ୍କ ସୁରକ୍ଷାକୁ ସୁନିଶ୍ଚିତ କରିବା ପାଇଁ ‘ଯଶୋଭୂମି’ରେ ହାଇଟେକ୍ ସୁରକ୍ଷା ବ୍ୟବସ୍ଥା ମଧ୍ୟ ରହିଛି। ୩ ହଜାରରୁ ଅଧିକ କାର୍ ପାଇଁ ଅଣ୍ଡରଗ୍ରାଉଣ୍ଡ କାର୍ ପାର୍କିଂ ସୁବିଧାରେ ୧୦୦ରୁ ଅଧିକ ଇଲେକ୍ଟ୍ରିକ୍ ଚାର୍ଜିଂ ପଏଣ୍ଟ ରହିଛି।

ନୂଆ ମେଟ୍ରୋ ଷ୍ଟେସନ ‘ଯଶୋଭୂମି ଦ୍ୱାରକା ସେକ୍ଟର ୨୫’ର ଉଦଘାଟନ ସହିତ ‘ଯଶୋଭୂମି’କୁ ଦିଲ୍ଲୀ ଏୟାରପୋର୍ଟ ମେଟ୍ରୋ ଏକ୍ସପ୍ରେସ୍ ଲାଇନ୍ ସହ ସଂଯୋଗ କରାଯିବ। ନୂତନ ମେଟ୍ରୋ ଷ୍ଟେସନରେ ତିନୋଟି ସବ୍ ୱେ ରହିବ – ଏକ ୭୩୫ ମିଟର ଲମ୍ବା ସବ୍ୱେ ଯାହା ଷ୍ଟେସନକୁ ପ୍ରଦର୍ଶନୀ କକ୍ଷ, ସମ୍ମିଳନୀ କେନ୍ଦ୍ର ଏବଂ କେନ୍ଦ୍ର ପରିସର ସହିତ ସଂଯୋଗ କରେ; ଦ୍ୱାରକା ଏକ୍ସପ୍ରେସ ୱେ ଦେଇ ପ୍ରବେଶ/ପ୍ରସ୍ଥାନକୁ ସଂଯୋଗ କରୁଥିବା ଅନ୍ୟ ଏକ; ତୃତୀୟଟି ମେଟ୍ରୋ ଷ୍ଟେସନକୁ ‘ଯଶୋଭୂମି’ର ଭବିଷ୍ୟତ ପ୍ରଦର୍ଶନୀ କକ୍ଷ ସହିତ ସଂଯୋଗ କରୁଛି।

ପିଏମ୍ ବିଶ୍ୱକର୍ମା

ପାରମ୍ପରିକ ହସ୍ତଶିଳ୍ପରେ ନିୟୋଜିତ ଲୋକଙ୍କୁ ସମର୍ଥନ ଦେବା ପ୍ରଧାନମନ୍ତ୍ରୀଙ୍କ ନିରନ୍ତର ଭାବେ ଧ୍ୟାନ ଦେଇ ଆସୁଛନ୍ତି । ଯୋଜନାର ଉଦ୍ଦେଶ୍ୟ କେବଳ ଶିଳ୍ପୀ ଓ କାରିଗରମାନଙ୍କୁ ଆର୍ଥିକ ସହାୟତା କରିବା ନୁହେଁ ବରଂ ସ୍ଥାନୀୟ ଉତ୍ପାଦ, କଳା ଓ ହସ୍ତଶିଳ୍ପ ମାଧ୍ୟମରେ ବହୁ ପୁରୁଣା ପରମ୍ପରା, ସଂସ୍କୃତି ଓ ବିବିଧ ଐତିହ୍ୟକୁ ବଞ୍ଚାଇ ରଖିବା ଓ ସମୃଦ୍ଧ କରିବା ।

ପ୍ରଧାନମନ୍ତ୍ରୀ ବିଶ୍ୱକର୍ମା ଯୋଜନାରେ କେନ୍ଦ୍ର ସରକାର ୧୩,୦୦୦ କୋଟି ଟଙ୍କା ବ୍ୟୟ କରିବେ । ଏହି ଯୋଜନା ଅଧୀନରେ ବାୟୋମେଟ୍ରିକ୍ ଆଧାରିତ ପିଏମ୍ ବିଶ୍ୱକର୍ମା ପୋର୍ଟାଲ ବ୍ୟବହାର କରି ଜନ ସେବା କେନ୍ଦ୍ର ମାଧ୍ୟମରେ ବିଶ୍ୱକର୍ମାମାନଙ୍କୁ ମାଗଣାରେ ପଞ୍ଜିକୃତ କରାଯିବ। ସେମାନଙ୍କୁ ପିଏମ୍ ବିଶ୍ୱକର୍ମା ପ୍ରମାଣପତ୍ର ଏବଂ ପରିଚୟପତ୍ର, ମୌଳିକ ଓ ଉନ୍ନତ ପ୍ରଶିକ୍ଷଣ ସହିତ ଦକ୍ଷତା ଉନ୍ନତିକରଣ, ୧୫,୦୦୦ ଟଙ୍କାର ଟୁଲକିଟ୍ ପ୍ରୋତ୍ସାହନ, ୫% ରିହାତି ସୁଧ ହାରରେ ୧ ଲକ୍ଷ ଟଙ୍କା (ପ୍ରଥମ କିସ୍ତି) ଏବଂ ୨ ଲକ୍ଷ ଟଙ୍କା (ଦ୍ୱିତୀୟ କିସ୍ତି) ପର୍ଯ୍ୟନ୍ତ ବନ୍ଧକମୁକ୍ତ ଋଣ ସହାୟତା, ଡିଜିଟାଲ କାରବାର ପାଇଁ ପ୍ରୋତ୍ସାହନ ଏବଂ ବିପଣନ ସହାୟତା ପ୍ରଦାନ କରାଯିବ।
ବିଶ୍ୱକର୍ମାମାନଙ୍କ ଦ୍ୱାରା ନିଜ ହାତ ଓ ଉପକରଣରେ କରାଯାଉଥିବା ଗୁରୁ-ଶିଷ୍ୟ ପରମ୍ପରା ବା ପରିବାର ଭିତ୍ତିକ ପାରମ୍ପରିକ କୌଶଳ ଅଭ୍ୟାସକୁ ଆଗକୁ ବଢ଼ାଇବା ଓ ସୁଦୃଢ଼ କରିବା ଏହି ଯୋଜନାର ଉଦ୍ଦେଶ୍ୟ। ପ୍ରଧାନମନ୍ତ୍ରୀ ବିଶ୍ୱକର୍ମା ଯୋଜନାର ମୁଖ୍ୟ ଲକ୍ଷ୍ୟ ହେଉଛି ଶିଳ୍ପୀ ଏବଂ କାରିଗରଙ୍କ ଉତ୍ପାଦ, ସେବାର ଗୁଣବତ୍ତା ଏବଂ ପହଞ୍ଚରେ ଉନ୍ନତି ଆଣିବା ତଥା ସେମାନଙ୍କୁ ଘରୋଇ ଏବଂ ବିଶ୍ୱସ୍ତରୀୟ ମୂଲ୍ୟ ଶୃଙ୍ଖଳା ସହିତ ଯୋଡ଼ିବା ।

ଏହି ଯୋଜନା ସମଗ୍ର ଭାରତର ଗ୍ରାମୀଣ ଏବଂ ସହରାଞ୍ଚଳର କାରିଗର ଏବଂ କାରିଗରମାନଙ୍କୁ ସହାୟତା ପ୍ରଦାନ କରିବ । ପ୍ରଧାନମନ୍ତ୍ରୀ ବିଶ୍ୱକର୍ମା ଅଧୀନରେ ୧୮ଟି ପାରମ୍ପରିକ ହସ୍ତଶିଳ୍ପ ଅନ୍ତର୍ଭୁକ୍ତ ହେବ। ଏଗୁଡ଼ିକ ମଧ୍ୟରେ ରହିଛି (୧) ବଢ଼େଇ; (୨) ଡଙ୍ଗା ନିର୍ମାତା; (୩) ଅସ୍ତ୍ରଶସ୍ତ୍ର ନିର୍ମାତା; (୪) କମାର ; (୫) ହାତୁଡ଼ି ଓ ଉପକରଣ ନିର୍ମାତା; (୬) ତାଲା ନିର୍ମାତା; (୭) ବଣିଆ; (୮) କୁମ୍ଭାର; (୯) ମୂର୍ତ୍ତିଶିଳ୍ପୀ, ପଥର କଟାଳି; (୧୦) ଜୋତା କାରିଗର ; (୧୧) ରାଜମିସ୍ତ୍ରୀ; (୧୨) ଝୁଡ଼ି/ଚଟେଇ/ଝାଡ଼ୁ ନିର୍ମାତା, କତା ବୁଣାଳି; (୧୩) କଣ୍ଢେଇ ଏବଂ ଖେଳନା ନିର୍ମାତା (ପାରମ୍ପରିକ); (୧୪) ଭଣ୍ଡାରୀ; (୧୫) ଫୁଲମାଳ କାରିଗର; (୧୬) ରଜକ; (୧୭) ଦରଜି; ଏବଂ (୧୮) ମାଛଧରା ଜାଲ ନିର୍ମାତା।

ଦିଲ୍ଲୀ: ବିଶ୍ୱକର୍ମା ଜୟନ୍ତୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ପୂର୍ବାହ୍ନ ପ୍ରାୟ ୧୧ଟାରେ ନୂଆଦିଲ୍ଲୀର ଦ୍ୱାରକାସ୍ଥିତ ଇଣ୍ଡିଆ ଇଣ୍ଟରନ୍ୟାସନାଲ କନଭେନ୍ସନ୍ ଆଣ୍ଡ ଏକ୍ସପୋ ସେଣ୍ଟରରେ “ପିଏମ୍ ବିଶ୍ୱକର୍ମା” ନାମକ ଏକ ନୂତନ ଯୋଜନାର ଶୁଭାରମ୍ଭ କରିବେ।

ପାରମ୍ପରିକ ଶିଳ୍ପରେ ନିୟୋଜିତ କାରିଗର ମାନଙ୍କୁ ସହାୟତା ପ୍ରଦାନ କରିବା ଉପରେ ପ୍ରଧାନମନ୍ତ୍ରୀଙ୍କର ନିରନ୍ତର ଲକ୍ଷ୍ୟ ରହିଛି। କେବଳ କାରିଗର ଓ ଶିଳ୍ପୀ ମାନଙ୍କୁ ଆର୍ଥିକ ସହାୟତା ପ୍ରଦାନ କରିବା ନୁହେଁ ବରଂ ସ୍ଥାନୀୟ ଉତ୍ପାଦ, କଳା ଓ ହସ୍ତଶିଳ୍ପ ମାଧ୍ୟମରେ ବହୁ ପୁରୁଣା ପରମ୍ପରା, ସଂସ୍କୃତି ଓ ବିବିଧ ଐତିହ୍ୟକୁ ବଞ୍ଚାଇ ରଖିବା ଓ ସମୃଦ୍ଧ କରିବା ପାଇଁ ପ୍ରଧାନମନ୍ତ୍ରୀଙ୍କ ଦୃଷ୍ଟିକୋଣ ଦ୍ୱାରା ଏହି ଯୋଜନା ଅନୁପ୍ରାଣିତ ହୋଇଛି।

୧୩,୦୦୦ କୋଟି ଟଙ୍କା ବ୍ୟୟ ଅଟକଳ ସହିତ କେନ୍ଦ୍ର ସରକାର ପିଏମ୍ ବିଶ୍ୱକର୍ମା ଯୋଜନାକୁ ସମ୍ପୂର୍ଣ୍ଣ ଆର୍ଥିକ ସହାୟତା ପ୍ରଦାନ କରିବେ। ଏହି ଯୋଜନା ଅଧୀନରେ ବାୟୋମେଟ୍ରିକ୍ ଆଧାରିତ ପିଏମ୍ ବିଶ୍ୱକର୍ମା ପୋର୍ଟାଲ ବ୍ୟବହାର କରି ସାଧାରଣ ସେବା କେନ୍ଦ୍ର ମାଧ୍ୟମରେ ବିଶ୍ୱକର୍ମା ମାନଙ୍କୁ ମାଗଣାରେ ପଞ୍ଜୀକୃତ କରାଯିବ। ସେମାନଙ୍କୁ ପିଏମ୍ ବିଶ୍ୱକର୍ମା ସାର୍ଟିଫିକେଟ୍ ଏବଂ ପରିଚୟ ପତ୍ର, ମୌଳିକ ଓ ଉନ୍ନତ ଦକ୍ଷତା ବିକାଶ ପ୍ରଶିକ୍ଷଣ ସହିତ ୧୫,୦୦୦ ଟଙ୍କାର ଟୁଲକିଟ୍ ପ୍ରୋତ୍ସାହନ ରାଶି, ୫% ରିହାତି ସୁଧ ହାରରେ ୧ ଲକ୍ଷ ଟଙ୍କା (ପ୍ରଥମ କିସ୍ତି) ଏବଂ ୨ ଲକ୍ଷ ଟଙ୍କା (ଦ୍ୱିତୀୟ କିସ୍ତି) ପର୍ଯ୍ୟନ୍ତ ବନ୍ଧକମୁକ୍ତ ଋଣ ସହାୟତା, ଡିଜିଟାଲ କାରବାର ପାଇଁ ପ୍ରୋତ୍ସାହନ ଏବଂ ମାର୍କେଟିଂ ସହାୟତା ପ୍ରଦାନ କରାଯିବ।

ଗୁରୁ – ଶିଷ୍ୟ ପରମ୍ପରା ବା ପରିବାର ଭିତ୍ତିକ ପାରମ୍ପରିକ କୌଶଳ ଓ ବୃତ୍ତିକୁ ସୁଦୃଢ଼ ଓ ଦୀର୍ଘସ୍ଥାୟୀ କରିବା ଏହି ଯୋଜନାର ଉଦ୍ଦେଶ୍ୟ। କାରିଗର ଏବଂ ଶିଳ୍ପୀ ମାନଙ୍କର ଉତ୍ପାଦ ଏବଂ ସେବାର ଗୁଣବତ୍ତା ତଥା ପ୍ରସାରରେ ଉନ୍ନତି ଆଣିବା ଏବଂ ସେମାନଙ୍କୁ ଘରୋଇ ଏବଂ ବିଶ୍ୱସ୍ତରୀୟ ମୂଲ୍ୟ ଶୃଙ୍ଖଳ ସହିତ ସମନ୍ୱିତ କରିବାକୁ ସୁନିଶ୍ଚିତ କରିବା ହେଉଛି ପିଏମ୍ ବିଶ୍ୱକର୍ମା ଯୋଜନାର ମୁଖ୍ୟ ଲକ୍ଷ୍ୟ।

ଏହି ଯୋଜନା ସମଗ୍ର ଭାରତରେ ଗ୍ରାମାଂଚଳ ଏବଂ ସହରାଞ୍ଚଳର କାରିଗର ଏବଂ ଶିଳ୍ପୀ ମାନଙ୍କୁ ସହାୟତା ପ୍ରଦାନ କରିବ। ପିଏମ୍ ବିଶ୍ୱକର୍ମା ଯୋଜନା ଅଧୀନରେ ୧୮ଟି ପାରମ୍ପରିକ ହସ୍ତଶିଳ୍ପ ଅନ୍ତର୍ଭୁକ୍ତ ହେବ। ଏଗୁଡିକ ମଧ୍ୟରେ ରହିଛି (୧) ବଢ଼େଇ କାମ ; (୨) ଡଙ୍ଗା ନିର୍ମାଣ; (୩) ଅସ୍ତ୍ରଶସ୍ତ୍ର ନିର୍ମାଣ; (୪) କମାର କାମ ; (୪) ହାତୁଡି ଏବଂ ଟୁଲ୍ କିଟ୍ ପ୍ରସ୍ତୁତି ; (୬) ତାଲା ନିର୍ମାଣ; (୭) ବଣିଆ ; (୮) କୁମ୍ଭାର କାମ; (୯) ମୂର୍ତ୍ତିଶିଳ୍ପୀ, ପଥର ଶିଳ୍ପୀ; (ଙ୍ଘ) ମୋଚି (ଚପଲ / ଜୋତା କାରିଗର); (୧୧) ମିସ୍ତ୍ରୀ (ରାଜମିସ୍ତ୍ରୀ); (୧୨) ଟୋକେଇ / ଚଟେଇ / ଝାଡୁ ପ୍ରସ୍ତୁତକାରୀ / ନଡିଆ କତା ବୁଣାଳୀ; (୧୩) କଣ୍ଢେଇ ଏବଂ ଖେଳନା ନିର୍ମାଣ (ପାରମ୍ପରିକ); (୧୪) ଭଣ୍ଡାରୀ; (୧୫) ଫୁଲମାଳ ପ୍ରସ୍ତୁତି ; (୧୬) ଧୋବା; (୧୭) ଦରଜୀ; ଏବଂ (୧୮) ମାଛ ଧରା ଜାଲ ପ୍ରସ୍ତୁତି।