Tag: ନରେନ୍ଦ୍ର ମୋଦୀ

ନୂଆଦିଲ୍ଲୀ: ଆଜି ଆମେରିକା କଂଗ୍ରେସର ମିଳିତ ଅଧିବେଶନକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସମ୍ବୋଧିତ କରିଛନ୍ତି। ପ୍ରଥମ ଭାରତୀୟ ପ୍ରଧାନମନ୍ତ୍ରୀ ଭାବେ ଦ୍ଵିତୀୟ ଥର ପାଇଁ ଶ୍ରୀ ମୋଦୀ ଆମେରିକା କଂଗ୍ରେସର ମିଳିତ ଅଧିବେଶନକୁ ସମ୍ବୋଧିତ କରିଛନ୍ତି। ଆସନ୍ତୁ ପଢିବା ପ୍ରଧାନମନ୍ତ୍ରୀ ମୋଦୀଙ୍କ ଏହି ଐତିହାସିକ ସମ୍ବୋଧନ।

ବାଚସ୍ପତି ମହୋଦୟ,

ଉପରାଷ୍ଟ୍ରପତି ମହୋଦୟା,

ଆମେରିକା କଂଗ୍ରେସର ସମ୍ମାନନୀୟ ସଦସ୍ୟଗଣ,

ଭାଇ ଓ ଭଉଣୀମାନେ,

ନମସ୍କାର!

ଯୁକ୍ତରାଷ୍ଟ୍ର ଆମେରିକା କଂଗ୍ରେସକୁ ସମ୍ବୋଧିତ କରିବା ସବୁବେଳେ ଏକ ସମ୍ମାନର ବିଷୟ। ଦୁଇ ଥର ଏଭଳି କରିବାର ସୁଯୋଗ ମିଳିବା ମୋ ପାଇଁ ଏକ ସୌଭାଗ୍ୟ। ଏହି ସମ୍ମାନ ପାଇଁ, ଭାରତର ୧୪୦ କୋଟି ନାଗରିକଙ୍କ ତରଫରୁ ମୁଁ ନିଜର କୃତଜ୍ଞତା ପ୍ରକାଶ କରୁଛି । ମୁଁ ଦେଖିପାରୁଛି ଯେ ଆପଣମାନଙ୍କ ମଧ୍ୟରୁ ପ୍ରାୟ ଅଧା ଲୋକ ୨୦୧୬ରେ ଏଠାରେ ଥିଲେ। ପୁରୁଣା ବନ୍ଧୁ ଭାବେ ଆପଣଙ୍କ ସହୃଦୟତାକୁ ମୁଁ ଅନୁଭବ କରିପାରୁଛି । ଅନ୍ୟ ଅଧା ସଦସ୍ୟଙ୍କ ମଧ୍ୟରେ ନୂତନ ବନ୍ଧୁତାକୁ ନେଇ ରହିଥିବା ଉତ୍ସାହକୁ ମଧ୍ୟ ମୁଁ ଦେଖିପାରୁଛି। ୨୦୧୬ରେ ସିନେଟର ହ୍ୟାରୀ ରିଡ୍‌, ସିନେଟର ଜନ୍‌ ମ୍ୟାକେନ୍‌, ସିନେଟର ଓରିନ୍‌ ହ୍ୟାଚ୍‌, ଏଲିଜା କମିଙ୍ଗସ୍‌, ଆଲସୀ ହ୍ୟାଷ୍ଟିଙ୍ଗ୍‌ସ୍‌ ଓ ଅନ୍ୟମାନଙ୍କୁ ମୁଁ ସାକ୍ଷାତ କରିଥିଲି, ଦୁଃଖର ବିଷୟ ସେମାନେ ଆଜି ଆମ ଗହଣରେ ନାହାନ୍ତି। ମୁଁ ସେମାନଙ୍କର ସ୍ମୃତିଚାରଣ କରୁଛି।

ବାଚସ୍ପତି ମହୋଦୟ,

ସାତ ବର୍ଷ ପୂର୍ବରୁ ଏହି ଜୁନ୍‌ ମାସରେ ଏଠାରେ ମୁଁ ଅଭିଭାଷଣ ରଖିବାକୁ ଛିଡ଼ା ହୋଇଥିଲି। ସେତେବେଳେ ହାମିଲଟନ୍‌ ସବୁ ପୁରସ୍କାର ହାତେଇ ନେଇଥିଲା। ଠିକ୍‌ ସେହି ସମୟରେ ମୁଁ କହିଥିଲି, ଇତିହାସର ଦ୍ୱିଧାକୁ ଆମେ ପଛରେ ପକାଇ ଦେଇ ସାରିଛୁ । ଆଜି ଯେତେବେଳେ ଆମର ଯୁଗ ଏକ ଦୋଛକିରେ ଛିଡ଼ା ହୋଇଛି, ମୁଁ ଏଠାରେ ଚଳିତ ଶତାବ୍ଦୀ ପାଇଁ ଆମର ଆହ୍ୱାନ ସମ୍ପର୍କରେ କଥା ହେବାକୁ ଆସିଛି ।

ଆମେ ବର୍ତ୍ତମାନ ସୁଦ୍ଧା ଲମ୍ବା ଏବଂ ଅଙ୍କାବଙ୍କା ରାସ୍ତାରେ ଯାତ୍ରା କରି ଆସିଛୁ, ବନ୍ଧୁତାର ପରୀକ୍ଷାରେ ଉତ୍ତୀର୍ଣ୍ଣ ହୋଇଛୁ । ସାତ ବର୍ଷ ପୂର୍ବରୁ ଏକ ଗ୍ରୀଷ୍ମ ଋତୁରେ ମୁଁ ଯେତେବେଳେ ଏଠାକୁ ଆସିଥିଲି, ସେବେଠାରୁ ବର୍ତ୍ତମାନ ମଧ୍ୟରେ ଅନେକ କିଛି ବଦଳି ଯାଇଛି। କିନ୍ତୁ ଅନେକ କିଛି ପୂର୍ବ ପରି ସମାନ ରହିଛି – ଯଥା ଭାରତ ଓ ଆମେରିକା ମଧ୍ୟରେ ବନ୍ଧୁତାକୁ ଆହୁରି ନିବିଡ଼ କରିବା ପାଇଁ ଆମର ପ୍ରତିବଦ୍ଧତା। ବିଗତ କିଛି ବର୍ଷ ମଧ୍ୟରେ, ଆର୍ଟିଫିସିଆଇ ଇଣ୍ଟେଲିଜେନ୍ସ ବା ଏଆଇ କ୍ଷେତ୍ରରେ ଅନେକ ପ୍ରଗତି ହୋଇଛି। ଅନୁରୂପ ଭାବେ, ଆଉ ଏକ ଏଆଇ-ଆମେରିକା ଓ ଇଣ୍ଡିଆ (ଭାରତ) ବନ୍ଧୁତାରେ ଆହୁରି ଅନେକ ସ୍ମରଣୀୟ ବିକାଶ ହୋଇଛି ।

ବାଚସ୍ପତି ମହୋଦୟ ଏବଂ ସମ୍ମାନନୀୟ ସଦସ୍ୟଗଣ,

ଲୋକମାନଙ୍କ ସହ ଯୋଡ଼ି ହେବା, ସେମାନଙ୍କ କଥା ଶୁଣିବା ଏବଂ ସେମାନଙ୍କର ଭାବନାକୁ ଅନୁଭବ କରିବା ହେଉଛି ଗଣତନ୍ତ୍ରର ସୌନ୍ଦର୍ଯ୍ୟ। ଆଉ, ମୁଁ ଜାଣେ ଯେ ଏଥିପାଇଁ ଅନେକ ସମୟ, ଶକ୍ତି, ପ୍ରୟାସ ଓ ଯାତ୍ରା ଆବଶ୍ୟକ ହୋଇଥାଏ। ଆଜି ହେଉଛି ଗୁରୁବାର ଦିନର ଏକ ଅପରାହ୍ଣ-ଆପଣମାନଙ୍କ ମଧ୍ୟରୁ କିଛି ଲୋକଙ୍କ ପାଇଁ ଏକ ବ୍ୟସ୍ତବହୁଳ ଦିନ। ତେଣୁ, ମୋ ପାଇଁ ସମୟ ବାହାର କରିଥିବାରୁ ମୁଁ କୃତଜ୍ଞ। ଏଇ ଗତ ମାସରେ ଆପଣମାନେ କେତେ ବ୍ୟସ୍ତ ରହିଛନ୍ତି ତାହା ମଧ୍ୟ ମୁଁ ଜାଣିଛି ।

ମୁଁ ନିଜେ ଏକ ଜୀବନ୍ତ ଗଣତନ୍ତ୍ରର ଜଣେ ନାଗରିକ ହୋଇଥିବାରୁ, ବାଚସ୍ପତି ମହୋଦୟ ମୁଁ ଗୋଟିଏ କଥା ସ୍ୱୀକାର କରିପାରିବି ଯେ ଆପଣଙ୍କୁ ଖୁବ୍‌ କଷ୍ଟ କାମ ମିଳିଛି ! ମୁଁ ଏହାକୁ ଉତ୍ସାହ, ଅନୁନୟ ଏବଂ ନୀତିର ସଂଘର୍ଷ ସହିତ ଯୋଡ଼ି ପାରିବି। ମୁଁ ବିଭିନ୍ନ ପ୍ରକାର ବିଚାର ଓ ବିଚାରଧାରା ମଧ୍ୟରେ ବିତର୍କକୁ ବୁଝିପାରୁଛି। କିନ୍ତୁ ମୁଁ ଆଜି ଏହା ଦେଖି ଆନନ୍ଦିତ ଯେ ଆପଣ ଆଜି ବିଶ୍ୱର ଦୁଇଟି ମହାନ ଗଣତନ୍ତ୍ର – ଭାରତ ଏବଂ ଯୁକ୍ତରାଷ୍ଟ୍ର ଆମେରିକା ମଧ୍ୟରେ ରହିଥିବା ସମ୍ପର୍କକୁ ପାଳନ କରିବା ଲାଗି ଏକତ୍ରିତ ହୋଇଛନ୍ତି । ଯେତେବେଳେ ଆପଣଙ୍କର ଏକ ମଜବୁତ ଦ୍ୱିଦଳୀୟ ସହମତିର ଆବଶ୍ୟକତା ଦେଖା ଦେବ, ସେଥିରେ ସହଯୋଗ କରି ମୁଁ ଖୁସି ହେବି।  ସଦନରେ ବିଭିନ୍ନ ବିଚାରକୁ ନେଇ ଏକ ପ୍ରତିଯୋଗିତା ହେବା ଏବଂ ନିଶ୍ଚିତ ଭାବେ ହେବା ଜରୁରି । କିନ୍ତୁ, ଯେତେବେଳେ ଆମେ ନିଜ ରାଷ୍ଟ୍ର ପାଇଁ ବକ୍ତବ୍ୟ ରଖିଥାଉ, ଆମେ ଏକ ସ୍ୱରରେ ନିଜର କଥା ରଖିବା ଉଚିତ୍‌। ଆଉ, ଆପଣମାନେ ଏହା କରିପାରିବେ ବୋଲି ଦେଖାଇ ଦେଇଛନ୍ତି। ଅଭିନନ୍ଦନ!

ବାଚସ୍ପତି ମହୋଦୟ,

ସମାନ ଲୋକମାନଙ୍କୁ ନେଇ ଗୋଟିଏ ରାଷ୍ଟ୍ର ଗଠନର ଦୃଷ୍ଟିକୋଣ ସହିତ ଆମେରିକାର ପ୍ରତିଷ୍ଠା ହୋଇଥିଲା। ନିଜର ସମଗ୍ର ଇତିହାସରେ, ଆପଣମାନେ ସାରା ବିଶ୍ୱର ଲୋକମାନଙ୍କୁ ଆଲିଙ୍ଗନ କରିଛନ୍ତି। ଆଉ, ଆପଣ ସେମାନଙ୍କୁ ଆମେରିକୀୟ ସ୍ୱପ୍ନର ସମାନ ଅଂଶୀଦାର କରିଛନ୍ତି । ଏଠାରେ ଲକ୍ଷାଧିକ ଲୋକ ରହୁଛନ୍ତି, ଯେଉଁମାନଙ୍କର ମୂଳଦୁଆ ଭାରତ ସହ ଯୋଡ଼ି ହୋଇ ରହିଛି । ସେମାନଙ୍କ ମଧ୍ୟରୁ କିଛି ଲୋକ ସମ୍ମାନର ସହିତ ଏହି କକ୍ଷରେ ବସିଥାନ୍ତି । ମୋ ପଛରେ ଏମିତି ଜଣେ ଅଛି, ଯିଏ ଇତିହାସ ରଚିଛି ! ମୁଁ ଜାଣିବାକୁ ପାଇଛି ଯେ, ସମୋସା (ସିଙ୍ଗଡ଼ା) କକସ୍‌ ଏବେ ସଦନର ସ୍ୱାଦ ପାଲଟିଛି । ଏହା ଆଗକୁ ବଢ଼ିବ ଏବଂ ଏଠାରେ ଭାରତୀୟ ବ୍ୟଞ୍ଜନର ସମ୍ପୂର୍ଣ୍ଣ ବିବିଧତା ଆଣିବ ବୋଲି ମୁଁ ଆଶା କରୁଛି । ଦୁଇ ଶତାବ୍ଦୀରୁ ଅଧିକ ସମୟ ଧରି, ମହାନ ଆମେରିକୀୟ ଏବଂ ଭାରତୀୟଙ୍କ ଜୀବନ ଜରିଆରେ ଆମେ ପରସ୍ପରକୁ ଅନୁପ୍ରାଣିତ କରିଛୁ। ଆମେ ମହାତ୍ମା ଗାନ୍ଧୀ ଓ ମାର୍ଟିନ ଲୁଥର କିଙ୍ଗ୍‌ ଜୁନିୟରଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥାଉ।  ଆମେ ଆହୁରି ଅନେକ ଲୋକଙ୍କୁ ମଧ୍ୟ ସ୍ମରଣ କରିଥାଉ ଯେଉଁମାନେ ସ୍ୱାଧୀନତା, ସମାନତା ଏବଂ ନ୍ୟାୟ ପାଇଁ କାର୍ଯ୍ୟ କରିଛନ୍ତି । ଆଜି, ମୁଁ ସେମାନଙ୍କ ମଧ୍ୟରୁ ଜଣେ ତଥା କଂଗ୍ରେସ ସଦସ୍ୟ ଜନ୍‌ ଲିୱିସଙ୍କୁ ମଧ୍ୟ ହାର୍ଦ୍ଦିକ ଶ୍ରଦ୍ଧାଞ୍ଜଳି ଅର୍ପଣ କରିବାକୁ ଚାହୁଁଛି ।

ବାଚସ୍ପତି ମହୋଦୟ,

ଗଣତନ୍ତ୍ର ଆମର ପବିତ୍ର ତଥା ସହଭାଗୀ ଆଦର୍ଶ ମଧ୍ୟରୁ ଅନ୍ୟତମ। ଦୀର୍ଘ ସମୟ ଧରି ଏହା ବିକଶିତ ହୋଇଛି ଏବଂ ଏହା ବିଭିନ୍ନ ରୂପ ଓ ବ୍ୟବସ୍ଥାରେ ବଦଳିଛି । ତେବେ, ସମଗ୍ର, ଇତିହାସରେ ଗୋଟିଏ କଥା ସ୍ପଷ୍ଟ ରହିଛି ।

ଗଣତନ୍ତ୍ର ହେଉଛି ସେହି ଭାବନା ଯାହା ସମାନତା ଏବଂ ସମ୍ମାନକୁ ସମର୍ଥନ କରିଥାଏ।

ଗଣତନ୍ତ୍ର ଏକ ବିଚାର ଯାହା ବିତର୍କ ଓ ଆଲୋଚନାକୁ ସ୍ୱାଗତ କରିଥାଏ।

ଗଣତନ୍ତ୍ର ଏକ ସଂସ୍କୃତି ଯାହା ବିଚାର ଏବଂ ଅଭିବ୍ୟକ୍ତିକୁ ପ୍ରୋତ୍ସାହନ ଦେଇଥାଏ।

ଭାରତ ପ୍ରାଚୀନ କାଳରୁ ଏଭଳି ମୂଲ୍ୟବୋଧ ତଥା ଆଦର୍ଶର ଅଧିକାରୀ ହେବା ଲାଗି ସୌଭାଗ୍ୟ ପାଇଛି।

ଗଣତାନ୍ତ୍ରିକ ଭାବନାର ବିକାଶରେ ଭାରତର ଗଣତନ୍ତ୍ରର ଜନନୀ ଅଟେ।

ହଜାର ହଜାର ବର୍ଷ ପୂର୍ବରୁ ଆମର ସବୁଠୁ ପ୍ରାଚୀନ ଧର୍ମଗ୍ରନ୍ଥରେ କୁହାଯାଇଥିଲା,

‘ଏକମ୍‌ ସତ୍‌ ବିପ୍ରା ବହୁଧା ବଦନ୍ତି’।

ଏହାର ଅର୍ଥ ହେଉଛି – ସତ୍ୟ ଏକ, କିନ୍ତୁ ବୁଦ୍ଧିମାନ ଲୋକମାନେ ଏହାକୁ ଭିନ୍ନ ଭିନ୍ନ ଢଙ୍ଗରେ ବ୍ୟକ୍ତ କରିଥାନ୍ତି।

ଏବେ ଆମେରିକା ସବୁଠୁ ପୁରୁଣା ଏବଂ ଭାରତ ସବୁଠୁ ବଡ଼ ଗଣତନ୍ତ୍ର ।

ଆମର ସହଭାଗିତା ଗଣତନ୍ତ୍ରର ଭବିଷ୍ୟତ ପାଇଁ ଶୁଭ ସଙ୍କେତ ଅଟେ ।

ଆମେ ସମସ୍ତେ ମିଶି ବିଶ୍ୱକୁ ଏକ ଉନ୍ନତ ଭବିଷ୍ୟତ ଦେବା ଏବଂ ଭବିଷ୍ୟତକୁ ଏକ ଉନ୍ନତ ବିଶ୍ୱ ଦେଇପାରିବା।

ବାଚସ୍ପତି ମହୋଦୟ,

ବିଗତ ବର୍ଷ ଭାରତ ସ୍ୱାଧୀନତାର ୭୫ ବର୍ଷ ପୂରଣ କରିଛି । ସବୁ ମାଇଲଖୁଣ୍ଟ ଗୁରୁତ୍ୱପୂର୍ଣ୍ଣ, କିନ୍ତୁ ଏହା ସ୍ୱତନ୍ତ୍ର ଥିଲା। ଭିନ୍ନ ଭିନ୍ନ ସ୍ୱରୂପରେ ହଜାର ହଜାର ବର୍ଷର ବିଦେଶୀ ଶାସନ ପରେ, ଆମେ ସ୍ୱାଧୀନତାର ୭୫ ବର୍ଷ ପୂରଣ ହେବାର ଉଲ୍ଲେଖନୀୟ ଯାତ୍ରାକୁ ପାଳନ କରିଥିଲୁ । ଏହା କେବଳ ଗଣତନ୍ତ୍ରର ଉତ୍ସବ ନୁହେଁ, ବରଂ ବିବିଧତାର ଉତ୍ସବ। କେବଳ ସମ୍ବିଧାନ ନୁହେଁ, ସାମାଜିକ ସଶକ୍ତିକରଣର ମଧ୍ୟ ଉତ୍ସବ। କେବଳ ପ୍ରତିଯୋଗିତାମୂଳକ ଏବଂ ସହଯୋଗୀ ସଂଘୀୟ ବ୍ୟବସ୍ଥା ନୁହେଁ, ଗୁରୁତ୍ୱପୂର୍ଣ୍ଣ ଏକତା ଓ ଅଖଣ୍ଡତାର ଉତ୍ସବ ।

ଆମ ଦେଶରେ ୨ ହଜାର ୫ଶହରୁ ଅଧିକ ରାଜନୈତିକ ଦଳ ରହିଛନ୍ତି । ହଁ ଆପଣ ଠିକ୍‌ ଶୁଣିଲେ – ଦୁଇ ହଜାର ପାଞ୍ଚ ଶହ । ୨୦ଟି ଭିନ୍ନ ଭିନ୍ନ ଦଳ ଭାରତର ବିଭିନ୍ନ ରାଜ୍ୟରେ ପ୍ରଶାସନ ଚଳାଉଛନ୍ତି । ଆମ ଦେଶରେ ୨୨ଟି ସରକାରୀ ଭାଷା ଏବଂ ଏକ ହଜାରରୁ ଅଧିକ କଥିତ ଭାଷା ରହିଛି, ତଥାପି ଆମେ ଏକ ସ୍ୱରରେ କଥା ହୋଇଥାଉ । ପ୍ରତି ୧୦୦ ମାଇଲ୍‌ ଦୂର ଯିବା ପରେ ଆମର ବ୍ୟଞ୍ଜନ ବଦଳି ଯାଏ। ଡୋସାରୁ ଆଳୁ ପରଟା ଯାଏ ଏବଂ ଶ୍ରୀଖଣ୍ଡରୁ ସନ୍ଦେଶ ଯାଏ, ଆମେ ସବୁ ଖାଦ୍ୟକୁ ଉପଭୋଗ କରିଥାଉ । ଆମ ଦେଶରେ ବିଶ୍ୱର ସବୁ ଧର୍ମାବଲମ୍ବୀ ଲୋକମାନେ ବସବାସ କରନ୍ତି ଏବଂ ଆମେ ସବୁ ଧର୍ମକୁ ସମ୍ମାନ ଜଣାଇଥାଉ । ଭାରତରେ, ବିବିଧତା ଜୀବନର ଏକ ସ୍ୱାଭାବିକ ମାର୍ଗ ।

ଆଜି ବିଶ୍ୱ ଭାରତ ବିଷୟରେ ଅଧିକରୁ ଅଧିକ ଜାଣିବା ପାଇଁ ଚାହୁଁଛି । ମୁଁ ଏହି ସଦନରେ ମଧ୍ୟ ସେପରି ଅନୁସନ୍ଧିତ୍ସା ଦେଖି ପାରୁଛି । ବିଗତ ଦଶ ବର୍ଷ ମଧ୍ୟରେ ଆମେରିକା କଂଗ୍ରେସର ଶତାଧିକ ସଦସ୍ୟଙ୍କୁ ସ୍ୱାଗତ କରିବା ଆମ ପାଇଁ ସମ୍ମାନର ବିଷୟ । ସମସ୍ତେ ଭାରତର ବିକାଶ, ଗଣତନ୍ତ୍ର ଏବଂ ବିବିଧତାକୁ ବୁଝିବା ପାଇଁ ଚାହୁଁଛନ୍ତି । ଭାରତ ବର୍ତ୍ତମାନ କ’ଣ କରୁଛି ଏବଂ କିପରି କରୁଛି ତାହା ଜାଣିବା ପାଇଁ ସମସ୍ତେ ଆଗ୍ରହୀ । ଆମ ଭିତରେ ନିବିଡ଼ ବନ୍ଧୁତା ରହିଥିବାରୁ ତାହା ପ୍ରକାଶ କରିବା ମୋ ପାଇଁ ଆନନ୍ଦର ବିଷୟ ।

ବାଚସ୍ପତି ମହାଶୟ,

ପ୍ରଧାନମନ୍ତ୍ରୀ ଭାବେ ମୁଁ ଯେତେବେଳେ ପ୍ରଥମ ଥର ଆମେରିକା ଗସ୍ତରେ ଆସିଥିଲି, ଭାରତ ସେତେବେଳେ ବିଶ୍ୱର ଦଶମ ସର୍ବବୃହତ ଅର୍ଥବ୍ୟବସ୍ଥା ଥିଲା । ଆଜି ଭାରତ ବିଶ୍ୱର ପଞ୍ଚମ ସର୍ବବୃହତ ଅର୍ଥବ୍ୟବସ୍ଥା ହୋଇପାରିଛି । ଆଉ ଖୁବ୍‌ଶୀଘ୍ର, ଭାରତ ବିଶ୍ୱର ତୃତୀୟ ସର୍ବବୃହତ ଅର୍ଥବ୍ୟବସ୍ଥା ହେବ । ଆମେ କେବଳ ବ୍ୟାପକ ପ୍ରଗତି ନୁହେଁ ବରଂ ଦ୍ରୁତ ପ୍ରଗତି ହାସଲ କରୁଛୁ ।  ଭାରତର ବିକାଶ ହେଲେ ସାରା ବିଶ୍ୱ ବିକଶିତ ହୋଇଥାଏ । ସର୍ବୋପରି ଆମେ ବିଶ୍ୱ ଜନସଂଖ୍ୟାର ଏକ ଷଷ୍ଠାଂଶ ! ବିଗତ ଶତାବ୍ଦୀରେ, ଭାରତ ଯେତେବେଳ ସ୍ୱାଧୀନତା ହାସଲ କଲା, ଏହା ଅନେକ ଦେଶକୁ ଉପନିବେଶବାଦ ଶାସନ ଠାରୁ ନିଜକୁ ମୁକ୍ତ କରିବା ପାଇଁ ଅନୁପ୍ରାଣିତ କରିଥିଲା। ଚଳିତ ଶତାବ୍ଦୀରେ, ଭାରତ ଯେତେବେଳେ ବିକାଶର ନୂଆ ମାଇଲଖୁଣ୍ଟ ପ୍ରତିଷ୍ଠା କରୁଛି, ଏହା ଅନ୍ୟ ଦେଶମାନଙ୍କୁ ମଧ୍ୟ ବିକଶିତ ହେବା ପାଇଁ ଅନୁପ୍ରାଣିତ କରିବ। ଆମର ଲକ୍ଷ୍ୟ ହେଉଛି ସବକା ସାଥ୍‌, ସବକା ବିକାଶ, ସବ୍‌କା ବିଶ୍ୱାସ, ସବ୍‌କା ପ୍ରୟାସ। ଏହାର ଅର୍ଥ ହେଉଛି : ସମସ୍ତଙ୍କୁ ସାଙ୍ଗରେ ନେଇ ସମସ୍ତଙ୍କ ବିକାଶ, ସମସ୍ତଙ୍କ ବିଶ୍ୱାସ ଏବଂ ସମସ୍ତଙ୍କ ପ୍ରୟାସ।

ଏହି ଲକ୍ଷ୍ୟ କିଭଳି ଦ୍ରୁତ ଗତିରେ ଏବଂ ବ୍ୟାପକତାର ସହିତ ସାକାର ରୂପ ନେଉଛି, ତାହା ମୁଁ କହିବାକୁ ଚାହୁଁଛି । ଆମେ ଭିତ୍ତିଭୂମି ବିକାଶ ଉପରେ ଧ୍ୟାନ ଦେଉଛୁ । ୧୫ କୋଟି ଲୋକଙ୍କୁ ଆଶ୍ରୟ ଦେବା ପାଇଁ ଆମେ ପ୍ରାୟ ୪ କୋଟି ଆବାସ ଯୋଗାଇ ଦେଇଛୁ । ଏହା ଅଷ୍ଟ୍ରେଲିୟାର ଜନସଂଖ୍ୟା ଠାରୁ ପ୍ରାୟ ଛଅଗୁଣ ଅଧିକ ! ଆମେ ଏକ ଜାତୀୟ ସ୍ୱାସ୍ଥ୍ୟ ବୀମା ଯୋଜନା କାର୍ଯ୍ୟକାରୀ କରୁଛୁ ଯାହା ପ୍ରାୟ ୫୦ କୋଟି ଲୋକଙ୍କ ପାଇଁ ମାଗଣା ଚିକିତ୍ସା ସୁନିଶ୍ଚିତ କରୁଛି । ଏହା ଦକ୍ଷିଣ ଆମେରିକାର ଲୋକସଂଖ୍ୟା ଠାରୁ ଅଧିକ ! ଆମେ ବିଶ୍ୱର ସର୍ବବୃହତ ଆର୍ଥିକ ଅନ୍ତର୍ଭୂକ୍ତୀକରଣ ଯୋଜନା ଜରିଆରେ ବ୍ୟାଙ୍କ ସେବାରୁ ବଞ୍ଚିତ ଲୋକମାନଙ୍କୁ ବ୍ୟାଙ୍କ ସେବା ଯୋଗାଇ ଦେଉଛୁ। ପ୍ରାୟ ୫୦ କୋଟି ଲୋକ ଏହାର ଲାଭ ପାଇଛନ୍ତି । ଏହା ଉତ୍ତର ଆମେରିକାର ଲୋକସଂଖ୍ୟା ସହ ସମାନ । ଆମେ ଡିଜିଟାଲ ଇଣ୍ଡିଆ ନିର୍ମାଣ ଦିଗରେ କାର୍ଯ୍ୟ କରିଛୁ । ଆଜି, ଆମ ଦେଶରେ ପ୍ରାୟ ୮୫ କୋଟି ସ୍ମାର୍ଟ ଫୋନ୍‌ ଓ ଇଣ୍ଟରନେଟ୍‌ ଉପଭୋକ୍ତା ରହିଛନ୍ତି । ଏହା ୟୁରୋପର ଜନସଂଖ୍ୟା ଠାରୁ ଅଧିକ ! ଆମେ ଭାରତରେ ନିର୍ମିତ ୨୨୦ କୋଟି  ଡୋଜ୍‌ କୋଭିଡ ଟିକା ଦେଇ ଆମ ଦେଶବାସୀଙ୍କୁ କରୋନା ମହାମାରୀ ଠାରୁ ସୁରକ୍ଷା ଦେଇଛୁ, ତାହା ପୁଣି ସମ୍ପୂର୍ଣ୍ଣ ମାଗଣାରେ! ହୁଏତ’ ମୁଁ ଖୁବ୍‌ଶୀଘ୍ର ମହାଦେଶରୁ ବାହାରକୁ ଯାଇପାରେ, ତେଣୁ ମୁଁ ଏହି ଠାରେ ବିରାମ ନେଉଛି!

ସମ୍ମାନନୀୟ ସଦସ୍ୟଗଣ,

ବେଦ ବିଶ୍ୱର ସବୁଠୁ ପ୍ରାଚୀନ ଗ୍ରନ୍ଥ । ହଜାର ହଜାର ବର୍ଷ ପୂର୍ବରୁ ସଙ୍କଳିତ ଏହି ଶାସ୍ତ୍ର ମାନବ ଜଗତ ପାଇଁ ଏକ ଶ୍ରେଷ୍ଠ ସମ୍ପଦ । ତତ୍କାଳୀନ ସମୟରେ ମହିଳା ସାଧୁମାନେ ବେଦର ବହୁ ଶ୍ଳୋକ ରଚନା କରିଥିଲେ । ଆଉ ଆଜି, ଆଧୁନିକ ଭାରତରେ, ମହିଳାମାନେ ଆମକୁ ଏକ ଉନ୍ନତ ଭବିଷ୍ୟତ ଦିଗରେ ଆଗେଇ ନେଉଛନ୍ତି । ଭାରତ କେବଳ ମହିଳାଙ୍କୁ ଲାଭ ପହଞ୍ଚାଉଥିବା ବିକାଶ ପାଇଁ ଲକ୍ଷ୍ୟ ରଖିନାହିଁ, ବରଂ ଏହା ମହିଳାଙ୍କ ନେତୃତ୍ୱାଧୀନ ବିକାଶ ଦିଗରେ ଅଗ୍ରସର ହେଉଛି, ଯେଉଁଠି ମହିଳାମାନେ ବିକାଶ ଯାତ୍ରାରେ ନେତୃତ୍ୱ ନେଉଛନ୍ତି । ସାଧାରଣ ଆଦିବାସୀ ପୃଷ୍ଠଭୂମିରେ ବଢ଼ିଥିବା ଜଣେ ମହିଳା ଆଜି ଆମର ରାଷ୍ଟ୍ର ମୁଖ୍ୟ ହୋଇପାରିଛନ୍ତି ।

ବିଭିନ୍ନ ସ୍ତରରେ ପ୍ରାୟ ଦେଢ଼ ନିୟୁତ ମହିଳା ପ୍ରତିନିଧି ଏବଂ ତାହା ପୁଣି ସ୍ଥାନୀୟ ସରକାରୀ ସ୍ତରରେ ଆମର ନେତୃତ୍ୱ ନେଉଛନ୍ତି । ଆଜି ମହିଳାମାନେ ଆମେ ଦେଶର ସ୍ଥଳ ସେନା, ନୌସେନା ଓ ବାୟୁ ସେନାରେ କର୍ତ୍ତବ୍ୟରତ ଅଛନ୍ତି । ବିଶ୍ୱରେ ସବୁଠୁ ଅଧିକ ସଂଖ୍ୟକ ମହିଳା ପାଇଲଟ୍‌ ଭାରତରେ ଅଛନ୍ତି । ଆହୁରି ମହିଳାମାନେ ଆମ ମଙ୍ଗଳ ମିଶନରେ ନେତୃତ୍ୱ ନେଇ ଆମକୁ ମଙ୍ଗଳ ଗ୍ରହରେ ପହଞ୍ଚାଇ ପାରିଛନ୍ତି । ଜଣେ ଶିଶୁ କନ୍ୟା ପାଇଁ ନିବେଶ ସାରା ପରିବାରରେ ଉନ୍ନତି ଆଣିଥାଏ। ମହିଳାଙ୍କୁ ସଶକ୍ତ କରିବା ଦ୍ୱାରା ରାଷ୍ଟ୍ରର ପରିବର୍ତ୍ତନ ହୋଇଥାଏ।

ବାଚସ୍ପତି ମହୋଦୟ,

ଭାରତ ହେଉଛି ଅଧିକ ଯୁବ ଜନସଂଖ୍ୟା ଥିବା ଏକ ପ୍ରାଚୀନ ରାଷ୍ଟ୍ର । ଭାରତ ନିଜର ପରମ୍ପରା ପାଇଁ ପରିଚିତ । କିନ୍ତୁ ଯୁବ ପିଢ଼ିମାନେ ଏହାକୁ ପ୍ରଯୁକ୍ତିର ଏକ କେନ୍ଦ୍ରରେ ପରିଣତ କରିଛନ୍ତି । ଇନଷ୍ଟାଗ୍ରାମରେ ସୃଜନଶୀଳ ରିଲ୍‌ ତିଆରି କରିବା ହେଉ କିମ୍ବା ରିୟଲ ଟାଇମ୍‌ ପେମେଣ୍ଟ, କୋଡିଂ କିମ୍ବା କ୍ୱାଣ୍ଟମ କମ୍ପ୍ୟୁଟିଂ, ମେସିନ୍‌ ଲର୍ଣ୍ଣିଂ କିମ୍ବା ମୋବାଇଲ୍‌ ଆପ୍‌, ଫିନଟେକ୍‌ କିମ୍ବା ଡେଟା ସାଇନ୍ସ, ସମାଜ କିଭଳି ଆଧୁନିକ ପ୍ରଯୁକ୍ତିକୁ ଗ୍ରହଣ କରିଥାଏ, ଭାରତର ଯୁବକମାନେ ତାହାର ଏକ ଶ୍ରେଷ୍ଠ ଉଦାହରଣ । ଭାରତରେ ପ୍ରଯୁକ୍ତିର ଅର୍ଥ କେବଳ ସୃଜନଶୀଳତା ନୁହେଁ, ବରଂ ସମାବେଶିତା।  ଆଜି ଡିଜିଟାଲ ପ୍ଲାଟଫର୍ମଗୁଡ଼ିକ ଗୋପନୀୟତାକୁ ସୁରକ୍ଷା ଦେବା ସହିତ ଲୋକମାନଙ୍କର ଅଧିକାର ଓ ସମ୍ମାନକୁ ସଶକ୍ତ କରୁଛନ୍ତି ।

ବିଗତ ନଅ ବର୍ଷ ମଧ୍ୟରେ, ୧୦୦ କୋଟିରୁ ଅଧିକ ଲୋକ ଏକ ଅଭିନବ ଡିଜିଟାଲ ବାୟୋମେଟ୍ରିକ ପରିଚୟ ପାଇଛନ୍ତି ଯାହାକୁ ସେମାନେ ନିଜର ବ୍ୟାଙ୍କ ଏକାଉଣ୍ଟ ଓ ମୋବାଇଲ୍‌ ଫୋନ୍‌ ସହ ଯୋଡ଼ି ପାରିଛନ୍ତି । ଏହି ଡିଜିଟାଲ ସାର୍ବଜନୀନ ଭିତ୍ତିଭୂମି ମାତ୍ର କିଛି ସେକେଣ୍ଡ ମଧ୍ୟରେ ନାଗରିକଙ୍କ ନିକଟରେ ଆର୍ଥିକ ସହାୟତା ପହଞ୍ଚାଇବାରେ ଆମକୁ ସହାୟକ ହୋଇଛି । ୮୫ କୋଟି ଲୋକ ସେମାନଙ୍କ ଏକାଉଣ୍ଟରେ ପ୍ରତ୍ୟକ୍ଷ ଆର୍ଥିକ ଲାଭ ପାଇପାରୁଛନ୍ତି । ଗୋଟିଏ ବର୍ଷରେ ତିନି ଥର, ମାତ୍ର ଗୋଟିଏ କ୍ଲିକ୍‌ ଜରିଆରେ, ୧୦ କୋଟିରୁ ଅଧିକ ଚାଷୀଙ୍କ ବ୍ୟାଙ୍କ ଏକାଉଣ୍ଟରେ ଆର୍ଥିକ ସହାୟତା ଯୋଗାଇ ଦିଆଯାଉଛି । ଏପରି ଆର୍ଥିକ ହସ୍ତାନ୍ତର ପରିମାଣ ୩୨୦ ବିଲିୟନ ଡଲାର ଅତିକ୍ରମ କରିସାରିଛି ଏବଂ ଏହି ପ୍ରକ୍ରିୟାରେ ଆମେ ୨୫ ବିଲିୟନ ଡଲାର ଅର୍ଥ ସଞ୍ଚୟ କରିପାରିଛୁ । ଯଦି ଆପଣ ଭାରତ ଗସ୍ତ କରୁଛନ୍ତି, ଆପଣ ଦେଖିବେ ଯେ ଅର୍ଥ ପଇଠ କରିବା ଲାଗି ସମସ୍ତେ ଫୋନ ବ୍ୟବହାର କରୁଛନ୍ତି, ଏପରିକି ଉଠାଦୋକାନୀମାନେ ମଧ୍ୟ।

ବିଗତ ବର୍ଷ, ବିଶ୍ୱରେ ପ୍ରତ୍ୟେକ ୧୦୦ ରିୟଲ ଟାଇମ୍‌ ଡିଜିଟାଲ ପେମେଣ୍ଟ ମଧ୍ୟରୁ ୪୬ଟି ଭାରତରେ ହୋଇଥିଲା । ପାଖାପାଖି ଚାରି ଲକ୍ଷ ମାଇଲ୍‌ ଅପ୍ଟିକାଲ ଫାଇବର କେବୁଲ ସଂଯୋଗ ଏବଂ ଶସ୍ତା ଡେଟା ଦେଶରେ ସୁଯୋଗର ଏକ ବିପ୍ଳବ ଆଣିଛି । କେବଳ ନିଜ ଫୋନରେ ଟ୍ୟାପ୍‌ କରି ଚାଷୀମାନେ ପାଣିପାଗ ସୂଚନା ପାଇପାରୁଛନ୍ତି, ବୟସ୍କମାନେ ସାମାଜିକ ସୁରକ୍ଷା ଅର୍ଥ, ଛାତ୍ରଛାତ୍ରୀ ବୃତ୍ତି ପାଉଛନ୍ତି, ଡାକ୍ତରମାନେ ଟେଲି ମେଡ଼ିସିନ୍‌ ଯୋଗାଇ ଦେଉଛନ୍ତି, ମତ୍ସ୍ୟଜୀବୀମାନେ ମାଛଧରା ସ୍ଥାନ ସମ୍ପର୍କରେ ସୂଚନା ପାଉଛନ୍ତି ଏବଂ କ୍ଷୁଦ୍ର ବ୍ୟବସାୟୀଙ୍କୁ ଋଣ ମିଳିପାରୁଛି ।

ବାଚସ୍ପତି ମହୋଦୟ,

ଗଣତନ୍ତ୍ର, ସମାବେଶିତା ଓ ଦୀର୍ଘସ୍ଥାୟିତ୍ୱ ଭାବନା ଆମକୁ ପରିଭାଷିତ କରିଥାଏ। ଏହା ମଧ୍ୟ ଦୁନିଆ ପାଇଁ ଆମର ଦୃଷ୍ଟିକୋଣକୁ ରୂପ ଦେଇଥାଏ। ଆମେ ପୃଥିବୀ ପାଇଁ ଉତ୍ତରଦାୟୀ ହେବା ସହିତ ଭାରତର ବିକାଶକୁ ଆଗେଇ ନେଉଛୁ ।

ଆମର ବିଶ୍ୱାସ ହେଉଛି : ମାତା ଭୂମିଃ ପୁତ୍ର ଅହଂ ପୃଥିବ୍ୟାଃ।

ଏହାର ଅର୍ଥ ହେଉଛି – ‘‘ପୃଥିବୀ ଆମର ମା’ ଏବଂ ଆମେ ତା’ର ସନ୍ତାନ।’’

ଭାରତୀୟ ସଂସ୍କୃତି ଗଭୀର ଭାବେ ଆମର ପରିବେଶ ଓ ଆମ ପୃଥିବୀକୁ ସମ୍ମାନ କରିଥାଏ। ଦ୍ରୁତତମ ବିକାଶଶୀଳ ଅର୍ଥବ୍ୟବସ୍ଥା ହେବା ସମୟରେ, ଆମେ ଆମର ସୌର କ୍ଷମତାକୁ ୨ହଜାର ୩ଶହ ପ୍ରତିଶତ ବୃଦ୍ଧି କରିଛୁ ! ହଁ, ଆପଣମାନେ ଶୁଣିଛନ୍ତି – ୨ ହଜାର ୩ଶହ ପ୍ରତିଶତ !

ପ୍ୟାରିସ ପ୍ରତିବଦ୍ଧତାକୁ ପୂରଣ କରିବାରେ ଆମେ ପ୍ରଥମ ଜି୨୦ ଦେଶ ହୋଇପାରିଛୁ । ୨୦୩୦ ସୁଦ୍ଧା ଧାର୍ଯ୍ୟ କରାଯାଇଥିବା ଲକ୍ଷ୍ୟର ନଅ ବର୍ଷ ପୂର୍ବରୁ ଆମେ ଆମର ଶକ୍ତି ଆବଶ୍ୟକତାରେ ଅକ୍ଷୟ ଶକ୍ତିର ଭାଗକୁ ଚାଳିଶ ପ୍ରତିଶତରେ ପହଞ୍ଚାଇ ପାରିଛୁ । କିନ୍ତୁ ଆମେ ଏତିକିରେ ଅଟକି ନାହୁଁ । ଗ୍ଲାସଗୋ ଶିଖର ସମ୍ମିଳନୀ ଠାରେ, ମୁଁ ମିଶନ୍‌ ଲାଇଫ୍‌ – ଲାଇଫ ଷ୍ଟାଇଲ୍‌ ଫର୍‌ ଏନଭାଇରନ୍‌ମେଣ୍ଟ ପାଇଁ ପ୍ରସ୍ତାବ ଦେଇଥିଲି । ଏହା ଦୀର୍ଘସ୍ଥାୟିତ୍ୱ ପାଇଁ ଏକ ବାସ୍ତବ ଜନ ଆନ୍ଦୋଳନ ଆରମ୍ଭ କରିବାର ମାର୍ଗ। ଏହାକୁ କେବଳ ସରକାରଙ୍କ କାମ ଭାବେ ଛାଡ଼ି ଦିଆଯାଇନାହିଁ ।

ବିବେକପୂର୍ଣ୍ଣ ନିଷ୍ପତ୍ତି ନେବା ସହିତ, ପ୍ରତ୍ୟେକ ବ୍ୟକ୍ତି ସକାରାତ୍ମକ ପ୍ରଭାବ ପକାଇ ପାରିବେ । ଦୀର୍ଘସ୍ଥାୟିତ୍ୱକୁ ଏକ ଜନ ଆନ୍ଦୋଳନରେ ପରିଣତ କରିବା ଦ୍ୱାରା ବିଶ୍ୱକୁ ଦ୍ରୁତ ଗତିରେ ଶୂନ୍ୟ ଅଙ୍ଗାରକାମ୍ଳ ନିର୍ଗମନ ଲକ୍ଷ୍ୟ ହାସଲରେ ସହାୟତା ମିଳିପାରିବ। ଆମର ସଂକଳ୍ପ ହେଉଛି ପୃଥିବୀ ଅନୁକୂଳ ବିକାଶ । ଆମର ସଂକଳ୍ପ ହେଉଛି ପୃଥିବୀ ଅନୁକୂଳ ସମୃଦ୍ଧି । ଆମର ସଂକଳ୍ପ ହେଉଛି ପୃଥିବୀ ଅନୁକୂଳ ମାନବ ସମାଜ ଗଠନ।

ବାଚସ୍ପତି ମହୋଦୟ,

ଆମେ ବସୁଧୈବ କୁଟୁମ୍ବକମ୍‌ ବା ସାରା ବିଶ୍ୱ ଏକ ପରିବାର ବିଚାରକୁ ନେଇ ବଞ୍ଚିଥାଉ। ବିଶ୍ୱ ସହିତ ଆମର ସମ୍ପର୍କ ସମସ୍ତଙ୍କ ଲାଭ ପାଇଁ ଉଦ୍ଦିଷ୍ଟ । ‘‘ଏକ ସୂର୍ଯ୍ୟ, ଏକ ବିଶ୍ୱ, ଏକ ଗ୍ରୀଡ’’, ବିଶ୍ୱକୁ ସ୍ୱଚ୍ଛ ଇନ୍ଧନ ସହ ଯୋଡ଼ିବା କାର୍ଯ୍ୟରେ ଆମ ସମସ୍ତଙ୍କୁ ସାମିଲ କରିବାକୁ ଚାହୁଁଛି । ‘‘ଏକ ଅର୍ଥ, ଏକ ବିଶ୍ୱ’’ ପଶୁମାନଙ୍କୁ ଏବଂ ଉଦ୍ଭିଦ ସହିତ ସମସ୍ତଙ୍କ ପାଇଁ ଗୁଣବତ୍ତାପୂର୍ଣ୍ଣ ସ୍ୱାସ୍ଥ୍ୟ ଯତ୍ନ ଆଣିବା ଲାଗି ବିଶ୍ୱ କାର୍ଯ୍ୟାନୁଷ୍ଠାନର ଏକ ଦୃଷ୍ଟିକୋଣ ଅଟେ ।

ଆମେ ଜି-୨୦ ଅଧ୍ୟକ୍ଷତା ଗ୍ରହଣ କରିବା ସମୟରେ ଏହି ଭାବନା ମଧ୍ୟ ପ୍ରତିଫଳିତ ହୋଇଥାଏ – ‘‘ଏକ ପୃଥିବୀ, ଏକ ପରିବାର, ଏକ ଭବିଷ୍ୟତ।’’ ଆମେ ଯୋଗ ମାଧ୍ୟମରେ ମଧ୍ୟ ଏକତାର ଭାବନାକୁ ପ୍ରୋତ୍ସାହିତ କରିଥାଉ। ଗତକାଲି ସାରା ବିଶ୍ୱ ଅନ୍ତର୍ଜାତୀୟ ଯୋଗ ଦିବସ ପାଳନ କରିବା ଲାଗି ଏକ ସଙ୍ଗେ ଗୋଟିଏ ମଞ୍ଚରେ ଏକତ୍ରିତ ହୋଇଥିଲା। ଗତ ସପ୍ତାହରେ, ସବୁ ଦେଶ ଶାନ୍ତି ସୈନିକମାନଙ୍କ ସମ୍ମାନରେ ଏକ ସ୍ମାରକ ପ୍ରାଚୀର ତିଆରି କରିବା ଲାଗି ମିଳିତ ଜାତିସଂଘରେ ଆମର ପ୍ରସ୍ତାବକୁ ଏକାଠି ସମର୍ଥନ କରିଥିଲେ।

ଆଉ ଚଳିତ ବର୍ଷ, ସାରା ବିଶ୍ୱ ଦୀର୍ଘସ୍ଥାୟୀ କୃଷି ଓ ପୋଷଣକୁ ସମାନ ଭାବେ ପ୍ରୋତ୍ସାହନ ଦେବା ଲାଗି ଅନ୍ତର୍ଜାତୀୟ ମିଲେଟ୍‌ ବର୍ଷ ପାଳନ କରୁଛି । କୋଭିଡ ସମୟରେ, ଆମେ ଦେଢ଼ଶହରୁ ଅଧିକ ଦେଶରେ ଟିକା ଓ ଔଷଧ ପହଞ୍ଚାଇ ଥିଲୁ। ଆମେ ନିଜ ପାଇଁ ଯେମିତି କରିଥାଉ, ଠିକ୍‌ ସେମିତି ବିପଦ ସମୟରେ ପ୍ରଥମ ସହାୟତାକାରୀ ଭାବେ ଅନ୍ୟମାନଙ୍କ ନିକଟରେ ମଧ୍ୟ ଆମେ ପହଞ୍ଚିଛୁ । ଆମେ ଆମର ସାଧାରଣ ସମ୍ବଳକୁ ସେହି ଲୋକମାନଙ୍କୁ ଦେଇଛୁ ଯେଉଁମାନଙ୍କର ଏହା ସବୁଠୁ ଅଧିକ ଦରକାର । ଆମେ ନିର୍ଭରଶୀଳତା ନୁହେଁ କ୍ଷମତା ନିର୍ମାଣ କରିଥାଉ।

ବାଚସ୍ପତି ମହୋଦୟ,

ଯେତେବେଳେ ମୁଁ ବିଶ୍ୱ ପ୍ରତି ଭାରତର ଦୃଷ୍ଟିକୋଣ ବିଷୟରେ ଆଲୋଚନା କରୁଛି, ସେଥିରେ ଯୁକ୍ତରାଷ୍ଟ୍ର ଆମେରିକା ଏକ ବିଶେଷ ସ୍ଥାନ ରଖିଥାଏ। ମୁଁ ଜାଣିଛି ଯେ ଆମ ସମ୍ପର୍କ ଆପଣମାନଙ୍କ ପାଇଁ ଗୁରୁତ୍ୱପୂର୍ଣ୍ଣ । କଂଗ୍ରେସର ପ୍ରତ୍ୟେକ ସଦସ୍ୟ ଏଥିରେ ଗଭୀର ରୁଚି ରଖିଥାନ୍ତି । ଭାରତରେ ପ୍ରତିରକ୍ଷା ଏବଂ ଏରୋସ୍ପେସ୍‌ କ୍ଷେତ୍ର ବଢ଼ିଲେ, ୱାଶିଂଟନ୍‌, ଏରିଜେନା, ଜର୍ଜିୟା, ଆଲବାମା, ଦକ୍ଷିଣ କ୍ୟାରୋଲିନା ଏବଂ ପେନସିଲଭାନିଆ ରାଜ୍ୟରେ ଉଦ୍ୟୋଗ ବଢ଼ିଥାଏ। ଆମେରିକୀୟ କମ୍ପାନୀମାନେ ବଢ଼ିଲେ, ଭାରତରେ ସେମାନଙ୍କର ଗବେଷଣା ଓ ବିକାଶ କେନ୍ଦ୍ରକୁ ମଧ୍ୟ ପ୍ରୋତ୍ସାହନ ମିଳିଥାଏ। ଭାରତୀୟମାନେ ଅଧିକ ବିମାନ ଯାତ୍ରା କଲେ, ବିମାନଗୁଡ଼ିକର ଗୋଟିଏ ଅର୍ଡରରେ ଆମେରିକାର ୪୪ଟି ରାଜ୍ୟରେ ଦଶ ଲକ୍ଷରୁ ଅଧିକ ନିଯୁକ୍ତି ସୃଷ୍ଟି ହୋଇଥାଏ।

ଯେତେବେଳେ ଆମେରିକୀୟ ଫୋନ୍‌ ନିର୍ମାତା ଭାରତରେ ନିବେଶ କରିଥାନ୍ତି, ଏହା ଦୁଇ ଦେଶରେ ନିଯୁକ୍ତି ଓ ସୁଯୋଗର ଏକ ସମ୍ପୂର୍ଣ୍ଣ ଇକୋସିଷ୍ଟମ୍‌ ବିକଶିତ କରିଥାଏ। ଭାରତ ଏବଂ ଆମେରିକା ସେମିକଣ୍ଡକ୍ଟର ଓ ଗୁରୁତ୍ୱପୂର୍ଣ୍ଣ ଖଣିଜ ଉପରେ ମିଳିମିଶି କାମ କଲେ, ଏହା ବିଶ୍ୱ ଯୋଗାଣ ଶୃଙ୍ଖଳାକୁ ଅଧିକ ବିବିଧ, ନମନୀୟ ଏବଂ ବିଶ୍ୱସନୀୟ କରିବାରେ ସହାୟତା କରିଥାଏ। ବାସ୍ତବରେ, ବାଚସ୍ପତି ମହୋଦୟ, ଶତାବ୍ଦୀର ପ୍ରାରମ୍ଭରେ ଆମର ପ୍ରତିରକ୍ଷା ସହଯୋଗ ନଗଣ୍ୟ ଥିଲା। ଏବେ ଯୁକ୍ତରାଷ୍ଟ୍ର ଆମେରିକା ଆମର ସବୁଠୁ ଗୁରୁତ୍ୱପୂର୍ଣ୍ଣ ପ୍ରତିରକ୍ଷା ଭାଗିଦାର ମଧ୍ୟରୁ ଅନ୍ୟତମ। ଆଜି ଭାରତ ଏବଂ ଆମେରିକା ମହାକାଶ ଓ ସାଗରରେ, ବିଜ୍ଞାନ ଓ ସେମିକଣ୍ଡକ୍ଟରରେ, ଷ୍ଟାର୍ଟଅପ୍‌ ଓ ସ୍ଥିରତାରେ, ପ୍ରଯୁକ୍ତି ଓ ବ୍ୟବସାୟରେ, କୃଷି ଓ ଅର୍ଥରେ, କଳା ଓ ଆର୍ଟିଫିସିଆଲ ଇଣ୍ଟେଲିଜେନ୍ସରେ, ଇନ୍ଧନ ଓ ଶିକ୍ଷା, ସ୍ୱାସ୍ଥ୍ୟସେବା ଓ ମାନବୀୟ ପ୍ରୟାସରେ ଏକ ସଙ୍ଗେ କାମ କରୁଛନ୍ତି ।

ଆମେ ଲଗାତାର ଆଗକୁ ବଢ଼ିବା ଜାରି ରଖିପାରିବୁ । କିନ୍ତୁ ଏହାକୁ ସଂକ୍ଷେପରେ କହିବା ଲାଗି, ମୁଁ କହିବି, ଆମର ସହଯୋଗର ପରିଧି ଅସୀମ, ଆମ ତାଳମେଳର କ୍ଷମତା ଅସୀମିତ, ଆମ ସମ୍ପର୍କର ନିବିଡ଼ତା ମଧ୍ୟ ଅତି ସହଜ।

ଏସବୁଥିରେ ଭାରତୀୟ-ଆମେରିକୀୟମାନେ ବଡ଼ ଭୂମିକା ନିର୍ବାହ କରିଛନ୍ତି। ସେମାନେ କେବଳ ‘ସ୍ପେଲିଂ ବୀ’ରେ ନୁହେଁ ସବୁ କ୍ଷେତ୍ରରେ ପ୍ରତିଭାଶାଳୀ। ନିଜ ହୃଦୟ ଓ ମସ୍ତିଷ୍କ, ପ୍ରତିଭା ଓ କୌଶଳ ତଥା ଆମେରିକା ଓ ଭାରତ ପ୍ରତି ନିଜର ଭଲ ପାଇବା ଜରିଆରେ ସେମାନେ ଆମକୁ ଯୋଡ଼ିଛନ୍ତି, ସେମାନେ ଦ୍ୱାର ଖୋଲି ଦେଇଛନ୍ତି, ସେମାନେ ଆମ ଭାଗିଦାରୀର କ୍ଷମତା ପ୍ରଦର୍ଶନ କରିଛନ୍ତି ।

ବାଚସ୍ପତି ମହୋଦୟ, ସମ୍ମାନନୀୟ ସଦସ୍ୟଗଣ,

ଅତୀତରେ ପ୍ରତ୍ୟେକ ଭାରତୀୟ ପ୍ରଧାନମନ୍ତ୍ରୀ ଏବଂ ଆମେରିକାର ରାଷ୍ଟ୍ରପତି ଆମ ସମ୍ପର୍କକୁ ଆଗକୁ ନେଇଛନ୍ତି । କିନ୍ତୁ ଏହାକୁ ନୂଆ ଉଚ୍ଚତାକୁ ନେଇଯିବାର ଗୌରବ ଆମ ପିଢ଼ିକୁ ପ୍ରାପ୍ତ ହୋଇଛି । ଏହା ଚଳିତ ଶତାବ୍ଦୀର ଏକ ନିର୍ଣ୍ଣାୟକ ଭାଗିଦାରୀ ବୋଲି ରାଷ୍ଟ୍ରପତି ବାଇଡେନଙ୍କ କଥାରେ ମୁଁ ସହମତ । କାରଣ ଏହା ଏକ ବଡ଼ ଉଦ୍ଦେଶ୍ୟକୁ ପୂରଣ କରିଥାଏ । ଗଣତନ୍ତ୍ର, ଜନସଂଖ୍ୟା ଏବଂ ଭାଗ୍ୟ ଆମକୁ ସେହି ଉଦ୍ଦେଶ୍ୟ ପ୍ରଦାନ କରିଥାଏ । ଜଗତୀକରଣର ଏକ ପରିଣାମ ସ୍ୱରୂପ ଯୋଗାଣ ଶୃଙ୍ଖଳାର ଅତ୍ୟଧିକ-ଏକତ୍ରୀକରଣ ହୋଇଛି ।

ଯୋଗାଣ ଶୃଙ୍ଖଳାକୁ ବିବିଧ କରିବା, ବିକେନ୍ଦ୍ରିକୃତ କରିବା ଏବଂ ଗଣତାନ୍ତ୍ରିକରଣ କରିବା ଲାଗି ଆମେ ମିଳିମିଶି କାମ କରିବୁ । ପ୍ରଯୁକ୍ତି ଏକବିଂଶ ଶତାବ୍ଦୀରେ ସୁରକ୍ଷା, ସମୃଦ୍ଧି ଓ ନେତୃତ୍ୱକୁ ନିର୍ଦ୍ଧାରଣ କରିବ। ସେଥିପାଇଁ ଆମେ ଦୁଇ ଦେଶ ଏକ ନୂଆ ‘‘ଗୁରୁତ୍ୱପୂର୍ଣ୍ଣ ଓ ଆଧୁନିକ ପ୍ରଯୁକ୍ତି ପାଇଁ ପ୍ରୟାସ’’ ପ୍ରତିଷ୍ଠା କରିଛୁ । ଆମର ଜ୍ଞାନ ଭାଗିଦାରୀ ମାନବ ଜଗତର ସେବା କରିବ ଏବଂ ଜଳବାୟୁ ପରିବର୍ତ୍ତନ, କ୍ଷୁଧା ଓ ସ୍ୱାସ୍ଥ୍ୟର ବିଶ୍ୱସ୍ତରୀୟ ଆହ୍ୱାନର ମୁକାବିଲା ଲାଗି ସମାଧାନ ଖୋଜିବ ।

ବାଚସ୍ପତି ମହୋଦୟ, ସମ୍ମାନନୀୟ ସଦସ୍ୟଗଣ,

ବିଗତ କିଛି ବର୍ଷ ଗମ୍ଭୀର ବିଘଟନକାରୀ ବିକାଶର ସାକ୍ଷୀ ରହିଆସିଛି । ୟୁକ୍ରେନ୍‌ ଯୁଦ୍ଧ ସହିତ, ୟୁରୋପକୁ ଯୁଦ୍ଧ ଫେରିଛି । ଯଦ୍ଦ୍ୱାରା ଏହି କ୍ଷେତ୍ରରେ ଗମ୍ଭୀର ପୀଡ଼ା ଦେଖିବାକୁ ମିଳିଛି । ଏଥିରେ ମହାଶକ୍ତିମାନେ ସାମିଲ ହୋଇଥିବାରୁ, ପରିଣାମ ଭୟାବହ ହେବ । ଗ୍ଲୋବାଲ୍‌ ସାଉଥ୍‌ ଦେଶ ଏହାଦ୍ୱାରା ଅଧିକ ପ୍ରଭାବିତ ହୋଇଛନ୍ତି । ମିଳିତ ଜାତିସଂଘ ଚାର୍ଟର ସିଦ୍ଧାନ୍ତକୁ ସମ୍ମାନ, ବିବାଦଗୁଡ଼ିକର ଶାନ୍ତିପୂର୍ଣ୍ଣ ସମାଧାନ ଏବଂ ସାର୍ବଭୌମତ୍ୱ ଓ କ୍ଷେତ୍ରୀୟ ଅଖଣ୍ଡତାକୁ ସମ୍ମାନ ଉପରେ ବିଶ୍ୱ ବ୍ୟବସ୍ଥା ଆଧାରିତ ।

ପୂର୍ବରୁ ଯାହା ମୁଁ ପ୍ରତ୍ୟକ୍ଷ ଭାବେ ଏବଂ ସାର୍ବଜନୀନ ଭାବେ କହିସାରିଛି, ଏହା ଯୁଦ୍ଧର ସମୟ ନହେଁ ବରଂ ଆଲୋଚନା ଓ କୂଟନୀତି ମଧ୍ୟରୁ ଗୋଟିଏର ଯୁଗ । ଆଉ, ଆମ ସମସ୍ତଙ୍କୁ ରକ୍ତପାତ ଏବଂ ମାନବୀୟ ପୀଡ଼ା ରୋକିବା ପାଇଁ ସେସବୁ କରିବାକୁ ହେବ, ଯାହା ଆମେ କରିପାରିବା । ବାଚସ୍ପତି ମହୋଦୟ, ଚାପ ଓ ସଂଘର୍ଷର କଳା ବାଦଲ ଭାରତ ପ୍ରଶାନ୍ତ ମହାସାଗରୀର କ୍ଷେତ୍ରରେ ନିଜର କାୟା ବିସ୍ତାର କରୁଛି । କ୍ଷେତ୍ରୀୟ ସ୍ଥିରତା ଆମ ଭାଗିଦାରୀର ପ୍ରମୁଖ ଚିନ୍ତା ମଧ୍ୟରୁ ଅନ୍ୟତମ।

ଆମର ଏକ ସ୍ୱାଧୀନ, ମୁକ୍ତ ଏବଂ ସମାବେଶୀ ଭାରତ ପ୍ରଶାନ୍ତ ମହାସାଗରୀୟ କ୍ଷେତ୍ର ପାଇଁ ସହଭାଗୀ ଦୃଷ୍ଟିକୋଣ ରହିଛି, ଯାହା ସୁରକ୍ଷିତ ସମୁଦ୍ର ସହ ଯୋଡ଼ି ହୋଇ ରହିଥିବ, ଅନ୍ତର୍ଜାତୀୟ ଆଇନ ଦ୍ୱାରା ପରିଭାଷିତ ହୋଇଥିବ, ଆଧିପତ୍ୟରୁ ମୁକ୍ତ ଥିବ ଏବଂ ଆସିୟାନ୍‌ର କେନ୍ଦ୍ରୀୟତାରେ ରହିଥିବ । ଏପରି ଏକ କ୍ଷେତ୍ର ଯେଉଁଠି ସବୁ ଦେଶ, ଛୋଟ ହୁଅନ୍ତୁ ଅବା ବଡ଼, ନିଜ ପସନ୍ଦରେ ସ୍ୱାଧୀନ ଓ ଭୟମୁକ୍ତ ରହିବେ, ଯେଉଁଠି ପ୍ରଗତି ଋଣର ଅସମ୍ଭବ ବୋଝରେ ଚାପି ହେଉନଥିବ, ଯେଉଁଠି ରଣନୀତିକ ଉଦ୍ଦେଶ୍ୟ ପାଇଁ ଯୋଗାଯୋଗର ଲାଭ ନିଆଯାଉଥିବ, ଯେଉଁଠି ସବୁ ଦେଶ ସହଭାଗୀ ସମୃଦ୍ଧିର ଉଚ୍ଚଭାବନା ନେଇ ଉନ୍ନତି କରୁଥିବେ ।

ଆମର ଦୃଷ୍ଟିକୋଣ, ଅଟକାଇବା କିମ୍ବା ବହିଷ୍କାର କରିବା ଲାଗି ନୁହେଁ, ବରଂ ଶାନ୍ତି ଓ ସମୃଦ୍ଧିର ଏକ ସହଯୋଗୀ କ୍ଷେତ୍ର ନିର୍ମାଣ କରିବା ଉପରେ ଆଧାରିତ । ଆମେ କ୍ଷେତ୍ରୀୟ ପ୍ରତିଷ୍ଠାନ ସହିତ ଏବଂ କ୍ଷେତ୍ର ଭିତରେ ବାହାରେ ନିଜ ଭାଗିଦାରଙ୍କ ସହିତ କାମ କରିଥାଉ। ଏଥିମଧ୍ୟରେ କ୍ଷେତ୍ରୀୟ କଲ୍ୟାଣ ପାଇଁ କ୍ୱାଡ ଏକ ବଡ଼ ଶକ୍ତି ଭାବେ ମୁଣ୍ଡ ଟେକିଛି ।

ବାଚସ୍ପତି ମହୋଦୟ,

୯/୧୧ର ଦୁଇ ଦଶନ୍ଧିରୁ ଅଧିକ ସମୟ ପରେ ଏବଂ ମୁମ୍ବାଇରେ ୨୬/୧୧ର ଗୋଟିଏ ଦଶନ୍ଧିରୁ ଅଧିକ ସମୟ ପରେ ମଧ୍ୟ ଆତଙ୍କବାଦ ଓ ଉଗ୍ରବାଦ ସାରା ବିଶ୍ୱ ପାଇଁ ଏକ ଗମ୍ଭୀର ବିପଦ ଭାବେ ଜାରି ରହିଛି। ଏହି ବିଚାରଧାରା ନୂଆ ନୂଆ ରୂପ ଏବଂ ପରିଚୟ ଗ୍ରହଣ କରିଛି, କିନ୍ତୁ ଏହାର ଉଦ୍ଦେଶ୍ୟ ସମାନ ରହିଛି। ଆତଙ୍କବାଦ ମାନବତା ଶତ୍ରୁ ଏବଂ ଏହାର ମୁକାବିଲା କ୍ଷେତ୍ରରେ କୌଣସି କିନ୍ତୁ-ଯଦି ରହିପାରିବ ନାହିଁ । ଆମକୁ ଆତଙ୍କବାଦକୁ ପ୍ରାୟୋଜିତ କରୁଥିବା ଓ ପ୍ରସାରିତ କରୁଥିବା ଶକ୍ତି ଉପରେ ନିୟନ୍ତ୍ରଣ ହାସଲ କରିବାକୁ ହେବ।

ବାଚସ୍ପତି ମହୋଦୟ,

କୋଭିଡ-୧୯ର ସବୁଠୁ ବଡ଼ ପ୍ରଭାବ ହେଉଛି ଏହି କାରଣରୁ ହୋଇଥିବା ମାନବୀୟ କ୍ଷତି ଏବଂ ଯନ୍ତ୍ରଣା। ମୁଁ କଂଗ୍ରେସ ସଦସ୍ୟ ରନ୍‌ ରାଇଟ୍‌ ଏବଂ ସେହି ସଦସ୍ୟମାନଙ୍କୁ ସ୍ମରଣ କରିବାକୁ ଚାହୁଁଛି ଯେଉଁମାନେ କୋଭିଡ୍‌ରେ ନିଜର ପ୍ରାଣ ହରାଇଥିଲେ। ଆମେ ମହାମାରୀରୁ ବାହାରକୁ ଆସିବା ସମୟରେ, ଆମକୁ ଏକ ନୂଆ ବ୍ୟବସ୍ଥାକୁ ଆକାର ଦେବାକୁ ହେବ । ବିଚାର-ବିମର୍ଶ, ଆପୋସ ସଦ୍‌ଭାବ ଓ ଚିନ୍ତା ବର୍ତ୍ତମାନ ସମୟର ଆବଶ୍ୟକତା। ଗ୍ଲୋବାଲ୍‌ ସାଉଥ୍‌ (ଅବିକଶିତ ତୃତୀୟ ବିଶ୍ୱ ଦେଶ ସମୂହ) ସହ ଯୋଡ଼ି ହେବା ହିଁ ଆଗକୁ ବଢ଼ିବାର ମାର୍ଗ । ସେଥିପାଇଁ ମୋର ଦୃଢ଼ ବିଶ୍ୱାସ ରହିଛି ଯେ ଆଫ୍ରିକୀୟ ସଂଘକୁ ଜି-୨୦ର ପୂର୍ଣ୍ଣ ସଦସ୍ୟତା ଦିଆଯିବା ଉଚିତ୍‌।

ଆମେ ବହୁପକ୍ଷବାଦକୁ ପୁନର୍ଜୀବିତ କରିବା ଆବଶ୍ୟକ ଏବଂ ଉନ୍ନତ ସମ୍ବଳ ଓ ପ୍ରତିନିଧିତ୍ୱ ସହିତ ବହୁପକ୍ଷୀୟ ପ୍ରତିଷ୍ଠାନରେ ସଂସ୍କାର ଆଣିବା ଉଚିତ୍‌ । ଏହା ଆମର ସବୁ ବୈଷୟିକ ପ୍ରଶାସନିକ ସଂସ୍ଥା, ବିଶେଷ କରି ମିଳିତ ଜାତିସଂଘ ଉପରେ ଲାଗୁ ହୋଇଥାଏ। ଯେତେବେଳେ ଦୁନିଆ ବଦଳିଛି, ଆମ ସଂସ୍ଥାଗୁଡ଼ିକ ମଧ୍ୟ ବଦଳିବା ଉଚିତ୍‌ । ନଚେତ୍‌ ନିୟମ ବିନା ପ୍ରତିଦ୍ୱନ୍ଦ୍ୱିତା ହେଲେ ବିଶ୍ୱ ପ୍ରତି ବିପଦ ଦେଖା ଦେବ। ଅନ୍ତର୍ଜାତୀୟ ଆଇନ ଉପରେ ଆଧାରିତ ଏକ ନୂଆ ବିଶ୍ୱ ବ୍ୟବସ୍ଥା ପାଇଁ କାମ କରିବାରେ, ଆମ ଦୁଇ ଦେଶ ଭାଗିଦାର ରୂପରେ ସବୁଠୁ ଆଗରେ ରହିବେ ।
ବାଚସ୍ପତି ମହୋଦୟ ଏବଂ ଏବଂ ବିଶିଷ୍ଟ ଅତିଥିଗଣ,

ଆଜି ଆମ ସମ୍ପର୍କରେ ଏକ ନୂଆ ସକାଳ ଆସିଛି ଯାହାକି ଆମ ଦୁଇ ଦେଶର ଭାଗ୍ୟକୁ ସାକାର ରୂପ ଦେବ ନାହିଁ, ବରଂ ଦୁନିଆର ଭାଗ୍ୟ ମଧ୍ୟ ବଦଳାଇ ଦେବ । ଯୁବ ଆମେରିକୀୟ କବି ଅମାଣ୍ଡା ଗୋର୍ମାନ୍‌ ଯଥାର୍ଥ ଭାବେ ଲେଖିଛନ୍ତି :

‘‘ଯେବେ ଦିନ ଆସେ ଆମେ ଅନ୍ଧକାରରୁ ବାହାରିଥାଉ,

ପ୍ରଜ୍ଜ୍ୱଳିତ ଏବଂ ସାହସୀ ହୋଇ,

ଆମେ ଏଥିରୁ ମୁକ୍ତ ହେବା ମାତ୍ରେ ଏକ ନୂଆ ସକାଳ ଆସେ

ଯେହେତୁ ସେଠାରେ ସବୁବେଳେ ଆଲୋକ ରହିଛି,

ଏହାକୁ ଅନୁଭବ କରିବା ଲାଗି ଆମର ଯଥେଷ୍ଟ ସାହସ ଥାଆନ୍ତା କି।’’

ଆମର ବିଶ୍ୱସନୀୟ ଭାଗିଦାରୀ ଏହି ନୂଆ ସକାଳରେ ସୂର୍ଯ୍ୟ ଭଳି ଅଟେ ଯାହା ଚତୁର୍ଦ୍ଦିଗରେ ଆଲୋକ ଖେଳାଇ ଦେବ ।

ମୁଁ ଲେଖିଥିବା ଏକ କବିତା ଏବେ ମୋର ମନେ ପଡ଼ୁଛି :

ଆକାଶରେ ମୁଣ୍ଡ ଉଠାଇ

ଘନ ବାଦଲକୁ ଚିରି

ଆଲୋକର ସଂକଳ୍ପ ନେବା

ଏବେ ତ’ ସୂର୍ଯ୍ୟ ଉଇଁଛି ।

ଦୃଢ଼ ସଂକଳ୍ପ ସହିତ

ସବୁ ସଂକଟକୁ ପାର୍‌ କରି

ଘନ ଅନ୍ଧକାରକୁ ଦୂରେବା

ଏବେ ତ’ ସୂର୍ଯ୍ୟ ଉଇଁଛି ।।

ବାଚସ୍ପତି ମହୋଦୟ ଏବଂ ସମ୍ମାନନୀୟ ଅତିଥିଗଣ,

ଆମେ ସମସ୍ତେ ଭିନ୍ନ ଭିନ୍ନ ପରିସ୍ଥିତି ଏବଂ ଇତିହାସରୁ ଆସିଛୁ, କିନ୍ତୁ ଆମେ ଗୋଟିଏ ସଂକଳ୍ପ ଏବଂ ସମାନ ଭାଗ୍ୟ ନେଇ ଏକାଠି ଆଗକୁ ବଢ଼ୁଛୁ । ଆମର ଭାଗିଦାରୀ ଆଗକୁ ବଢ଼ିଲେ, ଆର୍ଥିକ ସହନଶୀଳତା ବଢ଼ିଥାଏ, ନବସୃଜନ ବଢ଼ିଥାଏ, ବିଜ୍ଞାନର ପ୍ରସାର ହୋଇଥାଏ, ଜ୍ଞାନ ଆଗକୁ ବଢ଼ିଥାଏ, ମାନବ ଜାତିକୁ ଲାଭ ମିଳିଥାଏ, ଆମ ସମୁଦ୍ର ଏବଂ ଆକାଶ ସୁରକ୍ଷିତ ରହିଥାଏ, ଏହାଦ୍ୱାରା ଗଣତନ୍ତ୍ର ଉଜ୍ଜ୍ୱଳ ହେବ ଏବଂ ବିଶ୍ୱ ରହିବା ପାଇଁ ଏକ ଉନ୍ନତ ସ୍ଥାନ ହୋଇପାରିବ ।

ଏହା ହିଁ ଆମ ଭାଗିଦାରୀର ଲକ୍ଷ୍ୟ। ଚଳିତ ଶତାବ୍ଦୀ ପାଇଁ ଏହା ହିଁ ଆମ ଆହ୍ୱାନ । ବାଚସ୍ପତି ମହୋଦୟ ଏବଂ ସମ୍ମାନନୀୟ ସଦସ୍ୟଗଣ, ଆମ ଭାଗିଦାରୀର ଉଚ୍ଚ ମାନକ ଦୃଷ୍ଟିରୁ ମଧ୍ୟ, ଏହି ଗସ୍ତ ଏକ ମହାନ ସକାରାତ୍ମକ ପରିବର୍ତ୍ତନ ମଧ୍ୟରୁ ଅନ୍ୟତମ । ସାଥୀ ହୋଇ ଆମେ ଏହା ପ୍ରଦର୍ଶିତ କରିବା ଯେ ଗଣତନ୍ତ୍ରର ମୂଲ୍ୟ ରହିଛି ଏବଂ ଗଣତନ୍ତ୍ର ହିଁ ପରିଣାମ ଦେଇଥାଏ। ମୁଁ ଭାରତ-ଆମେରିକା ଭାଗିଦାରୀ ପାଇଁ ଆପଣଙ୍କ ନିରନ୍ତର ସମର୍ଥନ ଉପରେ ଭରସା କରୁଛି ।

ଯେତେବେଳେ ମୁଁ ୨୦୧୬ରେ ଏଠାକୁ ଆସିଥିଲି, ମୁଁ କହିଥିଲି ଯେ, ‘‘ଆମ ସମ୍ପର୍କ ଏକ ମହତ୍ୱପୂର୍ଣ୍ଣ ଭବିଷ୍ୟତ ପାଇଁ ପ୍ରସ୍ତୁତ ରହିଛି ।’’ ଆଜି ହିଁ ସେହି ଭବିଷ୍ୟତ ଆସିଛି । ଏହି ସମ୍ମାନ ପାଇଁ ମୁଁ ପୁଣିଥରେ ବାଚସ୍ପତି ମହୋଦୟ, ଉପରାଷ୍ଟ୍ରପତି ମହୋଦୟା ଏବଂ ସମ୍ମାନନୀୟ ସଦସ୍ୟମାନଙ୍କୁ ଧନ୍ୟବାଦ ଜଣାଇବାକୁ ଚାହୁଁଛି ।

ଈଶ୍ୱର ଆମେରିକାର ମଙ୍ଗଳ କରନ୍ତୁ ।

ଜୟ ହିନ୍ଦ।

ଭାରତ-ଆମେରିକା ବନ୍ଧୁତା ଜିନ୍ଦାବାଦ୍‌।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭିଡିଓ ବାର୍ତ୍ତା ଜରିଆରେ ପୁଣେରେ ଅନୁଷ୍ଠିତ ଜି -୨୦ ଶିକ୍ଷା ମନ୍ତ୍ରୀଙ୍କ ବୈଠକକୁ ସମ୍ବୋଧିତ କରିଛନ୍ତି।

ଏହି ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଛନ୍ତି ଯେ ଶିକ୍ଷା କେବଳ ଆମର ମୂଳଦୁଆ ନୁହେଁ, ଏହା ଭବିଷ୍ୟତର ମାନବିକତା ପାଇଁ ମଧ୍ୟ ଆୟୁଦ୍ଧ ଅଟେ। ପ୍ରଧାନମନ୍ତ୍ରୀ ଶିକ୍ଷା ମନ୍ତ୍ରୀମାନଙ୍କୁ ଶେରପା ବୋଲି କହିଥିଲେ ଏବଂ ସମସ୍ତଙ୍କ ବିକାଶ, ଶାନ୍ତି ଏବଂ ସମୃଦ୍ଧି ପାଇଁ ସେମାନେ ମାନବଜାତିର ନେତୃତ୍ୱ ନେଉଛନ୍ତି ବୋଲି ଉଲ୍ଲେଖ କରିଥିଲେ। ଶ୍ରୀ ମୋଦୀ ଆଲୋକପାତ କରି କହିଛନ୍ତି ଯେ ଭାରତୀୟ ଶାସ୍ତ୍ରଗୁଡ଼ିକ ଉଲ୍ଲେଖ କରିଛନ୍ତି ଯେ ଖୁସି ପାଇବାର ଏକ ମାତ୍ର ଚାବିକାଠି ହେଉଛି ଶିକ୍ଷା। ଏକ ସଂସ୍କୃତ ଶ୍ଲୋକ ପଢିବାର ଅର୍ଥ ହେଉଛି ‘ପ୍ରକୃତ ଜ୍ଞାନ ନମ୍ରତା ପ୍ରଦାନ କରେ, ନମ୍ରତା ଠାରୁ ମୂଲ୍ୟବୋଧ, ମୂଲ୍ୟବୋଧରୁ ଧନ ପ୍ରାପ୍ତ ହୁଏ, ଧନ ଜଣେ ବ୍ୟକ୍ତିକୁ ଭଲ କାର୍ଯ୍ୟ କରିବାକୁ ସକ୍ଷମ କରେ ଏବଂ ଏହା ହିଁ ଆନନ୍ଦ ଆଣିଥାଏ’ ବୋଲି ଉଲ୍ଲେଖକରି ପ୍ରଧାନମନ୍ତ୍ରୀ କହିଛନ୍ତି ଯେ ଭାରତ ଏ କ୍ଷେତ୍ରରେ ସାମଗ୍ରିକ ଏବଂ ବିସ୍ତୃତ ଯାତ୍ରା ଆରମ୍ଭ କରିଛି। ଶ୍ରୀ ମୋଦୀ ଗୁରୁତ୍ୱାରୋପ କରିଛନ୍ତି ଯେ ମୂଳଦୂଆର ସାକ୍ଷରତା ଯୁବପିଢୀ ପାଇଁ ଏକ ଦୃଢ ଆଧାର ଅଟେ ଏବଂ ଭାରତ ଏହାକୁ ଜ୍ଞାନକୌଶଳ ସହିତ ସମ୍ମିଶ୍ରଣ କରୁଛି। ସେ “ନେସନାଲ ଇନିସିଏଟିଭ ଫର ପ୍ରଫିସିଏନ୍ସି ଇନ୍‍ ରିଡିଂ ୱିଥ୍‍ ଅଣ୍ଡରଷ୍ଟାଣ୍ଡିଂ ଆଣ୍ଡ ନ୍ୟୁମେରେସି” କିମ୍ବା ସରକାରଙ୍କ “ନିପୁଣ ଭାରତ” ପଦକ୍ଷେପ ଆଲୋକପାତ କରି ଖୁସି ବ୍ୟକ୍ତ କରିଛନ୍ତି ଯେ “ମୌଳିକ ଶିକ୍ଷା ଏବଂ ସଂଖ୍ୟା” ମଧ୍ୟ ଜି୨୦ ଦ୍ୱାରା ପ୍ରାଥମିକତା ଭାବରେ ଚିହ୍ନଟ ହୋଇଛି। ୨୦୩୦ ସୁଦ୍ଧା ଏକ ର୍ନିଦ୍ଦିଷ୍ଟ ସମୟ ମଧ୍ୟରେ ଏହା ଉପରେ କାର୍ଯ୍ୟ କରିବାକୁ ସେ ଗୁରୁତ୍ୱାରୋପ କରିଥିଲେ।

ନୂତନ ଇ-ଶିକ୍ଷାକୁ ଅଭିନବ ଭାବରେ ଗ୍ରହଣ ଏବଂ ବ୍ୟବହାର କରିବାର ଆବଶ୍ୟକତା ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି ଏବଂ ଉନ୍ନତ ଶାସନ ସହିତ ଗୁଣାତ୍ମକ ଶିକ୍ଷା ପ୍ରଦାନ କରିବା ଉଦ୍ଦେଶ୍ୟ ବୋଲି ସେ କହିଛନ୍ତି। ସେ ଏ ଦିଗରେ ସରକାର ନେଇଥିବା ଅନେକ ପଦକ୍ଷେପ ଉପରେ ଆଲୋକପାତ କରିଥିଲେ ଏବଂ ‘ଯୁବ ଆଙ୍କାକ୍ଷୀ ମାନସିକତା ପାଇଁ ଷ୍ଟଡି ୱେବ୍ସ ଅଫ୍‍ ଆକ୍ଟିଭ୍‌-ଲର୍ନିଙ୍ଗ୍‌’ କିମ୍ବା ‘ସ୍ୱୟମ’ ନାମକ ଏକ ଅନଲାଇନ୍ ପ୍ଲାଟଫର୍ମ ବିଷୟରେ ଉଲ୍ଲେଖ କରିଥିଲେ ଯାହା ୯ମ ଶ୍ରେଣୀରୁ ସ୍ନାତକୋତ୍ତର ସ୍ତର ପର୍ଯ୍ୟନ୍ତ ସମସ୍ତ ପାଠ୍ୟକ୍ରମ ଆୟୋଜନ ଏବଂ ସକ୍ଷମ କରିଥାଏ ଏବଂ ରିମୋଟ୍‍ ଜରିଆରେ ପାଠପଢା ସହିତ ଗ୍ରହଣୀୟତା, ସମାନତା ଏବଂ ଗୁଣବତ୍ତା ଉପରେ ଧ୍ୟାନ ଦେଇଥାଏ। ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ, ୩୪ ମିଲିୟନରୁ ଅଧିକ ନାମଲେଖା ଏବଂ ୯୦୦୦ ରୁ ଅଧିକ ପାଠ୍ୟକ୍ରମ ସହିତ ଏହା ଏକ ପ୍ରଭାବଶାଳୀ ଶିକ୍ଷଣ ଉପକରଣ ହୋଇପାରିଛି। ସେ ଆହୁରି ମଧ୍ୟ କହିଛନ୍ତି ଯେ ଜ୍ଞାନ ବାଣ୍ଟିବା ପାଇଁ ଡିଜିଟାଲ୍ ଭିତ୍ତିଭୂମି କିମ୍ବା “ଦୀକ୍ଷା ପୋର୍ଟାଲ୍‌” ଯାହା ଦୂରନିରନ୍ତର ଶିକ୍ଷା ମାଧ୍ୟମରେ ବିଦ୍ୟାଳୟ ଶିକ୍ଷା ପ୍ରଦାନ କରିବାକୁ ଲକ୍ଷ୍ୟ ରଖିଛି। ଶ୍ରୀ ମୋଦୀ ସୂଚନା ଦେଇଛନ୍ତି ଯେ ଏହା ୨୯ ଟି ଭାରତୀୟ ଏବଂ ୭ ଟି ବିଦେଶୀ ଭାଷାରେ ଶିକ୍ଷାକୁ ସମର୍ଥନ କରେ ଏବଂ ଏପର୍ଯ୍ୟନ୍ତ ୧୩୭ ମିଲିୟନରୁ ଅଧିକ ପାଠ୍ୟକ୍ରମ ସମାପ୍ତ ହୋଇଛି। ଶ୍ରୀ ମୋଦୀ ଏହା ମଧ୍ୟ ସୂଚାଇ ଦେଇଛନ୍ତି ଯେ ଗ୍ଲୋବାଲ ସାଉଥରେ ଥିବା ଲୋକଙ୍କ ସହ ଏହି ଅଭିଜ୍ଞତା ଏବଂ ସମ୍ବଳ ସେୟାର କରି କରି ଭାରତ ଖୁସି ହେବ।

କ୍ରମାଗତ ଭାବରେ ଦକ୍ଷ, ପୁନଃ ଦକ୍ଷ ଏବଂ ଅଧିକ ଦକ୍ଷ କରି ଆମର ଯୁବକମାନଙ୍କୁ ଭବିଷ୍ୟତ ପାଇଁ ପ୍ରସ୍ତୁତ କରିବାର ଆବଶ୍ୟକତା ଉପରେ ଆଲୋକପାତ କରି ପ୍ରଧାନମନ୍ତ୍ରୀ କାର୍ଯ୍ୟ ବିବରଣୀ ଏବଂ ଅଭ୍ୟାସଗୁଡ଼ିକର ବିକାଶ ସହିତ ସେମାନଙ୍କର ଦକ୍ଷତାକୁ ସମାନ କରିବା ଉପରେ ଗୁରୁତ୍ୱାରୋପ କରିଥିଲେ। ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଯେ ଭାରତରେ ଆମେ ଏହି ଦକ୍ଷତା ମ୍ୟାପିଂ କରୁଛୁ ଯେଉଁଠାରେ ଶିକ୍ଷା, ଦକ୍ଷତା ଏବଂ ଶ୍ରମ ମନ୍ତ୍ରଣାଳୟ ଏହି ପଦକ୍ଷେପ ନେଇ କାର୍ଯ୍ୟ କରୁଛନ୍ତି। ଶ୍ରୀ ମୋଦୀ ଏହା ମଧ୍ୟ ପରାମର୍ଶ ଦେଇଛନ୍ତି ଯେ ଜି -୨୦ ଦେଶ ବିଶ୍ୱ ସ୍ତରରେ ଦକ୍ଷତା ଆକଳନ କରିପାରିବେ ଏବଂ ଏହାକୁ କାର୍ଯ୍ୟକାରୀ କରିବା ପାଇଁ ଆବଶ୍ୟକ କରୁଥିବା ପାର୍ଥକ୍ୟଗୁଡିକ ଖୋଜି ପାରିବେ।

ଡିଜିଟାଲ ଜ୍ଞାନକୌଶଳ ଏକ ସମାନତାକାରୀ ଭାବରେ କାର୍ଯ୍ୟ କରିଥାଏ ଏବଂ ଅନ୍ତର୍ଭୂକ୍ତିକୁ ପ୍ରୋତ୍ସାହିତ କରେ ବୋଲି ପ୍ରଧାନମନ୍ତ୍ରୀ ମନ୍ତବ୍ୟ ଦେଇଛନ୍ତି। ସେ କହିଛନ୍ତି ଯେ ଶିକ୍ଷାକୁ ବୃଦ୍ଧି ତଥା ଭବିଷ୍ୟତର ଆବଶ୍ୟକତା ସହ ଖାପ ଖୁଆଇବା ପାଇଁ ଏହା ଏକ ଶକ୍ତି। ସେ କୃତ୍ରିମ ବୁଦ୍ଧିମତାର ସମ୍ଭାବନା ଉପରେ ମଧ୍ୟ ମତ ରଖିଥିଲେ ଯାହା ଶିକ୍ଷା, ଦକ୍ଷତା ଏବଂ ଶିକ୍ଷା କ୍ଷେତ୍ରରେ ବହୁତ ସମ୍ଭାବନା ପ୍ରଦାନ କରିଥାଏ। ଜ୍ଞାନକୌଶଳ ଦ୍ୱାରା ସୃଷ୍ଟି ହୋଇଥିବା ସୁଯୋଗ ଏବଂ ଆହ୍ୱାନ ମଧ୍ୟରେ ସଠିକ୍ ସନ୍ତୁଳନ ସୃଷ୍ଟି କରିବାରେ ସେ ଜି -୨୦ ର ଭୂମିକା ଉପରେ ମଧ୍ୟ ଗୁରୁତ୍ୱାରୋପ କରିଥିଲେ।

ଅନୁସନ୍ଧାନ ଏବଂ ନବସୃଜନ ଉପରେ ଗୁରୁତ୍ୱ ଦିଆଯାଇଥିବା ଉପରେ ପ୍ରଧାନମନ୍ତ୍ରୀ ଆଲୋକପାତ କରି କହିଛନ୍ତି ଯେ ଭାରତ ସାରା ଦେଶରେ ଦଶ ହଜାର “ଅଟଳ ଟିଙ୍କରିଂ ଲ୍ୟାବ” ପ୍ରତିଷ୍ଠା କରିଛି ଯାହା ଆମ ସ୍କୁଲ ପିଲାମାନଙ୍କ ପାଇଁ ଅନୁସନ୍ଧାନ ଏବଂ ନବସୃଜନ ନର୍ସରୀ ଭାବରେ କାର୍ଯ୍ୟ କରୁଛି। ସେ ସୂଚନା ଦେଇଛନ୍ତି ଯେ ୭.୫ ମିଲିୟନରୁ ଅଧିକ ଛାତ୍ରଛାତ୍ରୀ ଏହି ଲ୍ୟାବରେ ୧.୨ ମିଲିୟନରୁ ଅଧିକ ଅଭିନବ ପ୍ରକଳ୍ପରେ କାର୍ଯ୍ୟ କରୁଛନ୍ତି। ପ୍ରଧାନମନ୍ତ୍ରୀ ଜୋର ଦେଇଛନ୍ତି ଯେ ଜି୨୦ ଦେଶଗୁଡିକ ନିଜସ୍ୱ ଶକ୍ତି ସହିତ ଗବେଷଣା ଏବଂ ନବସୃଜନକୁ ପ୍ରୋତ୍ସାହିତ କରିବାରେ ବିଶେଷ ଭୂମିକା ଗ୍ରହଣ କରିପାରନ୍ତି, ବିଶେଷ କରି ଗ୍ଲୋବାଲ ସାଉଥରେ। ଅନୁସନ୍ଧାନ ସହଯୋଗ ବୃଦ୍ଧି ପାଇଁ ଏକ ପଥ ସୃଷ୍ଟି କରିବାକୁ ସେ ମାନ୍ୟଗଣ୍ୟ ବ୍ୟକ୍ତିଙ୍କୁ ଅନୁରୋଧ କରିଥିଲେ।

ଆମର ଶିଶୁ ଏବଂ ଯୁବକଙ୍କ ଭବିଷ୍ୟତ ଦିଗରେ ଜି -୨୦ ଶିକ୍ଷା ମନ୍ତ୍ରୀଙ୍କ ବୈଠକର ମହତ୍ୱକୁ ଦର୍ଶାଇ ପ୍ରଧାନମନ୍ତ୍ରୀ ଖୁସି ବ୍ୟକ୍ତ କରିଛନ୍ତି ଯେ ସ୍ଥାୟୀ ବିକାଶ ଲକ୍ଷ୍ୟ ହାସଲ ପାଇଁ ତ୍ୱରାନ୍ୱିତତକାରୀ ଗୋଷ୍ଠୀ ସବୁଜ ପରିବର୍ତ୍ତନ, ଡିଜିଟାଲ ପରିବର୍ତ୍ତନ ଏବଂ ମହିଳା ସଶକ୍ତିକରଣକୁ ତ୍ୱରାନ୍ୱିତକାରୀ ଭାବରେ ଚିହ୍ନଟ କରିଛନ୍ତି। ଏହି ସବୁ ପ୍ରୟାସର ମୂଳରେ ଶିକ୍ଷା ବୋଲି ଉଲ୍ଲେଖକରି ପ୍ରଧାନମନ୍ତ୍ରୀ କହିଛନ୍ତି ଯେ ବୈଠକର ଫଳାଫଳ ଏକ ଅନ୍ତର୍ଭୂକ୍ତ, କାର୍ଯ୍ୟ-ଆଧାରିତ ଏବଂ ଭବିଷ୍ୟତ-ପ୍ରସ୍ତୁତ ଶିକ୍ଷା ଏଜେଣ୍ଡା ହେବ। ପ୍ରଧାନମନ୍ତ୍ରୀ କହିଛନ୍ତି, ଏହା ବସୁଧୈବ କୁଟୁମ୍ବକମ୍ – ଗୋଟିଏ ପୃଥିବୀ, ଗୋଟିଏ ପରିବାର, ଗୋଟିଏ ଭବିଷ୍ୟତ ର ପ୍ରକୃତ ଆବେଗରେ ସମଗ୍ର ବିଶ୍ୱର ଲାଭ କରିବ ବୋଲି କହି ପ୍ରଧାନମନ୍ତ୍ରୀ ତାଙ୍କ ଅଭିଭାଷଣ ଶେଷ କରିଥିଲେ।

ନ୍ୟୁୟର୍କ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୧ ଜୁନ, ୨୦୨୩ରେ ଆମେରିକାର ନ୍ୟୁୟର୍କ ସହରସ୍ଥିତ ମିଳିତ ଜାତିସଂଘ ମୁଖ୍ୟାଳୟରେ ଥିବା ନର୍ଥ ଲନ୍‌ରେ ଆୟୋଜିତ ଅନ୍ତର୍ଜାତୀୟ ଯୋଗ ଦିବସ ସମାରୋହରେ ନେତୃତ୍ୱ ନେଇଥିଲେ।

ଚଳିତ ବର୍ଷ ଯୋଗ ଦିବସର ବିଷୟବସ୍ତୁ ‘ବସୁଧୈବ କୁଟୁମ୍ବକମ୍‌ ପାଇଁ ଯୋଗ’ ରଖାଯାଇଛି। ‘‘ବସୁଧୈବ କୁଟୁମ୍ବକମ୍‌’’ ବା ‘‘ଏକ ପୃଥିବୀ-ଏକ ପରିବାର – ଏକ ଭବିଷ୍ୟତ।’’

ଏହି କାର୍ଯ୍ୟକ୍ରମରେ ୧୩୫ରୁ ଅଧିକ ଦେଶର ହଜାର ହଜାର ଲୋକ ଅତି ଆଗ୍ରହର ସହିତ ସାମିଲ ହୋଇ ଯୋଗ ପ୍ରତି ନିଜର ସମର୍ଥନ ଜଣାଇଥିଲେ। ଏଠାରେ ଆୟୋଜିତ ଗୋଟିଏ ଯୋଗ ଅଧିବେଶନରେ ସର୍ବାଧିକ ସଂଖ୍ୟକ ଦେଶର ଲୋକମାନେ ଅଂଶଗ୍ରହଣ କରିବା ଦ୍ୱାରା ଗିନିଜ୍‌ ୱାର୍ଲ୍ଡ ରେକର୍ଡ ପ୍ରତିଷ୍ଠା ହୋଇଥିଲା। ଏହି ଅବସରରେ ମିଳିତ ଜାତସସଂଘ ମହାସଚିବ ଆଣ୍ଟୋନିଓ ଗୁଟେରେସଙ୍କ ଏକ ଭିଡ଼ିଓ ବାର୍ତ୍ତା ମଧ୍ୟ ପ୍ରସାରଣ କରାଯାଇଥିଲା।

ଏହି କାର୍ଯ୍ୟକ୍ରମରେ ୭୭ତମ ମିଳିତ ଜାତିସଂଘ ମହାସଭାର ଅଧ୍ୟକ୍ଷ ସାବା କୋରୋସୀ, ନ୍ୟୁୟର୍କ ସିଟୀର ମେୟର ଏରିକ୍‌ ଆଡାମ୍ସ, ମିଳିତ ଜାତିସଂଘର ଉପମହାସଚିବ ଏବଂ ମିଳିତ ଜାତିସଂଘ ଦୀର୍ଘସ୍ଥାୟୀ ବିକାଶ ଗୋଷ୍ଠୀର ଅଧ୍ୟକ୍ଷ ସୁଶ୍ରୀ ଅମିନା ଜେ. ମହମ୍ମଦଙ୍କ ସମେତ ବହୁ ବିଶିଷ୍ଟ ମାନ୍ୟଗଣ୍ୟ ବ୍ୟକ୍ତିବିଶେଷମାନେ ଅଂଶଗ୍ରହଣ କରିଥିଲେ। ସେହିପରି ସମାଜର ସବୁ ବର୍ଗର ପ୍ରମୁଖ ବ୍ୟକ୍ତିବିଶେଷ – କୂଟନୀତିଜ୍ଞ, ଅଧିକାରୀ, ଶିକ୍ଷାବିତ୍‌, ସ୍ୱାସ୍ଥ୍ୟ ପେସାଦାର, ପ୍ରଯୁକ୍ତିବିତ୍‌, ଉଦ୍ୟୋଗ ଜଗତର ବିଶିଷ୍ଟ ବ୍ୟକ୍ତିବିଶେଷ, ଗଣମାଧ୍ୟମ ବ୍ୟକ୍ତିବିଶେଷ, କଳାକାର, ଆଧ୍ୟାତ୍ମିକ ଗୁରୁ ଏବଂ ଯୋଗ ସାଧକମାନେ ଅଂଶଗ୍ରହଣ କରିଥିଲେ।

ଯୋଗ ଅଧିବେଶନ ପୂର୍ବରୁ, ପ୍ରଧାନମନ୍ତ୍ରୀ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ପୁଷ୍ପାଞ୍ଜଳି ଅର୍ପଣ କରିଥିଲେ ଯାହାକୁ ଡିସେମ୍ବର ୨୦୨୨ରେ ଭାରତର ମିଳିତ ଜାତିସଂଘ ସୁରକ୍ଷା ପରିଷଦର ଅଧ୍ୟକ୍ଷତା ସମୟରେ ଉଦଘାଟନ କରାଯାଇଥିଲା। ଏହାପରେ ପ୍ରଧାନମନ୍ତ୍ରୀ ନର୍ଥ ଲନ୍‌ ଠାରେ ଥିବା ପିସ୍‌ କିପିଂ ମେମୋରିଆଲରେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆମେରିକାରେ ପହଞ୍ଚିଛନ୍ତି। ନ୍ୟୁୟର୍କର ଜେକେଏଫ୍ ବିମାନବନ୍ଦରରେ ପ୍ରଧାନମନ୍ତ୍ରୀ ମୋଦୀଙ୍କୁ ସ୍ୱାଗତ କରାଯାଇଛି। ଜୁନ୍ ୨୩ ତାରିଖ ପର୍ଯ୍ୟନ୍ତ ପ୍ରଧାନମନ୍ତ୍ରୀ ଏହି ଗୁରୁତ୍ୱପୂର୍ଣ୍ଣ ଗସ୍ତରେ ରହିବେ। ଏହି ସମୟରେ ପ୍ରଧାନମନ୍ତ୍ରୀ ଜାତିସଂଘରେ ଯୋଗ ଦିବସ କାର୍ଯ୍ୟକ୍ରମରେ ଅଂଶଗ୍ରହଣ କରିବା ସହିତ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ସହ ରାତ୍ରୀ ଭୋଜନ କରିବେ। ଆସନ୍ତୁ ଜାଣିବା ପ୍ରଧାନମନ୍ତ୍ରୀ ମୋଦୀଙ୍କ ଆମେରିକା ଗସ୍ତର ସମ୍ପୂର୍ଣ୍ଣ କାର୍ଯ୍ୟସୂଚୀ…

ଆମେରିକାର ରାଷ୍ଟ୍ରପତି ଜୋ ବାଇଡେନ ଏବଂ ପ୍ରଥମ ଲେଡି ଜିଲ ବାଇଡେନଙ୍କ ନିମନ୍ତ୍ରଣରେ ପ୍ରଧାନମନ୍ତ୍ରୀ ଆମେରିକାରେ ପହଞ୍ଚିଛନ୍ତି। ପ୍ରଧାନମନ୍ତ୍ରୀଙ୍କ ଗସ୍ତ ସମ୍ପର୍କରେ ଆମେରିକାର ଏନଏସସି ସଂଯୋଜକ ଷ୍ଟ୍ରାଟେଜିକ୍ କୋର୍ଡିନେଟର ଜନ୍ କିର୍ବି କହିଛନ୍ତି ଯେ, ଏହି ଗସ୍ତ ଆମ ଦୁଇ ଦେଶ ମଧ୍ୟରେ ଥିବା ମଜବୁତ ସମ୍ପର୍କକୁ ନିଶ୍ଚିତ କରିବ ଏବଂ ଆମର ରଣନୀତିକ ସହଭାଗିତାକୁ ଆହୁରି ଆଗକୁ ବଢାଇବ। ଭାରତୀୟମାନଙ୍କ ସହିତ, ଆମେ ଏକ ସୁରକ୍ଷିତ ଏବଂ ସମୃଦ୍ଧ ଇଣ୍ଡୋ-ପାସିଫିକ୍ କ୍ଷେତ୍ରରେ ବିଶ୍ୱାସ କରୁ, ତେଣୁ ଆମର ପ୍ରତିରକ୍ଷା ସହଯୋଗରେ ଉନ୍ନତି ଆଣିବାର ଆବଶ୍ୟକତା ଅଛି।

ପ୍ରଧାନମନ୍ତ୍ରୀ ମୋଦୀଙ୍କ ଆମେରିକା ଗସ୍ତ:

ପ୍ରଧାନମନ୍ତ୍ରୀ ମୋଦୀ ୨୦ ତାରିଖରୁ ଜୁନ୍ ୨୫ ତାରିଖ ମଧ୍ୟରେ ଆମେରିକା ଏବଂ ଇଜିପ୍ଟ ଗସ୍ତରେ ଯାଇଛନ୍ତି। ନ୍ୟୁୟର୍କରେ ମିଳିତ ଜାତିସଂଘ ମୁଖ୍ୟାଳୟରେ ଆନ୍ତର୍ଜାତୀୟ ଯୋଗ ଦିବସ ଉତ୍ସବରେ ପ୍ରଧାନମନ୍ତ୍ରୀ ଯୋଗଦେବେ। ଯୋଗ ଦିବସ କାର୍ଯ୍ୟକ୍ରମ ପରେ ପିଏମ ମୋଦୀ ଜୁନ୍ ୨୨ ତାରିଖରେ ୱାଶିଂଟନ୍ ଡିସି ଯିବେ। ଯେଉଁଠାରେ ତାଙ୍କୁ ହ୍ଵାଇଟ ହାଉସରେ ପାରମ୍ପାରିକ ସ୍ୱାଗତ କରାଯିବ।

ରାଷ୍ଟ୍ରପତି ଜୋ ବାଇଡେନଙ୍କ ସହ ରାତ୍ରୀ ଭୋଜନ କରିବେ:

ଏହି ସମୟରେ ପିଏମ ମୋଦୀ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କୁ ଭେଟିବେ। ରାଷ୍ଟ୍ରପତି ଜୋ ବାଇଡେନ ଏବଂ ତାଙ୍କ ପତ୍ନୀ ଏବଂ ପ୍ରଥମ ଲେଡି ଜିଲ ବାଇଡେନ ଜୁନ୍ ୨୨ ତାରିଖ ସନ୍ଧ୍ୟାରେ ପ୍ରଧାନମନ୍ତ୍ରୀଙ୍କ ସମ୍ମାନାର୍ଥେ ରାତ୍ରୀ ଭୋଜନ କରିବେ। ଜୁନ୍ ୨୨ ତାରିଖ ଦିନ ଆମେରିକା କଂଗ୍ରେସର ମିଳିତ ବୈଠକରେ ପ୍ରଧାନମନ୍ତ୍ରୀ ସମ୍ବୋଧିତ କରିବେ। ପ୍ରଥମ ଭାରତୀୟ ପ୍ରଧାନମନ୍ତ୍ରୀ ଭାବେ ଆମେରିକା ସଂସଦର ମିଳିତ ଅଧିବେଶନରେ ପ୍ରଧାନମନ୍ତ୍ରୀ ମୋଦୀ ଦ୍ୱିତୀୟ ଥର ପାଇଁ ସମ୍ବୋଧିତ କରିବେ। ଏହାପୂର୍ବରୁ ସେ ୨୦୧୬ରେ ଆମେରିକା ସଂସଦକୁ ସମ୍ବୋଧିତ କରିଥିଲେ।

ଏଲୋନ୍ ମସ୍କ ସହିତ ଏହି ସେଲିବ୍ରିଟିମାନଙ୍କୁ ଭେଟିବେ:

ଏହା ପରେ ପ୍ରଧାନମନ୍ତ୍ରୀ ଜୁନ୍ ୨୩ ତାରିଖରେ ଅନେକ ପ୍ରମୁଖ କମ୍ପାନୀର ସିଇଓଙ୍କୁ ଭେଟିବେ। ଏହି ସମୟରେ ପ୍ରଧାନମନ୍ତ୍ରୀ ଟେସଲା ଏବଂ ଟ୍ୱିଟର ମାଲିକ ଏଲୋନ୍ ମସ୍କ, ନୋବେଲ ପୁରସ୍କାର ବିଜେତା ଅର୍ଥନୀତିଜ୍ଞ ପଲ୍ ରୋମର, କଳାକାର, ବୈଜ୍ଞାନିକ, ଶିକ୍ଷାବିତ୍ ତଥା ସ୍ୱାସ୍ଥ୍ୟ ବିଭାଗର ବିଶେଷଜ୍ଞଙ୍କୁ ମଧ୍ୟ ଭେଟିବେ। ଅଧିକାରୀ କହିଛନ୍ତି ଯେ, ପ୍ରଧାନମନ୍ତ୍ରୀ ମୋଦୀ ଲେଖକ ନିକୋଲାସ ନାସିମ ତାଲିବ ଏବଂ ନିବେଶକ ରେ ଡାଲିଓଙ୍କୁ ଭେଟି ପାରନ୍ତି। ପ୍ରଧାନମନ୍ତ୍ରୀଙ୍କୁ ଭେଟିବାର ସମ୍ଭାବନା ଥିବା ଅନ୍ୟ ବିଶିଷ୍ଟ ବ୍ୟକ୍ତିବିଶେଷଙ୍କ ମଧ୍ୟରେ ଫାଲୁ ଶାହା, ଜେଫ୍ ସ୍ମିଥ୍, ମାଇକେଲ୍ ଫ୍ରୋମେନ୍, ଡାନିଏଲ୍ ରସେଲ, ଏଲବ୍ରିଜ୍ କଲବି, ପିଟର ଆଗ୍ରେ, ଷ୍ଟିଫେନ୍ କ୍ଲାସ୍କୋ ଏବଂ ଚନ୍ଦ୍ରିକା ଟଣ୍ଡନ୍ ଅଛନ୍ତି।

କମଲା ହାରିସଙ୍କ ସହିତ ମଧ୍ୟାହ୍ନ ଭୋଜନ, ଭାରତୀୟମାନଙ୍କୁ ସମ୍ବୋଧିତ କରିବେ:

ଆମେରିକାର ଉପରାଷ୍ଟ୍ରପତି କମଲା ହାରିସ୍ ଏବଂ ବୈଦେଶିକ ମନ୍ତ୍ରୀ ଆଣ୍ଟୋନି ବ୍ଲିଙ୍କେନ୍ ନିଜେ ଜୁନ୍ ୨୩ ତାରିଖରେ ପ୍ରଧାନମନ୍ତ୍ରୀ ମୋଦୀଙ୍କ ପାଇଁ ମଧ୍ୟାହ୍ନ ଭୋଜନ କରିବେ। ସେହି ଦିନ ୱାଶିଂଟନ୍‌ର ରୋନାଲଡ୍ ରେଗାନ୍ ବିଲଡିଂ ଏବଂ ଆନ୍ତର୍ଜାତୀୟ ବାଣିଜ୍ୟ କେନ୍ଦ୍ରରେ ପ୍ରଧାନମନ୍ତ୍ରୀ ଭାରତୀୟ ପ୍ରବାସୀଙ୍କୁ ସମ୍ବୋଧିତ କରିବେ। ତାଙ୍କର ଦୁଇ ଦେଶ ଗସ୍ତର ଦ୍ୱିତୀୟ ପର୍ଯ୍ୟାୟରେ ପ୍ରଧାନମନ୍ତ୍ରୀ ଜୁନ୍ ୨୪ ରୁ ୨୫ ତାରିଖ ପର୍ଯ୍ୟନ୍ତ ଇଜିପ୍ଟ ଗସ୍ତରେ କାହିରା ଗସ୍ତ କରିବେ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତିନି ଦିବସୀୟ ଆମେରିକା ଏବଂ ଇଜିପ୍ଟ ଗସ୍ତ କରୁଛନ୍ତି। ତାଙ୍କର ଏହି ଐତିହାସିକ ଗସ୍ତ ପୂର୍ବରୁ ପ୍ରଧାନମନ୍ତ୍ରୀ ଦେଶବାସୀଙ୍କୁ ଏକ ବିବୃତ୍ତି ଦେଇଛନ୍ତି। ପ୍ରଧାନମନ୍ତ୍ରୀ କହିଛନ୍ତି ଯେ, ”ରାଷ୍ଟ୍ରପତି ଜୋସେଫ ବାଇଡେନ ଏବଂ ପ୍ରଥମ ଲେଡି ଡକ୍ଟର ଜିଲ ବାଇଡେନଙ୍କ ନିମନ୍ତ୍ରଣ କ୍ରମେ ମୁଁ ଆମେରିକା ଯାତ୍ରା କରୁଛି। ଏହି ବିଶେଷ ନିମନ୍ତ୍ରଣ ହେଉଛି ଆମର ଗଣତାନ୍ତ୍ରିକ ରାଷ୍ଟ୍ର ମଧ୍ୟରେ ଭାଗିଦାରୀର ଶକ୍ତି ଏବଂ ସହଯୋଗର ପ୍ରତିଫଳନ।

ମୁଁ ନ୍ୟୁୟର୍କରୁ ମୋର ଗସ୍ତ ଆରମ୍ଭ କରିବି, ଯେଉଁଠାରେ ମୁଁ ଜୁନ୍ ୨୧ ରେ ମିଳିତ ଜାତିସଂଘର ମୁଖ୍ୟାଳୟରେ ଜାତିସଂଘର ନେତୃତ୍ୱ ତଥା ଅନ୍ତର୍ଜାତୀୟ ସମ୍ପ୍ରଦାୟର ସଦସ୍ୟଙ୍କ ସହ ଯୋଗ ଦିବସ ପାଳନ କରିବି। ମୁଁ ଏହି ବିଶେଷ ଉତ୍ସବକୁ ଅପେକ୍ଷା କରିଛି ଯାହା ଡିସେମ୍ବର ୨୦୧୪ ରେ ଆନ୍ତର୍ଜାତୀୟ ଯୋଗ ଦିବସକୁ ସ୍ୱୀକୃତି ଦେବା ପାଇଁ ଭାରତର ପ୍ରସ୍ତାବକୁ ସମର୍ଥନ ସହ ଆରମ୍ଭ ହୋଇଥିଲା।

ମୁଁ ଏହା ପରେ ୱାଶିଂଟନ୍ ଡି.ସି. ଠାରେ ରାଷ୍ଟ୍ରପତି ବାଇଡେନ ଙ୍କୁ ସାକ୍ଷାତ କରିବି ଯାହାଙ୍କୁ ସେପ୍ଟେମ୍ବର ୨୦୨୧ ରେ ମୋର ଶେଷ ଅଫିସିଆଲ୍ ଗସ୍ତ ପରଠାରୁ ମୁଁ ଅନେକ ଥର ସାକ୍ଷାତ କରିବାର ସୁଯୋଗ ପାଇଛି। ଏହି ଗସ୍ତ ଆମର ସହଭାଗୀତାର ଗଭୀରତା ଏବଂ ବିବିଧତାକୁ ସମୃଦ୍ଧ କରିବାର ଏକ ସୁଯୋଗ ହେବ।

ଭାରତ-ଆମେରିକା ସମ୍ପର୍କ ବହୁମୁଖୀ ଓ ଗଭୀର। ସାମଗ୍ରୀ ଏବଂ ସେବା କ୍ଷେତ୍ରରେ ଆମେରିକା ହେଉଛି ଭାରତର ସର୍ବବୃହତ ବାଣିଜ୍ୟ ଭାଗୀଦାର। ଆମେ ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା, ଶିକ୍ଷା, ସ୍ୱାସ୍ଥ୍ୟ, ପ୍ରତିରକ୍ଷା ଏବଂ ସୁରକ୍ଷା କ୍ଷେତ୍ରରେ ଘନିଷ୍ଠ ଭାବରେ ସହଯୋଗ କରୁ। କ୍ରିଟିକାଲ୍ ଆଣ୍ଡ ଏମର୍ଜିଂ ଟେକ୍ନୋଲୋଜି ଉପରେ ଏହି ପଦକ୍ଷେପ ପ୍ରତିରକ୍ଷା ଶିଳ୍ପ ସହଯୋଗ, ସ୍ପେସ୍, ଟେଲିକମ୍, କ୍ୱାଣ୍ଟମ୍, ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଏବଂ ବାୟୋଟେକ୍ ସେକ୍ଟରରେ ନୂତନ ପରିମାଣ ଏବଂ ବ୍ୟାପକ ସହଯୋଗକୁ ସାମିଲ୍ କରିଛି। ଆମର ଦୁଇ ଦେଶ ମଧ୍ୟ ଏକ ମୁକ୍ତ ଏବଂ ସମନ୍ବିତ ଇଣ୍ଡୋ-ପାସିଫିକ୍ ବିଷୟରେ ଆମର ସମାନ ଦର୍ଶନକୁ ଆଗକୁ ବଢ଼ାଇବାରେ ସହଯୋଗ କରୁଛନ୍ତି।

ରାଷ୍ଟ୍ରପତି ବାଇଡେନ ଏବଂ ଆମେରିକାର ଅନ୍ୟ ବରିଷ୍ଠ ନେତାଙ୍କ ସହ ମୋର ଆଲୋଚନା ଆମର ଦ୍ୱିପାକ୍ଷିକ ସହଯୋଗକୁ ତଥା ଜି -୨୦, କ୍ୱାଡ ଏବଂ ଆଇପିଏଫ ପରି ବହୁମୁଖୀ ଫୋରମରେ ଏକୀକରଣ କରିବାର ସୁଯୋଗ ପ୍ରଦାନ କରିବ।

ରାଷ୍ଟ୍ରପତି ବାଇଡେନ ଏବଂ ପ୍ରଥମ ଲେଡି ଡକ୍ଟର ଜିଲ ବାଇଡେନ ଙ୍କ ସହ ଷ୍ଟେଟ୍ ବାଙ୍କୱେଟ ରେ ଯୋଗଦେବା ର ମଧ୍ୟ କାର୍ଯ୍ୟକ୍ରମ ରହିଛି।

ଆମେରିକା କଂଗ୍ରେସ ସର୍ବଦା ଭାରତ-ଆମେରିକା ସମ୍ପର୍କକୁ ଦୃଢ଼ ଦ୍ୱିପାକ୍ଷିକ ସମର୍ଥନ ଯୋଗାଇଥାଏ। ମୋର ଗସ୍ତ ସମୟରେ ମୁଁ କଂଗ୍ରେସ ନେତୃତ୍ୱର ନିମନ୍ତ୍ରଣ କ୍ରମେ ଆମେରିକା କଂଗ୍ରେସର ମିଳିତ ଅଧିବେଶନକୁ ସମ୍ବୋଧିତ କରିବି।

ଆମ ଦେଶ ମଧ୍ୟରେ ବିଶ୍ୱାସକୁ ବଢ଼ାଇବରେ ଶକ୍ତିଶାଳୀ ପିପୁଲ୍ ଟୁ ପିପୁଲ ଲିଙ୍କେଜ୍ ପ୍ରମୁଖ ଭୂମିକା ଗ୍ରହଣ କରିଛି। ମୁଁ ଉତ୍ସାହଜନକ ଭାରତୀୟ-ଆମେରିକୀୟ ସମ୍ପ୍ରଦାୟକୁ ଭେଟିବାକୁ ଅପେକ୍ଷା କରିଛି ଯାହା ଆମ ସମାଜର ସର୍ବୋତ୍ତମ ପ୍ରତିନିଧିତ୍ୱ କରେ। ଆମର ବାଣିଜ୍ୟ ଏବଂ ପୁଞ୍ଜି ବିନିଯୋଗ ସମ୍ପର୍କକୁ ସୁଦୃଢ଼ ଏବଂ ବିଶ୍ୱସ୍ତରୀୟ ଯୋଗାଣ ଶୃଙ୍ଖଳା ଗଠନ ପାଇଁ ସୁଯୋଗ ବିଷୟରେ ଆଲୋଚନା କରିବା ପାଇଁ ମୁଁ କେତେକ ଅଗ୍ରଣୀ ସିଇଓଙ୍କୁ ମଧ୍ୟ ସାକ୍ଷାତ କରିବି।

ମୁଁ ନିଶ୍ଚିତ ଯେ ମୋର ଆମେରିକା ଗସ୍ତ ଗଣତନ୍ତ୍ର, ବିବିଧତା ଏବଂ ସ୍ୱାଧୀନତାର ସହଭାଗୀ ମୂଲ୍ୟବୋଧ ଉପରେ ଆଧାର କରି ଆମର ସମ୍ପର୍କକୁ ଦୃଢ଼ କରିବ। ମିଳିତ ବିଶ୍ବର ଆହ୍ବାନ ଗୁଡିକ ପୂରଣ କରିବାରେ ଆମେ ଏକତ୍ର ରହିଛୁ।

ରାଷ୍ଟ୍ରପତି ଅବଦେଲ ଫତ୍ତାହ ଏଲ୍-ସିସିଙ୍କ ନିମନ୍ତ୍ରଣରେ ମୁଁ ୱାଶିଂଟନ୍ ଡି.ସି. ରୁ କାଇରୋ ଯାତ୍ରା କରିବି। ପ୍ରଥମ ଥର ପାଇଁ ଏକ ଘନିଷ୍ଠ ଏବଂ ବନ୍ଧୁତ୍ୱପୂର୍ଣ୍ଣ ଦେଶକୁ ରାଜ୍ୟ ପରିଦର୍ଶନ କରିବାକୁ ମୁଁ ଉତ୍ସାହିତ।

ଚଳିତ ବର୍ଷ ଆମ ଗଣତନ୍ତ୍ର ଦିବସ ପାଳନ ଅବସରରେ ରାଷ୍ଟ୍ରପତି ସିସିଙ୍କୁ ମୁଖ୍ୟ ଅତିଥି ଭାବରେ ଗ୍ରହଣ କରିବାର ଆନନ୍ଦ ପାଇଥିଲୁ। କିଛି ମାସ ମଧ୍ୟରେ ଏହି ଦୁଇଟି ପରିଦର୍ଶନ ଇଜିପ୍ଟ ସହିତ ଆମର ଦ୍ରୁତ ଗତିରେ ବିକାଶଶୀଳ ସହଭାଗୀତାର ପ୍ରତିଫଳନ ଅଟେ, ଯାହା ରାଷ୍ଟ୍ରପତି ସିସିଙ୍କ ଗସ୍ତ ସମୟରେ ଏକ ‘ଷ୍ଟ୍ରାଟେଜିକ୍ ପାର୍ଟନରସିପ୍’କୁ ଉନ୍ନୀତ ହୋଇଥିଲା।

ରାଷ୍ଟ୍ରପତି ସିସି ଏବଂ ଇଜିପ୍ଟ ସରକାରଙ୍କ ବରିଷ୍ଠ ସଦସ୍ୟମାନଙ୍କ ସହ ଆମର ସଭ୍ୟତା ଏବଂ ବହୁମୁଖୀ ସହଭାଗୀତାକୁ ଅଧିକ ଗତି ଦେବା ପାଇଁ ମୁଁ ମୋର ଆଲୋଚନାକୁ ଅପେକ୍ଷା କରିଛି। ମୋତେ ମଧ୍ୟ ଇଜିପ୍ଟରେ ଥିବା ଭାରତୀୟ ସମୂହମାନଙ୍କୁ ସାକ୍ଷାତ କରିବାର ସୁଯେଗା ମିଳିବ।”