Tag: ନରେନ୍ଦ୍ର ମୋଦୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କ୍ରମାଗତ ଭାବେ ଏମ୍‌ ପକ୍ସ ସ୍ଥିତି ଉପରେ ନଜର ରଖିଛନ୍ତି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପରାମର୍ଶ କ୍ରମେ ତାଙ୍କର ପ୍ରମୁଖ ସଚିବ ଡକ୍ଟର ପିକେ ମିଶ୍ର ଦେଶରେ ଏମ-ପକ୍ସ ମୁକାବିଲା ପାଇଁ ପ୍ରସ୍ତୁତିର ସ୍ଥିତି ଏବଂ ଆନୁସଙ୍ଗିକ ଜନସ୍ୱାସ୍ଥ୍ୟ ପଦକ୍ଷେପର ସମୀକ୍ଷା କରିବା ପାଇଁ ଏକ ଉଚ୍ଚସ୍ତରୀୟ ବୈଠକରେ ଅଧ୍ୟକ୍ଷତା କରିଥିଲେ।

ସୂଚନାଯୋଗ୍ୟ, ଆଫ୍ରିକାର ବିଭିନ୍ନ ସ୍ଥାନରେ ଏହି ରୋଗର ବ୍ୟାପକତାକୁ ଦୃଷ୍ଟିରେ ରଖି ବିଶ୍ୱ ସ୍ୱାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ୧୪ ଅଗଷ୍ଟ ୨୦୨୪ରେ ପୁଣି ଥରେ ଏମ-ପକ୍ସକୁ ଅନ୍ତର୍ଜାତୀୟ ସ୍ତରରେ ଚିନ୍ତା ଉଦ୍ରେକକାରୀ ଜରୁରି ପରିସ୍ଥିତି ବା ପବ୍ଲିକ୍ ହେଲ୍‌ଥ୍‌ ଇମର୍ଜେନ୍ସି ଅଫ୍ ଇଣ୍ଟରନ୍ୟାସନାଲ କନସର୍ନ (ପିଏଚ୍ଇଆଇସି) ରୂପେ ଘୋଷଣା କରିଛି। ଡବ୍ଲ୍ୟୁଏଚଓର ପୂର୍ବ ବୟାନ ଅନୁଯାୟୀ, ୨୦୨୨ ପର ଠାରୁ ସମଗ୍ର ବିଶ୍ୱରେ ୧୧୬ଟି ଦେଶରେ ୯୯,୧୭୬ ଟି ମାମଲା ଚିହ୍ନଟ ହୋଇଥିବା ବେଳେ ୨୦୮ ଜଣଙ୍କ ମୃତ୍ୟୁ ଘଟିଛି। ପରବର୍ତ୍ତୀ ସମୟରେ ଡେମୋକ୍ରାଟିକ ରିପବ୍ଲିକ୍ ଅଫ୍ କଙ୍ଗୋରେ ଏମ୍‌-ପକ୍ସ ମାମଲା କ୍ରମାଗତ ଭାବେ ବୃଦ୍ଧି ପାଉଥିବା ସେମାନେ ସୂଚନା ଦେଇଛନ୍ତି।

ଗତବର୍ଷ ଏହି ମାମଲା ଯଥେଷ୍ଟ ବୃଦ୍ଧି ପାଇଥିଲା ଏବଂ ଚଳିତ ବର୍ଷ ଏପର୍ଯ୍ୟନ୍ତ ଚିହ୍ନଟ ହୋଇଥିବା ଆକ୍ରାନ୍ତଙ୍କ ସଂଖ୍ୟା ଗତବର୍ଷର ସମୁଦାୟ ଆକ୍ରାନ୍ତଙ୍କ ସଂଖ୍ୟାକୁ ଟପିଯାଇଛି, ଯେଉଁଥିରେ ୧୫,୬୦୦ରୁ ଅଧିକ ମାମଲା ଚିହ୍ନଟ ହୋଇଥିବା ବେଳେ ୫୩୭ ମୃତ୍ୟୁ ଘଟିଛି। ଡବ୍ଲ୍ୟୁଏଚ୍ଓ ଦ୍ୱାରା ୨୦୨୨ରେ ଅନ୍ତର୍ଜାତୀୟ ଚିନ୍ତାର ଜନସ୍ୱାସ୍ଥ୍ୟ ଜରୁରୀକାଳୀନ ପରିସ୍ଥିତି ଘୋଷଣା ହେବା ପରଠାରୁ ଭାରତରେ ୩୦ଟି ମାମଲା ସାମ୍ନାକୁ ଆସିଛି। ୨୦୨୪ ମାର୍ଚ୍ଚରେ ଶେଷ ଥର ପାଇଁ ଏମ ପକ୍ସ ମାମଲା ଚିହ୍ନଟ ହୋଇଥିଲା।

ଏହି ଉଚ୍ଚସ୍ତରୀୟ ବୈଠକରେ ସୂଚନା ଦିଆଯାଇଥିଲା ଯେ ବର୍ତ୍ତମାନ ସୁଦ୍ଧା ଦେଶରେ ଏମପକ୍ସର କୌଣସି ମାମଲା ସାମ୍ନାକୁ ଆସିନାହିଁ। ବର୍ତ୍ତମାନର ଆକଳନ ଅନୁଯାୟୀ, ନିରନ୍ତର ସଂକ୍ରମଣ ସହିତ ବଡ଼ ଧରଣର ସଂକ୍ରମଣ ହେବାର ଆଶଙ୍କା କମ୍ ରହିଛି।

ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବଙ୍କୁ ଅବଗତ କରାଯାଇଥିଲା ଯେ ଏମ-ପକ୍ସ ସଂକ୍ରମଣ ସାଧାରଣତଃ ୨-୪ ସପ୍ତାହ ପର୍ଯ୍ୟନ୍ତ ବ୍ୟାପୁଥିବା ଏକ ସଂକ୍ରାମକ ବ୍ୟାଧି। ଏମ-ପକ୍ସ ରୋଗୀମାନେ ସାଧାରଣତଃ ସହାୟକ ଚିକିତ୍ସା ସେବା ଏବଂ ପରିଚାଳନା ଦ୍ୱାରା ସୁସ୍ଥ ହୁଅନ୍ତି। ସଂକ୍ରମିତ ରୋଗୀଙ୍କ ସହ ଦୀର୍ଘ ସମୟ ରହିବା ଏବଂ ଘନିଷ୍ଠ ସଂସ୍ପର୍ଶରେ ଆସିବା ଦ୍ୱାରା ଏମ-ପକ୍ସ ସଂକ୍ରମଣ ହୁଏ। ଏହା ମୁଖ୍ୟତଃ ଯୌନ ମାର୍ଗ, ରୋଗୀର ଶରୀର/କ୍ଷତ ତରଳ ପଦାର୍ଥ ସହିତ ସିଧାସଳଖ ସଂସ୍ପର୍ଶରେ ଆସିବା କିମ୍ବା ସଂକ୍ରମିତ ବ୍ୟକ୍ତିର ଦୂଷିତ ପୋଷାକ/ଲିନେନ୍ ମାଧ୍ୟମରେ ହୋଇଥାଏ।

ଗତ ଏକ ସପ୍ତାହ ମଧ୍ୟରେ ନିମ୍ନଲିଖିତ ପଦକ୍ଷେପ ନିଆଯାଇଛି ବୋଲି ସ୍ୱାସ୍ଥ୍ୟ ସଚିବ ସୂଚନା ଦେଇଥିଲେ :

ଭାରତ ପାଇଁ ବିପଦ ଆକଳନ କରିବା ନିମନ୍ତେ ଜାତୀୟ ରୋଗ ନିୟନ୍ତ୍ରଣ କେନ୍ଦ୍ର (ଏନସିଡିସି) ଦ୍ୱାରା ୧୨ ଅଗଷ୍ଟ, ୨୦୨୪ରେ ବିଶେଷଜ୍ଞମାନଙ୍କର ଏକ ବୈଠକ ଡକାଯାଇଥିଲା।

ଏନସିଡିସି ପକ୍ଷରୁ ପୂର୍ବରୁ ଜାରି କରାଯାଇଥିବା ଏମପକ୍ସ ଉପରେ ଏକ ସଂକ୍ରାମକ ରୋଗ (ସିଡି) ଆଲର୍ଟକୁ ଅପଡେଟ୍ କରାଯାଉଛି।

ଅନ୍ତର୍ଜାତୀୟ ବିମାନବନ୍ଦର (ପୋର୍ଟ ଅଫ୍ ଏଣ୍ଟ୍ରି)ରେ ସ୍ୱାସ୍ଥ୍ୟ ଟିମ୍ ର ସଚେତନତା ଆରମ୍ଭ ହୋଇଛି।

ଆଜି ସକାଳେ ସ୍ୱାସ୍ଥ୍ୟ ସେବା ମହାନିର୍ଦ୍ଦେଶକ (ଡିଜିଏଚ୍ଏସ୍) ପକ୍ଷରୁ ୨୦୦ରୁ ଅଧିକ ଅଂଶଗ୍ରହଣକାରୀଙ୍କୁ ନେଇ ଏକ ଭିଡିଓ କନଫରେନ୍ସିଂ ବୈଠକ ଡକାଯାଇଥିଲା। ରାଜ୍ୟରେ ସମନ୍ୱିତ ରୋଗ ନିରୀକ୍ଷଣ କାର୍ଯ୍ୟକ୍ରମ (ଆଇଡିଏସପି) ୟୁନିଟ୍ ଏବଂ ଅନ୍ତର୍ଜାତୀୟ ସୀମାରେ ପ୍ରବେଶ ବନ୍ଦର ଇତ୍ୟାଦି ସମେତ ରାଜ୍ୟସ୍ତରରେ ସ୍ୱାସ୍ଥ୍ୟ କର୍ତ୍ତୃପକ୍ଷଙ୍କୁ ଏ ସମ୍ପର୍କରେ ସଚେତନ କରାଯାଇଥିଲା।

ପ୍ରଧାନମନ୍ତ୍ରୀଙ୍କ ପ୍ରମୁଖ ଶାସନ ସଚିବ ଡ. ପି.କେ.ମିଶ୍ର ନିରୀକ୍ଷଣ ବଢ଼ାଇବା ସହ ମାମଲାଗୁଡ଼ିକର ତୁରନ୍ତ ଚିହ୍ନଟ ପାଇଁ ପ୍ରଭାବଶାଳୀ ପଦକ୍ଷେପ ନେବାକୁ ନିର୍ଦ୍ଦେଶ ଦେଇଥିଲେ। ସେ ଆହୁରି ମଧ୍ୟ ନିର୍ଦ୍ଦେଶ ଦେଇଥିଲେ ଯେ ଶୀଘ୍ର ରୋଗ ଚିହ୍ନଟ ପାଇଁ ପରୀକ୍ଷାଗାର ନେଟୱାର୍କ ପ୍ରସ୍ତୁତ କରାଯାଉ। ବର୍ତ୍ତମାନ ୩୨ଟି ପରୀକ୍ଷାଗାର ନମୁନା ପରୀକ୍ଷା ପାଇଁ ପ୍ରସ୍ତୁତ ରହିଛି।

ଏହି ରୋଗର ନିରାକରଣ ଓ ଚିକିତ୍ସା ପାଇଁ ନିର୍ଦ୍ଧାରିତ ନିୟମକୁ ବ୍ୟାପକ ଭାବେ ପ୍ରସାରିତ କରିବାକୁ ଡାକ୍ତର ପି.କେ ମିଶ୍ର ନିର୍ଦ୍ଦେଶ ଦେଇଛନ୍ତି। ଏହି ରୋଗର ଲକ୍ଷଣ ଓ ସଂକେତ ସମ୍ପର୍କରେ ସ୍ୱାସ୍ଥ୍ୟସେବା ପ୍ରଦାନକାରୀଙ୍କ ମଧ୍ୟରେ ସଚେତନତା ଅଭିଯାନ ଏବଂ ନିରୀକ୍ଷଣ ବ୍ୟବସ୍ଥାକୁ ଠିକ୍ ସମୟରେ ପ୍ରସାରିତ କରିବାର ଆବଶ୍ୟକତା ଉପରେ ସେ ଗୁରୁତ୍ୱାରୋପ କରିଥିଲେ।

ଏହି ବୈଠକରେ ନୀତି ସଦସ୍ୟ ଡାକ୍ତର ଭିକେ ପଲ୍, ସ୍ୱାସ୍ଥ୍ୟ ଓ ପରିବାର କଲ୍ୟାଣ ସଚିବ ଅପୂର୍ବ ଚନ୍ଦ୍ର, ସ୍ୱାସ୍ଥ୍ୟ ଗବେଷଣା ସଚିବ ଡାକ୍ତର ରାଜୀବ ବହଲ, ସଦସ୍ୟ ସଚିବ (ଜାତୀୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ) କ୍ରିଷ୍ଣା ଏସ୍ ବତ୍ସ, ସୂଚନା ଓ ପ୍ରସାରଣ ସଚିବ ସଞ୍ଜୟ ଜାଜୁ ଏବଂ ଗୃହ ସଚିବ ଗୋବିନ୍ଦ ମୋହନଙ୍କ ସମେତ ଅନ୍ୟ ମନ୍ତ୍ରଣାଳୟର ଅଧିକାରୀମାନେ ଉପସ୍ଥିତ ଥିଲେ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଅର୍ଥନୈତିକ ବ୍ୟାପାର ସଂକ୍ରାନ୍ତ କ୍ୟାବିନେଟ୍ କମିଟି ୧୪୧୩ କୋଟି ଟଙ୍କା ବ୍ୟୟ ଅଟକଳରେ ବିହାରର ପାଟନାସ୍ଥିତ ଭିଟା ଠାରେ ଏକ ନୂତନ ସିଭିଲ ଏନକ୍ଲେଭ ର ବିକାଶ ପାଇଁ ଭାରତୀୟ ବିମାନବନ୍ଦର ପ୍ରାଧିକରଣ (ଏଏଆଇ)ର ପ୍ରସ୍ତାବକୁ ମଞ୍ଜୁର କରିଛି।

ଏହି ଭିତ୍ତିଭୂମି ପ୍ରକଳ୍ପ ପାଟନା ବିମାନ ବନ୍ଦରରେ କ୍ଷମତାର ଆଶାନୁରୂପ ସନ୍ତୁଳନକୁ ଦୂର କରିବା ପାଇଁ ଏକ ରଣନୈତିକ ପଦକ୍ଷେପକୁ ପ୍ରତିନିଧିତ୍ୱ କରେ। ଏଏଆଇ ପାଟନା ବିମାନବନ୍ଦରରେ ଏକ ନୂତନ ଟର୍ମିନାଲ ବିଲ୍ଡିଂ ନିର୍ମାଣ ପ୍ରକ୍ରିୟାରେ ଥିବା ବେଳେ ସୀମିତ ଜମି ଉପଲବ୍ଧତା ଯୋଗୁଁ ଅଧିକ ସମ୍ପ୍ରସାରଣ ବାଧାପ୍ରାପ୍ତ ହୋଇଛି।

ଭିଟା ବିମାନବନ୍ଦରରେ ପ୍ରସ୍ତାବିତ ନୂତନ ସମନ୍ୱିତ ଟର୍ମିନାଲ ବିଲ୍ଡିଂ ୬୬,୦୦୦ ବର୍ଗ ମିଟର ପରିବ୍ୟାପ୍ତ ଏବଂ ଏହା ୩୦ ପିକ୍ ଆୱାର ଯାତ୍ରୀ (ପିଏଚପି) ପରିଚାଳନା ପାଇଁ ଡିଜାଇନ୍ କରାଯାଇଛି ଏବଂ ବାର୍ଷିକ ୫୦ ଲକ୍ଷ ଯାତ୍ରୀଙ୍କୁ ସେବା ପ୍ରଦାନ କରିବ। ଆବଶ୍ୟକ ସ୍ଥଳେ ଏହାକୁ ଆହୁରି ୫୦ ଲକ୍ଷ ବୃଦ୍ଧି କରାଯିବ ଏବଂ ବାର୍ଷିକ ଏକ କୋଟି ଯାତ୍ରୀଙ୍କ ସର୍ବାଧିକ କ୍ଷମତା ରହିବ। ଏହି ପ୍ରକଳ୍ପର ମୁଖ୍ୟ ଉପାଦାନ ଗୁଡ଼ିକ ହେଲା ଏ-୩୨୧/ବି-୭୩୭-୮୦୦/ଏ-୩୨୦ ପ୍ରକାର ବିମାନ ପାଇଁ ଉପଯୁକ୍ତ ୧୦ଟି ପାର୍କିଂ ବେ’ ଏବଂ ଦୁଇଟି ଲିଙ୍କ୍ ଟ୍ୟାକ୍ସିୱେ ନିର୍ମାଣ କରିବାରେ ସକ୍ଷମ ଏକ ଆପ୍ରନ୍ ନିର୍ମାଣ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ଦିନ ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ଠାରୁ ଟେଲିଫୋନ୍‍ କଲ୍‍ ପାଇଥିଲେ।

ଭାରତର ୭୮ ତମ ସ୍ୱାଧୀନତା ଦିବସ  ପାଇଁ  ପ୍ରଧାନମନ୍ତ୍ରୀ ନେତାନ୍ୟାହୁ ତାଙ୍କର ଶୁଭେଚ୍ଛା ଜଣାଇଛନ୍ତି।

ଦୁଇ ନେତା ପଶ୍ଚିମ ଏସିଆର ସ୍ଥିତି ଉପରେ ଆଲୋଚନା କରିଥିଲେ।

ଉତ୍ତେଜନା ହ୍ରାସ ପାଇଁ ପ୍ରଧାନମନ୍ତ୍ରୀ ମୋଦୀ ଗୁରୁତ୍ୱାରୋପ କରିଥିଲେ। ସମସ୍ତ ବନ୍ଧକଙ୍କୁ ତୁରନ୍ତ ମୁକ୍ତ କରିବା ଏବଂ ପ୍ରଭାବିତଙ୍କ ପାଇଁ ମାନବିକ ସହାୟତା ଆବଶ୍ୟକ ବୋଲି ପ୍ରଧାନମନ୍ତ୍ରୀ କହିଛନ୍ତି। ଆଲୋଚନା ଏବଂ କୂଟନୀତି ମାଧ୍ୟମରେ ବିବାଦର ଶୀଘ୍ର ଏବଂ ଶାନ୍ତିପୂର୍ଣ୍ଣ ସମାଧାନ ପାଇଁ ସେ ଆହ୍ବାନ ଦେଇଛନ୍ତି।

ଦୁଇ ନେତା ଦ୍ୱିପାକ୍ଷିକ ସହଯୋଗର ବିଭିନ୍ନ ଦିଗ ଏବଂ ଭାରତ-ଇସ୍ରାଏଲ୍ ରଣନୀତିକ ଭାଗିଦାରୀକୁ ଆହୁରି ମଜବୁତ କରିବାର ଉପାୟ ଉପରେ ମଧ୍ୟ ଆଲୋଚନା କରିଥିଲେ।

ଦୁଇ ନେତା ପରସ୍ପରର ସମ୍ପର୍କରେ ରହିବାକୁ ରାଜି ହୋଇଛନ୍ତି।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ବୈଠକରେ ବାଙ୍ଗାଲୋର ମେଟ୍ରୋ ରେଳ ପ୍ରକଳ୍ପର ତୃତୀୟ ପର୍ଯ୍ୟାୟକୁ ଅନୁମୋଦନ ମିଳିଛି, ଯେଉଁଥିରେ ୩୧ଟି ଷ୍ଟେସନ ସହିତ ୪୪.୬୫ କିଲୋମିଟର ଦୀର୍ଘ ଦୁଇଟି ଏଲିଭେଟେଡ୍ କରିଡର ରହିଛି। କରିଡର -୨ ଜେପି ନଗର ଚତୁର୍ଥ ପର୍ଯ୍ୟାୟରୁ କେମ୍ପାପୁରା (ଆଉଟର ରିଙ୍ଗ ରୋଡ୍ ପଶ୍ଚିମରେ) ପର୍ଯ୍ୟନ୍ତ ୩୨.୧୫ କିଲୋମିଟର ଲମ୍ବରେ ୨୨ଟି ଷ୍ଟେସନ ଏବଂ ହୋସାହଲ୍ଲୀରୁ କଡାବାଗେରେ (ମଗାଡି ରୋଡ୍ ପାର୍ଶ୍ୱରେ) ପର୍ଯ୍ୟନ୍ତ ୯ଟି ଷ୍ଟେସନ ସହିତ ୧୨.୫୦ କିଲୋମିଟର ଲମ୍ବ ପାଇଁ ଉଦ୍ଦିଷ୍ଟ।

ତୃତୀୟ ପର୍ଯ୍ୟାୟ କାର୍ଯ୍ୟକ୍ଷମ ହେବା ପରେ ବେଙ୍ଗାଲୁରୁ ସହରରେ ୨୨୦.୨୦ କିଲୋମିଟର ସକ୍ରିୟ ମେଟ୍ରୋ ରେଳ ନେଟୱାର୍କ ରହିବ।

ପ୍ରକଳ୍ପର ସମୁଦାୟ ମୂଲ୍ୟ ୧୫,୬୧୧ କୋଟି ଟଙ୍କା ରହିଛି।

ପ୍ରକଳ୍ପର ଲାଭ:

ବାଙ୍ଗାଲୋର ମେଟ୍ରୋ ରେଳ ପ୍ରକଳ୍ପର ତୃତୀୟ ପର୍ଯ୍ୟାୟ ସହରର ଭିତ୍ତିଭୂମି ବିକାଶରେ ଏକ ଗୁରୁତ୍ୱପୂର୍ଣ୍ଣ ଅଗ୍ରଗତିକୁ ପ୍ରତିନିଧିତ୍ୱ କରୁଛି । ସହରରେ ମେଟ୍ରୋ ରେଳ ନେଟୱାର୍କର ଏକ ପ୍ରମୁଖ ବିସ୍ତାର ଭାବରେ ତୃତୀୟ ପର୍ଯ୍ୟାୟ କାର୍ଯ୍ୟ କରେ ।

ଉନ୍ନତ ସଂଯୋଗ :

ତୃତୀୟ ପର୍ଯ୍ୟାୟରେ ପ୍ରାୟ ୪୪.୬୫ କିଲୋମିଟର ନୂଆ ମେଟ୍ରୋ ଲାଇନ୍ ଯୋଡ଼ାଯିବ, ଯାହା ବେଙ୍ଗାଲୁରୁ ସହରର ପଶ୍ଚିମ ଭାଗକୁ ସଂଯୋଗ କରିବ, ଯେଉା ପୂର୍ବରୁ କମ୍ ସେବା ପ୍ରଦାନ କରାଯାଉଥିଲା । ତୃତୀୟ ପର୍ଯ୍ୟାୟରେ ସହରର ପ୍ରମୁଖ ଅଞ୍ଚଳକୁ ସମନ୍ୱିତ କରାଯିବ, ଯେଉଁଥିରେ ପିନ୍ୟା ଶିଳ୍ପାଞ୍ଚଳ, ବାନରଘାଟା ରୋଡ୍ ଓ ଆଉଟର ରିଙ୍ଗରୋଡରେ ଆଇଟି ଶିଳ୍ପ, ତୁମକୁରୁ ରୋଡ୍ ଏବଂ ଓଆରଆରରେ ବୟନ ଓ ଇଞ୍ଜିନିୟରିଂ ସାମଗ୍ରୀ ଉତ୍ପାଦନ ୟୁନିଟ୍‌, ଭାରତ ଇଲେକ୍ଟ୍ରୋନିକ୍ସ ଲିମିଟେଡ୍ (ବିଇଏଲ୍‌), ପିଇଏସ୍ ବିଶ୍ୱବିଦ୍ୟାଳୟ, ଆମ୍ବେଦକର କଲେଜ, ପଲିଟେକନିକ୍ କଲେଜ, କେଏଲ୍‌ଇ କଲେଜ, ଦୟାନନ୍ଦସାଗର ବିଶ୍ୱବିଦ୍ୟାଳୟ, ଆଇଟିଆଇ ଆଦି ପ୍ରମୁଖ ଶିକ୍ଷାନୁଷ୍ଠାନ ସାମିଲ କରାଯିବ । ତୃତୀୟ ପର୍ଯ୍ୟାୟ କରିଡର ସହରର ଦକ୍ଷିଣ ଭାଗ, ଆଉଟର ରିଙ୍ଗ ରୋଡ୍ ପଶ୍ଚିମ, ମଗାଡି ରୋଡ୍ ଏବଂ ବିଭିନ୍ନ ଅଞ୍ଚଳକୁ ସଂଯୋଗ ପ୍ରଦାନ କରିଥାଏ, ଯାହା ସହରର ସାମଗ୍ରିକ ଯୋଗାଯୋଗକୁ ବୃଦ୍ଧି କରିଥାଏ । ବାଣିଜ୍ୟିକ କେନ୍ଦ୍ର, ଶିଳ୍ପ କେନ୍ଦ୍ର, ଶିକ୍ଷାନୁଷ୍ଠାନ ଏବଂ ସ୍ୱାସ୍ଥ୍ୟ ସେବା ସୁବିଧାରେ ଉନ୍ନତ ଯୋଗାଯୋଗ ବାସିନ୍ଦାଙ୍କୁ ଉନ୍ନତ ସୁବିଧା ପ୍ରଦାନ କରିବ ।

ଟ୍ରାଫିକ ଭିଡ଼ ହ୍ରାସ :

ଏକ ଦକ୍ଷ ବିକଳ୍ପ ସଡ଼କ ପରିବହନ ଭାବରେ ମେଟ୍ରୋ ରେଳ ଏବଂ ବେଙ୍ଗାଲୁରୁ ସହରରେ ମେଟ୍ରୋ ରେଳ ନେଟୱାର୍କର ସମ୍ପ୍ରସାରଣ ଭାବରେ ଫେଜ୍ – ୩ ସହିତ ଟ୍ରାଫିକ ଭିଡ଼ ହ୍ରାସ କରିବ ବୋଲି ଆଶା କରାଯାଉଛି ଏବଂ ଆଉଟର ରିଙ୍ଗ ରୋଡ୍ ପଶ୍ଚିମ, ମଗାଡି ରାସ୍ତା ଏବଂ ସହରର ଅନ୍ୟ ପ୍ରମୁଖ ମୁଖ୍ୟ ରାସ୍ତାଗୁଡ଼ିକର ପ୍ରବଳ ଜନଗହଳିପୂର୍ଣ୍ଣ ମାର୍ଗ ଉପରେ ବିଶେଷ ଭାବରେ ପ୍ରଭାବଶାଳୀ ହେବ ବୋଲି ଆଶା କରାଯାଉଛି । ସଡ଼କ ଯାତାୟାତ ହ୍ରାସ ଫଳରେ ଯାନବାହନ ଚଳାଚଳ ସହଜ ହୋଇପାରିବ, ଯାତ୍ରା ସମୟ ହ୍ରାସ ପାଇବ, ସାମଗ୍ରିକ ସଡ଼କ ନିରାପତ୍ତା ବୃଦ୍ଧି ପାଇବ ଇତ୍ୟାଦି ।

ପରିବେଶ ଲାଭ :

ତୃତୀୟ ପର୍ଯ୍ୟାୟ ମେଟ୍ରୋ ରେଳ ପ୍ରକଳ୍ପ ସଂଯୋଗ ଏବଂ ବେଙ୍ଗାଲୁରୁ ସହରରେ ସାମଗ୍ରିକ ମେଟ୍ରୋ ରେଳ ନେଟୱାର୍କ ବୃଦ୍ଧି, ପାରମ୍ପରିକ ଜୀବାଶ୍ମ ଇନ୍ଧନ ଆଧାରିତ ପରିବହନ ତୁଳନାତ୍ମକ ଭାବେ କାର୍ବନ ନିର୍ଗମନକୁ ଯଥେଷ୍ଟ ହ୍ରାସ କରିପାରିବ ।

ଅର୍ଥନୈତିକ ଅଭିବୃଦ୍ଧି :

ଯାତ୍ରା ସମୟ ହ୍ରାସ ଏବଂ ସହରର ବିଭିନ୍ନ ସ୍ଥାନରେ ଉନ୍ନତ ପ୍ରବେଶ ବ୍ୟକ୍ତିବିଶେଷଙ୍କୁ ସେମାନଙ୍କ କର୍ମକ୍ଷେତ୍ରରେ ଅଧିକ ଦକ୍ଷତାର ସହ ପହଞ୍ଚିବାକୁ ଅନୁମତି ଦେଇ ଉତ୍ପାଦକତା ବୃଦ୍ଧି କରିପାରିବ । ତୃତୀୟ ପର୍ଯ୍ୟାୟ ନିର୍ମାଣ ଓ ପରିଚାଳନା ଦ୍ୱାରା ନିର୍ମାଣ ଶ୍ରମିକଙ୍କ ଠାରୁ ଆରମ୍ଭ କରି ପ୍ରଶାସନିକ କର୍ମଚାରୀ ଓ ରକ୍ଷଣାବେକ୍ଷଣ କର୍ମଚାରୀଙ୍କ ପର୍ଯ୍ୟନ୍ତ ବିଭିନ୍ନ କ୍ଷେତ୍ରରେ ଅନେକ ନିଯୁକ୍ତି ସୁଯୋଗ ସୃଷ୍ଟି ହେବ । ଏହାବ୍ୟତୀତ, ବର୍ଦ୍ଧିତ ଯୋଗାଯୋଗ ସ୍ଥାନୀୟ ବ୍ୟବସାୟକୁ ଉତ୍ସାହିତ କରିପାରେ, ବିଶେଷ କରି ନୂତନ ମେଟ୍ରୋ ଷ୍ଟେସନ ନିକଟବର୍ତ୍ତୀ ଅଞ୍ଚଳରେ ଯାହା ପୂର୍ବରୁ କମ୍ ଉପଲବ୍ଧ ଅଞ୍ଚଳରେ ପୁଞ୍ଜିନିବେଶ ଏବଂ ବିକାଶକୁ ଆକୃଷ୍ଟ କରିପାରିବ ।

ସାମାଜିକ ପ୍ରଭାବ :

ବେଙ୍ଗାଲୁରୁରେ ତୃତୀୟ ପର୍ଯ୍ୟାୟ ମେଟ୍ରୋ ରେଳ ନେଟୱାର୍କର ସମ୍ପ୍ରସାରଣ ସାର୍ବଜନୀନ ପରିବହନକୁ ଅଧିକ ନ୍ୟାୟସଙ୍ଗତ ପହଂଚ ପ୍ରଦାନ କରିବ, ବିଭିନ୍ନ ସାମାଜିକ – ଅର୍ଥନୈତିକ ଗୋଷ୍ଠୀକୁ ଉପକୃତ କରିବ ଏବଂ ପରିବହନ ଅସମାନତା ହ୍ରାସ କରିବ , ଯାହା ପରିବହନ ସମୟ ହ୍ରାସ କରି ଏବଂ ଅତ୍ୟାବଶ୍ୟକ ସେବା ଗୁଡ଼ିକର ଉପଲବ୍ଧତାରେ ଉନ୍ନତି ଆଣି ଉନ୍ନତମାନର ଜୀବନ ଧାରଣରେ ଯୋଗଦାନ କରିବ ।

ମଲ୍ଟି-ମୋଡାଲ୍ ସମନ୍ୱିତକରଣ ଏବଂ ଅନ୍ତିମ ମାଇଲ୍ ସଂଯୋଗ :

ଜେପି ନଗର ଚତୁର୍ଥ ପର୍ଯ୍ୟାୟ, ଜେପି ନଗର, କାମାକ୍ୟା, ମହୀଶୂର ରୋଡ୍‌, ସୁମନାହଲ୍ଲୀ, ପିନ୍ୟା, ବିଇଏଲ୍ ସର୍କଲ୍‌, ହେବଲ୍‌, କେମ୍ପାପୁରା, ହୋସାହଲ୍ଲୀରେ ୧୦ଟି ସ୍ଥାନରେ ମଲ୍ଟି-ମୋଡାଲ ଇଣ୍ଟିଗ୍ରେସନ୍ ଯୋଜନା କରାଯାଇଛି ଏବଂ ବର୍ତ୍ତମାନର ଏବଂ ନିର୍ମାଣାଧୀନ ମେଟ୍ରୋ ଷ୍ଟେସନ୍‌, ବିଏମଟିସି ବସଷ୍ଟାଣ୍ଡ୍‌, ଭାରତୀୟ ରେଳ ଷ୍ଟେସନ୍‌, ପ୍ରସ୍ତାବିତ ଉପନଗରୀୟ (କେ-ରାଇଡ୍‌) ଷ୍ଟେସନ୍ ସହିତ ଇଣ୍ଟରଚେଞ୍ଜ ପ୍ରଦାନ କରାଯିବ ।

ସମସ୍ତ ତୃତୀୟ ପର୍ଯ୍ୟାୟ ଷ୍ଟେସନରେ ଉତ୍ସର୍ଗୀକୃତ ବସ୍ ବେ, ପିକ୍ ଅପ୍ ଆଣ୍ଡ ଡ୍ରପ୍ ଅଫ୍ ବେ, ପଦଚାରୀ ପଥ, ଆଇପିଟି / ଅଟୋ ରିକ୍ସା ଷ୍ଟାଣ୍ଡ ରହିଛି । ବିଏମଟିସି ପୂର୍ବରୁ କାର୍ଯ୍ୟକ୍ଷମ ମେଟ୍ରୋ ଷ୍ଟେସନଗୁଡ଼ିକୁ ଫିଡର ବସ୍ ଚଳାଉଛି ଏବଂ ଏହାକୁ ଫେଜ୍ -୩ ଷ୍ଟେସନ ପର୍ଯ୍ୟନ୍ତ ବିସ୍ତାର କରାଯିବ । ୧୧ଟି ଗୁରୁତ୍ୱପୂର୍ଣ୍ଣ ଷ୍ଟେସନରେ ପାର୍କିଂ ସୁବିଧା ପ୍ରଦାନ କରାଯାଇଛି । ଫେଜ୍ -୧ ଏବଂ ଫେଜ୍ -୨ର ବର୍ତ୍ତମାନର ଷ୍ଟେସନଗୁଡ଼ିକୁ ଫେଜ୍ – ୩ର ପ୍ରସ୍ତାବିତ ଷ୍ଟେସନ ସହିତ ସଂଯୁକ୍ତ କରାଯାଇଛି । ଏଫ୍‌ଓବି / ସ୍କାଏୱାକ୍ ମାଧ୍ୟମରେ ଦୁଇଟି ରେଳ ଷ୍ଟେସନ (ଲୋଟେଗୋଲାହାଲି ଏବଂ ହେବଲ) କୁ ସିଧାସଳଖ ସଂଯୋଗ କରାଯାଇଛି । ଫେଜ୍ – ୩ ମେଟ୍ରୋ ଷ୍ଟେସନରେ ବାଇକ୍ ଏବଂ ସାଇକେଲ୍ ସେୟାରିଂ ସୁବିଧାର ବ୍ୟବସ୍ଥା କରାଯାଇଛି ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସାମାଜିକ ଗଣମାଧ୍ୟମ ପ୍ଲାଟଫର୍ମ ଏକ୍ସ ମାଧ୍ୟମରେ ମହାନ ଦାର୍ଶନିକ, ଚିନ୍ତକ ତଥା ଆଧ୍ୟାତ୍ମିକ ନେତା ଶ୍ରୀ ଅରବିନ୍ଦୋଙ୍କୁ ତାଙ୍କର ଜୟନ୍ତୀ ଅବସରରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି।

ପ୍ରଧାନମନ୍ତ୍ରୀଙ୍କ ପୋଷ୍ଟରେ ଶ୍ରୀ ଅରବିନ୍ଦୋଙ୍କ ଚିରନ୍ତନ ପରମ୍ପରା ଏବଂ ଭାରତର ଜାତୀୟ ଜାଗୃତି ଉପରେ ତାଙ୍କର ଗଭୀର ପ୍ରଭାବ ଉପରେ ଆଲୋକପାତ କରାଯାଇଥିଲା।

ପ୍ରଧାନମନ୍ତ୍ରୀ ତାଙ୍କ ଶ୍ରଦ୍ଧାଞ୍ଜଳିରେ କହିଛନ୍ତି, “ଶ୍ରୀ ଅରବିନ୍ଦୋଙ୍କୁ ତାଙ୍କ ଜନ୍ମ ବାର୍ଷିକୀରେ ଶ୍ରଦ୍ଧାଞ୍ଜଳି। ତାଙ୍କୁ ଜଣେ ଉଲ୍ଲେଖନୀୟ ଦାର୍ଶନିକ, ଚିନ୍ତକ ତଥା ଆଧ୍ୟାତ୍ମିକ ନେତା ଭାବରେ ସ୍ମରଣ କରାଯାଇଥାଏ। ଜାତୀୟ ଜାଗୃତି ଉପରେ ତାଙ୍କର ଗୁରୁତ୍ୱ ସମସ୍ତ ପିଢ଼ୀଙ୍କୁ ପ୍ରେରଣା ଯୋଗାଇଆସୁଛି। ସେ ଯେଉଁ ଭାରତର ପରିକଳ୍ପନା କରିଥିଲେ, ଆମେ ତାହାକୁ ସାକାର କରିବାକୁ ପ୍ରତିବଦ୍ଧ।”

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଗଷ୍ଟ ୧୫, ୨୦୨୪ରେ ଦିଲ୍ଲୀର ଐତିହାସିକ ଲାଲକିଲ୍ଲାରୁ ୭୮ତମ ସ୍ୱାଧୀନତା ଦିବସ ପାଳନ କରିବାରେ ଦେଶବାସୀଙ୍କ ନେତୃତ୍ୱ ନେବେ। ସେ ଜାତୀୟ ପତାକା ଉତ୍ତୋଳନ କରିବା ସହ ଏହି ସ୍ମାରକୀର ପ୍ରାଚୀରରୁ ଦେଶବାସୀଙ୍କ ଉଦ୍ଦେଶ୍ୟରେ ପାରମ୍ପରିକ ଅଭିଭାଷଣ ଦେବେ। ଚଳିତ ବର୍ଷର ସ୍ୱାଧୀନତା ଦିବସର ବିଷୟବସ୍ତୁ ହେଉଛି ‘ବିକଶିତ ଭାରତ @ ୨୦୪୭‘ । ଏହି ଉତ୍ସବ ୨୦୪୭ ସୁଦ୍ଧା ଦେଶକୁ ଏକ ବିକଶିତ ରାଷ୍ଟ୍ରରେ ପରିଣତ କରିବା ଦିଗରେ ସରକାରଙ୍କ ପ୍ରୟାସକୁ ଏକ ନୂତନ ପ୍ରୋତ୍ସାହନ ପ୍ରଦାନ କରିବା ପାଇଁ ଏକ ପ୍ଲାଟଫର୍ମ ଭାବରେ କାର୍ଯ୍ୟ କରିବ।

 ସ୍ବତନ୍ତ୍ର ଅତିଥି

ଜାତୀୟ ଉତ୍ସାହର ଏହି ପର୍ବରେ ଜନଭାଗିଦାରୀକୁ ବଢ଼ାଇବା ଉଦ୍ଦେଶ୍ୟରେ ଚଳିତ ବର୍ଷ ଲାଲକିଲ୍ଲାରେ ଉତ୍ସବ ଦେଖିବା ପାଇଁ ପ୍ରାୟ ୬ ହଜାର ସ୍ବତନ୍ତ୍ର ଅତିଥିଙ୍କୁ ନିମନ୍ତ୍ରଣ କରାଯାଇଛି। ଯୁବକ, ଆଦିବାସୀ ସମ୍ପ୍ରଦାୟ, କୃଷକ, ମହିଳା ଓ ଅନ୍ୟାନ୍ୟ ସ୍ବତନ୍ତ୍ର ଅତିଥି ଭାବେ ପରିଚିତ ଏହି ବ୍ୟକ୍ତିମାନେ ବିଭିନ୍ନ ସରକାରୀ ଯୋଜନା/ପ୍ରୋତ୍ସାହନ ସହାୟତାରେ ବିଭିନ୍ନ କ୍ଷେତ୍ରରେ ଉତ୍କର୍ଷ ପ୍ରଦର୍ଶନ କରିଛନ୍ତି।

ଏହି କାର୍ଯ୍ୟକ୍ରମରେ ଅଟଳ ଇନୋଭେସନ ମିଶନ ଏବଂ ପିଏମ୍‍ ଶ୍ରୀ (ବିକଶିତ ଭାରତ ପାଇଁ ପ୍ରଧାନମନ୍ତ୍ରୀ ବିଦ୍ୟାଳୟ) ଯୋଜନାର ଉପକୃତ ଛାତ୍ରଛାତ୍ରୀ ଏବଂ ‘ମେରି ମାଟି ମେରା ଦେଶ’ ଅଧୀନରେ ମେରା ଯୁବ ଭାରତ (ମାଇଁ ଭାରତ) ଏବଂ ଜାତୀୟ ସେବା ଯୋଜନାର ସ୍ୱେଚ୍ଛାସେବୀମାନେ ଯୋଗ ଦେବେ । ଅତିଥିମାନଙ୍କ ମଧ୍ୟରେ ଆଦିବାସୀ କାରିଗର/ବନ ଧନ ବିକାଶ ସଦସ୍ୟ ଏବଂ ଜାତୀୟ ଅନୁସୂଚିତ ଜନଜାତି ଅର୍ଥ ଓ ଉନ୍ନୟନ ନିଗମ ଦ୍ୱାରା ଅନୁଦାନପ୍ରାପ୍ତ ଆଦିବାସୀ ଉଦ୍ୟୋଗୀମାନେ ଏବଂ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି, ପ୍ରଧାନମନ୍ତ୍ରୀ ଫସଲ ବୀମା ଯୋଜନାର ହିତାଧିକାରୀ ଏବଂ କୃଷକ ଉତ୍ପାଦନକାରୀ ସଂଗଠନର ପ୍ରତିନିଧିମାନେ ଯୋଗଦେବେ।

ସ୍ୱୀକୃତିପ୍ରାପ୍ତ ସାମାଜିକ ସ୍ୱାସ୍ଥ୍ୟ କର୍ମୀ (ଆଶା), ସହାୟକ ନର୍ସ ମିଡୱାଇଫ (ଏଏନଏମ) ଏବଂ ଅଙ୍ଗନୱାଡି କର୍ମୀ; ନିର୍ବାଚିତ ମହିଳା ପ୍ରତିନିଧି; ସଂକଳ୍ପର ହିତାଧିକାରୀ: ମହିଳା ସଶକ୍ତିକରଣ କେନ୍ଦ୍ର, ଲକ୍ଷପତି ଦିଦି ଓ ଡ୍ରୋନ୍ ଦିଦି ଯୋଜନା ଏବଂ ସଖୀ କେନ୍ଦ୍ର ଯୋଜନା; ଏବଂ ଶିଶୁ କଲ୍ୟାଣ ସମିତି ଏବଂ ଜିଲ୍ଲା ଶିଶୁ ସୁରକ୍ଷା ୟୁନିଟ୍ର କର୍ମକର୍ତ୍ତାମାନେ ମଧ୍ୟ ଏହି ଉତ୍ସବ ଦେଖିବେ।

ନିକଟରେ ଶେଷ ହୋଇଥିବା ପ୍ୟାରିସ୍ ଅଲିମ୍ପିକ୍ସରେ ଅଂଶଗ୍ରହଣ କରିଥିବା ଭାରତୀୟ ଦଳକୁ ମଧ୍ୟ ଏହି ଉତ୍ସବରେ ସାମିଲ ହେବାକୁ ନିମନ୍ତ୍ରଣ କରାଯାଇଛି । ଆକାଂକ୍ଷୀ ବ୍ଲକ କାର୍ଯ୍ୟକ୍ରମର ପ୍ରତ୍ୟେକ ବ୍ଲକରୁ ଜଣେ ଅତିଥି; ସୀମା ସଡ଼କ ସଂଗଠନର କର୍ମକର୍ତ୍ତା; ପ୍ରେରଣା ସ୍କୁଲ କାର୍ଯ୍ୟକ୍ରମର ଛାତ୍ରଛାତ୍ରୀ; ଏବଂ ପ୍ରାଥମିକତା କ୍ଷେତ୍ର ଯୋଜନାରେ ସଫଳତା ହାସଲ କରିଥିବା ଗ୍ରାମ ପଞ୍ଚାୟତର ସରପଞ୍ଚମାନେ ମଧ୍ୟ ଏହି କାର୍ଯ୍ୟକ୍ରମରେ ଯୋଗଦେବେ ।

ବିଭିନ୍ନ ରାଜ୍ୟ/କେନ୍ଦ୍ରଶାସିତ ଅଞ୍ଚଳରୁ ପାରମ୍ପରିକ ପୋଷାକ ପିନ୍ଧି ପ୍ରାୟ ୨୦୦୦ ଲୋକଙ୍କୁ ଏହି ଭବ୍ୟ ସମାରୋହ ଦେଖିବା ପାଇଁ ନିମନ୍ତ୍ରଣ କରାଯାଇଛି। ମାଇଁଗଭ ଏବଂ ଆକାଶବାଣୀର ମିଳିତ ସହଯୋଗରେ ପ୍ରତିରକ୍ଷା ମନ୍ତ୍ରଣାଳୟ ଦ୍ୱାରା ଆୟୋଜିତ ବିଭିନ୍ନ ଅନଲାଇନ୍ ପ୍ରତିଯୋଗିତାର ୩ ହଜାର (୩୦୦୦) ବିଜେତା ମଧ୍ୟ ଏହି ଉତ୍ସବରେ ଅଂଶଗ୍ରହଣ କରିବେ।

 ସମାରୋହ

ଲାଲକିଲ୍ଲାରେ ପହଞ୍ଚିବା ପରେ ପ୍ରଧାନମନ୍ତ୍ରୀଙ୍କୁ ରକ୍ଷା ମନ୍ତ୍ରୀ ଶ୍ରୀ ରାଜନାଥ ସିଂହ, ରକ୍ଷା ରାଜ୍ୟମନ୍ତ୍ରୀ ଶ୍ରୀ ସଞ୍ଜୟ ସେଠ ଏବଂ ପ୍ରତିରକ୍ଷା ସଚିବ ଶ୍ରୀ ଗିରିଧର ଅରମାନେ ସ୍ୱାଗତ କରିବେ । ପ୍ରତିରକ୍ଷା ସଚିବ ଦିଲ୍ଲୀ ଏରିଆର ଜେନେରାଲ ଅଫିସର କମାଣ୍ଡିଂ (ଜିଓସି) ଲେଫ୍ଟନାଣ୍ଟ ଜେନେରାଲ ଭବନୀଶ କୁମାର ପ୍ରଧାନମନ୍ତ୍ରୀଙ୍କୁ ପରିଚିତ କରାଇବେ। ଏହାପରେ ଦିଲ୍ଲୀ ଅଞ୍ଚଳର ଜିଓସି ଶ୍ରୀ ନରେନ୍ଦ୍ର ମୋଦୀଙ୍କୁ ସଲାମ ସ୍ଥଳକୁ ନେଇଯିବେ, ଯେଉଁଠାରେ ଏକ ମିଳିତ ଆନ୍ତଃସେବା ଏବଂ ଦିଲ୍ଲୀ ପୋଲିସ ଗାର୍ଡ ପ୍ରଧାନମନ୍ତ୍ରୀଙ୍କୁ ସଲାମ ପ୍ରଦାନ କରିବେ । ଏହାପରେ ପ୍ରଧାନମନ୍ତ୍ରୀ ଗାର୍ଡ ଅଫ୍ ଅନର ପରିକ୍ରମଣ କରିବେ।

ପ୍ରଧାନମନ୍ତ୍ରୀଙ୍କ ପାଇଁ ଗାର୍ଡ ଅଫ୍ ଅନର ଦଳରେ ସେନା, ନୌସେନା,  ବାୟୁସେନା ଏବଂ ଦିଲ୍ଲୀ ପୋଲିସର ଜଣେ ଅଧିକାରୀ ଏବଂ ୨୪ ଜଣ ଲେଖାଏଁ ଯବାନ ରହିବେ । ଚଳିତ ବର୍ଷ ଭାରତୀୟ ନୌସେନା ହେଉଛି ସମନ୍ୱୟ ସେବା । ଗାର୍ଡ ଅଫ୍ ଅନରକୁ କମାଣ୍ଡର ଅରୁଣ କୁମାର ମେହେଟ୍ଟା ପରିଚାଳନା କରିବେ । ପ୍ରଧାନମନ୍ତ୍ରୀଙ୍କ ଗାର୍ଡରେ ଥିବା ସେନା ଦଳର ନେତୃତ୍ୱ ମେଜର ଅର୍ଜୁନ ସିଂହ, ଲେଫ୍ଟନାଣ୍ଟ କମାଣ୍ଡର ଗୁଲିଆ ଭବେଶ ଏନକେ ନୌସେନା ଦଳ ଏବଂ ସ୍କ୍ୱାଡ୍ରନ୍ ଲିଡର ଅକ୍ଷରା ଉନିଆଲ ବାୟୁସେନା ର ନେତୃତ୍ୱ ନେବେ। ଅତିରିକ୍ତ ଡିସିପି ଅନୁରାଗ ଦ୍ୱିବେଦୀଙ୍କ ନେତୃତ୍ୱରେ ଦିଲ୍ଲୀ ପୁଲିସ ଟିମ୍ ଗଠନ କରାଯାଇଛି।

ଗାର୍ଡ ଅଫ୍ ଅନର ପରିକ୍ରମଣ କରିବା ପରେ ପ୍ରଧାନମନ୍ତ୍ରୀ ଲାଲକିଲ୍ଲାର ପ୍ରାଚୀରକୁ ଯିବେ ଯେଉଁଠାରେ ତାଙ୍କୁ ରକ୍ଷା ମନ୍ତ୍ରୀ ଶ୍ରୀ ରାଜନାଥ ସିଂହ, ରକ୍ଷା ରାଜ୍ୟମନ୍ତ୍ରୀ ଶ୍ରୀ ସଞ୍ଜୟ ସେଠ, ଚିଫ୍ ଅଫ୍ ଡିଫେନ୍ସ ଷ୍ଟାଫ୍ ଜେନେରାଲ ଅନିଲ ଚୌହାନ, ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ, ନୌସେନା ମୁଖ୍ୟ ଆଡମିରାଲ ଦୀନେଶ କେ ତ୍ରିପାଠୀ ଏବଂ ବାୟୁସେନା ମୁଖ୍ୟ ଏୟାର ଚିଫ୍ ମାର୍ଶାଲ ଭିଆର ଚୌଧୁରୀ ସ୍ୱାଗତ କରିବେ । ଜାତୀୟ ପତାକା ଉତ୍ତୋଳନ ପାଇଁ ଦିଲ୍ଲୀ ସ୍ଥିତ ଜିଓସି ପ୍ରଧାନମନ୍ତ୍ରୀଙ୍କୁ ମଞ୍ଚକୁ ପାଛୋଟିନେବେ ।

ଲେଫ୍ଟନାଣ୍ଟ ସଞ୍ଜିତ ସାଇନି ଜାତୀୟ ପତାକା ଉତ୍ତୋଳନରେ ପ୍ରଧାନମନ୍ତ୍ରୀଙ୍କୁ ସହଯୋଗ କରିବେ। ଏହା ୧୭୨୧ ଫିଲ୍ଡ ବ୍ୟାଟେରୀ (ସମାରୋହ)ର ବୀର ବନ୍ଧୁକଧାରୀମାନଙ୍କ ଦ୍ୱାରା ୨୧ ତୋପ ସଲାମ ସହିତ ସମନ୍ୱିତ ହେବ । ସ୍ୱଦେଶୀ ୧୦୫ ମିଲିମିଟର ଲାଇଟ୍ ଫିଲ୍ଡ ବନ୍ଧୁକ ବ୍ୟବହାର କରି ଆନୁଷ୍ଠାନିକ ସମାରୋହର ନେତୃତ୍ୱ ମେଜର ସବନିସ୍‍ କୌଶିକ ନେବେ ଏବଂ ବନ୍ଧୁକ ସ୍ଥିତି ଅଧିକାରୀ ହେବେ ନାଏବ ସୁବେଦାର (ଏଆଇଜି) ଅନୁତୋଷ ସରକାର ।

ଜାତୀୟ ପତାକା ଉତ୍ତୋଳନ ସମୟରେ ସେନା, ନୌସେନା ଓ ବାୟୁସେନାର ଜଣେ ଅଧିକାରୀ ଏବଂ ୩୨ ଜଣ ଲେଖାଏଁ ଏବଂ ଦିଲ୍ଲୀ ପୋଲିସର ୧୨୮ ଜଣ ଯବାନଙ୍କୁ  ନେଇ ଗଠିତ ନ୍ୟାସନାଲ ଫ୍ଲାଗ ଗାର୍ଡ ରାଷ୍ଟ୍ରୀୟ ଅଭିବାଦନ ପ୍ରଦାନ କରିବେ । କମାଣ୍ଡର ବିନୟ ଦୁବେ ଏହି ଇଣ୍ଟର ସର୍ଭିସ ଗାର୍ଡ ଏବଂ ପୋଲିସ ଗାର୍ଡର କମାଣ୍ଡରେ ରହିବେ ।

ନ୍ୟାସନାଲ ଫ୍ଲାଗ ଗାର୍ଡରେ ଥିବା ଆର୍ମି କଣ୍ଟିଜେଣ୍ଟର ନେତୃତ୍ୱ ମେଜର ଦୀନେଶ ନାଗନଗୋମ, ଲେଫ୍ଟନାଣ୍ଟ କମାଣ୍ଡର ସଚିନ ଧନଖଡ ନୌସେନା ଦଳ ଏବଂ ସ୍କ୍ୱାର୍ଡନ ଲିଡର ସିଏସ୍ ଶ୍ରବଣ ଦେବୈୟାଙ୍କ ଦ୍ୱାରା ବାୟୁସେନା କଣ୍ଟିଜେଣ୍ଟ ଦାୟିତ୍ୱ ତୁଲାଇବେ। ଅତିରିକ୍ତ ଡିସିପି ଅଚିନ ଗର୍ଗ ଦିଲ୍ଲୀ ପୁଲିସ ଟିମର ନେତୃତ୍ୱ ନେବେ।

ତ୍ରିରଙ୍ଗା ଉତ୍ତୋଳନ ପରେ ତ୍ରିରଙ୍ଗାକୁ ‘ରାଷ୍ଟ୍ରୀୟ ଅଭିବାଦନ’ ମିଳିବ । ଗୋଟିଏ ଜେସିଓ ଓ ଅନ୍ୟାନ୍ୟ ପଦବୀକୁ ନେଇ ଗଠିତ ପଞ୍ଜାବ ରେଜିମେଣ୍ଟ ମିଲିଟାରୀ ବ୍ୟାଣ୍ଡ ଜାତୀୟ ପତାକା ଉତ୍ତୋଳନ ସମୟରେ ଜାତୀୟ ସଙ୍ଗୀତ ବଜାଇ ‘ରାଷ୍ଟ୍ରୀୟ ଅଭିବାଦନ’ ପ୍ରଦାନ କରିବ ଏବଂ ସୁବେଦାର ମେଜର ରାଜେନ୍ଦ୍ର ସିଂ ଏହି ବ୍ୟାଣ୍ଡ ପରିଚାଳନା କରିବେ।

ପ୍ରଧାନମନ୍ତ୍ରୀଙ୍କ ଦ୍ୱାରା ଜାତୀୟ ପତାକା ଉତ୍ତୋଳନ ହେବା ମାତ୍ରେ ଲାଇନ୍ ଆଷ୍ଟର୍ନ ଫର୍ମେସନରେ ଭାରତୀୟ ବାୟୁସେନାର ଦୁଇଟି ଆଡଭାନ୍ସ ଲାଇଟ୍ ହେଲିକପ୍ଟର ଧ୍ରୁବ ଦ୍ୱାରା କାର୍ଯ୍ୟକ୍ରମ ସ୍ଥଳରେ ପୁଷ୍ପବର୍ଷା କରାଯିବ । ହେଲିକପ୍ଟରର କ୍ୟାପଟେନ୍‍ ରହିବେ ୱିଙ୍ଗକମାଣ୍ଡର ଅମ୍ବର ଅଗ୍ରୱାଲ ଏବଂ ୱିଙ୍ଗକମାଣ୍ଡର ରାହୁଲ ନୈନୱାଲ ।

ପୁଷ୍ପବର୍ଷା ପରେ ପ୍ରଧାନମନ୍ତ୍ରୀ ଦେଶବାସୀଙ୍କୁ ସମ୍ବୋଧିତ କରିବେ। ତାଙ୍କ ଭାଷଣ ଶେଷରେ ନ୍ୟାସନାଲ କ୍ୟାଡେଟ କର୍ପସ (ଏନସିସି)ର କ୍ୟାଡେଟମାନେ ଜାତୀୟ ସଙ୍ଗୀତ ଗାନ କରିବେ । ଦେଶର ବିଭିନ୍ନ ବିଦ୍ୟାଳୟର ମୋଟ ୨୦୦୦ ବାଳକ ଓ ବାଳିକା କ୍ୟାଡେଟ୍ (ସେନା, ନୌସେନା ଓ ବାୟୁସେନା) ଏହି ଉତ୍ସବରେ ଅଂଶଗ୍ରହଣ କରିବେ ଏହି କ୍ୟାଡେଟମାନେ ରାମପାର୍ଟ ସମ୍ମୁଖ ଜ୍ଞାନପଥରେ ବସିବେ। ସେମାନେ ତ୍ରିରଙ୍ଗା କିଟ୍ ସହିତ ‘ମାଇଁ ଭାରତ ‘ ଲୋଗୋ ତିଆରି କରିବେ । ମୋଟ ୫୦୦ ଜାତୀୟ ସେବା ଯୋଜନା (ଏନ୍ଏସ୍ଏସ୍) ସ୍ୱେଚ୍ଛାସେବୀ ମଧ୍ୟ ଅଂଶଗ୍ରହଣ କରିବେ ।

ନୂଆଦିଲ୍ଲୀ: ବିଭିନ୍ନ ସମ୍ପ୍ରଦାୟରେ ହାତୀମାନଙ୍କ ସୁରକ୍ଷା ପାଇଁ ନିଆଯାଉଥିବା ପଦକ୍ଷେପଗୁଡ଼ିକୁ ବିଶ୍ୱ ହସ୍ତୀ ଦିବସରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଶଂସା କରିଛନ୍ତି। ହାତୀମାନେ ଚଳପ୍ରଚଳ କରିବା ପାଇଁ ଏକ ଅନୁକୂଳ ଆବାସସ୍ଥଳୀ ଯୋଗାଇ ଦେବା ଦିଗରେ ଯଥାସମ୍ଭବ ପ୍ରଚେଷ୍ଟା ପାଇଁ ପ୍ରତିବଦ୍ଧତାକୁ ଶ୍ରୀ ମୋଦୀ ପୁଣି ଦୋହରାଇଛନ୍ତି।

ଆମ ସଂସ୍କୃତି ଓ ଇତିହାସରେ ହାତୀମାନେ କେତେ ମୂଲ୍ୟବାନ ଏବଂ ସେମାନଙ୍କର ଗୁରୁତ୍ୱ କେତେ ତାହା ମଧ୍ୟ ପ୍ରଧାନମନ୍ତ୍ରୀ ଉଲ୍ଲେଖ କରିଛନ୍ତି। ବିଗତ ବର୍ଷ ମାନଙ୍କରେ ହାତୀମାନଙ୍କ ସଂଖ୍ୟା ବୃଦ୍ଧି ପାଉଥିବାରୁ ସେ ସନ୍ତୋଷ ପ୍ରକାଶ କରିଛନ୍ତି।

ପ୍ରଧାନମନ୍ତ୍ରୀ ଏକ୍ସ ରେ ପୋଷ୍ଟ କରିଛନ୍ତି;

“ହାତୀମାନଙ୍କ ସୁରକ୍ଷା ପାଇଁ ବିଭିନ୍ନ ସମ୍ପ୍ରଦାୟରେ କରାଯାଉଥିବା ପ୍ରଚେଷ୍ଟାକୁ ପ୍ରଶଂସା କରିବା ପାଇଁ ବିଶ୍ୱ ହସ୍ତୀ ଦିବସ ଏକ ଅବସର। ଏଥିସହ ହାତମାନେ ଯେପରି ସୁରୁଖୁରୁରେ ଚଳପ୍ରଚଳ କରିପାରିବେ ସେଥିପାଇଁ ଏକ ଅନୁକୂଳ ଆବାସ ବାତାବରଣ ସୃଷ୍ଟି କରିବା ଦିଗରେ ଆମେ ପୁଣି ଆମ ପ୍ରତିବଦ୍ଧତାକୁ ଦୋହରାଉଛୁ। ଆମ ଭାରତରେ ମଧ୍ୟ ହାତୀ ଆମ ସଂସ୍କୃତି ଓ ଇତିହାସ ସହ ଜଡ଼ିତ। ଏବଂ ଏହା ମଧ୍ୟ ଖୁସିର ବିଷୟ ଯେ ବିଗତ କେଇ ବର୍ଷ ମାନଙ୍କରେ ସେମାନଙ୍କ ସଂଖ୍ୟା ବୃଦ୍ଧି ପାଇଚାଲିଛି।”

ନୂଆଦିଲ୍ଲୀ: ସରକାର ଦେଶର କୃଷକମାନଙ୍କୁ ସଶକ୍ତ କରିବା ପାଇଁ ପ୍ରତିବଦ୍ଧ ଅଛନ୍ତି ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂଆଦିଲ୍ଲୀରେ ୧୦୯ କିସମର ନୂଆ ଫସଲ ଜାରି କରି କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, ପରିବେଶ ଅନୁକୂଳ ଏବଂ ଉଚ୍ଚ ଅମଳକ୍ଷମ କିସମର ଫସଲ ଚାଷୀମାନଙ୍କର ଆୟ ବୃଦ୍ଧି କରିବ।

ପ୍ରାକୃତିକ ଚାଷ ପ୍ରତି କୃଷକମାନଙ୍କର ଆଗ୍ରହ ବୃଦ୍ଧି ପାଉଥିବାରୁ ଶ୍ରୀ ମୋଦୀ ଖୁସି ପ୍ରକାଶ କରିଛନ୍ତି। ଏହି ଅବସରରେ ଚାଷୀମାନଙ୍କର ଅନୁଭୂତି ଶୁଣିବା ସହ ପ୍ରାକୃତିକ ଚାଷର ଉପକାର ବିଷୟରେ ବିସ୍ତୃତ ଭାବରେ ଆଲୋଚନା କରିଥିଲେ।

ପ୍ରଧାନମନ୍ତ୍ରୀ ଏକ୍ସରେ ପୋଷ୍ଟ କରିଛନ୍ତି;

“ଆମେ କୃଷକ ଭାଇ ଓ ଭଉଣୀମାନଙ୍କୁ ସଶକ୍ତ କରିବାକୁ ପ୍ରତିଶ୍ରୁତିବଦ୍ଧ। ଏ ଦିଗରେ ଆଜି ଆମେ ଦିଲ୍ଲୀରେ ୧୦୯ଟି ନୂତନ କିସମର ଫସଲ ଜାରି କରିବାର ସୁଯୋଗ ପାଇଲୁ। ଏହି ଜଳବାୟୁ ଅନୁକୂଳ ଏବଂ ଅଧିକ ଅମଳକ୍ଷମ କିସମରୁ ଉତ୍ପାଦନରେ ବୃଦ୍ଧି ସହିତ ଆମର କୃଷକମାନଙ୍କର ଆୟ ମଧ୍ୟ ବୃଦ୍ଧି ପାଇବ।”

“ମୁଁ ସନ୍ତୁଷ୍ଟ ଯେ ଆମର କୃଷକ ଭାଇ ଓ ଭଉଣୀମାନେ ମଧ୍ୟ ଶୀଘ୍ର ପ୍ରାକୃତି ଚାଷ ଆଡକୁ ଅଗ୍ରସର ହେଉଛନ୍ତି। ଆଜି ମୁଁ ତାଙ୍କ ଅନୁଭୂତି ବିଷୟରେ ଅତି ନିକଟରୁ ଜାଣିବାର ସୁଯୋଗ ପାଇଲି। ଏହି ସମୟ ମଧ୍ୟରେ ଆମେ ପ୍ରାକୃତିକ ଚାଷର ଉପକାର ବିଷୟରେ ବିସ୍ତୃତ ଭାବରେ ଆଲୋଚନା କରିଥିଲୁ।”

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ନୂଆଦିଲ୍ଲୀସ୍ଥିତ ଭାରତୀୟ କୃଷି ଗବେଷଣା ସଂସ୍ଥା ଠାରେ ୧୦୯ଟି ଉଚ୍ଚ ଉତ୍ପାଦନକ୍ଷମ ଜଳବାୟୁ ସହନଶୀଳ ଏବଂ ଜୈବ ଉର୍ବରୀକରଣ ପ୍ରଜାତିର ଫସଲ ଉନ୍ମୋଚନ କରିଛନ୍ତି।

ଏହି ଅବସରରେ ପ୍ରଧାନମନ୍ତ୍ରୀ କୃଷକ ଏବଂ ବୈଜ୍ଞାନିକମାନଙ୍କ ସହ ମଧ୍ୟ ଆଲୋଚନା କରିଥିଲେ। ଏହି ନୂତନ ଫସଲ ପ୍ରଜାତିର ମହତ୍ତ୍ୱ ଉପରେ ଆଲୋଚନା କରି ପ୍ରଧାନମନ୍ତ୍ରୀ କୃଷି କ୍ଷେତ୍ରରେ ମୂଲ୍ୟ ବୃଦ୍ଧିର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ପ୍ରଧାନମନ୍ତ୍ରୀ କହିଛନ୍ତି ଯେ, ଏହି ନୂତନ କିସମଗୁଡିକ ଅତ୍ୟନ୍ତ ଲାଭଦାୟକ ହେବ କାରଣ ଏହା ଚାଷୀଙ୍କ ଖର୍ଚ୍ଚ ହ୍ରାସ କରିବାରେ ସହାୟକ ହେବା ସହିତ ପରିବେଶ ଉପରେ ମଧ୍ୟ ସକାରାତ୍ମକ ପ୍ରଭାବ ପକାଇବ।

ପ୍ରଧାନମନ୍ତ୍ରୀ ବାଜରାର ଗୁରୁତ୍ୱ ବିଷୟରେ ଆଲୋଚନା କରିଥିଲେ ଏବଂ ଲୋକମାନେ କିପରି ପୁଷ୍ଟିକର ଖାଦ୍ୟ ଆଡକୁ ଅଗ୍ରସର ହେଉଛନ୍ତି ସେ ବିଷୟରେ ଉଲ୍ଲେଖ କରିଥିଲେ। ପ୍ରାକୃତିକ ଚାଷର ଉପକାରିତା ଏବଂ ଜୈବିକ ଚାଷ ପ୍ରତି ସାଧାରଣ ଲୋକଙ୍କ ବୃଦ୍ଧି ପାଉଥିବା ଆସ୍ଥା ବିଷୟରେ ସେ କହିଥିଲେ ଯେ ଲୋକମାନେ ଜୈବିକ ଖାଦ୍ୟ ଖାଇବା ଏବଂ ଦାବି କରିବା ଆରମ୍ଭ କରିଛନ୍ତି। ପ୍ରାକୃତିକ ଚାଷକୁ ପ୍ରୋତ୍ସାହିତ କରିବା ପାଇଁ ସରକାରଙ୍କ ପ୍ରୟାସକୁ କୃଷକମାନେ ପ୍ରଶଂସା କରିଛନ୍ତି।

ସଚେତନତା ସୃଷ୍ଟି କରିବାରେ କୃଷି ବିଜ୍ଞାନ କେନ୍ଦ୍ର (କେଭିକେ) ର ଭୂମିକାକୁ ମଧ୍ୟ କୃଷକମାନେ ପ୍ରଶଂସା କରିଛନ୍ତି। ପ୍ରଧାନମନ୍ତ୍ରୀ ପରାମର୍ଶ ଦେଇଥିଲେ ଯେ କେଭିକେଗୁଡିକ ପ୍ରତି ମାସରେ ବିକଶିତ ହେଉଥିବା ନୂତନ ପ୍ରଜାତିର ଲାଭ ବିଷୟରେ ସକ୍ରିୟ ଭାବରେ କୃଷକମାନଙ୍କୁ ଅବଗତ କରାଇବା ଉଚିତ ଯାହା ଦ୍ୱାରା ଏହାର ଫାଇଦାକୁ ନେଇ ସଚେତନତା ବୃଦ୍ଧି ପାଇବ।

ଏହି ନୂତନ ଫସଲ ପ୍ରଜାତିର ବିକାଶ ପାଇଁ ପ୍ରଧାନମନ୍ତ୍ରୀ ବୈଜ୍ଞାନିକମାନଙ୍କୁ ମଧ୍ୟ ପ୍ରଶଂସା କରିଥିଲେ। ଅବ୍ୟବହୃତ ଫସଲକୁ ମୁଖ୍ୟ ସ୍ରୋତରେ ଆଣିବା ପାଇଁ ପ୍ରଧାନମନ୍ତ୍ରୀ ଦେଇଥିବା ପରାମର୍ଶ ଅନୁଯାୟୀ ସେମାନେ କାର୍ଯ୍ୟ କରୁଛନ୍ତି ବୋଲି ବୈଜ୍ଞାନିକମାନେ ସୂଚନା ଦେଇଥିଲେ।

ପ୍ରଧାନମନ୍ତ୍ରୀଙ୍କ ଦ୍ୱାରା ଜାରି କରାଯାଇଥିବା ୬୧ ଟି ଫସଲର ୧୦୯ ଟି ପ୍ରଜାତି ମଧ୍ୟରେ ୩୪ଟି କ୍ଷେତ ଫସଲ ଏବଂ ୨୭ଟି ଉଦ୍ୟାନ କୃଷି ଫସଲ ଅନ୍ତର୍ଭୁକ୍ତ । କ୍ଷେତ ଫସଲ ମଧ୍ୟରେ ବାଜରା, ଚାରାଜାତୀୟ ଫସଲ, ତୈଳବୀଜ, ଡାଲିଜାତୀୟ ଫସଲ, ଆଖୁ, କପା, ତନ୍ତୁଜାତୀୟ ଏବଂ ଅନ୍ୟାନ୍ୟ ସମ୍ଭାବ୍ୟ ଫସଲ ସମେତ ବିଭିନ୍ନ ଶସ୍ୟର ବିହନ ଜାରି କରାଯାଇଥିଲା। ଉଦ୍ୟାନ କୃଷି ଫସଲ ମଧ୍ୟରେ ବିଭିନ୍ନ ପ୍ରକାରର ଫଳ, ପନିପରିବା, ବାଡିବଗିଚାରେ ଚାଷ ହେଉଥିବା ଫସଲ, କନ୍ଦଜାତୀୟ ଫସଲ, ମସଲା, ଫୁଲ ଓ ଔଷଧୀୟ ଫସଲ ଜାରି କରାଯାଇଥିଲା।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ପୂର୍ବାହ୍ନ ୧୧ଟାରେ ନୂଆଦିଲ୍ଲୀସ୍ଥିତ ଇଣ୍ଡିଆ ଏଗ୍ରିକଲଚରାଲ ରିସର୍ଚ୍ଚ ଇନଷ୍ଟିଚ୍ୟୁଟରେ ୧୦୯ ହାଇ ୟଲ୍ଡିଂ, ପରିବେଶ ଅନୁକୂଳ ଏବଂ ପୋଷକତତ୍ତ୍ୱ ଥିବା ଶସ୍ୟର ଉନ୍ମୋଚନ କରିବେ। ଏହି ଅବସରରେ ପ୍ରଧାନମନ୍ତ୍ରୀ କୃଷକ ଓ ଗବେଷକମାନଙ୍କ ସହ ମଧ୍ୟ ଭାବ ବିନିମୟ କରିବେ।

ପ୍ରଧାନମନ୍ତ୍ରୀ ୧୦୯ ଭେରାଇଟିର ୬୧ଟି ଶସ୍ୟ ଉନ୍ମୋଚନ କରିବେ ଯାହା ମଧ୍ୟରେ ୩୪ କ୍ଷେତ୍ର ଫସଲ ଏବଂ ୨୭ଟି ଉଦ୍ୟାନ ଫସଲ ରହିଛି। କ୍ଷେତ୍ର ଫସଲ ମଧ୍ୟରେ ବାଜରା, ଗୋଖାଦ୍ୟ ଫସଲ, ତୈଳବୀଜ, ଡାଲି ଜାତୀୟ ଶସ୍ୟ, ଆଖୁ, କପା, ତନ୍ତୁ ଏବଂ ଅନ୍ୟାନ୍ୟ ସମ୍ଭାବିତ ଫସଲ ଭଳି ଡାଲି ଜାତୀୟ ଫସଲ ଉନ୍ମୋଚନ ହେବ । ଉଦ୍ୟାନ ଶସ୍ୟ ମଧ୍ୟରେ ବିଭିନ୍ନ ପ୍ରକାରର ଫଳ, ପନିପରିବା, ବୃକ୍ଷରୋପଣ, ଆଳୁ ଜାତୀୟ, ମସଲା, ଫୁଲ ଏବଂ ଔଷଧୀୟ ଫସଲ ଉନ୍ମୋଚନ ହେବ।

ପ୍ରଧାନମନ୍ତ୍ରୀ ସର୍ବଦା ପୁଷ୍ଟିକର ଚାଷ ଏବଂ ପରିବେଶ ଅନୁକୂଳ ଚାଷ ପଦ୍ଧତିକୁ ପ୍ରୋତ୍ସାହିତ କରି ଆସିଛନ୍ତି। ସେ ମଧ୍ୟ ମଧ୍ୟାହ୍ନ ଭୋଜନ, ଅଙ୍ଗନବାଡ଼ି ଭଳି ସରକାରୀ ଯୋଜନା ସହ ସମ୍ପର୍କ ଥିବା ବିଭିନ୍ନ ପ୍ରକାର ପୋଷକତତ୍ତ୍ୱ ବିଶିଷ୍ଟ ଶସ୍ୟକୁ ଗୁରୁତ୍ୱ ଦେଇଛନ୍ତି ଯାହାକି ଭାରତକୁ କୁପୋଷଣରୁ ମୁକ୍ତ କରିବ। ଏହି ପଦକ୍ଷେପ କୃଷକମାନଙ୍କର ଆୟ ବଢ଼ାଇବା ସହ ସେମାନଙ୍କ ପାଇଁ ଔଦ୍ୟୋଗିକତାର ନୂତନ କ୍ଷେତ୍ର ସୃଷ୍ଟି କରିବ ବୋଲି ପ୍ରଧାନମନ୍ତ୍ରୀ ଗୁରୁତ୍ୱ ଦେଇଛନ୍ତି। ୧୦ ହାଇୟଲ୍ଡିଂ ଶସ୍ୟର ଉନ୍ମୋଚନ ଏ ଦିଗରେ ଆଉ ଏକ ପଦକ୍ଷେପ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ, ୱାୟନାଡରେ ଭୂସ୍ଖଳନ ଦ୍ୱାରା ପ୍ରଭାବିତ ହୋଇଥିବା ଲୋକଙ୍କ ପାଇଁ ଆମର ପ୍ରାର୍ଥନା ରହିଛି ଏବଂ ରିଲିଫ ପ୍ରୟାସରେ ସାହାଯ୍ୟ କରିବା ପାଇଁ କେନ୍ଦ୍ର ସରକାର ସମସ୍ତ ସମ୍ଭାବ୍ୟ ସହାୟତା ପ୍ରତିଶ୍ରୁତି ଦେଇଛି। କେନ୍ଦ୍ର ସରକାର ପ୍ରତ୍ୟେକ ସହାୟତା ଓ ରିଲିଫ କାର୍ଯ୍ୟ ପାଇଁ ରାଜ୍ୟ ସରକାରଙ୍କ ସହ ଠିଆ ହୋଇଛନ୍ତି ବୋଲି ସେ କହିଛନ୍ତି। ପ୍ରଧାନମନ୍ତ୍ରୀ କେରଳର ୱାୟନାଡରେ ଆକାଶମାର୍ଗରୁ ସ୍ଥିତି ଅନୁଧ୍ୟାନ କରିବା ପରେ ଭୂସ୍ଖଳନ ପ୍ରଭାବିତ ଅଞ୍ଚଳ ପରିଦର୍ଶନ କରିବା ସହ ସ୍ଥିତି ସମୀକ୍ଷା କରିଛନ୍ତି।

ପ୍ରଧାନମନ୍ତ୍ରୀ ପ୍ରାକୃତିକ ବିପର୍ଯ୍ୟୟ ସମୟରେ ଆହତ ହୋଇଥିବା ରୋଗୀମାନଙ୍କୁ ଭେଟିବା ସହ ରିଲିଫ ଶିବିରରେ ରହୁଥିବା ଲୋକଙ୍କ ସହିତ ଆଲୋଚନା କରିଥିଲେ। ଏକ ସମୀକ୍ଷା ବୈଠକରେ ଶ୍ରୀ ମୋଦୀ ଆଶ୍ୱାସନା ଦେଇଛନ୍ତି ଯେ ଏହି ଦୁଃଖ ସମୟରେ କେନ୍ଦ୍ର ସରକାର ଏବଂ ସାରା ଦେଶ ବିପର୍ଯ୍ୟୟ ପ୍ରଭାବିତ ଲୋକଙ୍କ ସହଯୋଗ ପାଇଁ ପ୍ରସ୍ତୁତ ଅଛନ୍ତି। ମୁଖ୍ୟମନ୍ତ୍ରୀଙ୍କ ପକ୍ଷରୁ ବିସ୍ତୃତ ସ୍ମାରକପତ୍ର ପଠାଯିବ ବୋଲି ସେ କହିଛନ୍ତି।

ପ୍ରଧାନମନ୍ତ୍ରୀ କହିଛନ୍ତି ଯେ, ୱାୟନାଡରେ ଉଦ୍ଧାର କାର୍ଯ୍ୟ ଉପରେ ସେ ନଜର ରଖିଛନ୍ତି ଏବଂ କର୍ତ୍ତୃପକ୍ଷଙ୍କ ସହ ନିରନ୍ତର ଯୋଗାଯୋଗରେ ଅଛନ୍ତି । ସେ କହିଛନ୍ତି ଯେ, ବିପର୍ଯ୍ୟୟ ପରିଚାଳନା ପାଣ୍ଠି ପ୍ରଦାନ କରାଯାଇ ସାରିଛି ଏବଂ ଅବଶିଷ୍ଟ ଭାଗ ମଧ୍ୟ ତୁରନ୍ତ ପ୍ରଦାନ କରାଯିବ।

ଶ୍ରୀ ମୋଦୀ କହିଛନ୍ତି ଯେ ସାମ୍ପ୍ରତିକ ପରିସ୍ଥିତିର ମୁକାବିଲା କରିପାରୁଥିବା ସମସ୍ତ କେନ୍ଦ୍ରୀୟ ଏଜେନ୍ସିକୁ ଏକତ୍ରିତ କରାଯାଇଛି ଏବଂ ସେମାନେ ପ୍ରଭାବିତଙ୍କୁ ସାହାଯ୍ୟ କରୁଛନ୍ତି। ଏନଡିଆରଏଫ, ଏସଡିଆରଏଫ, ସେନା, ରାଜ୍ୟ ପୋଲିସ, ସ୍ଥାନୀୟ ଚିକିତ୍ସା ବଳ, ସ୍ୱେଚ୍ଛାସେବୀ ସଂଗଠନ ଏବଂ ଅନ୍ୟାନ୍ୟ ସେବା ଭିତ୍ତିକ ଅନୁଷ୍ଠାନର ଯବାନମାନେ ତୁରନ୍ତ ବିପର୍ଯ୍ୟୟ ପ୍ରଭାବିତ ଅଞ୍ଚଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ବୋଲି ସୂଚନା ଦେଇ ପ୍ରଧାନମନ୍ତ୍ରୀ ସେମାନଙ୍କୁ ପ୍ରଶଂସା କରିଥିଲେ।

ବିଶେଷ କରି ପରିବାରବର୍ଗଙ୍କୁ ହରାଇଥିବା ପିଲାମାନଙ୍କ ସମେତ ପ୍ରଭାବିତ ଲୋକଙ୍କୁ ସହାୟତା କରିବା ପାଇଁ ନୂତନ ଦୀର୍ଘମିଆଦୀ ଯୋଜନା ପ୍ରସ୍ତୁତ କରିବାର ଆବଶ୍ୟକତା ଉପରେ ଶ୍ରୀ ମୋଦୀ ଗୁରୁତ୍ୱାରୋପ କରିଥିଲେ। କେନ୍ଦ୍ରରୁ ଆବଶ୍ୟକ ସମସ୍ତ ସହଯୋଗରେ ରାଜ୍ୟ ସରକାର ଏଥିରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ବୋଲି ସେ ବିଶ୍ୱାସ ବ୍ୟକ୍ତ କରିଛନ୍ତି।

ପ୍ରଧାନମନ୍ତ୍ରୀ ୱାୟନାଡବାସୀଙ୍କୁ ଆଶ୍ୱାସନା ଦେଇ କହିଥିଲେ ଯେ ଘର, ସ୍କୁଲ, ସଡ଼କ ଭିତ୍ତିଭୂମି ଏବଂ ପିଲାଙ୍କ ଭବିଷ୍ୟତ ହେଉ ଏହି ଅଞ୍ଚଳରେ ଜୀବିକା ପୁନରୁଦ୍ଧାର କରିବା ପାଇଁ ଦେଶ ଏବଂ କେନ୍ଦ୍ର ସରକାର ଯଥାସମ୍ଭବ ଉଦ୍ୟମ କରିବେ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଗଷ୍ଟ ୧୧ ତାରିଖ ପୂର୍ବାହ୍ନ ୧୧ଟାରେ ନୂଆଦିଲ୍ଲୀସ୍ଥିତ ଇଣ୍ଡିଆ ଏଗ୍ରିକଲଚରାଲ ରିସର୍ଚ୍ଚ ଇନଷ୍ଟିଚ୍ୟୁଟରେ ୧୦୯ ହାଇ ୟଲ୍ଡିଂ, ପରିବେଶ ଅନୁକୂଳ ଏବଂ ପୋଷକତତ୍ତ୍ୱ ଥିବା ଶସ୍ୟର ଉନ୍ମୋଚନ କରିବେ। ଏହି ଅବସରରେ ପ୍ରଧାନମନ୍ତ୍ରୀ କୃଷକ ଓ ଗବେଷକମାନଙ୍କ ସହ ମଧ୍ୟ ଭାବ ବିନିମୟ କରିବେ।

ପ୍ରଧାନମନ୍ତ୍ରୀ ୧୦୯ ଭେରାଇଟିର ୬୧ଟି ଶସ୍ୟ ଉନ୍ମୋଚନ କରିବେ ଯାହା ମଧ୍ୟରେ ୩୪ କ୍ଷେତ୍ର ଫସଲ ଏବଂ ୨୭ଟି ଉଦ୍ୟାନ ଫସଲ ରହିଛି। କ୍ଷେତ୍ର ଫସଲ ମଧ୍ୟରେ ବାଜରା, ଗୋଖାଦ୍ୟ ଫସଲ, ତୈଳବୀଜ, ଡାଲି ଜାତୀୟ ଶସ୍ୟ, ଆଖୁ, କପା, ତନ୍ତୁ ଏବଂ ଅନ୍ୟାନ୍ୟ ସମ୍ଭାବିତ ଫସଲ ଭଳି ଡାଲି ଜାତୀୟ ଫସଲ ଉନ୍ମୋଚନ ହେବ । ଉଦ୍ୟାନ ଶସ୍ୟ ମଧ୍ୟରେ ବିଭିନ୍ନ ପ୍ରକାରର ଫଳ, ପନିପରିବା, ବୃକ୍ଷରୋପଣ, ଆଳୁ ଜାତୀୟ, ମସଲା, ଫୁଲ ଏବଂ ଔଷଧୀୟ ଫସଲ ଉନ୍ମୋଚନ ହେବ।

ପ୍ରଧାନମନ୍ତ୍ରୀ ସର୍ବଦା ପୁଷ୍ଟିକର ଚାଷ ଏବଂ ପରିବେଶ ଅନୁକୂଳ ଚାଷ ପଦ୍ଧତିକୁ ପ୍ରୋତ୍ସାହିତ କରି ଆସିଛନ୍ତି । ସେ ମଧ୍ୟ ମଧ୍ୟାହ୍ନ ଭୋଜନ, ଅଙ୍ଗନବାଡ଼ି ଭଳି ସରକାରୀ ଯୋଜନା ସହ ସମ୍ପର୍କ ଥିବା ବିଭିନ୍ନ ପ୍ରକାର ପୋଷକତତ୍ତ୍ୱ ବିଶିଷ୍ଟ ଶସ୍ୟକୁ ଗୁରୁତ୍ୱ ଦେଇଛନ୍ତି ଯାହାକି ଭାରତକୁ କୁପୋଷଣରୁ ମୁକ୍ତ କରିବ । ଏହି ପଦକ୍ଷେପ କୃଷକମାନଙ୍କର ଆୟ ବଢ଼ାଇବା ସହ ସେମାନଙ୍କ ପାଇଁ ଔଦ୍ୟୋଗିକତାର ନୂତନ କ୍ଷେତ୍ର ସୃଷ୍ଟି କରିବ ବୋଲି ପ୍ରଧାନମନ୍ତ୍ରୀ ଗୁରୁତ୍ୱ ଦେଇଛନ୍ତି । ୧୦ ହାଇୟଲ୍ଡିଂ ଶସ୍ୟର ଉନ୍ମୋଚନ ଏ ଦିଗରେ ଆଉ ଏକ ପଦକ୍ଷେପ ।

ନୂଆଦିଲ୍ଲୀ: ଆଜି ବିଶ୍ୱ ସିଂହ ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସିଂହ ସଂରକ୍ଷଣ ଏବଂ ସୁରକ୍ଷା କାର୍ଯ୍ୟରେ ଜଡିତ ସମସ୍ତଙ୍କୁ ସାବାସୀ ଦେଇଛନ୍ତି। ଶ୍ରୀ ମୋଦୀ ଫେବୃଆରୀ ୨୦୨୪ରେ ଅନ୍ତର୍ଜାତୀୟ ବିଗ୍ କ୍ୟାଟ୍ ଆଲାଏନ୍ସ ପ୍ରତିଷ୍ଠା ପାଇଁ କେନ୍ଦ୍ର କ୍ୟାବିନେଟ୍‌ର ଅନୁମୋଦନ ଉପରେ ଆଲୋକପାତ କରିଛନ୍ତି, ଯାହା ବଡ ବିଲେଇମାନଙ୍କୁ ସୁରକ୍ଷା ଦେବା ପାଇଁ ସରକାରଙ୍କ ପ୍ରତିବଦ୍ଧତାକୁ ଦୋହରାଇଛି। ଏହି ଅବସରରେ ସମଗ୍ର ବିଶ୍ୱରୁ ମିଳିଥିବା ଉତ୍ସାହଜନକ ପ୍ରତିକ୍ରିୟାରେ ସେ ଖୁସି ବ୍ୟକ୍ତ କରିଛନ୍ତି।

ପ୍ରଧାନମନ୍ତ୍ରୀ ମୋଦୀ ସମସ୍ତ ବନ୍ୟଜନ୍ତୁ ପ୍ରେମୀଙ୍କୁ ଗିର ଜାତୀୟ ଉଦ୍ୟାନ ପରିଦର୍ଶନ କରିବା ଏବଂ ଗୁଜରାଟର ଲୋକମାନଙ୍କର ଅତିଥ୍ୟ ଗ୍ରହଣ କରିବା ସହ ସିଂହର ସୁରକ୍ଷା ପାଇଁ ନିଆଯାଇଥିବା ପଦକ୍ଷେପଗୁଡିକ ସମ୍ପର୍କରେ ଜାଣିବାକୁ ନିମନ୍ତ୍ରଣ ପ୍ରଦାନ କରିଛନ୍ତି।

ଏକ୍ସରେ ଏକ ଟ୍ୱିଟ୍ ଥ୍ରେଡ୍ ପୋଷ୍ଟ କରି ଶ୍ରୀ ମୋଦୀ କହିଛନ୍ତି;

“ବିଶ୍ୱ ସିଂହ ଦିବସରେ ମୁଁ ସିଂହ ସଂରକ୍ଷଣ କ୍ଷେତ୍ରରେ କାର୍ଯ୍ୟ କରୁଥିବା ସମସ୍ତଙ୍କୁ ପ୍ରଶଂସା କରୁଛି ଏବଂ ଏହି ବଡ ବିଲେଇମାନଙ୍କୁ ସୁରକ୍ଷା ଦେବା ପାଇଁ ଆମର ପ୍ରତିବଦ୍ଧତାକୁ ଦୋହରାଉଛି। ଆମେ ସମସ୍ତେ ଜାଣିଛୁ ଯେ, ଭାରତର ଗୁଜାରଟର ଗିରଠାରେ ସିଂହମାନଙ୍କର ଏକ ବୃହତ୍ ଜନସଂଖ୍ୟା ବାସ କରନ୍ତି। ବର୍ଷ ବର୍ଷ ଧରି ସେମାନଙ୍କ ସଂଖ୍ୟା ଯଥେଷ୍ଟ ବୃଦ୍ଧି ପାଇଛି, ଯାହା ଏକ ଭଲ ଖବର।”

“ଚଳିତ ବର୍ଷ ଫେବୃଆରୀରେ, ବଡ ବିଲେଇମାନେ ରହୁଥିବା ବିଶ୍ୱର ସମସ୍ତ ଦେଶକୁ ଏକତ୍ର କରିବା ପାଇଁ କେନ୍ଦ୍ର କ୍ୟାବିନେଟ୍ ଅନ୍ତର୍ଜାତୀୟ ବିଗ୍ କ୍ୟାଟ୍ ଆଲାଏନ୍ସ ପ୍ରତିଷ୍ଠାକୁ ଅନୁମୋଦନ ପ୍ରଦାନ କରିଛି। ସ୍ଥାୟୀ ବିକାଶକୁ ବୃଦ୍ଧି କରିବା ପାଇଁ ଏହା ଏକ ସାମଗ୍ରିକ ଆଭିମୁଖ୍ୟ ଗଠନ କରିବାକୁ ଚେଷ୍ଟା କରେ ଏବଂ ଏହି ପରିପ୍ରେକ୍ଷୀରେ ସମ୍ପ୍ରଦାୟର ଉଦ୍ୟମକୁ ମଧ୍ୟ ସମର୍ଥନ କରେ। ଏହି ପ୍ରୟାସକୁ ବିଶ୍ୱବ୍ୟାପୀ ଉତ୍ସାହଜନକ ପ୍ରତିକ୍ରିୟା ମିଳୁଛି।”

“ମୁଁ ମଧ୍ୟ ସମସ୍ତ ବନ୍ୟଜନ୍ତୁ ପ୍ରେମୀଙ୍କୁ ଗିର୍‌ରେ ଏସିଆର ରାଜକୀୟ ସିଂହ ଆବିଷ୍କାର କରିବାକୁ ନିମନ୍ତ୍ରଣ କରୁଛି। ଏହି ଅବସରରେ ସମସ୍ତେୁ ସିଂହର ସୁରକ୍ଷା ପାଇଁ ନିଆଯାଇଥିବା ପଦକ୍ଷେପ ସମ୍ପର୍କରେ ଜାଣିବାର ସୁଯୋଗ ପାଇବେ ଏବଂ ଏଥିସହ ଗୁଜରାଟର ଲୋକମାନଙ୍କର ଆତିଥ୍ୟକୁ ମଧ୍ୟ ଅନୁଭବ କରିପାରିବେ।”