Tag: ରେଢାଖୋଲ

କନ୍ଦର୍ପ ବେହେରା
ରେଢାଖୋଲ: ରେଢାଖୋଲ ସ୍ଥିତ ରାଣୀ ଅନ୍ନପୂର୍ଣା ସରକାରୀ ବାଳିକା ଉଚ୍ଚ ବିଦ୍ୟାଳୟରେ ୩୨ ତମ ସଡକ ସୁରକ୍ଷା ସପ୍ତାହ ପାଳନ ହୋଇଯାଇଛି। ଏହି କାର୍ଯ୍ୟକ୍ରମରେ ରେଢାଖୋଲ ବ୍ଲକ୍‌ର ମାଧ୍ୟମିକ ବିଦ୍ୟାଳୟର ଛାତ୍ରଛାତ୍ରୀମାନଙ୍କୁ ନେଇ ଏକ ରାଲି ସହର ପରିକ୍ରମା କରାଯାଇଥିଲା।

ଜନସଚେତନତା ସୃଷ୍ଟି ପାଇଁ ରାଲିରେ ପ୍ଲା କାର୍ଡ ଧରି ଓ ପୋଷ୍ଟର ମାଧ୍ୟମରେ ଜନସଚେତନତା କରାଯାଇଥିଲା। ଏହି ରାଲିକୁ ରେଢାଖୋଲ ଥାନାଧିକାରୀ ଏସ୍ ବି ଛତ୍ରିଆ ପତାକା ଦେଖାଇ ଆନୁଷ୍ଠାନିକ ଭାବରେ ଶୁଭାରମ୍ଭ କରିଥିଲେ।

ବିଦ୍ୟଳୟ ପରିସରରେ ଛାତ୍ରଛାତ୍ରୀମାନଙ୍କ ଦ୍ୱାରା ପ୍ରବନ୍ଧ, କୁଇଜ୍, ଶ୍ଲୋଗାନ୍ ଓ ଚିତ୍ରାଙ୍କନ ପ୍ରତିଯୋଗିତା ଅନୁଷ୍ଠିତ ହୋଇଥିଲା। କୃତି ପ୍ରତିଯୋଗୀମାନଙ୍କୁ ମୁଖ୍ୟଅତିଥି ପୁରସ୍କାର ପ୍ରଦାନ କରିଥିଲେ।

ବିଦ୍ୟାଳୟର ସହକାରୀ ଶିକ୍ଷକ ବିଜୟାନନ୍ଦ ପ୍ରଧାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ଥାନାଧିକାରୀ ଏସ୍‌. ବି. ଛତ୍ରିଆ, ମୁଖ୍ୟବକ୍ତା ଭାବରେ ଯଶୋବନ୍ତ ଚିନ୍ନାରା, ଟ୍ରାଫିକ୍ ସବ୍ ଇନସ୍ପେକ୍ଟର, ଆର୍ .ଟି.ଓ, ସେଚ୍ଛାସେବୀ ଅନୁଷ୍ଠାନ, ସାର୍କର ସଂଗଠକ ଚକ୍ରଧର ନନ୍ଦ ଓ ଅବସରପ୍ରାପ୍ତ ଶିକ୍ଷକ ଉଦିତ୍ କୁମାର ପାଟ୍ଟଯୋଶୀ ସମ୍ମାନୀତ ଅତିଥି ଭାବରେ ଯୋଗଦେଇଥିଲେ। ଶେଷରେ ଖେଳ ଶିକ୍ଷକ ନରେନ୍ଦ୍ର କୁମାର ଦେହୁରୀ ଧନ୍ୟବାଦ ଅର୍ପଣ କରିଥିଲେ।

କନ୍ଦର୍ପ ବେହେରା
ରେଢାଖୋଲ: ଆଜି ଅପରାହ୍ନ ୪ ଟାରେ ରେଢାଖୋଲରେ ଏକ ଅଜଣା ଗାଡି ଧକ୍କାରେ ଗୋଟିଏ ବଳଦର ଅନ୍ତଃବୁଜୁଳା ବାହାରି ପଡିବା ଭଳି ଏକ ଅଭାବନୀୟ ଘଟନା ଘଟିଛି।
ପ୍ରକାଶ ଯେ, ରେଢାଖୋଲ ସହରର ଜାତୀୟ ରାଜପଥ ୫୫ ର ବବି ସାରଭିସ୍ ସେଂଟର ନିକଟରେ ଅପରାହ୍ନ ପାଖାପାଖି ୪ ଟାରେ ରାସ୍ତା ଉପରେ ଠିଆ ହୋଇଥିବା ଏକ ବଳଦକୁ ଜୋରରେ ଏକ ଅଜଣା ଗାଡି ଧକ୍କା ଦେବା ଫଳରେ ବଳଦଟି ଗୁରୁତର ହୋଇ ପଡିବା ସହ ଅନ୍ତଃବୁଜୁଳା ବାହାରି ପଡିଥିଲା। ରେଢାଖୋଲରୁ ପ୍ରାଣୀଧନ ଚିକିତ୍ସକ ଆସି ବଳଦକୁ ଚିକିତ୍ସା କରିଥିଲେ। ଘଟଣା ସ୍ଥଳରେ ପୋଲିସ୍ ବିଭାଗ ମଧ୍ୟ ଉପସ୍ଥିତ ଥିଲେ। ଦୁର୍ଘଟଣା ଘଟାଇ ଟ୍ରକ୍‌ଟି ଫେରାର ମାରିଥିଲା।

କନ୍ଦର୍ପ ବେହେରା
ରେଢାଖୋଲ: ଗତକାଲି ରାତିରେ ବଡବାହାଳ ରେଞ୍ଜ ଅଂଚଳରୁ ହରିଣ ସିଙ୍ଘ, ଚମଡା, ଦେଶୀବନ୍ଧୁକ, ଫାସ ଜାଲ ଜଙ୍ଗଲ ବିଭାଗ ଜବତ କରିବା ସହ ୨ ଜଣଙ୍କୁ ଅଟକ ରଖିଥିବା ଏକ ବିଶ୍ୱସ୍ତ ସୂତ୍ରରୁ ଜଣା ପଡିଛି।

ପ୍ରକାଶ ଯେ, ସମ୍ବଲପୁର ଜିଲ୍ଲା ରେଢାଖୋଲ ବନଖଣ୍ଡ, ବଡବାହାଳ ରେଞ୍ଜ ଅଧିନସ୍ଥ ଭରତାପୁର ପଂଚାୟତର ଚୁଡାପୁଡୁଗ ଗ୍ରାମରୁ ବନବିଭାଗ ଦେଶୀବନ୍ଧୁକ, ଚମଡା, ହରିଣସିଙ୍ଘ ସହ ଫାସଜାଲ ଜବତ କରିଥିବା ବେସରକାରୀ ସୂତ୍ରରୁ ସୂଚନା ହସ୍ତଗତ ହୋଇଛି। ଏଥି ସହ ୨ ଜଣଙ୍କୁ ବନବିଭାଗ ଅଟକ ରଖି ଅଧିକ ସୂଚନା ପାଇଁ ପଚରାଉଚୁରା କରୁଥିବା ମଧ୍ୟ ଖବର ମିଳିଛି।

ଅଧିକ ସୂଚନା ପାଇଁ ବଡବାହାଳ ରେଞ୍ଜର ଅଧିକାରୀଙ୍କୁ ବାରମ୍ବାର ଯୋଗାଯୋଗ କରାଯାଉଥିଲେ ମଧ୍ୟ ସେ ସହଯୋଗ କରୁନଥିବା ଜଣାପଡିଛି। ବନବିଭାଗର ଜଣେ କର୍ମଚାରୀଙ୍କୁ ଏ ସଂପର୍କରେ ପଚାରିବାରୁ ସେ ଏ ସଂପର୍କରେ ସବିଶେଷ ତଥ୍ୟ ଦିଆଯିବ ବୋଲି ଆମ ପ୍ରତିନିଧିଙ୍କ ଠାରେ ପ୍ରକାଶ କରିଛନ୍ତି।

ରେଞ୍ଜ ଅଧିକାରୀ ସାମ୍ବାଦିକ ମାନଙ୍କୁ ସହଯୋଗ କରୁ ନଥିବାରୁ ରେଢାଖୋଲ ସାମ୍ବାଦିକ ମହଲରେ ଅସନ୍ତୋଷ ପ୍ରକାଶ ପାଇଛି। ଗତକାଲି ଠାରୁ ଏ ସବୁ ଜବତ କରିଥିଲେ ମଧ୍ୟ  ବନବିଭାଗ ଏପର୍ଯ୍ଯନ୍ତ ସାମ୍ବାଦିକମାନଙ୍କୁ ତଥ୍ୟ ଦେବାରେ ବିଳମ୍ବ କରିଥିବାରୁ ବନବିଭାଗ ଉପରେ ପ୍ରଶ୍ନ ସୃଷ୍ଟି ହେଉଛି।

କନ୍ଦର୍ପ ବେହେରା
ରେଢାଖୋଲ: ଜନୈକା ମହିଳାଙ୍କୁ ଜଣେ ଫରେଷ୍ଟଗାର୍ଡ ଅସଦାଚରଣ ଅଭିଯୋଗରେ ରେଢାଖୋଲ କେନ୍ଦୁପତ୍ର ଡିଏଫ୍‌ଓ ଙ୍କ କାର୍ଯ୍ୟାଳୟରେ ପରିବାର ତରଫରୁ ଆଜି ଧାରଣାରେ ବସିଥିଲେ।

ପ୍ରକାଶ ଯେ, ସୋନପୁର ଜିଲ୍ଲା ବୀରମହାରାଜପୁର ଅମରପାଲି ଗ୍ରାମର ଜନୈକା ମହିଳାଙ୍କୁ ସେଇ ଗ୍ରାମର ବରୁଣ ନାଏକ ନାମକ ଫରେଷ୍ଟ ଗାର୍ଡ ଗତ ତା ୧୫ ନଭେମ୍ବର ରାତିରେ ଶାଢିକୁ ଟଣାଓଟରା କରିବା ସହ ଅଭଦ୍ର ଭାଷାରେ ଗାଳିଗୁଲଜ କରିଥିଲେ। ଏପରିକି ଜୀବନରେ ମାରିଦେବାକୁ ଧମକ ମଧ୍ୟ ଦେଇଥିବା ବୀରମହାରାଜପୁର ଥାନାରେ ଅଭିଯୋଗ

ହୋଇଛି। ଏନେଇ ରେଢାଖୋଲ କେନ୍ଦୁପତ୍ର ଡିଏଫ୍‌ଓଙ୍କ କାର୍ଯ୍ୟାଳୟରେ ଫରେଷ୍ଟ ଗାର୍ଡଙ୍କୁ ଚାକିରିରୁ ବହିଷ୍କାର କରିବା ଦାବୀରେ ପରିବାର ତରଫରୁ ଧାରଣାରେ ବସିଥିଲେ। ମହିଳାଙ୍କ ଅଭିଯୋଗ ଯେ, ଫରେଷ୍ଟଗାର୍ଡ ଆଗରୁ ବହୁବାର ସେଇ ଗାଁ ରେ ଝିଅବୋହୂମାନଙ୍କୁ ଖରାପ କଥା କହିବା ଅଭିଯୋଗରେ ଗାଁରେ ସମାଧାନ ହୋଇଥିଲା। ଏହା ସତ୍ତ୍ୱେ ସେ ପୁନର୍ବାର ଗ୍ରାମର ଜନୈକା ମହିଳାଙ୍କୁ ଅସଦାଚରଣ କରିବାରୁ ସଂପୃକ୍ତ ମହିଳାଙ୍କ ପରିବାର ଅତିଷ୍ଠ ହୋଇ ଥାନାର ଦ୍ୱାରସ୍ଥ ହେବା ସହ ବହିଷ୍କାର ଦାବୀରେ ରେଢାଖୋଲ କେନ୍ଦୁପତ୍ର ଡିଏଫ୍‌ଓଙ୍କ କାର୍ଯ୍ୟାଳୟରେ ଧାରଣାରେ ବସିଥିଲେ। ଡିଏଫ୍‌ଓ ସାତ ଦିନ ମଧ୍ୟରେ ଏହାର ସମାଧାନ କରିବାକୁ ପ୍ରତିଶୃତି ଦେବା ପରେ ଧାରଣାରେ ବସିଥିବା ପୀଡିତ ପରିବାର ଧାରଣାକୁ ସ୍ଥଗିତ ରଖିଥିଲେ।

କନ୍ଦର୍ପ ବେହେରା
ରେଢାଖୋଲ: ବନ ସଂରକ୍ଷଣ ସମିତି ରଖିଥବା ଜଙ୍ଗଲକୁ ନେଇ ଡଇଁଚା ଓ ହିନ୍ତରାଇ ଗ୍ରାମ ମଧ୍ୟରେ ବିବାଦ ଦେଖାଦେଇଥିବା ବେଳେ ଡଇଁଚା ଗ୍ରାମବାସୀ ଡିଏଫ୍‌ଓଙ୍କ ଠାରେ ଅଭିଯୋଗ କରିଛନ୍ତି।

ପ୍ରକାଶ ଯେ, ରେଢାଖୋଲ ବନଖଣ୍ଡ ଅନ୍ତର୍ଗତ ଡଇଁଚା ଗ୍ରାମରେ ଗତ ଅପ୍ରେଲ ମାସ ଠାରୁ ଏକ ବନ ସଂରକ୍ଷଣ ସମିତି ଗଠନ କରାଯାଇ ନିକଟସ୍ଥ ବଡଝରଣ ସଂରକ୍ଷିତ ଜଙ୍ଗଲକୁ ଜଗି ଆସୁଛନ୍ତି। ଅନୁଗୋଳ ଅଂଚଳରୁ ଆସି ଡଇଁଚା ଗ୍ରାମ ନିକଟରେ ବସତି ସ୍ଥାପନ କରି ରହିଥିବା ହିନ୍ତରାଇ ଗ୍ରାମବାସୀ ସେ ଜଙ୍ଗଲକୁ ଡଇଁଚା ଗ୍ରାମବାସୀ ରଖିଥିବାରୁ ଆମ୍ଭ ଗ୍ରାମବାସୀ ଅସୁବିଧା ପାଉଛୁ ବୋଲି ଡିଏଫ୍‌ଓଙ୍କ ଠାରେ ମଧ୍ୟ ଅଭିଯୋଗ କରିଥିଲେ। ହିନ୍ତରାଇ ଗ୍ରାମବାସୀର କେତେଜଣ ବ୍ୟକ୍ତି ପ୍ରତିବର୍ଷ ସେଇ ଜଙ୍ଗଲକୁ କାଟି ବାହାର ଜିଲ୍ଲାକୁ ବେପାର କରିଆସୁଥିଲେ। ଡଇଁଚା ବନ ସଂରକ୍ଷଣ ସମିତି ଜଙ୍ଗଲକୁ ପ୍ରତ୍ୟେକ ଦିନ ଜଗି ଆସୁଥିବାରୁ ସେମାନେ ସେଇ ଜଙ୍ଗଲରୁ କାଠ ଆଣି ନ ପାରିବାରୁ ବର୍ତ୍ତମାନ ଡଇଁଚା ବନ ସଂରକ୍ଷଣ ସମିତି ବିରୁଦ୍ଧରେ ଆଭିଯୋଗ କରୁଛନ୍ତି।

ଡଇଁଚା ଗ୍ରାମ ରାଜାରାଜୁଡା ଅମଳର ଗ୍ରାମ ହୋଇଥିବା ବେଳେ ହିନ୍ତରାଇ ଗ୍ରାମବାସୀ ଅନୁଗୋଳ ଜିଲ୍ଲାରୁ ଆସି ଆମ ଜଙ୍ଗଲ ବୋଲି ଦାବୀ କରୁଛନ୍ତି। ଡଇଁଚା ଗ୍ରାମବାସୀ ଏହା ଆମ ଜଙ୍ଗଲ ବୋଲି ଦାବୀ କରିବା ସହ ବନ ସଂରକ୍ଷଣ ସମିତି ଗଠନ କରିଛନ୍ତି। ଏହାକୁ ନେଇ ଦୁଇ ଗ୍ରାମ ମଧ୍ୟରେ ବିବାଦ ଦେଖା ଦେଇଥିବା ଡଇଁଚା ବନସଂରକ୍ଷଣ ସମିତି ରେଢାଖୋଲ ଡିଏଫଓ ଙ୍କ ଠାରେ ଅଭିଯୋଗ କରିବା ସହ ହିନ୍ତରାଇ ଗ୍ରାମର ଜନୈକ ବ୍ୟକ୍ତି ଡଇଁଚା ଗ୍ରାମବାସୀ ମାନଙ୍କୁ ମିଡିଆ ସାମ୍ନାରେ ଅପପ୍ରଚାର କରୁଥିବା ଡଇଁଚା ଗ୍ରାମବାସୀ ରେଢାଖୋଲ ଥାନାରେ ଅଭିଯୋଗ କରିବା ସହ ରେଢାଖୋଲ ଡିଏଫ୍‌ଓଙ୍କ ଠାରେ ଅଭିଯୋଗ କରିଛନ୍ତି।

ଜଙ୍ଗଲ ବିଭାଗ କୌଣସି ସହଯୋଗ ନ କଲେ ଡଇଁଚା ଗ୍ରାମବାସୀ ରଖିଥିବା ବନସଂରକ୍ଷଣ ସମିତିର ସମସ୍ତ ସଭ୍ୟ ସ୍ୱେଚ୍ଛାକୃତ ଭାବରେ ସେଇ ଜଙ୍ଗଲକୁ ସୁରକ୍ଷା ଦିଗରେ ଲାଗିବେ ବୋଲି ଆମ ପ୍ରତିନିଧିଙ୍କ ଠାରେ ପ୍ରକାଶ କରିଛନ୍ତି। ଏ ସଂପର୍କରେ ରେଢାଖୋଲ ଡିଏଫ୍‌ଙ୍କ ଠାରେ ଡଇଁଚା ବନସଂରକ୍ଷଣ ସମିତିର ସମସ୍ତ ସଭ୍ୟ ଲିଖିତାକାରରେ ଜଣାଇଛନ୍ତି।

କନ୍ଦର୍ପ ବେହେରା
ରେଢାଖୋଲ, ସମ୍ବଲପୁର ଜିଲ୍ଲା ନାକଟିଦେଉଳ ଥାନା କୁ୍ଞ୍ଜାମୁରା ଗାଁରେ ବାଇକ୍ ଦୁର୍ଘଟଣାରେ ଜଣେ ବୃଦ୍ଧଙ୍କ ମୃତ୍ୟୁ ହୋଇଛି। ବୃଦ୍ଧ ଜଣଙ୍କର ମୃତ୍ୟୁକୁ କେନ୍ଦ୍ର କରି ଗାଁରେ ଉତ୍ତେଜନା ଦେଖା ଦେବା ସହ ଗ୍ରାମବାସୀ ମାନେ କ୍ଷତିପୂରଣ ଦାବିରେ ରାସ୍ତାରୋକ କରିଥିଲେ।

ନାକଟିଦେଉଳ ଥାନା ବାଟଗାଁ ପଂଚାୟତର କୁ୍ଞ୍ଜାମୁରା ବକ୍ସିବଜାର ସାହିର ସଦା ନାଏକ ନାମରେ ଜଣେ ବୃଦ୍ଧ ବାଟଗାଁ ଗ୍ରାମକୁ କୌଣସି କାମରେ ଯାଇ ସେଠାରୁ ଫେରୁଥିଲେ । ବକ୍ସିବଜାର ସାହି ନିକଟରେ ପଛପଟୁ ଦୃତ ଗତିରେ ଦେବଗଡ ଜିଲ୍ଲା ରିଆମାଳ ଅଂଚଳର ଦୁଇଜଣ ବ୍ୟକ୍ତି ବାଟଗାଁ ପଟୁ ଓଡି -୧୫ ପି ୬୫୪୬ ନମ୍ବର ଥିବା ଏକ ମୋଟର ସାଇକେଲରେ ଫେରୁଥିଲେ । ବକ୍ସିବଜାର ଛକ ନିକଟରେ ବୃଦ୍ଧ ଜଣଙ୍କୁ ବାଇକ ଆରୋହୀ ଧକ୍କା ଦେଇଥିଲା । ଘଟଣା ସ୍ଥଳରେ ବୃଦ୍ଧଙ୍କର ମୃତ୍ୟୁ ଘଟିଥିଲ । ବାଇକ୍ ଆରୋହୀ ଦୁଇ ଜଣଙ୍କୁ ଗ୍ରାମବାସୀ ଅଟକ ରଖିବା ସହ କ୍ଷତିପୂରଣ ଦାବିରେ  ରାସ୍ତାରେ ଶବ ରଖି ରାଂଚି-ବିଜୟୱାଡା ରାସ୍ତା ଅବରୋଧ କରିଥିଲେ।

ଖବର ପାଇ ରେଢାଖୋଲ ଏସ୍‌ଡିପିଓ ହାଡିବନ୍ଧୁ ସ୍ୱାଇଁ ଓ ନାକଟିଦେଉଳ ଥାନାଧିକାରୀ ଘଟଣା ସ୍ଥଳରେ ପହଂଚିଥିଲେ। ଲୋକମାନେ ରାସ୍ତା ରୋକରୁ ହଟି ନ ଥିବା ଜଣା ପଡିଛି । ନାକଟିଦେଉଳ ଥାନାଧିକାରୀଙ୍କୁ ଏ ସଂପର୍କରେ ଜାଣିବା ପାଇଁ ଯୋଗାଯୋଗ କରିଥିଲେ ମଧ୍ୟ ଯୋଗାଯୋଗ ସଂଭବ ହୋଇପାରି ନ ଥିଲା ।