ନୂଆଦିଲ୍ଲୀ: ଆୟୋଜକ ଅଷ୍ଟ୍ରେଲିଆ ଆଇସିସି ଟି-୨୦ ବିଶ୍ୱକପରେ ବହୁତ ନୈରାଶ୍ୟ ଢଙ୍ଗରେ ଖେଳ ଆରମ୍ଭ କରିଛି। ନ୍ୟୁଜିଲ୍ୟାଣ୍ଡ ବିପକ୍ଷରେ କଙ୍ଗାରୁ ଦଳ ୮୯ ରନ ବ୍ୟବଧାନରେ ପରାଜୟ ବରଣ କରିଛି। ପ୍ରଥମେ ବ୍ୟାଟିଂ କରି କିୱି ଦଳ ଡିଭନ୍ କନୱେଙ୍କ ଅପରାଜିତ ୯୨ ରନର ଇନିଂସରେ ୩ ୱିକେଟ୍ ହରାଇ ୨୦୦ ରନ୍ ସଂଗ୍ରହ କରିଥିଲେ। ନ୍ୟୁଜିଲ୍ୟାଣ୍ଡର ମାରାତ୍ମକ ବୋଲିଂ ସାମ୍ନାରେ ଅଷ୍ଟ୍ରେଲିଆ ଦଳ ମାତ୍ର ୧୧୧ ରନ୍ ରେ ଅଟକିଯାଇଥିଲା।
Tag: ଅଷ୍ଟ୍ରେଲିଆ
ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ହେବାକୁ ଥିବା ଟି-୨୦ ବିଶ୍ୱକପ ମ୍ୟାଚକୁ ନେଇ ହାଇଦ୍ରାବାଦ ସାଂସଦ ତଥା ଏଆଇଏମଆଇଏମ ମୁଖ୍ୟ ଅସଦୁଦ୍ଦିନ ଓୱାଇସି ବିସିସିଆଇକୁ ପ୍ରଶ୍ନ କରିଛନ୍ତି। ଓୱାଇସି କହିଛନ୍ତି ଯେ, ଭାରତୀୟ ଦଳ ଅଷ୍ଟ୍ରେଲିଆରେ ପାକିସ୍ତାନ ସହ କ୍ରିକେଟ୍ ମ୍ୟାଚ୍ ଖେଳୁଛି କାହିଁକି? ସେଠାରେ ଭାରତୀୟ ଦଳକୁ ଖେଳିବାର ନଥିଲା। ଭାରତ ଅପେକ୍ଷା ପାକିସ୍ତାନ ସହିତ କ୍ରିକେଟ୍ ମ୍ୟାଚ୍ ଅଧିକ ଗୁରୁତ୍ୱପୂର୍ଣ୍ଣ କି? ଏସିଆ କପ୍ ଖେଳିବାକୁ ପାକିସ୍ତାନ ଯିବେ ନାହିଁ, ବରଂ ତାଙ୍କ ସହ ଅଷ୍ଟ୍ରେଲିଆରେ ଖେଳିବେ। ଇଏ କି ପ୍ରେମ। ଯଦି ତୁମେ ପାକିସ୍ତାନ ସହିତ ଖେଳୁ ନାହଁ? ତେବେ ଏହା ଟେଲିଭିଜନ ପାଇଁ ୨ ହଜାର କୋଟି କ୍ଷତି ତ ହେବ, ହେଲେ ଏହା ଭାରତଠାରୁ ଅଧିକ ଗୁରୁତ୍ୱପୂର୍ଣ୍ଣ କି?
ଓୱାଇସି ଏକ କାର୍ଯ୍ୟକ୍ରମରେ ଜୟ ଶାହାଙ୍କ ବିବୃତ୍ତି ବିଷୟରେ ଏକ ପ୍ରଶ୍ନର ଉତ୍ତର ଦେଉଥିଲେ ଯେଉଁଥିରେ ବିସିସିଆଇ ସଚିବ କହିଥିଲେ ଯେ, ଏସିଆ କପ୍ ଏକ ନିରପେକ୍ଷ ସ୍ଥାନରେ ଖେଳାଯିବ। କାରଣ ଭାରତୀୟ ଦଳ ପାକିସ୍ତାନ ଗସ୍ତ କରିବ ନାହିଁ। ଉଲ୍ଲେଖ ଯୋଗ୍ୟ ଯେ, ଜୟ ଶାହା ମଧ୍ୟ ଏସୀୟ କ୍ରିକେଟ୍ ପରିଷଦର ମୁଖ୍ୟ ଅଟନ୍ତି। ଓୱାଇସିଙ୍କୁ ପଚରାଯାଇଥିଲା କି ଟି-୨୦ ବିଶ୍ୱକପ ମ୍ୟାଚ, ଭାରତ କିମ୍ବା ପାକିସ୍ତାନ କିଏ ଜିତିବ? ଏହା ଉପରେ ସେ କହିଥିଲେ ଯେ, ‘ମୁଁ ଜାଣେ ନାହିଁ ଏହି ମ୍ୟାଚ୍ କିଏ ଜିତିବ, କିନ୍ତୁ ମୁଁ ଚାହୁଁଛି ଭାରତ ଜିତୁ ଏବଂ ଶାମି ଓ ସିରାଜଙ୍କ ଭଳି ଆମ ପିଲାମାନେ ପାକିସ୍ତାନକୁ ପରାସ୍ତ କରନ୍ତୁ।’ ଏହି ସମୟ ମଧ୍ୟରେ ସେ ମୁସଲିମ ଖେଳାଳିଙ୍କ ଟ୍ରୋଲ ପ୍ରସଙ୍ଗ ମଧ୍ୟ ଉଠାଇଥିଲେ।
ନୂଆଦିଲ୍ଲୀ: ଆଗତକାଲି ୱାର୍ମ ଅପ୍ ମ୍ୟାଚ୍ ରେ ଭାରତୀୟ ଦଳ ଅଷ୍ଟ୍ରେଲିଆକୁ ପରାସ୍ତ କରିଛି। ତେବେ ଟି -୨୦ ବିଶ୍ୱକପ ୨୦୨୨ ରେ ଟିମ୍ ଇଣ୍ଡିଆ ଅକ୍ଟୋବର ୨୩ ତାରିଖରୁ ପାକିସ୍ତାନ ବିପକ୍ଷ ମ୍ୟାଚ୍ ସହିତ ଅଭିଯାନ ଆରମ୍ଭ କରିବ। ଉଭୟ ଦଳ ମଧ୍ୟରେ ଏହି ମ୍ୟାଚ୍ ମେଲବୋର୍ଣ୍ଣ କ୍ରିକେଟ୍ ଗ୍ରାଉଣ୍ଡରେ ଖେଳାଯିବ। ଏଥି ସହିତ, ଏହି ମ୍ୟାଚ୍ ପୂର୍ବରୁ ଅକ୍ଟୋବର ୧୯ ତାରିଖରେ ଭାରତୀୟ ଦଳ ନ୍ୟୁଜିଲ୍ୟାଣ୍ଡ ବିପକ୍ଷ ଦ୍ୱିତୀୟ ଅଫିସିଆଲ୍ ୱାର୍ମ ଅପ୍ ମ୍ୟାଚ୍ ଖେଳିବ। ବାସ୍ତବରେ ଏହି ବିଶ୍ୱକପ୍ରେ ଅନେକ ଭେଟେରାନ୍ ଖେଳାଳିଙ୍କୁ ଶେଷ ଥର ପାଇଁ ଭାରତର ଟି-୨୦ ଜର୍ସିରେ ଦେଖିବାକୁ ମିଳିବ। ତେବେ ଆସନ୍ତୁ ଏପରି ଖେଳାଳୀମାନଙ୍କ ଉପରେ ନଜର ପକାଇବା, ଯେଉଁମାନେ ଏହି ବିଶ୍ୱକପ ପରେ ବୋଧହୁଏ ଭାରତୀୟ ଟି-୨୦ ଦଳରେ ଦେଖାଯିବେ ନାହିଁ।
ରୋହିତ ଶର୍ମା:
ଭାରତୀୟ ଅଧିନାୟକ ରୋହିତ ଶର୍ମା ଟି-୨୦ ଫର୍ମାଟରେ ରନ୍ ସ୍କୋର କରିବାକୁ ସଂଘର୍ଷ କରୁଛନ୍ତି। ଏହା ସହିତ ଭାରତୀୟ ଅଧିନାୟକଙ୍କୁ ମଧ୍ୟ ଅନେକ ଥର ଆଘାତର ସାମ୍ନା କରିବାକୁ ପଡିଛି। ବାସ୍ତବରେ, ଯେଉଁ ପ୍ରକାରର ବ୍ୟାଟ୍ସମ୍ୟାନ୍ ଭାବେ ରୋହିତ ଶର୍ମାଙ୍କୁ ବିବେଚନା କରାଯାଏ, ସେହିଭଳି ସେ ଖେଳ ଦେଖାଇ ନାହାଁନ୍ତି। ବିଶ୍ୱାସ କରାଯାଏ ଯେ, ଟି-୨୦ ବିଶ୍ୱକପ ୨୦୨୨ ପରେ ବୋଧହୁଏ ରୋହିତ ଶର୍ମାଙ୍କୁ ଏହି ଫର୍ମାଟରେ ଖେଳୁଥିବା ଦେଖା ଯାଇନପାରନ୍ତି, କାରଣ ଦିନିକିଆ ବିଶ୍ୱକପ ୨୦୨୩ କୁ ପ୍ରାୟ ୧ ବର୍ଷ ବାକି ଅଛି। ଆଗାମୀ ଦିନିକିଆI ବିଶ୍ୱକପ ଉପରେ ଧ୍ୟାନ ଦେବା ପାଇଁ ରୋହିତ ଶର୍ମା ଟି-୨୦ ଫର୍ମାଟ୍ କୁ ଛାଡିବେ ବୋଲି କଳ୍ପନାଜଳ୍ପନା ଚାଲିଛି।
ବିରାଟ କୋହଲି:
ପୂର୍ବତନ ଭାରତୀୟ ଅଧିନାୟକ ଦୀର୍ଘ ସମୟ ଧରି ଖରାପ ଫର୍ମ ସହ ସଂଘର୍ଷ କରିଥିଲେ। ତେବେ ବର୍ତ୍ତମାନ ବିରାଟ କୋହଲି ନିଜର ପୁରୁଣା ଶୈଳୀକୁ ଫେରିଛନ୍ତି। ଏସିଆ କପ୍ ୨୦୨୨ରେ ଆଫଗାନିସ୍ତାନ ବିପକ୍ଷ ମ୍ୟାଚରେ ପ୍ରାୟ ୩ ବର୍ଷ ପରେ ବିରାଟ କୋହଲି ଅନ୍ତର୍ଜାତୀୟ କ୍ରିକେଟ୍ ରେ ଏକ ଶତକ ହାସଲ କରିଥିଲେ, କିନ୍ତୁ ପୂର୍ବତନ ଭାରତୀୟ ଅଧିନାୟକ ଟି-୨୦ ଫର୍ମାଟରେ ଆଶା କରାଯାଉଥିବା ପରି ରନ୍ ସ୍କୋର କରିବାରେ ସକ୍ଷମ ନୁହଁନ୍ତି। ବିଶ୍ୱାସ କରାଯାଏ ଯେ, ଟି-୨୦ ବିଶ୍ୱକପ ୨୦୨୨ ପରେ ତାଙ୍କୁ ବୋଧହୁଏ ଭାରତୀୟ ଟି-୨୦ ଦଳରେ ଦେଖିବାକୁ ମିଳିବ ନାହିଁ। ଏଥିସହ ବିରାଟ କୋହଲି ଭାରତୀୟ ଅଧିନାୟକ ରୋହିତ ଶର୍ମାଙ୍କ ପରି ଆଗାମୀ ଦିନିକିଆ ବିଶ୍ୱକପ ୨୦୨୩ ଉପରେ ଧ୍ୟାନ ଦେବାକୁ ଚାହୁଁଛନ୍ତି।
ଦୀନେଶ କାର୍ତ୍ତିକ:
ଭାରତୀୟ ୱିକେଟ୍ କିପର ବ୍ୟାଟ୍ସମ୍ୟାନ୍ ଦୀନେଶ କାର୍ତ୍ତିକ ଆଇପିଏଲ୍ ୨୦୨୨ ରେ ଚମତ୍କାର ପ୍ରଦର୍ଶନ କରି ଟିମ୍ ଇଣ୍ଡିଆକୁ ଫେରିଥିଲେ। ସେ ବର୍ତ୍ତମାନ ଅଷ୍ଟ୍ରେଲିଆରେ ଭାରତୀୟ ଦଳ ପାଇଁ ଟି-୨୦ ବିଶ୍ଵ କପ ଖେଳିବାକୁ ଯାଉଛନ୍ତି। ବାସ୍ତବରେ, ଦୀନେଶ କାର୍ତ୍ତିକଙ୍କ ବୟସ ପ୍ରାୟ ୩୭ ବର୍ଷ। ଏଭଳି ପରିସ୍ଥିତିରେ, ଏକ ଦୃଢ ସମ୍ଭାବନା ଅଛି ଯେ, ଟି-୨୦ ବିଶ୍ୱକପ ୨୦୨୨ ପରେ ଭାରତୀୟ ଚୟନକର୍ତ୍ତାମାନେ ଏହି ବୟସ ସୀମା ମଧ୍ୟରେ ଦୀନେଶ କାର୍ତ୍ତିକଙ୍କୁ ବ୍ୟାଟିଂ କରିବାକୁ ସୁଯୋଗ ଦେବେ ନାହିଁ। ସୂଚନାଯୋଗ୍ୟ ଯେ, ଦୀନେଶ କାର୍ତ୍ତିକ ଟି-୨୦ ବିଶ୍ୱକପ ୨୦୦୭ ଭାରତୀୟ ଦଳର ଏକ ଅଂଶ ହୋଇସାରିଛନ୍ତି, କିନ୍ତୁ ଟି-୨୦ ବିଶ୍ୱକପ ୨୦୨୨ ରେ ବୋଧହୁଏ ଏହି ଖେଳାଳିଙ୍କୁ ଶେଷ ଥର ପାଇଁ ଭାରତ ପାଇଁ ଏକ ଆନ୍ତର୍ଜାତୀୟ ଟି-୨୦ ମ୍ୟାଚ ଖେଳୁଥିବା ଦେଖିବାକୁ ମିଳିବ।
ନୂଆଦିଲ୍ଲୀ: ଟି-୨୦ ବିଶ୍ୱକପ ପୂର୍ବରୁ ଫର୍ମକୁ ଫେରିବାର କେଏଲ ରାହୁଲ ସଂକେତ ଦେଇଛନ୍ତି। ଟିମ୍ ଇଣ୍ଡିଆ ପାଇଁ ଏହା ଏକ ଆଶ୍ଵସ୍ତି। ସେ ସୋମବାର ପ୍ରଥମ ୱାର୍ମ ଅପ୍ ମ୍ୟାଚ୍ ରେ ଅଷ୍ଟ୍ରେଲିଆ ବିପକ୍ଷରେ ଅର୍ଦ୍ଧଶତକ ହାସଲ କରିଛନ୍ତି। ଅଷ୍ଟ୍ରେଲିଆରେ ଏହା କ୍ରମାଗତ ଦ୍ୱିତୀୟ ଅର୍ଦ୍ଧଶତକ। ଏହାପୂର୍ବରୁ ସେ ପଶ୍ଚିମ ଅଷ୍ଟ୍ରେଲିଆ ବିପକ୍ଷରେ ଆକ୍ରମଣାତ୍ମକ ଇନିଂସ ଖେଳିଥିଲେ। ଏହିପରି ଭାବେ ସେ କ୍ରମାଗତ ଚତୁର୍ଥ ଅର୍ଦ୍ଧଶତକ ହାସଲ କରିଛନ୍ତି। ଏହି ମ୍ୟାଚରେ ଅଷ୍ଟ୍ରେଲିଆ ଅଧିନାୟକ ଆରୋନ ଫିଞ୍ଚ ଟସ୍ ଜିତି ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ଭାରତ ପ୍ରଥମ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୧୮୬ ରନ ସଂଗ୍ରହ କରିଥିଲା।
ଟିମ ଇଣ୍ଡିଆ ପକ୍ଷରୁ କେଏଲ ରାହୁଲ ସର୍ବାଧିକ ୩୩ ଟି ବଲରେ ୫୭ ରନ ସଂଗ୍ରହ କରିଥିଲେ। ଏହି ପାଳିରେ କେଏଲ ୩ ଟି ଛକା ଏବଂ ୬ ଟି ଚୌକା ମାରିଥିଲେ। ସେହିଭଳି ସୂର୍ଯ୍ୟକୁମାର ଯାଦବ ୩୩ ବଲରେ ୫୦ ରନ କରିଥିବା ବେଳେ ଏହି ପାଳିରେ ସେ ୧ ଟି ଛକା ଏବଂ ୬ ଟି ଚୌକା ମାରିଥିଲେ। ତେବେ ଅଧିନାୟକ ରୋହିତ ଶର୍ମା ୧୪ ଟି ବଲରେ ୧୫ ରନ ସଂଗ୍ରହ କରିଥିବା ବେଳେ ବିରାଟ କୋହିଲି ୧୩ ଟି ବଲରେ ୧୯ ରନ, ଦିନେଶ କାର୍ତ୍ତିକ ୧୪ ଟି ବଲରେ ୨୦ ରନ, ହାର୍ଦ୍ଦିକ ପାଣ୍ଡ୍ୟା ୨ ରନ, ରବିଚନ୍ଦ୍ରନ ଅଶ୍ଵିନୀ ୨ ଟି ବଲରେ ୫ ରନ ଏବଂ ଅକ୍ସର ପଟେଲ ୬ ରନ କରି ଅପରାଜିତ ରହିଥିଲେ।
ଜବାବରେ ଅଷ୍ଟ୍ରେଲିଆ ଦଳ ନିର୍ଦ୍ଧାରିତ ୨୦ ଓଭରରେ ସମସ୍ତ ୱିକେଟ ହରାଇ ୧୮୦ ରନ ସଂଗ୍ରହ କରିପାରିଥିଲେ। ଅଷ୍ଟ୍ରେଲିଆ ଅଧିନାୟକ ଆରୋନ ଫିଞ୍ଚ ସର୍ବାଧିକ ୫୪ ବଲରେ ୭୬ ରନ ସଂଗ୍ରହ କରିଥିବା ବେଳେ ମିଚେଲ ମାର୍ଶ ୩୫ ରନ, ଗ୍ଲେନ ମାକ୍ସୱେଲ ୨୩ ରନ ଏବଂ ଷ୍ଟିବେନ ସ୍ମିଥ ୧୧ ରନ ଯୋଡିଥିଲେ। ଏମାନଙ୍କ ବ୍ୟତୀତ ଅନ୍ୟ କୌଣସି ଖେଳାଳି ୨ ଅଙ୍କ ସ୍କୋରକୁ ଛୁଇଁପାରିନଥିଲେ। ଏହିପରି ଭାବରେ ଅଷ୍ଟ୍ରେଲିଆକୁ ଭାରତୀୟ ଦଳ ୬ ରନରେ ପରାସ୍ତ କରିଥିଲା।
ଭାରତୀୟ ବୋଲର ଭାବେ ଆହତରୁ ଫେରିଥିବା ମହମ୍ମଦ ଶାମି ମାତ୍ର ୧ ଓଭର ବୋଲିଂ କରି ୩ ଟି ୱିକେଟ ନେଇଥିଲେ। ସେହିଭଳି ଭୁବନେଶ୍ବର କୁମାର ୩ ଓଭରରେ ୨୦ ରନ ଦେଇ ୨ ଟି ୱିକେଟ ନେଇଥିବା ବେଳେ ଅର୍ଶଦୀପ ସିଂ ୩ ଓଭରରେ ୩୪ ରନ ଦେଇ ୧ ଟି ୱିକେଟ, ହର୍ଶଲ ପଟେଲ ୩ ଓଭରରେ ୩୦ ରନ ଦେଇ ୧ ଟି ଏବଂ ୟୁଜବେନ୍ଦ୍ର ଚହଲ ୩ ଓଭରରେ ୧ ଟି ୱିକେଟ ଅକ୍ତିଆର କରିଥିଲେ।
ନୂଆଦିଲ୍ଲୀ: ମହମ୍ମଦ ଶାମି ଟି-୨୦ ବିଶ୍ୱକପ ଖେଳିବେ। ତାଙ୍କୁ ଜସପ୍ରୀତ ବୁମ୍ରାଙ୍କ ସ୍ଥାନରେ ଦଳରେ ସ୍ଥାନ ଦିଆଯାଇଛି। ପିଠିରେ ଆଘାତ ଲାଗିଥିବାରୁ ବୁମରା ଟୁର୍ଣ୍ଣାମେଣ୍ଟରୁ ବାଦ ପଡିଛନ୍ତି। ନିକଟରେ ଶାମି ଏନସିଏରେ ଫିଟନେସ୍ ପରୀକ୍ଷାରେ ଉତ୍ତୀର୍ଣ୍ଣ ହୋଇ ବୁଧବାର ଅଷ୍ଟ୍ରେଲିଆ ଯାଇଥିଲେ। ବିଶ୍ୱକପ୍ର ମ୍ୟାଚ୍ ଅକ୍ଟୋବର ୧୬ ତାରିଖରୁ ଆରମ୍ଭ ହେଉଛି। ଅକ୍ଟୋବର ୨୩ ତାରିଖରେ ଭାରତକୁ ପାକିସ୍ତାନ ବିପକ୍ଷରେ ପ୍ରଥମ ମ୍ୟାଚ୍ ଖେଳିବାକୁ ପଡିବ। ଗତ ଟି-୨୦ ବିଶ୍ୱକପରେ ଶାମି ମଧ୍ୟ ଭାରତୀୟ ଦଳର ଅଂଶ ହୋଇଥିଲେ। ଏଥର ଦଳ ରୋହିତ ଶର୍ମାଙ୍କ ଅଧିନାୟକତ୍ୱରେ ଯାଉଛି। ଏଥର ମୋଟ ୧୬ ଟି ଦଳ ଏହି ଟୁର୍ଣ୍ଣାମେଣ୍ଟରେ ଭାଗ ନେଉଛନ୍ତି।
ବିସିସିଆଇ ଦ୍ଵାରା ଜାରି ଏକ ବିବୃତ୍ତିରେ ସଚିବ ଜୟ ଶାହା କହିଛନ୍ତି ଯେ, ବୁମରାଙ୍କ ବଦଳରେ ଚୟନ କମିଟି ମହମ୍ମଦ ଶାମିଙ୍କୁ ଦଳରେ ସ୍ଥାନ ଦେଇଛନ୍ତି। ସେ ଅଷ୍ଟ୍ରେଲିଆରେ ପହଞ୍ଚି ୱାର୍ମ ଅପ୍ ମ୍ୟାଚ୍ ପୂର୍ବରୁ ଦଳରେ ଯୋଗଦେବେ। ଏହା ବ୍ୟତୀତ ମହମ୍ମଦ ସିରାଜ ଏବଂ ଶାର୍ଦ୍ଦୁଲ ଠାକୁରଙ୍କୁ ବ୍ୟାକଅପ୍ ଭାବରେ ଯୋଡି ଦିଆଯାଇଛି। ଉଭୟ ଦ୍ରୁତ ବୋଲର ଶୀଘ୍ର ଅଷ୍ଟ୍ରେଲିଆ ଯିବେ।
ତେବେ ଶାମି ଗତ ୩ ମାସ ଧରି ଗୋଟିଏ ବି ମ୍ୟାଚ୍ ଖେଳି ନାହାଁନ୍ତି। ଏଭଳି ପରିସ୍ଥିତିରେ ସେ ୨ ଟି ୱାର୍ମ ଅପ୍ ମ୍ୟାଚ୍ ରୁ ଫର୍ମ ହାସଲ କରିବାକୁ ଚାହାଁନ୍ତି। ଅକ୍ଟୋବର ୧୭ ତାରିଖରେ ପ୍ରଥମ ୱାର୍ମ ଅପ୍ ମ୍ୟାଚ୍ ରେ ଦଳକୁ ଅଷ୍ଟ୍ରେଲିଆକୁ ସାମ୍ନା କରିବାକୁ ପଡିବ। ଏଥି ସହିତ ଦଳ ଅକ୍ଟୋବର ୧୯ ତାରିଖରେ ନ୍ୟୁଜିଲ୍ୟାଣ୍ଡ ବିପକ୍ଷରେ ଖେଳିବ। ଭାରତୀୟ ଦଳ ଅତୀତରେ ପଶ୍ଚିମ ଅଷ୍ଟ୍ରେଲିଆ ବିପକ୍ଷରେ ୨ ଟି ୱାର୍ମ ଅପ୍ ମ୍ୟାଚ୍ ଖେଳିଛି। ଗୋଟିଏରେ ଦଳ ଜିତିଥିବା ବେଳେ ଗୋଟିଏରେ ଦଳ ହାରିଛି। ଅନେକ ବଡ ଖେଳାଳି ଏପର୍ଯ୍ୟନ୍ତ ଭଲ ପ୍ରଦର୍ଶନ କରିବାରେ ସକ୍ଷମ ହୋଇ ନାହାଁନ୍ତି।
ଟି-୨୦ ବିଶ୍ୱକପ ପାଇଁ ଭାରତୀୟ ଦଳ ନିମ୍ନଲିଖିତ ଅଟେ:
୫ ବ୍ୟାଟ୍ସମ୍ୟାନ୍: ରୋହିତ ଶର୍ମା (ଅଧିନାୟକ), କେ.ଏଲ୍ ରାହୁଲ (ଉପ-ଅଧିନାୟକ), ଦୀପକ ହୁଡା ବିରାଟ କୋହଲି, ସୂର୍ଯ୍ୟକୁମାର ଯାଦବ
୨ ୱିକେଟ୍ କିପର: ଦୀନେଶ କାର୍ତ୍ତିକ, ଋଷଭ ପନ୍ତ
୨ ଅଲରାଉଣ୍ଡର: ହାର୍ଦ୍ଦିକ ପାଣ୍ଡ୍ୟା, ଅକ୍ସର ପଟେଲ
୨ ସ୍ପିନ୍ ବୋଲର: ୟୁଜବେନ୍ଦ୍ର ଚହଲ, ଆର ଅଶ୍ୱିନ
୪ ଦ୍ରୁତ ବୋଲର: ମହମ୍ମଦ ଶାମି, ହର୍ଷଲ ପଟେଲ, ଭୁବନେଶ୍ୱର କୁମାର, ଅର୍ଶଦୀପ ସିଂ
ନୂଆଦିଲ୍ଲୀ: ରୋଡ ସେଫ୍ଟି ୱାର୍ଲ୍ଡ ସିରିଜ୍ ୨୦୨୨ ର ପ୍ରଥମ ସେମିଫାଇନାଲ ମ୍ୟାଚ୍ ଗୁରୁବାର ଦିନ ରାୟପୁରରେ ଇଣ୍ଡିଆ ଲିଜେଣ୍ଡ୍ସ ଏବଂ ଅଷ୍ଟ୍ରେଲିଆ ଲିଜେଣ୍ଡ୍ସ ମଧ୍ୟରେ ଖେଳାଯାଇଥିଲା। ଏହି ମ୍ୟାଚ୍ରେ ଇଣ୍ଡିଆ ଲିଜେଣ୍ଡ୍ସ ଦଳ ଚାରିଟି ବଲ ପୂର୍ବରୁ ପାଞ୍ଚ ୱିକେଟ୍ ରେ ଜିତିଥିଲା। ଏହି ବିଜୟ ସହିତ ଇଣ୍ଡିଆ ଲିଜେଣ୍ଡ୍ସ ଦଳ ମଧ୍ୟ ଫାଇନାଲରେ ପ୍ରବେଶ କରିଛି।
ସେମିଫାଇନାଲ ମ୍ୟାଚର ହିରୋ ୱିକେଟ୍ କିପର ଓପନର୍ ନମନ୍ ଓଝା ଥିଲେ। ସେ ୧୪୫.୧୬ ଷ୍ଟ୍ରାଇକ୍ ହାରରେ ୬୨ ବଲରେ ୯୦ ରନର ଅପରାଜିତ ଅର୍ଦ୍ଧଶତକ ଖେଳିଥିଲେ। ଏହି ସମୟରେ ତାଙ୍କ ବ୍ୟାଟରୁ ସାତଟି ଚୌକା ଏବଂ ପାଞ୍ଚଟି ଉତ୍କୃଷ୍ଟ ଛକା ଆସିଥିଲା। ଏହି ଉତ୍ତମ ପ୍ରଦର୍ଶନ ପାଇଁ ଓଝାଙ୍କୁ ‘ପ୍ଲେୟାର ଅଫ୍ ଦି ମ୍ୟାଚ୍’ ଭାବେ ବିବେଚନା କରାଯାଇଥିଲା।
This guy never disappoints us when he’s on strike
Well played @irfanpathan_official ??Keep watching #RoadSafetyWorldSeries, live now only on #ColorsCineplex, @justvoot, @CCSuperhits and @Sports18.#IndiaLegends #AustraliaLegends #RSWS2022 pic.twitter.com/DSFq37KU36
— Colors Cineplex (@Colors_Cineplex) September 29, 2022
ଓଝାଙ୍କ ବ୍ୟତୀତ ଭାରତୀୟ ବିଜୟର କାହାଣୀରେ ସର୍ବାଧିକ ଅବଦାନ ଦେଇଥିବା ଖେଳାଳି ହେଉଛନ୍ତି ଅଲରାଉଣ୍ଡର ଇରଫାନ ପଠାନ। ବାସ୍ତବରେ, ଏକ ସମୟରେ ଏହି ମ୍ୟାଚ୍ ଭାରତୀୟ ଦଳର ହାତରୁ ଯାଉଥିବା ପରି ମନେ ହେଉଥିଲା, କିନ୍ତୁ ନିମ୍ନ କ୍ରମରେ ପଠାନ ବିସ୍ଫୋରକ ବ୍ୟାଟିଂ କରିବା ଯୋଗୁଁ ଭାରତୀୟ ଦଳ ଜିତିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
ସଚିନ ତେନ୍ଦୁଲକର (୧୦), ସୁରେଶ ରାଇନା (୧୧), ଯୁବରାଜ ସିଂ (୧୮), ଷ୍ଟୁଆର୍ଟ ବିନି (୨) ଏବଂ ୟୁସୁଫ ପଠାନ (୧), ରେ ଆଉଟ ହେବା ପରେ ମୋର୍ଚ୍ଚା ସମ୍ଭାଳି ମାତ୍ର ୧୨ ଟି ବଲ ଖେଳି ୩୦୮.୩୩ ରନ ରେଟ ହାରରେ ଇରଫାନ ପଠାନ ୩୭ ରନର ବିସ୍ପୋରକ ବ୍ୟାଟିଂ କରିଥିଲେ। ସେ ଶେଷ ପର୍ଯ୍ୟନ୍ତ ଅପରାଜିତ ରହି ଦଳ ପାଇଁ ଗୁରୁତ୍ୱପୂର୍ଣ୍ଣ ରନ୍ ଯୋଗଦାନ ଦେଇଥିଲେ। ଏହି ସମୟରେ ତାଙ୍କ ବ୍ୟାଟରୁ ଚାରିଟି ଛକା ଏବଂ ଦୁଇଟି ଚୌକା ଆସିଥିଲା। ପଠାନଙ୍କ ଏହି ଉତ୍କୃଷ୍ଟ ବ୍ୟାଟିଂ ହେତୁ ଇଣ୍ଡିଆ ଲିଜେଣ୍ଡ୍ସ ଦଳ ଚାରିଟି ବଲ ପୂର୍ବରୁ ପାଞ୍ଚ ୱିକେଟ୍ ହରାଇ ଫାଇନାଲରେ ପ୍ରବେଶ କରିଥିଲା।
ନୂଆଦିଲ୍ଲୀ: ଟି-୨୦ ସିରିଜରେ ଅଷ୍ଟ୍ରେଲିଆକୁ ପରାସ୍ତ କରିବା ପରେ ବର୍ତ୍ତମାନ ଟିମ୍ ଇଣ୍ଡିଆ ଦକ୍ଷିଣ ଆଫ୍ରିକାକୁ ସାମ୍ନା କରିବ। ଆଜି ଠାରୁ ଦୁଇ ଦଳ ମଧ୍ୟରେ ଏକ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳାଯିବ। ଏହି ସିରିଜର ପ୍ରଥମ ଟି-୨୦ ମ୍ୟାଚ୍ ଥିରୁବନନ୍ତପୁରମରେ ଖେଳାଯିବ। ଏହି ମ୍ୟାଚରେ ଟିମ୍ ଇଣ୍ଡିଆର ଖେଳାଳି ଏକାଦଶ କିପରି ହେବ ଜାଣନ୍ତୁ….
କହିବାକୁ ଗଲେ ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ସିରିଜ ପାଇଁ ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଏବଂ ଦ୍ରୁତ ବୋଲର ଭୁବନେଶ୍ୱର କୁମାରଙ୍କୁ ବିଶ୍ରାମ ଦିଆଯାଇଛି। ଏଥି ସହିତ ଦୀପକ ହୁଡା ମଧ୍ୟ ପିଠି ଯନ୍ତ୍ରଣା ହେତୁ ଟିମ୍ ଇଣ୍ଡିଆର ଅଂଶ ହେବେ ନାହିଁ।
ଆଜି ଖେଳାଯିବାକୁ ଥିବା ପ୍ରଥମ ଟି-୨୦ ରେ କେବଳ କେ.ଏଲ୍ ରାହୁଲ ଏବଂ ରୋହିତ ଶର୍ମା ଇନିଂସ ଆରମ୍ଭ କରିବେ। ଏଥିସହିତ ବିରାଟ କୋହଲିଙ୍କୁ ତିନି ନମ୍ବରରେ ଏବଂ ଚତୁର୍ଥ ନମ୍ବରରେ ସୂର୍ଯ୍ୟକୁମାର ଯାଦବ ଖେଳିବା ନିଶ୍ଚିତ ରହିଛି।
ପ୍ରଥମ ଟି-୨୦ ରେ ହାର୍ଦ୍ଦିକ ପାଣ୍ଡ୍ୟାଙ୍କ ଅନୁପସ୍ଥିତିରେ ଉଭୟ ଋଷଭ ପନ୍ତ ଏବଂ ଦୀନେଶ କାର୍ତ୍ତିକ ଖେଳାଳି ଏକାଦଶରେ ସ୍ଥାନ ପାଇପାରନ୍ତି। ପନ୍ତ ପଞ୍ଚମ ନମ୍ବରରେ ଏବଂ କାର୍ତ୍ତିକ ଷଷ୍ଠ ନମ୍ବରରେ ଖେଳିପାରନ୍ତି। ଏହା ପରେ ସ୍ପିନ୍ ଅଲରାଉଣ୍ଡର ଅକ୍ସର ପଟେଲ ସାତ ନମ୍ବରରେ ଖେଳିବେ। ଅଷ୍ଟ୍ରେଲିଆ ବିପକ୍ଷ ଟି-୨୦ ସିରିଜରେ ପଟେଲଙ୍କ ଭଲ ବୋଲିଂ ପ୍ରଦର୍ଶନ ଥିଲା।
ଫାଷ୍ଟ ବୋଲିଂ ବିଭାଗରେ ସ୍ୱିଙ୍ଗ୍ ମାଷ୍ଟର ଦୀପକ ଚହର, ମଧ୍ୟମ ଫାଷ୍ଟ ବୋଲର ହର୍ଷଲ ପଟେଲ ଏବଂ ଫାଷ୍ଟ ବୋଲର ଜସପ୍ରୀତ ବୁମ୍ରା ଦମ ଦେଖାଇବେ। ଏଥି ସହିତ, ସ୍ପିନ୍ କମାଣ୍ଡ ପୁଣିଥରେ ୟୁଜବେନ୍ଦ୍ର ଚହଲଙ୍କ ହାତରେ ରହିବ।
ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟି-୨୦ ରେ ଭାରତର ସମ୍ଭାବ୍ୟ ଏକାଦଶ: ରୋହିତ ଶର୍ମା (ଅଧିନାୟକ), କେ.ଏଲ୍ ରାହୁଲ (ଉପ ଅଧିନାୟକ), ବିରାଟ କୋହଲି, ସୂର୍ଯ୍ୟକୁମାର ଯାଦବ, ଋଷଭ ପନ୍ତ (ୱିକେଟ୍ କିପର), ଦୀନେଶ କାର୍ତ୍ତିକ, ଅକ୍ସର ପଟେଲ, ଦୀପକ ଚହର, ହର୍ଷଲ ପଟେଲ, ଜସପ୍ରୀତ ବୁମରା ଏବଂ ୟୁଜବେନ୍ଦ୍ର ଚହଲ।
ନୂଆଦିଲ୍ଲୀ: ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯାଇଥିବା ତୃତୀୟ ତଥା ଅନ୍ତିମ ଟି -୨୦ ମ୍ୟାଚରେ ଅଷ୍ଟ୍ରେଲିଆକୁ ୬ ୱିକେଟରେ ପରାସ୍ତ କରିଛି। ଏହା ସହ ଟିମ୍ ଇଣ୍ଡିଆ ତିନି ମ୍ୟାଚ୍ ବିଶିଷ୍ଟ ଟି -୨୦ ସିରିଜ୍ କୁ ୨-୧ରେ ଜିତିଛି। ୯ ବର୍ଷ ପରେ ଭାରତ ଅଷ୍ଟ୍ରେଲିଆ ବିପକ୍ଷରେ ଟି -୨୦ ସିରିଜ ଜିତିଛି।
ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ୨୦ ଓଭରରେ ୭ ୱିକେଟ୍ ହରାଇ ୧୮୬ ରନ୍ ସଂଗ୍ରହ କରିଥିଲା। ଏହାର ଜବାବରେ ଟିମ୍ ଇଣ୍ଡିଆ ଶେଷ ଓଭରରେ ଟାର୍ଗେଟକୁ ପୂରଣ କରିଥିଲା। ଭାରତ ପାଇଁ ସୁର୍ଯ୍ୟକୁମାର ଯାଦବ ସର୍ବାଧିକ ୬୯ ରନ୍ ସଂଗ୍ରହ କରିଥିଲେ। ଏଥିସହିତ ବିରାଟ କୋହଲି ୬୩ ରନର ଇନିଂସ ଖେଳିଥିଲେ।
ହାଇଦ୍ରାବାଦ: ଆଜି ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମରେ ଭାରତ ଏବଂ ଅଷ୍ଟ୍ରେଲିଆର ଦଳ ମୁହାଁମୁହିଁ ହେବେ। ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜର ଏହି ଶେଷ ମ୍ୟାଚ୍ ସନ୍ଧ୍ୟା ୭ ଟାରୁ ଆରମ୍ଭ ହେବ। ଏହି ସିରିଜରେ ଉଭୟ ଦଳ ବର୍ତ୍ତମାନ ୧-୧ ରେ ବରାବର ଅଛନ୍ତି। ତେଣୁ ହାଇଦ୍ରାବାଦରେ ଅନୁଷ୍ଠିତ ହେବାକୁ ଥିବା ଏହି ମ୍ୟାଚର ଫଳାଫଳ ଦ୍ୱାରା ସିରିଜର ବିଜେତା ଘୋଷିତ ହେବ।
ଏହି ସିରିଜର ପ୍ରଥମ ମ୍ୟାଚ୍ ଭାରତୀୟ ଦଳ ହରାଇଥିଲା। ମୋହାଲିରେ ଭାରତୀୟ ଦଳ ୨୦୮ ରନ୍ ର ବିରାଟ ସ୍କୋରକୁ ମଧ୍ୟ ରକ୍ଷା ପାରିନଥିଲା। ତେବେ ଦ୍ୱିତୀୟ ମ୍ୟାଚ୍ରେ ଟିମ୍ ଇଣ୍ଡିଆ ପ୍ରତ୍ୟାବର୍ତ୍ତନ କରି ସିରିଜକୁ ୧-୧ରେ ସମାନ କରିଥିଲା। ସିରିଜର ଏହି ଦ୍ୱିତୀୟ ମ୍ୟାଚ୍ ବର୍ଷା ଦ୍ୱାରା ପ୍ରଭାବିତ ହୋଇଥିଲା ଯେଉଁଥିରେ କେବଳ ୮-୮ ଓଭର ଖେଳାଯାଇଥିଲା। ଶେଷ ଓଭରରେ ୬ ୱିକେଟ୍ ରେ ଭାରତ ଜିତିଥିଲା।
ହେଡ୍ ଟୁ ହେଡ୍: ଏପର୍ଯ୍ୟନ୍ତ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ୨୫ ଟି -୨୦ ଆନ୍ତର୍ଜାତୀୟ ଖେଳାଯାଇଛି। ସେଥିମଧ୍ୟରୁ ଭାରତ ଅଧିକ ଜିତିଛି। ଭାରତ ୧୪ ଟି ମ୍ୟାଚ୍ ଜିତିଥିବାବେଳେ ଅଷ୍ଟ୍ରେଲିଆ ୧୦ ଟି ମ୍ୟାଚ୍ ଜିତିଛି। ଗୋଟିଏ ମ୍ୟାଚ୍ ଫଳାଫଳ ଶୂନ୍ୟ ରହିଛି।
ପିଚ୍ ତାପମାତ୍ରା: ଗତ ତିନିବର୍ଷ ଧରି ହାଇଦ୍ରାବାଦରେ କୌଣସି ଆନ୍ତର୍ଜାତୀୟ ତି-୨୦ ମ୍ୟାଚ୍ ହୋଇନାହିଁ। ତେବେ ଏହା ପୂର୍ବରୁ ଟି -୨୦ ମ୍ୟାଚ୍ରେ ଭଲ ରନ୍ ସ୍କୋର କରାଯାଇଛି। ଏଥର ମଧ୍ୟ ଏଠାରେ ବଡ ସ୍କୋର ହେବା ସମ୍ଭାବନା ଅଛି। ପିଚରେ ଘାସ ନାହିଁ, ତେଣୁ ବୋଲରମାନଙ୍କୁ ଏଠାରେ ରନ୍ ରୋକିବା କଷ୍ଟକର ହୋଇପାରେ।
ଟିମ୍ ଇଣ୍ଡିଆ ସମ୍ଭାବ୍ୟ ଖେଳାଳି: ରୋହିତ ଶର୍ମା (କ୍ୟାପଟେନ୍), କେ.ଏଲ୍ ରାହୁଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା, ଦୀନେଶ କାର୍ତ୍ତିକ, ଅକ୍ସର ପଟେଲ, ଭୁବନେଶ୍ୱର କୁମାର, ହର୍ଷଲ ପଟେଲ, ଯୁଜବେନ୍ଦ୍ର ଚହଲ, ଜସପ୍ରୀତ ବୁମ୍ରା।
ଅଷ୍ଟ୍ରେଲିଆ ସମ୍ଭାବ୍ୟ ଖେଳାଳି: ଆରୋନ ଫିଞ୍ଚ (କ୍ୟାପଟେନ୍), ଜୋସ୍ ଇଂଲିସ୍, ଷ୍ଟିଭେନ୍ ସ୍ମିଥ୍, ଗ୍ଲେନ୍ ମ୍ୟାକ୍ସୱେଲ, ମାଥ୍ୟୁ ୱେଡ୍, ଟିମ୍ ଡେଭିଡ, କ୍ୟାମେରନ୍ ଗ୍ରୀନ୍, ଆଡାମ ଜାମ୍ପା, ପ୍ୟାଟ୍ କମିନ୍ସ, ଜୋସ୍ ହାଜଲେଉଡ୍, ନାଥାନ୍ ଏଲିସ୍।
ନାଗପୁର: ନାଗପୁରରେ ଖେଳାଯାଇଥିବା ଦ୍ୱିତୀୟ ଟି-୨୦ ରେ ଟିମ୍ ଇଣ୍ଡିଆ ଅଷ୍ଟ୍ରେଲିଆକୁ ୬ ୱିକେଟ୍ ରେ ପରାସ୍ତ କରିଛି। ଏହି ବର୍ଷା ବାଧାପ୍ରାପ୍ତ ୮ ଓଭର ମ୍ୟାଚରେ ଅଷ୍ଟ୍ରେଲିଆ ପ୍ରଥମେ ଖେଳିବା ପରେ ଟିମ୍ ଇଣ୍ଡିଆକୁ ୯୧ ରନ୍ ଲକ୍ଷ୍ୟ ଦେଇଥିଲା, ଯାହା ଘରୋଇ ଦଳ ଶେଷ ଓଭରରେ ଚାରିଟି ୱିକେଟ୍ ହରାଇ ଲକ୍ଷ୍ୟ ହାସଲ କରିଥିଲା। ଏହି ବିଜୟ ସହିତ ଭାରତ ତିନି ମ୍ୟାଚ୍ ବିଶିଷ୍ଟ ଟି-ଟ୍ୱେଣ୍ଟି ସିରିଜରେ ୧-୧ରେ ସମାନ ହୋଇଛି।
କ୍ୟାପଟେନ ରୋହିତ ଶର୍ମା ଭାରତ ପାଇଁ ୪୬ ରନ୍ ରନର ପାଳି ଖେଳିଥିଲେ। ୨୦ ଟି ବଲରେ ସେ ଆକ୍ରାମଣାତ୍ମକ ଇନିଂସ ଖେଳି ୪ ଟି ଚୌକା ଓ ୪ ଟି ଛକା ମାରିଥିଲେ। ଶେଷ ଓଭରରେ ଦୀନେଶ କାର୍ତ୍ତିକ ଗୋଟିଏ ଛକା ଓ ଗୋଟିଏ ଚୌକା ମାରି ଟିମ୍ ଇଣ୍ଡିଆକୁ ଚାରି ବଲ ପୂର୍ବରୁ ବିଜୟୀ କରିଥିଲେ।
୮ ଓଭରରେ ୯୧ ରନ୍ର ଟାର୍ଗେଟକୁ ପିଛା କରି ଟିମ୍ ଇଣ୍ଡିଆ ଏକ ଭଲ ଆରମ୍ଭ କରିଥିଲା। ପ୍ରଥମ ଓଭରରେ ରୋହିତ-ରାହୁଲ ତିନିଟି ଛକା ମାରିଥିଲେ। ଜୋଶ ହାଜଲେଉଡଙ୍କ ଏହି ଓଭରରେ ରୋହିତ ଦୁଇଟି ଛକା ଓ କେଏଲ ରାହୁଲ ଗୋଟିଏ ଛକା ମାରିଥିଲେ। ଦ୍ୱିତୀୟ ଓଭରରେ ୧୦ ରନ ଆସିଥିଲା। ଭାରତର ପ୍ରଥମ ୱିକେଟ୍ ତୃତୀୟ ଓଭରରେ ପଡ଼ିଥିଲା। ୬ ଟି ବଲରେ ୧୦ ରନ୍ ସ୍କୋର କରିବା ପରେ କେ.ଏଲ୍ ରାହୁଲଙ୍କୁ ଆଉଟ କରାଯାଇଥିଲା।
ତେବେ ରାହୁଲଙ୍କ ଆଉଟ ପରେ ମଧ୍ୟ ରୋହିତ ଅଟକି ନଥିଲେ ଏବଂ ବଡ ସଟ ଖେଳିବା ଜାରି ରଖିଥିଲେ। ଏଥି ସହିତ ତିନି ନମ୍ବରରେ ବ୍ୟାଟିଂ କରିବାକୁ ଆସିଥିବା କୋହଲି ମଧ୍ୟ ଦୁଇଟି ଚୌକା ମାରି ନିଜର ଉଦ୍ଦେଶ୍ୟ ପ୍ରମାଣ କରିଥିଲେ। କିନ୍ତୁ ପଞ୍ଚମ ଓଭରରେ ଲେଗ ସ୍ପିନର ଆଡମ ଜାମ୍ପା କ୍ରମାଗତ ଦୁଇଟି ବଲରେ କୋହଲି ଏବଂ ସୂର୍ଯ୍ୟକୁମାର ଯାଦବଙ୍କୁ ଆଉଟ କରି ଭାରତକୁ ସମସ୍ୟାରେ ପକାଇଥିଲେ।
କିନ୍ତୁ ରୋହିତ ଅଟକି ନଥିଲେ ଏବଂ ସମସ୍ତ ବୋଲରଙ୍କ ଉପରେ ବଡ ସଟ୍ ଖେଳୁଥିଲେ। ସପ୍ତମ ଓଭରରେ ହାର୍ଦ୍ଦିକ ଆଉଟ୍ ହୋଇଥିଲେ। ସେ ୯ ରନ୍ ସ୍କୋର କରିଥିଲେ। ଏହା ପରେ ସାତଟି ବଲରେ ୧୩ ରନ୍ ଆବଶ୍ୟକ ଥିଲା। ରୋହିତ କ୍ରିଜକୁ ଯାଇ ସପ୍ତମ ଓଭରର ଶେଷ ବଲରେ ଗୋଟିଏ ଚୌକା ମାରିଥିଲେ। ତା’ପରେ ଶେଷ ଓଭରରେ ୯ ରନ୍ ଦରକାର ଥିଲା। ଦୀନେଶ କାର୍ତ୍ତିକ ପ୍ରଥମ ବଲରେ ଗୋଟିଏ ଛକା ଏବଂ ଦ୍ଵିତୀୟ ବଲରେ ଚୌକା ମାରି ଟିମ୍ ଇଣ୍ଡିଆକୁ ବିଜୟ ଦେଇଥିଲେ। ସେ ଦୁଇଟି ବଲରେ ୧୦ ରନ୍ କରିଥିଲେ।
ନୂଆଦିଲ୍ଲୀ: ଅଷ୍ଟ୍ରେଲିଆ ବିପକ୍ଷ ତିନି ମ୍ୟାଚ୍ ବିଶିଷ୍ଟ ଟି -୨୦ ସିରିଜର ପ୍ରଥମ ମ୍ୟାଚ୍ ଟିମ୍ ଇଣ୍ଡିଆ ହାରିଛି। ଏବେ ଦ୍ୱିତୀୟ ମ୍ୟାଚ୍ରେ ସେ ଏକ ଶକ୍ତିଶାଳୀ ପ୍ରତ୍ୟାବର୍ତ୍ତନ କରିବାକୁ ଚେଷ୍ଟା କରିବ। ଆଗାମୀ ମ୍ୟାଚ୍ ଟିମ୍ ଇଣ୍ଡିଆ ପାଇଁ ଏକ ‘କର ବା ମର’ ମ୍ୟାଚ୍ ହେବ। ଯଦି ଭାରତୀୟ ଦଳ ମଧ୍ୟ ଏହି ମ୍ୟାଚ୍ ହାରିଯାଏ, ତେବେ ସିରିଜ୍ ଅଷ୍ଟ୍ରେଲିଆ ନାମରେ ହେବ। ଏଭଳି ପରିସ୍ଥିତିରେ ଭାରତୀୟ ଦଳ ଏହି ମ୍ୟାଚରେ ବହୁତ ଗୁରୁତ୍ୱ ଦେବାକୁ ଯାଉଛି। ଏଥି ସହିତ ଅଷ୍ଟ୍ରେଲିଆ ଏହି ମ୍ୟାଚ୍ ଜିତିବାକୁ ଚେଷ୍ଟା କରିବ ଏବଂ ସିରିଜରେ ଏକ ଅପରାଜୟ ଅଗ୍ରଣୀ ହାସଲ କରିବ।
ଏହି ବଡ ମ୍ୟାଚ୍ କେବେ ଏବଂ କେଉଁଠାରେ ହେବ?:
ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଟି -୨୦ ସିରିଜର ଏହି ଦ୍ୱିତୀୟ ମ୍ୟାଚ୍ ସେପ୍ଟେମ୍ବର ୨୩ ତାରିଖ ଦିନ ସନ୍ଧ୍ୟା ୭ ଟାରେ ଖେଳାଯିବ। ଏହି ମ୍ୟାଚ୍ ନାଗପୁରର ବିଦର୍ଭ କ୍ରିକେଟ୍ ଆସୋସିଏସନ୍ ଷ୍ଟାଡିୟମରେ ଅନୁଷ୍ଠିତ ହେବ।
ଲାଇଭ୍ ଟେଲିକାଷ୍ଟ କେଉଁଠାରେ ଦେଖିବେ?:
ଏହି ମ୍ୟାଚର ଲାଇଭ ଟେଲିକାଷ୍ଟ ଷ୍ଟାର ସ୍ପୋର୍ଟସ ନେଟୱାର୍କର ବିଭିନ୍ନ ଚ୍ୟାନେଲରେ କରାଯିବ। ଏହା ସହିତ, ଏହି ମ୍ୟାଚ୍ ର ଲାଇଭ୍ ଷ୍ଟ୍ରିମିଂ ଡିସ୍ନି + ହଟଷ୍ଟାର୍ ଆପ୍ ରେ ଦେଖିବାକୁ ମିଳିବ।
ଖେଳାଳି ଏକାଦଶରେ କୌଣସି ପରିବର୍ତ୍ତନ ହେବ କି?:
ମୋହାଲିରେ ଅନୁଷ୍ଠିତ ପ୍ରଥମ ଟି -୨୦ ମ୍ୟାଚରେ ଅଷ୍ଟ୍ରେଲିଆର ପୁରା ଦଳ ଏକ ଭଲ ପ୍ରଦର୍ଶନ କରିଥିଲେ। ଏପରି ପରିସ୍ଥିତିରେ, ତାଙ୍କ ଦଳର କୌଣସି ପରିବର୍ତ୍ତନ ସମ୍ଭାବନା କମ ଅଟେ। ଏଠାରେ, ଟିମ୍ ଇଣ୍ଡିଆରେ ଏକ ପରିବର୍ତ୍ତନ ନିଶ୍ଚିତ ବୋଲି ବିଶ୍ୱାସ କରାଯାଏ। ଉମେଶ ଯାଦବଙ୍କ ସ୍ଥାନରେ ଖେଳାଳି ଏକାଦଶରେ ଜସପ୍ରୀତ ବୁମ୍ରାଙ୍କୁ ଦେଖିବାକୁ ମିଳିପାରେ।
ଟିମ୍ ଇଣ୍ଡିଆ: ରୋହିତ ଶର୍ମା (କ୍ୟାପଟେନ୍), କେ.ଏଲ୍ ରାହୁଲ, ବିରାଟ କୋହଲି, ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା, ଦୀନେଶ କାର୍ତ୍ତିକ, ଅକ୍ସର ପଟେଲ, ଭୁବନେଶ୍ୱର କୁମାର, ହର୍ଷଲ ପଟେଲ, ଯୁଜବେନ୍ଦ୍ର ଚହଲ, ଜସପ୍ରୀତ ବୁମ୍ରା।
ଅଷ୍ଟ୍ରେଲିଆ: ଆରୋନ୍ ଫିଞ୍ଚ (କ୍ୟାପଟେନ୍), ଜୋସ୍ ଇଂଲିସ୍, ଷ୍ଟିଭେନ୍ ସ୍ମିଥ୍, ଗ୍ଲେନ୍ ମ୍ୟାକ୍ସୱେଲ, ମାଥ୍ୟୁ ୱେଡ୍ (ୱିକି), ଟିମ୍ ଡେଭିଡ, କାମେରନ୍ ଗ୍ରୀନ୍, ଆଡାମ ଜାମ୍ପା, ପ୍ୟାଟ୍ କମିନ୍ସ, ଜୋସ୍ ହାଜଲେଉଡ୍, ନାଥାନ୍ ଏଲିସ୍।
ନୂଆଦିଲ୍ଲୀ: ଆସନ୍ତା ମାସରୁ ଅଷ୍ଟ୍ରେଲିଆରେ ଟି -୨୦ ବିଶ୍ୱକପ ୨୦୨୨ ଆୟୋଜିତ ହେବ। ଏହି ଟି -୨୦ ବିଶ୍ୱକପ ପାଇଁ ୧୩ ଟି ଦେଶ ନିଜ ଦଳ ଘୋଷଣା କରିଛନ୍ତି। ବର୍ତ୍ତମାନ ଦଳ ଘୋଷଣା କରିବା ପରେ ସମସ୍ତ ଦେଶ ମଧ୍ୟ ୨୦୨୨ ଟି -୨୦ ବିଶ୍ୱକପ ପାଇଁ ନିଜର ନୂଆ ଜର୍ସି ଲଞ୍ଚ କରୁଛନ୍ତି। ଏହି କ୍ରମରେ ପାକିସ୍ତାନ କ୍ରିକେଟ୍ ଦଳ ମଧ୍ୟ ଟି -୨୦ ବିଶ୍ୱକପ ପାଇଁ ନୂଆ ଜର୍ସି ଲଞ୍ଚ କରିଛି। ପାକିସ୍ତାନ ଜର୍ସି ଲଞ୍ଚ ହେବା ମାତ୍ରେ ଏହା ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ପାକିସ୍ତାନ ଦଳର ଅଧିନାୟକ ବାବର ଆଜାମ ପାକିସ୍ତାନ ଦଳର ନୂଆ ଜର୍ସିରେ ସ୍ଥାନ ପାଇଛନ୍ତି। ତାଙ୍କ ସହ ସାଥୀ ଖେଳାଳି ଏବଂ ଯୁବ ଦ୍ରୁତ ବୋଲରମାନେ ପାକିସ୍ତାନର ଟି -୨୦ ବିଶ୍ୱକପ୍ର ନୂଆ ଜର୍ସିରେ ନଜର ଆସିଛନ୍ତି। ଏଥି ସହିତ ପାକିସ୍ତାନର ସ୍ପିନ ବୋଲର ଶାଦବ ଖାନ ମଧ୍ୟ ଏହି ନୂଆ ଜର୍ସିରେ ନଜର ଆସିଛନ୍ତି। ଉଲ୍ଲେଖ ଯୋଗ୍ୟ ଯେ ଆସନ୍ତା ମାସରେ ଟି -୨୦ ବିଶ୍ୱକପର ପ୍ରଥମ ମ୍ୟାଚରେ ପାକିସ୍ତାନ ଦଳ ଭାରତ ବିପକ୍ଷରେ ଖେଳିବ। ଉଭୟଙ୍କ ମଧ୍ୟରେ ଏହି ମ୍ୟାଚ୍ ଅଷ୍ଟ୍ରେଲିଆର ମେଲବୋର୍ଣ୍ଣରେ ଖେଳାଯିବ। ଏହି ମ୍ୟାଚ୍ ପାଇଁ ପ୍ରଶଂସକଙ୍କ ମଧ୍ୟରେ ବହୁତ ଉତ୍ସାହ ରହିଛି ଏବଂ ଏହାର ସମସ୍ତ ଟିକେଟ୍ ମଧ୍ୟ ବୁକ୍ ହୋଇସାରିଛି।
ନୂଆଦିଲ୍ଲୀ: ଆସନ୍ତା ମାସରୁ ଅଷ୍ଟ୍ରେଲିଆରେ ହେବାକୁ ଥିବା ଟି-୨୦ ବିଶ୍ୱକପ ପାଇଁ ଟିମ୍ ଇଣ୍ଡିଆ ନିଜର ଅଭିଯାନକୁ ଜୋରଦାର କରିଛି। ସୋମବାର ଦିନ ଭାରତୀୟ ଦଳର ୧୫ ଜଣିଆ ଦଳ ଘୋଷଣା କରାଯାଇଛି ଏବଂ ବର୍ତ୍ତମାନ ଦଳର ନୂଆ ଜର୍ସି ଆସିବା ବିଷୟରେ ସୂଚନା ମିଳିଛି। ଭାରତୀୟ କ୍ରିକେଟ୍ ଦଳର ଅଫିସିଆଲ୍ କିଟ୍ ପାର୍ଟନର ‘ଏମପିଏଲ୍ ସ୍ପୋର୍ଟସ୍’ ଏକ ଭିଡିଓ ସେୟାର କରିଛି ଯେଉଁଥିରେ ଜଣାପଡିଛି ଯେ ଭାରତୀୟ ଦଳ ନୂଆ ଜର୍ସି ସହିତ ଟି-୨୦ ବିଶ୍ୱକପ୍ରେ ପ୍ରବେଶ କରିବ।
ଏହି ଭିଡିଓରେ ରୋହିତ ଶର୍ମା, ଶ୍ରେୟସ୍ ଆୟର ଏବଂ ହାର୍ଦ୍ଦିକ ପାଣ୍ଡ୍ୟା ନଜର ଆସିଛନ୍ତି। ରୋହିତ ଶର୍ମା କହୁଛନ୍ତି, ପ୍ରଶଂସକ ଭାବରେ ଆପଣମାନେ ଆମକୁ କ୍ରିକେଟର କରିଛ। ଶ୍ରେୟସ୍ କୁହନ୍ତି, ‘ଆପଣମାନଙ୍କ ଉତ୍ସାହ ବିନା, ଖେଳରେ କୌଣସି ମଜା ନାହିଁ।’ ଏହା ପରେ ହାର୍ଦ୍ଦିକ ପାଣ୍ଡ୍ୟା ପ୍ରଶଂସକମାନଙ୍କୁ ଟିମ୍ ଇଣ୍ଡିଆର ନୂଆ ଜର୍ସିର ଅଂଶ ହେବାକୁ କହୁଥିବା ନଜର ଆସିଛନ୍ତି।
The game is not really the same without you guys cheering us on!
Show your fandom along with @BCCI for the game by sharing your fan moments on https://t.co/jH9ozOU1e9#MPLSports #IndianCricketTeam #ShareYourFanStories #CricketFandom #loveforcricket #cricket pic.twitter.com/VObQ3idfUz— MPL Sports (@mpl_sport) September 13, 2022
ଏହି ଭିଡିଓ ସାମ୍ନାକୁ ଆସିବା ମାତ୍ରେ ପ୍ରଶଂସକମାନେ ନୂଆ ଜର୍ସି ପାଇଁ ପରାମର୍ଶ ଦେବା ଆରମ୍ଭ କରି ଦେଇଛନ୍ତି। କେହି କେହି ପୁରୁଣା ସ୍କାଏ ବ୍ଲୁ ରଙ୍ଗର ଜର୍ସି ଦାବି କରୁଛନ୍ତି ଏବଂ କେହି କେହି କହୁଛନ୍ତି ଯେ ଏଥର ଏହା ସମାନ ଜର୍ସି ହେବ ଯାହା ୨୦୦୭ ରେ ଅନୁଷ୍ଠିତ ପ୍ରଥମ ଟି-୨୦ ବିଶ୍ୱକପରେ ହୋଇଥିଲା।
ଉଲ୍ଲେଖ ଯୋଗ୍ୟ ଯେ, ଅକ୍ଟୋବର ୨୨ ତାରିଖରେ ଅଷ୍ଟ୍ରେଲିଆ ଏବଂ ନ୍ୟୁଜିଲ୍ୟାଣ୍ଡ ମ୍ୟାଚ୍ ସହିତ ଟି-୨୦ ବିଶ୍ୱକପ ଆରମ୍ଭ ହେବ। ଏହି ମ୍ୟାଚ୍ ସିଡନୀ କ୍ରିକେଟ୍ ଗ୍ରାଉଣ୍ଡରେ ଖେଳାଯିବ। ତେବେ ଏହା ପୂର୍ବରୁ ଅକ୍ଟୋବର ୧୬ ତାରିଖରୁ ୨୧ ତାରିଖ ମଧ୍ୟରେ ଯୋଗ୍ୟତା ମ୍ୟାଚ୍ ମଧ୍ୟ ଖେଳାଯିବ। ଭାରତୀୟ ଦଳ ଅକ୍ଟୋବର ୨୩ ତାରିଖରେ ପାକିସ୍ତାନ ବିପକ୍ଷରେ ଏହାର ପ୍ରଥମ ମ୍ୟାଚ୍ ଖେଳିବ।
ନୂଆଦିଲ୍ଲୀ: ଅଷ୍ଟ୍ରେଲିଆରେ ଖେଳାଯିବାକୁ ଥିବା ୨୦୨୨ ଟି -୨୦ ବିଶ୍ୱକପ ପାଇଁ ବିସିସିଆଇ ଭାରତୀୟ ଦଳ ଘୋଷଣା କରିଛି। ଏହି ଦଳରେ ବାମହାତୀ ଦ୍ରୁତ ବୋଲର ଅର୍ଶଦୀପ ସିଂ ସ୍ଥାନ ପାଇଛନ୍ତି। ଏଥି ସହ ଜସପ୍ରୀତ ବୁମ୍ରା ଏବଂ ହର୍ଷଲ ପଟେଲ ଫେରି ଆସିଛନ୍ତି।
ଟି -୨୦ ବିଶ୍ୱକପ ପାଇଁ ଟିମ୍ ଇଣ୍ଡିଆ: ରୋହିତ ଶର୍ମା (କ୍ୟାପଟେନ୍), କେ.ଏଲ୍ ରାହୁଲ (ଭାଇସ କ୍ୟାପଟେନ୍), ବିରାଟ କୋହଲି, ସୂର୍ଯ୍ୟକୁମାର ଯାଦବ, ଦୀପକ ହୁଡା, ଋଷଭ ପନ୍ତ (ଡବ୍ଲୁ.କେ), ଦୀନେଶ କାର୍ତ୍ତିକ (ଡବ୍ଲୁ.କେ), ହାର୍ଦ୍ଦିକ ପାଣ୍ଡ୍ୟା, ରବିଚନ୍ଦ୍ରନ ଅଶ୍ୱିନ, ୟୁଜବେନ୍ଦ୍ର ଚହଲ, ଅକ୍ସର ପଟେଲ, ଜସପ୍ରୀତ ବୁମ୍ରା, ଭୁବନେଶ୍ୱର କୁମାର, ହର୍ଷଲ ପଟେଲ ଏବଂ ଅର୍ଶଦୀପ ସିଂ।
ସେହଭଳି ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ବିପକ୍ଷ ଟି -୨୦ ସିରିଜ ପାଇଁ ଭାରତୀୟ ଦଳ ଘୋଷଣା କରାଯାଇଛି। ଏହି ସିରିଜରେ ଭାରତର ଦୃତ ବୋଲର ଜସପ୍ରୀତ ବୁମ୍ରା ଫେରିବାକୁ ଯାଉଛନ୍ତି। ବୁମରାଙ୍କ ବ୍ୟତୀତ ହର୍ଷଲ ପଟେଲ ଏବଂ ମହମ୍ମଦ ଶାମି ମଧ୍ୟ ଏହି ସିରିଜରେ ଫେରୁଛନ୍ତି। ଟି -୨୦ ବିଶ୍ୱକପ ପୂର୍ବରୁ ଭାରତୀୟ ଦଳକୁ ଅଷ୍ଟ୍ରେଲିଆ ଏବଂ ପରେ ଦକ୍ଷିଣ ଆଫ୍ରିକା ବିପକ୍ଷରେ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳିବାକୁ ପଡିବ।
ଅଷ୍ଟ୍ରେଲିଆ ବିପକ୍ଷ ଟି-୨୦ ସିରିଜ ପାଇଁ ଭାରତୀୟ ଦଳ:
ରୋହିତ ଶର୍ମା (ଅଧିନାୟକ), କେ.ଏଲ୍ ରାହୁଲ (ଉପ-ଅଧିନାୟକ), ବିରାଟ କୋହଲି, ସୂର୍ଯ୍ୟକୁମାର ଯାଦବ, ଦୀପକ ହୁଡା, ଋଷଭ ପନ୍ତ (ଡବ୍ଲୁ.କେ), ଦୀନେଶ କାର୍ତ୍ତିକ (ଡବ୍ଲୁ.କେ), ଆର ଅଶ୍ୱିନ, ୟୁଜବେନ୍ଦ୍ର ଚହଲ, ଅକ୍ସର ପଟେଲ, ଅର୍ଶଦୀପ ସିଂ, ମହମ୍ମଦ ଶାମି, ହର୍ଷଲ ପଟେଲ, ଦୀପକ ଚହର, ଜସପ୍ରୀତ ବୁମ୍ରା।
ଦକ୍ଷିଣ ଆଫ୍ରିକା ବିପକ୍ଷ ଟି-୨୦ ସିରିଜ ପାଇଁ ଭାରତୀୟ ଦଳ:
ରୋହିତ ଶର୍ମା (ଅଧିନାୟକ), କେ.ଏଲ୍ ରାହୁଲ (ଉପ-ଅଧିନାୟକ), ବିରାଟ କୋହଲି, ସୂର୍ଯ୍ୟକୁମାର ଯାଦବ, ଦୀପକ ହୁଡା, ଋଷଭ ପନ୍ତ (ଡବ୍ଲୁ.କେ), ଦୀନେଶ କାର୍ତ୍ତିକ (ଡବ୍ଲୁ.କେ), ଆର ଅଶ୍ୱିନ, ୟୁଜବେନ୍ଦ୍ର ଚହଲ, ଅକ୍ସର ପଟେଲ, ଅର୍ଶଦୀପ ସିଂ, ମହମ୍ମଦ ଶାମି, ହର୍ଷଲ ପଟେଲ, ଦୀପକ ଚହର, ଜସପ୍ରୀତ ବୁମ୍ରା।
ନୂଆଦିଲ୍ଲୀ: ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜର ଶେଷ ମ୍ୟାଚରେ ଅଷ୍ଟ୍ରେଲିଆ ବିପକ୍ଷରେ ଜିମ୍ବାୱେ ଏକ ଐତିହାସିକ ବିଜୟ ପଞ୍ଜିକରଣ କରିଛି। ଜିମ୍ବାୱେ ଟାଉନ୍ସଭିଲର ରିଭରୱେ ଷ୍ଟାଡିୟମରେ ଅଷ୍ଟ୍ରେଲିଆକୁ ୩ ୱିକେଟରେ ପରାସ୍ତ କରିଛି। ଜିମ୍ବାୱେ ପ୍ରଥମ ଥର ପାଇଁ ଅଷ୍ଟ୍ରେଲିଆକୁ ନିଜ ମାଟିରେ ପରାସ୍ତ କରିଛି। ଏଠାରେ ପ୍ରଥମେ ବ୍ୟାଟିଂ କରି ଅଷ୍ଟ୍ରେଲିଆ ମାତ୍ର ୧୪୧ ରନ୍ ସଂଗ୍ରହ କରିଥିଲା। ଜବାବରେ ଜିମ୍ବାୱେ ୩୯ ଓଭରରେ ୭ ୱିକେଟ୍ ହରାଇ ଲକ୍ଷ୍ୟ ହାସଲ କରିଥିଲା।
ଅଷ୍ଟ୍ରେଲିଆର ଏହି ଗ୍ରାଉଣ୍ଡରେ ଜିମ୍ବାୱେ ଅଧିନାୟକ ରେଗିସ୍ ଚକାବାୱା ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ରେଗିସ୍ ଙ୍କ ଏହି ନିଷ୍ପତ୍ତି ତାଙ୍କ ବୋଲରଙ୍କ ଦ୍ଵାରା ଠିକ୍ ପ୍ରମାଣିତ ହୋଇଥିଲା ଏବଂ ଆରମ୍ଭରୁ ଅଷ୍ଟ୍ରେଲିଆର ୱିକେଟ୍ ପତନ ଘଟିଥିଲା। ଅଷ୍ଟ୍ରେଲିଆ ୯ ରନରେ ପ୍ରଥମ ୱିକେଟ୍ ହରାଇଥିଲା। ଏହା ପରେ ଗୋଟିଏ ପରେ ଗୋଟିଏ ୱିକେଟ୍ ପତନ ହୋଇଥିଲା ଏବଂ ୭୨ ରନ୍ ବେଳକୁ ଅଷ୍ଟ୍ରେଲିଆ ୫ ୱିକେଟ୍ ହରାଇଥିଲା। ଏଠାରେ ଡେଭିଡ ୱାର୍ଣ୍ଣର ଗୋଟିଏ ମୁଣ୍ଡରେ ଜମି ରହିଥିଲେ। କିନ୍ତୁ ଅନ୍ୟ ପ୍ରାନ୍ତରୁ ତାଙ୍କୁ କୌଣସି ସମର୍ଥନ ମିଳିଲା ନାହିଁ। ସମଗ୍ର ଅଷ୍ଟ୍ରେଲିୟ ଦଳର କେବଳ ଦୁଇଜଣ ଖେଳାଳି ଡବଲ୍ସ ମାର୍କ ଛୁଇଁ ପାରିଥିଲେ।
ଡେଭିଡ ୱାର୍ନର ୯୬ ବଲରୁ ୯୪ ରନ ସଂଗ୍ରହ କରିଥିବାବେଳେ ଗ୍ଲେନ ମ୍ୟାକ୍ସୱେଲ ୨୨ ବଲରୁ ୧୯ ରନ ସ୍କୋର କରିଥିଲେ। ଅବଶିଷ୍ଟ ୮ ବ୍ୟାଟ୍ସମ୍ୟାନ୍ ୦ ରୁ ୫ ମଧ୍ୟରେ ପ୍ୟାଭିଲିୟନକୁ ଫେରିଥିଲେ। ଏହିପରି ୩୧ ଓଭରରେ ୧୪୧ ରନ୍ ସ୍କୋର କରିବା ପରେ ସମଗ୍ର କଙ୍ଗାରୁ ଦଳ ଆଉଟ୍ ହୋଇଥିଲେ। ଜିମ୍ବାୱେ ପାଇଁ ୩ ଓଭରରେ ୧୦ ରନ୍ ଦେଇ ରିଆନ୍ ବର୍ଲ ୫ ୱିକେଟ୍ ନେଇଥିଲେ।
ଜିମ୍ବାୱେ ୧୪୨ ରନ୍ କୁ ପିଛା କରି ବ୍ୟାଟିଂ ଆରମ୍ଭ କରିଥିଲା। ପ୍ରଥମ ୱିକେଟ୍ ପାଇଁ ଓପନିଂ ଯୋଡି ୩୮ ରନ୍ ଯୋଡିଥିଲେ। ତେବେ ପ୍ରଥମ ୱିକେଟ୍ ଖସିଯିବା ମାତ୍ରେ ଗୋଟିଏ ପରେ ଗୋଟିଏ ୱିକେଟ ଖସି ଯାଇଥିଲା ଏବଂ ଗୋଟିଏ ସମୟରେ ଜିମ୍ବାୱେ ମଧ୍ୟ ୭୭ ରନରେ ୫ ୱିକେଟ୍ ହରାଇଥିଲା। ଏଠାରୁ ଅଧିନାୟକ ରେଗିସ୍ ଚକାବାୱା (୩୭) ଅଧିନାୟକ ଇନିଂସ ଖେଳି ଜିମ୍ବାୱେକୁ ପରବର୍ତ୍ତୀ ଦୁଇଟି ୱିକେଟ୍ ପାଇଁ ଛୋଟ ଭାଗିଦାରୀ କରି ଏକ ଐତିହାସିକ ବିଜୟ ପ୍ରଦାନ କରିଥିଲେ। ଜିମ୍ବାୱେ ୩୯ ଓଭରରେ ୭ ୱିକେଟ୍ ହରାଇ ଲକ୍ଷ୍ୟ ହାସଲ କରିଥିଲା। ରିଆନ୍ ବର୍ଲଙ୍କୁ ‘ପ୍ଲେୟାର ଅଫ୍ ଦି ମ୍ୟାଚ୍’ ଭାବରେ ସମ୍ମାନିତ କରାଯାଇଥିଲା।
ବର୍ମିଂହାମ: ୨୦୨୨ କମନୱେଲଥ ଗେମ୍ସ ବର୍ମିଂହାମରେ ସମାପ୍ତ ହୋଇଛି। ୭୨ ଟି ଦେଶର ୫୦୦୦ ରୁ ଅଧିକ ଖେଳାଳି ଏହି କ୍ରୀଡ଼ା ମହାକୁମ୍ଭରେ ଭାଗ ନେଇଥିଲେ। ଏଥିରେ ଅଷ୍ଟ୍ରେଲିଆ ୧୭୮ ରେ ସର୍ବାଧିକ ପଦକ ଜିତିଥିଲା। ଇଂଲଣ୍ଡ ୧୭୬ ଏବଂ ଭାରତ ୬୧ ପଦକ ପାଇଛି।
ସୋମବାର ଶେଷ ହୋଇଥିବା କମନୱେଲଥ ଗେମ୍ସରେ ଭାରତ ନିଜର ପଞ୍ଚମ ଶ୍ରେଷ୍ଠ ପ୍ରଦର୍ଶନ ପୋଷ୍ଟ କରି ୨୨ ଟି ସ୍ୱର୍ଣ୍ଣ ସମେତ ୬୧ ଟି ପଦକ ଜିତିଥିବାବେଳେ ଆୟୋଜକ ଇଂଲଣ୍ଡ ପଦକ ହାସଲ କରିବାରେ ଏକ ନୂତନ ରେକର୍ଡ ସୃଷ୍ଟି କରିଛି।
ବର୍ମିଂହାମ କମନୱେଲଥ ଗେମ୍ସରେ ସୁଟିଂ ଦଳ ଅଂଶଗ୍ରହଣ ନକରି ମଧ୍ୟ ୨୨ ଟି ସ୍ୱର୍ଣ୍ଣ, ୧୬ ଟି ରୌପ ଏବଂ ୨୩ ଟି ବ୍ରୋଞ୍ଜ ସମେତ ଭାରତ ୬୧ ଟି ପଦକ ହାସଲ କରିପାରିଛି। ଅଷ୍ଟ୍ରେଲିଆ, ଇଂଲଣ୍ଡ ଏବଂ କାନାଡା ପରେ ଭାରତ ପଦକ ତାଲିକାରେ ଚତୁର୍ଥ ସ୍ଥାନରେ ରହିଛି।
କମନୱେଲଥ ଗେମ୍ସରେ ଭାରତର ସର୍ବୋତ୍ତମ ପ୍ରଦର୍ଶନ ୨୦୧୦ ରେ ନୂଆଦିଲ୍ଲୀରେ ହୋଇଥିଲା। ସେଠାରେ ଭାରତ ୩୮ ଟି ସ୍ୱର୍ଣ୍ଣ ପଦକ ସମେତ ମୋଟ ୧୦୧ ପଦକ ଜିତିଥିଲା ଏବଂ ପଦକ ତାଲିକାରେ ଦ୍ୱିତୀୟ ସ୍ଥାନରେ ରହିଥିଲା।
ମଞ୍ଚେଷ୍ଟରରେ ୨୦୦୨ କମନୱେଲଥ ଗେମ୍ସରେ ଭାରତ ୩୦ ଟି ସ୍ୱର୍ଣ୍ଣ ପଦକ ସହିତ ୬୯ ଟି ପଦକ ଜିତିଥିଲା, ଯାହା ପ୍ରତି ଚାରି ବର୍ଷରେ ଆୟୋଜିତ ଖେଳଗୁଡିକରେ ଭାରତର ଦ୍ୱିତୀୟ ଶ୍ରେଷ୍ଠ ପ୍ରଦର୍ଶନ ଅଟେ। ଗତଥର ଗୋଲ୍ଡକୋଷ୍ଟ ଗେମ୍ସରେ ଭାରତ ୬୬ ଟି ପଦକ ଜିତିଥିଲା, ଯେଉଁଥିରେ ୨୬ ଟି ସ୍ୱର୍ଣ୍ଣ ପଦକ ମଧ୍ୟ ରହିଥିଲା। ମେଲବୋର୍ଣ୍ଣରେ ୨୦୦୬ କମନୱେଲଥ ଗେମ୍ସରେ ଭାରତ ମଧ୍ୟ ୨୨ ଟି ସ୍ୱର୍ଣ୍ଣ ପଦକ ଜିତିଥିଲା, କିନ୍ତୁ ରୌପ୍ୟ ପଦକ ସଂଖ୍ୟା ୧୭ ଥିଲା।
ବର୍ମିଂହାମ କମନୱେଲଥ ଗେମ୍ସରେ ଭାରତ ପୁରୁଷ ଖେଳାଳିଙ୍କ ଦ୍ଵାରା ୧୩ ଟି ସ୍ୱର୍ଣ୍ଣ ସହ ମୋଟ ୩୫ ଟି ପାଇଥିବାବେଳେ ୮ ଟି ସ୍ଵର୍ଣ୍ଣ ସହିତ ମୋଟ ୨୩ ଟି ପଦକ ମହିଳା ଖେଳାଳିମାନେ ପାଇଛନ୍ତି। ଏବଂ ଭାରତୀୟ ଖେଳାଳି ଗୋଟିଏ ସ୍ୱର୍ଣ୍ଣ ସମେତ ମିଶ୍ରିତ ଇଭେଣ୍ଟରେ ତିନୋଟି ପଦକ ଜିତିଥିଲେ।
ଭାରତୀୟ ଖେଳାଳି କୁସ୍ତିରେ ସର୍ବାଧିକ ୧୨ ଟି ପଦକ ଜିତିଛନ୍ତି, ଯେଉଁଥିରେ ୬ ଟି ସ୍ୱର୍ଣ୍ଣ ପଦକ ଅନ୍ତର୍ଭୁକ୍ତ। ଏହା ବ୍ୟତୀତ ଟେବୁଲ ଟେନିସରେ ଚାରିଟି ଏବଂ ଭାରୋତ୍ତୋଳନ, ବକ୍ସିଂ ଏବଂ ବ୍ୟାଡମିଣ୍ଟନରେ ତିନୋଟି ଲେଖାଏଁ ସ୍ୱର୍ଣ୍ଣ ପଦକ ଜିତିଥିଲେ।
ଆୟୋଜକ ଇଂଲଣ୍ଡ ମୋଟ ୧୭୬ ପଦକ ଜିତିଥିଲା, ସେଥିମଧ୍ୟରେ ୫୭ ଟି ସ୍ୱର୍ଣ୍ଣ ପଦକ, ଯାହା କମନୱେଲଥ ଗେମ୍ସରେ ସେମାନଙ୍କର ନୂତନ ରେକର୍ଡ। ପୂର୍ବରୁ ଗ୍ଲାସ୍ଗୋରେ ୨୦୧୪ ଗେମ୍ସରେ ଇଂଲଣ୍ଡ ୧୭୪ ପଦକ ଜିତିଥିଲା। ଅଷ୍ଟ୍ରେଲିଆ କମନୱେଲଥ ଗେମ୍ସରେ ପ୍ରାଧାନ୍ୟ ବିସ୍ତାର କରି ୬୭ ଟି ସ୍ୱର୍ଣ୍ଣ, ୫୭ ଟି ରୌପ୍ୟ ଏବଂ ୫୪ ଟି ବ୍ରୋଞ୍ଜ ପଦକ ସହିତ ମୋଟ ୧୭୮ ପଦକ ଜିତିଥିଲା।
ବର୍ମିଂହାମ: ୨୦୨୨ କମନୱେଲଥ ଗେମ୍ସର ଫାଇନାଲରେ ବର୍ମିଂହାମ, ଏଜବାଷ୍ଟନ୍ ଠାରେ ଖେଳାଯାଇଥିବା ଟିମ୍ ଇଣ୍ଡିଆକୁ ଅଷ୍ଟ୍ରେଲିଆ ୯ ରନ ରେ ପରାସ୍ତ କରିଛି। ଏହା ସହିତ ଭାରତୀୟ ଦଳର ସ୍ୱର୍ଣ୍ଣ ଜିତିବାର ସ୍ୱପ୍ନ ମଧ୍ୟ ଧୂଳିସାତ ହୋଇଗଲା। ଭାରତୀୟ ମହିଳା ଦଳକୁ ରୌପ୍ୟ ପଦକରେ ସନ୍ତୁଷ୍ଟ ହେବାକୁ ପଡ଼ିଛି। ଅଷ୍ଟ୍ରେଲିଆ ପ୍ରଥମେ ବ୍ୟାଟିଂ କରି ୨୦ ଓଭରରେ ୮ ୱିକେଟ ହରାଇ ୧୬୧ ରନ ସ୍କୋର କରିଥିଲା। ଏହାର ଜବାବରେ ଭାରତୀୟ ଦଳ ମାତ୍ର ୧୫୨ ରନ୍ ସ୍କୋର କରିପାରିଥିଲା।
ଏହି ବିଜୟ ସହିତ ଅଷ୍ଟ୍ରେଲିଆ ୨୦୨୨କମନୱେଲଥ ଗେମ୍ସରେ କ୍ରିକେଟରେ ସ୍ୱର୍ଣ୍ଣ ପଦକ ଜିତିଛି। ଏଥି ସହିତ ଫାଇନାଲରେ ହାରିଥିବା ଭାରତୀୟ ଦଳ ରୌପ୍ୟ ପଦକ ପାଇଛି।
ବର୍ମିଂହାମ: ଅଷ୍ଟ୍ରେଲିଆ ପରେ ବର୍ମିଂହାମରେ ଚାଲିଥିବା କମନୱେଲଥ ଗେମ୍ସ 2022 ରେ ଆୟୋଜକ ଇଂଲଣ୍ଡ ମଧ୍ୟ ସ୍ୱର୍ଣ୍ଣ ପଦକ ସଂଖ୍ୟା ୫୦ କୁ ଛୁଇଁଛି। କମନୱେଲଥ ଗେମ୍ସର 9 ତମ ଦିନରେ ଇଂଲଣ୍ଡ ଖେଳାଳିମାନେ ସେମାନଙ୍କର 50 ତମ ସ୍ୱର୍ଣ୍ଣ ଜିତିଛନ୍ତି। ଆୟୋଜକ ଦେଶ ବର୍ତ୍ତମାନ ମୋଟ 148 ପଦକ ସହିତ ଦ୍ୱିତୀୟ ସ୍ଥାନରେ ଅଛି। ଏଠାରେ ଅଷ୍ଟ୍ରେଲିଆ ପ୍ରଥମ ସ୍ଥାନରେ ରହିଛି। ଅଷ୍ଟ୍ରେଲୀୟ ଖେଳାଳିମାନେ ଏପର୍ଯ୍ୟନ୍ତ 59 ଟି ସ୍ୱର୍ଣ୍ଣ ସହିତ ମୋଟ 155 ପଦକ ଜିତିଛନ୍ତି।
ଏହି କମନୱେଲଥ ଗେମ୍ସରେ କାନଡା ଖେଳାଳିମାନେ ମଧ୍ୟ ଏକ ଶକ୍ତିଶାଳୀ ଖେଳ ପ୍ରଦର୍ଶନ କରୁଛନ୍ତି। ସେମାନେ ବର୍ତ୍ତମାନ ପର୍ଯ୍ୟନ୍ତ 84 ଟି ପଦକ ଜିତିଛନ୍ତି। ସେଥିରୁ କେବଳ ୨୨ ଟି ସ୍ଵର୍ଣ୍ଣ ପଦକ ଅଛି। ଏଠାରେ ନ୍ୟୁଜିଲ୍ୟାଣ୍ଡ 17 ଟି ସ୍ୱର୍ଣ୍ଣ ସହିତ ଚତୁର୍ଥ ସ୍ଥାନରେ ରହି ମୋଟ 44 ଟି ପଦକ ଜିତିଛି। ଏଥି ସହିତ 13 ଟି ସ୍ୱର୍ଣ୍ଣ ସମେତ ମୋଟ 40 ପଦକ ସହ ଭାରତ ପଞ୍ଚମ ସ୍ଥାନରେ ରହିଛି।
ଏପର୍ଯ୍ୟନ୍ତ 223 ସ୍ୱର୍ଣ୍ଣ ପଦକ ସ୍ଥିର ହୋଇଛି। ଆସନ୍ତା ଦୁଇ ଦିନରେ 57 ଟି ସ୍ୱର୍ଣ୍ଣ ପଦକ ସ୍ଥିର ହେବା ବାକି ଅଛି। ବକ୍ସିଂ, ଟେବୁଲ୍ ଟେନିସ୍ ଏବଂ ବ୍ୟାଡମିଣ୍ଟନ୍ ଭଳି ଇଭେଣ୍ଟରେ ଭାରତୀୟ ଆଥଲେଟମାନେ ଏଠାରେ ସ୍ୱର୍ଣ୍ଣ ବର୍ଷା କରିପାରନ୍ତି। 9 ଦିନ ପରେ ଏହିପରି ରହିଛି ପଦକ ତାଲିକା..
କ୍ର.ସଂଖ୍ୟା | ଦେଶ | ସ୍ଵର୍ଣ୍ଣ | ରୌପ୍ୟ | ତମ୍ବା | ସମୁଦାୟ |
1 | ଅଷ୍ଟ୍ରେଲିଆ | 59 | 46 | 50 | 155 |
2 | ଇଂଲଣ୍ଡ | 50 | 52 | 46 | 148 |
3 | କାନଡା | 22 | 29 | 33 | 84 |
4 | ନ୍ୟୁଜିଲାଣ୍ଡ | 17 | 12 | 15 | 44 |
5 | ଭାରତ | 13 | 11 | 16 | 40 |
6 | ନାଇଜେରିଆ | 9 | 8 | 13 | 30 |
7 | ସ୍କଟଲ୍ୟାଣ୍ଡ | 8 | 9 | 24 | 41 |
8 | ଦକ୍ଷିଣ ଆଫ୍ରିକା | 7 | 8 | 11 | 26 |
9 | ମାଲେସିଆ | 6 | 5 | 4 | 15 |
10 | ଜାମାଇକା | 6 | 4 | 2 | 12 |
ବର୍ମିଂହାମ: ବର୍ମିଂହାମରେ ଚାଲିଥିବା କମନୱେଲଥ ଗେମ୍ସ ୨୦୨୨ରେ ମହିଳା କ୍ରିକେଟର ସେମିଫାଇନାଲ ମ୍ୟାଚ ଆସନ୍ତାକାଲି ଅର୍ଥାତ୍ ଅଗଷ୍ଟ ୬ ତାରିଖରେ ଖେଳାଯିବ। ପ୍ରଥମ ସେମିଫାଇନାଲରେ ଭାରତ ଏବଂ ଇଂଲଣ୍ଡ ମୁହାଁମୁହିଁ ହେବେ। ଦ୍ୱିତୀୟ ସେମିଫାଇନାଲରେ ନ୍ୟୁଜିଲାଣ୍ଡକୁ ଅଷ୍ଟ୍ରେଲିଆ ଭେଟିବ। ଉଭୟ ମ୍ୟାଚ୍ ବହୁତ ରୋମାଞ୍ଚକର ହେବ ବୋଲି ଆଶା କରାଯାଉଛି।
ଭାରତୀୟ ମହିଳା କ୍ରିକେଟ୍ ଦଳ ଶେଷ ମ୍ୟାଚରେ ବାରବାଡୋସକୁ ଏକପାଖିଆ ଭାବେ ପରାସ୍ତ କରି ସେମିଫାଇନାଲରେ ପ୍ରବେଶ କରିଛି। ଟିମ୍ ଇଣ୍ଡିଆ ଏହାର ଗ୍ରୁପ୍ ଏରେ ଦ୍ୱିତୀୟ ସ୍ଥାନ ଅଧିକାର କରିଛି। ଭାରତକୁ ପ୍ରଥମ ମ୍ୟାଚ୍ରେ ଅଷ୍ଟ୍ରେଲିଆ ବିପକ୍ଷରେ ରୋମାଞ୍ଚକର ପରାଜୟର ସମ୍ମୁଖୀନ ହେବାକୁ ପଡିଥିଲା। ଏହା ପରେ ସେ ପାକିସ୍ତାନ ଏବଂ ବାରବାଡୋସକୁ ପରାସ୍ତ କରି ସେମିଫାଇନାଲ ପାଇଁ ଟିକେଟ ପାଇଥିଲେ। ଅନ୍ୟପକ୍ଷରେ ଇଂଲଣ୍ଡ ଦଳ ସେମାନଙ୍କ ଗ୍ରୁପ୍-ବିରେ ଏକ ଶକ୍ତିଶାଳୀ ପ୍ରଦର୍ଶନ କରି ପ୍ରଥମ ସ୍ଥାନରେ ରହି ସେମିଫାଇନାଲରେ ପ୍ରବେଶ କରିଥିଲା। ଇଂଲଣ୍ଡ ସମସ୍ତ ତିନୋଟି ମ୍ୟାଚ୍ ଜିତିଥିଲା।
ଭାରତର ଶେଫାଳି ବର୍ମା ଏବଂ ସ୍ମୃତି ମନ୍ଧନା କ୍ରମାଗତ ଭାବେ ରନ୍ ସ୍କୋର କରୁଛନ୍ତି। ଏହି ଟୁର୍ଣ୍ଣାମେଣ୍ଟରେ ଜେମିମା ରୋଡ୍ରିଗେଜ୍ ଏବଂ ହରମାନପ୍ରୀତ କୌର ମଧ୍ୟ ରନ୍ ସ୍କୋର କରିଛନ୍ତି। ବୋଲିଂରେ ରେଣୁକା ସିଂ ଉତ୍କୃଷ୍ଟ ରହିଛନ୍ତି। ସେ ତିନୋଟି ମ୍ୟାଚ୍ରେ ୯ ୱିକେଟ୍ ନେଇଛନ୍ତି। ସେ ବର୍ତ୍ତମାନ କମନୱେଲଥ ଗେମ୍ସରେ ସର୍ବାଧିକ ୱିକେଟ୍ ନେଇଛନ୍ତି। ଅନ୍ୟପକ୍ଷରେ ଇଂଲଣ୍ଡ ପାଇଁ ବ୍ୟାଟ୍ସମ୍ୟାନଙ୍କ ମଧ୍ୟରେ ଆଲିସ୍ କ୍ୟାପସି ଏବଂ ବୋଲରଙ୍କ ମଧ୍ୟରେ ଇକେଲଷ୍ଟୋନ୍ ଏବଂ ବ୍ରଣ୍ଟ ବିରୋଧୀ ଦଳ ପାଇଁ ଅଧିକ ସମସ୍ୟା ସୃଷ୍ଟି କରିଛନ୍ତି।
ପ୍ରତିଯୋଗିତା କେବେ ଏବଂ କେଉଁଠାରେ ଦେଖିବେ?:
ଭାରତ ଏବଂ ଇଂଲଣ୍ଡ ମହିଳା କ୍ରିକେଟ୍ ଦଳ ମଧ୍ୟରେ ଏହି ଲଢେଇ ଅଗଷ୍ଟ ୬ ତାରିଖରୁ ଅପରାହ୍ନ ୩.୩୦ ରେ ଆରମ୍ଭ ହେବ। ସୋନି ସ୍ପୋର୍ଟସ ନେଟୱାର୍କର ବିଭିନ୍ନ ଚ୍ୟାନେଲରେ ମ୍ୟାଚର ଲାଇଭ ଟେଲିକାଷ୍ଟ କରାଯିବ। ଏହା ଡିଡି ସ୍ପୋର୍ଟସରେ ମଧ୍ୟ ପ୍ରସାରିତ ହେବ। ମ୍ୟାଚ୍ ର ଲାଇଭ୍ ଷ୍ଟ୍ରିମିଂ ସୋନି LIV ଆପ୍ ରେ ଦେଖିବାକୁ ମିଳେ।
ନୂଆଦିଲ୍ଲୀ: ଚଳିତ ବର୍ଷ ଅଷ୍ଟ୍ରେଲିଆରେ ୨୦୨୨ ଟି-୨୦ ବିଶ୍ୱକପ ଖେଳାଯିବ। ସମସ୍ତ ଦଳ ଏ ସମ୍ପର୍କରେ ପ୍ରସ୍ତୁତି ଆରମ୍ଭ କରିଛନ୍ତି। ଭାରତୀୟ ଦଳ ମଧ୍ୟ କ୍ରମାଗତ ଭାବରେ ଟି-୨୦ ସିରିଜ୍ ଖେଳୁଛି। ଏହି ଦ୍ୱିପାକ୍ଷିକ ସିରିଜ୍ ସହିତ ଦଳ ଏହାର ପ୍ରସ୍ତୁତି ଶେଷ କରୁଛି। ଏହା ସହିତ ଭାରତୀୟ ଦଳ ପରିଚାଳନା ମଧ୍ୟ ଖେଳାଳିଙ୍କ ପ୍ରଦର୍ଶନ ଉପରେ ନଜର ରଖିଛି। ଚୟନକର୍ତ୍ତାଙ୍କ ପାଇଁ ଟି-୨୦ ଦଳ ବାଛିବା ଏହା ସହଜ କରିବ।
ଏହି ଖେଳାଳୀମାନେ ଖେଳିବା ପ୍ରାୟ ନିଶ୍ଚିତ:
ଟି-୨୦ ବିଶ୍ୱକପ ପାଇଁ କିଛି ଖେଳାଳିଙ୍କ ଚୟନ ସ୍ଥିର ବୋଲି ଧରାଯାଉଛି। ଏଥିମଧ୍ୟରେ ରୋହିତ ଶର୍ମା, କେ.ଏଲ୍ ରାହୁଲ, ବିରାଟ କୋହଲି, ଦୀନେଶ କାର୍ତ୍ତିକ, ହାର୍ଦ୍ଦିକ ପାଣ୍ଡ୍ୟା, ଜସପ୍ରୀତ ବୁମ୍ରା ଏବଂ ହର୍ଷଲ ପଟେଲ ଅଛନ୍ତି। ଏଥି ସହିତ ବିଶ୍ୱକପ ପୂର୍ବରୁ ଭଲ ପ୍ରଦର୍ଶନ କରିଥିବା ଖେଳାଳିଙ୍କୁ ଦଳରେ ସ୍ଥାନ ଦିଆଯିବ। ରୋହିତ ଶର୍ମା ଏବଂ କେ.ଏଲ୍ ରାହୁଲ ଇନିଂସ ଆରମ୍ଭ କରିବାକୁଥିବାବେଳେ ବିରାଟ କୋହଲି ତିନି ନମ୍ବରରେ ଖେଳିବାକୁ ଆସିପାରନ୍ତି। ଜଣେ ୱିକେଟ୍ କିପର ଭାବରେ ଦୀନେଶ କାର୍ତ୍ତିକ ଦଳରେ ସ୍ଥାନ ପାଇପାରନ୍ତି। ଏହା ବ୍ୟତୀତ ପନ୍ତ, ଆୟର, କିଶନ, ସାମସନ ମଧ୍ୟମ କ୍ରମରେ ଏକ ସୁଯୋଗ ପାଇପାରନ୍ତି।
ରୋହିତ ଶର୍ମା:
ଆଜିକାଲି ଭାରତୀୟ ଅଧିନାୟକ ରୋହିତ ଶର୍ମାଙ୍କ ଫର୍ମ ଭଲରେ ଚାଲିନାହିଁ। ଆଇପିଏଲ୍ ୨୦୨୨ ର ୧୪ ଟି ମ୍ୟାଚ୍ ରେ ସେ ହାରାହାରି ୧୯.୧୪ ଏବଂ ଷ୍ଟ୍ରାଇକ୍ ରେଟ୍ ୧୨୦.୧୭ ରେ ୨୬୮ ରନ୍ ସ୍କୋର କରିଥିଲେ। ଏହି ସମୟ ମଧ୍ୟରେ ସେ ଗୋଟିଏ ଅର୍ଦ୍ଧଶତକ ହାସଲ କରିନଥିଲେ। ଏହା ପରେ ରୋହିତଙ୍କୁ ଆଫ୍ରିକା ସିରିଜ୍ ପାଇଁ ବିଶ୍ରାମ ଦିଆଯାଇଥିଲା। ବର୍ତ୍ତମାନ ସେ ଇଂଲଣ୍ଡ ବିପକ୍ଷ ଦିନିକିଆ ଏବଂ ଟି-୨୦ ରେ ହଜିଯାଇଥିବା ଫର୍ମକୁ ଫେରାଇବା ପାଇଁ ଚେଷ୍ଟା କରିବେ।
କେ.ଏଲ୍ ରାହୁଲ:
କେଏଲ ରାହୁଲ ଟି-୨୦ ବିଶ୍ୱକପ ୨୦୨୨ରେ ରୋହିତ ଶର୍ମାଙ୍କ ସହ ଇନିଂସ ଆରମ୍ଭ କରିପାରନ୍ତି। ଆଇପିଏଲ୍ ୨୦୨୨ ରେ ରାହୁଲଙ୍କ ପ୍ରଦର୍ଶନ ଅତ୍ୟନ୍ତ ଭଲ ଥିଲା। ସେ ହାରାହାରି ୫୧.୩୩ ଏବଂ ଷ୍ଟ୍ରାଇକ୍ ରେଟ୍ ୧୩୫.୩୮ ରେ ୧୫ ଟି ମ୍ୟାଚ୍ ରେ ୬୧୬ ରନ୍ ସ୍କୋର କରିଥିଲେ। ଏହି ସମୟ ମଧ୍ୟରେ ସେ ୪ ଟି ଅର୍ଦ୍ଧଶତକ ଏବଂ ୨ ଟି ଶତକ ହାସଲ କରିଥିଲେ। ଆଘାତ ଯୋଗୁଁ କେ.ଏଲ୍ ଙ୍କ ଜର୍ମାନୀରେ ଅସ୍ତ୍ରୋପଚାର କରାଯାଇଛି।
ବିରାଟ କୋହଲି:
ବିରାଟ କୋହଲି ଟି-୨୦ ବିଶ୍ୱକପ ୨୦୨୨ ରେ ତିନି ନମ୍ବରରେ ବ୍ୟାଟିଂ କରୁଥିବା ଦେଖିବାକୁ ମିଳିପାରନ୍ତି। କୋହଲି କିନ୍ତୁ ଦୀର୍ଘ ଦିନ ଧରି ଫର୍ମ ସହ ସଂଘର୍ଷ କରିଆସୁଛନ୍ତି। ଆଇପିଏଲ୍ ୨୦୨୨ରେ ତାଙ୍କର ପ୍ରଦର୍ଶନ ମଧ୍ୟ ଖରାପ ଥିଲା। ସେ ହାରାହାରି ୨୨.୭୩ ଏବଂ ଷ୍ଟ୍ରାଇକ୍ ହାର ୧୧୫.୯୮ ରେ ୧୬ ଟି ମ୍ୟାଚରେ ୩୪୧ ରନ୍ ସଂଗ୍ରହ କରିଥିଲେ। କିନ୍ତୁ ଭାରତୀୟ ଦଳ ନିଶ୍ଚିତ ଭାବେ ବଡ଼ ଖେଳାଳିଙ୍କୁ ବିଶ୍ୱକପ ଭଳି ଏକ ବଡ଼ ଟୁର୍ଣ୍ଣାମେଣ୍ଟରେ ନେବାକୁ ପସନ୍ଦ କରିବ।
ଦୀନେଶ କାର୍ତ୍ତିକ:
ଦୀନେଶ କାର୍ତ୍ତିକ ନିଜର ଚମତ୍କାର ପ୍ରଦର୍ଶନ ସହିତ ଟି-୨୦ ବିଶ୍ୱକପ ୨୦୨୨ ପାଇଁ ନିଜର ଦାବି ଉପସ୍ଥାପନ କରିଛନ୍ତି। କାର୍ତ୍ତିକ ଆଇପିଏଲ୍ ୨୦୨୨ ରେ RCB ପାଇଁ ଫିନିଶର ଭୂମିକା ଗ୍ରହଣ କରିଥିଲେ। ସେ ହାରାହାରି ୫୫.୦୦ ରେ ୧୬ ଟି ମ୍ୟାଚରେ ୩୩୦ ରନ୍ ଏବଂ ୧୮୩.୩୩ ର ଚମତ୍କାର ଷ୍ଟ୍ରାଇକ୍ ହାର ହାସଲ କରିଥିଲେ। ଏହି ସମୟ ମଧ୍ୟରେ ସେ ମଧ୍ୟ ଅର୍ଦ୍ଧଶତକ ହାସଲ କରିଥିଲେ।
ହାର୍ଦ୍ଦିକ ପାଣ୍ଡ୍ୟା:
ହାର୍ଦ୍ଦିକ ପାଣ୍ଡ୍ୟା ଟି-୨୦ ବିଶ୍ୱକପ ୨୦୨୨ରେ ଭାରତୀୟ ନିମ୍ନ କ୍ରମକୁ ମଜବୁତ କରିପାରିବେ। ସେ ଶେଷରେ ଆସି ସ୍କୋରକୁ ଦ୍ରୁତ ଗତିରେ ବଢାଇବା ସହିତ ବୋଲିଂ ମଧ୍ୟ କରିପାରନ୍ତି। ଆଇପିଏଲ୍ ୨୦୨୨ ରେ ସେ ତାଙ୍କ ଅଧିନାୟକତ୍ୱରେ ଗୁଜୁରାଟ ଟାଇଟାନ୍ସକୁ ବିଜେତା କରିଛନ୍ତି।
ଜସପ୍ରୀତ ବୁମ୍ରା:
ଇଂଲଣ୍ଡ ବିପକ୍ଷ ଶେଷ ଟେଷ୍ଟ ପାଇଁ ଟି-୨୦ ବିଶ୍ୱକପ ୨୦୨୨ ଦଳରେ ସ୍ଥାନ ପାଇବାକୁ ଜସପ୍ରୀତ ବୁମ୍ରା ପ୍ରାୟ ନିଶ୍ଚିତ। ସେ ଭାରତୀୟ ଦ୍ରୁତ ବୋଲିଂର ନେତୃତ୍ୱ ନେବେ। ଇଂଲଣ୍ଡ ବିପକ୍ଷ ଟେଷ୍ଟରେ ବୁମ୍ରା ବଲ୍ ଏବଂ ବ୍ୟାଟ୍ ସହିତ ଚମତ୍କାର କରୁଛନ୍ତି।
ହର୍ଷଲ ପଟେଲ:
ଆଇପିଏଲ୍ ୨୦୨୧ ରେ ପର୍ପଲ କ୍ୟାପ୍ ବିଜେତା ହର୍ଷଲ ପଟେଲଙ୍କୁ ଟି-୨୦ ବିଶ୍ୱକପ ୨୦୨୨ରେ ଅନ୍ତର୍ଭୁକ୍ତ କରାଯାଇପାରେ। ଆଇପିଏଲ୍ ୨୦୨୨ ର ୧୫ ଟି ମ୍ୟାଚରେ ହର୍ଷଲ ୧୯ ୱିକେଟ୍ ନେଇଥିଲେ। ଏହି ଋତୁରେ ୩୪ ରନ ଦେଇ ୪ ୱିକେଟ ନେବା ତାଙ୍କର ସର୍ବୋତ୍ତମ ପ୍ରଦର୍ଶନ ଥିଲା।
ନୂଆଦିଲ୍ଲୀ: ଚଳିତ ବର୍ଷ ଶେଷରେ ଟି-୨୦ ବିଶ୍ୱକପ ଅଷ୍ଟ୍ରେଲିଆରେ ଖେଳାଯିବ। ଏହି ଟୁର୍ଣ୍ଣାମେଣ୍ଟ ପୂର୍ବରୁ ସବୁଠାରୁ ବଡ ପ୍ରଶ୍ନ ହେଉଛି, ଦୀନେଶ କାର୍ତ୍ତିକ ଏବଂ ଋଷଭ ପନ୍ତଙ୍କ ମଧ୍ୟରୁ କିଏ ହେବ ବିଶ୍ଵକପ ଦଳରେ ସାମିଲ? ଏହି ସମୟରେ ପୂର୍ବତନ ଭାରତୀୟ କ୍ରିକେଟର ଇରଫାନ ପଠାନ ଟି-୨୦ ବିଶ୍ୱକପ ପାଇଁ ଭାରତର ଖେଳାଳି ଏକାଦଶ ଚୟନ କରିଛନ୍ତି।
ଋଷଭ ପନ୍ତଙ୍କୁ ୨୦୨୨ ଟି-୨୦ ବିଶ୍ୱକପ ପାଇଁ ଭାରତର ଏକାଦଶ ଖେଳାଳିରେ ଅନ୍ତର୍ଭୁକ୍ତ କରିନାହାଁନ୍ତି ପୂର୍ବତନ ଅଲରାଉଣ୍ଡର। ଲଗାତାର ରନ୍ ସ୍କୋର କରିବାକୁ ପନ୍ତ ସଂଘର୍ଷ କରୁଛନ୍ତି। ଦକ୍ଷିଣ ଆଫ୍ରିକା ବିପକ୍ଷ ପାଞ୍ଚ ମ୍ୟାଚ୍ ବିଶିଷ୍ଟ ସିରିଜରେ ମଧ୍ୟ ସେ ମାତ୍ର ୫୮ ରନ୍ ସ୍କୋର କରିପାରିଛନ୍ତି। ଏହାପୂର୍ବରୁ ପନ୍ତ ନ୍ୟୁଜିଲ୍ୟାଣ୍ଡ ବିପକ୍ଷ ତିନି ମ୍ୟାଚ ବିଶିଷ୍ଟ ସିରିଜରେ ମାତ୍ର ୩୩ ରନ୍ ସଂଗ୍ରହ କରିଥିଲେ। ପନ୍ତ ଏପର୍ଯ୍ୟନ୍ତ ଟି-୨୦ ଇଣ୍ଟରନ୍ୟାସନାଲରେ ଚମତ୍କାର କରିବାକୁ ସକ୍ଷମ ହୋଇନାହାଁନ୍ତି।
ଅଷ୍ଟ୍ରେଲିଆରେ ଖେଳାଯିବାକୁ ଥିବା ଟି-୨୦ ବିଶ୍ୱକପ ପାଇଁ ଇରଫାନ ପଠାନ ଟିମ ଇଣ୍ଡିଆର ଖେଳାଳି ଏକାଦଶରେ ୩୭ ବର୍ଷିୟ ଦୀନେଶ କାର୍ତ୍ତିକଙ୍କୁ ଅନ୍ତର୍ଭୁକ୍ତ କରିଛନ୍ତି। ଦକ୍ଷିଣ ଆଫ୍ରିକା ସିରିଜରୁ ତିନି ବର୍ଷ ପରେ କାର୍ତ୍ତିକ ଟିମ୍ ଇଣ୍ଡିଆକୁ ଫେରିଛନ୍ତି। କାର୍ତ୍ତିକ ଫେରିବା ପରେ ଟି-୨୦ ଆନ୍ତର୍ଜାତୀୟ ସ୍ତରରେ ତାଙ୍କର ପ୍ରଥମ ଅର୍ଦ୍ଧଶତକ ହାସଲ କରିଛନ୍ତି।
ଇରଫାନ୍ ପଠାନ୍ କେ.ଏଲ୍ ରାହୁଲ ଏବଂ ରୋହିତ ଶର୍ମାଙ୍କୁ ଓପନର୍ ଭାବରେ ଚୟନ କରିଛନ୍ତି। ଏଥି ସହିତ ବିରାଟ କୋହଲି ତିନି ନମ୍ବରରେ ଏବଂ ସୂର୍ଯ୍ୟକୁମାର ଯାଦବ ଚତୁର୍ଥ ସ୍ଥାନରେ ଅଛନ୍ତି। ଏହା ବ୍ୟତୀତ ବୋଲିଂରେ ରବିନ୍ଦ୍ର ଜାଡେଜା, ହର୍ଷଲ ପଟେଲ, ଭୂବନେଶ୍ୱର କୁମାର, ୟୁଜବେନ୍ଦ୍ର ଚହଲ ଏବଂ ଜସପ୍ରୀତ ବୁମ୍ରା ଅଛନ୍ତି।
ତେବେ ଆଶ୍ଚର୍ଯ୍ୟର କଥା ହେଉଛି, ଇରଫାନ୍ ପଠାନ୍ ଶ୍ରେୟସ୍ ଆୟର, ଋଷଭ ପନ୍ତ, ମହମ୍ମଦ ଶାମି, କୁଲଦୀପ ଯାଦବ, ଭେଙ୍କଟେଶ ଆୟର ଏବଂ ଇଶାନ କିଶନଙ୍କ ଭଳି ଷ୍ଟାର ଖେଳାଳିଙ୍କୁ ବିଶ୍ୱକପ ଦଳରେ ସାମିଲ କରିନାହାଁନ୍ତି।
୨୦୨୨ ଟି-୨୦ ବିଶ୍ୱକପ ପାଇଁ ଇରଫାନ ପଠାନଙ୍କ ଖେଳାଳି ଏକାଦଶ: କେ.ଏଲ୍ ରାହୁଲ, ରୋହିତ ଶର୍ମା, ବିରାଟ କୋହଲି, ସୂର୍ଯ୍ୟକୁମାର ଯାଦବ, ହାର୍ଦ୍ଦିକ ପାଣ୍ଡ୍ୟା, ଦୀନେଶ କାର୍ତ୍ତିକ, ରବିନ୍ଦ୍ର ଜାଡେଜା, ହର୍ଷଲ ପଟେଲ, ଭୂବନେଶ୍ୱର କୁମାର, ଯୁଜବେନ୍ଦ୍ର ଚହଲ ଏବଂ ଜସପ୍ରୀତ ବୁମ୍ରା।