ଭୁବନେଶ୍ବର, ଓଡିଶାରେ ଇଲେଟ୍ରିକ ଯାନକୁ ମିଳିବ ରିହାତି, ଏ ନେଇ ଆଜି ରାଜ୍ୟ କ୍ୟାବିନେଟରେ ନିଆଯାଇଛି ବଡ ନିଷ୍ପତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ କ୍ୟାବିନେଟ ବୈଠକ ବସିଥିଲା। ଏଥିରେ 2025 ସୁଦ୍ଧା 20 ପ୍ରତିଶତ ଇଲେଟ୍ରିକ ଯାନ ରାଜ୍ୟରେ ବିକ୍ରି କରାଯିବାକୁ ଉତ୍ସାହିତ କରାଯିବ। ସେଥିପାଇଁ ଓଡିଶା ଇଲେଟ୍ରିକ ଭେଇକଲ ଆଇନ 2021କୁ ସ୍ବୀକୃତି ପ୍ରଦାନ କରାଯାଇଛି।
ସେହିପରି ଏହି ଇଲେଟ୍ରିକ ଯାନ ଓଡିଶାରେ ବିକ୍ରି ବୃଦ୍ଧି ପାଇଁ ରାଜ୍ୟ ସରକାର ଉତ୍ସାହିତ କରିବେ। ଅନ୍ୟପକ୍ଷରେ ଏହି ଶିଳ୍ପକୁ ମଧ୍ୟ ରାଜ୍ୟ ସରକାର ପ୍ରତ୍ସାହିତ କରିବେ ବୋଲି କ୍ୟାବିନେଟରେ ନିଷ୍ପତି କରାଯାଇଛି। ରାଜ୍ୟରେ ଏହି ଗାଡି ନିର୍ମାଣ ପାଇଁ କଂପାନୀ ଆଗ୍ରହୀ ହେଲେ ସେମାନଙ୍କୁ ପର୍ଯ୍ୟାପ୍ତ ସୁବିଧା ସରକାର ଯୋଗାଇବେ।
ଏଥିସହିତ ଓଡିଶାରେ ଏହି ଯାନ ଉପରେ ଗବେଷଣା ତଥା ବିକାଶ ପାଇଁ ମଧ୍ୟ ରାଜ୍ୟ ସରକାର ସୁବିଧା ସୁଯୋଗ ଯୋଗାଇ ଦେବେ। ଯେଉଁମାନେ ଏହି ଗାଡି କ୍ରୟ କରିବେ ସେମାନଙ୍କୁ ରାଜ୍ୟ ସରକାର ବିକ୍ରୟ ରିହାତି ମଧ୍ୟ ଘୋଷଣା କରିଛନ୍ତି। ଏପରିକି ଋଣ କରି ଗାଡି କିଣିଲେ ସେହି ଋଣର ସୁଧ ଉପରେ ରାଜ୍ୟ ସରକାର ରିହାତି ପ୍ରଦାନ କରିବେ।
ଏହି ଗାଡିର ବୀମାଭୁକ୍ତ ପର୍ଯ୍ୟନ୍ତ ରୋଡ ଟ୍ୟାକ୍ସ ଏବଂ ରେଜିଷ୍ଟ୍ରେସନ ଫି ମଧ୍ୟ ଛାଡ କରିବା ପାଇଁ ନବୀନ ସରକାର ବଡ ନିଷ୍ପତି ଗ୍ରହଣ କରିଛନ୍ତି। ଏହାଦ୍ବାରା ଲୋକମାନେ ଏହି ଗାଡି କିଣିବା ପାଇଁ ଆଗ୍ରହ ପ୍ରକାଶ କରିବେ। ସେହିପରି ଏମଏସଏମଇ ବିଭାଗ ଦ୍ବାରା ଏହି କ୍ଷେତ୍ରରେ ଷ୍ଟାର୍ଟଅପ କୁ ଉତ୍ସାହିତ କରିବା ପାଇଁ ମଧ୍ୟ କ୍ୟାବିନେଟ ନିଷ୍ପତି ଗ୍ରହଣ କରିଛନ୍ତି।