ସୀତାରାମ ଅଗ୍ରୱାଲ
ଚିଲିକା: ଆଜି ପୂର୍ବାହ୍ନରେ ବଡ଼କୁଳ ପାନ୍ଥ ନିବାସ ଠାରେ ଇକୋ ଟୁରିଜିମ ଡେଭଲପମେଣ୍ଟ ସୋସାଇଟି ଆନୁକୂଲ୍ୟରେ ଏକ ବୈଠକ ଅନୁଷ୍ଠିତ ହୋଇଯାଇଛି। ଚିଲିକା ତହସିଲଦାର ପ୍ରଦୀପ କୁମାର ସାହୁଙ୍କ ଅଧକ୍ଷତାରେ ହୋଇଥିବା ଉକ୍ତ ବୈଠକରେ ସ୍ଥାନୀୟ ଜିଲ୍ଲା ପରିଷଦ ପ୍ରତିନିଧି ପ୍ରଭାସ ସୁନ୍ଦରାୟ, ଡୁଙ୍ଗମାଳ ସରପଞ୍ଚ ଗଣେଶ୍ୱର ସ୍ୱାଇଁ, ବଡ଼କୁଳ ସରପଞ୍ଚ ପ୍ରହ୍ଲାଦ ବେହେରା, ଅଠରବାଟିଆ ସରପଞ୍ଚ ଦୀପକ କୁମାର ଜେନା, ମୋଟର ବୋଟ ସଭାପତି ବଳରାମ ରାଉତରାୟ, ସମ୍ପାଦକ କୃଷ୍ଣଚନ୍ଦ୍ର ରାଉତରାୟ, ବାଲୁଗାଁ ଥାନା ଅଧିକାରୀ ରଶ୍ମି ରଞ୍ଜନ ଦାଶ, ନାଭାଲ ଫାଣ୍ଡି ଅଧିକାରୀ ଦିଲ୍ଲୀପ ସାହୁ, ଓଟିଡ଼ିସି ପରିଚାଳକ ସବ୍ୟସାଚୀ କର, ଶାନ୍ତି କମିଟିର ସଭ୍ୟସଭ୍ୟା ଏବଂ ସ୍ଥାନୀୟ ଅଂଚଳର ବାସିନ୍ଦା ଉପସ୍ଥିତ ଥିଲେ।
ଓଟିଡିସି ପରିଚାଳକ ଶ୍ରୀ କର ବିଗତ ଦିନର ବିବରଣୀ ପାଠ କରିବା ସହ ଆଗାମୀ ଦିନରେ ହେବାକୁ ଥିବା ବିଭିନ୍ନ ଉନ୍ନୟନ ପ୍ରସ୍ତାବ ସମ୍ପର୍କିତ ସୂଚନା ଦେଇଥିଲେ। ଯାହାକି ସୁଲଭ ଶୌଚାଳୟ, ପ୍ରାଇଭେଟ ବୋଟ ଆସୋସିଏସନ ଟିକେଟ ଗୃହ ପାଇଁ ଜମି ଚିହ୍ନଟ, ଡଷ୍ଟବିନ ସ୍ଥାପନ ସହ ସୁପରିଚାଳନା, ପ୍ରତିବର୍ଷ ଆୟବ୍ୟୟର ଅଟକଳ ଉପସ୍ଥାପନ, ଚଳିତ ବର୍ଷ ପ୍ରାରମ୍ଭରୁ ବିଭିନ୍ନ ଦୋକାନୀ ଏବଂ ବୋଟ ସଂଘର ସହମତିରେ ଉନ୍ନୟନ ମୂଳକ କାର୍ଯ୍ୟ ନିମିତ୍ତ ଦୈନିକ ଦେୟ ଆଦାୟ, ଜେଟିରେ ଭାସମାନ ପୋଲ ପ୍ରତିଷ୍ଠା, ଓଟିଡିସି ପରିସର ସମେତ ଜେଟି ପରିସରକୁ ସିସି କ୍ୟାମେରା ପରିସରଭୁକ୍ତ,ପ୍ରତ୍ୟେକ ଡଙ୍ଗାର ଲାଇସେନ୍ସ, ଇନ୍ସୁରାନ୍ସ ଯାଞ୍ଚ ସହ ପର୍ଯ୍ୟଟକ ଏବଂ ଚାଳକଙ୍କୁ ଲାଇଫ ଜ୍ୟାକେଟ ବାଧ୍ୟତା ମୂଳକ ଆଦି ସମ୍ବନ୍ଧରେ ଗୁରୁତ୍ୱାରୋପ ଦେବାସହ ଏହାକୁ ପାଳନ କରିବା ଦିଗରେ ସର୍ବସହମତ ପ୍ରକାଶ ପାଇଥିଲା।