Tag: ଉପନିର୍ବାଚନ

ଭୁବନେଶ୍ବର, ଓଡିଶାର ଦୁଇଟି ନିର୍ବାଚନ ମଣ୍ଡଳୀ ତିର୍ତ୍ତୋଲ ଏବଂ ବାଲେଶ୍ବର ସଦର ଆସନରେ ଉପନିର୍ବାଚନ ହେବ। ଏ ନେଇ ଆଜି ଉପନିର୍ବାଚନର ସମସ୍ତ ତଥ୍ୟ ଓଡିଶା ମୁଖ୍ୟ ନିର୍ବାଚନ ଅଧିକାରୀ ପ୍ରଦାନ କରିଛନ୍ତି। ସେହି ଅନୁସାରେ ଆସନ୍ତା ନଭେମ୍ବର ୩ ତାରିଖରେ ହେବ ଭୋଟଗ୍ରହଣ ।

ଏହି ଦୁଇ ନିର୍ବାଚନ ମଣ୍ଡଳୀରେ ନିର୍ବାଚନ ପକ୍ରିୟା ନିମ୍ନ ତାରିଖ ଧାର୍ଯ୍ୟ କରାଯାଇଛି।

ଅକ୍ଟୋବର ୯- ପ୍ରକାଶ ପାଇବ ବିଧିବଦ୍ଧ ବିଜ୍ଞପ୍ତି

ଅକ୍ଟୋବର ୧୬- ନାମାଙ୍କନ ଦାଖଲର ଶେଷ ତାରିଖ

ଅକ୍ଟୋବର ୧୭- ପ୍ରାର୍ଥୀପତ୍ର ଯାଞ୍ଚ କରାଯିବ

ଅକ୍ଟୋବର ୧୯-ପ୍ରାର୍ଥୀପତ୍ର ପ୍ରତ୍ୟାହାର କରିପାରିବେ ପ୍ରାର୍ଥୀ

ନଭେମ୍ବର ୩-ଭୋଟଗ୍ରହଣ

ନଭେମ୍ବର ୧୦-ଭୋଟଗଣତି

ନଭେମ୍ବର ୧୨- ସମସ୍ତ ନିର୍ବାଚନ ପକ୍ରିୟା ଶେଷ ହୋଇ ଆଚରଣ ବିଧି ପ୍ରତ୍ୟାହାର

ତେବେ ଏଥର ଭୋଟ ଗ୍ରହଣ ପକ୍ରିୟା ପୁରା କୋଭିଡ କଟକଣା ଭିତରେ କରାଯିବ ବୋଲି ନିର୍ବାଚନ ଅଧିକାରୀ କହିଛନ୍ତି। ସେହି ଅନୁସାରେ

୧-ପ୍ରାର୍ଥୀମାନେ ସେମାନଙ୍କର ପ୍ରାର୍ଥୀପତ୍ର ଉଭୟ ଅନଲାଇନ୍ ଓ ଅଫଲାଇନରେ ଦାଖଲ କରିପାରିବେ

୨- ସିଧା ବା ଅଫଲାଇନ୍ ନାମାଙ୍କନ ସମୟରେ ପ୍ରାର୍ଥୀ ମାତ୍ର ଦୁଇ ଜଣଙ୍କୁ ସାଥୀରେ ନେଇ ଯାଇପାରିବେ

୩-ପ୍ରାର୍ଥୀ ନାମାଙ୍କନ ସମୟରେ ୨ଟିରୁ ଅଧିକ ଗାଡି ନେଇ ଯାଇପାରିବେ ନାହିଁ

୪-ନିର୍ବାଚନ ପ୍ରଚାର ସମୟରେ ୫ରୁ ଅଧିକ ଲୋକ କାହା ଘରକୁ ଯାଇପାରିବେ ନାହିଁ

୫-ଡିଜିଟାଲ ମାଧ୍ୟମରେ ପ୍ରାର୍ଥୀଙ୍କ ପ୍ରଚାରକୁ ଅଧିକ ଗୁରୁତ୍ୱ ଦେବା ପାଇଁ ପ୍ରାର୍ଥୀମାନଙ୍କୁ କୁହାଯିବ

୬-ମତଦାନ ସମୟରେ ଜନଗହଳି ନିୟନ୍ତ୍ରଣ ଉପରେ ଧ୍ୟାନ ଦିଆଯିବ, ମାତ୍ର ଏକ ହଜାର ଭୋଟରଙ୍କୁ ନେଇ ବୁଥ କରାଯିବ

୭-ଉପ-ନିର୍ବାଚନରେ କରୋନା ପୀଡିତ ବି କରିପାରିବେ ମତଦାନ, ସେମାନେ ଶେଷ ସମୟରେ ଭୋଟ୍ ଦେବା ପାଇଁ ଅନୁମତି ଦିଆଯିବ

ଭୋଟଗ୍ରହଣ ସମୟରେ ଭିଡ ବା ଲୋକ ଗହଳି ହ୍ରାସ କରିବା ପାଇଁ ଏଥର ଅଧିକ ବୁଥର ଯୋଜନା କରାଯାଇଛି। ସେହି ଅନୁସାରେ ବାଲେଶ୍ବର ପାଇଁ ମୋଟ ବୁଥ ସଂଖ୍ୟା ୩୪୬ଟି କରାଯାଇଥିବା ବେଳେ ସେଥିରେ ମୁଖ୍ୟ ବୁଥ ୧୯୮ଟି ଏବଂ ଶାଖା ବୁଥ ୧୪୮ଟି କରାଯାଇଛି। ସେହିପରି ତିର୍ତ୍ତୋଲ ପାଇଁ ମୋଟି ଭୋଟ ଗ୍ରହଣ କେନ୍ଦ୍ର ୩୭୩ଟି ମଧ୍ୟରୁ ମୁଖ୍ୟ ବୁଥ ୨୬୫ ଏବଂ ଶାଖା ବୁଥ ୧୦୮ଟି କରାଯାଇଛି।

ବର୍ତ୍ତମାନ ଏହି ଉପନିର୍ବାଚନ ପକ୍ରିୟାରେ ଦୁଇଟି ଆସନରୁ ଯେଉଁ ସଂଖ୍ୟାରେ ଭୋଟର ଅଛନ୍ତି ତାହା ହେଲା

ବାଲେଶ୍ବର ନିର୍ବାଚନ ମଣ୍ଡଳିର ଭୋଟର ସଂଖ୍ୟା ହେଲା

ମୋଟ ଭୋଟର- ୨ ଲକ୍ଷ ୨୬ ହଜାର ୫ ଶହ ୮୬

ପୁରୁଷ ଭୋଟର-୧ ଲକ୍ଷ ୧୬ ହଜାର ୮ ଶହ ୮୪

ମହିଳା ଭୋଟର-୧ ଲକ୍ଷ ୯ ହଜାର ୬ ଶହ ୯୩

ଅନ୍ୟାନ୍ୟ-୯

ସେହିପରି ତିର୍ତ୍ତୋଲ ନିର୍ବାଚନ ମଣ୍ଡଳିର ଭୋଟର ସଂଖ୍ୟା ହେଲା

ମୋଟ ଭୋଟର- ୨ ଲକ୍ଷ ୩୮ ହଜାର ୫୬

ପୁରୁଷ ଭୋଟର- ୧ ଲକ୍ଷ ୨୩ ହଜାର ୬୦୦

ଅନ୍ୟାନ୍ୟ-୨୮

ନିର୍ବାଚନ ଘୋଷଣା ଦିନଠାରୁ ଉଭୟ ଜଗତସିଂହପୁର ଏବଂ ବାଲେଶ୍ବର ଜିଲ୍ଲାରେ ଆଚରଣ ବିଧି ଲାଗୁ ହୋଇଯାଇଛି। ଏହା ସମସ୍ତ ରାଜନୈତିକ ଦଳ, ପ୍ରାର୍ଥୀ ଏବଂ ସରକାରଙ୍କ ଉପରେ ଲାଗୁ କରାଯାଇଛି।

ସଂପଦ ଦଳାଇ

ଭୁବନେଶ୍ବର, ଖୁବ ଶିଘ୍ର ଓଡିଶାରେ ଦୁଇଟି ବିଧାନସଭା ଆସନ ପାଇଁ ଉପନିର୍ବାଚନ ହେବ। ଏହି ଦୁଇଟି ଆସନ ହେଲା ତିର୍ତ୍ତୋଲ ଏବଂ ବାଲେଶ୍ବର ସଦର ଆସନ। ତିର୍ତ୍ତୋଲ ନିର୍ବାଚନ ମଣ୍ଡଳୀରେ ବିଧାୟକ ଥିବା ବିଷ୍ଣୁ ଦାସ ଏବଂ ବାଲେଶ୍ବର ସଦରର ବିଧାୟକ ଥିବା ମଦନମୋହନ ଦତ୍ତଙ୍କ ପରଲୋକ ହୋଇଛି। ଫଳରେ ଉଭୟ ଆସନ ବର୍ତ୍ତମାନ ଖାଲିପଡିଥିବାରୁ ଉପନିର୍ବାଚନ ହେବ। ତାରିଖ ଘୋଷଣା ହୋଇ ନ ଥିଲେ ମଧ୍ୟ ରାଜ୍ୟ ରାଜନୀତିରେ ଏହି ଉପନିର୍ବାଚନକୁ ନେଇ ବେଶ୍ ତତ୍ପରତା ପ୍ରକାଶ ପାଇଲାଣି।

ତେବେ ଏହି ଦୁଇ ନିର୍ବାଚନ ମଣ୍ଡଳୀ ମଧ୍ୟରୁ ବାଲେଶ୍ବର ସଦର ଆସନଟିକୁ ନେଇ ବର୍ତ୍ତମାନ ତିନିଦଳ ମଧ୍ୟରେ ବେଶ୍ ବଳକଶା ହେବାର ସମ୍ଭାବନା ସୃଷ୍ଟି ହୋଇଛି। କାରଣ ହେଲା ଏହି ନିର୍ବାଚନ ମଣ୍ଡଳିର ଯେଉଁ ଲୋକସଭା ଆସନଟି ଅଛି ସେହି ଆସନର ତିନି ଦଳର ଲୋକସଭା ନେତା ହେଉଛନ୍ତି ବେଶ୍ ପ୍ରଭାବଶାଳୀ। ସେମାନେ ହେଲେ ବିଜେଡିର ରବିନ୍ଦ୍ର ଜେନା, କଂଗ୍ରେସର ନବଜ୍ୟୋତି ପଟ୍ଟନାୟକ ଏବଂ ବିଜେପିର କେନ୍ଦ୍ରମନ୍ତ୍ରୀ ପ୍ରତାପ ଷଡଙ୍ଗୀ।

ଯେହେତୁ ଏହି ଆସନଟି ଗତ ବିଧାନସଭା ନିର୍ବାଚନରେ ବିଜେଡି ହାତରୁ ବିଜେପି ଛଡାଇ ନେଇଥିଲା, ଏଥର ମଧ୍ୟ ଦଳ ବିଜୟ ଲାଭ କରିବ ବୋଲି ଆଶା ରଖିଛି। ତେବେ ବିଜେପିର ଅନ୍ୟ ଏକ ବଡ ଅସ୍ତ୍ର ଅଛି ତାହା ହେଲେ ସେହି ବିଧାନସଭା ଆସନର ଲୋକସଭା ସାଂସଦ ହେଉଛନ୍ତି ପ୍ରତାପ ଷଡଙ୍ଗୀ। ପ୍ରତାପ କେନ୍ଦ୍ରମନ୍ତ୍ରୀ ଥିବାରୁ ତାଙ୍କର ପ୍ରଭାବ ସେହି ବିଧାନସଭା ଆସନରେ ନିଶ୍ଚିତ ପରିଲକ୍ଷିତ ହେବ।

ଅନ୍ୟପଟେ କଂଗ୍ରେସ କଥା ଯଦି ବିଚାର କରାଯାଏ ତେବେ ଏହି ଲୋକସଭା ଆସନରୁ ପ୍ରାର୍ଥୀ ଥିଲେ ନବଜ୍ୟୋତି ପଟ୍ଟନାୟକ। କଂଗ୍ରେସ ସଭାପତି ନିରଂଜନ ପଟ୍ଟନାୟକଙ୍କ ପୁତ୍ର ନବଜ୍ୟୋତିଙ୍କ ମଧ୍ୟ ସେହି ଅଞ୍ଚଳରେ ସଂଗଠନ ରହିଛି। ଲୋକସଭା ପରି ବିଧାନସଭା ଉପନିର୍ବାଚନରେ ମଧ୍ୟ ଦଳ ଭଲ ପରିଶ୍ରମ କରିବ ବୋଲି ଜଣାପଡିଲାଣି।

ସେହିପରି ବିଜେଡି କଥା ଯଦି ଚିନ୍ତା କରାଯାଏ ତେବେ ବାଲେଶ୍ବର ଲୋକସଭା ପ୍ରାର୍ଥୀ ରବି ଜେନାଙ୍କ ମଧ୍ୟ ବେଶ୍ ଦବଦବା ରହିଛି। ଏହି ଉପନିର୍ବାଚନ ବାଲେଶ୍ବର ଅଞ୍ଚଳର ବିଜେଡିର ଶକ୍ତିଶାଳି ନେତା ରବି ଜେନାଙ୍କ ସମ୍ମାନର ପ୍ରଶ୍ନ ହେବ। କାରଣ ସେ ଲୋକସଭାରେ ହାରିଯିବା ପରେ ବର୍ତ୍ତମାନ ଦଳରେ ସେ ଏକ କଣଠୋସା ହେଲା ପରି ରହିଛନ୍ତି।

ବର୍ତ୍ତମାନ ବାଲେଶ୍ବର ସଦର ବିଧାନସଭା ଉପନିର୍ବାଚନ ପାଇଁ କେଉଁ ଦଳରୁ କିଏ ସେ ପ୍ରାର୍ଥୀ ହେବେ ତାହା ଭିନ୍ନ କଥା। ହେଲେ ପ୍ରକୃତ ଲଢେଇ କିନ୍ତୁ ଗତ ନିର୍ବାଚନରେ ତିନି ଦଳର ଲୋକସଭା ପ୍ରାର୍ଥୀଙ୍କ ମଧ୍ୟରେ ହେବ ତାହା ନିଶ୍ଚିତ।

ଏହି ବିଧାନସଭା ଆସନ ପାଇଁ କଂଗ୍ରେସରୁ କୁଆଡେ ଖୋଦ ନବଜ୍ୟୋତି ପଟ୍ଟନାୟକ ପ୍ରାର୍ଥୀ ହେବେ ବୋଲି ଶୁଣାଯାଉଛି। ସେପଟେ ବିଜେଡି ମଧ୍ୟ କୁଆଡେ ରବି ଜେନାଙ୍କୁ ମଧ୍ୟ ପ୍ରାର୍ଥୀ କରିପାରେ ବୋଲି ସମ୍ଭାବନା ରହିଛି। ହେଲେ ବିଜେପି ସମବେଦନା ଭୋଟ ହାତେଇବା ପାଇଁ ହୁଏତ ଦିବଙ୍ଗତ ବିଧାୟକଙ୍କ ପୁଅ ମାନସ ଦତ୍ତଙ୍କୁ ପ୍ରାର୍ଥୀ କରିପାରେ ବୋଲି ଜଣାପଡିଛି।

ଗତ ଲୋକସଭାରେ ବିପୁଳ ପଇସା ଖର୍ଚ୍ଚ କରି କଂଗ୍ରେସ ଏବଂ ବିଜେଡିର ଏହି ଦୁଇ ପ୍ରାର୍ଥୀ ହାରିବେ ପରେ ବର୍ତ୍ତମାନ ବିଧାନସଭା ପାଇଁ ମଧ୍ୟ ଲାଳାୟିତ। ସେଥିପାଇଁ ଏହି ଦୁଇଜଣଙ୍କର ପ୍ରାର୍ଥୀ ହେବା ବହୁ ସମ୍ଭାବନା ରହିଛି ବୋଲି ଚର୍ଚ୍ଚା ଚାଲିଛି। ତେବେ ଏହା ନିଶ୍ଚିତ ଯେ, ବାଲେଶ୍ବର ଉପ ନିର୍ବାଚନ ସବୁଠାରୁ ବ୍ୟୟ ବହୁଳ ଉପନିର୍ବାଚନ ହେବ ଏଥିରେ ସନ୍ଦେହ ନାହିଁ।

ସେହିପରି ତିର୍ତ୍ତୋଲ ବିଧାନସଭା ଆସନଟି ବିଜେଡି ହାତରେ ଥିଲା। ଏହି ଆସନରେ ଦିବଙ୍ଗତ ନେତା ବିଷ୍ଣୁ ଦାସଙ୍କର ଦଖଲ ମଧ୍ୟ ବେଶ ରହିଥିଲା। ବିଜେଡିର ଯେଉଁ ଗଣିତ ତାହା ହେଲା ସମବେଦନା ଭୋଟ ହାତେଇବା ପାଇଁ ତାଙ୍କ ପରିବାରରୁ ଜଣଙ୍କୁ ପ୍ରାର୍ଥୀ କରିବା। ସେହି ଅନୁସାରେ ଏହି ଆସନରେ ବିଷ୍ଣୁ ଦାସଙ୍କ ପୁତ୍ର ବିଜୟ ଶଙ୍କର ଦାସ ପ୍ରାର୍ଥୀ ହେବାର ସମ୍ଭାବନା ଅଧିକ ରହିଛି।

ତେବେ ରାଜ୍ୟରେ ଗତ ୨୦ ବର୍ଷ ଧରି ଶାସନ ଗାଦିରେ ଥିବା ବିଜେଡି ଦୁଇଟି ଉପନିର୍ବାଚନକୁ ଛାଡିଦେଲେ ଆଉ ସବୁଥିରେ ବିଜୟ ଲାଭ କରିଛି। ସେ ଦୁଇଟି ହେଲା ଲକ୍ଷ୍ମୀପୁର ଓ ତଲସରା ବିଧାନସଭା ଉପନିର୍ବାଚନ। ସେହି ଦୃଷ୍ଟିରୁ ଏଥର ଉପନିର୍ବାଚନରେ ମଧ୍ୟ  ବିଜେଡି ବାଲେଶ୍ୱର ଓ ତିର୍ତ୍ତୋଲକୁ ଦଖଲ କରିବ ବୋଲି ନିଶ୍ଚିତ ହୋଇ ରହିଛି।