Tag: କଳାହାଣ୍ଡି

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: ସରକାରୀ ସ୍କୁଲ ଗୁଡିକୁ ଆଧୁନିକ ଶୈଳୀରେ ରୂପରେଖ ଦେବା ସହିତ ଶିକ୍ଷାର ଉପଯୁକ୍ତ ବାତାବରଣ ସୃଷ୍ଟି କରିବା ପାଇଁ ସ୍ମାର୍ଟ ସ୍କୁଲ ଯୋଜନା ପ୍ରଣୟନ କରାଯାଇଥିବା ବେଳେ ପ୍ରଥମ ପର୍ଯ୍ୟାୟରେ କଳାହାଣ୍ଡି ଜିଲ୍ଲାର ୨୯ ଟି ସ୍ମାର୍ଟ ସ୍କୁଲ ମୂଖ୍ୟମନ୍ତ୍ରୀଙ୍କ ଦ୍ୱାରା ଉଦଘାଟିତ ହୋଇଯାଇଛି। ଶିକ୍ଷା ମାଧ୍ୟମରେ ଓଡିଶାର ପ୍ରଗତି ହେଉଛି ଓଡିଶାର ମୂଳ ମନ୍ତ୍ରୀ ବୋଲି ଭବାନୀପାଟଣାସ୍ଥିତ ମାଣିକେଶ୍ୱରୀ ହାଇସ୍କୁଲ ପରିସରରେ ଏହି ଅବସରରେ ଅନୁଷ୍ଠିତ ଉଦଘାଟନୀ ସମାରୋହରେ ଗୃହ ରାଷ୍ଟ୍ର ମନ୍ତ୍ରୀ କ୍ୟାପଟେନ ଦିବ୍ୟ ଶଙ୍କର ମିଶ୍ର ପ୍ରକାଶ କରିଛନ୍ତି। ମୂଖ୍ୟମନ୍ତ୍ରୀଙ୍କ ଦୂରଦୃଷ୍ଟି ଯୋଗୁଁ ଏବଂ କଳାହାଣ୍ଡି ପ୍ରତି ସ୍ୱତନ୍ତ୍ର ପଦକ୍ଷେପ ନିଆଯାଉଥିବା ହେତୁ କଳାହାଣ୍ଡି ଆଜି ଭୋକର ଭୂଗୋଳରୁ ସବୁଜ ସଫଳ ଆଲୋକିତ ଉଜ୍ୱଳ ହୋଇପାରିଛି ବୋଲି ମନ୍ତ୍ରୀ ନିଜ ବକ୍ତବ୍ୟରେ ପ୍ରକାଶ କରିଥିଲେ। ଭିଡିଓ କନଫରନେସିଂ ମାଧ୍ୟମରେ ଜିଲ୍ଲାର ୨୯ଟି ସ୍ମାର୍ଟ ସ୍କୁଲକୁ ମୂଖ୍ୟମନ୍ତ୍ରୀ ଉଦଘାଟନ କରିଥିବା ବେଳେ ନର୍ଲା ବିଧାୟକ ଭୂପିନ୍ଦର ସିଂ, ଲାଂଜିଗଡ ବିଧାୟକ ପ୍ରଦୀପ ଦିଶାରୀ, ଧର୍ମଗଡ ବିଧାୟକ ମୌଷଧି ବାଗ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ । କଳାହାଣ୍ଡି ଜିଲ୍ଲାପାଳଙ୍କ ପରିଚାଲନାରେ ଏହି କାର୍ଯ୍ୟକ୍ରମରେ ଗଣଶିକ୍ଷା ସଚିବ ସତ୍ୟବ୍ରତ ସାହୁ ଯୋଗ ଦେଇ ମାଣୀକେଶ୍ୱରୀ ହାଇସ୍କୁଲରେ ନିଜ ଛାତ୍ର ଜୀବନର ଅଭିଜ୍ଞତା ବଖାଣିବା ସହିତ ଶିକ୍ଷକ ରାମେଶ୍ୱର ଠାକୁରଙ୍କ ସଂପର୍କରେ ଉପସ୍ଥାପନ କରିଥିଲେ।

ଏହି ସ୍ମାର୍ଟ ସ୍କୁଲ କାର୍ଯ୍ୟକ୍ରମରେ ମାଣିକେଶ୍ୱରୀ ହାଇସ୍କୁଲ ସମେତ ବିଏମ ହାସ୍କୁଲ ଓ ଟାଉନ ହାଇସ୍କୁଲ, ଥୁଆମୂଲ ରାମପୁର ବ୍ଲକର ସିରମସ୍କା ହାଇସ୍କୁଲ ଓ ପାଡେପଦର ହାଇସ୍କୁଲ, ନର୍ଲା ବ୍ଲକର ତୁଳାପଡା ଦାମୋଦର ହାଇସ୍କୁଲ ଓ ନର୍ଲା ପଂଚାୟତ ହାଇସ୍କୁଲ, ମଦନପୁର ରାମପୁର ବ୍ଲକର ଦୁର୍ଗାମାଧବ ହାଇସ୍କୁଲ ଓ ଅଲାତରା ପଂଚସଖା ହାଇସ୍କୁଲ, ଲାଂଜିଗଡ ବ୍ଲକର ଲାଂଜିଗଡ ରୋଡ ସରକାରୀ ହାଇସ୍କୁଲ ଓ ବିଶ୍ୱନାଥପୁର ଗୋପବନ୍ଧୁ ହାଇସ୍କୁଲ, କେସିଙ୍ଗା ବ୍ଲକର କେସିଙ୍ଗା ହାଇସ୍କୁଲ, ବେଲଖଣ୍ଡି ହାଇସ୍କୁଲ ତୁୁଣ୍ଡଲା ହାଇସ୍କୁଲ ଓ କଶୃପଡା ହାଇସ୍କୁଲ, କର୍ଲାମୁଣ୍ଡା ବ୍ଲକର ରିଷିଡା ହାଇସ୍କୁଲ ଓ ଗଜବାହାଲ ହାଇସ୍କୁଲ, ଜୁନାଗଡ ବ୍ଲକର ଜୁନାଗଡ ହାଇସ୍କୁଲ ଓ ମହିଚଲା ବାଲାଜୀ ହାଇସ୍କୁଲ, କୋକସରା ବ୍ଲକର କୋକସରା ଜବାହର ହାଇସ୍କୁଲ ଓ ଲଡୁଗାଁ ହାଇସ୍କୁଲ, ଜୟପାଟଣା ବ୍ଲକର ଉମାଶଂକର ହାଇସ୍କୁଲ ଓ ହୀରାପୁର ହାଇସ୍କୁଲ, କଲମପୁର ବ୍ଲକର ଦୁର୍ଗାମାଧବ ହାଇସ୍କୁଲ ଓ ବୀଜମରା ସ୍ୱାମୀ ବିବେକାନନ୍ଦ ହାଇସ୍କୁଲ, ଗୋଲାମୁଣ୍ଡା ବ୍ଲକର ଫରଙ୍ଗ ହାଇସ୍କୁଲ ଓ ଗୋଲାମୁଣ୍ଡା ହାଇସ୍କୁଲ, ଧର୍ମଗଡ ବ୍ଲକର ଧର୍ମଗଡ ହାଇସ୍କୁଲ ଓ ବ୍ରାହ୍ମଣଛେଣ୍ଡିଆ ରାମକୃଷ୍ଣ ହାଇସ୍କୁଲ ଆଦି ୨୯ ଟି ହାଇସ୍କୁଲ କୁ ପ୍ରଥମ ପର୍ଯ୍ୟାୟରେ ସ୍ମାର୍ଟ ସ୍କୁଲ ଭାବେ ଉଦଘାଟନ କରାଯାଇଛି।

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: କଳାହାଣ୍ଡି ଜିଲ୍ଲା ଓୟୁଏଟି ପଡିଆଠାରେ ମୂଖ୍ୟମନ୍ତ୍ରୀ ନବୀନ ପଟ୍ଟନାୟକ ମହିଳାମାନଙ୍କୁ ସ୍ୱାସ୍ଥ୍ୟକଲ୍ୟାଣ କାର୍ଡ ବଂଟନ କରିଛନ୍ତି। ଏନେଇ ଆୟୋଜିତ ଏକ ସାଧାରଣ ସଭାରେ ମୂଖ୍ୟମନ୍ତ୍ରୀ ନବୀନ ପଟ୍ଟନାୟକ ମୂଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ  ସ୍ୱାସ୍ଥ୍ୟ ମନ୍ତ୍ରୀ ନବ ଦାସ, ଅର୍ଥମନ୍ତ୍ରୀ ନିରଂଜନ ପୂଝାରୀ, ମହିଳା ଓ ଶିଶୁ ବିକାଶ ମନ୍ତ୍ରୀ ଟୁକୁନି ସାହୁ ଙ୍କ ସମେତ ଗୃହ ରାଷ୍ଟ୍ର ମନ୍ତ୍ରୀ କ୍ୟାପଟେନ ଦିବ୍ୟ ଶଙ୍କର ମିଶ୍ର ଯୋଗ ଦେଇଥିଲେ।

ଆକାଶ ଦାଶ ନାୟକ ଓ ସୁଲତା ଦେଓଙ୍କ ସଂଯୋଜନାରେ ଅନୁଷ୍ଠିତ ହୋଇଥିବା ଏହି କାର୍ଯ୍ୟକ୍ରମରେ ମୂଖ୍ୟମନ୍ତ୍ରୀ ସେଠାରେ ଉପସ୍ଥିତ ମହିଳା ମାନଙ୍କୁ ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନାରେ ସ୍ୱାସ୍ଥ୍ୟ ସେବା କାର୍ଡ ବଂଟନ କରି ଶୁଭାରମ୍ଭ କରିଥିଲେ। ମନ୍ତ୍ରୀ ଟୁକୁନି ସାହୁ ସ୍ୱାଗତ ଭାଷଣ ଦେଇ ନବୀନ ସରକାର ତରଫରୁ ମାଆ ମାନଙ୍କୁ ସ୍ୱାସ୍ଥ୍ୟ ସେବା ପାଇଁ ଦଶ ଲକ୍ଷ ଟଙ୍କା ଆର୍ôଥକ ସାହାଯ୍ୟ ଯୋଗାଇ ଦେବାର ବ୍ୟବସ୍ଥା କରାଯାଉଥିବା ବିଷୟ ଉପସ୍ଥାପନ କରିଥିଲେ।

ସ୍ୱାସ୍ଥ୍ୟ ମନ୍ତ୍ରୀ ନବ ଦାଶ ମୂଖ୍ୟମନ୍ତ୍ରୀଙ୍କ ଦ୍ୱାରା ସମଗ୍ର ଓଡିଶାର କଣ ଅନୁକୋଣରେ ସମସ୍ତ ପରିବାର ଯେପରି ସ୍ୱାସ୍ଥ୍ୟ ସେବା ପାଇପାରିବେ ସେଥିପ୍ରତି ସରକାର ସର୍ବଦା ଚେଷ୍ଟିତ ଥିବା ପ୍ରକାଶ କରିଥିଲେ। ଅର୍ଥମନ୍ତ୍ରୀ ନିରଂଜନ ପୂଝାରୀ ସରକାରଙ୍କ ବିକାଶ ର ଗାଥା ପ୍ରକାଶ କରିଥିବା ବେଳେ ସରକାରଙ୍କ ବିକାଶୋନ୍ମୂଖି କାର୍ଯ୍ୟକ୍ରମକୁ ବିରୋଧି ସହ୍ୟ କରିପାରୁନଥିବା ପ୍ରକାଶ କରିଥରଲେ। ଗୃହ ରାଷ୍ଟ୍ର ମନ୍ତ୍ରୀ ବିଗତ ଦିନର କଳାହାଣ୍ଡି ଓ ଆଜିର ଉନ୍ନତି ପଥର କଳାହାଣ୍ଡି ସଂପର୍କରେ ଅବଲୋକନ କରି ସରକାର କଳାହାଣ୍ଡିର ବିକାଶ ପାଇଁ ସର୍ବଦା ଚେଷ୍ଟା କରିଆସୁଥିବା ପ୍ରକାଶ କରିଥିଲେ। ସେଥିପାଇଁ ମୂଖ୍ୟମନ୍ତ୍ରୀଙ୍କ ଦୂରଦୃଷ୍ଟି ଏବଂ କଳାହାଣ୍ଡିର ବିକାଶ ଯୋଜନା ସଂପର୍କରେ ଉପସ୍ଥିତ ଜନସାଧାରଣଙ୍କୁ ଅବଗତ କରାଇଥିଲେ।

ଏହି ଅବସରରେ ମୂଖ୍ୟମନ୍ତ୍ରୀ ପ୍ରାୟ ୪ ଲକ୍ଷ ୭ ହଜାର ୧୦୪ ପରିବାରକୁ ବିଜୁ ସ୍ୱାସ୍ଥ୍ୟ କଲ୍ୟାଣ କାର୍ଡ ଦେଇଥିବା ବେଳେ କଳାହାଣ୍ଡି ବାସୀଙ୍କୁ ପ୍ରାୟ ୯୦୦ କୋଟୀ ଟଙ୍କାର ପ୍ରକଳ୍ପ ଭେଟିଦେଇଛନ୍ତି। କଳାହାଣ୍ଡି ଆଜି ଶିକ୍ଷା, ସ୍ୱାସ୍ଥ୍ୟ ସେବା, ଜଳସେଚନ, କୃଷି କ୍ଷେତ୍ରରେ ବିକାଶ ଆଡକୁ ମୁହାଇଛି ଏବଂ ମୋର ପ୍ରତ୍ୟକ୍ଷ ନଜର ରହିଥିବା ମୂଖ୍ୟମନ୍ତ୍ରୀ ପ୍ରକାଶ କରିଛନ୍ତି।

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: ଜାଲ ସାର୍ଟିଫିକେଟଧାରୀ ଶିକ୍ଷକଙ୍କ ସଂପର୍କରେ ଉଚିତ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଓଡିଶା ପ୍ରାଥମିକ ଶିକ୍ଷା ନିର୍ଦ୍ଦେଶକଙ୍କ ପକ୍ଷରୁ କଳାହାଣ୍ଡି ସମେତ ଓଡିଶାର ସମସ୍ତ ଜିଲ୍ଲା ଶିକ୍ଷାଅଧିକାରୀ ମାନଙ୍କୁ ନିର୍ଦ୍ଦେଶ ଦିଆଯାଇଥିବା ଜଣାପଡିଛି। ପ୍ରାଥମିକ ଶିକ୍ଷା ନିର୍ଦ୍ଦେଶାଳୟ ପୂର୍ବ ପତ୍ର ସଂଖ୍ୟା ୧୯୧୬୬ ତା୨୯.୧୦.୨୦୨୦, ୨୨୪୨୨ ତା.୦୧.୧୨.୨୦୨୦, ୫୨୬ ତା.୨୧.୦୧.୨୦୨୧ ଏବଂ ୧୩୨୩୨ ତା.୧୯.୦୮.୨୦୨୧ ଆଧାରରେ ପତ୍ର ସଂଖ୍ୟା ୧୩୮୬୩ ତା.୨୮.୦୮.୨୦୨୧ ଅନୁସାରେ ଜିଲ୍ଲା ଶିକ୍ଷାଧିକାରୀ, ଜିଲ୍ଲା ଶିକ୍ଷା ପ୍ରକଳ୍ପ ସଂଯୋଜକ ତଥା ତତ ସଂଲଗ୍ନିତ ଗୋଷ୍ଠୀ ଶିକ୍ଷାଧିକାରୀ ମାନଙ୍କୁ ଦିଆଯାଇଥିବା ଜଣାପଡିଛି।

ମାନ୍ୟବର ଓଡିଶା ହାଇକୋର୍ଟ WP(C)18752/2018 ରେ ଜାଲ ଶିକ୍ଷକ ତଥା କର୍ମଚାରୀ ମାନଙ୍କ ସଂପର୍କରେ ସବିଶେଷ ତଥ୍ୟ ଯୋଗାଇଦେବା ପାଇଁ ନିର୍ଦ୍ଦେଶ ଦିଆଯାଇଥିବା ବେଳେ ସଂପୃକ୍ତ ଜିଲ୍ଲା ଶିକ୍ଷାଧିକାରୀ ମାନେ ତଥ୍ୟ ଯୋଗାଇ ଦେବାରେ ବିଳମ୍ବ ହେଉଥିବା କାରଣରୁ ପ୍ରାଥମିକ ଶିକ୍ଷା ନିର୍ଦ୍ଦେଶାଳୟ ଅସୁବିଧାର ସମ୍ମୁଖିନ ହେଉଥିବା ଦର୍ଶାଯାଇଛି। ଅଗଷ୍ଟ ୩୧ ତାରିଖ ସୁଦ୍ଧା ଜାଲ ଶିକ୍ଷକ ମାନଙ୍କ ସଂପର୍କରେ ତଥ୍ୟ ଯୋଗାଇ ନଦେଲେ ସଂପୃକ୍ତ ଶିକ୍ଷାଧିକାରୀ ମାନଙ୍କ ଦରମା ବନ୍ଦ କରିଦେବାକୁ କଡା ନିର୍ଦ୍ଦେଶ ଦିଆଯାଇଥିବା ଜଣାପଡିଛି।

ସରକାରଙ୍କ ଏହି ନିର୍ଦ୍ଦେଶ ଦେବାପରେ କଳାହାଣ୍ଡି ଜିଲ୍ଲାରେ ଜାଲିଆତିକରି ଶିକ୍ଷକତା କରୁଥିବା ଶିକ୍ଷକ ମହଲରେ ଭୟର ବାତାବରଣ ଖେଳିଯାଇଥିବା ଜଣାପଡିଛି। କଳାହାଣ୍ଡି ଜିଲ୍ଲାରେ ବହୁ ସଂକ୍ୟାରେ ଜାଲ ସାର୍ଟିଫିକେଟଧାରୀ ଶିକ୍ଷକ କାର୍ଯ୍ୟରତ ଥିବା ବହୁଦିନରୁ ଅଭିଯୋଗ ହୋଇଆସୁଥିବା ବେଳେ ସେସବୁର ତନଖି କରାଯାଉନଥିବା ଜଣାପଡିଛି। ଅଧିକାଂଶ ପ୍ରାର୍ଥୀ ଦରଖାସ୍ତ ଦାଖଲ ସମୟରେ ଅଧିକ ମାର୍କ ପାଇଥିବା ଜାଲ ସାର୍ଟିଫିକେଟ ଦାଖଲ କରି ଚୟନ ହୋଇଯାଉଥିବା ଏବଂ ପୋଷ୍ଟିଂ ଅର୍ଡର ହାସଲ କରି କାର୍ଯ୍ୟରେ ଯୋଗ ଦେବା ସମୟରେ ସଠିକ ସାର୍ଟିଫିକେଟ ଦାଖଲ କରିଦେଇଥିବା କୁହାଯାଉଛି। ଫଳରେ ସେହି ଜାଲିଆତି ସଂପର୍କରେ ତଦନ୍ତକାରୀ ଅଧିକାରୀଙ୍କ ନଜରକୁ ଆସିପାରୁନଥିବା ଚର୍ଚ୍ଚା ହେଉଛି।

ତଦନ୍ତକାରୀ ଅଫିସର ସଂପୃକ୍ତ ଶିକ୍ଷକଙ୍କର ପଦବୀ ପାଇବା ପାଇଁ ଆବେଦନ ସମୟରେ କେଉଁ ସାର୍ଟିଫିକେଟ ଦାଖଲ କରିଥିଲେ ଏବଂ କେଉଁ ମାର୍କ ବଳରେ ଚାକିରୀ ପାଇବାକୁ ଯୋଗ୍ୟ ବିବେଚିତ ହେଲେ ସେସଂପର୍କରେ ତଦନ୍ତ କଲେ ଆହୁରି ଅନେକ ଜାଲିଆତି ସଂପର୍କରେ ଜଣାପଡିଯାଇପାରେ ବୋଲି ବୁଦ୍ଧିଜୀବି ମହଲରେ ଦାବୀ ହେଉଛି। ଶିକ୍ଷକ ନିଯୁକ୍ତି ପ୍ରକ୍ରୀୟା ଆରମ୍ଭରୁ କାଗଜାତ ତଦନ୍ତ କରାଗଲେ ଜାଲ ସାର୍ଟୀପିକେଟ ସଂପର୍କରେ ବହୁ ଗୋପନୀୟ ତଥ୍ୟ ପଦାକୁ ଆସିଯାଇପାରିବ ବୋଲି ଆଲୋଚନା ହେଉଛି।

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: କଳାହାଣ୍ଡି ଜିଲ୍ଲାର କେସିଙ୍ଗା ଓ ଜୁନାଗଡ ଠାରେ ଥିବା ଏଫସିଆଇ ଅଫିସା ସାମନାରେ ଜିଲ୍ଲା ବିଜେଡି ପକ୍ଷରୁ ଧାରଣା ଦିଆଯାଇ ରାଜ୍ୟପାଳଙ୍କ ଉଦ୍ଦେଶ୍ୟରେ କଳାହାଣ୍ଡି ଜିଲ୍ଲାପାଳଙ୍କୁ ଦାବୀପତ୍ର ଦିଆଯାଇଛି। କେନ୍ଦ୍ର ସରକାର ଓଡିଶାକୁ ସବସିଡି ବାବଦକୁ ୬୫୦୦ କୋଟୀ ଟଙ୍କା ଦେବାକୁ ଥିବା ବେଳେ ଏଫସିଆଇ ମାଧ୍ୟମରେ ଚାଉଳ ଉଠାଣରେ ବିଲମ୍ବ କରୁଥିବା ଅଭିଯୋଗ କରାଯାଇଛି। କେସିଙ୍ଗା ଠାରେ ଜିଲ୍ଲା ସଭାପତି ପୁଷ୍ପେନ୍ଦ୍ର ସିଂଦେଓଙ୍କ ଙ୍କ ନେତୃତ୍ୱ ରେ ନର୍ଲା ବିଧାୟକ ଭୂପିନ୍ଦର ସିଂ,ପୂର୍ବତନ ବିଧାୟକ ଦୁଷ୍ମନ୍ତ ନାଏକ ଓ ଗୋବର୍ଦ୍ଧନ ଦାସ ପ୍ରମୂଖ ଙ୍କ ଉପସ୍ଥିତିରେ ବହୁ ବିଜେଡି କର୍ମୀ କେନ୍ଦ୍ର ଉପରେ ବର୍ଷିଥିଲେ। ସେହିପରି ଜୁନାଗଡସ୍ଥିତ ଏଫସିଆଇ କାର୍ଯ୍ୟାଲୟ ସମ୍ମୁଖରେ ଧର୍ମଗଡ ବିଧାୟକ ମୌଷଧି ବାଗ ଓ ଲାଂଜିଗଡ ବିଧାୟକ ପ୍ରଦୀପ ଦିଶାରୀ ଙ୍କ ନେତୃତ୍ୱରେ ବହୁ ବିଜେଡି କର୍ମୀ ସାମିଲ ହୋଇ କେନ୍ଦ୍ର ଉପରେ ବର୍ଷି ଥିଲେ। ଧାନ କିଣା ବାବଦକୁ କେନ୍ଦ୍ର ସରକାର ୬୫୦୦ କୋଟୀ ଟଙ୍କା ବାକି ରଖିଥିବା ବେଳେ କାଲି ବସ୍ତା ଯୋଗାଣ ରେ ଅସୁବିଧା ହେଉଥିବା କାରଣରୁ ଧାନ କିଣାରେ ବ୍ୟାପକ ଅସୁବିଧା ହେଉଥିବା ଦର୍ଶାଇ ମହାମହିମ ରାଜ୍ୟପାଳଙ୍କ ଉଦ୍ଦେଶ୍ୟରେ କଳାହାଣ୍ଡି ଜିଲ୍ଲାପାଳଙ୍କୁ ଏକ ତିନି ଦଫା ଦାବୀ ପତ୍ର ଦାଖଲ କରାଯାଇଥିଲା।

ଅନ୍ୟପକ୍ଷରେ ବିଜେଡିର ଏତାଦୃଶ ଧାରଣା କେବଳ ଲୋକଙ୍କୁ ଭୂଆଁ ବୁଲାଇବା ଉଦ୍ଦେଶ୍ୟରେ କରାଯାଉଥିବା ବିଜେପି ପକ୍ଷରୁ ପାଲଟା ଅଭିଯୋଗ କରାଯାଇଛି। ବିଜେପି କୃଷକ ସେଲ ରାଜ୍ୟ ସଭାପତି ପ୍ରଦୀପ ପୁରୋହିତ ଧାନ କିଣା କାରବାରରେ ରାଜ୍ୟ ସରକାରଙ୍କ ଅପାରଗତା ବୋଲି ଦର୍ଶାଇଥିବା ଜଣାପଡିଛି। ରାଜ୍ୟ ସରକାର ଚାଷୀଙ୍କ ଧାନକୁ ମଣ୍ଡିରେ କଟନୀ ଛଟନି ବନ୍ଦ କରିବା ସହିତ ଆବଶ୍ୟକୀୟ ଗୋଦାମ ବ୍ୟବସ୍ଥା କରି ଚାଷିଙ୍କ ଠାରୁ ସିଧାସଳଖ ଧାନ କିଣନ୍ତୁ ବୋଲି ଦାବୀ କରିଛନ୍ତି। ଇପ୍ରକ୍ରୀୟା ମାଧ୍ୟମରେ ମଣ୍ଡି ଲେବର ଓ ଟ୍ରାନ୍ସପୋର୍ଟ ବ୍ୟବସ୍ଥା କରି ମଣ୍ଡିୱାରୀ ସ୍ୱଚ୍ଛତା ସହ ଲୋକଲୋଚନକୁ ଆଣନ୍ତୁ ବୋଲି ଦାବୀ କରାଯାଇଛି। ମଣ୍ଡି ମାନଙ୍କରେ ପ୍ରକୃତ ପକ୍ଷେ କଣସବୁ ଘଟୁଛି ସେସବୁ ଚାଷୀମାନେ ଠିକ ଜାଣିଥିବା ପ୍ରକାଶ କରିଛନ୍ତି।

ଏଭଲି ଗୋଲକ ଧନ୍ଦା ଭିତରେ ନୀରିହ ଚାଷୀ ପେଷି ହୋଇଯାଉଥିବା କଳାହାନଯଡିର ଚାଷୀମାନଙ୍କ ମଧୟରେ ଆଲୋଚନା ହେଉଛି । ମଣ୍ଡି ବନ୍ଦ ଘୋଷଣା ହେବାପରେ ମଧ୍ୟ ଅଦ୍ୟାବଧି ମଣ୍ଡି ମାନଙ୍କରେ ଚାଷୀଙ୍କ ଧାନ ବିକ୍ରି ହୋନପାରି ପଡିରହିଥିବା ଅଭିଯୋଗ ହେଉଛି। ଗତ ଖରିଫରେ ମଧ୍ୟ ସେଭଲି ମଣ୍ଡି ବନ୍ଦ ହେବାପରେ ଚାଷୀଙ୍କ ଧାନକୁ କମ ମୂଲ୍ୟରେ ବିକ୍ରୀ କରାଯାଇଥିବା ବେଳେ ହେି ଧାନର ହିସାବ କିପରି କରାଗଲା ଏବଂ ସେହି ଧାନର ଚାଉଲ କିପରି ଉଠାଣ ହେଲା ସେସଂପର୍କରେ ତଦନ୍ତ ହେବା ଅବଶ୍ୟକ ବୋଲି ଚାଷି ମହଲରେ ଦାବୀ ହେଉଛି। ସେହିପରି ରବିର ଧାନ କୁ କିପରି ଉଠାଣ କରାଯିବ ତାହା ମୂଖ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି।

ଭୁବନେଶ୍ବର, ଫସଲବୀମା ସପ୍ତାହ ପାଳନ ଅବସରରେ ପ୍ରଧାନମନ୍ତ୍ରୀ ଫସଲବୀମା ଯୋଜନାର ପ୍ରଚାର ଓ ପ୍ରସାର ଏବଂ ଚାଷୀମାନଙ୍କ ମଧ୍ୟରେ ଜନସଚେତନତା ବୃଦ୍ଧି ନିମନ୍ତେ ଫସଲବୀମା ଯୋଜନା ପ୍ରଚାର ଗାଡ଼ିକୁ ଆଜି କୃଷି ଭବନଠାରେ କୃଷି ଓ କୃଷକ ସଶକ୍ତିକରଣ, ମତ୍ସ୍ୟ ଓ ପ୍ରାଣୀସଂପଦ ବିକାଶ, ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ ପତାକା ଦେଖାଇ ଶୁଭାରମ୍ଭ କରିଛନ୍ତି ।

ଏହି ଅବସରରେ ୧୦ଟି ଆକାଂକ୍ଷୀ ଜିଲ୍ଲାର ୧୦ଟି ପଛୁଆ ବ୍ଲକ୍‌ରେ ଚାଷୀମାନଙ୍କୁ ଅଧିକ ସଚେତନ କରିବା ପାଇଁ ୨ଟି ପ୍ରଚାର ଗାଡ଼ିର ବ୍ୟବସ୍ଥା କରାଯାଇଛି । ପ୍ରଥମ ଗାଡ଼ିଟି ଭୁବନେଶ୍ୱରରୁ ବାହାରି ଗଜପତି, ରାୟଗଡ଼ା, କୋରାପୁଟ, ନବରଙ୍ଗପୁର ଏବଂ ମାଲକାନଗିରିର ବ୍ଲକ୍‌ଗୁଡ଼ିକ ପରିକ୍ରମା କରିବ।

ଦ୍ୱିତୀୟ ଗାଡ଼ିଟି ଢେଙ୍କାନାଳରୁ ଯାତ୍ରା ଆରମ୍ଭ କରି ଢେଙ୍କାନାଳ ସମେତ ବଲାଙ୍ଗୀର, କନ୍ଧମାଳ, କଳାହାଣ୍ଡି, ନୂଆପଡ଼ା ଓ ରାୟଗଡ଼ା ଜିଲ୍ଲାର ବ୍ଲକ୍‌ରେ ପ୍ରଚାର କାର୍ଯ୍ୟ କରିବ । ଫସଲ ବୀମା ଯୋଜନା ସମ୍ବନ୍ଧରେ ଚାଷୀମାନଙ୍କୁ ଅଧିକ ସଚେତନ କରିବା ନିମନ୍ତେ ଚଳିତ ବର୍ଷ ଜୁଲାଇ ମାସ ୧ରୁ ୭ ତାରିଖ ପର୍ଯ୍ୟନ୍ତ ‘ଫସଲବୀମା ସପ୍ତାହ’ ପାଳନ କରାଯାଉଛି ।

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: କଳାହାଣ୍ଡି ଜିଲ୍ଲାରେ କୃଷିଯନ୍ତ୍ରପାତି ଯୋଗାଣ କରାଯାଇ ସରକାରୀ ସବସିଡି ବାଟ ମାରଣା ଅଭିଯୋଗ ସଂପର୍କରେ ତଦନ୍ତ ଧିମେଇ ଯାଇଥିବା ଅଭିଯୋଗ ହେଉଛି। ପ୍ରାୟ ୨୬ ଲକ୍ଷ ଟଙ୍କା ମୂଲ୍ୟର କମ୍ବାଇନ ହାରଭେଷ୍ଟର ପାଇଁ ହିତାଧିକାରୀଙ୍କୁ ସରକାରଙ୍କ ପକ୍ଷରୁ ୬ ଲକ୍ଷ ଟଙ୍କା ସବସିଡି ଯୋଗାଇ ଦିଆଯାଉଥିବା ବେଳେ ଅସାଧୁ ଡିଲର ଦଲାଲ ମାଧ୍ୟମରେ ଗରିବ, ନୀରିହ, ତଥା ଅନୁସୂଚିତ ଜାତି ଓ ଜନଜାତି (ଏସ.ସି/ଏସ.ଟି ) ସଂପ୍ରଦାୟର ବ୍ୟକ୍ତିଙ୍କୁ ଅଳ୍ପ କିଛି ଲାଲସା ଦେଖାଇ କେବଳ କାଜପତ୍ର ପସ୍ତୃତ କରି ପ୍ରତ୍ୟେକଙ୍କ ଠାରୁ ୬ ଲକ୍ଷ ଟଙ୍କାର ସବସିଡି ବାଟ ମାରଣା କରାଯାଇଥିବା ଅଭିଯୋଗ ହୋଇଥିଲା।

ଏସଂପର୍କରେ ସରକାର ତଦନ୍ତ ନିର୍ଦ୍ଦେଶ ଦେଇଥିବା ବେଳେ ଅସାଧୁ ଡିଲର ମାନଙ୍କ ଦ୍ୱାରା ଏହି ତଦନ୍ତକୁ ଚପାଇ ଦେବାକୁ ଉଦ୍ୟମ କରାଯାଉଥିବା ଜଣାପଡିଛି। ଡିଲର ମାନଙ୍କ ପକ୍ଷରୁ ତଦନ୍ତ ସହିତ ସଂଶ୍ଳିଷ୍ଟ ମାନଙ୍କୁ ବିଭିନ୍ନ ପ୍ରକାର ଚାପ ପକାଇବାର ଉଦ୍ୟମ କରୁଥିବା ମଧ୍ୟ କୁହାଯାଉଛି । ଯାହାଫଳରେ ମାତ୍ର ଅଳ୍ପ କିଛି ପ୍ରଲୋଭନରେ ପଡି ସରକାରୀ ସବସିଡି ୬ଲକ୍ଷ ଟଙ୍କାକୁ ଅନ୍ୟହାତରେ ଟେକିଦେଇଥିବା ନୀରିହ ଗରିବ ତଥା ଅନୁସୂଚିତ ଜାତି ଓ ଜନଜାତି (ଏସ.ସି/ଏସ.ଟି ) ସଂପ୍ରଦାୟର ବ୍ୟକ୍ତି ର ହିଁ କ୍ଷତିହେବ ଏଥିରେ କୌଣସି ଦ୍ୱିମତ ହିଁ ନାହିଁ ବୋଲି ବୁଦ୍ଧିଜୀବି ମହଲରେ ଆଲୋଚନା ହେଉଛି। ସରକାର ସେଭଲି ବ୍ୟକ୍ତି ବିଶେଷଙ୍କୁ ସବସିଡି ଯୋଗାଇ ଦେବାର କୌଣସି ମୂଲ୍ୟ ହିଁ ରହୁ ନାହିଁ ବୋଲି ମଧ୍ୟ ଆଲୋଚନା ହେଉଛି।

ନେତ୍ରମୋହନ ମାଝୀ, ଅର୍ଜୁନ ମାଝୀ, ଟୋପିନ୍ଦ୍ର ସୁନାନୀ, ପରମେଶ୍ୱର ଶବର, ରାମେଶ୍ୱର ଶବର ଭଲି ନୀରିହ ବ୍ୟକ୍ତି ମାନଙ୍କୁ ସରକାରୀ ସହାୟତା ମିଳିବା ପ୍ରଲୋଭନ ଦେଖାଇ ହାରଭେଷ୍ଟର ଯୋଗାଇ ନଦେଇ ସେମାନଙ୍କ ସବସିଡି ଟଙ୍କା ଉଠାଣ କରିନେଇଥିବା ବେଳେ ସେମାନଙ୍କୁ ୬ଲକ୍ଷ ଟଙ୍କା ସରକାର ଦେଇଥିଲେହେଁ ପ୍ରକୃତ ହିତାଧିକାରୀ ସେହି ସୁବିଧାରୁ ବଂଚିତ ହୋଇଯାଇଥିବା ଜଣାପଡିଛି। ମାତ୍ର ୧୧ ଡିସମିଲ ଘରଡିହ ଥିବା ଜନଜାତି ବ୍ୟକ୍ତିଙ୍କ ନାମରେ ୨୪ଲକ୍ଷ ୬୦ହଜାର ଟଙ୍କାର ହାରଭେଷ୍ଟର ଯୋଗାଣ କରାଯାଇ ୬ଲକ୍ଷ ଟଙ୍କା ସବସିଡି ଦିଆଯାଇ ବାଟମାରଣା ହୋଇଥିବା ଅଭିଯୋଗ ହେଉଛି।

ଅନ୍ୟପକ୍ଷରେ ମେକାନିକ କାମ କରୁଥିବା ଧନଂଜୟ ମାଝୀ, ବିଜୁପକ୍କାଘର ପାଇଥିବା ଈଶ୍ୱର ଭୋଇ ଏବଂ ବେଦାନ୍ତ ମାଝି, ଉପେନ୍ଦ୍ର ମାଝୀ, ବିଜୟ ମାଝୀ, ପବିତ୍ର ମାଝି ଭଲି ସରଳ ନୀରିହ ଏସ.ସି/ଏସ.ଟି ବ୍ୟକ୍ତିଙ୍କ ଖାତାରେ ସରକାରୀ ସବସିଡି ୬ ଲକ୍ଷ ଦିଆଯାଇଥିଲେହେଁ ସେମାନେ ଶୋଷିତ ହୋଇଥିବା ଅଭିଯୋଗ ହୋଇଥିବା ବେଳେ ସେସଂପର୍କରେ ବିଭାଗୀୟ କାର୍ଯ୍ୟାନୁଷ୍ଠାନ ଶୂନ। ଏସଂପର୍କରେ ଠୋସ ପଦକ୍ଷେପ ନିଆନଗଲେ ଆଗାମୀ ଦିନରେ ଏଭଲି ଶୋଷଣ ବୃଦ୍ଧିପାଇବାର ସମ୍ଭାବନାକୁ ଏଡାଇଦିଆଯାଇନପାରେ।

ୟନମାର କମ୍ପାନୀ ତରଫରୁ ଦଲାଲ ମାଧ୍ୟମରେ କାଗଜାତ ସଂଗ୍ରହ କରାଯାଇ ସରଳ ନୀରିହ ଏସ.ସି/ଏସ.ଟି ବ୍ୟକ୍ତିଙ୍କୁ ଟାର୍ଗେଟ କରି ସେମାନଙ୍କୁ ସରକାରୀ ସହାୟତା ଆଶା ଦେଖାଇ ଜମି ଓ ପାଶବୁକ/ଚେକ ଇତ୍ୟାଦି କାଗଜାତ ସଂଗ୍ରହ କରି ଫଟୋଉଠାଇ ନେଇ ହାରଭେଷ୍ଟର ଯୋଗାଣ କାଗଜାତ ପ୍ରସ୍ତୃତ କରାଯାଉଥିଲା ଓ ପାଶବୁକରେ ସବସିଡି ୬ ଲକ୍ଷ ଟଙ୍କା ପଡିଲା ପରେ ଟଙ୍କା ଉଠାଣ କରିଦେଲେ ତାହା ଡିପୋଜିଟ କରି ବେଙ୍କ ଋଣ କରାଇ ହାରଭେଷ୍ଟର ଯୋଗାଣ କରାଯିବା ବୋଲି ଆଶାଦେଖାଇ ମାତ୍ର ୨୦/୩୦ ହଜାର ଟଙ୍କା ଦେଇ ୬ଲକ୍ଷ ଟଙ୍କାର ସବସିଡି ଉଠାଇ ନେଇଥିବା ଅଭିଯୋଗ ହୋଇଛି। ନେତ୍ର ମୋହନ ମାଝୀଙ୍କ ୁ ସେଭଲି ଠକେଇ କରାଯାଇଥିବା ଅଭିଯୋଗ ହେବା ପରେ ସଂପୃକ୍ତ ଦଲାଲ ନିଜେ ଉକ୍ତ ହାରଭେଷ୍ଟର କିଣିଥିବା ସଫେଇ ଦେଉଥିବା ବେଳେ ଟୋପିନ୍ଦ୍ର ସୁନାନୀ ଙ୍କ କାଗଜାତରେ ଅନ୍ୟ ଲୋକଙ୍କ ଫୋନ ନମ୍ବର ଦର୍ଶା ଯାଇଥିବା ଜଣାପଡିଛି। ଅଧିକାଂଶ ହାରଭେଷ୍ଟର ଯୋଗାଣ କରାନଯାଇ କେବଳ କାଗଜାତ ପ୍ରସ୍ତୃତ କରାଯାଇ ସବସିଡି ହଡପ ଯୋଜନା କରାଯାଇଥିବା ଅଭିଯୋଗ ହୋଇଛି।

କୃଷିବିଭାଗ ପକ୍ଷରୁ ହିତାଧିକାରୀ ପାଖରେ ହାରଭେଷ୍ଟର ଅଛି କି ନାହିଁ ସେବିଷୟରେ ତଦନ୍ତ ଚାଲିଥିବା ବିଭାଗ ପକ୍ଷରୁ କୁହାଯାଉଥିବା ବେଳେ କିପରି ଭାବରେ କେଉଁ ବେଙ୍କ ଦ୍ୱାରା ଲକ୍ଷ ଲକ୍ଷ ଟଙ୍କା ଋଣ ହେଲା, ସବସିଡି ଟଙ୍କା ପାଶବୁକରେ ପଡିଲା ପରେ କାହା ପାଖକୁ ଟ୍ରାନସଫର ହେଲା, ହିତାଧିକାରୀ କଣ ପାଇଲା, ବର୍ତ୍ତମାନ ହାରଭେଷ୍ଟର କାହା ପାଖରେ ଅଛି, ଯଦି ଲିଜ ଦିଆଯାଇଛି ବୋଲି କୁହାଯାଉଛି ତେବେ କିପରି ଭାବେ ଲିଜ ଦିଆଯାଇଛି, ହିତାଧିକାରୀ କେତେ ଟଙ୍କା ପାଉଛି ଆଦି ବିଭିନ୍ନ ବିଷୟରେ ତଦନ୍ତ କରାଗଲେ ବହୁ ଗୋପନୀୟ ତଥ୍ୟ ପଦାକୁ ଆସିପାରିବ ବୋଲି ବୁଦ୍ଧିଜୀବି ମହଲରେ ଦାବୀ ହେଉଛି। ଏସଂପର୍କରେ ଉଚିତ ପଦକ୍ଷେପ ନିଆନଗଲେ ସରକାରୀ ସବସିଡି କେବଳ ଦଲାଲ ଓ ଡିଲରଙ୍କ ଦ୍ୱାରା ବାଟମାରଣା ହିଁ ସାର ହେବ ଏବଂ ସରକାରଙ୍କ କୃଷକ ପ୍ରୋତ୍ସାହନ ଯୋଜନା ସଫଳ ହୋଇପାରିବ ନାହିଁ ବୋଲି ଚାଷୀମହଲରେ ମତପ୍ରକାଶ ପାଇବାରେ ଲାଗିଛି।

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: କଳାହାଣ୍ଡି ଜିଲ୍ଲାରେ ଆଜି ଅନ୍ନଦାତାଙ୍କ ଅବସ୍ଥା ଦୁର୍ବିସହ ହୋଇପଡିଥିବା ଜଣାପଡିଛି। ବାଧ୍ୟ ହୋଇ ଅନ୍ନଦାତା ଆଜି ରାଜରାସ୍ତାରେ ଧାନ ବସ୍ତା ସହ ଓହ୍ଲାଇଥିବା ଦେଖାଯାଇଛି। କଳାହାଣ୍ଡିରେ ପ୍ରତି ଖରିଫ ଓ ରବିରେ ମଣ୍ଡି ସମସ୍ୟା ର ସମାଧାନ ହୋଇପାରିନାହିଁ। ସରକାରଙ୍କ ଧାନକ୍ରୟ ନୀତି ବଦଳୁଥିଲେ ହେଁ ଚାଷିଙ୍କ ଧାନ ବିକ୍ରୀ ସମସ୍ୟା ସମାଧାନ ହୋଇପାରୁନାହିଁ।

ଚାଷିଙ୍କ କଷ୍ଟ ଉପାର୍ଜିତ ଧାନ ବିକ୍ରୀ କରିବା ପାଇଁ ତହସିଲଦାର ଙ୍କ ଠାରୁ ଆରମ୍ଭ କରି ଧର୍ମଗଡ ଉପଜିଲ୍ଲାପାଳଙ୍କ ପାଖରେ ଆପତି କରିଥିଲେ ହେଁ ସେସବୁ ସମସ୍ୟା ର ସମାଧାନ ହୋଇନପାରିବାରୁ ଶେଷରେ ବାଧ୍ୟ ହୋଇ ଚାଷି ରାଜରାସ୍ତାକୁ ଓହ୍ଲାଇଥିବା ଜଣାପଡିଛି। କୋକସରା ବ୍ଲକ ଅଂଚଳର କାଶୀବାହାଲ, ମୋଟେର, ଜୟପାଟଣା ବ୍ଲକର ବାନେର, ବିମଳା,ରଣମାଲ, ଭେଜିଗୁଡା, ବାଣ୍ଡିଗାଁ, ବଡଟେମରୀ ତଥା କଲମପୁର ବ୍ଲକ ଅଂଚଳର ବିଜମରା, ଦୁଲକିବନ୍ଧ ମଣ୍ଡି ଅଂଚଳର ଶତାଧିକ ଳ ଚାଷି ଶନିବାରଦିନ ମୋଟେର ଜୟପାଟଣା ରାସ୍ତା ଉପରେ ଧାନ ବସ୍ତା ସହ ଧାରଣା ଦେଇଥିଲେ। ଏହିସବୁ ମଣ୍ଡି ଗୁଡିକର ଚାଷୀମାନେ ସଂପୃକ୍ତ ମଣ୍ଡି ଗୁଡିକରେ ଧାନ ବିକ୍ରୀ କରିବା ପାଇଁ ନିର୍ଦ୍ଧାରିତ ଧାନକିଣା ସଂସ୍ଥା ଗୁଡିକରେ ଚାଷୀ ପଂଜିକରଣ କରାଇଥିଲେ। ତଦନୁସାରେ ଚାଷୀମାନେ ସଂପୃକ୍ତ ମଣ୍ଡିକୁ ଧାନ ନେଇଥିଲେହେଁ ସେମାନଙ୍କ ଧାନ ସବୁ ବିକ୍ରୀ ହୋଇନପାରି ଶେହରେ ସେମାନଙ୍କ ଟୋକନ ସବୁ ଲାପ୍ସ ହୋଇଯାଇଥିବା ହେତୁ ଧାନ ବିକି ପାରିନଥିବା ଚାଷିମାନେ ଧାନ ବିକି ପାରିନଥିବା ଅଭିଯୋଗ ହୋଇଛି।

ଘଟଣା ସ୍ଥଳରେ ଜୟପାଟଣା ତହସିଲଦାର ସୁଭଦ୍ରା ମୁଣ୍ଡିକା, ଥାନାଧିକାରିଣୀ ରଶ୍ମିତା ପ୍ରଧାନ, ଧର୍ମଗଡ ଏଆରସିଏସ ଭୀକାରୀ ସେଠ, ଏସିଏସଓ ଖଗେଶ୍ୱର ପଣ୍ଡା ଚାଷି ମାନଙ୍କୁ ବୁଝାସୁଝା କରିଥିଲେହେଁ ଚାଷୀମାନେ ଲାପ୍ସ ହୋଇଥିବା ଟୋକନ ୱାପସ କରାଯାଇ ସେମାନଙ୍କ ଧାନ ବିକ୍ରି କରାଯିବା ବ୍ୟବସ୍ଥା କରିବାକୁ ଅଡିବସିଥିଲେ। ଶେଷରେ ଜିଲ୍ଲା ଯୋଗାଣ ଅଧିକାରୀ ଆସି ଚାଷୀଙ୍କ ଧାନ ଉଠାଣ କରିବାକୁ ନିର୍ଭର ପ୍ରତିଶ୍ରୁତି ଦେବାପରେ ଚାଷୀ ଧାରଣାରୁ ଉଠିଥିବା ଜଣାପଡିଛି।

ପ୍ରତିବର୍ଷ ଧାନ କିଣା ବ୍ୟବସ୍ଥାରେ ସମସ୍ୟା ଦେଖାଯାଉଥିବା ବେଳେ ପ୍ରଶାସନ ସେସବୁର ସମାଧାନ କରିପାରୁନଥିବା ଚାଷୀ ମହଲରେ ଆଲୋଚନା ହେଉଛି। ସମଗ୍ର କଳାହାଣ୍ଡି ଜିଲ୍ଲାରେ ମାତ୍ର ୭୨ ଜଣ ମିଲର୍ସଙ୍କ ମର୍ଜିରେ ଧାନ କିଣା ବ୍ୟବସ୍ଥା ପରିଚାଲିତ ହେଉଥିବା ବେଳେ ପ୍ରାୟ ୫୮ହଜାର ଚାଷି ଶୋଷିତ ହୋଇଥାନ୍ତି ଏବଂ ପ୍ରଶାସନ କିଂକର୍ତବ୍ୟ ବିମୂଢଃ ହୋଇ ପଡୁଥିବା ଅଭିଯୋଗ ହେଉଛି। ସମସ୍ତ ପ୍ରକାର ସରକାରୀ ନିୟମ କାନୁନକୁ ଜଳାଂଜଳି ଦିଆଯାଇ ଚାଷୀଙ୍କ ଧାନକୁ ସିଧାସଳଖ ମଣ୍ଡିରେ ସଂଶ୍ଳିଷ୍ଟ ହୋଇଥିବା ରାଇସମିଲର୍ସଙ୍କ ପସନ୍ଦ ଅନୁସାରେ ଧାନ ଉଠାଣ କରାଯାଇଥାଏ ଏବଂ ସଂପୃକ୍ତ ଧାନକିଣା ସଂସ୍ଥା ପାକ୍ସ କିମ୍ବା ଏସଏଚଜି ରେ କେବଳ କାଗଜାତ ପ୍ରସ୍ତୃତ କରାଯାଇଥାଏ।

ଧାନ ବିକ୍ରିରୁ ଶତକଡା ଅଢେଇ ଟଙ୍କା କମିଶନ ପାଉଥିବା ଧାନକିଣା ସଂସ୍ଥା ମାନଙ୍କର କୌଣସି ଭିତିଭୂମି ନଥିବା ବେଳେ ଶତକଡା ଦୁଇ ଟଙ୍କା ମାର୍କେଟ ଫିଜ ନେଉଥିବା ଆରଏମସି ପକ୍ଷରୁ ଚାଷିଙ୍କୁ ଆବଶ୍ୟକୀୟ ସହେଯାଗ ଯୋଗାଇ ଦିଆଯାଉନାହିଁ କିମ୍ବା କୌଣସି ପ୍ରକାରେ ଚାଷୀ ସଚେତନତା କରାଯାଉନାହିଁ। ମଣ୍ଡି ମାନଙ୍କରେ ଚାଷୀ ଭିତିଭୂମି ଓ ଚାଷି ସଚେତନତା ଅଭାବରୁ ବାଧ୍ୟ ହୋଇ ପ୍ରଶାସନ ଜାଣତରେ ରାଇସ ମିଲର୍ସ ମାନେ ହିଁ ମଣ୍ଡିରେ ନିଜ ମର୍ଜିରେ ଧାନ ଉଠାଣ କରୁଥିବା ଅଭିଯୋଗ ହୋଇଥାଏ।

ଅନ୍ୟପକ୍ଷରେ ଯେଉଁସବୁ ମଣ୍ଡିରେ ସ୍ଥାନୀୟ ମିଲର୍ସ ଟେଗିଂ ହୋଇଥାଏ ସେସବୁ ମଣ୍ଡି ମାନଙ୍କରେ ଅସାଧୁ ମିଲର୍ସ ଙ୍କ ଲାଭଖୋର ମନୋବୃତି ଯୋଗୁଁ ଚାଷିଙ୍କୁ ଅଧିକ ହଇରାଣ ହରକତ ହେବାକୁ ପଡୁଥିବା ଚାଷି ମହଲରେ ଅଭିଯୋଗ ହୋଇଥାଏ। ଧାନ ଉଠାଣ ପାଇଁ ଟ୍ରାନସପୋର୍ଟିଂ ବାହାନାରେ କେତେକ ମିଲର୍ସ ଙ୍କୁ ଶହେ ରୁ ଅଧରକ କିମି ଦୂରର ମଣ୍ଡି ରେ ସଂଲଗ୍ନ କରାଯାଉଥିବା ବେଳେ କେତେକଙ୍କୁ ୨ରୁ ୩ କିମି ଦୂରତା ମଧ୍ୟରେ ସୀମିତ କରାଯାଉଥିବା ଚାଷି ହଇରାଣର ଏକ ମୂଖ୍ୟ କାରଣ ବୋଲି ଚାଷି ନେତାମାନେ ପ୍ରକାଶ କରନ୍ତି।

ଅତୀତରେ ଏଭଲି ଅନେକ ସମସ୍ୟା ଦେଖାଦେଇଥିବା ବେଳେ ଅଦ୍ୟାବଧି ସେସବୁର ସମାଧାନ ହେଉନଥିବା ବେଳେ ପ୍ରତିବର୍ଷ ଧାନ କିଣା ବ୍ୟବସ୍ଥାରେ ସମସ୍ୟା ଉପରେ ସମସ୍ୟା ବଢିବାରେ ଲାଗୁଥିବା ଚାଷୀମହଲରେ ଅଭିଯୋଗ ହେଉଛି। ପାକ୍ସ ମାନଙ୍କରେ କିଛିଟା ଭିତିଭୂମି ବଢୁଥିବା ବେଳେ ଗତ ୨୦୧୮ ମସିହାରେ ସରକାର ମହିଳା ସଶକ୍ତିକରଣ ନାମରେ ଏସଏଚଜିଙ୍କୁ ଧାନକିଣା ଦାୟୀତ୍ୱ ଦେବାପରେ କମିଶନଟଙ୍କାର କୌଣସି ହିସାବ ରହୁନଥିବା ମଧ୍ୟ ଅଭିଯୋଗ ହେଉଛି। କେତେକ ରାଇସ ମିଲର୍ସ ଙ୍କ କବଜାରେ ଏସଏଚଜି ପରିଚାଲିତ ହେଉଥିବା ଏବଂ କମିଶନ ଟଙ୍କା ସିଧାସଳଖ ସେମାନଙ୍କ ପକେଟକୁ ଯାଉଥିବା ହେତୁ ଭିତିଭୂମି ବୃଦ୍ଧି କେବଳ ଦିବାସ୍ୱପ୍ନ ବୋଲି ଚାଷୀ ମହଲରେ ଆଲୋଚନା ହେଉଛି।

ଏଭଳି ଅନେକ ସମସ୍ୟାର ସମାଧାନ କରାଯାଉନଥିବା ବେଳେ ମାର୍କେଟଫିଜ ନେଉଥିବା ଆରଏମସି ଚାଷି ସଚେତନତା ପାଇଁ କୌଣସି ବ୍ୟବସ୍ଥା କରୁନଥିବା ମଧ୍ୟ ଅନ୍ୟ ଏକ ପ୍ରମୂଖ କାରଣ ବୋଲି ମଧ୍ୟ ଆଲୋଚନା ହେଉଛି। ସରକାର ଏସବୁ ଦିଗପ୍ରତି ଦୃଷ୍ଟି ଦେବାକୁ ଚାଷୀମହଲରେ ଦାବୀ ହେଉଛି।

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: ସରକାର ଶିଶୁ ଶ୍ରମିକ ନିୟୋଜନ ଉପରେ କଟକଣା ଜାରି କରିଥିବା ବେଳେ କଳାହାଣ୍ଡି କେନ୍ଦୁପତ୍ର ବିଭାଗରେ ତାହାର ଉଲ୍ଲଂଘନ କରାଯାଉଥିବା ଜଣାପଡିଛି। ମଦନପୁର ବ୍ଲକ କେନ୍ଦୁପତ୍ର ବିଭାଗ ଅନ୍ତର୍ଗତ ସିଂହପୁର ପଂଚାୟତ କୁଟୁପଲା ଗ୍ରାମରେ କୋମଳମତି ଶିଶୁ ମାନେ ନିୟୋଜିତ ହୋଇ କେନ୍ଦୁପତ୍ର କାମ କରୁଥିବା ଭଲି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ସ୍କୁଲରେ ପାଠ ପଢୁଥିବା ୧୪ ବର୍ଷରୁ କମ ବୁସ୍କ ପିଲାମାନଙ୍କୁ ସେଠାକାର କେନ୍ଦୁପତ୍ର ଫଡିରେ ବିଭିନ୍ନ କାମରେ ନିୟୋଜିତ କରି ଦାୟୀତ୍ୱରେ ଥିବା ଫରେଷ୍ଟର ତଥା ମୁନସି ମାନେ ମୁନାଫା ଉଠାଉଥିବାର ଅଭିଯୋଗ ହୋଇଛି।

ସାଂପ୍ରତିକ କରୋନା ମହାମାରୀ ସମୟରେ ରାଜ୍ୟ ସରକାର ଲକଡାଉନ ସ୍ଥିତି ଜାରି କରିଥିବା ବେଳେ ସେହି କୋମଳମତି ଶିଶୁମାନେ କାମ କରୁଥିବା ସମୟରେ ମାସ୍କ ମଧ୍ୟ ପରିଧାନ କରୁନଥିବା ଦେଖାଯାଉଛି। ସାଧାରଣତଃ କେନ୍ଦୁପତ୍ର ଫଡିମାନଙ୍କରେ ଶ୍ରମିକ ନିଯୁକ୍ତି କରି ପତ୍ର ତୋଳା ଠାରୁ ଆରମ୍ଭ କରି ପତ୍ରକେରା ବାନ୍ଧିବା ସହିତ ଶୁଖାଇବା, ସଂଗ୍ରହ କରି ଫଡିରେ ଭର୍ତି କରିବା ପର୍ଯ୍ୟନ୍ତ ଅନେକ କାମ ରହିଥାଏ। ସେସବୁ କାମ କରିବା ପାଇଁ ସଂପୃକ୍ତ ଫରେଷ୍ଟରଙ୍କ ମାଧ୍ୟମରେ ଅସ୍ଥାୟୀ ମୁନସି ମାନଙ୍କୁ ଦିନ ମଜୁରିଆ ନିୟୋଜନ ଦାୟୀତ୍ୱ ଦିଆଯାଇଥାଏ। ହେଲେ କମ ମଜୁରିଆଦ୍ୱାରା କାମ କରାଇନେଇ ଅଧିକ ବିଲ କରିବା ଠାରୁ ଆରମ୍ଭ କରି ଏଭଲି ଭାବେ ଶିଶୁ ମାନଙ୍କୁ ନିୟୋଜିତ କରି ଅଧିକ ମୁନାଫା ଉଠାଯାଉଥିବାର ଅଭିଯୋଗ ହେଉଛି।

ଗ୍ରାମାଂଚଳର କୋମଳମତି ଶିଶୁଛାତ୍ରମାନେ ସ୍କୁଲ ବନ୍ଦ ହୋଇଥିବା କାରଣରୁ ଏଭଲିଭାବେ କାମ କରୁଥିବା ବୁଦ୍ଧିଜୀବି ମହଲରେ ମତପ୍ରକାଶ ପାଇବାରେ ଲାଗିଛି। ହେଲେ କେନ୍ଦୁପତ୍ର ବିଭାଗ ଦ୍ୱାରା ଏଭଲି ଶିଶୁ ମାନଙ୍କୁ ନିୟୋଜନ କରାଯିବା ଘଟଣାକୁ ନିନ୍ଦା କରାଯାଇଛି। ବିଭାଗୀୟ କର୍ତୃପକ୍ଷ ଏସଂପର୍କରେ ଉଚିତ ପଦକ୍ଷେପ ନେବାକୁ ଦାବୀ ହେଉଛି। ଏନେଇ ବିଭାଗୀୟ ପଦାଧିକାରୀଙ୍କ ସହ ଯୋଗାଯୋଗ ସମ୍ଭବପର ହୋଇପାରିନାହିଁ। ଶିଶୁ ଶ୍ରମିକ ସୁରକ୍ଷା ଆଇନ ଅନୁସାରେ କି ପ୍ରକାର ପଦକ୍ଷେପ ଗ୍ରହଣ କରାଯାଉଛି ତାହା ଆଗାମୀ ସମୟ ରେ ଜଣାପଡିବ ବୋଲି ସାଧାରଣରେ ଆଲୋଚନା ହେଉଛି।