Tag: କଳାହାଣ୍ଡି

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: ସରକାର ଶିଶୁ ଶ୍ରମିକ ନିୟୋଜନ ଉପରେ କଟକଣା ଜାରି କରିଥିବା ବେଳେ କଳାହାଣ୍ଡି କେନ୍ଦୁପତ୍ର ବିଭାଗରେ ତାହାର ଉଲ୍ଲଂଘନ କରାଯାଉଥିବା ଜଣାପଡିଛି। ମଦନପୁର ବ୍ଲକ କେନ୍ଦୁପତ୍ର ବିଭାଗ ଅନ୍ତର୍ଗତ ସିଂହପୁର ପଂଚାୟତ କୁଟୁପଲା ଗ୍ରାମରେ କୋମଳମତି ଶିଶୁ ମାନେ ନିୟୋଜିତ ହୋଇ କେନ୍ଦୁପତ୍ର କାମ କରୁଥିବା ଭଲି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି। ସ୍କୁଲରେ ପାଠ ପଢୁଥିବା ୧୪ ବର୍ଷରୁ କମ ବୁସ୍କ ପିଲାମାନଙ୍କୁ ସେଠାକାର କେନ୍ଦୁପତ୍ର ଫଡିରେ ବିଭିନ୍ନ କାମରେ ନିୟୋଜିତ କରି ଦାୟୀତ୍ୱରେ ଥିବା ଫରେଷ୍ଟର ତଥା ମୁନସି ମାନେ ମୁନାଫା ଉଠାଉଥିବାର ଅଭିଯୋଗ ହୋଇଛି।

ସାଂପ୍ରତିକ କରୋନା ମହାମାରୀ ସମୟରେ ରାଜ୍ୟ ସରକାର ଲକଡାଉନ ସ୍ଥିତି ଜାରି କରିଥିବା ବେଳେ ସେହି କୋମଳମତି ଶିଶୁମାନେ କାମ କରୁଥିବା ସମୟରେ ମାସ୍କ ମଧ୍ୟ ପରିଧାନ କରୁନଥିବା ଦେଖାଯାଉଛି। ସାଧାରଣତଃ କେନ୍ଦୁପତ୍ର ଫଡିମାନଙ୍କରେ ଶ୍ରମିକ ନିଯୁକ୍ତି କରି ପତ୍ର ତୋଳା ଠାରୁ ଆରମ୍ଭ କରି ପତ୍ରକେରା ବାନ୍ଧିବା ସହିତ ଶୁଖାଇବା, ସଂଗ୍ରହ କରି ଫଡିରେ ଭର୍ତି କରିବା ପର୍ଯ୍ୟନ୍ତ ଅନେକ କାମ ରହିଥାଏ। ସେସବୁ କାମ କରିବା ପାଇଁ ସଂପୃକ୍ତ ଫରେଷ୍ଟରଙ୍କ ମାଧ୍ୟମରେ ଅସ୍ଥାୟୀ ମୁନସି ମାନଙ୍କୁ ଦିନ ମଜୁରିଆ ନିୟୋଜନ ଦାୟୀତ୍ୱ ଦିଆଯାଇଥାଏ। ହେଲେ କମ ମଜୁରିଆଦ୍ୱାରା କାମ କରାଇନେଇ ଅଧିକ ବିଲ କରିବା ଠାରୁ ଆରମ୍ଭ କରି ଏଭଲି ଭାବେ ଶିଶୁ ମାନଙ୍କୁ ନିୟୋଜିତ କରି ଅଧିକ ମୁନାଫା ଉଠାଯାଉଥିବାର ଅଭିଯୋଗ ହେଉଛି।

ଗ୍ରାମାଂଚଳର କୋମଳମତି ଶିଶୁଛାତ୍ରମାନେ ସ୍କୁଲ ବନ୍ଦ ହୋଇଥିବା କାରଣରୁ ଏଭଲିଭାବେ କାମ କରୁଥିବା ବୁଦ୍ଧିଜୀବି ମହଲରେ ମତପ୍ରକାଶ ପାଇବାରେ ଲାଗିଛି। ହେଲେ କେନ୍ଦୁପତ୍ର ବିଭାଗ ଦ୍ୱାରା ଏଭଲି ଶିଶୁ ମାନଙ୍କୁ ନିୟୋଜନ କରାଯିବା ଘଟଣାକୁ ନିନ୍ଦା କରାଯାଇଛି। ବିଭାଗୀୟ କର୍ତୃପକ୍ଷ ଏସଂପର୍କରେ ଉଚିତ ପଦକ୍ଷେପ ନେବାକୁ ଦାବୀ ହେଉଛି। ଏନେଇ ବିଭାଗୀୟ ପଦାଧିକାରୀଙ୍କ ସହ ଯୋଗାଯୋଗ ସମ୍ଭବପର ହୋଇପାରିନାହିଁ। ଶିଶୁ ଶ୍ରମିକ ସୁରକ୍ଷା ଆଇନ ଅନୁସାରେ କି ପ୍ରକାର ପଦକ୍ଷେପ ଗ୍ରହଣ କରାଯାଉଛି ତାହା ଆଗାମୀ ସମୟ ରେ ଜଣାପଡିବ ବୋଲି ସାଧାରଣରେ ଆଲୋଚନା ହେଉଛି।

ଦୁଷ୍ମନ୍ତ କୁମାର ପଣ୍ଡା
କଳାହାଣ୍ଡି: କଳାହାଣ୍ଡି ଜିଲ୍ଲାର ନର୍ଲା ନିର୍ବାଚନ ମଣ୍ଡଳୀ ଅନ୍ତର୍ଗତ ଅପହଂଚ ଅଂଚଳକୁ ରାଜ୍ୟ ଜଳସଂପଦ ଓ ସୂଚନା ଲୋକସଂପର୍କ ମନ୍ତ୍ରୀ ଗସ୍ତ କରିଛନ୍ତି। ସ୍ଥାନୀୟ ବିଧାୟକ ଭୂପିନ୍ଦର ସିଂ ଙ୍କ ସହିତ ଟ୍ରାକ୍ଟରରେ ବସି ସଂଗ୍ର ଅଂଚଳକୁ ବୁଲି ବିଭିନ୍ନ ଅଂଚଳ ବୁଲି ଦେଖିଛନ୍ତି। ବିଶେହ କରି କେସିଙ୍ଗା ବ୍ଲକ ଅଧିନସ୍ଥ କଶୃପଡା ପଂଚାୟତର ଶତାଧିକ ଚାଷୀଙ୍କ ତେଲନଦୀ କୂଳିଆ ଚାଷ ଜମି ମାନଙ୍କରେ ବଢିପାଣି ଯୋଗୁଁ ଚାଷ ନଷ୍ଟ ହେଉଥିବା କାରଣରୁ ଆଡିବନ୍ଧ ନିର୍ମାଣ କରିବାକୁ ଦୀର୍ଘ ଦିନରୁ ଦାବୀ ହୋଇଆସୁଥିଲା।

ବିଧାୟକ ଓ ମନ୍ତ୍ରୀ ସ୍ଥାନୀୟ ଚାଷୀ ମାନଙ୍କ ସହିତ ସମଗ୍ର ଅଂଚଳକୁ ଦେଖିବା ପରେ ସୁକୁନାଭଟା ଠାରୁ ଘାଟପଡା ପର୍ଯ୍ୟନ୍ତକୁ ତିନି କି.ମି. ପର୍ଯ୍ୟନ୍ତକୁ ଆଡିବନ୍ଧ ନିର୍ମାଣ କରାଯିବାକୁ ପ୍ରସ୍ତାବ ଦିଆଯାଇଥିବା ଜଣାପଡିଛି। ଜଳସଂପଦ ବିଭାଗ ତରଫରୁ ସର୍ଭେ କରାଯାଇ ଅଟକଳ ପ୍ରସ୍ତୃତ କରାଯାଇ ବୈଷୟୀକ ପରାମର୍ଶଦାତା କମିଟୀକୁ ପଠାଯାଇଥିବା ଜଣାପଡିଛି। ସ୍ଥାନୀୟ ବିଧାୟକଙ୍କ ସହିତ ଜଳସଂପଦ ମନ୍ତ୍ରୀଙ୍କ ତେଲନଦୀ। ଅଞ୍ଚଳ ପରିଦର୍ଶନ ଏବଂ ଆଡିବନ୍ଧ ନିର୍ମାଣ ପ୍ରସ୍ତାବ ଯୋଗୁଁ ସ୍ଥାନୀୟ ଚାଷୀ ମହଲରେ ଖୁସିର ଲହରୀ ଖେଲିଯାଇଥିବା ଜଣାପଡିଛି। ମନ୍ତ୍ରୀଙ୍କ ଗସ୍ତ ସମୟରେ ତେଲ ଅବବାହିକା ମୂଖ୍ୟଯନ୍ତ୍ରୀ ଙ୍କ ସମେତ ଅନ୍ୟାନ୍ୟ ପଦାଧିକାରୀ ତଥା ସେହି ଅଂଚଳର ଶତାଧିକ ଚାଷୀ ଉପସ୍ଥିତ ଥିଲେ।

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: କଳାହାଣ୍ଡି ଜିଲ୍ଲାରେ ଗତ ୧୪ ତାରିଖ ଦିନ ଓଡିଶାର ମୂଖ୍ୟମନ୍ତ୍ରୀଙ୍କ ଗସ୍ତ ଓ ଉଠାଜଳସେଚନ ପ୍ରକଳ୍ପର ଲୋକାର୍ପଣ ଉତ୍ସବରେ କୋଭିଡ ନିୟମକୁ ଖୋଲାଖୋଲି ଉଲ୍ଲଂଘନ ଅଭିଯୋଗ ହୋଇଛି। ଏନେଇ କଂଗ୍ରେସ ଦଳ ପକ୍ଷରୁ ବିଭିନ୍ନ ଥାନାରେ ମାମଲା ଦାଏର କରାଯାଇଥିବା ଜଣାପଡିଛି।

ଅଭିଯୋଗ ଅନୁସାରେ ଜୟପାଟଣା ବ୍ଲକ ମଙ୍ଗଳପୁର ଠାରେ ମୂଖ୍ୟମନ୍ତ୍ରୀଙ୍କ ସମେତ ଗୃହ ରାଷ୍ଟ୍ର ମନ୍ତ୍ରୀ ଓ ବହୁ ମନ୍ତ୍ରୀ, ବିଧାୟକ, ୫ଟି ସଚିବ ଓ ଅନ୍ୟାନ୍ୟ ପ୍ରଶାସନିକ ଅଧିକାରୀ ସଭା ମଂଚରେ ଉପସ୍ଥିତ ଥିବା ବେଳେ କୋଭିଡ ନିୟମ ଉଲ୍ଲଂଘନ କରାଯାଇ ୩ ହଜାରରୁ ଅଧିକ ଜନସମାଗମ କରାଯାଇଥିଲା।

ସରକାରୀ କାର୍ଯ୍ୟକ୍ରମରେ ବହୁମାତ୍ରାରେ ଦଳୀୟ ପତାକା ବ୍ୟବହାର କରାଯାଇ ରାଜକୋଷରୁ ପ୍ରଚୁର ଅର୍ଥ ଖର୍ଚ୍ଚ କରାଯାଇଥିବା ଅଭିଯୋଗ ହୋଇଛି। ସେହିପରି ୧୩ ତାରିଖ ଦିନ ମନ୍ତ୍ରୀ, ଏମଏଲଏ ମାନେ ବିଭିନ୍ନ ଗ୍ରାମକୁ ଯାଇ କୋଭିଡ ନିୟମ ଉଲ୍ଲଂଘନ କରି ଲୋକଙ୍କୁ ଠୁଳ କରିଥିବା ବେଳେ ସେମାନଙ୍କ ଉପରେ କାହିଁକି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ ବୋଲି କଂଗ୍ରେସ ପକ୍ଷରୁ କୁହାଯାଇଛି। ଏନେଇ କଂଗ୍ରେସ ଦଳ ପକ୍ଷରୁ ଧର୍ମଗଡ, କୋକସରା ଏବଂ ଜୟପାଟଣା ଥାନାରେ ପୃଥକ ଅଭିଯୋଗ ପତ୍ର ଦାଖଲ କରାଯାଇଥିବା ଜଣାପଡିଛି।

ଦୁଷ୍ମନ୍ତ କୁମାର ପଣ୍ଡା

କଳାହାଣ୍ଡି: ସରକାର କୃଷି ଓ କୃଷକ ମାନଙ୍କ ଉନ୍ନତି ନିମନ୍ତେ ଅନେକ ଯୋଜନା ପ୍ରଣୟନ କରିବା ସହିତ କୃଷି କ୍ଷେତ୍ରରେ ଆଧୁନିକ ପ୍ରଣାଳୀ ଅବଲମ୍ବନ କରିବା ପାଇଁ ରିହାତି ମୂଲ୍ୟରେ ଅତ୍ୟାଧୁନିକ କୃଷି ଯନ୍ତ୍ରପାତି ଯୋଗାଣ ବ୍ୟବସ୍ଥା କରିଛନ୍ତି। ଏହାର ସୁଯୋଗ ନେଇ କଳାହାଣ୍ଡିର ନୀରିହ ଚାଷୀମାନଙ୍କ ସରଳତାର ସୁଯୋଗ ନେଇ କେତେକ ଅସାଧୁ ଡିଲର ଚାଷୀଙ୍କୁ କୌଣସି କୃଷି ଯନ୍ତ୍ରପାତି ଯୋଗାଇ ନଦେଇ ଚାଷୀଙ୍କ ନାମରେ ସବସିଡି ଟଙ୍କା ହଡପ କରିନେଇଥିବା ଅଭିଯୋଗ ହୋଇଛି। ଅନେକ ଚାଷୀ ନିଜ ନାମରେ କୌଣସି କୃଷି ଯନ୍ତ୍ରପାତି ଆଣିନଥିବାର ପ୍ରକାଶ କରିଛନ୍ତି।

ଇନ୍ଦ୍ରାବତୀ ଜଳ ସେଚନ ଯୋଜନାରୁ ବ୍ୟାପକ ଭାବେ ଜଳସେଚନ ବ୍ୟବସ୍ଥା ହେବାପରେ ଦୁଇଫସଲି ଧାନ ଚାଷ ବୃଦ୍ଧିପାଇବାରେ ଲାଗିଛି। ଏହାର ସୁଯୋଗ ନେଇ ଜିଲ୍ଲା ସାରା ଅଣଓଡିଆ ଚାଷୀ ସଂଖ୍ୟା ଯଥେଷ୍ଟ ବୃଦ୍ଧି ପାଇବାରେ ଲାଗିଛି। ଅନ୍ୟପକ୍ଷରେ ଧାନ ଅମଳ କରିବା ପାଇଁ ନିର୍ଦ୍ଧାରିତ ସମୟରେ ଆବଶ୍ୟକ ଶ୍ରମିକ ମିଳୁନଥିବାରୁ ଧାନ ଅମଳରେ ଅସୁବିଧା ହେଉଥିବା କାରଣରୁ ଧାନ ଅମଳ ପାଇଁ କମ୍ବାଇନ ହାରଭେଷ୍ଟର ଭଲି ମୂଲ୍ୟବାନ ଯନ୍ତ୍ରଚାଲିତ ମେସିନର ଆବଶ୍ୟକ ପଡିଥାଏ। ପ୍ରାୟ ଚବିଶ ରୁ ଛବିଶ ଲକ୍ଷ ଟଙ୍କାର ଏହି କମ୍ବାଇନ ହାରଭେଷ୍ଟର ପାଇଁ ସରକାର ପକ୍ଷରୁ ଛଅ ଲକ୍ଷ ଟଙ୍କା ହିତାଧିକାରୀ ଚାଷୀଙ୍କୁ ସବସିଡି ଆକାରରେ ଯୋଗାଇ ଦିଆଯାଇଥାଏ। ଏହାର ସୁଯୋଗ ନେଇ କିଛି ଅସାଧୁ ଡିଲର ନିଜର କେତେକ ଏଜେଂଟ ମାଧ୍ୟମରେ ଗରିବ ନୀରିହ ଚାଷୀଙ୍କୁ ଚିହ୍ନଟ କରି ସେମାନଙ୍କ ଠାରୁ କାଗଜାତ ସଂଗ୍ରହ କରିବା ସହିତ ଫୁସୁଲାଇ ଆଧାର କାର୍ଡ, ଚେକ ସହିତ ବ୍ୟାଙ୍କ ପାଶବୁକ, ଜମି ସଂକ୍ରାନ୍ତୀୟ କାଗଜାତର କପି ଇତ୍ୟାଦି ସଂଗ୍ରହ କରି ସଂପୃକ୍ତ ଚାଷୀଙ୍କ ନାମରେ କମ୍ବାଇନ ହାରଭେଷ୍ଟର ମେସିନ ଆଣିଥିବା ଦର୍ଶାଇ ଚାଷୀଙ୍କ ବେଙ୍କ ପାଶବୁକରେ ସବସିଡି ଟଙ୍କା ପଡିଗଲେ ଚେକ ମାଧ୍ୟମରେ ଟଙ୍କା ଉଠାଣ କରିନେଇ ଚାଷୀଙ୍କୁ ଦଶ ହଜାରରୁ କୋଡିଏ ହଜାର ଟଙ୍କା ଧରାଇ ଦେଇ ସବସିଡି ହରିଲୁଟ କରିଥିବା ଅଭିଯୋଗ ମାନ ହୋଇଛି।

ଗତ ୨୦୧୮ ମସିହାରେ କଳାହାଣ୍ଡି ଜିଲ୍ଲା ଜୁନାଗଡ ବ୍ଲକ ଅନ୍ତର୍ଗତ ମୁଣ୍ଡରାଗୁଡା ଗ୍ରାମପଂଚାୟତ ର ପଣ୍ଡରାପଲା ଗ୍ରାମର ନେତ୍ର ମୋହନ ମାଝୀ ପି. ଦକ୍ଷିଣ ମାଝୀ ଙ୍କ ନାମରେ ୟନମାର କରମଣ୍ଡଳ ଏଗ୍ରୋ ଟୁଲ୍ସ କମ୍ପାନୀର ଏକ କମ୍ବାଇନ ହାରଭେଷ୍ଟର ଯୋଗାଣ ହୋଇଥିବା ସରକାରୀ ରେକର୍ଡରେ ଥିବା ବେଳେ ତାଙ୍କ ପାଖରେ କୌଣସି କମ୍ବାଇନ ହାରଭେଷ୍ଟର ନଥିବାର ପ୍ରକାଶ କରିଛନ୍ତି। ଏପରିକି ନେତ୍ର ମୋହନ ଙ୍କୁ ତିରୁମାଳା ଏଗ୍ରୋ ଏଜେନ୍ସିର ଜନୈକ କର୍ମଚାରୀ ଡାକି ନେଇ ଧର୍ମଗଡ ନିକଟସ୍ଥ ବସୁଲ ଗ୍ରାମରେ ଏକ ଧାନ କ୍ଷେତରେ ଥିବା ହାରଭେଷ୍ଟର ସାମନାରେ ଠିଆ କରାଇ ଦେଇ ଫଟୋ ଉଠାଇ ନେଇଥିବା ନେତ୍ରାନନ୍ଦ ପ୍ରକାଶ କରିଛନ୍ତି। ନେତ୍ର ମୋହନ ମାଝୀଙ୍କ ବେଙ୍କ ଚେକ ନଂ.୫୨୪୯୮୧ ଓ ୫୨୪୯୮୨ ଯୋଗେ ୧୮.୦୧.୨୦୧୯ ଦିନ ଏବଂ ଚେକ ନଂ. ୫୨୪୯୮୩ ଯୋଗେ ଏନଇଏଫଟି କରି କମ୍ପାନୀ କର୍ମଚାରୀ ସମସ୍ତ ସବସିଡି ଟଙ୍କା ଉଠାଣ କରିନେଇଥିବା ଜଣାପଡିଛି। ଏସଂପର୍କରେ ନେତ୍ର ମୋହନ ଜିଲ୍ଲାପାଳ ଓ କୃଷିବିଭାଗ ଙ୍କ ଠାରେ ଲିଖିତ ଅଭିଯୋଗ କରିଥିଲେ ହେଁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିବା ଜଣାପଡିଛି।
ସେହିପରି ଗତ ୨୦୧୮-୧୯ ମସିହାରେ ଜୟପାଟଣା ବ୍ଲକ ଅନ୍ତର୍ଗତ ମୋହନଗୁଡା ଗ୍ରାମର ଅର୍ଜୁନ ମାଝୀ ନିଜ ନାମରେ କମ୍ବାଇନ ହାରଭେଷ୍ଟର ମେସିନ ଆସିନଥିବା ଅଭିଯୋଗ କରିଛନ୍ତି। ଅଭିଯୋଗ ଅନୁସାରେ ନିକଟସ୍ଥ ବିମଳା ଗ୍ରାମରେ ରହୁଥିବା ଜୁନାଗଡିଆ ଚିରିକୁରୁ ନାମକ ଜଣେ ଅଣଓଡିଆ ଚାଷୀ ଅର୍ଜୁନ ମାଝୀକୁ ଆଶା ଦେଖାଇ ଭବାନୀପାଟଣାସ୍ଥିତ କ୍ଲାସ ସୋରୁମକୁ କୁ ଡାକିନେଇ କମ୍ବାଇନ ହାରଭେଷ୍ଟର କିଣିବା ପାଇଁ କହିଥିଲେ। କ୍ଲାସ ସୋରୁମର ମାଲିକ ସହ ଚିରିକୁରୁ କଥା ହୋଇ ସେଠାରେ କେତେକ କାଗଜାତରେ ସ୍ୱାକ୍ଷର କରାଇବା ସହିତ ଅର୍ଜୁନକୁ ନିକଟରେ ଥିବା ଏକ ପ୍ରାଇଭେଟ ବେଙ୍କକୁ ଡାକିନେଇ ସେଠାରେ ଋନ କରିବା ପାଇଁ କେତେକ କଲାଗଜାତରେ ସ୍ୱାକ୍ଷର କରାଇବା ସହିତ ମୋର ପିଏନବିର ପାଶବୁକ ର ସାତଟି ଖାଲି ଚେକ ରେ ସ୍ୱାକ୍ଷର କରାଇନେଇଥିଲେ। କିଛିଦିନପରେ କମ୍ବାଇନ ହାରଭେଷ୍ଟର ଆସିଯିବ ବୋଲି କହି ସେଠାରୁ ମୋତେ ଘରେ ଛାଡିଦେଇଥିଲେ। ପଚାରିଲେ ତୋର କୌଣସି ହାରଭେଷ୍ଟର ମଂଜୁରୀ ହୋଇପାରିଲା ନାହିଁ ବୋଲି ଅର୍ଜୁନକୁ କହୁଥିବା ଅର୍ଜୁନ ଜିଲ୍ଲାପାଳଙ୍କ ପାଖରେ ଲିଖିତ ଅଭିଯୋଗ କରିଥିବା ଜଣାପଡିଛି।

ସବସିଡି ମଂଜୁର ହୋଇଥିବା ସରକାରୀ ରେକର୍ଡରେ ଏଭଲି ଅନେକ ଚାଷୀ ଙ୍କ ନାମରେ କମ୍ବାଇନ ହାରଭେଷ୍ଟର ଯୋଗାଣ ହୋଇଥିବା ତଥ୍ୟ ମିଳିଥିବା ବେଳେ ତନ୍ମଧ୍ୟରୁ ଅଧିକାଂଶ ଚାଷୀଙ୍କୁ କୌଣସି କମ୍ବାଇନ ହାରଭେଷ୍ଟର ଯୋଗାଇ ନଦେଇ କମ୍ପାନୀ ମାଲିକ ଓ ଏଜେନ୍ସି ମାଲିକ ମାନେ ଦଲାଲ ମାଧ୍ୟମରେ ଲକ୍ଷ ଲକ୍ଷ ଟଙ୍କା ସବସିଡି ହରିଲୁଟ କରିଥିବା ଅଭିଯୋଗମାନ ହୋଇଛି।

ଗତ ୨୦୧୮-୧୯ ମସିହାରେ ଜୁନାଗଡ ବ୍ଲକର ଗୌଡଛେଣ୍ଡିଆ ଗ୍ରାମର ସରୋଜ ସୁନାନିଙ୍କ ନାମରେ ୟାନମାର କମ୍ପାନୀର କମ୍ବାଇନ ହାରଭେଷ୍ଟର ପାଇଁ ଛଅ ଲକ୍ଷ ଟଙ୍କା ସବସିଡି ମିଳିଥିବା ବେଳେ ତାଙ୍କ ପାଖରେ କୌଣସି ହାରଭେଷ୍ଟର ନଥିବା ଜଣାପଡିଛି। ସେହିପରି ୟନମାର କମ୍ପାନୀର କମ୍ବାଇନ ହାରଭେଷ୍ଟର ଯୋଗାଇଦେବା ପାଇଁ ଅସ୍ଥାୟୀ ଭାବେ ଚାରବାହାଲ ଠାରେ ଏକ ଚେଆର ଟେବୁଲ ପକାଇ ତିରୁମାଳା ଏଗ୍ରୋ ଏଜେନ୍ସି ମାଧ୍ୟମରେ କେତେକ ଦଲାଲ ଏଭଲି ଭାବେ ନୀରିହ ଚାଷୀଙ୍କ ନାମରେ ସବସିଡି ହରିଲୁଟ ଯୋଜନା କରିଥିବା କୁହାଯାଉଛି। ବର୍ତମାନ ଚାରବାହାଲ ଠାରେ ଏହି ଏଜେନ୍ସି ହିଁ ନଥିବା ଜଣାପଡିଛି। କଲମପୁର ବ୍ଲକ ଅନ୍ତର୍ଗତ ବିଜମରା ଗ୍ରାମର ପେଶାରେ ଜଣେ ମେକାନିକ ଧନଂଜୟ ମାଝୀଙ୍କ ନାମରେ କ୍ଲାସ କମ୍ପାନୀର ପ୍ରାୟ ୨୭ ଟକ୍ଷ ଟଙ୍କାର କ୍ଲାସ କମ୍ବାଇନ ହାରଭେଷ୍ଟର ବାବଦକୁ ଛଅ ଲକ୍ଷ ଟଙ୍କା ସବସିଡି ଉଠାଣ କରାଯାଇଥିବା ବେଳେ ଧନଂଜୟ ପାଖରେ କୌଣସି ହାରଭେଷ୍ଟର ନଥିବାର ପ୍ରକାଶ।

ସେହିପରି ଦୁଲକିବନ୍ଧ ଗ୍ରାମର ବିଜୁପକ୍କାଘର ହିତାଧିକାରୀ ଈଶ୍ୱର ଭୋଇ ନାମରେ କ୍ଲାସ କମ୍ବାଇନ ହାରଭେଷ୍ଟର ପାଇଁ ଛଅ ଲକ୍ଷ ଟଙ୍କା ସବସିଡି ଉଠାଣ କରାଯାଇଥିବା ବେଳେ ଈଶ୍ୱର ପାଖରେ କୌଣସି କମ୍ବାଇନ ହାରଭେଷ୍ଟର ନଥିବା ତାଙ୍କ ପରିବାର ଲୋକଙ୍କଠାରୁ ପ୍ରକାଶ। ଜୟପାଟଣା ବ୍ଲକର ଭଇଁରୀପାଲି ଗ୍ରାମର ବେଦାନ୍ତ ମାଝୀଙ୍କୁ ମାଁ ସନ୍ତୋଷି ଇଂଜିନିୟରିଂ ଜୟପାଟଣା ତରଫରୁ କର୍ତାର ଏଗ୍ରୋ କମ୍ପାନୀର କମ୍ବାଇନ ହାରଭେଷ୍ଟ ଯୋଗାଇ ଦେଇଥିବା ଦର୍ଶାଇ ଛଅ ଲକ୍ଷ ଟଙ୍କା ସବସିଡି ଉଠାଣ କରାଯାଇଥରବା ବେଳେ ବେଦାନ୍ତକୁ କୌଣସି ହାରଭେଷ୍ଟର ଦିଆଯାଇନଥିବା ଜଣାପଡିଛି। ଭଇଁରୀପାଲି ଗ୍ରାମର ଉପେନ୍ଦ୍ର ମାଝୀ ଓ ମୋହନଗୁଡା ଗ୍ରାମର ବିଜୟ କୁମାର ମାଝୀଙ୍କ ନାମରେ କ୍ଲାସ କମ୍ପାନୀର କମ୍ବାଇନ ହାରଭେଷ୍ଟର ଯୋଗାଣ କରାଯାଇଥିବା ଦର୍ଶାଇ ଛଅ ଲକ୍ଷ ଟଙ୍କା ଲେଖାଏଁ ସବସିଡି ଉଠାଣ ହୋଇଥିବା ବେଳେ ସେମାନଙ୍କ ପାଖରେ କୌଣସି କମ୍ବାଇନ ହାରଭେଷ୍ଟର ହିଁ ନାହିଁ।

ସେହିପରି ଧର୍ମଗଡ ବ୍ଲକ ଅନ୍ତର୍ଗତ ବଡବସୁଲ ଗ୍ରାମର ପର୍ଶୁରାମ ଶବର ଓ ରାମେଶ୍ୱର ଶବର ଙ୍କ ନାମରେ ୟନମାର କମ୍ପାନୀର କମ୍ବାଇନ ହାରଭେଷ୍ଟର ଯୋଗାଣ ହୋଇଥିବା ଦର୍ଶାଇ ଛଅଲକ୍ଷ ଟଙ୍କା ଲେଖାଏ ସବସିଡି ଉଠାଣ କରାଯାଇଥିବା ବେଳେ ସେମାନଙ୍କ ପାଖରେ କୌଣସି କମ୍ବାଇନ ହାରଭେଷ୍ଟର ହିଁ ନାହିଁ।

ଗତ ୨୦୧୯-୨୦ ମସିହାରେ କ୍ଲାସ ଇଣ୍ଡିଆ କମ୍ପାନୀ ର କମ୍ବାଇନ ହାରଭେଷ୍ଟର ଭବାନୀପାଟଣାସ୍ଥିତ ନର୍ମଦା ଇଣ୍ଢଷ୍ଟ୍ରୀଜ ପକ୍ଷରୁ ଭବାନୀପାଟଣା ବ୍ଲକ ତୁର୍ପି ଗ୍ରାମର ବିଶ୍ୱନାଥ ପାତ୍ର, ଗୋଲାମୁଣ୍ଡା ବ୍ଲକ ତୁମୁରା ଗ୍ରାମର ଦୁଯ୍ୟୋଧନ ମାଝୀ, ଜୟପାଟଣା ବ୍ଲକର ଭଇଁରୀପାଲି ଗ୍ରାମର ଦୁର୍ଜନ ବାଗ ଙ୍କୁ କମ୍ବାଇନ ହାରଭେଷ୍ଟର ଯୋଗାଇ ଦେଇ ଥିବା ଦର୍ଶାଇ ଛଅ ଲକ୍ଷ ଟଙ୍କା ଲେଖାଏଁ ସବସିଡି ଉଠାଣ କରାଯାଇଥିବା ବେଳେ ସେମାନଙ୍କ ପାଖରେ କୌଣସି କମ୍ବାଇନ ହାରଭେଷ୍ଟର ହିଁ ନାହିଁ। ସେହିପରି ୟନମାର କରମଣ୍ଡଳ ଏଗ୍ରି ସଲୁ୍ୟସନ କମ୍ପାନୀର କମ୍ବାଇନ ହାରଭେଷ୍ଟର ତିରୁମାଳା ଏଗୋ୍ର ଏଜେନ୍ସି ପକ୍ଷରୁ ନର୍ଲା ବ୍ଲକର କୁଟେନ ଗ୍ରାମର ପ୍ରଫୁଲ୍ଲ କୁମାର ସାହୁ, ଜୟପାଟଣା ବ୍ଲକ ବଡଟେମରୀ ଗ୍ରାମର ରବିନ୍ଦ୍ର ମାଝୀ, କଲମପୁର ବ୍ଲକର ପରୁଆଗୁଡା ଗ୍ରାମର ତୋପିନ୍ଦ୍ର ସୁନାନୀ ଙ୍କୁ କମ୍ବାଇନ ହାରଭେଷ୍ଟର ଯୋଗାଇ ଦେଇ ଥିବା ଦର୍ଶାଇ ଛଅ ଲକ୍ଷ ଟଙ୍କା ଲେଖାଏଁ ସବସିଡି ଉଠାଣ କରାଯାଇଥିବା ବେଳେ ସେମାନଙ୍କ ପାଖରେ କୌଣସି କମ୍ବାଇନ ହାରଭେଷ୍ଟର ହିଁ ନାହିଁ।

ସେହିପରି ଏକସନ କନଷ୍ଟ୍ରକସନ ଇକୁ୍ୟପମେଂଟ କମ୍ପାନୀର କମ୍ବାଇନ ହାରଭେଷ୍ଟର ଅସ୍ଥା ଏଗୋ୍ର ଟୁଲ୍ସ ପକ୍ଷରୁ ଜୁନାଗଡ ବ୍ଲକର କର୍ଲାକୋଟ ଗ୍ରାମର ଡେଙ୍ଗା ମାଝୀ ଙ୍କୁ କମ୍ବାଇନ ହାରଭେଷ୍ଟର ଯୋଗାଇ ଦେଇଥିବା ଦର୍ଶାଇ ଛଅ ଲକ୍ଷ ଟଙ୍କା ଲେଖାଏଁ ସବସିଡି ଉଠାଣ କରାଯାଇଥିବା ବେଳେ ସେମାନଙ୍କ ପାଖରେ କୌଣସି କମ୍ବାଇନ ହାରଭେଷ୍ଟର ହିଁ ନାହିଁ। ସେହିପରି କରତାର ଏଗ୍ରୋ ଇଣ୍ଡଷ୍ଟ୍ରିଜ କମ୍ପାନୀର କମ୍ବାଇନ ହାରଭେଷ୍ଟର ମାଁ ସନ୍ତୋଷୀ ଇଂଜିନିୟରିଂ ପକ୍ଷରୁ ଜୁନାଗଡ ବ୍ଲକର ଦାସିଗାଁ ଗ୍ରାମର ଡେଙ୍ଗା ମାଝୀ ଙ୍କୁ କମ୍ବାଇନ ହାରଭେଷ୍ଟର ଯୋଗାଇ ଦେଇଥିବା ଦର୍ଶାଇ ଛଅ ଲକ୍ଷ ଟଙ୍କା ସବସିଡି ଉଠାଣ କରାଯାଇଥିବା ବେଳେ ସେମାନଙ୍କ ପାଖରେ କୌଣସି କମ୍ବାଇନ ହାରଭେଷ୍ଟର ହିଁ ନାହିଁ।

ବିଗତ ବର୍ଷ ମାନଙ୍କରେ କୃଷି ଯନ୍ତପାତି ଯୋଗାଣ ପାଇଁ ସରକାରୀ ସବସିଡି ଯୋଗାଣ କରାଯାଇଥିବା ସଂପର୍କରେ ଅନୁସନ୍ଧାନ କରାଗଲେ ଏଭଲି ଅନେକ ତାଲିକା ବାହାରିବ ବୋଲି ସାଧାରଣରେ ଅଭିଯୋଗ ହେଉଛି। ଅନେକ କ୍ଷେତ୍ରରେ ବିଭିନ୍ନ କୃଷିଯନ୍ତ୍ରପାତିର ଏଜେନ୍ସି ମାଲି ମାନେ ଦଲାଲ ଲଗାଇ ନୀରିହ ଚାଷିମାନଙ୍କୁ ଅଲ୍ପ କିଛି ଟଙ୍କା ପ୍ରଲୋଭନ ଦେଖାଇ ସେମାନଙ୍କ ନାମରେ ଏଭଲି ଅନେକ କମ୍ବାଇନ ହାରଭେଷ୍ଟର ଏବଂ ଅନ୍ୟାନ୍ୟ କୃଷି ଯନ୍ତ୍ରପାତି ନାମରେ ସବସିଡି ବାବଦକୁ ଲକ୍ଷ ଲକ୍ଷ ଟଙ୍କା ହରିଲୁଟ କରିଥିବା ଅଭିଯୋଗ ହେଉଛି। ଅନେକ କ୍ଷେତ୍ରରେ ଅଭାବି ଚାଷୀ ଅଳ୍ପ କିଛି ଟଙ୍କା ଲାଲସାରେ ନିଜସ୍ୱ କାଗଜାତ ଦେଇଦେଉଥିବା ବେଳେ କେତେକ ଚାଷୀଙ୍କ ଅଜାଣତରେ ଏଭଲି ଭାବେ ସବସିଡି ହରିଲୁଟ ହୋଇଥିବା ଅଭିଯୋଗ ହେଉଛି। ନିଜ ପକେଟରୁ କିଛି ଖର୍ଚ୍ଚ କରାନଯାଇ କାଗଜାତ କପି ଓ ପାଶ ବୁକ ବ୍ୟବହାର କରି କିଛି ଟଙ୍କା ପାଇ ଚାଷି ଖୁସ ରହୁଥିବା ବେଳେ ଚଂଚକତା କରି ଦଲାଲ ଓ ଏଜେନ୍ସି ମାଲିକ ମାନେ ମାଲେମାଲ ହେଉଥିବା ଜଣାପଡିଛି।

ଏସବୁ ଅଭିଯୋଗ ଯଦିଓ ସତ୍ୟ ତେବେ ସରକାରୀ ସବସିଡି ଅର୍ଥ ସଠିକ ମାର୍ଗରେ ଖର୍ଚ୍ଚ ହୋଇପାରୁନଥିବାରୁ ବୁଦ୍ଧିଜୀବି ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇବାରେ ଲାଗିଛି। ଏଜେନ୍ସି ମାଲିକ ମାନଙ୍କ ଏଭଲି କାରବାରରେ ସାଧାରଣ ଚାଷୀ ସବସିଡି ପାଇପାରୁନାହିଁ। କେତେକାଂଶରେ ଅଣଓଡିଆ ଚାଷିମାନେ ଏଜେନ୍ସି ମାଲିକଙ୍କ ସହ ସଲାସୁତୁରା କରି ସ୍ଥାନୀୟ ନୀରିହ ଗରିବ ଚାଷୀ ନାମରେ କୃଷିଯନ୍ତ୍ରପାତି ଉଠାଣ କରି ପଡୋଶୀ ରାଜ୍ୟକୁ ଚାଲାଣ କରୁଥିବା ବେଳେ ଜୟପାଟଣା ବ୍ଲକ ଅନ୍ତର୍ଗତ ବିମଲା ଗ୍ରାମରେ ଥିବା ଜନୈକ ଅଣ ଓଡିଆ ଚାଷୀ ପ୍ରାୟ ପନ୍ଦର ଗୋଟି ବିଭିନ୍ନ କମ୍ପାନୀର କମ୍ବାଇନ ହାରଭେଷ୍ଟର ରଖି ବ୍ୟବସାୟ କରୁଥିବା ଜଣାପଡିଛି। ଅନ୍ୟପକ୍ଷରେ କୃଷିଯନ୍ତ୍ରପାତି ସବସିଡି ମାମଲରେ ପୂର୍ବ ଭଲି କୃଷି ଅଧିକାରି ମାନଙ୍କୁ ସାମିଲ କରାଯାଉ ନଥିବାରୁ ଏଜେନ୍ସି ମାଲିକ ମାନେ ସହଜରେ ଏଭଲି ଚଂଚକତା କରିବାରେ ସକ୍ଷମ ହେଉଥିବା ଜନୈକ ବରିଷ୍ଠ କୃଷିପଦାଧିକାରୀ ପ୍ରକାଶ କରିଛନ୍ତି। ଏହି କମ୍ବାଇନ ହାରଭେଷ୍ଟର ସବସିଡି ଯୋଗାଣ ସଂପର୍କରେ ଏକ ଉଚ୍ଚସ୍ତରୀୟ ତଦନ୍ତ କରାଯିବାକୁ ଚାଷିମହଲରେ ଦୃଢ ଦାବୀ ହେଉଛି।