ସୀତାରାମ ଅଗ୍ରୱାଲ
ଚିଲିକା: ଚିଲିକାରେ ମତ୍ସ୍ୟଜୀବୀଙ୍କ ବିପଦ ପିଛା ଛାଡୁନି। ମାଛ ମାରୁଥିବା ବେଳେ ଚିଲିକାରେ ବଜ୍ରଘାତ ଯୋଗୁଁ ଜଣେ ଧୀବରଙ୍କ ମୃତ୍ୟୁ ହୋଇଛି। ସୌଭାଗ୍ୟବଶତଃ ନିକଟରେ ଥିବା ଆଉ ୪ ଜଣ ଧୀବର ସୁରକ୍ଷିତ ଅଛନ୍ତି। ମୃତକଙ୍କ ନାମ ମାଗା ବେହେରା (୫୨ ବର୍ଷ)। ଟାଙ୍ଗୀ ଥାନା ବାଲି ପାଟପୁର ବଡ ବାହାଣିଆ ସାହିରେ ତାଙ୍କ ଘର ବୋଲି ଜଣାପଡିଛି।
ଆଜି ଭୋରରୁ ମାଛ ମାରିବା ପାଇଁ ଡଙ୍ଗାରେ ଚିଲିକାକୁ ଯାଇଥିଲେ। ବାଲି ପାଟପୁର ନଇ ନିକଟରେ ମାଛ ଧରୁଥିବା ବେଳେ ଏହି ଅଘଟଣ ଘଟିଛି।
ପ୍ରକାଶ ଥାଉ କି ଗତକାଲି ମଧ୍ୟ ବଜ୍ରଘାତରେ ବାପ ପୁଅଙ୍କର ମୃତ୍ୟୁ ହୋଇଥିଲା। ବାଲୁଗାଁ ଏନଏସି ଶାନ୍ତିନଗର ବାସିନ୍ଦା ଧୀବର ବିଧାନ ବିଶ୍ୱାସ (୬୦) ଓ ପୁତ୍ର ଉତ୍ତମ ବିଶ୍ୱାସ (୩୦) ଚିଲିକାକୁ ମାଛ ଧରିବା ପାଇଁ ଯାଇଥିଲେ। ହେଲେ ସେହି ସମୟରେ ଭୟଙ୍କ ଉପରକୁ ବଜ୍ରାଘାତ ହୋଇଥିଲା, ଯାହାଫଳରେ ଘଟଣାସ୍ଥଳରେ ବାପ ପୁଅଙ୍କ ମୃତ୍ୟୁ ହୋଇଥିଲା।