ସୀତାରାମ ଅଗ୍ରୱାଲ
ଚିଲିକା: ଚିଲିକାରେ ପକ୍ଷୀ ଶିକାର ଥମିବାର ନାଁ ନେଉନାହିଁ। ଶୀତ ଋତୁରେ ଲକ୍ଷାଧିକ ବିଦେଶାଗତ ପକ୍ଷୀ ଚିଲିକା ଆସୁଥିବା ବେଳେ ଶିକାରୀମାନେ ସକ୍ରିୟ ହୋଇ ଉଠୁଛନ୍ତି। ବନ୍ୟପ୍ରାଣୀ ବିଭାଗର କଡା ପ୍ରହରା ସତ୍ତ୍ୱେ ଶିକାରୀମାନେ ଶିକାର କରିବାରେ ବ୍ୟସ୍ତ ରହିଛନ୍ତି। ବନ୍ୟପ୍ରାଣୀ ବିଭାଗ ପକ୍ଷରୁ ପ୍ରତିଦିନ ଶିକାରୀଙ୍କୁ ଗିରଫ କରାଯାଉଥିବା ବେଳେ ଆଜି ଜଣେ ନାବାଳକ ଛାତ୍ର ପକ୍ଷୀ ଶିକାର ଅଭିଯୋଗରେ ଗିରଫ ହୋଇଛନ୍ତି।
ଆଜି ଶୀକାର କରି ଘରକୁ ଫେରୁଥିବା ବେଳେ ଏହି ନାବାଳକ ଶିକାରୀ ଜଣଙ୍କୁ ବନ୍ୟପ୍ରାଣୀ ବିଭାଗ ଗିରଫ କରିଛି। ଗିରଫ ଛାତ୍ର ଜଣକ +୨ ଶ୍ରେଣୀର ପ୍ରଥମ ବର୍ଷର ଛାତ୍ର ବୋଲି ଜଣା ପଡିଛି। ନାବାଳକ ଛାତ୍ର ଜଣକ ପକ୍ଷୀ ଶୀକାର କରି ବିକ୍ରି କରିବାକୁ ଯାଉଥିବା ବେଳେ ପାଟ୍ରୋଲିଂ କରୁଥିବା ବନ୍ୟ ପ୍ରାଣୀ କର୍ମଚାରୀମାନେ ବାଣପୁର ଥାନା ବଉଳା ବନ୍ଧ ଗ୍ରାମ ନିକଟରୁ ଗିରଫ କରିଛନ୍ତି। ତାଙ୍କ ନିକଟରୁ ୩ ଟି ମୃତ ବିଦେଶୀ ପକ୍ଷୀ ଜବତ କରାଯାଇଛି।
ତେବେ ପକ୍ଷୀ ଶୀକାରକୁ ରୋକିବା ପାଇଁ ଶତ ଚେଷ୍ଟା କଲେ ମଧ୍ୟ ବନ୍ୟ ପ୍ରାଣୀ ବିଭାଗ ବିଫଳ ହୋଇଛି। ବନ୍ୟ ପ୍ରାଣୀ ବିଭାଗର କଡା ପ୍ରହରାକୁ ଖାତିର ନକରି ଶୀକାରୀମାନେ ବାରମ୍ବାର ପକ୍ଷୀ ଶୀକାର କରୁଛନ୍ତି। ତେଣୁ ବିଦେଶୀ ପକ୍ଷୀମାନଙ୍କୁ ସୁରକ୍ଷା ଦେବା ସହ
ଶୀକାର ନ କରିବାକୁ ପରାମର୍ଶ ଦେଇଛନ୍ତି ରେଂଜର ଚୁଡାରାଣୀ ମୁର୍ମୁ।