Tag: ନିର୍ବାଚନ

ପ୍ରକାଶ ଭୋଳ

ଭୁବନେଶ୍ବର: ପୁରୀ ଲୋକସଭାରୁ ସମ୍ବିତ ପାତ୍ର ଜିତିବା ଦରକାର। ଏହା ଚାହୁଛି ରାଷ୍ଟ୍ରୀୟ ବିଜେପି। ସେତିକି ନୁହେଁ ଖୋଦ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଚାହୁଛନ୍ତି ଓଡିଶାର କେମିତି ହେଲେ ସମ୍ବିତ ପାତ୍ର ଜିତିବା ଦରକାର। ପ୍ରକୃତ କାରଣ କଣ ଜଣାପଡି ନ ଥିଲେ ମଧ୍ୟ ଓଡିଶାରୁ ସମ୍ବିତ ପାତ୍ର ନେତୃତ୍ବ ନେବାରେ ଉପଯୁକ୍ତ ବୋଲି ଦିଲ୍ଲୀରେ ଦଳ ଚିନ୍ତା କରିଛି।

ସେଥିପାଇଁ ସମ୍ବିତ, ଗଣ୍ଡାଗଣ୍ଡା କେନ୍ଦ୍ରମନ୍ତ୍ରୀଙ୍କୁ ଆଣି ପୁରୀ ଲୋକସଭା ନିର୍ବାଚନ ମଣ୍ଡଳୀରେ ଭର୍ତ୍ତି କରି ସାରିଲେଣି। ନିକଟରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ପୁରୀରେ ବହୁ କାର୍ଯ୍ୟକ୍ରମ କରି ସମ୍ବିତଙ୍କ ଲୋକପ୍ରିୟତାକୁ ବୃଦ୍ଧି କରିଛନ୍ତି। ସେ ପୁରୀ ସହରରେ ବିଭିନ୍ନ କାର୍ଯ୍ୟକ୍ରମ କରିବା ସହିତ ରଘୁରାଜପୁର ଏବଂ ପିପିଲିରେ ମଧ୍ୟ ଛୋଟଛୋଟ କାର୍ଯ୍ୟକ୍ରମ କରିଛନ୍ତି। ସେସବୁ କାର୍ଯ୍ୟକ୍ରମର ଉଦ୍ଦେଶ୍ୟ ଯାହା ହେଉ ନା କାହିଁକି ଏହା ଦ୍ବାରା ପୁରୀରେ ସମ୍ବିତ ପାତ୍ରଙ୍କ ପତିୟାରା ବଢିବାରେ ଲାଗିଛି।

ଏହା ପୂର୍ବରୁ ପୁରୀ ଗସ୍ତରେ ଆସିଥିଲେ କେନ୍ଦ୍ର ପରିବେଶ ଜଙ୍ଗଲ ଏବଂ ଜଳବାୟୁ ପରିବର୍ତ୍ତନ, ଶ୍ରମ ମନ୍ତ୍ରୀ ଭୂପେନ୍ଦ୍ର ଯାଦବ। ସେ ମଧ୍ୟ ପୁରୀ ଲୋକସଭା କ୍ଷେତ୍ରରେ ବିଭିନ୍ନ କାର୍ଯ୍ୟକ୍ରମ କରିଥିଲେ। ପିପିଲିରେ ସେ ତ୍ରିରଙ୍ଗା ଯାତ୍ରା ମଧ୍ୟ କରି ଏକ ବଡ ଶୋଭାଯାତ୍ରାରେ ସମ୍ବିତ ପାତ୍ରଙ୍କ ସହ ବୁଲିଥିଲେ। ସେହିପରି ପୂର୍ବରୁ ପୁରୀ ସଂସଦୀୟ କ୍ଷେତ୍ରର ଚିଲିକା ନିର୍ବାଚନ ମଣ୍ଡଳୀରେ ଏକ ବଡ ସଭା କରିଥିଲେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ ପି ନଡ୍ଡା। ଯାହା ସମ୍ବିତଙ୍କ ପାରିବା ପଣିଆକୁ ପ୍ରତିପାଦନ କରିଛି।

କେବଳ ଯେ କେନ୍ଦ୍ରମନ୍ତ୍ରୀ ଆସୁଛନ୍ତି ତାହା ନୁହେଁ ଖୋଦ ସମ୍ବିତ ମଧ୍ୟ ପୁରୀ ସଂସଦୀୟ କ୍ଷେତ୍ରର ସମସ୍ତ ବିଧାନସଭା ମଣ୍ଡଳୀର ପ୍ରତି ପଞ୍ଚାୟତ ଏକା ଏକା ବୁଲି ସାରିଲେଣି। ବର୍ତ୍ତମାନ ତାଙ୍କ ନିର୍ବାଚନ ମଣ୍ଡଳୀର ଛୋଟବଡ ସମସ୍ତ କାର୍ଯ୍ୟକ୍ରମରେ ସେ ସିଧା ଲୋକଙ୍କ ପାଖରେ ହାଜର ହେଉଛନ୍ତି।  ସାଧାରଣ ନିର୍ବାଚନକୁ ଢେର ଦିନ ବାକିଥିଲେ ମଧ୍ୟ ସମ୍ବିତଙ୍କ ଏପରି ମାରଥନ ଗସ୍ତ ବର୍ତ୍ତମାନ ତାଙ୍କର ଜିତିବା ରାସ୍ତାକୁ ସୁଗମ କରିବାରେ ଲାଗିଛି।

ଅନ୍ୟପଟେ ପୁରୀ ଲୋକସଭା ଆସନରେ ବିଜେଡିର ନିଷ୍କ୍ରିୟତା ସମ୍ବିତଙ୍କ ପାଇଁ ଏକ ବଡ ସୁଯୋଗ ଆଣି ଦେଇଛି। ପୁରୀ ସାଂସଦ ପିନାକୀ ମିଶ୍ର ଦିଲ୍ଲୀରୁ ଆଉ ଓଡିଶା ଆସୁ ନାହାଁନ୍ତି। ଆସିଲେ ମଧ୍ୟ ତାଙ୍କ ନିର୍ବାଚନ ମଣ୍ଡଳିରେ ମୁଣ୍ଡ ପୁରାଉ ନାହାଁନ୍ତି। ସେ କୁଆଡେ ଆଉ ନିର୍ବାଚନରେ ପ୍ରତିଦ୍ବନ୍ଦିତା କରିବେ ନାହିଁ ବୋଲି ପିନାକୀ ତାଙ୍କ କର୍ମିମାନଙ୍କୁ କହିସାରିଲେଣି। ଫଳରେ ସମ୍ବିତଙ୍କ ପାଇଁ ବିଲେଇ କପାଳକୁ ଶିକା ଛିଣ୍ଡିବା ପରି ପରିସ୍ଥିତି ସୃଷ୍ଟି ହୋଇଛି।

ତେବେ ସାଧାରଣରେ ଏକ ପ୍ରଶ୍ନ ସୃଷ୍ଟି ହେବା ସ୍ବାଭାବିକ ଯେ, କେନ୍ଦ୍ର ବିଜେପି କଣ ପାଇଁ ସମ୍ବିତଙ୍କ ଜିତିବାକୁ ଗୁରୁତ୍ବ ଦେଉଛି। ଏହାର ଉତ୍ତରରେ ଏତିକି କୁହାଯାଇ ପାରିବ ଯେ, ଭବିଷ୍ୟତରେ ଓଡିଶାରେ ବିଜେପିର ମୁହଁ ହେବେ ସମ୍ବିତ ପାତ୍ର। କାରଣ ପୂର୍ବରୁ ଯେଉଁମାନଙ୍କୁ ଦଳ ଓଡିଶାର ମଙ୍ଗୁଆଳ କରି ଛାଡିଥିଲେ ତାଙ୍କୁ ଲୋକେ ପସନ୍ଦ କରୁ ନାହାଁନ୍ତି। ଫଳରେ ଓଡିଶାରେ ବିଜେପି ଯେପରି ସଫଳତା ପାଇବା କଥା ତାହା ହୋଇପାରୁ ନାହିଁ।

ହେଲେ ସେଥିରୁ ସମ୍ବିତ ସଂପୂର୍ଣ୍ଣ ଅଲଗା। ସେ ଲୋକମାନଙ୍କ ଦ୍ବାରା ସହଜରେ ଗ୍ରହଣୀୟ ହୋଇପାରୁଛନ୍ତି। ସେଥିପାଇଁ ସେ ଚଳିତ ନିର୍ବାଚନରେ ଜିତିବା ପରେ ତାଙ୍କୁ ଶକ୍ତିଶାଳି କରାଯାଇ ଓଡିଶା ବିଜେପିର ମଙ୍ଗ ସମ୍ଭାଳିବା ପାଇଁ ଏକ ଦୀର୍ଘ ମିଆଦି ଯୋଜନା ବିଜେପି କରିଛି। ଏଥିପାଇଁ ସମ୍ବିତଙ୍କ ପାଇଁ ଦିଲ୍ଲୀରୁ ଏକ ଟିମ ଭୁବନେଶ୍ବରରେ ରହି କାର୍ଯ୍ୟ କରୁଛନ୍ତି। ସମ୍ବିତଙ୍କ ନିର୍ବାଚନ ଜିତିବା ପାଇଁ ପୁରା ଟିମ କେନ୍ଦ୍ରର ନିର୍ଦ୍ଦେଶ ଅନୁସାରେ ରଣନୀତି ତିଆରି କରୁଛନ୍ତି।

ଭୁବନେଶ୍ବର: ବର୍ତ୍ତମାନ ଓଡିଶାରେ ଏକ ବଡ ଚର୍ଚ୍ଚା ଚାଲିଛି। ତାହା ହେଲା ଓଡିଶାରେ ଆଗୁଆ ବିଧାନସଭା ନିର୍ବାଚନ ହେବ। ଚର୍ଚ୍ଚା ଅନୁସାରେ ନବୀନ ପଟ୍ଟନାୟକ କୁଆଡେ ଆସନ୍ତା ସେପ୍ଟେମ୍ବର ମାସରେ ବିଧାନସଭା ଭଙ୍ଗ କରିବେ। ଏହାପରେ ଡିସେମ୍ବରରେ ଦେଶରେ ହେବାକୁ ଥିବା ପାଞ୍ଚୋଟି ବିଧାନସଭା ନିର୍ବାଚନ ସହିତ ଓଡିଶା ନିର୍ବାଚନ ମଧ୍ୟ ହେବ।

ତେବେ ଏହି ଚର୍ଚ୍ଚା ଅନୁସାରେ ଆସନ୍ତା ସେପ୍ଟେମ୍ବର ୧୭ ତାରିଖରେ ନବୀନ ପଟ୍ଟନାୟକ ସରକାର ଭାଙ୍ଗିବାକୁ ଘୋଷଣା କରିବେ। ତେବେ ଏ ନେଇ କେନ୍ଦ୍ର ସରକାର କୁଆଡେ ଚାପ ପକାଉଛନ୍ତି ବୋଲି କୁହାଯାଉଛି। କାରଣ କେନ୍ଦ୍ର ସରକାରଙ୍କ କୌଣସି ପ୍ରକାରରେ ରାଜ୍ୟ ବିଧାନସଭା ସହ ଦେଣନେଣ ନାହିଁ। ସେମାନଙ୍କର ସାଂସଦ ଦରକାର, ଲୋକସଭାରେ ସଂଖ୍ୟା ଗରିଷ୍ଠ ଦରକାର।

ହେଲେ ଓଡିଶାରେ ବିଧାନସଭା ସହିତ ଲୋକସଭା ନିର୍ବାଚନ ହେଉଥିବାରୁ ରାଷ୍ଟ୍ରୀୟ ବିଜେପିକୁ ଅଡୁଆ ହେଉଛି। ନବୀନ ପଟ୍ଟନାୟକଙ୍କ ହାୱାରେ ବିଧାନସଭାରେ ସବୁ ଭୋଟ ବିଜେଡି ପୋଛି ନେବା ସହିତ ଲୋକସଭା ଭୋଟ ମଧ୍ୟ ନେଇଯାଉଛନ୍ତି। ସେଥିପାଇଁ ଅମିତ ସାହା ଓଡିଶା ଗସ୍ତବେଳେ କୁଆଡେ ନବୀନ ଏବଂ ପାଣ୍ଡିଆନଙ୍କ ସହିତ ଆଲୋଚନା କରି ଆଗୁଆ ନିର୍ବାଚନ କରିବା ପାଇଁ ଚାପ ପକାଇଛନ୍ତି।

ଘଟଣାଟି ଏବର ନୁହେଁ, ବହୁ ପୂର୍ବରୁ କୁଆଡେ କେନ୍ଦ୍ର ସରକାର ବିଜେଡି ଉପରେ ଚାପ ପକାଇ ଆସୁଛନ୍ତି। ସେଥିପାଇଁ କେନ୍ଦ୍ରରୁ ଆସୁଥିବା ବିଜେପି ନେତାମାନେ କୌଣସି ପ୍ରକାରରେ ବିଜେଡି ଉପରେ ଆକ୍ରମଣାତ୍ମକ ଆଭିମୁଖ୍ୟ ପ୍ରକାଶ କରୁ ନାହାଁନ୍ତି। ବିଜେଡି ମଧ୍ୟ କେନ୍ଦ୍ର ବିରୋଧରେ କୌଣସି ପ୍ରକାରର ଆଭିମୁଖ୍ୟ ପ୍ରକାଶ କରୁ ନାହିଁ। ବଂର ସବୁ ପ୍ରକାରର ସହାୟତା ପ୍ରଦାନ କରିବାରେ ଲାଗିଛି।

ଅନ୍ୟପକ୍ଷରେ ବର୍ତ୍ତମାନ ବିଜେଡି ସରକାରଙ୍କ କାର୍ଯ୍ୟକୁ ଅନୁଧ୍ୟାନ କଲେ ଏହା ସ୍ପଷ୍ଟ ହେଉଛି ଯେ, ରାଜ୍ୟରେ ନିଶ୍ଚିତ ଆଗୁଆ ନିର୍ବାଚନ ହେବ। ବିଜେଡି ସରକାରର ପ୍ରଚାର ପ୍ରସାର କରିବା ପାଇଁ 5ଟି ସଚିବ ଭିକେ ପାଣ୍ଡିଆନ ପ୍ରମୁଖ ଭୂମିକା ଗ୍ରହଣ କରିଛନ୍ତି। ନବୀନ ସରକାର କିପରି ଭଲ କାମ କରୁଛନ୍ତି ତାହାକୁ ଜିଲ୍ଲାୱାରୀ ବୁଲି ବୁଲି ସେ ଲୋକ ସମର୍ଥନ ଜୁଟାଇବାରେ ଲାଗିପଡିଛନ୍ତି।

ସେହିପରି ବିଜେଡି ଦଳ ଭିତରେ ମଧ୍ୟ ବେଶ ତତ୍ପରତା ପ୍ରକାଶ ପାଇଛି। କିଛି ମାସ ଧରି ଦଳର ଛାମୁଆ ସଂଗଠନଗୁଡିକ ସଜାଡିବା ସହିତ ଜିଲ୍ଲାରେ ନୂଆନୂଆ ମୁଖିଆ ନିଯୁକ୍ତି ହେବାରେ ଲାଗିଛନ୍ତି। ସେହିପରି ବିଜେଡି ନେତାମାନେ ମଧ୍ୟ ବର୍ତ୍ତମାନ ତୃଣମୂଳ ସ୍ତରରେ ନିଜର କାର୍ଯ୍ୟକ୍ରମ ମଧ୍ୟ ଆରମ୍ଭ କରିସାରିଛନ୍ତି।

କାହାକୁ ଟିକେଟ ମିଳିବ ତାହା ଜଣାପଡି ନ ଥିଲେ ମଧ୍ୟ ଆଶାୟୀମାନେ ଗାଁକୁ ଗାଁ ବୁଲିବାରେ ଲାଗିଛନ୍ତି। ବିଜେଡି ଦଳ ଏବଂ ବିଜେଡି ସରକାରର ଏପରି ତତ୍ପରତା ଯୋଗୁଁ ରାଜ୍ୟରେ ଆଗୁଆ ନିର୍ବାଚନ ସମ୍ଭାବନାକୁ ଅଧିକ ଦୃଢିଭୂତ କରିବାରେ ଲାଗିଛି।