Tag: ପିପିଲି ଉପନିର୍ବାଚନ

ଭୁବନେଶ୍ବର: ବହୁ ଚର୍ଚ୍ଚିତ ପିପିଲି ଉପନିର୍ବାଚନ ଶେଷ ହେଲା। ଫଳାଫଳ ମଧ୍ୟ ବାହାରିଲା। ବିଜେଡି ପ୍ରାର୍ଥି ରୁଦ୍ର ପ୍ରତାପ ମହାରଥୀ ୨୦,୯୧୬ ଖଣ୍ଡ ଭୋଟ ବ୍ୟବଧାନରେ ବିଜେପି ପ୍ରାର୍ଥୀଙ୍କୁ ହରାଇଲେ। ରାଜନୀତିରେ ହାରଜିତି ଲାଗିରହିଛି। ଜଣେ ଜିତିବ ଅନ୍ୟମାନେ ହାରିବେ। ହେଲେ ଏହି ହାରିବା ମଧ୍ୟ ରହିଛି ଦୁଇ ପ୍ରକାରର। ତାହା ହେଲା ସମ୍ମାନ ସହିତ ହାରିବା ଏବଂ ଅପମାନିତ ହୋଇ ହାରିବା।

ଏସବୁକୁ ବିଚାରକୁ ନେଲେ ପିପିଲି ଉପନିର୍ବାଚନରେ ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକ ସମ୍ମାନର ସହିତ ହାରିଛନ୍ତି ବୋଲି କୁହାଯିବ। କାରଣ ବିଜେଡି ପରି ଟାଣୁଆ ଦଳ, ମୁଖ୍ୟମନ୍ତ୍ରୀଙ୍କ ନିର୍ମଳ ଭାବମୂର୍ତ୍ତି ଏବଂ ବାପାଙ୍କ ସୁଦୃଢ ସଂଗଠନ ରୁଦ୍ରଙ୍କୁ ବେଶ ସୁହାଇଲା। ପୂର୍ବରୁ ସମସ୍ତେ ଆକଳନ କରିଥିଲେ ଯେ, ପିପିଲିରେ ବିଜେଡି ନିଶ୍ଚିତ ଜିତିବ। ଏଥିସହିତ ସମସ୍ତେ ଏହା ମଧ୍ୟ ଜାଣିଥିଲେ ଯେ ବିଜେପି ଟକ୍କର ଦେବ। ଆଉ ଦେଲା ମଧ୍ୟ।

ଭୋଟ ଗଣତିରୁ ସ୍ପଷ୍ଟ ହେଲା ଯେ, ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକ ବେଶ ଭଲ ଟକ୍କର ଦେଇଛନ୍ତି। କାରଣ ସେ ଦୁଇଟି ରାଉଣ୍ଡରେ ବିଜେଡି ପ୍ରାର୍ଥୀଙ୍କଠାରୁ ଆଗୁଆ ଥିଲେ। ଯାହାଦ୍ବାରା ଗଣିତ ଏପଟ ସେପଟ ହୋଇଯିବ ବୋଲି ଅନେକ ଭାବୁଥିଲେ। ପରିଶେଷରେ ସେ ୨୦ ହଜାର ଭୋଟରେ ହାରିଲେ।  ହେଲେ ସେ ନିଜର ଏବଂ ଦଳର ସମ୍ମାନ ରକ୍ଷା କରି ହାରିଲେ।

ଏପରି ପରିସ୍ଥିତିରେ କଂଗ୍ରେସର ପ୍ରାର୍ଥୀଙ୍କ ଦୟନୀୟ ଅବସ୍ଥା ଜଳଜଳ ହୋଇ ଦେଖାଦେଇଛି। କଂଗ୍ରେସ ପ୍ରାର୍ଥୀ ବିଶ୍ବକେଶନ ହରିଚନ୍ଦନ ମହାପାତ୍ର ସର୍ବମୋଟ ଭୋଟ ପାଇଲେ ମାତ୍ର ୪ ହଜା ୨୬୧ ଖଣ୍ଡ ଭୋଟ। ଅର୍ଥାତ ସେ ପାଞ୍ଚ ହଜାର ଭୋଟ ମଧ୍ୟ ହାତେଇବାରେ ସକ୍ଷମ ହୋଇପାରିଲେ ନାହିଁ। ଅମାନତଠାରୁ ସେ ଢେରେ କମ ଭୋଟ ପାଇଛନ୍ତି। ଏଥିରୁ ସ୍ପଷ୍ଟ ହେଲା ଯେ, କଂଗ୍ରେସ ତାହାର ଇଜ୍ଜତ ମଧ୍ୟ ରଖି ପାରିଲା ନାହିଁ।

ବର୍ତ୍ତମାନ ଏହି ନିର୍ବାଚନର ଫଳାଫଳ ସୂଚାଇ ଦେଲା ଯେ, କଂଗ୍ରେସ ଆଗାମୀ ଦିନରେ ନିରଜଂନ ପଟ୍ଟନାୟକ ନେତୃତ୍ୟରେ କଣ କରିବ। ଆସନ୍ତା ବର୍ଷ ରାଜ୍ୟରେ ପଞ୍ଚାୟତ ଏବଂ ପୌର ନିର୍ବାଚନ ହେବାକୁ ଯାଉଛି। ଗୋଟିଏ ନିର୍ବାଚନ ମଣ୍ଡଳିରେ ଯେଉଁ ଦଳ ପାଞ୍ଚ ହଜାର ଭୋଟ ହାତେଇ ପାରିଲା ନାହିଁ ସେ ସାରା ଓଡିଶାରେ କଣ କରିବ ତାହା ବେଶ ଅନୁମେୟ ହୋଇ ସାରିଲାଣି।

କଂଗ୍ରେସର ଏପରି ଦୟନୀୟ ଅବସ୍ଥା ପାଇଁ ପିପିଲି କଂଗ୍ରେସ ପ୍ରାର୍ଥୀ ଦାୟୀ ନୁହଁନ୍ତି। ଦାୟୀ ହେଉଛନ୍ତି ଖୋଦ ପ୍ରଦେଶ ସଭାପତି ନିରଂଜନ ପଟ୍ଟନାୟକ। କାରଣ ତାଙ୍କର ନେତୃତ୍ୟ ବର୍ତ୍ତମାନ ରାଜ୍ୟ ରାଜନୀତିରେ ପ୍ରଭାବ ପକାଇପାରୁ ନାହିଁ ବୋଲି ବାରମ୍ବାର ପ୍ରମାଣତି ହେବାରେ ଲାଗିଛି।

ଗତ ସାଧାରଣ ନିର୍ବାଚନରେ ଉଭୟ ବାପପୁଅ ମଧ୍ୟ ହାରିଲେ। ଯେତେବେଳେ ନିରଂଜନ ନିଜେ ଏବଂ ପୁଅକୁ ଜିତାଇବାର କ୍ଷମତା ନାହିଁ, ସେତେବେଳେ ଅନ୍ୟକୁ କିପରି ଜିତାଇବେ ? ଏହି ପ୍ରଶ୍ନ ମଧ୍ୟ କଂଗ୍ରେସ ମହଲରେ ସୃଷ୍ଟି ହେବାରେ ଲାଗିଛି। ଯଦି କଂଗ୍ରେସର ଏହିପରି ଅବସ୍ଥା ଲାଗି ରହେ ତେବେ ଭବିଷ୍ୟତରେ ପ୍ରାର୍ଥୀଙ୍କ ଭୋଟ ସଂଖ୍ୟା ହଜାରକୁ ମଧ୍ୟ ଖସି ଆସିବାର ସମ୍ଭାବନା ରହିଛି।

ଭୁବନେଶ୍ବର: ଶେଷରେ ପିପିଲି ଉପନିର୍ବାଚନ ଶେଷ ହୋଇଛି, ଫଳାଫଳ ମଧ୍ୟ ପ୍ରକାଶ ପାଇଛି। ଏହି ଉପନିର୍ବାଚନରେ ବିଜେଡି ପ୍ରାର୍ଥୀ ରୁଦ୍ରପ୍ରତାପ ମହାରଥୀ ବିଜୟ ଲାଭ କରିଛନ୍ତି। ସେ ତାଙ୍କର ନିକଟତମ ପ୍ରତିଦ୍ବନ୍ଦୀ ଆଶ୍ରିତ ପଟ୍ଟନାୟକଙ୍କୁ ୨୦ ହଜାର ୯୧୬ ଭୋଟରେ ପରାସ୍ତ କରିଛନ୍ତି।  ତେବେ ଏହି ନିର୍ବାଚନର ଫଳାଫଳକୁ ନେଇ ଆସନ୍ତୁ ଜାଣିବା ଏହି ୨୦ଟି କଥା।

ପିପିଲିର ମୋଟ ଭୋଟର ସଂଖ୍ୟା- ୨ ଲକ୍ଷ ୨୯ ହଜାର ୫୮୩

ମୋଟ ପୁରୁଷ ଭୋଟର ସଂଖ୍ୟା- ୧ ଲକ୍ଷ ୧୯ ହଜାର ୨୦

ମୋଟ ମହିଳା ଭୋଟର ସଂଖ୍ୟା- ୧ ଲକ୍ଷ ୧୦ ହଜାର ୫୬୨

ପିପିଲି ଉପନିର୍ବାଚନରେ ମୋଟ ଭୋଟ ଗ୍ରହଣ- ୧ ଲକ୍ଷ ୮୦ ହଜାର ୯୩୦

ମୋଟ ପୋଷ୍ଟାଲ ବାଲାଟ- ୮୯୩ ଭୋଟ

ମୋଟ ବୈଧ ଭୋଟ ସଂଖ୍ୟା -୧ ଲକ୍ଷ ୮୦ ହଜାର ୯୯

ମୋଟ ରିଜେକ୍ଟ ହୋଇଥିବା ଭୋଟ- ୧୩୬ ଖଣ୍ଡ

ନିର୍ବାଚନରେ ପ୍ରତିଦ୍ବନ୍ଦିତା କରିଥିବା ମୋଟ ପ୍ରାର୍ଥୀଙ୍କ ସଂଖ୍ୟା- ୧୦

ବିଜେଡି ପ୍ରାର୍ଥୀ ରୁଦ୍ର ମହାରଥୀଙ୍କ ଭୋଟ- ୯୬,୯୭୨ ଖଣ୍ଡ

ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକଙ୍କ ଭୋଟ- ୭୬,୦୫୬ ଖଣ୍ଡ ଭୋଟ

କଂଗ୍ରେସ ପ୍ରାର୍ଥୀ ବିଶ୍ବକେସନ ହରିଚନ୍ଦନ ମହାପାତ୍ରଙ୍କ ଭୋଟ- ୪୨୬୧ ଖଣ୍ଡ

ସିପିଆଇ ପ୍ରାର୍ଥୀ ଅଶୋକ ପ୍ରଧାନଙ୍କ ଭୋଟ ସଂଖ୍ୟା- ୮୯୮ ଖଣ୍ଡ

ଅଖିଳ ଭାରତ ହିନ୍ଦୁ ମହାସଭା ପ୍ରାର୍ଥୀ ଜୟ ପ୍ରକାଶ ସେଠୀଙ୍କ ଭୋଟ- ୪୫୫

କଳିଙ୍ଗ ସେନା ପ୍ରାର୍ଥୀ ପିଙ୍କଲିନ ମହାନ୍ତିଙ୍କ ଭୋଟ ସଂଖ୍ୟା- ୧୫୬ ଭୋଟ

ରିପବ୍ଲିକାନ ପାର୍ଟି ଅଫ ଇଣ୍ଡିଆର ପ୍ରାର୍ଥୀ ମହମ୍ମଦ ଇମାନୁଉଦ୍ଦିନ ୨୪୪ ଭୋଟ

ଏହି ନିର୍ବାଚନରେ ଛିଡା ହୋଇଥିବା ମୋଟ ସ୍ବାଧୀନ ପ୍ରାର୍ଥୀ ସଂଖ୍ୟା- ୩ ଜଣ

ସ୍ବାଧୀନ ପ୍ରାର୍ଥୀ ନାଗେନ୍ଦ୍ର ନାଥ ମିଶ୍ରଙ୍କ ଭୋଟ- ୪୧୪,

ସ୍ବାଧୀନ ପ୍ରାର୍ଥୀ ସୁଲୋଚନା ସାହୁଙ୍କ ଭୋଟ-  ୨୬୬

ସ୍ବାଧୀନ ପ୍ରାର୍ଥୀ ସ୍ବପ୍ନେଶ୍ବର ନାୟକଙ୍କ ଭୋଟ- ୩୭୭

ନୋଟାରେ ପଡିଥିବା ମୋଟ ଭୋଟ ସଂଖ୍ୟା-୮୩୧ ଖଣ୍ଡ

ଭୁବନେଶ୍ବର: ଆଜି ପିପିଲି ଉପନିର୍ବାଚନରେ ଦିବଙ୍ଗତ ନେତା ପ୍ରଦୀପ ମହାରଥୀଙ୍କ ପୁତ୍ର ରୁଦ୍ରପ୍ରତାପ ମହାରଥୀ ବିଜୟ ଲାଭ କରିଛନ୍ତି। ତାଙ୍କର ନିକତମ ପ୍ରତିଦ୍ବନ୍ଦୀ ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକଙ୍କୁ ୨୦ ହଜାର ୯୧୬ ଭୋଟ ବ୍ୟବଧାନରେ ହରାଇଛନ୍ତି। ଏହି ବିଜୟ ନିଶ୍ଚିତ ଭାବେ ମହାରଥୀ ପରିବାରରେ ଖୁସିର ଲହରି ଖେଳିଯାଇଛି।

ହେଲେ ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଆଜି ସକାଳେ ରୁଦ୍ର ପ୍ରସାଦ ମହାରଥୀଙ୍କ ପରିବାରର ସମସ୍ତେ ଦୁଃଖରେ ଭାଙ୍ଗି ପଡିଥିଲେ। ଆଉ ଏହାର କାରଣ ହେଲା ଆଜି ରୁଦ୍ରଙ୍କ ବାପା ତଥା ପିପିଲିର ଟାଣୁଆ ନେତା ପ୍ରଦୀପ ମହାରଥୀଙ୍କ ଥିଲା ପ୍ରଥମ ଶ୍ରାଦ୍ଧ ବାର୍ଷିକ। ଗତ ବର୍ଷ ଏହି ଅକ୍ଟୋବର 3 ତାରିଖରେ ସେ ଶେଷ ନିଃସ୍ବାଶ ତ୍ୟାଗ କରିଥିଲେ।

ସଂଯୋଗ ବସତଃ ଆଜି ପିପିଲି ଉପନିର୍ବାଚନର ଭୋଟ ଗଣତି ମଧ୍ୟ ଥିଲା। ଆଜି ସକାଳେ ରୁଦ୍ର ପ୍ରସାଦଙ୍କ ପରିବାରର ସମସ୍ତେ ପ୍ରଦୀପଙ୍କ ପ୍ରଥମ ବାର୍ଷିକ ପାଳନ କରିଥିଲେ। ଏହି ସମୟରେ ପରିବାରର ସମସ୍ତଙ୍କ ଆଖିରେ ଲୁହ ଝରିପଡିଥିଲା। ଗୋଟିଏ ପଟେ ପୁଅର ବିଜୟ ସମ୍ଭାବନାର ଉତ୍ସାହ ଅନ୍ୟପଟେ ତାଙ୍କର ପ୍ରଥମ ଶ୍ରାଦ୍ଧ ବାର୍ଷିକ, ଉଭୟ କୋହକୁ ସମ୍ବରଣ କରିପାରି ନ ଥିଲେ ମହାରଥୀ ପରିବାର।

ଉପନିର୍ବାଚନ ଭୋଟ ଗଣତି ଥିବାରୁ ପ୍ରଦୀପ ମହାରଥୀଙ୍କ ପ୍ରଥମ ଶ୍ରାଦ୍ଧ ବାର୍ଷିକ ଯେପରି ପାଳନ କରିବା କଥା ତାହା ହୋଇପାରି ନ ଥିଲା। ହେଲେ ବିଧି ଅନୁସାରେ ଯାହା କିଛି କରାଯିବା କଥା ତାଙ୍କ ପରିବାର ତାହା ପାଳନ କରିଥିଲେ।

ଏହି ଉପଲକ୍ଷେ ପ୍ରଦୀପ ମହାରଥୀଙ୍କ ଏକ ପ୍ରତିମୂର୍ତ୍ତି ଆଜି ଅନାବରଣ କରାଯାଇଥିଲା। ଭୋଟ ଗଣତି ବେଳେ ଏହି ପ୍ରତିମୂର୍ତ୍ତିକୁ ତାଙ୍କ ପୁତ୍ର ରୁଦ୍ରପ୍ରତାପ ଅନାବରଣ କରିଥିଲେ। ସେତେବେଳକୁ ସେ ବିଜୟ ହୋଇ ନ ଥିଲେ। ପରବର୍ତ୍ତି ସମୟରେ ବିଜୟ ଘୋଷଣା ହେବା ପରେ ରୁଦ୍ରପ୍ରତାପ ବାପାଙ୍କ ପ୍ରତିମୂର୍ତ୍ତି ପାଖରେ ଆର୍ଶିବାଦ ଭିକ୍ଷା କରିଥିଲେ।

ଭୁବନେଶ୍ବର: ଶେଷ ହେଲା ପିପିଲି ଉପନିର୍ବାଚନ। ଫଳାଫଳ କଣ ହେବ ତାହା ଭିନ୍ନ କଥା। ହେଲେ ଏହି ଉପନିର୍ବାଚନ ରାଜ୍ୟ ରାଜନୀତିରେ କେତେକ ନୂଆ ଦୃଷ୍ଟାନ୍ତ ସୃଷ୍ଟି କରିଛି। ସେଥିରୁ ଗୋଟିଏ ହେଲା ଦେଶର ବଳିଷ୍ଠ ମନ୍ତ୍ରୀ ଅଶ୍ବିନୀ ବୈଷ୍ଣବ ପିପିଲି ପ୍ରଚାରରେ ସାମିଲ ନ ହେବା।

ଅଶ୍ବିନୀ ନୂଆ ମନ୍ତ୍ରୀ ହେବା ପରେ ଏହି ପିପିଲି ଉପନିର୍ବାଚନ ଥିଲା ତାଙ୍କ ପାଇଁ ପ୍ରଥମ। ସେଥିପାଇଁ ତାଙ୍କ ନାମ ବିଜେପିର ଷ୍ଟାର ପ୍ରଚାରକ ତାଲିକାରେ ରଖାଯାଇଥିଲା। ଏଥିସହିତ ଓଡିଶାର ଆଉ ଦୁଇମନ୍ତ୍ରୀଙ୍କ ନାମ ମଧ୍ୟ ଏହି ତାଲିକାରେ ଥିଲା। ସେଥିରେ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ବିଶେଶ୍ବର ଟୁଡୁ ବିଜେପି ପ୍ରାର୍ଥୀଙ୍କ ପାଇଁ ପ୍ରଚାର କଲେ। ହେଲେ ଏହି ପ୍ରଚାରରୁ ନିଜକୁ ଦୂରେଇ ରଖିଲେ ମନ୍ତ୍ରୀ ଅଶ୍ବିନୀ ବୈଷ୍ଣବ। ଯାହାକୁ ନେଇ ବିଭିନ୍ନ ମହଲରେ ଉଠିଛି ପ୍ରଶ୍ନ।

ଯେତେବେଳେ ବିଜେପିର ଷ୍ଟାର ପ୍ରଚାରକ ତାଲିକା ବାହାରିଲା ସେତେବେଳେ ଅଶ୍ବିନୀଙ୍କ ନାମକୁ ଦେଖି ପିପିଲିର ବିଜେପି କର୍ମୀ ବେଶ୍ ଉତ୍ସାହିତ ହୋଇପଡିଥିଲେ। କାରଣ ଥିଲା ବର୍ତ୍ତମାନ ଧର୍ମେନ୍ଦ୍ରଙ୍କ ଅପେକ୍ଷା ଲୋକେ ଅଶ୍ବିନୀ ବୈଷ୍ଣବଙ୍କୁ ଅଧିକ ପସନ୍ଦ କରୁଛନ୍ତି। ସେ ଆସିଲେ ପ୍ରଚାରର ନିଶ୍ଚିତ ଗୁରୁତ୍ବ ବଢିବ ବୋଲି କର୍ମୀମାନେ ଆଶା ରଖିଥିଲେ। ହେଲେ ଶେଷ ମୂହୁର୍ତ୍ତ ପର୍ଯ୍ୟନ୍ତ ତାହା ସମ୍ଭବ ହେଲା ନାହିଁ।

ଅଶ୍ବିନୀ ବୈଷ୍ଣବ ପିପିଲି ଉପନିର୍ବାଚନ ନ ଆସିବା ନେଇ ବିଭିନ୍ନ ମହଲରେ ଭିନ୍ନଭିନ୍ନ ଆଲୋଚନା ଚାଲିଛି। ହେଲେ ପ୍ରକୃତ କଥା ହେଲା ଯେ ସେ ପ୍ରଚାରକୁ ଆସିଲେ ବିଜେଡି କିମ୍ବା ନବୀନ ପଟ୍ଟନାୟକଙ୍କୁ ବିରୋଧ କରିପାରିବେ ନାହିଁ। ଏପରି ଏକ ଅଡୁଆ ପରିସ୍ଥିତିରେ ପଡି ସେ ଏହି ପ୍ରଚାରକୁ ଆସିପାରିଲେ ନାହିଁ ବୋଲି ଜଣାପଡିଛି।

ଅନ୍ୟପକ୍ଷରେ ଅଶ୍ବିନୀଙ୍କ ପାଇଁ ଆଉ ଏକ ଅସୁବିଧା ହେଲା ଯଦି କୌଣସି ଚାପରେ ଯଦି ସେ ପ୍ରଚାରରେ ଆସି ବିଜେଡି ବିରୋଧରେ କହିଥାଆନ୍ତେ ତେବେ ତାହାକୁ ଲୋକେ ଗ୍ରହଣ କରି ନ ଥାଆନ୍ତେ। କାରଣ ନବୀନଙ୍କ ଆର୍ଶିବାଦରେ ସେ ରାଜ୍ୟସଭାକୁ ଯାଇ ମନ୍ତ୍ରୀ ହୋଇଛନ୍ତି। ତାଙ୍କ ବିରୋଧରେ କହିଥିଲେ ଲୋକେ ତାଙ୍କୁ ନିଶ୍ଚିତ ବିଶ୍ବାସଘାତକ ବୋଲି କହିବାକୁ ପଛେଇ ନଥାନ୍ତେ।

ଏସବୁ କାରଣ ନେଇ ଅଶ୍ବିନୀ ପିପିଲି ପ୍ରଚାରରୁ ନିଜକୁ ଦୂରେଇ ରଖିଲେ। ତେବେ ପ୍ରଶ୍ନ ଉଠୁଛି ଯେ, ସେ କେତେଦିନ ଏପରି ନିଜକୁ ଦୂରେଇ ରଖିବେ। କାରଣ ନିକଟରେ ପଞ୍ଚାୟତ ଏବଂ ପୌର ନିର୍ବାଚନ ଆସୁଛି। ଏପରି କ୍ଷେତ୍ରରେ ବିଜେପି କର୍ମି ଅଶ୍ବିନୀ ବୈଷ୍ଣବ ପ୍ରଚାର କରନ୍ତୁ ବୋଲି ଚାହିଁବେ। ସେତେବେଳେ ସେ କେତେ ଲୁଚି ରହିବେ ତାହା ସନ୍ଦେହ ସୃଷ୍ଟି କରିଛି।

ଭୁବନେଶ୍ବର: କୋଭିଡ୍-୧୯ ମହାମାରୀ ଯୋଗୁଁ ସ୍ଥଗିତ ଥିବା ୧୧୦-ପିପିଲି ବିଧାନସଭା ନିର୍ବାଚନ ମଣ୍ଡଳୀରେ ଗୁରୁବାର ଦିନ ଭୋଟ ଗ୍ରହଣ ହେବ। ସେଥିପାଇଁ ଚୁଡାନ୍ତ ପ୍ରସ୍ତୁତି ହୋଇ ସାରିଛି ବୋଲି ମୁଖ୍ୟ ନିର୍ବାଚନ ଅଧିକାରୀ ଶ୍ରୀ ସୁଶୀଲ୍ କୁମାର ଲୋହାନୀ ପ୍ରକାଶ କରିଛନ୍ତି।ଏଥର ନିର୍ବାଚନ ଆୟୋଗଙ୍କ ନିର୍ଦ୍ଦେଶାନୁସାରେ ନିରବ ସମୟ ୪୮ ଘଣ୍ଟାରୁ ୭୨ ଘଣ୍ଟାକୁ ବୃଦ୍ଧି କରାଯାଇଛି। ଫଳରେ ମତଦାନ ଆରମ୍ଭର ୭୨ ଘଣ୍ଟା ପୂର୍ବରୁ ନିର୍ବାଚନ ପ୍ରଚାର ବନ୍ଦ ହୋଇଛି। ସେହି ଅନୁସାରେ ମଙ୍ଗଳବାର ବୁଧବାର ଦୁଇଦିନ ପାଇଁ ପ୍ରଚାର ବନ୍ଦ କରାଯାଇଛି।

ଉପନିର୍ବାଚନ ପାଇଁ ସମୁଦାୟ ୩୪୮ ଗୋଟି ପୁଲିଂ ପାର୍ଟି ନିୟୋଜିତ ହୋଇ ବୁଥ୍ ମାନଙ୍କୁ ଯିବେ । କୋଭିଡ-୧୯ ଦୃଷ୍ଟି କୋଣରୁ ନିୟୋଜିତ ହୋଇଥିବା ପୁଲିଂ ପାର୍ଟିମାନଙ୍କୁ ତିନି ଗୋଟି ପର୍ଯ୍ୟାୟରେ ବୁଥଗୁଡିକୁ ପ୍ରେରଣ କରାଯିବାକୁ ସ୍ଥିର କରାଯାଇଛି । ସକାଳ ୬ ଟା ୩୦ ମିନିଟ ରୁ ସକାଳ ୧୦ ଟା ଯାଏ ପ୍ରଥମ ପର୍ଯ୍ୟାୟ, ୧୦ ଟାରୁ ଅପରାହ୍ନ ୧ ଘଟିକା ପର୍ଯ୍ୟନ୍ତ ଦ୍ୱତୀୟ ପର୍ଯ୍ୟାୟ ଏବଂ ଅପରାହ୍ନ ୧ ଘଟିକା ଠାରୁ ଅପରାହ୍ନ ୪ ଘଟିକା ପର୍ଯ୍ୟନ୍ତ ତୃତୀୟ ପର୍ଯ୍ୟାୟ ଏହି ପରି ଭାବରେ ପୁଲିଂ ପାର୍ଟି ମାନଙ୍କୁ ବୁଥ୍ ଗୁଡିକୁ କଡା କୋଭିଡ୍ କଟକଣା ମଧ୍ୟରେ ପ୍ରେରଣ କରାଯାଉଛି ।

ଉପନିର୍ବାଚନ କାର୍ଯ୍ୟରେ ସମୁଦାୟ ୧୪୯୦ ଜଣ କର୍ମଚାରୀ ନିୟୋଜିତ ହୋଇଛନ୍ତି । ଏହା ମଧ୍ୟରେ ୯୮ ଜଣ ସଂରକ୍ଷିତ କର୍ମଚାରୀ ମଧ୍ୟ ଅଛନ୍ତି । ଏତଦ୍ ବ୍ୟତୀତ ବୁଥ୍ ବାହାରେ ରହି ନିର୍ବାଚନ କାର‌୍ୟ୍ୟ କରିବା ନିମନ୍ତେ ଅତିରିକ୍ତ ୬୯୬ ଜଣ କର୍ମଚାରୀଙ୍କୁ ନିଯୁକ୍ତି କରାଯାଇଛି । ଏହି କର୍ମଚାରୀ ମାନେ ବିଶେଷ ଭାବରେ କୋଭିଡ ନିୟମାବଳୀ ପାଳନ ସମ୍ପର୍କରେ କାର୍ଯ୍ୟ କରିବେ ବୋଲି ମୁଖ୍ୟ ନିର୍ବାଚନ ଅଧିକାରୀ ଶ୍ରୀ ଲୋହାନୀ ପ୍ରକାଶ କରିଛନ୍ତି ।

ବରିଷ୍ଠ ନାଗରିକ ୮୦ ବର୍ଷରୁ ଉର୍ଦ୍ଧ୍ୱ, ଦିବ୍ୟାଙ୍ଗ ଏବଂ ସଂଦିଗ୍ଧ କୋଭିଡ ଆକ୍ରାନ୍ତ ଭୋଟରଙ୍କ ପାଇଁ ପୋଷ୍ଟାଲ ବାଲାଟ ମାଧ୍ୟମରେ ଭୋଟ ଗ୍ରହଣ କରାଯିବା ପାଇଁ ସମସ୍ତ ପ୍ରକାରର ବ୍ୟବସ୍ଥା କରାଯାଇଛି ଓ ୯୨୪ ଜଣଙ୍କୁ ପୋଷ୍ଟାଲ ବାଲଟ୍ ମାଧ୍ୟମରେ ଭୋଟ ଦେବା ନିମନ୍ତେ ଚିହ୍ନଟ କରାଯାଇଛି । ପ୍ରତି ଭୋଟରଙ୍କୁ ଭୋଟର ତାଲିକାରେ ଥିବା ସେମାନଙ୍କର କ୍ରମିକ ସଂଖ୍ୟା ଓ ବୁଥ୍ ସଂପର୍କରେ ଆଗୁଆ ସୂଚନା ଦେବା ନିମନ୍ତେ ନିର୍ବାଚନ କମିଶନଙ୍କ ନିର୍ଦ୍ଦେଶାନୁସାରେ ପ୍ରଶାସନ ତରଫରୁ ସମସ୍ତ ଭୋଟର ମାନଙ୍କୁ ଚିରକୁଟ ବାଣ୍ଟିବାର ବ୍ୟବସ୍ଥା କରାଯାଇଛି ବୋଲି ମୁଖ୍ୟ ନିର୍ବାଚନ ଅଧିକାରୀ ଶ୍ରୀ ଲୋହାନୀ ପ୍ରକାଶ କରିଛନ୍ତି ।

ପିପିଲି ବିଧାନସଭା ନିର୍ବାଚନ ମଣ୍ଡଳୀରେ ଥିବା ମୋଟ୍ ୩୦୦୯ ଜଣ ଦିବ୍ୟାଙ୍ଗ ଭୋଟର ମାନଙ୍କ ମତଦାନ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି । ସେମାନଙ୍କୁ ଘରୁ ମତଦାନ କେନ୍ଦ୍ରକୁ ନେବା ଆଣିବା ନିମନ୍ତେ ପ୍ରଶାସନ ତରଫରୁ ସମସ୍ତ ପ୍ରାକାରର ବ୍ୟବସ୍ଥା କରାଯାଇଛି। ବୁଥରେ ସେମାନଙ୍କ ପାଇଁ ରାମ୍ଫ ଓ ହ୍ୱିଲ୍ ଚେୟାରର ବ୍ୟବସ୍ଥା କରାଯିବା ସହ ମତଦାନ କେନ୍ଦ୍ର ମଧ୍ୟରେ ସହାୟତା ନିମନ୍ତେ ସ୍ୱେଚ୍ଛାସେବକ ନିଯୁକ୍ତ କରାଯାଇଛି । ଜିଲ୍ଲା ନିର୍ବାଚନ ଅଧିକାରୀ ଦ୍ୱାରା କୋଭିଡ ମୁକ୍ତ ନିର୍ବାଚନ ପାଇଁ ସମସ୍ତ ପ୍ରକାରର ବ୍ୟବସ୍ଥା ନିର୍ବାଚନ ଆୟୋଗଙ୍କ ନିର୍ଦ୍ଦେଶାନୁସାରେ କରାଯାଇଛି ବୋଲି ମୁଖ୍ୟ ନିର୍ବାଚନ ଅଧିକାରୀ ଶ୍ରୀ ଲୋହାନୀ ପ୍ରକାଶ କରିଛନ୍ତି ।

ଭୁବନେଶ୍ବର: ଚଳିତମାସ 30 ତାରିଖରେ ହେବ ପିପିଲି ବିଧାନସଭାର ଉପନିର୍ବାଚନ। ତେବେ କରୋନା କଟକଣା ଭିତରେ ଏହି ଉପନିର୍ବାଚନ କରାଇବା ପାଇଁ ମୁଖ୍ୟ ନିର୍ବାଚନ ଅଧିକାରୀ ଚେଷ୍ଠା ଜାରୀ ରଖିଛନ୍ତି। ପ୍ରଚାର ଏବଂ ଭୋଗ ଗ୍ରହଣ ବେଳେ ଯେପରି ସଂକ୍ରାମଣ ବୃଦ୍ଧି ନ ପାଏ ସେଥିପାଇଁ ବିଭିନ୍ନ ନିତିନିୟମ ଜାରୀ ହେବାରେ ଲାଗିଛି।

ସେହି ଅନୁସାରେ ଏହି ଉପନିର୍ବାଚନ ପରିଚାଳନାରେ ଭାଗ ନେବାକୁ ଥିବା ଅଧିକାରୀମାନେ ଡବଲ ଡୋଜ ଟିକା ନେବା ବାଧ୍ୟତା ମୂଳକ କରାଯାଇଛି। ଅର୍ଥାତ ଯେଉଁମାନେ ଡବଲ ଡୋଜ ଟିକା ଗ୍ରହଣ କରିଥିବେ ସେମାନଙ୍କୁ ଭୋଟ କାର୍ଯ୍ୟରେ ନିୟୋଜିତ କରାଯିବ। ଏହାକୁ ଜିଲ୍ଲାପାଳ ତଦାରଖ କରିବେ ବୋଲି ମୁଖ୍ୟ ନିର୍ବାଚନ ଅଧିକାରୀ କହିଛନ୍ତି।

ସେହିପରି ଭୋଗଗ୍ରହଣ ସମୟରେ ବୁଥର ଭିଡ କମାଇବା ପାଇଁ ମୁଖ୍ୟ ନିର୍ବାଚନ ଅଧିକାରୀ ବୁଥ ସଂଖ୍ୟାକୁ ୭୫କୁ ବୃଦ୍ଧି କରିଛନ୍ତି। ଫଳରେ ମୋଟ 262ଟି ବୁଥରେ ଏଥର ଭୋଟ ଗ୍ରହଣ ହେବ ବୋଲି ଜଣାପଡିଛି।

ପିପିଲି ଉପନିର୍ବାନ ଦୁଇଥର ସ୍ଥଗିତ ପରେ ବର୍ତ୍ତମାନ ଉପନିର୍ବାଚନ ହେବାକୁ ଯାଉଛି। ବିଜେଡିର ବରିଷ୍ଠ ନେତା ପ୍ରଦୀପ ମହାରଥୀଙ୍କ ପରଲୋକ ପରେ ସେଠାରେ ଉପନିର୍ବାଚନ ଘୋଷଣା କରାଯାଇଥିଲା। କରୋନା ସମୟରେ ଏହି ଉପନିର୍ବାଚନ କରିବା ବେଳେ କଂଗ୍ରେସ ପ୍ରାର୍ଥ ଅଜିତ ମହ୍ଗରାଜଙ୍କର ମୃତ୍ୟୁ ହେଲା। ଫଳରେ ଏହାକୁ ସ୍ଥଗିତ କରାଗଲା। କଂଗ୍ରେସ ନୂଆ ପ୍ରାର୍ଥୀ ଦେବା ପରେ ପୁଣି ନୂଆ ତାରିଖ ଘୋଷଣା କରାଗଲା। ହେଲେ ସେତେବେଳେ କରୋନା ସ୍ଥିତି ଭୟଙ୍କର ହେବାରୁ ପୁଣି ଏହି ଉପନିର୍ବାଚନକୁ ସ୍ଥଗିତ କରାଗଲା।

ଦୁଇଥର ସ୍ଥଗିତ ପରେ ବର୍ତ୍ତମାନ ଆସନ୍ତା 30 ତାରିଖରେ ଉପନିର୍ବାଚନ ହେବ ବୋଲି ତାରିଖ ନିର୍ଦ୍ଧାରିତ ହୋଇଛି। ଏଥିରେ ବିଜେଡିରୁ ରୁଦ୍ରପ୍ରତାପ ମହାରଥୀ, ବିଜେପିରୁ ଆଶ୍ରିତ ପଟ୍ଟନାୟକ ଏବଂ କଂଗ୍ରେସରୁ ବିଶ୍ବକେଶନ ହରିଚନ୍ଦନ ମହାପାତ୍ର ପ୍ରାର୍ଥୀ ହୋଇଛନ୍ତି। ଏହି ଉପନିର୍ବାଚନ ପାଇଁ ବିଜେଡି, ବିଜେପି ଏବଂ କଂଗ୍ରେସ ତାହାର ଷ୍ଟାର ପ୍ରଚାରକ ତାଲିକା ପ୍ରକାଶ କରିଛି।