Tag: ପ୍ରତିବାଦ

ଭୁବନେଶ୍ୱର: ୨୦୨୨-୨୩ ଆର୍ଥିକ ବର୍ଷ ପାଇଁ ଓଡ଼ିଶା ରାଜ୍ୟ ବିଦ୍ୟୁତ୍ ନିୟାମକ (ଓଇଅରସି)ଙ୍କ ନିକଟରେ ବିଦ୍ୟୁତ୍ ଶୁଳ୍କ ବୃଦ୍ଧି ପାଇଁ ଉତ୍ପାଦନ ଓ ବିତରଣ କମ୍ପାନୀମାନେ ଆବେଦନ କରିଛନ୍ତି। ସେମାନଙ୍କ ଦରଖାସ୍ତକୁ ବିଚାରକୁ ନେଇ ଆଗାମୀ ଆର୍ଥିକ ବର୍ଷ ପାଇଁ ଓଇଆରସି କର୍ତ୍ତୃପକ୍ଷ ବିଦ୍ୟୁତ୍ ଶୁଳ୍କ ବୃଦ୍ଧି କରିବା ମସୁଧାରେ ଆଗାମୀ କାଲିଠାରୁ ଫେବୃୟାରୀ ୨୮ ତାରିଖ ପର୍ଯ୍ୟନ୍ତ ଆଭାସୀ ଜନଶୁଣାଣି କରିବାକୁ ଯାଉଛନ୍ତି। ଏହି ଆଭାସୀ ଜନଶୁଣାଣିକୁ ଓଡ଼ିଶା ରାଜ୍ୟ ବିଦ୍ୟୁତ୍ ଉପଭୋକ୍ତା ମହାସଂଘ ପକ୍ଷରୁ ବିରୋଧ କରାଯାଇଛି।

ଆଜି ‘ମହାସଂଘ’ର ଏକ ବୈଠକ ଏହାର ଅଧ୍ୟକ୍ଷ ଶ୍ରୀଯୁକ୍ତ ପଞ୍ଚାନନ କାନୁନଗୋଙ୍କ ଅଧ୍ୟକ୍ଷତାରେ ଜୟଦେବ ବିିହାରସ୍ଥିତ ଗୋପବନ୍ଧୁ ଭବନ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇ ଆଭାସୀ ଜନ ଶୁଣାଣିକୁ ବିରୋଧ କରିବା ସଙ୍ଗେ ସଙ୍ଗେ ସମ୍ଭାବ୍ୟ ବିଦ୍ୟତ୍ ଶୁଳ୍କ ବୃଦ୍ଧିକୁ ନେଇ ଅସନ୍ତୋଷ ପ୍ରକାଶ କରାଯାଇଛି। ପ୍ରାରମ୍ଭରେ ବୈଠକର ଲକ୍ଷ୍ୟ ଓ ଉଦ୍ଦେଶ୍ୟ ସମ୍ପର୍କରେ ‘ମହାସଂଘ’ର ଆବାହକ ରବି ବେହେରା ସୂଚନା ଦେଲା ପରେ ବିଭିନ୍ନ ରାଜନୈତିକ ଦଳର ପ୍ରତିନିଧିମାନେ ବିପର୍ଯ୍ୟସ୍ତ ବିଜୁଳି ସେବା, ଅଘୋଷିତ ବିଜୁଳି କାଟ ଓ ଶୁଳ୍କ ବୃଦ୍ଧି ଉପରେ ନିଜର ସୁଚିନ୍ତିତ ମତାମତ ଦେଇଥିଲେ। ଜନଶୁଣାଣିକୁ ଆଳ କରି ବିଜୁଳ କମ୍ପାନୀମାନେ ଜବରଦସ୍ତ ଖାଉଟିଙ୍କ ଉପରେ ନିଜର କ୍ଷତି ଭରଣା କରିବା ପାଇଁ ବିଜୁଳି ଶୁଳ୍କ ଭଳି ବୋଝକୁ ଲଦି ଚାଲିଛନ୍ତି ବୋଲି ମତପ୍ରକାଶ ପାଇଥିଲା।

ଏଠାରେ ଉଲ୍ଲେଖଥାଉକି କରୋନା କାଳରେ ମଧ୍ୟ ଦୁଇ ଦୁଇଥର ଆମ ରାଜ୍ୟରେ ବିଦ୍ୟୁତ୍ କମ୍ପାନୀମାନଙ୍କର ଚାପରେ ଓଇଆରସି କର୍ତ୍ତୃପକ୍ଷ ବିଦ୍ୟୁତ୍ ଶୁଳ୍କ ବୃଦ୍ଧି କରିଛନ୍ତି । ଫଳରେ ସର୍ବନିମ୍ନ ୫୦ ୟୁନିଟ୍ ପର୍ଯ୍ୟନ୍ତ ଗତ ଆର୍ଥିକ ବର୍ଷରେ ଥିବା ବିଦ୍ୟୁତ୍ ଶୁଳ୍କ ବୃଦ୍ଧି ପାଇ ୫୦ ପଇସା ବଢି ୩ ଟଙ୍କାରେ ପହଞ୍ଚିଛି। ଏହା ସତ୍ତ୍ୱେ ମଧ୍ୟ ବିଜୁଳି କମ୍ପାନୀମାନେ ପୁନଶ୍ଚ ୨୦୨୨-୨୩ ଆର୍ଥିକ ବର୍ଷରେ ବିଦ୍ୟୁତ୍ ଶୁଳ୍କ ବୃଦ୍ଧି ପାଇଁ ନିଜର ଦରଖାସ୍ତ ଦେଇଛନ୍ତି। ଏଠାରେ ପ୍ରକାଶଥାଉକି, ସମଗ୍ର ଦେଶରେ ଆଜିକୁ ୨୭ବର୍ଷ ତଳେ ଓଡ଼ିଶା ପ୍ରଥମ ରାଜ୍ୟ ଭାବେ ବିଜୁଳି ସଂସ୍କାର ବା ବିଜୁଳିର ଘରୋଇକରଣ କ୍ଷେତ୍ରରେ ୧୯୯୪-୯୫ ମସିହାରେ ବିଶ୍ୱବ୍ୟାଙ୍କରୁ ଋଣ ଆଣି ସଂସ୍କାର ଆରମ୍ଭ କରିଥିଲା। ଲକ୍ଷ୍ୟ ଥିଲା ସରବରାହ ଜନିତ ବିଜୁଳି କ୍ଷତିକୁ ୧୫ପ୍ରତିଶତକୁ କମାଇବା ଏବଂ ବିଜୁଳି ସେବାକୁ ସୁଲଭ, ନିରବଚ୍ଛିନ୍ନ ଓ ଗୁଣାତ୍ମକ କରିବା।

କିନ୍ତୁ ଦୀର୍ଘ ତିନିଦଶନ୍ଧି ପରେ ମଧ୍ୟ ଖୋଦ ରାଜଧାନୀରେ ବିଜୁଳି ସେବା ଆଜି ମଧ୍ୟ ବିପର୍ଯ୍ୟସ୍ତ। ଗାଁ ଗହଳିରେ ବିଜୁଳି କାଟ କଥା ନ କହିବା ଭଲ? ଆମ ପଛରେ ବିଦ୍ୟୁତ୍ ସଂସ୍କାରକୁ ଆପଣାଇଥିବା ଆନ୍ଧ୍ର ଓ ଦିଲ୍ଲୀ ଭଳି ରାଜ୍ୟ ଆଜି ବହୁ ଆଗରେ। ଆମେ ଯଦି ଗୋଟିଏ ପ୍ରତିଶତ ସରବରାହ ଜନିତ (ଏଟିଆଣ୍ଡ ସି) କ୍ଷତିକୁ କମାଇ ପାରିବା, ତାହେଲେ ବାର୍ଷିକ ଆମେ ୭୫ରୁ ୮୦ କୋଟି ଟଙ୍କା ରାଜସ୍ୱ ସଞ୍ଚୟ କରିପାରିବା। କିନ୍ତୁ ଦୁଃଖର କଥା ସରବରାହ ଜନିତ କ୍ଷତି କମାଇବା ପାଇଁ ଭିତ୍ତିଭୂମିର ଯେଉଁ ବିକାଶ କରିବା କଥା ଆବଣ୍ଟନ କମ୍ପାନୀଗୁଡ଼ିକ ସେ ଦିଗରେ ଆଦୌ ଟଙ୍କାଟିଏ ଖର୍ଚ୍ଚ କରୁନାହାଁନ୍ତି।

ଦୀର୍ଘ ତିନିଦଶନ୍ଧି ଧରି ଭିତ୍ତିଭୂମି ବିକାଶରେ କେତେ ଟଙ୍କା ଖର୍ଚ୍ଚ କରାଯାଇଛି, ଟାଟା କମ୍ପାନୀ ଆବଣ୍ଟନ କମ୍ପାନୀଗୁଡ଼ିକୁ ବହନ କରିବା ପରେ କେତେ ଟଙ୍କା ଭିତ୍ତିଭୂମି ଦିଗରେ ଖର୍ଚ୍ଚ ହୋଇଛି, ଏ ସବୁର ହିିସାବ ଜନସାଧାରଣଙ୍କ ଅବଗତ ନିମନ୍ତେ ଓଇଆରସି ପ୍ରକାଶ କରିବାର ସମୟ ଆସିଛି। ତାନହେଲେ ଜନସାଧାରଣଙ୍କୁଅନ୍ଧାରେ ରଖି ଯଦି ଶୁଳ୍କ ବୃଦ୍ଧି ପାଇଁ ଓଇଆରସି କର୍ତ୍ତୃପକ୍ଷ ଢାଲ ସାଜନ୍ତି, ତେବେ ଉପଭୋକ୍ତା ମହାସଂଘ ବାଧ୍ୟ ହୋଇ ରାଜରାସ୍ତାକୁ ଓହ୍ଲାଇ ଆନ୍ଦୋଳନ କରିବ। ତେଣୁ ଜନସାଧାରଣଙ୍କ ବୃହତ୍ତର ସ୍ୱାର୍ଥ ଦୃଷ୍ଟିରୁ ତୁରନ୍ତ ସରବରାହ ଜନିତ ଭିତ୍ତିଭୂମିକର ବିକାଶ, ବନ୍ୟା, ବାତ୍ୟା ସମୟରେ ରିପାୟାର ଓ ରେଷ୍ଟୋରେସନ ଉପରେ କେତେ ଟଙ୍କା ଖର୍ଚ୍ଚ ହୋଇଛି, କେବୁଲ ବିଛାଇବା ପାଇଁ କେତେ ଟଙ୍କାର ବଜେଣ ଆକଳନ କରାଯାଇ ଏପର୍ଯ୍ୟନ୍ତ କେତେ ଟଙ୍କା ଖର୍ଚ୍ଚ କରାଯାଇଛି, ଏହାର ହିସାବ ବିଜୁଳି କମ୍ପାନୀମାନେ ଜନସାଧାରଣଙ୍କ ସମ୍ମୁଖରେ ପ୍ରଦାନ କରିବାକୁ ଆଜିର ବୈଠକରେ ଦାବି କରାଯାଇଛି।

ଏହି ବୈଠକରେ ଅନ୍ୟମାନଙ୍କ ମଧ୍ୟରେ ସୁରେଶ ପାଣିଗ୍ରାହୀ, ପ୍ରଫୁଲ୍ଲ ସାମନ୍ତରା, ଶ୍ରୀମତୀ ପ୍ରମିଳା, ଶେଖ ଅବଦୁଲ ୱାଲି ଓ ଏନ୍‌. ନାରାୟଣ ରେଡ଼ି, ଜ୍ୟୋତି ରଞ୍ଜନ ମହାପାତ୍ର ପ୍ରମୁଖ ରାଜନୈତିକ ଦଳ ଓ ସାମାଜିକ ସଂଗଠନ ସମୂହର ପ୍ରତିନିଧିମାନେ ଯୋଗ ଦେଇ ଅଂଶଗ୍ରହଣ କରିଥିଲେ। ଆସନ୍ତା ମାର୍ଚ୍ଚ ମାସ ପ୍ରଥମ ସପ୍ତାହରେ ବିଦ୍ୟୁତ୍ ସଂସ୍କାରକୁ ନେଇ ଏକ ରାଜ୍ୟସ୍ତରୀୟ ଗଣ କନ୍‌ଭେନସନ ଅନୁଷ୍ଠିତ ହେବା ପାଇଁ ବୈଠକରେ ନିଷ୍ପତ୍ତି ଗ୍ରହଣ କରାଗଲା।

ଆଭାସୀ ଜନଶୁଣାଣି ପରିବର୍ତ୍ତେ ଓଇଆରସି କର୍ତ୍ତୃପକ୍ଷ ଶାରୀରିକ ଜନଶୁଣାଣି କରିବାକୁ ମହାସଂଘ ଦାବି କରିଛି। ନିର୍ବାଚନ ପ୍ରଚାର ସରଗରମ ହେଉଥିଲା ବେଳେ ସ୍କୁଲ୍‌, କଲେଜ, ବିଶ୍ୱବିଦ୍ୟାଳୟ ଖୋଲି ସାରିଥିଲା ବେଳେ ଆଭାସି ଜନଶୁଣାଣିର ଆଳ ଦେଖାଇ ବିଦ୍ୟୁତ୍ ଶୁଳ୍କ ବୃଦ୍ଧି ନିଷ୍ପତ୍ତିକୁ ଲଦି ଦିଆଗଲେ ଆନ୍ଦୋଳନ ହେବ ବୋଲି ଆଜିର ବୈଠକରେ ମହାସଂଘ ପକ୍ଷରୁ ଓଇଆରସି, ଗ୍ରୀଡ଼କୋ, ଟାଟାପାୱାର ଓ ରାଜ୍ୟ ସରକାରଙ୍କୁ ସତର୍କ କରାଇ ଦିଆଯାଇଛି।

ଭୁବନେଶ୍ବର: ରାଜ୍ୟରେ ଦର ଦାମ ବୃଦ୍ଧି ପ୍ରତିବାଦରେ ବିଜୁ ଜନତା ଦଳ ଆନ୍ଦୋଳନକୁ ଓହ୍ଲାଇଛି। ଆଜି ବିଜୁ ଜନତା ଦଳ ଦର ଦାମ ବୃଦ୍ଧି ପ୍ରତିବାଦରେ ରାଜଭବନ ସମ୍ମୁଖରେ ଆନ୍ଦୋଳନ କରୁଛି। ପେଟ୍ରୋଲ-ଡିଜେଲ ଏବଂ ଇନ୍ଧନ ଗ୍ୟାସ ଦରର ବୃଦ୍ଧିକୁ ନେଇ ବିଜୁ ଜନତା ଦଳ ରାସ୍ତାକୁ ଓହ୍ଲାଇଛି।

ନଭେମ୍ବର ପହିଲାରୁ ରାଜ୍ୟର ୧୪୭ ନିର୍ବାଚନମଣ୍ଡଳୀରେ ଆନ୍ଦୋଳନ କରାଯିବ ବୋଲି ବିଜେଡ଼ି ଘୋଷଣା କରିଛି। ଆସନ୍ତାକାଲି ମହିଳା ବିଜେଡ଼ି ମଧ୍ୟ ରାସ୍ତାକୁ ଓହ୍ଳାଇବ। ସେମାନେ ଗ୍ୟାସ ଦର ବୃଦ୍ଧି ପ୍ରତିବାଦରେ କେନ୍ଦ୍ର ସରକାର ବିରୋଧରେ ଆନ୍ଦୋଳନ କରିବେ। ସେହିଭଳି ଆସନ୍ତା ୫ ତାରିଖରେ ରାଜ୍ୟର ସବୁ ପେଟ୍ରୋଲ ପମ୍ପ ସମ୍ମୁଖରେ ଛାତ୍ର ବିଜେଡ଼ି ମଧ୍ୟ ବିରୋଧ ପ୍ରଦର୍ଶନ କରିବ।

ଭୁବନେଶ୍ବର: ଦରଦାମ ବୃଦ୍ଧିକୁ ନେଇ ରାଜ୍ୟରେ ବିଜୁ ଜନତା ଦଳ ଆନ୍ଦୋଳନ କରିବ। ଆସନ୍ତାକାଲି ପେଟ୍ରୋଲ-ଡିଜେଲ ଦର ବୃଦ୍ଧି ପ୍ରତିବାଦରେ ରାଜଭବନ ଆଗରେ ବିଜୁଜନତା ଦଳ ଧାରଣା ଦେବ। ତାପରେ ନଭେମ୍ବର ୧ ତାରିଖରୁ ସମସ୍ତ ୧୪୭ ବିଧାନସଭା ଅଞ୍ଚଳରେ ବିଜେଡ଼ି ଆନ୍ଦୋଳନ କରିବ। ଏହା ସହିତ ଗ୍ୟାସ ଦର ବୃଦ୍ଧି ପ୍ରତିବାଦରେ ମହିଳା ବିଜେଡ଼ି ନଭେମ୍ବର ୧ ତାରିଖରେ ରାସ୍ତାକୁ ଓହ୍ଳାଇବ।

ସେହିପରି ଛାତ୍ର ବିଜେଡ଼ି ମଧ୍ୟ ଆସନ୍ତା ୫ ତାରିଖରେ ପ୍ରତିବାଦ କରିବ। ପେଟ୍ରୋଲ-ଡିଜେଲ ଦର ବୃଦ୍ଧି ପ୍ରତିବାଦରେ ରାଜ୍ୟର ସମସ୍ତ ପେଟ୍ରୋଲ ପମ୍ପ ସମ୍ମୁଖରେ ଛାତ୍ର ବିଜେଡ଼ି ବିକ୍ଷୋଭ କରିବ। ଏନେଇ ସାମ୍ବାଦିକ ସମ୍ମିଳନୀରେ ପ୍ରମିଳା ମଲ୍ଲିକ, ଅତନୁ ସବ୍ୟସାଚୀ ଓ ପ୍ରତାପ ଦେବ ସୂଚନା ଦେଇଛନ୍ତି।

ନିରାକାରପୁର: ଅହେତୁକ ଦରଦାମ ବୃଦ୍ଧି, ଚାଷୀ ମାରଣ ନୀତି ଓ କେନ୍ଦ୍ର ମନ୍ତ୍ରୀଙ୍କ ପୂଅ ଚାଷୀ ମାନଙ୍କୁ ଗାଡି ଚଢାଇ ହତ୍ୟା କରିଥିବା ଆଦି ଦାବି ନେଇ ଓଡିଶା କୃଷକ ସଭା ପକ୍ଷରୁ ଭାରତ ବନ୍ଦ ଡାକରା ଦିଆଯାଇ ରେଳରୋକ କରାଯାଇଛି। ରେଳରୋକକୁ ସାରାଦେଶରେ ବାମପନ୍ଥୀ ଦଳ ରେଳରୋକ ଅରିବାକୁ ସମର୍ଥନ ଜଣାଇଛନ୍ତି। ଏହି ରେଳରୋକକୁ ଖୋର୍ଦ୍ଧା, ନୟାଗଡ଼ ଓ ପୁରୀ ଜିଲ୍ଲାର ବାମପନ୍ଥୀ ନେତା ଓ କର୍ମୀ ମାନେ ନିରାକାରପୁର ଷ୍ଟେସନ ଉପରେ ରେଳଧାରଣାରେ ବସି ରହି ରେଳରୋକ କରି ପ୍ରତିବାଦ କରିଛନ୍ତି।

କେନ୍ଦ୍ର ସରକାରଙ୍କ ଚାଷୀ ମାରଣନୀତିକୁ ଦୃଢ ଭାବରେ ବିରୋଧ କରିଛି ବାମପନ୍ଥୀ ସମର୍ଥକ ଓଡିଶା କୃଷକ ସଭା। ନିକଟ ଅତିତରେ ଚାଷୀମାନେ ବସି ଆନ୍ଦୋଳନ କରୁଥିବା ବେଳେ କେନ୍ଦ୍ର ମନ୍ତ୍ରୀଙ୍କ ପୂଅ ଯେଉଁ ଭଳି ଭାବରେ ଗାଡି ଚଢ଼ାଉ ଚାଷୀ ମାନଙ୍କୁ ହତ୍ୟା କଲେ ତାହାକୁ ନେଇ ରେଳରୋକ କରି ଦୃଢ ପ୍ରତିବାଦ କରାଯାଇଛି। ଓଡିଶା କୃଷକ ସଭା ପକ୍ଷରୁ ବାମପନ୍ଥୀ ଦଳର ନେତା ଓ ଦଳର କର୍ମକର୍ତ୍ତା ମାନେ ନିରାକାରପୁର ଷ୍ଟେସନରେ ରାସ୍ତା ଉପରେ ବସିରହି ବିକ୍ଷୋଭ କରିଛନ୍ତି। ରେଳ ଧାରଣାର ଉଭୟ ପାର୍ଶ୍ୱରେ ଦୁଇଟି ମାଲ ବୋଝେଇ ଗାଡି ଅଟକି ରହିଛି। ପ୍ରାୟ ଦୁଇଘଣ୍ଟା ଧରି ରେଳରୋକ କରାଯାଇଛି। ଖୋର୍ଦ୍ଧା ରେଳବାଇ ପୋଲିସ ଓ ନିରାକାରପୁର ପୋଲିସ ପହଞ୍ଚି ଆନ୍ଦୋଳନ କାରୀ ମାନଙ୍କ ସହିତ ଆଲୋଚନା କରିବା ପରେ ଆନ୍ଦୋଳନ ପ୍ରତ୍ୟାହୃତ ହୋଇଛି।

ଭୁବନେଶ୍ୱର: ଉତ୍ତର ପ୍ରଦେଶର ଲକ୍ଷ୍ମୀପୁର ଖେରିଠାରେ ଗତିକାଲି କେନ୍ଦ୍ର ଗୃହରାଷ୍ଟ୍ର ମନ୍ତ୍ରୀ ଅଜୟ କୁମାର ମିଶ୍ରଙ୍କ ପୁଅ ଆଶିଷ ମିଶ୍ରଙ୍କ ନେତୃତ୍ୱରେ ବିଜେପିର ଗୁଣ୍ଡାବାହିନୀ ୮ଜଣ କୃଷକଙ୍କ ଉପରେ ଅତ୍ୟନ୍ତ ବର୍ବର ଭାବେ ଗାଡ଼ି ଚଢାଇ ହତ୍ୟା କରିଛନ୍ତି। ଏହି ଘଟଣାକୁ ଧିକ୍କାର କରି, ଏହାର ପ୍ରତିବାଦରେ ଆଜି ସାରା ଦେଶରେ ଏବଂ ଓଡ଼ିଶାରେ ସଂଯୁକ୍ତ କିଷାନ ମୋର୍ଚ୍ଚା ତରଫରୁ ପ୍ରତିବାଦ ଆନ୍ଦୋଳନ ସଂଗଠିତ ହୋଇଛି।

ଓଡ଼ିଶାର ରାଜଧାନୀ ଭୁବନେଶ୍ୱରରେ ସଂଯୁକ୍ତ କିଷାନ ମୋର୍ଚ୍ଚା ନେତୃତ୍ୱରେ ଶହ ଶହ ସଂଖ୍ୟାରେ ପ୍ରତିବାଦକାରୀମାନେ ଏହି ବର୍ବର ଏବଂ ବିଭତ୍ସ କୃଷକ ଗଣହତ୍ୟାକୁ ତୀବ୍ର ନିନ୍ଦା ଏବଂ ପ୍ରତିବାଦ ଜଣାଇ ମହାତ୍ମା ଗାନ୍ଧୀ ମାର୍ଗରେ ପଟୁଆର କରିବା ସହିତ ବିକ୍ଷୋଭ ପ୍ରଦର୍ଶନ କରିଛନ୍ତି ଏବଂ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରିଛନ୍ତି। ସଂଯୁକ୍ତ କିଷାନ ମୋର୍ଚ୍ଚା ତରଫରୁ କୁହାଯାଇଛି ଯେ, ଗତକାଲିର ବର୍ବର କୃଷକ ହତ୍ୟାକାଣ୍ଡରେ ସମଗ୍ର ଦେଶବାସୀ ସ୍ତବ୍ଧ ହୋଇଯାଇଛନ୍ତି।

ଯେଉଁଭଳି ଭାବେ ହରିୟାଣାର ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟର ଏବଂ ଗୃହରାଷ୍ଟ୍ର ମନ୍ତ୍ରୀ କିଛିଦିନ ପୂର୍ବେ କୃଷକମାନଙ୍କ ବିରୁଦ୍ଧରେ ଉତ୍ତେଜନାମୂଳକ ବକ୍ତବ୍ୟ ଦେଇଥିଲେ, ସେଥିରୁ ସ୍ପଷ୍ଟ ହେଉଥିଲା ଯେ, କୃଷକ ଆନ୍ଦୋଳନକୁ ଦୁର୍ବଳ କରିବା ପାଇଁ ଏକ ଚକ୍ରାନ୍ତର ପରିକଳ୍ପନା କରାଯାଉଛି। କୃଷକମାନଙ୍କ ବିରୁଦ୍ଧରେ ଏହା ଏକ ସଂଗଠିତ ଏବଂ ପ୍ରାୟୋଜିତ ହତ୍ୟାକାଣ୍ଡ ବୋଲି ସଂଯୁକ୍ତ କିଷାନ ମୋର୍ଚ୍ଚା ଦୃଢ ଭାବେ କହିଛି। ଅନ୍ନଦାତାମାନଙ୍କ ଶାନ୍ତିପୂର୍ଣ୍ଣ ଆନ୍ଦୋଳନ ଉପରେ ଏଭଳି ଘଟଣା ଆମର ସାମ୍ବିଧାନିକ ଏବଂ ଗଣତାନ୍ତ୍ରିକ ଅଧିକାର ଉପରେ ପ୍ରଶ୍ନବାଚୀ ସୃଷ୍ଟି କରିଛି।

ସୁତରାଂ ସଂଯୁକ୍ତ କିଷାନ ମୋର୍ଚ୍ଚା ତରଫରୁ ଦାବି କରାଯାଇଛି ଯେ, ଗୃହରାଷ୍ଟ୍ର ମନ୍ତ୍ରୀଙ୍କ ପୁତ୍ର ଆଶିଷ ମିଶ୍ର ଏବଂ ତାଙ୍କ ଗୁଣ୍ଡାବାହିନୀଙ୍କ ବିରୁଦ୍ଧରେ ୩୦୨ ଦଫାରେ ମୋକଦ୍ଦମା ରୁଜୁ କରି ଗିରଫ କରାଯାଉ। ସର୍ବୋଚ୍ଚ ଅଦାଲତଙ୍କ ତଦାରଖରେ ଏକ ‘ସ୍ୱତନ୍ତ୍ର ଅନୁସନ୍ଧାନକାରୀ ଦଳ’ (ଏସ୍‌.ଆଇ.ଟି) ଗଠନ କରି ସମଗ୍ର ଘଟଣାର ତଦନ୍ତ କରାଯାଉ। ହିଂସା ଏବଂ ଉସ୍‌କାନୀମୂଳକ ବକ୍ତବ୍ୟ ପ୍ରଦାନ କରିଥିବା ହରିୟାଣାର ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟର ଏବଂ ଗୃହ ରାଷ୍ଟ୍ରମନ୍ତ୍ରୀ ଅଜୟ ମିଶ୍ରଙ୍କୁ ନିଜ ନିଜର ସାମ୍ବିଧାନିକ ପଦବୀରୁ ବହିଷ୍କାର କରାଯାଉ। ମୃତକ ପରିବାରମାନଙ୍କୁ ପର୍ଯ୍ୟାପ୍ତ କ୍ଷତିପୂରଣ ପ୍ରଦାନ କରାଯାଉ। ଏହି ଚାରିଦଫା ଦାବି ଉପରେ ସଂଯୁକ୍ତ କିଷାନ ମୋର୍ଚ୍ଚା ତରଫରୁ ପ୍ରତିବାଦ ଆନ୍ଦୋଳନ ଜାରି ରହିବ ବୋଲି ଘୋଷଣା କରାଯାଇଛି।

ଭୁବନେଶ୍ୱରରେ ଅନୁଷ୍ଠିତ ଏହି ପ୍ରତିବାଦ ବିକ୍ଷୋଭରେ ସର୍ବଶ୍ରୀ ସୁରେଶ ପାଣିଗ୍ରାହୀ, ଅଶୋକ ପ୍ରଧାନ, ଜ୍ୟୋତିରଞ୍ଜନ ମହାପାତ୍ର, ନରେନ୍ଦ୍ର ମହାନ୍ତି, ଶଙ୍କର ସାହୁ, ନିରଞ୍ଜନ ମହାନ୍ତି, ଶ୍ରୀକାନ୍ତ ମହାନ୍ତି, ରାଧାକାନ୍ତ ସେଠି, ନାରାୟଣ ରେଡି, ସୁଦର୍ଶନ ପ୍ରଧାନ, ଅରୁଣ ଜେନା, ଯୁଧିଷ୍ଠିର ମହାପାତ୍ର, ରାଜେନ୍ଦ୍ର ବର୍ମା, ବିଶ୍ୱପ୍ରିୟ କାନୁନଗୋ, କ୍ଷୀରୋଦ ସିଂହଦେଓ, ପ୍ରଭାତ ପାଣିଗ୍ରାହୀ, ଲେନିନ୍ କୁମାର, ପ୍ରମିଳା ବେହେରା, ଅଭିରାମ ବେହେରା, ପ୍ରମୋଦିନୀ ସାହୁ, କିଷାନ ପଟ୍ଟନାୟକ, ଗଣେଶ ତ୍ରିପାଠୀ, ସତୀଶ ମିଶ୍ର, ମହମ୍ମଦ ସୁକ୍ରୁ, ସଂଘମିତ୍ରା ଜେନା, ମଧୁସୂଦନ, ସୁବାସ ନାୟକ, ପ୍ରଦିପ୍ତ ନାୟକ, ଭାନୁମତି ରେଡ଼ି, ଅଶୋକ ସାହୁ, ଅଶୋକ ମିଶ୍ର, ରଶ୍ମିରଞ୍ଜନ ଜେନା, ସୁବାସ ସାହୁ, ସାଲ ମାର୍ଣ୍ଡିଂ, ଚାମ୍ବୁର ସୋରେନ, ଅନୁରାଧା ସୁବୁଦ୍ଧି, ମଧୁସୂଦନ ବିଶ୍ୱାଳ, ସୁନିତା ପାଣିଗ୍ରାହୀ, ଅନାମିକା ମିଶ୍ର, କ୍ଷୀରମଣି ମହନ୍ତ, ରାମଚନ୍ଦ୍ର ତ୍ରିପାଠୀ, ଜଗଦୀଶ ଜେନା, ପୂର୍ଣ୍ଣଚନ୍ଦ୍ର ପାଢୀ, ଜାନକୀ ବଲ୍ଲଭ ରାଓ, ବିବେକ କୃଷ୍ଣ ପ୍ରମୁଖ କୃଷକ, ଶମ୍ରିକ, ସାମାଜିକ କର୍ମୀ ଏବଂ ବୁଦ୍ଧିଜୀବୀମାନେ ବହୁ ସଂଖ୍ୟାରେ ଅଂଶଗ୍ରହଣ କରି ନେତୃତ୍ୱ ନେଇଥିଲେ।