Tag: ବାଣପୁର

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ସାନହନ୍ତୁଆଡ଼ ଗ୍ରାମରେ ବହୁ ଆଡମ୍ବର ସହକାରେ ଗିରିଗୋବର୍ଦ୍ଧନ ପୂଜା ରୀତିନିତି ଅନୁସାରେ ପାଳିତ ହୋଇଯାଇଛି। ବହୁ ପୁରାତନ କାଳରୁ ଉକ୍ତ ଗ୍ରାମରେ ପାଳିତ ହୋଇଆସୁଥିବା ଏହି ପୂଜାରେ ହଜାର ହଜାର ଭକ୍ତଙ୍କର ସୁଅ ଛୁଟିଥିଲା। ସାନହନ୍ତୁଆଡ଼ ଗ୍ରାମର ପ୍ରତି ଘରେ ଘରେ ପୂର୍ଣ୍ଣକୁମ୍ଭ ,ଦୀପ ପ୍ରଜ୍ଜ୍ବଳନ ଓ ଘର ସମ୍ମୁଖକୁ ମୁରୁଜ ଝୋଟି ଚିତା ଓ ଫୁଲରେ ସୁସଜ୍ଜିତ କରାଯାଇଥିଲା। ରବିବାର ଶେଷଦିନ ଅବସରରେ ପୂଜା ମହୋତ୍ସବରେ ବାଣପୁର ଅଞ୍ଚଳର ପେଣ୍ଡୁରା ପଲ୍ଲୀ, ଭଗବତୀପୁର ନୂଆଗାଁ, ଦେଓଗାଁ, କୋଳଥଡିହ , ମାଟିଆ ପୋଖରୀ ଓ ସାନ ହନ୍ତୁଆଡ଼ ଗ୍ରାମର ରେ ୭ କୀର୍ତ୍ତନ ମଣ୍ଡଳୀ ଯୋଗ ଦେଇଥିଲେ। ସଂକୀର୍ତ୍ତନ ମଣ୍ଡଳି ହରି ନାମ ଶ୍ରୀ କୃଷ୍ଣ ଭଗବାନଙ୍କର ଭଜନ ଜଣାଣ ପରିବେଷଣ କରିଥିଲେ।

ଗ୍ରାମର ତିନି ଠାକୁର ଯଥାକ୍ରମେ ଶ୍ରୀ ରଘୁନାଥ ଦେବ, ଶ୍ରୀ କୁଞ୍ଜ ବିହାରୀ ଦେବ ଓ ଶ୍ରୀ ମଦନ ମୋହନ ଦେବଙ୍କ ବିମାନକୁ ଫୁଲରେ ସୁସଜ୍ଜିତ କରାଯାଇ ନଗର ପରିକ୍ରମା କରାଯାଇଥିଲା।ଏହି ସମୟରେ ଏକ ଆଧ୍ୟତ୍ମିକ ପରିବେଶ ଦେଖିବାକୁ ମିଳିଥିଲା।

ଏହି ଅବସରରେ ପାଖାପାଖି ୫ ହଜାର ଶ୍ରଦ୍ଧାଳୁଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା ହୋଇଥିଲା । ସଂନ୍ଧ୍ୟାରେ ସ୍ଥାନୀୟ ବିଧାୟକ ତଥା ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଉକ୍ତ କାର୍ଯ୍ୟକ୍ରମରେ ଯୋଗଦେଇଥିଲେ। ସାନହନ୍ତୁଆଡ଼ ଗ୍ରାମର ଦୁଇ ସଭାପତି ମୁକୁନ୍ଦ ପ୍ରସାଦ ମହାନ୍ତି, ସୁଧୀର କୁମାର ପ୍ରଧାନ, ସାରଥୀ ସାମନ୍ତରାୟ , ନିରଞ୍ଜନ ପ୍ରଧାନ ଗ୍ରାମର ସମସ୍ତ ଅଧିକାରୀ ଏବଂ କମିଟି ସଦସ୍ୟ ବୃନ୍ଦ, ଗ୍ରାମର ଉଦୟମାନ ଯୁବକ ସୁଜୁତ ଛାଟୋଇ, ଅମିତାଭ ପଟ୍ଟନାୟକ , ସୁରେନ୍ଦ୍ର ସାମନ୍ତରାୟ , ନିଲେଶ ବରାଳ, ଉତ୍ତମ ସୁନ୍ଦରା, ଶିବଶକ୍ତି ଶାସମଲ ପ୍ରମୁଖ ସମସ୍ତ କାର୍ଯ୍ୟ ସୁଚାରରୂପେ ତୁଲାଇଥିଲେ।

ବାଣପୁର: ଆଜି ସକାଳ ୯.୦୦ ଘଟିକା ସମୟରେ ଗୋଦାବରୀଶ ମହାବିଦ୍ୟାଳୟର ଅଧ୍ୟକ୍ଷ ବିନାୟକ ହୋତା, ରୋଭର୍ ଲିଡର ଆଦିତ୍ୟ ସାରଥି ବେଦମାତ୍ତା, ରେଞ୍ଜର୍ ଲିଡର ଉତ୍କଳିକା ପାଢ଼ିଙ୍କ ଉପସ୍ଥିତିରେ ଏକ ଦୁର୍ନୀତି ନିବାରଣ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ଶ୍ରୀଯୁକ୍ତ ବେଦମତ୍ତା ରୋଭର, ରେଞ୍ଜର୍ ମାନଙ୍କୁ ଦୁର୍ନୀତି ବିରୁଦ୍ଧରେ ଏକ ଶପଥ ପାଠ କରାଇଥିଲେ।

ଅଧ୍ୟକ୍ଷ ଶ୍ରୀଯୁକ୍ତ ହୋତା ଦୁର୍ନୀତି ଦ୍ଵାରା ରାଷ୍ଟ୍ରର କିପରି ଅଧଃପତନ ହୁଏ ବକ୍ତବ୍ୟ ରଖିଥିଲେ ଓ ଛାତ୍ରଛାତ୍ରୀ ମାନେ ଦୁର୍ନୀତି ନିବାରଣ ପାଇଁ ସଚେତନ ହୋଇ ସମାଜକୁ କିପରି ସୁସ୍ଥ ରଖିପାରିବେ, ସେ ବିଷୟରେ ଆଲୋକ ପାତ କରିଥିଲେ।

ଏହି କାର୍ଯ୍ୟକ୍ରମରେ ତିରିଶି ଜଣ ରୋଭର ଓ ରେଞ୍ଜର ମାନଙ୍କ ସହିତ କଲେଜର ପୁରାତନ ଛାତ୍ର ନିତିଶ୍ କୁମାର୍ ବିଶ୍ଵାଳ ଓ ଛାତ୍ରୀ ସୁଦୀପ୍ତି ଶୁଭଦର୍ଶୀନି ସେଠି ଯୋଗ ଦେଇଥିଲେ।

ବାଣପୁର: ଆଜି ଅପରାହ୍ନରେ ବରିଷ୍ଠ ନାଗରିକ ସଂଘ, ବାଣପୁର ଆନୁକୁଲ୍ୟରେ ସ୍ଥାନୀୟ ଶ୍ରୀ ଶ୍ରୀ ରଙ୍କନାଥଦେବଙ୍କ ମନ୍ଦିର ପ୍ରାଙ୍ଗଣରେ ଏକ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଯାଇଛି। ଉକ୍ତ ସଭାରେ ଡ.ଚିନ୍ତାମଣି ମିଶ୍ର ସଭାପତିତ୍ୱ କରିବା ସହ ସଂଘର ଆଭିମୁଖ୍ୟ ସମ୍ପର୍କରେ ସୂଚନା ପ୍ରଦାନ କରିଥିଲେ। ସମ୍ପାଦକ ବସନ୍ତ କୁମାର ନାୟକ ସଂଘର ପଞ୍ଜିକରଣ ଓ ଉଦେଶ୍ୟ ସମ୍ପର୍କରେ ଆଲୋକପାତ କରିଥିଲେ। ଏହି ଅବସରରେ ବରିଷ୍ଠ ନାଗରିକ ନଳିନୀକାନ୍ତ ପଟ୍ଟନାୟକ, ଡ଼. ସୁଧାଂଶୁ ଶେଖର ମିଶ୍ର,ଡ.ସୁରେନ୍ଦ୍ରନାଥ ପାତ୍ର ଓ ମଧୁସୂଦନ ପାତ୍ରଙ୍କୁ ଉତ୍ତରୀୟ ଓ ପୁଷ୍ପଗୁଚ୍ଛ ଦେଇ ସଂଘ ତରଫରୁ ସମ୍ବର୍ଦ୍ଧିତ କରାଯାଇଥିଲା।

ପରିଶେଷରେ ଓଡ଼ିଶା ପ୍ରଶାସନିକ ସେବା ପରୀକ୍ଷାରେ କୃତିତ୍ୱ ହାସଲ କରିଥିବା ବାଣପୁର ଓ ଚିଲିକା ଅଞ୍ଚଳର ପାଞ୍ଚ ଜଣ ଯୁବ ପ୍ରତିଭାଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା। ତେବେ ଦୀର୍ଘ ବର୍ଷର ଉଦ୍ୟମ ଫଳରେ ବାଣପୁର ଅଞ୍ଚଳରେ ବରିଷ୍ଠ ନାଗରିକ ସଂଘର ପଞ୍ଜିକରଣ ହୋଇଥିବାରୁ ସମସ୍ତ ସଭ୍ୟମାନେ ଖୁସିବ୍ୟକ୍ତ କରିଥିଲେ। ଉକ୍ତ ସଭାରେ ବାଣପୁର ଅଞ୍ଚଳର ଶତାଧିକ ବରିଷ୍ଠ ନାଗରିକମାନେ ଯୋଗ ଦେଇଥିଲେ। ତେବେ ବରିଷ୍ଠ ନାଗରିକମାନଙ୍କୁ ବାର୍ଷିକ ଦେୟ ଦେଇ ସଭ୍ୟ ପଦ ଗ୍ରହଣ କରିବାକୁ ସଂଘ ତରଫରୁ ଅନୁରୋଧ କରାଯାଇଛି।

ବାଣପୁର: ଆଜି ତାଲୁକ ଆଇନ ସେବା ସମିତି, ବାଣପୁର ପକ୍ଷରୁ ଗୋଦାବରୀଶ ବିଦ୍ୟାପୀଠ ପରିସରରେ ଆଇନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଉକ୍ତ କାର୍ଯ୍ୟକ୍ରମରେ ଅଧ୍ୟକ୍ଷତା କରିଥିଲେ ତାଲୁକ ଆଇନ ସେବା ସମିତି ଅଧ୍ୟକ୍ଷ ତଥା ବରିଷ୍ଠ ଦେୱାନୀ ବିଚାରପତି ଅମରେଶ ମହାପାତ୍ର। ଅନ୍ୟମାନଙ୍କ ମଧ୍ୟରେ ବାଣପୁର କୋର୍ଟ ପ୍ରଥମ ଶ୍ରେଣୀ ବିଚାର ବିଭାଗୀୟ ବିଚାରପତି ସ୍ନାତକୀ ଦାସ, ବରିଷ୍ଠ ଆଇନଜୀବୀ ବିପ୍ଳବ କୁମାର ମୁଦୁଲି, ବାଣପୁର ଓକିଲ ସଂଘ ସମ୍ପାଦକ ରଞ୍ଜନ କୁମାର ବେଦମତ୍ତା, ଫ୍ରଣ୍ଟ ଅଫିସ ରିଟେନର ପଦ୍ମଜା ପଟ୍ଟନାୟକ ଏବଂ ଭାରପ୍ରାପ୍ତ ପ୍ରଧାନଶିକ୍ଷକ ଶ୍ୟାମସୁନ୍ଦର ପ୍ରଧାନ ଆଦି ଉପସ୍ଥିତ ଥିଲେ।

ଏହି ଅବସରରେ ବରିଷ୍ଠ ଦେୱାନୀ ବିଚାରପତି ଶ୍ରୀ ମହାପାତ୍ର ଉପସ୍ଥିତ ଛାତ୍ରଛାତ୍ରୀଙ୍କୁ ଆଇନ ସେବା ପ୍ରାଧିକରଣ ଏବଂ ତାହାର କାର୍ଯ୍ୟ ବିଷୟରେ ଅବଗତ କରାଇଥିଲେ। ଆଇନସେବା ପାଇବା ପାଇଁ ଯୋଗ୍ୟ ହିତାଧିକାରୀ, ବିଭିନ୍ନ ପ୍ରକାର ଆଇନସେବା ଯଥା ଆଇନ ପରାମର୍ଶ ମଧ୍ୟସ୍ଥତା ମାଧ୍ୟମରେ ମାମଲା ଫଇସଲା, ଯୋଗ୍ୟ ହିତାଧିକାରୀଙ୍କ ପାଇଁ ମାଗଣାରେ ଓକିଲ ନିଯୁକ୍ତି ତଥା ବିଭିନ୍ନ ସରକାରୀ କାର୍ଯ୍ୟାଳୟରେ ମିଳିବାକୁ ଥିବା ଆଇନଗତ ସାହାଯ୍ୟ ବିଷୟରେ ଆଲୋକପାତ କରିଥିଲେ।

ବରିଷ୍ଠ ଆଇନଜୀବୀ ଶ୍ରୀ ମୁଦୁଲି ଯିଏକି ଉକ୍ତ ବିଦ୍ୟାଳୟର ପ୍ରାକ୍ତନ ଛାତ୍ର, ଛାତ୍ରଛାତ୍ରୀଙ୍କୁ ଭଲ ମଣିଷ ହେବାପାଇଁ ଉପଦେଶ ଦେବା ସହ ଶିକ୍ଷାଧିକାର ଆଇନ, ପୀଡ଼ିତା କ୍ଷତିପୂରଣ ଆଇନ ବିଷୟରେ ବୁଝାଇଥିଲେ। ପରିଶେଷରେ ଭାରପ୍ରାପ୍ତ ପ୍ରଧାନଶିକ୍ଷକ ଧନ୍ୟବାଦ ଅର୍ପଣ କରିଥିଲେ।

ବାଣପୁର (ସୀତାରାମ ଅଗ୍ରୱାଲ): ନନ୍ଦପୁର ପଞ୍ଚାୟତ ଅନ୍ତର୍ଗତ ଦୋଳମୁଣ୍ଡାଇ ଗ୍ରାମରେ ଗତ ରବିବାର ଠାରୁ ସାତଦିନ ବ୍ୟାପି ଚାଲିଥିବା ଭାଗବତ କଥା ମହୋତ୍ସବ ଶନିବାର ଉଦଯାପିତ ହୋଇଯାଇଛି। ଉକ୍ତ ମହୋତ୍ସବରେ ଭୁବନେଶ୍ୱର ଇସ୍କନ ପୀଠର ବ୍ରହ୍ମଚାରୀ ଶ୍ରୀପାଦ ଅକ୍ଷୟ ହରି ଦାଶ ପ୍ରତ୍ୟେହ ଯୋଗଦେଇ ଶ୍ରଦ୍ଧାଳୁ ମାନଙ୍କୁ ପ୍ରଭୁ ଶ୍ରୀକୃଷ୍ଣଙ୍କ ଲୀଳା ଏବଂ ଭାଗବତ ପ୍ରବଚନ ଦେଇଥିଲେ।

ଭାଗବତ ପ୍ରବଚନ କାର୍ଯ୍ୟକ୍ରମରେ ହଜାର ହାଜର ଦୀକ୍ଷା ଗ୍ରହଣ କରିଥିବା ଶ୍ରଦ୍ଧାଳୁ ଯୋଗ ଦେଇ ପ୍ରଭୁକୃପା ଲାଭ କରିଥିଲେ।

ଉଦଯାପନୀ ଉତ୍ସବରେ ଶ୍ରୀପାଦ ଦାଶ ଶ୍ରଦ୍ଧାଳୁ ମାନଙ୍କୁ କଳି ଯୁଗରେ ମାନବ ଜାତି ମୋକ୍ଷ ପ୍ରାପ୍ତି ହେବା ନେଇ ମାର୍ଗ ଦର୍ଶନ କରିଥିଲେ। ପ୍ରତ୍ୟେହ ଶ୍ରଦ୍ଧାଳୁ ମାନଙ୍କ ପାଇଁ ଅଞ୍ଚଳର ବଦାନ୍ୟ ବ୍ୟକ୍ତି ମାନଙ୍କ ଦ୍ୱାରା ପ୍ରସାଦ ସେବନର ବ୍ୟବସ୍ଥା କରାଯାଇଥିଲା।

ଉକ୍ତ ଉତ୍ସବକୁ ଗ୍ରାମର ଦୀକ୍ଷାଦି ରବୀନ୍ଦ୍ର ପ୍ରଧାନ, ଉଲ୍ଲାସ ପ୍ରଧାନ, ଆଲୋକ ପ୍ରଧାନଙ୍କ ସହ ସମ୍ପୂର୍ଣ୍ଣ ଦୋଳମୁଣ୍ଡାଇ ଗ୍ରାମବାସୀ ସହଯୋଗ କରିଥିବା ଜଣାପଡିଛି।

ବାଣପୁର (ସୀତାରାମ ଅଗ୍ରୱାଲ): ବାଣପୁରର ପ୍ରଗତି ଶୀଳ ସାଂସ୍କୃତିକ ଅନୁଷ୍ଠାନ କଳିଙ୍ଗ କନ୍ୟା କଳା ପରିଷଦ ପକ୍ଷରୁ ଚଳିତ ବର୍ଷର ଶିଳ୍ପୀ ସମ୍ବର୍ଦ୍ଧନା ଉତ୍ସବ -୨୦୨୪ ଭେଟେଶ୍ଵର ସ୍ଥିତ ଶ୍ରୀ ଶ୍ରୀ ଭେଟି ନାଥ ଦେବ ମନ୍ଦିର ପରିସରରେ ଅନୁଷ୍ଠିତ ହୋଇଯାଇଛି। ବିଶିଷ୍ଟ ମଞ୍ଚ ନାଟ୍ୟ ନିର୍ଦେଶକ ପ୍ରମୋଦ କୁମାର ସ୍ଵାଇଁ, ନାଟ୍ୟକାର ଭିକାରୀ ଚରଣ ପ୍ରଧାନ, ନାଟ୍ୟ ସଙ୍ଗଠିକା ରଞ୍ଜୁଵାଳା ଚମ୍ପତିରାୟଙ୍କ ସାମଗ୍ରିକ ପରିଚାଳନାରେ ଅନୁଷ୍ଠିତ ଏହି ଉତ୍ସବରେ ମୁଖ୍ୟ ଅତିଥି ଭାବେ ବିଶିଷ୍ଟ ସମାଜସେବୀ ସୁକାନ୍ତ କୁମାର ବିଶ୍ବାଳ ଯୋଗଦେଇ ଶିଳ୍ପୀ ମାନଙ୍କୁ ପ୍ରମାଣପତ୍ର ଓ ଟ୍ରଫି ପ୍ରଦାନ ପୂର୍ଵକ କଳାକାର ମାନଙ୍କୁ ପ୍ରୋତ୍ସାହିତ କରିଥିଲେ।

ଏହି ଅବସରରେ ଅନୁଷ୍ଠାନ ପକ୍ଷରୁ ନିରବଚ୍ଛିନ୍ନ ସମାଜସେବା ପାଇଁ ସୁକାନ୍ତ କୁମାର ବିଶ୍ବାଳଙ୍କୁ ସମ୍ବର୍ଦ୍ଧିତ କରାଯାଇଥିଲା। ଗତ ବିଶ୍ଵ ନାଟ୍ୟ ମେଳା ୨୦୨୪ରେ ଜାତୀୟ ସ୍ତରରେ ପୁରସ୍କାର ଲାଭ କରିଥିବା କଳାକାର ଲକ୍ଷ୍ମୀ ସ୍ବାଇଁ, ଅନିତା ପ୍ରଧାନ, ପାପାଲି ସାଶମଲ, ରାଜଶ୍ରୀ ପଲେଇ ପ୍ରମୁଖଙ୍କୁ ମୁଖ୍ୟ ଅତିଥିଙ୍କ ଦ୍ଵାରା ସ୍ଵତନ୍ତ୍ର ଭାବରେ ପୁରସ୍କୃତ କରାଯିବା ସହ ଶ୍ରେଷ୍ଠ ନାଟ୍ୟକାର ଭାବେ ଭିକାରୀ ଚରଣ ପ୍ରଧାନ, ଶ୍ରେଷ୍ଠ ନିର୍ଦ୍ଦେଷ୍କ ଭାବେ ପ୍ରମୋଦ କୁମାର ସ୍ଵାଇଁ, ଶ୍ରେଷ୍ଠ ସଙ୍ଗୀତ ନିର୍ଦ୍ଦେଶକ ଭାବେ ସରୋଜକାନ୍ତ ସାଶମଲଙ୍କୁ ଟ୍ରଫି ଓ ମାନପତ୍ର ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯାଇଥିଲା।

ପରିଶେଷରେ ଆଗାମୀ ବିଶ୍ଵ ନାଟ୍ୟ ମେଳା ୨୦୨୫ ପାଇଁ ଭିକାରୀ ଚରଣ ପ୍ରଧାନଙ୍କ ରଚିତ ଏବଂ ପ୍ରମୋଦ କୁମାର ସ୍ଵାଇଁଙ୍କ ନିର୍ଦ୍ଦେଶିତ ନାଟକ ଅହି ନନ୍ଦିନୀ ବାବା ଭେଟି ନାଥଙ୍କ ପାଖରେ ସମର୍ପିତ କରାଯିବା ସହ ପାଣ୍ଡୁଲିପି ପୂଜନ ଅନୁଷ୍ଠିତ ହୋଇ ପୂର୍ଵାଭ୍ୟାସ ଅନୁଷ୍ଠିତ ହୋଇଥିଲା।

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଣପୁର ଅଞ୍ଚଳର ପ୍ରସିଦ୍ଧ ଶକ୍ତିପିଠ ମା’ ଭଗବତୀ ମନ୍ଦିର ସମ୍ମୁଖ ସମ୍ପୂର୍ଣ୍ଣ ଅନ୍ଧକାରମୟ ହୋଇଛି। ପୁର୍ବରୁ ମନ୍ଦିର ସମ୍ମୁଖ ଷ୍ଟ୍ରିଟ ଲାଇଟ ଅଚଳ ଥିବା ବେଳେ ବର୍ତ୍ତମାନ ଏଠାରେ ଏନଏସି ପକ୍ଷରୁ ବାତ୍ୟା ଉପଲକ୍ଷେ ହାଇମାଷ୍ଟ ଲାଇଟକୁ ତଳକୁ ଖସାଇ ଦିଆଯାଇଛି।

ତେବେ ବାତ୍ୟାର ପ୍ରଭାବ ବାଣପୁର ଅଞ୍ଚଳରେ ପଡ଼ିନଥିବା ବେଳେ ଅଦ୍ୟାବଧି ଉକ୍ତ ହାଇମାଷ୍ଟ ଲାଇଟକୁ କାର୍ଯ୍ୟକ୍ଷମ କରାଯାଉନାହିଁ। ଫଳରେ ସ୍ଥାନୀୟ ଏବଂ ରାଜ୍ୟରୁ ଆସୁଥିବା ଶ୍ରଦ୍ଧାଳୁମାନେ ସଂନ୍ଧ୍ୟାରେ ନାହିଁନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏପରିକି ଅନ୍ଧାରର ସୁଯୋଗ ନେଇ କିଛି ମଦ୍ୟପ ଓ ଅସାମାଜିକ ବ୍ୟକ୍ତିମାନେ ମନ୍ଦିର ନିକଟରେ ଆଡ୍ଡା ଜମାଉଛନ୍ତି।

ଫଳରେ ଶ୍ରଦ୍ଧାଳୁମାନେ ସଂନ୍ଧ୍ୟାରେ ମନ୍ଦିରକୁ ଯିବାକୁ ସୁରକ୍ଷିତ ମଣୁନାହାନ୍ତି। ମା’ ଭଗବତୀ ମନ୍ଦିର ଓଡିଶାର ଏକ ପ୍ରମୁଖ ଶକ୍ତିପିଠ ହୋଇଥିବା ବେଳେ ମାସ ମାସ ଧରି ଅଚଳ ହୋଇ ପଡ଼ିଥିବା ସାମାନ୍ୟ ଷ୍ଟ୍ରିଟ ଲାଇଟକୁ ଏନଏସି ମଧ୍ୟ ମରାମତି କରିପାରୁନାହିଁ।

ଏଣ୍ଡାଉମେଣ୍ଟ ସଭାପତି ତଥା ବାଣପୁର ତହସିଲଦାର ଏ ଦିଗରେ ବିହିତ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦୃଢ ଦାବି ହେଉଛି।

ବାଣପୁର (ସୀତାରାମ ଅଗ୍ରୱାଲ): “କଟକର ଚ଼ିନ୍ତାବାଇ ମୁଣ୍ଡି” ଙ୍କ ପରି ଜୀବନର ଅନ୍ତିମ ସୋପାନ ପର୍ଯ୍ୟନ୍ତ ଜନ୍ମମାଟି ବାଣପୁରର ଉନ୍ନତି ଓ ବିକାଶପାଇଁ ଅହରହ ଚ଼ିନ୍ତା କରିଥିବା ବ୍ୟକ୍ତିତ୍ଵ ବାଣପୁରର ବାଇମୁଣ୍ଡି ସ୍ବର୍ଗତ ରାଧାକୃଷ୍ଣ ରାମଙ୍କ ଦ୍ୱାଦଶାହ ସ୍ମୃତି ସଭା ଅନୁଷ୍ଠିତ ହୋଇଯାଇଛି। ବାଣପୁରସ୍ଥିତ ଶୁଭମଙ୍ଗଳ କଲ୍ୟାଣ ମଣ୍ଡପଠାରେ ଜୟ ବାଣପୁର ସଂଗ୍ରାମ ପରିଷଦ ଦ୍ଵାରା ଉକ୍ତ ସ୍ମୃତି ସଭା ଆୟୋଜନ କରାଯାଇଥିଲ। ବରିଷ୍ଠ ସାମ୍ବାଦିକ ନୃସିଂହ ପ୍ରସାଦ ମିଶ୍ରଙ୍କ ସଭାପତିତ୍ଵରେ ଆୟୋଜିତ ଏହି ସଭାରେ ତାଙ୍କୁ ଭଲ ପାଉଥିବା ବ୍ୟକ୍ତିତ୍ଵ ଗାଳ୍ପିକ ଶିବ ମିଶ୍ର, କବି ପୁରୁଷୋତ୍ତମ ମହାପାତ୍ର, ସାହିତ୍ୟସିନ୍ଦୁରାର ଆବାହକ ଗୋଲକ ପରୀଡା, ଅଧ୍ୟାପକ ସଂଗ୍ରାମ କେଶରୀ ସାହୁ, କବି ବାଳମୁକୁନ୍ଦଦାସ, ଶିକ୍ଷାବିତ୍ ଆନନ୍ଦ ଚନ୍ଦ୍ର ସେନାପତି, ଲକ୍ଷ୍ମୀଧର ପ୍ରଧାନ, ବ୍ରଜବନ୍ଧୁ ମିଶ୍ର, ଶଙ୍କର ନାୟକ, ଜିଲ୍ଲା ପରିଷଦ ଉପାଧ୍ୟକ୍ଷ ଗୋପୀନାଥ ମହାରଣା, ଗୋଦାବରୀଶ ମହାବିଦ୍ୟାଳୟର ପୂର୍ବତନ ଅଧ୍ୟକ୍ଷ ଡ଼ଃନୃସିଂହ ପ୍ରଧାନ, ଅଧ୍ୟାପକ ଭବାନୀ ପ୍ରସାଦ ହୋତା, ଆଡ଼୍‌ଭୋକେଟ୍ ଶେଷ ଦେବ ମହାରଣା, ନାଟ୍ୟ ନିର୍ଦ୍ଦେଶକ ମହେଶ୍ଵର ଜେନା, ଶକ୍ତିପ୍ରସାଦ ମହାପାତ୍ର, “ଜୟ ବାଣପୁର” ସଂଗଠନର ଆବାହକ ଇଂଜିନିୟର ଶେଷଦେବ ବରାଳ, ସମାଜସେବୀ ବ୍ରଜକିଶୋର ଜେନା, ସମାଜସେବୀ ନିରଞ୍ଜନ ପ୍ରଧାନ, ସୁନିଲ ବରାଳ ପ୍ରମୁଖ ଯୋଗ ଦେଇ ତାଙ୍କ ଫଟୋଚିତ୍ରରେ ପୁଷ୍ପାଞ୍ଜଳି ପ୍ରଦାନ ପୂର୍ବକ ଅମର ଆତ୍ମାର ସଦଗତି କାମନା କରି ଇଶ୍ଵରଙ୍କ ନିକଟରେ ପ୍ରାର୍ଥନା ସହ ବାଣପୁର ବାଲୁଗାଁର ବିକାଶ ପ୍ରତି ତାଙ୍କ ଅବଦାନ ସଂପର୍କରେ ବ୍ୟକ୍ତବ୍ୟ ରଖି ସ୍ମୃତି ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।

ଗୋଦାବରୀଶ ବିଦ୍ୟାପୀଠରେ ଶିକ୍ଷକତା ପଦରୁ ଅବସର ନେଇ ସ୍ବର୍ଗତ ରାମ ବାଣପୁର ବିଜ୍ଞାପିତ ଅଞ୍ଚଳ ପରିଷଦର ପ୍ରଥମ ଅଧ୍ୟକ୍ଷ ଭାବରେ ନିର୍ବାଚିତ ହୋଇ ସ୍ୱାଭିମାନ ବାଣପୁରର ଉନ୍ନତି ପାଇଁ ଆରମ୍ଭ କରିଥିଲେ ଅନେକ ଯୋଜନା। ତନ୍ମଧ୍ୟରୁ ବାଣପୁର ନିର୍ବାଚନମଣ୍ଡଳୀର ପରିବର୍ତ୍ତିତ ନାମ ଚ଼ିଲିକାକୁ ପୁନଃ ପରିବର୍ତ୍ତନ କରାଇବା ପାଇଁ ଭାରତର ଉଚ୍ଚତମ ନ୍ୟାୟାଳୟରେ ଲଢ଼େଇ, ବାଣପୁରରେ ସବରେଜିଷ୍ଟାର ଅଫିସ୍, ଭାରତୀୟ ଷ୍ଟେଟବ୍ୟାଙ୍କର ଶାଖା ଓ କୋର୍ଟ ପରିସର ସ୍ଥାପନ ସହିତ, ବାଲୁଗାଁଠାରେ ଦ୍ରୁତଗାମୀ ରେଳ ଗୁଡ଼ିକର ରହଣୀ ପାଇଁ ଅହରହ ଉଦ୍ୟମ କରି ସେ କିପରି କୃତକାର୍ଯ୍ୟ ହୋଇପାରିଥିଲେ ତାହା ବକ୍ତାମାନେ ବର୍ଣ୍ଣନା କରିଥିଲେ।

ଏକ ସାଲିସ୍ ବିହୀନ ସ୍ୱାଭିମାନୀ ମଣିଷ ଭାବରେ ବଞ୍ଚି ରହି ବାଣପୁରକୁ ରାଜସ୍ଵ ଉପଖଣ୍ଡ ମାନ୍ୟତା ଦାବିରେ ଲଢ଼େଇ ଜାରି ରଖି ସେ ଶେଷ ନିଶ୍ଵାସ ତ୍ୟାଗ କରିଥିଲେ। ତାହା ନିଶ୍ଚିତ ଭାବରେ ବାଣପୁର ଇତିହାସ ପୃଷ୍ଠାରେ ଏକ ଅମ୍ଳାନ ସ୍ମୃତି ହୋଇ ଚିରକାଳ ରହିଥିବ ବୋଲି ବକ୍ତାମାନେ ବ୍ୟକ୍ତବ୍ୟ ପ୍ରଦାନ କରି ତାଙ୍କ ଶେଷ ସ୍ୱପ୍ନ ବାଣପୁର ବାସୀଙ୍କ ପ୍ରମୁଖ ଦାବୀ ବାଣପୁର ରାଜସ୍ଵ ଉପଖଣ୍ଡ ମାନ୍ୟତା ଲାଭ ପାଇଁ ଅହରହ ସଂଗ୍ରାମ ଜାରି ରଖିବାକୁ ସଂକଳ୍ପ କରିଥିଲେ।

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଣପୁର ମଣ୍ଡଳର ପ୍ରଥମ ମହିଳା ତଥା ଭୀମପୁର ଗ୍ରାମର ଶିବାନୀ ରାଉତ ଓଡ଼ିଶା ପ୍ରସାଶନିକ ସେବା ପରୀକ୍ଷାରେ ଉତ୍ତୀର୍ଣ୍ଣ ଲାଭ କରି ମଣ୍ଡଳର ପ୍ରଥମ ମହିଳା ଭାବରେ କୃତିତ୍ତ୍ଵ ଅର୍ଜନ କରିଥିବାରୁ ଜନ୍ମମାଟି ଭୀମପୁରର ବାନାମ୍ବର ଏକାଡ଼େମୀଠାରେ ବିଦ୍ୟାଳୟ ଓ ଗ୍ରାମବାସୀଙ୍କ ତରଫରୁ ଉଚ୍ଛ୍ଵସିତ ସମୂର୍ଦ୍ଧନା ଜ୍ଞାପନ କରାଯାଇଛି। ଗ୍ରାମର ପ୍ରମୁଖ ପ୍ରଫେସର ନଳିନୀକାନ୍ତ ପଟ୍ଟନାୟକଙ୍କ ସଭାପତିତ୍ଵରେ ଏବଂ ଏକାଡ଼େମୀର ପ୍ରଧାନ ଶିକ୍ଷକ ରାଧାକୃଷ୍ଣଗଡ଼ନାୟକଙ୍କ ସହଯୋଗରେ ଆୟୋଜିତ ଏହି ସମାରୋହରେ ଅଧ୍ୟାପକ ସଂଗ୍ରାମ କେଶରୀ ସାହୁ, ଶିକ୍ଷାବିତ୍ ଆନନ୍ଦ ଚନ୍ଦ୍ରସେନାପତି, ବାଳମୁକୁନ୍ଦ ଦାସ, ବୈରାଗୀଚରଣ ବେହେରା, ଲକ୍ଷ୍ମୀଧର ସାହୁ, ରାହାସ ବିହାରୀ ସାହୁ, ବିଭୂତି ଭୂଷଣ ନନ୍ଦ, ରମେଶ ଚନ୍ଦ୍ର ବେହେରା, ମଧୁସୂଦନ ନନ୍ଦ, ଗଣେଶ୍ଵର ମୁଦୁଲି, ବୈରାଗୀଚରଣବଳ, ଏବଂ ଶିବାନୀଙ୍କ ବାପା, ମା ନାରାୟଣ ରାଉତ ଓ କବିତା ରାଉତଙ୍କ ସମେତ ଗ୍ରାମବାସୀ, ଶିକ୍ଷକ ଶିକ୍ଷୟିତ୍ରୀ ଓ ଛାତ୍ରଛାତ୍ରୀମାନେ ଯୋଗଦେଇ ଶିବାନୀଙ୍କୁ ପୁଷ୍ପମାଲ୍ୟାର୍ପଣ ସହିତ ପୁଷ୍ପ ବୃଷ୍ଟି କରାଇମଞ୍ଚ ଉପରକୁ ପାଛୋଟି ନେଇଥିଲେ।

ବାଣପୁର ମଣ୍ଡଳର ଭୀମପୁର ଗାଁ ଏକ ସଂସ୍କୃତି, ଐତିହ୍ୟ ସଂପନ୍ନ ଓ ଶିକ୍ଷା କ୍ଷେତ୍ରରେ ଏକ ଅଗ୍ରଣୀ ଗାଁ ହୋଇ ବହୁ କବି ସାହିତ୍ୟିକ, ପ୍ରଶାସନିକ ଅଧିକାରୀ, ଶିକ୍ଷାବିତଙ୍କୁ ସୃଷ୍ଟି କରିଥିଲେ ମଧ୍ୟ ଶିବାନୀ ରାଉତ ଓ. ପ୍ର .ସେ ପରୀକ୍ଷାରେ କୃତିତ୍ବ ଅର୍ଜନ କରି ପ୍ରଥମ ମହିଳା ପ୍ରଶାସନିକ ଅଧିକାରୀ ହେବାର ଗୌରବ ଲାଭ କରିଥିବାରୁ ଗାଁ’ମାଟି ଧନ୍ୟ ହୋଇଥିବା ସହିତ ସମଗ୍ର ଗ୍ରାମବାସୀ ଗୌରବାନ୍ୱିତ ମନେକରୁଥିବା କଥା କହି ନିଜ ନିଜର ବ୍ୟକ୍ତବ୍ୟ ରଖି ପାଇକ କବି କୃଷ୍ଣଚନ୍ଦ୍ର ତ୍ରିପାଠୀଙ୍କ ଗାଁ ଭୀମପୁର ଇତିହାସରେ ଶିବାନୀ ରାଉତ ଆଉ ଏକ ସ୍ଵର୍ଣ୍ଣିମ ଅଧ୍ୟାୟ ଯୋଡ଼ିଦେଇଥିବା କଥା ପ୍ରକାଶ କରି ସମାଜର ଦୁଃସ୍ଥ, ନିଷ୍ପେସିତର ସେବାରେ ନିଜକୁ ଉତ୍ସର୍ଗ କରିବାକୁ ପ୍ରେରଣା ପ୍ରଦାନ କରିଥିଲେ।

ସମ୍ବର୍ଦ୍ଧନାର ଉତ୍ତରରେ ଶିବାନୀ ନିଜର ଲକ୍ଷ ସ୍ଥଳରେ ପହଞ୍ଚିବା ପାଇଁ କିପରି ଏକାଗ୍ରତା ଓ ସାଧନା କରିବାକୁ ହୁଏ ସେ ସଂପର୍କରେ ଛାତ୍ରଛାତ୍ରୀମାନଙ୍କୁ ପରାମର୍ଶ ଦେଇ ସମସ୍ଥଙ୍କ ନିକଟରେ କୃତଜ୍ଞତା ପ୍ରକାଶ କରିଥିଲେ। ବିଦ୍ୟାଳୟ ତରଫରୁ ଉତ୍ତରୀୟ ମାନପତ୍ର ଓ ପୁଷ୍ପ ଗୁଚ୍ଛ ଦେଇ ତାଙ୍କୁ ସମ୍ବର୍ଦ୍ଧିତ କରାଯାଇଥିଲା। ଶେଷରେ ଶିକ୍ଷକ ଶଙ୍କର ନାୟକ ଧନ୍ୟବାଦ ଅର୍ପଣ କରିଥିଲେ।

ବାଣପୁର (ସୀତାରାମ ଅଗ୍ରୱାଲ): ଆଜି ପବିତ୍ର କୁମାର ପୂର୍ଣ୍ଣିମା। ଖୋର୍ଦ୍ଧା ଜିଲ୍ଲା ବାଣପୁର ଅଞ୍ଚଳର କୁମାରାଙ୍ଗ ଗ୍ରାମରେ ମହା ଆଡମ୍ବରରେ ପାଳିତ ହୋଇଛି କୁମାର ଉତ୍ସବ। ଉକ୍ତ ଉତ୍ସବ ଗ୍ରାମର ଅବସରପ୍ରାପ୍ତ କର୍ଣ୍ଣେଲ ଶ୍ରୀକାନ୍ତ ମହାପାତ୍ରଙ୍କ ସଭାପତିତ୍ୱରେ ଅନୁଷ୍ଠିତ ହୋଇଥିବାବେଳେ ଏଥିରେ ମୁଖ୍ୟ ଅତିଥି ଭାବେ ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଯୋଗଦେଇଥିଲେ ଏବଂ ସମ୍ମାନିତ ଅତିଥି ଭାବେ ବାଣପୁର ବ୍ଲକ ଅଧ୍ୟକ୍ଷ ଅମରେନ୍ଦ୍ର ରଣସିଂହ ଓ ଚିଲିକା ବ୍ଲକ ଅଧ୍ୟକ୍ଷା ଜ୍ୟୋତ୍ସ୍ନା ବେହେରା ଯୋଗ ଦେଇଥିଲେ।

ଗ୍ରାମର ଅବସରପ୍ରାପ୍ତ ବ୍ୟାଙ୍କ କର୍ମଚାରୀ ତଥା ପାଠାଗାରର ସମ୍ପାଦକ ଗୋକୁଳାନନ୍ଦ ମହାପାତ୍ର ପାଠାଗାରର ବାର୍ଷିକ ବିବରଣୀ ପାଠ କରିଥିଲେ। ଆଜିକୁ ୧୧୩ ବର୍ଷ ତଳେ ୧୯୧୨ ମସିହାରେ କୁମାରାଙ୍ଗ ଗ୍ରାମରେ ବହୁ ବିଜ୍ଞ ବ୍ୟକ୍ତି ମାନଙ୍କ ଦ୍ୱାରା ଆରମ୍ଭ କରାଯାଇଥିଲା କୁମାର ପାଠାଗାର।

କୁମାରାଙ୍ଗ ଏକ ଶିକ୍ଷିତ ଗ୍ରାମ ଭାବେ ବାଣପୁର ଅଂଚଳରେ ପରିଚିତ ଥିବାବେଳେ ଉକ୍ତ ପାଠାଗାର ଅବଦାନରେ ଗ୍ରାମବାସୀ ରାଜ୍ୟ ତଥା ଦେଶର ବହୁ ଉଚ୍ଚ ପଦବୀରେ ଅଧିଷ୍ଠିତ ହୋଇଥିବା ଗ୍ରାମବାସୀ କୁହନ୍ତି। ଉକ୍ତ ଉତ୍ସବରେ ଗ୍ରାମ ବାହାରେ ବାସ କରୁଥିବା ସମସ୍ତ ଉଚ୍ଚ ପଦସ୍ଥ ବ୍ୟକ୍ତିବିଶେଷ କୁମାର ଉତ୍ସବରେ ସାମିଲ ହୋଇଥିବା ବେଳେ ପ୍ରତ୍ୟେକ ବର୍ଷ ଗ୍ରାମବାସୀ ମହା ଆନନ୍ଦରେ ଏହା ପାଳିନ କରିଥାନ୍ତି।

କୁମାର ପାଠାଗାର ଦ୍ୱାରା ପ୍ରତ୍ୟେକ ବର୍ଷ ବାର୍ଷିକ ପତ୍ରିକା ପ୍ରକାଶ ପାଉଥିବା ବେଳେ ଚଳିତ ବର୍ଷର ବାର୍ଷିକ କୁମାର ପତ୍ରିକାକୁ ଅତିଥି ମାନେ ଉନ୍ମୋଚନ କରିଥିଲେ। ପାଠାଗାର ଦ୍ୱାରା ଦୁର୍ଗାପୂଜା ଠାରୁ ଗ୍ରାମରେ ଆୟୋଜିତ ବିଭିନ୍ନ ପ୍ରତିଯୋଗିତାରେ କୃତକାର୍ଯ୍ୟ ହୋଇଥିବା ପ୍ରତିଯୋଗୀ ମାନଙ୍କୁ ମୁଖ୍ୟ ଅତିଥି ମନ୍ତ୍ରୀ ଶ୍ରୀ ହରିଚନ୍ଦନ ପୁରସ୍କୃତ କରିଥିଲେ।

ପରିଶେଷରେ ପାଠାଗାର ସମିତି ପକ୍ଷରୁ ଆୟୋଜିତ ସାଂସ୍କୃତିକ କାର୍ଯ୍ୟକ୍ରମ ଦ୍ୱାରା ଗ୍ରାମବାସୀ ଶତମୁଖ ହୋଇଥିଲେ।

ଚିଲିକା (ସୀତାରାମ ଅଗ୍ରୱାଲ): ଆଜି ପୂର୍ବାହ୍ନରେ ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ ସିଙ୍ଗେଶ୍ୱର ପଞ୍ଚାୟତ ଅନ୍ତର୍ଗତ କିମ୍ଭିରିପଡାସ୍ଥିତ ବରିଷ୍ଠ ନାଗରିକ ଆବାସ ସେବାଶ୍ରମ, ବିଶ୍ୱଜୀବନ ସେବା ସଙ୍ଘ ଠାରେ ବାଣପୁର ତାଲୁକ ଆଇନ ସେବା ସମିତି ଅଧ୍ୟକ୍ଷ ତଥା ବରିଷ୍ଠ ଦେୱାନୀ ବିଚାରପତି ଅମେରେଶ ମହାପାତ୍ରଙ୍କ ଅଧ୍ୟକ୍ଷତାରେ ବିଶ୍ୱ ମାନସିକ ସ୍ୱାସ୍ଥ୍ୟ ଦିବସ ଅବସରରେ ଏକ ଆଇନ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ଅବସରରେ ବିଚାରପତି ଶ୍ରୀ ମହାପାତ୍ର ମାନସିକ ଅନଗ୍ରସର, ବରିଷ୍ଠ ନାଗରିକଙ୍କ ସୁରକ୍ଷା ଓ ସରକାରୀ ସହାୟତା ସମ୍ବନ୍ଧୀୟ ବିଭିନ୍ନ ଆଇନ ବିଷୟରେ ଆଲୋଚନା କରିଥିଲେ। ଅପରାହ୍ନରେ ବରିଷ୍ଠ ନାଗରିକ ଆବାସରେ ବାସ କରୁଥିବା ଅନ୍ତେବାସୀଙ୍କୁ ମିଳିମିଶି ପରିବାର ପରି ଚଳିବା ପାଇଁ ବିଚାରପତି ପରାମର୍ଶ ଦେଇଥିଲେ।

ଆଇନ ଅନୁଯାୟୀ ମାନସିକ ବିକାରଗସ୍ତ ବ୍ୟକ୍ତିଙ୍କୁ ମୁଖ୍ୟସ୍ରୋତରେ ସାମିଲ କରିବା ତଥା ତାଙ୍କ ଥଇଥାନ କରିବା ଦାୟିତ୍ୱ ସରକାରଙ୍କ ଏବଂ ଏଥିନିମନ୍ତେ ସମସ୍ତ ଜିଲ୍ଲାପାଳମାନଙ୍କୁ ସ୍ୱତନ୍ତ୍ର ଦାଇତ୍ୱ ଦିଆଯାଇଛି। ଯଦି କୌଣସି ମାନସିକ ବିକାରଗସ୍ତ ବ୍ୟକ୍ତି ତଥା ବରିଷ୍ଠ ନାଗରିକ ମାନେ ଆଇନଗତ ସହାୟତା ନେବାକୁ ଚାହିଁବେ ତେବେ ସେମାନେ ତାଲୁକ ଆଇନ ସେବା କମିଟି ମାଧ୍ୟମରେ ସହାୟତା ପାଇପାରିବେ ବୋଲି ବିଚାରପତି ଶ୍ରୀ ମହାପାତ୍ର କହିଥିଲେ।

ଉକ୍ତ କାର୍ଯ୍ୟକ୍ରମରେ ଫ୍ରଣ୍ଟ ଅଫିସ ରିଟେନର ପଦ୍ମଜା ପଟ୍ଟନାୟକ, ବାଣପୁର ଓକିଲ ସଂଘର ସମ୍ପାଦକ ରଞ୍ଜନ କୁମାର ବେଦମତା, ଆଇନଜୀବି ଅଶୋକ ପାଇକରାୟ, ସମାଜସେବୀ ସୁକାନ୍ତ ବିଶ୍ୱାଳ ଆଦି ଯୋଗ ଦେଇଥିଲେ।

ଅନୁରୂପ ଭାବେ ବାଣପୁର କୋଟ କର୍ମଚାରୀ, ବିଶ୍ୱ ଜୀବନ ସେବା ସଂଘର ମ୍ୟାନେଜର ଜୟ କୃଷ୍ଣ ପଟ୍ଟନାୟକ ଏଥିରେ ସହଯୋଗ କରିଥିଲେ। ପରିଶେଷରେ ବାଣପୁର ଓକିଲ ସଂଘର ଉପସଭାପତି ରାମ ଚନ୍ଦ୍ର ପଲାଇ ଧନ୍ୟବାଦ ଅର୍ପଣ କରିଥିଲେ।

ବାଣପୁର (ସୀତାରାମ ଅଗ୍ରୱାଲ): ନୂତନ ଖୋର୍ଦ୍ଧା ଏସପି ସାଗରିକା ନାଥ କାର୍ଯ୍ୟରେ ଯୋଗ ଦେଉ ଦେଉ ଜିଲ୍ଲାରେ ନିଶା କାରବାର ବନ୍ଦ କରିବା ପାଇଁ ବିଭିନ୍ନ ପଦକ୍ଷେପ ଗ୍ରହଣ କରିଛନ୍ତି। ଆଜି ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ଥାନା ପୋଲିସ ଦାମିଆ ବରବରା ଅଞ୍ଚଳରେ ଚଢ଼ାଉ କରି ବିପୁଳ ପରିମାଣରେ ଜିଞ୍ଜର ବୋତଲ ଜବତ କରିବା ସହ ଜଣେ ଅଭିଯୁକ୍ତଙ୍କୁ ଗିରଫ କରି କୋର୍ଟଚାଲାଣ କରିଛି। ଅଭିଯୁକ୍ତ ଜଣକ ମନ୍ଦାର ଗ୍ରାମର ସୁରେନ୍ଦ୍ର ଶବର (୪୨) ବୋଲି ଜଣାପଡିଛି।

ସୂଚନା ମୁତବକ ଉକ୍ତ ଅଞ୍ଚଳରେ ବେଆଇନ ଭାବେ ଜିଞ୍ଜର କାରବାର ହେଉଥିବାର ଖବର ପାଇ ବାଲୁଗାଁ ଏସଡିପିଓଙ୍କ ନିର୍ଦେଶକ୍ରମେ ବାଣପୁର ଆଇଆଇସି ରମେଶ କୁମାର ଦେବତା ଏକ ଟିମ ଗଠନ କରି ଉକ୍ତ ସ୍ଥାନରେ ଚଢ଼ାଉ କରିଥିଲେ। ଚଢ଼ାଉ ବେଳେ ଅଭିଯୁକ୍ତଙ୍କ ନିକଟରୁ ୩୩୦ ବୋତଲ ଜିଞ୍ଜର ଏବଂ ୧୦ ଲିଟର ଦେଶୀ ମଦ ଜବତ ହୋଇଛି।

ବାଣପୁର (ସୀତାରାମ ଅଗ୍ରୱାଲ): ଆଜି ସକାଳ ୦୮.୦୦ ଘଟିକା ସମୟରେ ଗୋଦାବରୀଶ ମହାବିଦ୍ୟାଳୟର ରୋଭର ଓ ରେଞ୍ଜର ମାନଙ୍କ ଦ୍ୱାରା ପୋଷ୍ୟଗ୍ରାମ୍ୟ ବେଙ୍ଗରାଜ ପଲ୍ଲୀରେ ଅଧ୍ୟକ୍ଷ ବିନାୟକ ହୋତା, ରୋଭର ଲିଡର ଆଦିତ୍ୟ ସାରଥୀ ବେଦମତ୍ତା, ରେଞ୍ଜର ଲିଡର ଉତ୍କଳିକା ପାଢ଼ୀ, ପୂର୍ବତନ କ୍ରୀଡା ଶିକ୍ଷକ ବୈରାଗୀ ଚରଣ ବଳ, ସମାଜ ସେବୀ ରବିନାରାୟଣ ପାଲ୍ ଙ୍କ ଉପସ୍ଥିତି ରେ ଏକ “କୁପୋଷଣ ନିରାକରଣ” ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମ ଆରମ୍ଭରେ ଏକକ ଅଭିନୟ, ନୃତ୍ୟ ପରିବେଷଣ ଓ ସଚେତନତା ସଭା ଅନୁଷ୍ଠିତ ହୋଇଥିଲା।

ପରିଶେଷରେ ଅଧ୍ୟକ୍ଷ ଶ୍ରୀ ହୋତା ଗ୍ରାମବାସୀ ମାନଙ୍କୁ ନିଜ ବାଡ଼ିରେ ସଜନା ଛୁଇଁ, ଅମୃତ ଭଣ୍ଡା, ଶାଗ, ପନିପରିବା ଚାଷ କରି ପିଲା ମାନଙ୍କୁ ମାଣ୍ଡିଆ, ଚୂଡା, ଛତୁଆ, ଗଜାମୁଗ, ଗଜାବୁଟ ଖାଇବା ଅଭ୍ୟାସ କରିବା ପାଇଁଁ ପରାମର୍ଶ ଦେଇଥିଲେ।

ଶ୍ରୀଯୁକ୍ତ ବଳ ସୁଷମ ଖାଦ୍ୟ ଓ କ୍ରୀଡ଼ାର ଆବଶ୍ୟକତା ବିଷୟରେ ସୂଚନା ଦେଇଥିଲେ। ଶ୍ରୀଯୁକ୍ତ ପାଲ୍ ପିଲାମାନଙ୍କୁ ଅଣ୍ଡା, କଦଳୀ ଓ ବିସ୍କୁଟ ବିତରଣ କରିଥିଲେ। ଶ୍ରୀଯୁକ୍ତ ବେଦମତ୍ତା ପୋଷଣ ଖାଦ୍ୟ ର ଆବଶ୍ୟକତା ବିଷୟରେ ମନ୍ତବ୍ୟ ରଖିଥିଲେ।

ଏହି କାର୍ଯ୍ୟକ୍ରମରେ ପ୍ରାୟ ୬୦ ରୁ ଉର୍ଦ୍ଧ୍ବ ଗ୍ରାମବାସୀ ଯୋଗ ଦେଇଥିଲେ। ଏହି କାର୍ଯ୍ୟକ୍ରମକୁ ରୋଭର ତୁଷାର କାନ୍ତ ମଲ୍ଲିକ, ରେଞ୍ଜର ଚିନ୍ମୟୀ ମିଶ୍ର, ରୋଭର ସଂଗ୍ରାମ କେଶରୀ ପ୍ରଧାନ, ରୋଭର ଆକାଶ ବେହେରା, ରେଞ୍ଜର ମୋନାଲିସା ବେହେରା ଓ ରେଞ୍ଜର ଗାୟତ୍ରୀ ସାହୁ ପରିଚାଳନା କରିଥିଲେ।

ପୁରାତନ ରୋଭର ମିଥୁନ, ସୁନିଲ୍, ସାଇପ୍ରସାଦ ଓ ସଞ୍ଜିତ ଯୋଗ ଦେଇଥିଲେ। ରେଞ୍ଜର ଲିଡର ସୁଶ୍ରୀ ପାଢ଼ୀ ଧନ୍ୟବାଦ ପ୍ରଦାନ କରିଥିଲେ।

ବାଣପୁର (ସୀତାରାମ ଅଗ୍ରୱାଲ): ଗୋଷ୍ଠୀ ଶିକ୍ଷା କାର୍ଯ୍ୟାଳୟ, ବାଣପୁର ଆନୁକୂଲ୍ୟରେ ବାଣପୁର ପଞ୍ଚାୟତ ସମିତି ସମ୍ମିଳନୀ କକ୍ଷଠାରେ ମଣ୍ଡଳସ୍ତରୀୟ ନିପୁଣ ଓଡ଼ିଶା କାର୍ଯ୍ୟକ୍ରମର ଶୁଭାରମ୍ଭ ଗୁରୁବାର ଦିନ ହୋଇଯାଇଛି। ଗୋଷ୍ଠୀ ଶିକ୍ଷା ଅଧିକାରିଣୀ ସି.ଏଚ୍. ବିଜୟଲକ୍ଷ୍ମୀଙ୍କ ଆବାହକତ୍ୱରେ ମୁଖ୍ୟ ଅତିଥିଭାବେ ବାଣପୁର ପଞ୍ଚାୟତ ସମିତି ଅଧ୍ୟକ୍ଷ ଅମରେନ୍ଦ୍ର ରଣସିଂହ ଏହାକୁ ଉଦ୍‌ଘାଟନ କରିଥିଲେ।

ମୁଖ୍ୟବକ୍ତା ଭାବେ ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ, ଖୋର୍ଦ୍ଧାର ବରିଷ୍ଠ ଶିକ୍ଷକ ପ୍ରଶିକ୍ଷକ ମହେଶ କୁମାର ବେହେରା ଯୋଗ ଦେଇ ମୌଳିକ ସ୍ତରରେ ପିଲାମାନଙ୍କର ମୌଳିକ ସାକ୍ଷରତା ଓ ସଂଖ୍ୟା ଜ୍ଞାନ ସମ୍ବନ୍ଧୀୟ ସମସ୍ତ ଦକ୍ଷତା ଓ କୌଶଳ ହାସଲ ନିମନ୍ତେ ପିତାମାତା, ଶିକ୍ଷକ ଶିକ୍ଷୟିତ୍ରୀ, ଗୋଷ୍ଠୀ ଓ ଜନପ୍ରତିନିଧିମାନଙ୍କର ମିଳିତ ସହଯୋଗର ଆବଶ୍ୟକତା ରହିଛି ବୋଲି ମତବ୍ୟକ୍ତ କରିଥିଲେ।

ସମ୍ମାନୀତ ଅତିଥି ଖୋର୍ଦ୍ଧା ଜିଲ୍ଲା ପରିଷଦର ଉପାଧ୍ୟକ୍ଷ ଗୋପିନାଥ ମହାରଣା ଓ ବାଣପୁର ବିଜ୍ଞାପିତ ଅଞ୍ଚଳ ପରିଷଦର ଅଧ୍ୟକ୍ଷ ମୌଳିକ ସାକ୍ଷରତା ଓ ସଂଖ୍ୟାଜ୍ଞାନର ଦକ୍ଷତାଗୁଡ଼ିକୁ ହାସଲ କରିବା ନିମନ୍ତେ ସମସ୍ତେ ଯତ୍ନବାନ ହେବାକୁ ମତାମତ ଦେଇଥିଲେ। ଉପସ୍ତିତ ବାଣପୁରର ୧୭ ଗ୍ରାମ ପଞ୍ଚାୟତର ସରପଞ୍ଚ ମାନେ ନିପୁଣ ଓଡ଼ିଶା କାର୍ଯ୍ୟକ୍ରମକୁ ବ୍ୟବସ୍ଥିତ ଢଙ୍ଗରେ ଆଗେଇ ନେଇ ସଫଳ କରିବାକୁ ଦୃଢ ପ୍ରତିଶୃତି ଦେଇଥିଲେ। ଏହି କାର୍ଯ୍ୟକ୍ରମକୁ ତୃଣମୂଳ ସ୍ତରରେ ସଫଳ କରିବାକୁ ଶିକ୍ଷକ, ଅଭିଭାବକ, ଜନପ୍ରତିନିଧି ,ସାମ୍ବାଦିକ , ପ୍ରଶାସନ ଓ ଶିକ୍ଷା ବିଭାଗର ଅଧିକାରୀ ମାନଙ୍କର ସହଭାଗୀତାର ଆବଶ୍ୟକତା ରହିଛି।

ବିଦ୍ୟାଳୟସ୍ତରରେ ନିପୁଣ ଓଡ଼ିଶା କାର୍ଯ୍ୟକ୍ରମକୁ କାର୍ଯ୍ୟକାରି ଓ ସଫଳ କରିବାପାଇଁ ଉପସ୍ଥିତ ଅଂଶଗ୍ରହଣକାରୀ ମାନେ ଶପଥ ପାଠ କରିଥିଲେ। ଏହି ପରିପ୍ରେକ୍ଷୀରେ ସମସ୍ତ ଅତିଥିମାନଙ୍କ ଦ୍ଵାରା ନିପୁଣ ଓଡ଼ିଶା ଲୋଗୋ ଉନ୍ମୋଚିତ ହୋଇଥିଲା। ଅନ୍ୟମାନଙ୍କ ମଧ୍ୟରେ ବାଣପୁର ବ୍ଳକ ଏ.ବି.ଡି. ଓ , ସି.ଡ଼ି.ପି.ଓ. , ସମସ୍ତ ସି.ଆର୍.ସି.ସି., ପ୍ରଧାନଶିକ୍ଷକ, ପ୍ରଧାନଶିକ୍ଷୟିତ୍ରୀ ଓ ଶିକ୍ଷକ ଉପସ୍ଥିତ ଥିଲେ। ଶେଷରେ ମଣ୍ଡଳ ସାଧନ କେନ୍ଦ୍ର ସଂଯୋଜକ ପ୍ରଭାତ କୁମାର ସେଠି ଧନ୍ୟବାଦ ଅର୍ପଣ କରିଥିଲେ।