ସୀତାରାମ ଅଗ୍ରଓ୍ବାଲ
ଚିଲିକା: ଦୀର୍ଘବର୍ଷର ସ୍ବପ୍ନ ପୂରଣ ହୋଇଛି ହେଲେ ତାହା ଅଧପନ୍ତରିଆ। ଏଠି ଆମେ କହୁଛୁ ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଲୁଗାଁ-ବାଣପୁର ରେଳବାଇ ଓଭରବ୍ରିଜ ବିଷୟରେ। ଅଗଣିତ ଆନ୍ଦୋଳନ ଏବଂ ଦାବି ପରେ ବାଣପୁର ଏବଂ ବାଲୁଗାଁକୁ ସଂଯୋଗ କରୁଥୁବା ମୁଖ୍ୟ ରାସ୍ତା ମଧ୍ୟରେ ଥିବା ବାଲୁଗାଁ ରେଳ ଷ୍ଟେସନର ରେଲୱେ ଲେବେଲ କ୍ରସିଂ ଗେଟ ଉପର ଦେଇ ଏକ ଓଭରବ୍ରିଜ ନିର୍ମାଣ ପ୍ରକଳ୍ପ ରାଜ୍ୟ ପୂର୍ତ୍ତବିଭାଗ ତରଫରୁ ଅନୁମୋଦନ ହେଇଥିଲା। ଏହି ପ୍ରକଳ୍ପର ଶୁଭ ଦେଇଥିଲେ ଓଡ଼ିଶାର ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଏବଂ ତତ୍କାଳୀନ ଚିଲିକା ବିଜେଡି ବିଧାୟକ ଶ୍ରୀ ରଘୁନାଥ ସାହୁ।
ସେହିଦିନ ଚିଲିକା ନିର୍ବାଚନମଣ୍ଡଳୀ ବାସୀଙ୍କର ଖୁସିର ସୀମା ନଥିଲା କାରଣ ବାଲୁଗାଁ ରେଳ ଫାଟକ ଖୋର୍ଦ୍ଧା ରେଳ ଡିଭିଜନର ସବୁଠାରୁ ବ୍ୟସ୍ତ ଫାଟକ ମଧ୍ୟରୁ ଅନ୍ୟତମ। ଏଠାରେ ପ୍ରତି ଦଶ ମିନିଟରେ ଥରେ ଉଭୟ ଯାତ୍ରୀବାହୀ ଓ ମାଲବାହୀ ରେଳ ଅତିକ୍ରମ କରେ। ଏହାଦ୍ୱାରା ଜନସାଧାରଣ ମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିଲେ। ଏପରିକି ଆମ୍ବୁଲାନ୍ସ ଏବଂ ଅଗ୍ନିଶମ ଗାଡି ମଧ୍ୟ ବହୁ ସମୟ ଧରି ଅଟକି ରହୁଥିଲା। ଏହି ଅସୁବିଧାକୁ ଦୃଷ୍ଟିରେ ରଖି ଏଠାରେ ଏକ ଓଭରବ୍ରିଜ୍ କରାଯିବାର ନିଷ୍ପତ୍ତି ନିଆଯାଇଥିଲା। କିନ୍ତୁ ଏହି ଓଭରବ୍ରିଜ୍ର ଶୁଭ ଦେବା ପରଦିନଠାରୁ ଅଞ୍ଚଳବାସୀ ଉତ୍କଣ୍ଠାର ସହ ଚାହିଁ ବସିଥିଲେ କେବେ ଓଭରବ୍ରିଜ କାର୍ଯ୍ୟ ସମ୍ପୂର୍ଣ ହେବ। ଇତି ମଧ୍ୟରେ ୨୦୧୪ ସାଧାରଣ ନିର୍ବାଚନରେ ପୁଣି ଚିଲିକା ବିଧାନସଭାର ମଙ୍ଗ ଧରିଲେ ବିଜେପି ବିଧାୟକ ଡ଼ଃ ବିଭୁତି ଭୂଷଣ ହରିଚନ୍ଦନ। ତାଙ୍କର ୫ ବର୍ଷର କାର୍ଯ୍ୟକାଳ ମଧ୍ୟରେ ମଧ୍ୟ ବ୍ରିଜ୍ କାମ ସମ୍ପୂର୍ଣ୍ଣ ହୋଇପାରିନଥିଲା।
ପରିଶେଷରେ ୨୦୧୯ ସାଧାରଣ ନିର୍ବାଚନରେ ଚିଲିକା ବିଧାନସଭା ଆସନରୁ ବିଜୟୀ ହୋଇଥିବା ବିଜେଡି ବିଧାୟକ ଶ୍ରୀ ପ୍ରଶାନ୍ତ ଜଗଦ୍ଦେବଙ୍କ ଉଦ୍ୟମରେ ଉକ୍ତ ଓଭରବ୍ରିଜର ବଳକା କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଶେଷ ହେଲା। ମାନ୍ୟବର ବିଧାୟକ ଗତ ଜାନୁଆରୀ ୨୬ ତାରିଖ ଦିନ ଉକ୍ତ ଓଭରବ୍ରିଜ ଉପରେ ଜାତୀୟ ପତାକା ଉତ୍ତୋଳନ କରିବା ପରେ ଏହାକୁ ପୂର୍ତ୍ତବିଭାଗ ଦ୍ୱାରା ସର୍ବସାଧାରଣଙ୍କ ଉଦ୍ଦେଶ୍ୟରେ କାର୍ଯ୍ୟକ୍ଷମ କରାଯାଇଥିଲା। ନିୟମ ଅନୁଯାୟୀ କୌଣସି ନୂଆ ଓଭରବ୍ରିଜ ଜନସାଧାରଣଙ୍କ ଉଦ୍ଦେଶ୍ୟରେ ସେତେବେଳେ ଲୋକାର୍ପିତ ହୋଇଥାଏ ଯେତେବେଳେ ଏହାର ଆନୁସଙ୍ଗିକ କାର୍ଯ୍ୟ ସମ୍ପୂର୍ଣ୍ଣ ରୂପେ ସମାପ୍ତ ହୋଇଥାଏ। କିନ୍ତୁ ବାଣପୁର-ବାଲୁଗାଁରେ ଏହାର ବିପରୀତ ହେଲା। ବିଧାୟକଙ୍କ ପତାକା ଉତ୍ତୋଳନ ପରେ ତାଙ୍କ ପ୍ରତିଶୃତିର ଟେକ ରଖିବା ପାଇଁ ତରବରିଆ ଭାବେ ପୂର୍ତ୍ତବିଭାଗ ଏହାକୁ କାର୍ଯ୍ୟକ୍ଷମ କରିଦେଲା ସତ କିନ୍ତୁ ବ୍ରିଜ୍ଟି ଅଧପନ୍ତରିଆ ଅବସ୍ଥାରେ ରହିଗଲା।
ଏହି ବ୍ରିଜ୍ର ଉଭୟ ପାର୍ଶ୍ୱରେ ରାସ୍ତା କାମ ସମାପ୍ତ ହୋଇନଥିଲା। ବ୍ରିଜର ଉଭୟ ଶ୍ଲୋପ ଅଞ୍ଚଳରେ ମାଟି ପଡ଼ିନଥିଲା। ଉଭୟ ପାର୍ଶ୍ୱରେ ସୁରକ୍ଷା ପ୍ରାଚୀର ଠିକ ଭାବରେ ହୋଇନଥିଲା, ଚିହ୍ନଟ ପାର୍ଶ୍ୱ ଅଂଶରେ ରଙ୍ଗ ଦିଆଯାଇନଥିଲା ଏବଂ ଆଲୋକୀକରଣ କରାଯାଇନଥିଲା। ମଝିରେ ଉକ୍ତ ବ୍ରିଜକୁ କିଛି ଦିନ ବନ୍ଦ କରାଯାଇଛି ଉଭୟ ଶ୍ଲୋପ ଅଞ୍ଚଳରେ ମାଟି ପକାଯାଇ କଂକ୍ରିଟ କରାଗଲା ଏବଂ ଛଅ ମାସ ମଧ୍ୟରେ ଅନ୍ୟାନ ଆନୁସଙ୍ଗିକ କାର୍ଯ୍ୟ ସବୁ ଶେଷ କରାଗଲା। ହେଲେ ବିଡମ୍ବନାର ବିଷୟ ହେଉଛି ବ୍ରିଜ କାର୍ଯ୍ୟକ୍ଷମର ଆଠ ମାସ ବିତିଗଲାଣି କିନ୍ତୁ ଏହି ବ୍ରିଜ ଉପର ର ଉଭୟ ପାର୍ଶ୍ୱରେ ଆଲୋକୀକରଣ ବ୍ୟବସ୍ଥା ଆଜି ଯାଏଁ ହୋଇପାରିଲା ନାହିଁ। ପାଖାପାଖି ୫୦୦ ମିଟର ଲମ୍ବା ବିଶିଷ୍ଟ ଏହି ଓଭରବ୍ରିଜ ଉପରେ ଗୋଟେ ବିଦ୍ୟୁତ ଖୁଣ୍ଟଟିଏ ମଧ୍ୟ ଆଜି ପର୍ଯ୍ୟନ୍ତ ଲାଗିନାହିଁ ଫଳରେ ସନ୍ଧ୍ୟା ହେଲେ ଯାତ୍ରୀ ମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ଏପରିକି ଛୋଟ ମୋଟ ଦୁର୍ଘଟଣା ମଧ୍ୟ ଘଟୁଛି।
କରୋନା ଲାଗି ସମଗ୍ର ଅଂଚଳ ଲକ ଡ଼ାଉନ ରେ ଥିବାବେଳେ ଗତ ଦୁଇ ମାସ ହେଲା ଅନଲକ ପ୍ରକ୍ରିୟାରେ ଧୀରେ ଧୀରେ ଅଞ୍ଚଳର ଦୋକାନ ବଜାର ଖୋଲିବା ସହ ସମୟ କଟକଣା କମୁଛି ଏବଂ ବର୍ତ୍ତମାନ କଟକଣା ସମ୍ପୂର୍ଣ ଉଠିଯାଇଛି। ବିଗତ ଆଠ ମାସ ମଧ୍ୟରେ ପୂର୍ତ୍ତବିଭାଗ କିମ୍ବା ଏନ.ଏ.ସି କାହାର ବି ଏ ଦିଗରେ ଦୃଷ୍ଟି ନପଡିବା ସାଧାରଣରେ ଚର୍ଚ୍ଚାର ବିଷୟ ପାଲଟିଛି। ପ୍ରତିଦିନ ସନ୍ଧ୍ୟାରେ ଶହ ଶହ ଲୋକ ସାଇକେଲ, ଗାଡିମଟରରେ ଉକ୍ତ ଓଭରବ୍ରିଜ ଦେଇ ଯିବାଆସିବା କରନ୍ତି କିନ୍ତୁ ଏହା ସମ୍ପୂର୍ଣ ଅନ୍ଧକାର ହୋଇଥିବାରୁ ଚୋରି, ଡକାୟତି, ଦୁର୍ଘଟଣା ତଥା ମଦ୍ୟପ ମାନଙ୍କ ଆଡ୍ଡା ଦିନକୁ ଦିନ ଏଠି ବୃଦ୍ଧି ପାଉଛି। ଏ ନେଇ ପୂର୍ତ୍ତବିଭାଗ, ଖୋର୍ଦ୍ଧା ନିର୍ବାହୀ ଅଧିକାରୀ ଶ୍ରୀ ଦୀପକ ପାଣିଗ୍ରାହୀଙ୍କୁ ଯୋଗାଯୋଗ କରିବାରୁ ଓଭରବ୍ରିଜରେ ବିଦ୍ୟୁତିକରଣ କରିବା କାର୍ଯ୍ୟ ଏନ.ଏ.ସି ର ବୋଲି ସେ କହିଥିଲେ ଏବଂ ଏ ବିଷୟରେ ଯଥାଶୀଘ୍ର ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଏବଂ ସ୍ଥାନୀୟ ବିଧାୟକଙ୍କ ସହ ଆଲୋଚନା କରାଯାଇ ଓଭରବ୍ରିଜର ଦୁଇ ପାର୍ଶ୍ଵରେ ପୂର୍ତ୍ତବିଭାଗ କିମ୍ବା ଏନ.ଏ.ସି ଦ୍ୱାରା ଷ୍ଟ୍ରିଟ ଲାଇଟ ନିଶ୍ଚିତ ଭାବେ କାର୍ଯ୍ୟକ୍ଷମ କରାଯିବ ବୋଲି ସୂଚନା ଦେଇଥିଲେ। ଅପରପକ୍ଷରେ ଏବିଷୟକୁ ନେଇ ବାଲୁଗାଁ ଏନଏସି କାର୍ଯ୍ୟନିର୍ବାହୀ ଅଧିକାରୀ ଆକୃତି ଗୋଏଙ୍କାଙ୍କୁ ପଚାରିବାରୁ ଉକ୍ତ ବ୍ରିଜ୍ଟି କାହା ଅଧୀନରେ ଯାଉଛି, ତାହା ତର୍ଜମା କରି ଉପଯୁକ୍ତ ପଦକ୍ଷେପ ନିଆଯିବ ବୋଲି କହିଥିଲେ।
ତେବେ ଏହି ବ୍ରିଜ୍ର ଆଲୋକୀକରଣ କାର୍ଯ୍ୟରେ ବିଳମ୍ବତାକୁ ନେଇ ବିଧାୟକଙ୍କୁ ଯୋଗାଯୋଗ କରାଯାଉଥିଲେ ମଧ୍ୟ ବିଧାୟକ ଏହାର ଉତ୍ତର କିଛି ଦେଉନାହାନ୍ତି। ତେବେ ବ୍ରିଜ୍ରେ ଲୋକଙ୍କ ଆତଯାତ ହେଉଥିବାବେଳେ ସାମାନ୍ୟ ଆଲୋକୀକରଣ କାର୍ଯ୍ୟରେ ଏତେ ବିଳମ୍ବତାକୁ ନେଇ ସାଧାରଣରେ ଅସନ୍ତୋଷ ବୃଦ୍ଧି ପାଇଛି। ଦେଖାଯାଉ ବାଣପୁର-ବାଲୁଗାଁ ଓଭରବ୍ରିଜ ଉପରେ ଷ୍ଟ୍ରିଟ ଲାଇଟ କେବେ ଲାଗୁଛି। ଦୁଇ ଗୋଟି ବିଭାଗର ଅବହେଳାରେ ବାଣପୁର-ବାଲୁଗାଁ ଅଞ୍ଚଳର ନିରୀହ ଜନସାଧାରଣ ବଳି ନପଡ଼ନ୍ତୁ ବୋଲି ବୁଦ୍ଧିଜୀବୀମାନେ ମତ ପ୍ରକାଶ କରିଛନ୍ତି।
