The Samikhsya Odia
ପାଟନା: ବିହାର ସରକାରଙ୍କ ପଶୁପାଳନ ମନ୍ତ୍ରୀ ତଥା ବିକାଶଶୀଳ ଇଂସାନ ପାର୍ଟିର ପ୍ରତିଷ୍ଠାତା ମୁକେଶ ସାହନି ଏକ ବଡ଼ ଅସୁବିଧାର ସମ୍ମୁଖୀନ ହୋଇଛନ୍ତି। ସମସ୍ତ ତିନିଜଣ ଭିଆଇପି ବିଧାୟକ ବିଜେପିରେ ଯୋଗ ଦେଇଛନ୍ତି। ବିଧାନସଭାର ବାଚସ୍ପତିଙ୍କୁ ଭେଟିବା ପରେ ବିଜେପିରେ ଯୋଗଦେବା ପାଇଁ ସୂଚନା ଦିଆଯାଇଛି। ଦଳର ଏହି ତିନି ବିଧାୟକ ରାଜୁ ସିଂ, ମିଶ୍ରୀଲାଲ ଏବଂ ସ୍ୱର୍ଣ୍ଣା ସିଂ ବିଜେପିରେ ଯୋଗ ଦେଇଛନ୍ତି। ବିଧାନସଭା ବାଚସ୍ପତି ବିଜୟ କୁମାର ସିହ୍ନା ଏହି ତିନିଜଣ ବିଧାୟକଙ୍କୁ ସ୍ୱୀକୃତି ପ୍ରଦାନ କରିଛନ୍ତି।
ସୀତାରାମ ଅଗ୍ରୱାଲ
ଚିଲିକା: ସମଗ୍ର ରାଜ୍ୟରେ ପୌର ନିର୍ବାଚନ ଆସନ୍ତା ୨୪ ତାରିଖରେ ଅନୁଷ୍ଠିତ ହେବାକୁ ଥିବା ବେଳେ ଆସନ୍ତାକାଲି ପ୍ରଚାରର ଶେଷ ଦିବସ। ଏହି ପରିପ୍ରେକ୍ଷୀରେ ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ଏବଂ ବାଲୁଗାଁ ଏନଏସି ଚଳଚଞ୍ଚଳ ହୋଇଉଠିଛି। ଉଭୟ ଏନଏସି ରେ ବିଜେଡି ଓ ବିଜେପି ମଧ୍ୟରେ କଡ଼ା ଟକ୍କର ହେବ ବୋଲି ଅନୁମେୟ ହେଉଛି। ତେବେ ଆଜି ବିଜେପି ପକ୍ଷରୁ ଉଭୟ ସହରରେ ମେଗା ରୋଡ଼ ଶୋ’ ଅନୁଷ୍ଠିତ ହୋଇଯାଇଛି।
ପୂର୍ବାହ୍ନରେ ନଗରମଣ୍ଡଳ ସଭାପତି ନିରଞ୍ଜନ ସେଠୀଙ୍କ ନେତୃତ୍ୱରେ ଏକ ବିଶାଳ ବାଇକ ରାଲି ବାଲୁଗାଁ ସହରସ୍ଥିତ ମା’ ଉତ୍ତରାୟଣୀ ମନ୍ଦିରରୁ ବାହାରି ବିଭିନ୍ନ ୱାର୍ଡ ପରିକ୍ରମା କରିଛି। ପଦ୍ମ ଫୁଲ ଚିହ୍ନରେ ଭୋଟ ଦେଇ ବିଜେପି ଅଧ୍ୟକ୍ଷା ପ୍ରାର୍ଥୀନୀ ସ୍ୱପ୍ନା ବଡ଼ଜେନା ଏବଂ ସମସ୍ତ ବିଜେପି କାଉନସିଲର ପ୍ରାର୍ଥୀଙ୍କୁ ବିପୁଳ ସଂଖ୍ୟାରେ ଭୋଟଦେଇ ବିଜୟୀ କରାଇବାକୁ ଉକ୍ତ ରାଲିରେ ନିବେଦନ କରାଯାଇଛି।
ଶୋଭାଯାତ୍ରାରେ ବିଜେପି ରାଜ୍ୟ ସାଧାରଣ ସମ୍ପାଦକ ପୃଥ୍ଵୀରାଜ ହରିଚନ୍ଦନ ଯୋଗଦେଇ ପଥପ୍ରାନ୍ତ ସଭା ମାଧ୍ୟମରେ ଏନଏସି ଅଞ୍ଚଳର ସମସ୍ତ ଦିଗରେ ବିକାଶକୁ ନେଇ ପ୍ରତିଶୃତି ଦେଇଥିଲେ।
ଅନୁରୂପ ଭାବେ ଅପରାହ୍ନରେ ବାଣପୁର ଏନଏସିରେ ମଣ୍ଡଳ ସଭାପତି ଭଗବାନ ପ୍ରଧାନଙ୍କ ନେତୃତ୍ୱରେ ବିଜେପି ଏକ ମେଗା ବାଇକ ରାଲି ବିଷରପାଟଣା ଠାରୁ ବାହାରି ସହରର ସମସ୍ତ ୱାର୍ଡ ପରିକ୍ରମା କରିଥିଲା। ଉକ୍ତ ରାଲିରେ ପୃଥ୍ଵୀରାଜ ହରିଚନ୍ଦନଙ୍କ ସମେତ ଓଡ଼ିଆ ଚଳଚ୍ଚିତ୍ର ଅଭିନେତ୍ରୀ ପିଙ୍କି ପ୍ରଧାନ ଯୋଗଦେଇଥିଲେ। ଏହି ଶୋଭାଯାତ୍ରାରେ ବିଜେପିର ଅଧ୍ୟକ୍ଷ ପ୍ରାର୍ଥୀ ନନ୍ଦ କିଶୋର ମିଶ୍ର ଏବଂ ସମସ୍ତ ବିଜେପି କାଉନସିଲର ପ୍ରାର୍ଥୀଙ୍କୁ ବିପୁଳ ସଂଖ୍ୟାରେ ଭୋଟଦେଇ ବିଜୟୀ କରାଇବାକୁ ନିବେଦନ କରାଯାଇଥିଲା।
ତେବେ ନିକଟରେ ବାଣପୁର ଓ ଚିଲିକା ବ୍ଲକ ଅଧ୍ୟକ୍ଷ ପଦ ହାତେଇବା ପରେ ବିଜେପି ଉଭୟ ବାଣପୁର ଓ ବାଲୁଗାଁ ଏନଏସି ଅଧ୍ୟକ୍ଷ ପଦ ହାତେଇବା ପାଇଁ ଆପ୍ରାଣ ଉଦ୍ୟମ ଜାରି ରଖିଥିବାର ଦେଖିବାକୁ ମିଳିଛି।
ନୂଆଦିଲ୍ଲୀ: ପଞ୍ଜାବରେ ବିଜୟ ପରେ ଆମ୍ ଆଦମୀ ପାର୍ଟି ଗୁଜୁରାଟ ନିର୍ବାଚନ ଉପରେ ନଜର ରଖିଛି। ଏହା ବ୍ୟତୀତ ଅରବିନ୍ଦ କେଜ୍ରିୱାଲଙ୍କ ନେତୃତ୍ୱାଧୀନ ଦଳ ମଧ୍ୟ ଆସନ୍ତା ବର୍ଷ ଛତିଶଗଡର ଆଦିବାସୀ ପ୍ରାଧାନ୍ୟ ରାଜ୍ୟରେ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବାକୁ ନିଷ୍ପତ୍ତି ନେଇଛି। ଅନ୍ୟପକ୍ଷରେ ପଞ୍ଜାବର ମନ ସରକାର କ୍ୟାବିନେଟ ଗଠନ ନେଇ କାର୍ଯ୍ୟାକ୍ରମ ଆରମ୍ଭ କରିଛନ୍ତି। ସେ ୨୫ ହଜାର ଚାକିରୀ ପାଇଁ ରାସ୍ତା ସଫା କରିବା ସହ ଅନେକ ନିଷ୍ପତ୍ତି ନେବା ଆରମ୍ଭ କରିଛନ୍ତି।
ଏହି ସମୟରେ ଆଜି ଦିଲ୍ଲୀର ମୁଖ୍ୟମନ୍ତ୍ରୀ ତଥା ଆମ୍ ଆଦମୀ ପାର୍ଟିର ସଂଯୋଜକ ଅରବିନ୍ଦ କେଜ୍ରିୱାଲ ପଞ୍ଜାବର ବିଧାୟକଙ୍କ ସହ ଏକ ଭର୍ଚୁଆଲ୍ ବୈଠକ କରିଛନ୍ତି। ଏହି ବୈଠକରେ ପଞ୍ଜାବର ମୁଖ୍ୟମନ୍ତ୍ରୀ ଭଗବନ୍ତ ମନ ଏବଂ ଏଏପି ନେତା ରାଘବ ଚଢା ମଧ୍ୟ ଉପସ୍ଥିତ ଥିଲେ। ବୈଠକ ସମୟରେ ମନଙ୍କ କାର୍ଯ୍ୟକୁ କେଜ୍ରିୱାଲ ପ୍ରଶଂସା କରି କହିଥିଲେ ଯେ, ‘ଭଗବନ୍ତ ମନ ୧୬ ତାରିଖ ଦିନ ଶପଥ ନେଇଥିଲେ, ୩ ଦିନ ମଧ୍ୟରେ ଲୋକଙ୍କ ପାଇଁ କାମ କରି ଦେଖାଇଦେଲେ। ପୂର୍ବତନ ମନ୍ତ୍ରୀଙ୍କ ସୁରକ୍ଷା ହଟାଇ ଏହାକୁ ଜନସାଧାରଣଙ୍କ ନିକଟରେ ଉପଲବ୍ଧ କରାଗଲା। ଅକ୍ଟୋବରରେ ଫସଲ ନଷ୍ଟ ହୋଇଥିଲା, ଚାଷୀଙ୍କ ଜିଲ୍ଲାରେ କ୍ଷତିପୂରଣ ପହଞ୍ଚିଲା। ୩-୪ ଦିନ ମଧ୍ୟରେ କୃଷକମାନେ ସେମାନଙ୍କର ଚେକ୍ ପାଇବେ।
ଦୁର୍ନୀତି ନିବାରଣ ହେଲ୍ପଲାଇନ ପଞ୍ଜାବରେ ଆରମ୍ଭ ହୋଇଥିଲା
ଏକ ଭର୍ଚୁଆଲ୍ ମିଟିଂରେ AAP ବିଧାୟକଙ୍କ ସହ କଥାବାର୍ତ୍ତା କରି ଅରବିନ୍ଦ କେଜ୍ରିୱାଲ କହିଛନ୍ତି ଯେ, ପଞ୍ଜାବରେ ଦୁର୍ନୀତି ନିବାରଣ ହେଲ୍ପଲାଇନ ଆରମ୍ଭ ହୋଇଛି। ୨୫ ହଜାର ଚାକିରି ଘୋଷଣା କରାଯାଇଛି, ଆମଠାରୁ ଲୋକଙ୍କ ଆଶା ବର୍ତ୍ତମାନ ବିଶ୍ୱାସରେ ପରିଣତ ହେଉଛି।
ଏହି ବୈଠକରେ ବିଜେପିକୁ ଟାର୍ଗେଟ କରିବାବେଳେ ସେ କହିଛନ୍ତି ଯେ, ଗୋଟିଏ ପଟେ ଭଗବନ୍ତ ମନ ଶପଥ ଗ୍ରହଣ କରିଛନ୍ତି ଏବଂ ଅନ୍ୟପଟେ ୪ ଟି ରାଜ୍ୟରେ ଜିତିଥିବା ବିଜେପି ମଧ୍ୟ ସରକାର ଗଠନ କରିପାରି ନାହିଁ। ବର୍ତ୍ତମାନ ସେମାନଙ୍କର ବିବାଦ ଲାଗିରହିଛି।
ପାଣାଜୀ: ଗୋଆରେ ବିଜେପି ସରକାର ଗଠନରେ ବିଳମ୍ବକୁ ନେଇ କଂଗ୍ରେସ ପ୍ରଶ୍ନ ଉଠାଇଛି। ଗୋଆ କଂଗ୍ରେସର ବରିଷ୍ଠ ନେତା ଦିଗମ୍ବର କାମାତ୍ ପଚାରିଛନ୍ତି ଯେ, ସ୍ଵାଧୀନ ବିଧାୟକ ଏବଂ ମହାରାଷ୍ଟ୍ରବାଦୀ ଗୋମନ୍ତକ ଦଳର ବିଜେପିର ସମର୍ଥନ ଅଛି କି? କଂଗ୍ରେସ ନେତା କାର୍ଲୋସ ଫରେରା କହିଛନ୍ତି ଯେ, ଯଦି ଏକକ ବୃହତ ଦଳ ସରକାର ଗଠନ କରିବାରେ ଅସମର୍ଥ, ତେବେ ଦ୍ୱିତୀୟ ଦଳକୁ ସରକାର ଗଠନ କରିବାର ସୁଯୋଗ ଦିଆଯିବା ଉଚିତ।
ଦିଗମ୍ବର କାମାତ୍ କହିଛନ୍ତି ଯେ, ମୁଖ୍ୟମନ୍ତ୍ରୀଙ୍କ ନାମରେ ସହମତି ଅଭାବରୁ କିମ୍ବା ଅନ୍ୟ ସ୍ଵାଧୀନ ବିଧାୟକ ତଥା ବିଜେପି ବିଧାୟକଙ୍କ ସମର୍ଥନ ନ ଥିବାରୁ ବିଜେପିରେ ଆଭ୍ୟନ୍ତରୀଣ କଳହ ଲାଗିଥିବାର ଦେଖାଯାଉଛି, ଯେଉଁଥିପାଇଁ ସରକାରୀ ଗଠନ ବିଳମ୍ବ ହେଉଛି।
ଯେତେବେଳେ ଦିଗମ୍ବର କାମାତ୍ଙ୍କୁ ଏହି ପ୍ରଶ୍ନ ପଚରାଗଲା ଯେ ଯଦି ସୁଯୋଗ ଦିଆଯାଏ, ତେବେ କଂଗ୍ରେସ ସରକାର ଗଠନ କରିପାରିବ କି? କଂଗ୍ରେସର ଅନ୍ୟ ଦଳର ସ୍ୱାଧୀନ ବିଧାୟକଙ୍କ ସହ ଆଲୋଚନା ହେଉଛି କି? ଗୋଆ ରାଜନୀତିରେ ସବୁକିଛି ସମ୍ଭବ ବୋଲି ସେ କହିଛନ୍ତି ଏବଂ କୌଣସି ସମ୍ଭାବନାକୁ ସେ ଏଡ଼ାଇ ନାହାଁନ୍ତି।
କଂଗ୍ରେସର ଅନ୍ୟ ଜଣେ ନେତା କାର୍ଲୋସ ଫରେରା କହିଛନ୍ତି ଯେ, ରାଜ୍ୟପାଳ ତାଙ୍କ ସାମ୍ବିଧାନିକ ଦାୟିତ୍ଵକୁ ସଠିକ୍ ଭାବରେ ପୂରଣ କରିବାରେ ସକ୍ଷମ ନୁହଁନ୍ତି। ଗୋଆ ଇତିହାସରେ ଏହା କେବେ ହୋଇ ନାହିଁ ଯେ, ସରକାରୀ ଗଠନ ପୂର୍ବରୁ ବିଧାୟକମାନେ ଶପଥ ନେଇଛନ୍ତି। ଏହା ରାଜ୍ୟପାଳଙ୍କ ଦାୟିତ୍ଵ ଅଟେ ଯେ, ଯଦି ଏକକ ବୃହତ ଦଳ ସରକାର ଗଠନ କରିବାରେ ସକ୍ଷମ ନୁହଁନ୍ତି, ତେବେ ଦ୍ୱିତୀୟ ଦଳକୁ ସରକାର ଗଠନ କରିବାର ସୁଯୋଗ ଦିଆଯିବା ଉଚିତ୍।
ଜୟପୁର: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ କଂଗ୍ରେସ ନେତା ଶଶି ଥରୁର ପ୍ରଶଂସା କରିଛନ୍ତି ଏବଂ ଉତ୍ତରପ୍ରଦେଶ ବିଧାନସଭା ନିର୍ବାଚନରେ ବିଜେପିର ବିଜୟ ପାଇଁ ସମସ୍ତ ଶ୍ରେୟ ଦେଇଛନ୍ତି। ଜୟପୁର ସାହିତ୍ୟ ମହୋତ୍ସବରେ ଗଣମାଧ୍ୟମ ସହ କଥାବାର୍ତ୍ତା କରି କଂଗ୍ରେସ ନେତା ଶଶି ଥରୁର ୟୁପି ବିଧାନସଭା ନିର୍ବାଚନର ଫଳାଫଳ ଉପରେ କହିଛନ୍ତି ଯେ, ବିଜେପି ଏତେ ବଡ ବିଜୟ ପାଇବ ବୋଲି ଆମେ କେବେ ଆଶା କରିନଥିଲୁ। ଥରୁର କହିଛନ୍ତି ଯେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଜଣେ ଅତ୍ୟଧିକ ଉତ୍ସାହ ଏବଂ ଗତିଶୀଳ ବ୍ୟକ୍ତି। ତାଙ୍କ ମଧ୍ୟରେ କିଛି ଜିନିଷ ଅଛି ଯାହା ବିଶେଷ ଭାବରେ ରାଜନୈତିକ ସ୍ତରରେ ବହୁତ ପ୍ରଭାବଶାଳୀ।
ଏଥିସହିତ ପ୍ରଧାନମନ୍ତ୍ରୀଙ୍କୁ ପ୍ରଶଂସା କରିବା ପରେ କଂଗ୍ରେସ ନେତା ମଧ୍ୟ ତାଙ୍କୁ ସମାଲୋଚନା କରି କହିଛନ୍ତି ଯେ, ସେ ସମାଜରେ ଏଭଳି ଶକ୍ତିକୁ ଆଣିଛନ୍ତି। ଯାହା ଆମ ଦେଶକୁ ସାମ୍ପ୍ରଦାୟିକ ତଥା ଧାର୍ମିକ ସ୍ତରରେ ବିଭକ୍ତ କରୁଛି। ଏହା ଦୁର୍ଭାଗ୍ୟଜନକ।
ୟୁପି ଏକଜିଟ୍ ପୋଲରେ ବିଜେପିର ବିଜୟ ପୂର୍ବାନୁମାନ କରାଯାଇଥିଲା। ଏକଜିଟ୍ ପୋଲର ଏହି ଆକଳନ ଉପରେ, ଥରୁର କହିଛନ୍ତି ଯେ, “ଏକଜିଟ୍ ପୋଲ୍ ଆସିବା ପର୍ଯ୍ୟନ୍ତ, ମୋ ମନରେ କୌଣସି ପ୍ରଶ୍ନ ନଥିଲା। ଅଧିକାଂଶ ଲୋକ ଏକ କଡା ଲଢେଇର ଆଶା କରୁଥିଲେ। କିଛି ଲୋକ କହୁଥିଲେ ଯେ ସମାଜବାଦୀ ପାର୍ଟି ଆଗରେ ଅଛି।” “ବହୁ ସଂଖ୍ୟାରେ ବିଜେପି କ୍ଷମତାକୁ ଆସିବ ବୋଲି ଅନେକେ ଆଶା କରି ନଥିଲେ। ସମାଜବାଦୀ ପାର୍ଟି (ଏସପି) ର ଆସନ ବୃଦ୍ଧି ପାଇଛି ଏବଂ ତେଣୁ ସେମାନେ ଏକ ଭଲ ବିରୋଧୀ ବୋଲି ପ୍ରମାଣିତ ହେବେ।”
ଭୁବନେଶ୍ବର: ବାଣପୁର ହିଂସାକୁ ନେଇ ବିଜେପି ପକ୍ଷରୁ କଡା ନିନ୍ଦା କରିବା ସହ ବଡ କାର୍ଯ୍ୟାନୁଷ୍ଠାନ ଦାବି କରାଯାଇଛି। ଏହା ସହ ରାଜ୍ୟ ସରକାରକୁ ମଧ୍ୟ ବିଜେପି ସମାଲୋଚନା କରିଛି। ତେବେ ବିଜେପିର ଏହି ସମାଲୋଚନା ପରେ ବିଜେଡ଼ି ପକ୍ଷରୁ ପ୍ରତିକ୍ରିୟା ରଖାଯାଇଛି। ବିଜେଡ଼ି ସାଂସଦ ଡା ସସ୍ମିତ ପାତ୍ର ବିଜେପିର ପ୍ରଶ୍ନ ଉପରେ ଉତ୍ତର ରଖିଛନ୍ତି।
ସେ କହିଛନ୍ତି ଯେ, ବିଜେପିର ଆଜି ଯେଉଁ ପ୍ରେସ ବାର୍ତ୍ତାରେ ଦାବି କରିଛି, ତାହା ଉପରେ ବିଜେଡ଼ି ଗତକାଲି ସ୍ପଷ୍ଟିକରଣ ରଖିଛି। ବିଜେଡ଼ି ପକ୍ଷରୁ ଏହି ଘଟଣାକୁ ତୀବ୍ର ନିନ୍ଦା କରିବା ସହ ଦୋଷୀଙ୍କ ଉପରେ କଡା କାର୍ଯ୍ୟାନୁଷ୍ଠାନ ପାଇଁ ବିଜେଡ଼ି ସ୍ପଷ୍ଟ କରିଛି।
କିନ୍ତୁ ଏହାକୁ ବିଜେପି ରାଜନୀତିକରଣ କରିବାକୁ ପ୍ରୟାସ କରୁଛି। ବିଜେପିର ରାଷ୍ଟ୍ରୀୟ ପ୍ରବକ୍ତା ଡା ସଂବିତ ପାତ୍ର ଏହି ଘଟଣାକୁ ରାଜନୀତିକରଣ ନକରିବାକୁ କହିଥିଲେ ମଧ୍ୟ ଏହାକୁ ନେଇ ରାଜନୀତି କରାଯାଉଛି। ତେଣୁ ବିଜେପିର ଏହା ଦୋହରା ନୀତି ବୋଲି ବିଜେଡ଼ି ସାଂସଦ କହିଛନ୍ତି।
ସେ ଆହୁରି କହିଛନ୍ତି ଯେ, ଗତକାଲି ଏହି ଅଭାବନୀୟ ଘଟଣା ଉପରେ ପୋଲିସ କାର୍ଯ୍ୟାନୁଷ୍ଠାନ ନେଇଛି। ଚିଲିକା ବିଧାୟକ ସୁସ୍ଥ ହେବା ପରେ ତାଙ୍କୁ ଗିରଫ କରାଯିବ ବୋଲି ପୋଲିସ ସ୍ପଷ୍ଟ କରିଛି।
ଉଲ୍ଲେଖ ଯୋଗ୍ୟ ଯେ, ଆଜି ବିଜେପିର ରାଷ୍ଟ୍ରୀୟ ପ୍ରବକ୍ତା ଡା ସଂବିତ ପାତ୍ର ଏକ ସାମ୍ବାଦିକ ସମ୍ମିଳନୀ କରି ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ବର୍ବରତାକୁ ନେଇ ରାଜ୍ୟ ସରକାରଙ୍କୁ ତୀବ୍ର ସମାଲୋଚନା କରିଥିଲେ। ପ୍ରଶାନ୍ତ ଜଗଦ୍ଦବେଙ୍କୁ ଦଳରୁ ବହିଷ୍କାର କରିବା ସହ ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ଲାଗି ସେ ଦାବି କରିଥିଲେ।
ପ୍ରଶାନ୍ତଙ୍କୁ ନିଲମ୍ବନ କରାଯାଇଛି ବୋଲି ଶାସକ ଦଳର ମୁଖପାତ୍ର ସସ୍ମିତ ପାତ୍ର ଗତକାଲି କହିଥିଲେ। ହେଲେ ବାସ୍ତବରେ ତାହା ହୋଇଥିବା ଭଳି ଲାଗୁନଥିଲା। ନିଲମ୍ବନ ସତ୍ତ୍ୱେ ପ୍ରଶାନ୍ତ ଦଳର ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଉଥିଲେ ବୋଲି ସମ୍ବିତ ଅଭିଯୋଗ କରିଥିଲେ।
ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭା ନିର୍ବାଚନରେ ଭାରତୀୟ ଜନତା ପାର୍ଟିର ପ୍ରଭାବଶାଳୀ ପ୍ରଦର୍ଶନ ସତ୍ତ୍ୱେ ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟଙ୍କ ସମେତ ରାଜ୍ୟର ୧୧ ଜଣ ମନ୍ତ୍ରୀ ପରାଜୟର ସମ୍ମୁଖୀନ ହୋଇଛନ୍ତି। ନିର୍ବାଚନ ଆୟୋଗଙ୍କ ଅନୁଯାୟୀ, ବିଜେପି ପ୍ରାର୍ଥୀ କେଶବ ପ୍ରସାଦ ମୌର୍ଯ୍ୟ ସମାଜବାଦୀ ପାର୍ଟି ସମର୍ଥିତ ଡା. ପଲ୍ଲଭି ପଟେଲଙ୍କ ଠାରୁ ୭ ହଜାର ୩୩୭ ଭୋଟରେ ପରାସ୍ତ ହୋଇଛନ୍ତି। ପଲ୍ଲବୀ ପଟେଲ ହେଉଛନ୍ତି ଅପନା ଦଳର ଜାତୀୟ ଉପାଧ୍ୟକ୍ଷ।
ମୌର୍ଯ୍ୟଙ୍କ ବ୍ୟତୀତ ରାଜ୍ୟ ସରକାରଙ୍କ ଆଖୁ ମନ୍ତ୍ରୀ ସୁରେଶ ରାଣା ୧୦ ହଜାରରୁ ଅଧିକ ଭୋଟରେ ଏସପି ସମର୍ଥିତ ରାଷ୍ଟ୍ରୀୟ ଲୋକ ଦଳର ଅଶ୍ରଫ ଅଲି ଖାନଙ୍କ ଠାରୁ ପରାସ୍ତ ହୋଇଇଛନ୍ତି। ଏଥି ସହିତ ବରେଲି ଜିଲ୍ଲାର ବହେଡି ବିଧାନସଭା ଆସନରୁ ରାଜ୍ୟ ମନ୍ତ୍ରୀ ଛତ୍ରପାଲ ସିଂ ଗାଙ୍ଗୱାର ୩ ହଜାର ୩୫୫ ଭୋଟରେ ସମାଜବାଦୀ ପାର୍ଟିର ଉଟାଉରହମାନଙ୍କ ଠାରୁ ପରାସ୍ତ ହୋଇଛନ୍ତି। ଯୋଗୀ ନେତୃତ୍ୱାଧୀନ ସରକାରରେ ଗ୍ରାମ୍ୟ ଉନ୍ନୟନ ମନ୍ତ୍ରୀ ରାଜେନ୍ଦ୍ର ପ୍ରତାପ ସିଂ ପଟ୍ଟି ବିଧାନସଭା ଆସନରୁ ୨୨ ହଜାର ୫୧ ଭୋଟରେ ସମାଜବାଦୀ ପାର୍ଟିର ରାମ ସିଂଙ୍କ ଠାରୁ ପରାସ୍ତ ହୋଇଛନ୍ତି। ଚିତ୍ରକୋଟ ଆସନରେ ରାଜ୍ୟ ମନ୍ତ୍ରୀ ଚନ୍ଦ୍ରିକା ପ୍ରସାଦ ଉପାଧ୍ୟାୟ ଏସପିର ଅନିଲ କୁମାରଙ୍କ ଠାରୁ ୨୦ ହଜାର ୮୭୬ ଭୋଟରେ ପରାଜିତ ହୋଇଛନ୍ତି।
ସମାଜସେବୀ ପାର୍ଟିର ଜୟପ୍ରକାଶ ଅଞ୍ଚଳଙ୍କ ଠାରୁ ରାଜ୍ୟ ମନ୍ତ୍ରୀ ଆନନ୍ଦ ସ୍ୱରୂପ ଶୁକ୍ଲା ୧୨ ହଜାର ୯୫୧ ଭୋଟରେ ପରାସ୍ତ ହୋଇଛନ୍ତି। କ୍ରୀଡା ମନ୍ତ୍ରୀ ଉପେନ୍ଦ୍ର ତିୱାରୀଙ୍କୁ ସମାଜବାଦୀ ପାର୍ଟି ପ୍ରାର୍ଥୀ ସାଙ୍ଗରାମ ସିଂ ୧୯ ହଜାର ୩୫୪ ଭୋଟରେ ହରାଇଛନ୍ତି।
ସମାଜବାଦୀ ପାର୍ଟିର ଉଷା ମୌର୍ଯ୍ୟ ବିଜେପି ପ୍ରାର୍ଥୀ ତଥା ରାଜ୍ୟ ମନ୍ତ୍ରୀ ରଣଭେନ୍ଦ୍ର ସିଂ ଧୁନିଙ୍କୁ ୨୫ ହଜାର ୧୮୧ ଭୋଟରେ ପରାସ୍ତ କରିଛନ୍ତି। ରାଜ୍ୟ ମନ୍ତ୍ରୀ ଲାଖନ ସିଂ ରାଜପୁତ ମାତ୍ର ୪୭୩ ଭୋଟ ବ୍ୟବଧାନରେ ସମାଜବାଦୀ ପାର୍ଟିର ପ୍ରଦୀପ କୁମାର ଯାଦବଙ୍କ ଠାରୁ ପରାସ୍ତ ହୋଇଛନ୍ତି। ବିଧାନସଭାର ପୂର୍ବତନ ବାଚସ୍ପତି ତଥା ସମାଜବାଦୀ ପାର୍ଟି ପ୍ରାର୍ଥୀ ମାତା ପ୍ରସାଦ ପାଣ୍ଡେ ମୌଳିକ ଶିକ୍ଷା ମନ୍ତ୍ରୀ ସତୀଶ ଚନ୍ଦ୍ର ଦ୍ୱିବେଦୀଙ୍କୁ ୧ ହଜାର ୬୬୨ ଭୋଟରେ ପରାସ୍ତ କରିଛନ୍ତି। ଗାଜୀପୁର ଆସନରେ ରାଜ୍ୟ ମନ୍ତ୍ରୀ ସଂଗୀତ ବଲୱନ୍ତ ୧ ହଜାର ୬୯୨ ଭୋଟ ବ୍ୟବଧାନରେ ସମାଜବାଦୀ ପାର୍ଟିର ଜୟକିଶାନଙ୍କ ଠାରୁ’ ପରାସ୍ତ ହୋଇଛନ୍ତି।
ଲକ୍ଷ୍ନୌ: ଆଜି ଉତ୍ତରପ୍ରଦେଶ ବିଧାନସଭା ନିର୍ବାଚନର ଭୋଟ ଗଣତି ଜାରି ରହିଛି। ୪୦୩ ଆସନ ବିଶିଷ୍ଟ ବିଧାନସଭା ଆସନ ପାଇଁ ଭୋଟ ଗଣତି ଜାରି ରହିଛି। ପ୍ରାରମ୍ଭିକ ଟ୍ରେଣ୍ଡରେ ବିଜେପି ଆଗୁଆ ଥିବା ବେଳେ ସମାଜବାଦୀ ପାର୍ଟି ଦ୍ଵିତୀୟ ସ୍ଥାନରେ ଅଛି। ସେହିଭଳି ବହୁଜନ ସମାଜବାଦୀ ପାର୍ଟି ତୃତୀୟ ସ୍ଥାନରେ ଥିବା ବେଳେ କଂଗ୍ରେସର ପୁଣିଥରେ ଚତୁର୍ଥ ସ୍ଥାନରେ ରହିଛି।
ଉତ୍ତରପ୍ରଦେଶ ମୋଟ ଆସନ ୪୦୩/୪୦୩ (ଗଣତି):
ବିଜେପି- ୨୭୪
ସମାଜବାଦୀ ପାର୍ଟି- ୧୨୦
ବହୁଜନ ସମାଜବାଦୀ ପାର୍ଟି- ୫
କଂଗ୍ରେସ- ୩
ଅନ୍ୟାନ୍ୟ- ୧
ନୂଆଦିଲ୍ଲୀ: ଆଜି ମଣିପୁର ବିଧାନସଭା ନିର୍ବାଚନର ଭୋଟ ଗଣତି ଜାରି ରହିଛି। ୬୦ ଆସନ ବିଶିଷ୍ଟ ବିଧାନସଭା ଆସନ ପାଇଁ ଭୋଟ ଗଣତି ଜାରି ରହିଛି। ପ୍ରାରମ୍ଭିକ ଟ୍ରେଣ୍ଡରେ ବିଜେପି ଆଗୁଆ ଥିବା ବେଳେ ଅନ୍ୟ ଦଳଗୁଡିକ ଦ୍ଵିତୀୟ ସ୍ଥାନରେ ଅଛନ୍ତି।
ଉତ୍ତରାଖଣ୍ଡ ମୋଟ ଆସନ ୬୦/୬୦ (ଗଣତି):
ବିଜେପି- ୨୯
ଅନ୍ୟ- ୨୨
କଂଗ୍ରେସ- ୦୯
ନୂଆଦିଲ୍ଲୀ: ଆଜି ଉତ୍ତରାଖଣ୍ଡ ବିଧାନସଭା ନିର୍ବାଚନର ଭୋଟ ଗଣତି ଜାରି ରହିଛି। ୭୦ ଆସନ ବିଶିଷ୍ଟ ବିଧାନସଭା ଆସନ ପାଇଁ ଭୋଟ ଗଣତି ଜାରି ରହିଛି। ପ୍ରାରମ୍ଭିକ ଟ୍ରେଣ୍ଡରେ ବିଜେପି ଆଗୁଆ ଥିବା ବେଳେ କଂଗ୍ରେସ ଦ୍ଵିତୀୟ ସ୍ଥାନରେ ଅଛି।
ଉତ୍ତରାଖଣ୍ଡ ମୋଟ ଆସନ ୭୦/୬୫ (ଗଣତି):
ବିଜେପି- ୩୯
କଂଗ୍ରେସ- ୨୧
ଅନ୍ୟ- ୦୫
ନୂଆଦିଲ୍ଲୀ: ଉତ୍ତରପ୍ରଦେଶରେ ବିଧାନସଭା ନିର୍ବାଚନର ସମସ୍ତ ସାତୋଟି ପର୍ଯ୍ୟାୟ ପାଇଁ ଭୋଟ୍ ଗ୍ରହଣ ଶେଷ ହୋଇଛି। ଆସନ୍ତାକାଲି ଫଳାଫଳ ଘୋଷଣା ହେବା ପାଇଁ ସମସ୍ତେ ଉତ୍ସାହର ସହିତ ଅପେକ୍ଷା କରିଛନ୍ତି। ଏଥି ସହିତ, ନିର୍ବାଚନର ଫଳାଫଳ ଘୋଷଣା ପୂର୍ବରୁ ସମସ୍ତ ନ୍ୟୁଜ୍ ଚ୍ୟାନେଲର ଏକଜିଟ୍ ପୋଲରେ କୁହାଯାଇଛି ଯେ, ୟୁପିରେ କେଉଁ ଦଳ କେତେ ସିଟ୍ ପାଇପାରିବେ ଏବଂ କେଉଁ ଦଳ ସରକାର ଗଠନ କରିବାର ସମ୍ଭାବନା ରହିଛି। ଅଧିକାଂଶ ଚ୍ୟାନେଲରେ ୟୁପିରେ ବିଜେପି ମିଳିତ ସରକାର ଗଠନ ହୋଇଥିବାବେଳେ ଏଭଳି ଏକଜିଟ୍ ପୋଲ୍ ମଧ୍ୟ ସାମ୍ନାକୁ ଆସିଛି, ଯାହାର ଆକଳନ ଅତ୍ୟନ୍ତ ଆଶ୍ଚର୍ଯ୍ୟଜନକ। ଏହି ଏକଜିଟ୍ ପୋଲ୍ ହେଉଛି ଦେଶବନ୍ଧୁ ଏବଂ ଏହାର ତଥ୍ୟ ଅନୁଯାୟୀ ରାଜ୍ୟରେ ଏକ ସମାଜବାଦୀ ପାର୍ଟି ମିଳିତ ସରକାର ଗଠନ କରୁଥିବା ଅନୁମାନ କରାଯାଇଛି।
ଦେଶବନ୍ଧୁଙ୍କ ଏକଜିଟ୍ ପୋଲରେ ସମାଜବାଦୀ ପାର୍ଟି ମେଣ୍ଟ ୟୁପି ନିର୍ବାଚନରେ ୨୦୦ ମାର୍କ ଅତିକ୍ରମ କରି ବହୁମତରୁ ଅଧିକ ଆସନ ହାସଲ କରିଥିବା ଜଣାପଡିଛି।
ଦେଶବନ୍ଧୁର ଏକଜିଟ୍ ପୋଲରେ, ୟୁପିରେ ଥିବା ୪୦୩ ବିଧାନସଭା ଆସନ ମଧ୍ୟରୁ ବିଜେପି ସହଯୋଗୀ ଦଳ ମାତ୍ର ୧୩୪ ରୁ ୧୫୦ ଟି ସିଟ୍ ପାଇଛି। ଅର୍ଥାତ୍, ୨୦୧୭ ନିର୍ବାଚନ ତୁଳନାରେ ବିଜେପି ଏହି ନିର୍ବାଚନରେ ଦୁଇଶହରୁ ଅଧିକ ଆସନ ହରାଉଛି।
ଦେଶବନ୍ଧୁର ଏକଜିଟ୍ ପୋଲରେ ସମାଜବାଦୀ ପାର୍ଟି ମେଣ୍ଟ ୟୁପିରେ ୪୦୩ ବିଧାନସଭା ଆସନରୁ ୨୨୮ ରୁ ୨୪୪ ସିଟ୍ ପାଉଥିବାର ଦେଖାଯାଉଛି।
ଦେଶବନ୍ଧୁର ଏକଜିଟ୍ ପୋଲରେ ସମାଜବାଦୀ ପାର୍ଟି ଗତ ନିର୍ବାଚନ ତୁଳନାରେ କେବଳ ଦୁଇଶହରୁ ଅଧିକ ଆସନ ପାଉନାହିଁ, ବରଂ ଏହା ମଧ୍ୟ ସ୍ପଷ୍ଟ ସଂଖ୍ୟାଗରିଷ୍ଠତା ଅର୍ଥାତ୍ ୨୦୨ ଟି ସିଟ୍ ଅତିକ୍ରମ କରୁଥିବା ଦେଖାଯାଉଛି।
ଅବଶ୍ୟ, ଅନ୍ୟ ସମସ୍ତ ଚ୍ୟାନେଲ ତୁଳନାରେ, ଦେଶବନ୍ଧୁଙ୍କ ଏକଜିଟ୍ ପୋଲର ଏହି ଆକଳନ କେତେ ସଠିକ୍ ତାହା ଆସନ୍ତାକାଲି ଫଳାଫଳ ଘୋଷଣା ହେବା ପରେ ସ୍ପଷ୍ଟ ହୋଇଯିବ। ବର୍ତ୍ତମାନ ସର୍ଭେରେ ସମସ୍ତ ଏଜେନ୍ସି ୟୁପିରେ ବିଜେପି ସରକାର ଗଠନ କରୁଥିବା ଦେଖିବାକୁ ମିଳିଛି।
ଜାଣନ୍ତୁ କେଉଁ ସ୍ରୋତର କ’ଣ ରହିଛି ପୂର୍ବନୁମାନ:
୧- ଇଟିଜି ରିସର୍ଚ୍ଚ: ବିଜେପିକୁ ୨୩୦-୨୪୫, ସମାଜବାଦୀ ପାର୍ଟିକୁ ୧୫୦-୧୬୫, କଂଗ୍ରେସକୁ ୨-୬, ବିଏସପିକୁ ୫-୧୦ ଆସନ
୨- ଇଣ୍ଡିଆ ନିୟୁଜ: ବିଜେପିକୁ ୨୨୨-୨୬୦, ସମାଜବାଦୀ ପାର୍ଟିକୁ ୧୩୫-୧୬୫, କଂଗ୍ରେସକୁ ୧-୩, ବିଏସପିକୁ ୪-୯ ଆସନ
୩- ଆଜ ତକ: ବିଜେପିକୁ ୨୮୮-୩୨୬, ସମାଜବାଦୀ ପାର୍ଟିକୁ ୭୧-୧୦୧, କଂଗ୍ରେସକୁ ୧-୩, ବିଏସପିକୁ ୩-୯ ଆସନ
୪- ନିୟୁଜ ୨୪: ବିଜେପିକୁ ୨୯୪, ସମାଜବାଦୀ ପାର୍ଟିକୁ ୧୦୫, କଂଗ୍ରେସକୁ ୧, ବିଏସପିକୁ ୨ ଆସନ
୫- ନିୟୁଜ ଏକ୍ସ: ବିଜେପିକୁ ୨୧୧-୨୨୫, ସମାଜବାଦୀ ପାର୍ଟିକୁ ୧୪୬-୧୬୦, କଂଗ୍ରେସକୁ ୪-୬, ବିଏସପିକୁ ୧୪-୨୪ ଆସନ
୬- ରିପବ୍ଲିକ: ବିଜେପିକୁ ୨୪୦, ସମାଜବାଦୀ ପାର୍ଟିକୁ ୧୪୦, କଂଗ୍ରେସକୁ ୪, ବିଏସପିକୁ ୧୭ ଆସନ
୭- ଟାଇମ୍ସ ନାଓ: ବିଜେପିକୁ ୨୨୫, ସମାଜବାଦୀ ପାର୍ଟିକୁ ୧୫୧, କଂଗ୍ରେସକୁ ୯, ବିଏସପିକୁ ୧୪ ଆସନ
୮- ଜି ନିୟୁଜ: ବିଜେପିକୁ ୨୨୩-୨୪୮, ସମାଜବାଦୀ ପାର୍ଟିକୁ ୧୩୮-୧୫୭, କଂଗ୍ରେସକୁ ୪-୯, ବିଏସପିକୁ ୫-୧୧ ଆସନ
ତେବେ ଏହି ୮ ଟି ସ୍ରୋତକୁ ହିସାବ କଲେ ବିଜେପିକୁ ୨୪୬ ଆସନ ମିଳୁଥିବା ବେଳେ ସମାଜବାଦୀ ପାର୍ଟିକୁ ୧୩୯ ଟି ଆସନ, କଂଗ୍ରେସକୁ ମାତ୍ର ୪ ଟି ଏବଂ ବାହୁଜନ ସମାଜବାଦୀ ପାର୍ଟିକୁ ୧୧ ଟି ଆସନ ମିଳୁଛି।
ନୂଆଦିଲ୍ଲୀ: ଆଜି ଉତ୍ତରପ୍ରଦେଶ ବିଧାନସଭା ନିର୍ବାଚନର ସପ୍ତମ ପର୍ଯ୍ୟାୟ ପାଇଁ ଭୋଟ୍ ସମାପ୍ତ ହେବା ପରେ ମାର୍ଚ୍ଚ ୧୦ ତାରିଖରେ ହେବାକୁ ଥିବା ନିର୍ବାଚନ ଫଳାଫଳ ଉପରେ ଲୋକଙ୍କ ନଜର ରହିଛି। ଏଥର ନିର୍ବାଚନରେ ଶାସକ ବିଜେପି ଏବଂ ସମାଜବାଦୀ ପାର୍ଟି ମଧ୍ୟରେ କଡ଼ା ପ୍ରତିଯୋଗିତା ହେବ ବୋଲି ଅନୁମାନ କରାଯାଉଛି। ଏକଜିଟ୍ ପୋଲ୍ ଅନୁଯାୟୀ, ବିଜେପି ସହଯୋଗୀ ଦଳସହ ମିଶି ସଂଖ୍ୟାଗରିଷ୍ଠତା ପାଇଁ ଆବଶ୍ୟକ ୨୦୨ ଟି ଆସନ ସହଜରେ ଅତିକ୍ରମ କରୁଥିବା ଜଣାପଡିଛି।
ଜାଣନ୍ତୁ କେଉଁ ସ୍ରୋତର କ’ଣ ରହିଛି ପୂର୍ବନୁମାନ:
୧- ଇଟିଜି ରିସର୍ଚ୍ଚ: ବିଜେପିକୁ ୨୩୦-୨୪୫, ସମାଜବାଦୀ ପାର୍ଟିକୁ ୧୫୦-୧୬୫, କଂଗ୍ରେସକୁ ୨-୬, ବିଏସପିକୁ ୫-୧୦ ଆସନ
୨- ଇଣ୍ଡିଆ ନିୟୁଜ: ବିଜେପିକୁ ୨୨୨-୨୬୦, ସମାଜବାଦୀ ପାର୍ଟିକୁ ୧୩୫-୧୬୫, କଂଗ୍ରେସକୁ ୧-୩, ବିଏସପିକୁ ୪-୯ ଆସନ
୩- ଆଜ ତକ: ବିଜେପିକୁ ୨୮୮-୩୨୬, ସମାଜବାଦୀ ପାର୍ଟିକୁ ୭୧-୧୦୧, କଂଗ୍ରେସକୁ ୧-୩, ବିଏସପିକୁ ୩-୯ ଆସନ
୪- ନିୟୁଜ ୨୪: ବିଜେପିକୁ ୨୯୪, ସମାଜବାଦୀ ପାର୍ଟିକୁ ୧୦୫, କଂଗ୍ରେସକୁ ୧, ବିଏସପିକୁ ୨ ଆସନ
୫- ନିୟୁଜ ଏକ୍ସ: ବିଜେପିକୁ ୨୧୧-୨୨୫, ସମାଜବାଦୀ ପାର୍ଟିକୁ ୧୪୬-୧୬୦, କଂଗ୍ରେସକୁ ୪-୬, ବିଏସପିକୁ ୧୪-୨୪ ଆସନ
୬- ରିପବ୍ଲିକ: ବିଜେପିକୁ ୨୪୦, ସମାଜବାଦୀ ପାର୍ଟିକୁ ୧୪୦, କଂଗ୍ରେସକୁ ୪, ବିଏସପିକୁ ୧୭ ଆସନ
୭- ଟାଇମ୍ସ ନାଓ: ବିଜେପିକୁ ୨୨୫, ସମାଜବାଦୀ ପାର୍ଟିକୁ ୧୫୧, କଂଗ୍ରେସକୁ ୯, ବିଏସପିକୁ ୧୪ ଆସନ
୮- ଜି ନିୟୁଜ: ବିଜେପିକୁ ୨୨୩-୨୪୮, ସମାଜବାଦୀ ପାର୍ଟିକୁ ୧୩୮-୧୫୭, କଂଗ୍ରେସକୁ ୪-୯, ବିଏସପିକୁ ୫-୧୧ ଆସନ
ତେବେ ଏହି ୮ ଟି ସ୍ରୋତକୁ ହିସାବ କଲେ ବିଜେପିକୁ ୨୪୬ ଆସନ ମିଳୁଥିବା ବେଳେ ସମାଜବାଦୀ ପାର୍ଟିକୁ ୧୩୯ ଟି ଆସନ, କଂଗ୍ରେସକୁ ମାତ୍ର ୪ ଟି ଏବଂ ବାହୁଜନ ସମାଜବାଦୀ ପାର୍ଟିକୁ ୧୧ ଟି ଆସନ ମିଳୁଛି।
ସୀତାରାମ ଅଗ୍ରୱାଲ
ବାଣପୁର: ରାଜ୍ୟରେ ପୌର ନିର୍ବାଚନ ପାଇଁ ବିଗୁଲ ବାଜିସାରିଛି। ଆସନ୍ତା ୨୪ ତାରିଖରେ ଏହି ନିର୍ବାଚନ ଅନୁଷ୍ଠିତ ହେବ। ତେବେ ଖୋର୍ଦ୍ଧା ଜିଲ୍ଲା ବାଣପୁର ଏବଂ ବାଲୁଗାଁ ବିଜ୍ଞାପିତ ଅଞ୍ଚଳ ପରିଷଦରେ ନିର୍ବାଚନ ତାତି ବଢ଼ିବାରେ ଲାଗିଛି। ଉଭୟ ଏନଏସି ରେ ୨ ପ୍ରମୁଖ ରାଜନୈତିକ ଦଳ ବିଜେପି ଏବଂ ବିଜେଡି ମଧ୍ୟରେ କଡ଼ ଟକ୍କର ହେବ ବୋଲି ପୂର୍ବାନୁମାନ କରାଯାଉଥିବାବେଳେ ଟିକେଟ ବଣ୍ଟନ କ୍ଷେତ୍ରରେ ଚଳିତ ଥର ବିଜେପି ବିଜେଡି ଠାରୁ ଆଗରେ ଥିବା ଜଣାପଡିଛି।
ବିଜେପି ପକ୍ଷରୁ ଉଭୟ ଏନଏସି ପାଇଁ ଅଧ୍ୟକ୍ଷ ପ୍ରାର୍ଥୀଙ୍କ ନାମ ଘୋଷଣା କରାଯାଇଥିବା ବେଳେ ବିଜେଡି ଏଯାବତ କୌଣସି ଏନଏସି ରେ ଅଧ୍ୟକ୍ଷ ପ୍ରାର୍ଥୀଙ୍କ ନାମ ଘୋଷଣା କରିପାରିନାହିଁ। ବାଲୁଗାଁ ଏନଏସି ରେ ଅଧ୍ୟକ୍ଷ ପଦବୀ ମହିଳାଙ୍କ ପାଇଁ ସରଂକ୍ଷିତ ଥିବା ବେଳେ ଏଠାରେ ସ୍ୱପ୍ନା ବଡ଼ଜେନାଙ୍କୁ ବିଜେପି ପ୍ରାର୍ଥୀ ଭାବେ ଘୋଷଣା କରିଛି।
ସେହିପରି ଭାବେ ବାଣପୁର ଏନଏସିର ଅଧ୍ୟକ୍ଷ ପ୍ରାର୍ଥୀ ଭାବେ ନନ୍ଦ କିଶୋର ମିଶ୍ରଙ୍କ ନାମକୁ ବିଜେପି ମୋହର ମାରିଛି। ନନ୍ଦ କିଶୋର ବାଣପୁର ଅଞ୍ଚଳର ଜଣେ ବିଶିଷ୍ଟ ବ୍ୟବସାୟୀ ଭାବେ ବେଶ ଜଣାସୁଣା।
ତେବେ ପ୍ରାର୍ଥୀ ଘୋଷଣା କରିବାରେ ବିଜେଡି ପକ୍ଷରୁ ବିଳମ୍ବ ହୋଇଛି। ଅଦ୍ୟାବଧି ଦଳ ପକ୍ଷରୁ ବିଧିବଦ୍ଧ ଭାବେ ୨ ଏନଏସି ପାଇଁ ଅଧ୍ୟକ୍ଷ ପ୍ରାର୍ଥୀ ଘୋଷଣା କରାଯାଇନଥିବା ବେଳେ ବାଲୁଗାଁ ପାଇଁ ବିଶିଷ୍ଟ ବ୍ୟବସାୟୀ ଶଙ୍କର ପାଇକରାୟଙ୍କ ଧର୍ମପତ୍ନୀ ସୁକାନ୍ତି ପାଇକରାୟ ଏବଂ ବାଣପୁର ପାଇଁ ମିଟୁ ନାୟକଙ୍କ ନାମ ଏକ ରକମର ଚୁଡାନ୍ତ ହୋଇଥିବାର କର୍ମୀମହଲ ସୂତ୍ରରୁ ଖବର ମିଳିଛି।
ତେବେ ଚଳିତ ପଞ୍ଚାୟତ ନିର୍ବାଚନରେ ଚିଲିକା ନିର୍ବାଚନ ମଣ୍ଡଳୀରେ ଜିଲ୍ଲା ପରିଷଦ ଆସନ ୬ ରୁ ୪ ବିଜେଡି ଜିତିଥିବା ବେଳେ ସରପଞ୍ଚ ତଥା ସମିତି ନିର୍ବଚନରେ ବିଜେପି ଉଭୟ ସ୍ଥାନରେ ଭଲ ପ୍ରଦର୍ଶନ କରିଛି। ଏପରିକି ୨ ବ୍ଲକରେ ବିଜେପି ସରକାର ଗଠନ କରିବ ବୋଲି ଦାବି କରିଛି।
କଟକ: କଟକ ମହାନଗର ନିଗମ ପାଇଁ ମେୟର ପ୍ରାର୍ଥୀ ଘୋଷଣା କରିଛି ବିଜେପି। ବିଜେପି ପକ୍ଷରୁ ଓଲିଉଡ ଅଭିନେତା ଶ୍ରୀତମ ଦାସଙ୍କୁ ସିଏମସିର ମେୟର ପ୍ରାର୍ଥୀ କରାଯାଇଛି। କଟକରୁ ମେୟର ପ୍ରାର୍ଥୀ ଭାବେ ସେ ପୌର ନିର୍ବାଚନରେ ପ୍ରତିଦ୍ବନ୍ଦ୍ବିତା କରିବେ। ଏହା ପୂର୍ବରୁ କଂଗ୍ରେସ ପକ୍ଷରୁ ଗତକାଲି ମେର ପ୍ରାର୍ଥୀ ଘୋଷଣା କରିଥିଲା। ସାଂସଦ ସୁବାସ ସିଂହଙ୍କୁ ବିଜେଡ଼ି କଟକ ମହାନଗର ପାଇଁ ମେୟର ପ୍ରାର୍ଥୀ ଘୋଷଣା କରିଥିଲା।
ଭୁବନେଶ୍ବର: ବିଜେଡ଼ି ଆଉ କଂଗ୍ରେସ ପରେ ଭୁବନେଶ୍ୱର ମହାନଗର ନିଗମ ପାଇଁ ମେୟର ପ୍ରାର୍ଥୀନୀ ଘୋଷଣା କରିଛି ବିଜେପି। ଡାକ୍ତର ସୁନୀତି ମୁଣ୍ଡଙ୍କୁ ବିଜେପି ପକ୍ଷରୁ ଭୁବନେଶ୍ଵର ମହାନଗର ନିଗମ ପାଇଁ ପ୍ରାର୍ଥୀ କରାଯାଇଛି। ଡାକ୍ତର ସୁନୀତି ମୁଣ୍ଡଙ୍କୁ ମେୟର ପ୍ରାର୍ଥୀନୀ ଭାବେ ଭୁବନେଶ୍ଵର ସାଂସଦ ଅପରିଜିତା ଷଡଙ୍ଗୀ ଘୋଷଣା କରିଛନ୍ତି।
ତେବେ ଆଜି ବିଜେଡ଼ି ପକ୍ଷରୁ ଭୁବନେଶ୍ବର ମହାନଗର ପାଇଁ ପ୍ରାର୍ଥୀ ଘୋଷଣା କରିଥିବା ବେଳେ ଗତକାଲି କଂଗ୍ରେସ ମଧ୍ୟ ମେୟର ପ୍ରାର୍ଥୀ ଘୋଷଣା କରିସାରିଛି। ବିଜେଡ଼ି ପକ୍ଷରୁ ସୁଲୋଚନା ଦାସଙ୍କୁ ମେୟର ପ୍ରାର୍ଥୀନୀ କରାଯାଇଥିବା ବେଳେ କଂଗ୍ରେସ ପକ୍ଷରୁ ମଧୁସ୍ମିତା ଆଚାର୍ଯ୍ୟଙ୍କ ନାମ ଘୋଷଣା କରାଯାଇଛି।
ଲକ୍ଷ୍ନୌ: ଉତ୍ତରପ୍ରଦେଶର ଫାଜିଲନଗର ବିଧାନସଭା ନିର୍ବାଚନମଣ୍ଡଳୀରୁ ସମାଜବାଦୀ ପାର୍ଟିର ପ୍ରାର୍ଥୀ ସ୍ୱାମୀ ପ୍ରସାଦ ମୌର୍ଯ୍ୟଙ୍କୁ ଆକ୍ରମଣ ଅଭିଯୋଗ ହୋଇଛି। ଏହି ଘଟଣା ପରେ ପିତାଙ୍କ ସମର୍ଥନରେ ବିଜେପି ସାଂସଦ ତଥା ସ୍ୱାମୀ ପ୍ରସାଦ ମୌର୍ଯ୍ୟଙ୍କ ଝିଅ ସଂଘମିତ୍ରା ମୌର୍ଯ୍ୟ ଏକ ବଡ ଭିଯୋଗ ଅଭିଯୋଗ ଆଣିଛନ୍ତି।
ତାଙ୍କ ପିତାଙ୍କ ସମର୍ଥନରେ ବିଜେପି ସାଂସଦ ତଥା ସ୍ୱାମୀ ପ୍ରସାଦ ମୌର୍ଯ୍ୟଙ୍କ ଝିଅ ସଂଘମିତ୍ରା ମୌର୍ଯ୍ୟ ବାହାରକୁ ଆସିଥିଲେ। ସେ କହିଛନ୍ତି, “ବିଜେପି ଶାନ୍ତି, ଦଙ୍ଗା ମୁକ୍ତ ରାଜ୍ୟ ବିଷୟରେ କଥାବାର୍ତ୍ତା କରେ, କିନ୍ତୁ ବିଜେପି ପ୍ରାର୍ଥୀ ମୋ ବାପାଙ୍କ ଉପରେ ଆକ୍ରମଣ କରିଥିଲେ। ମୁଁ ମୋ ବାପାଙ୍କୁ ଭୋଟ୍ ଦେଇ ସମର୍ଥନ ଜଣାଇବାକୁ ଫାଜିଲନଗରବାସୀଙ୍କୁ ନିବେଦନ କରୁଛି। ଲୋକମାନେ ମାର୍ଚ୍ଚ ୩ ତାରିଖରେ ବିଜେପିକୁ ଏକ ଶିକ୍ଷା ଦେବେ।
କାରଗୁଡିକ କିପରି କ୍ଷତିଗ୍ରସ୍ତ ହୋଇଛି ଏବଂ ଲୋକମାନେ ଆହତ ହୋଇଛନ୍ତି ତାହା ଦେଖିବାକୁ ମିଳିବ ବୋଲି ସେ କହିଛନ୍ତି। ଯେତେବେଳେ ମୁଁ ମୋ ବାପାଙ୍କୁ ଭେଟିବାକୁ ଯାଉଥିଲି, ବିଜେପି କର୍ମୀମାନେ ମୋର ଗାଡି ଚାରିପଟେ ଘେରି ରହିଥିଲେ।
ମଙ୍ଗଳବାର ଦିନ ପୂର୍ବତନ କ୍ୟାବିନେଟ ମନ୍ତ୍ରୀ ସ୍ଵାମୀ ପ୍ରସାଦ ମୌର୍ଯ୍ୟ ଦାବି କରିଥିଲେ ଯେ, ତାଙ୍କ ରୋଡ୍ ସୋ ସମୟରେ ଆକ୍ରମଣ କରାଯାଇଥିଲା ଏବଂ ଗାଡିଟି ନଷ୍ଟ ହୋଇଯାଇଥିଲା। ଏହି ଆକ୍ରମଣର ସୂଚନା ପରେ ସମାଜବାଦୀ ପାର୍ଟିର ରାଷ୍ଟ୍ରୀୟ ସଭାପତି ଅଖିଳେଶ ଯାଦବ ମଧ୍ୟ ପ୍ରତିକ୍ରିୟା ରଖିଛନ୍ତି।
ସେ କହିଛନ୍ତି ଯେ, “ସ୍ଵାମୀ ପ୍ରସାଦ ମୌର୍ଯ୍ୟଙ୍କ ଉପରେ ହୋଇଥିବା ଆକ୍ରମଣ ହାରୁଥିବା ଲୋକଙ୍କର ଅତ୍ୟନ୍ତ ନିନ୍ଦନୀୟ କାର୍ଯ୍ୟ। ଏହି ଆକ୍ରମଣ ଏସପି-ମେଣ୍ଟର ପ୍ରତ୍ୟେକ ଦଳର କର୍ମୀ ଏବଂ ସେମାନଙ୍କ ନେତାଙ୍କ ଉପରେ ଆକ୍ରମଣ ଭଳି। ମିଳିତ ଭାବେ ଏହାର ଉତ୍ତର ମିଳିବ। ଅବଶିଷ୍ଟ ଦୁଇଟି ପର୍ଯ୍ୟାୟ ବିଜେପିକୁ ଶୂନ ମିଳିବ। ଏହି ସରକାରଙ୍କ ଠାରୁ କୌଣସି କାର୍ଯ୍ୟାନୁଷ୍ଠାନ ଆଶା କରିବା ଅର୍ଥହୀନ।
ଲକ୍ଷ୍ନୌ: ଭାରତୀୟ ଜନତା ପାର୍ଟି ଛାଡି ସମାଜବାଦୀ ପାର୍ଟିରେ ଯୋଗ ଦେଇଥିବା ସ୍ୱାମୀ ପ୍ରସାଦ ମୌର୍ଯ୍ୟ ବିଜେପି ବିରୋଧରେ ଏକ ବଡ ଅଭିଯୋଗ ଆଣିଛନ୍ତି। ଆଜି ସେ ଏକ ଟ୍ୱିଟରେ ଦାବି କରିଛନ୍ତି ଯେ, ବିଜେପି କର୍ମୀମାନେ ତାଙ୍କୁ ଏବଂ ତାଙ୍କ ଶୋଭାଯାତ୍ରାରେ ଥିବା ଗାଡିଗୁଡ଼ିକୁ ଭଙ୍ଗାରୁଜା କରିଛନ୍ତି। ରୋଡ ସୋ ସମୟରେ ବିଜେପି ଦ୍ୱାରା ଆକ୍ରମଣ ହୋଇଥିବା ସ୍ଵାମୀ ପ୍ରସାଦ ମୌର୍ଯ୍ୟ ଅଭିଯୋଗ କରିଛନ୍ତି। ଏହି ଘଟଣାକୁ ନିନ୍ଦା କରିବା ସହ ଠେଙ୍ଗା, ବାଡ଼ି ଏବଂ ହିଂସା ଦ୍ୱାରା ଗଣତନ୍ତ୍ର ଦୁର୍ବଳ ହୋଇପାରିବ ନାହିଁ ବୋଲି ସେ କହିଛନ୍ତି।
ମୌର୍ଯ୍ୟଙ୍କ ଅଭିଯୋଗ ଅନୁଯାୟୀ, “ସୁରକ୍ଷା ଦୃଷ୍ଟିରୁ କୁଶୀନଗରେ ପ୍ରଚାର ବେଳେ ମୁଁ ଅନ୍ୟ ଏକ କାରରେ ବସିଥିଲି। ବିଜେପି କର୍ମୀମାନେ ସେଠାରେ ବାଡ଼ି, ପଥର ଓ ଅସ୍ତ୍ରଶସ୍ତ୍ର ଧରି ବସିଥିଲେ। ସେମାନେ ମୋ କାର ଉପରେ ଆକ୍ରମଣ କରିଥିଲେ। ଏଭଳି ଘଟଣା ବିଜେପିର ସଂରକ୍ଷଣରେ କରାଯାଉଛି ବୋଲି ସେ ଅଭିଯୋଗ କରିଛନ୍ତି।
ଭୁବନେଶ୍ବର: ଚାଲିଛି ପଞ୍ଚାୟତ ନିର୍ବାଚନର ଶେଷ ପର୍ଯ୍ୟାୟ ଗଣତି। ଏହି ପର୍ଯ୍ୟାୟରେ ଆଜି ମୋଟ ୨୩୧ ଟି ଜିଲ୍ଲା ପରିଷଦ ଜୋନରର ଭୋଟ ଗଣତି ଚାଲିଛି। ତେବେ ବର୍ତ୍ତମାନ ସୁଦ୍ଧା ଆସିଥିବା ରିପୋର୍ଟ ଅନୁସାରେ ବିଜେଡି ସର୍ବାଗ୍ରେ ରହିଛି। ବିଜେଡି ଏପରିସ୍ଥିତିରେ ରହିଛି ଯେ, ବିରୋଧୀ ଧଳ ପୁରା ଧୋଇ ହୋଇଯିବାର ସମ୍ଭାବନା ଦେଖାଦେଇଛି।
ସୂଚନା ଅନୁସାରେ ବର୍ତ୍ତମାନ ଗଣତିରେ ବିଜେଡି ୨୧୦ଟି ଜିଲ୍ଲା ପରିଷଦ ଜୋନରେ ଆଗରେ ରହିଛି। ସେହିପରି ବିଜେପି ୧୫ ଟି ଏବଂ କଂଗ୍ରେସ ୬ ଟି ଜୋନରେ ଆଗରେ ରହିଛି। ଗତ ଦୁଇ ପର୍ଯ୍ୟାୟ ଗଣତିରେ ସ୍ବାଧୀନ କିମ୍ବା ଅନ୍ୟାନ୍ୟ ପ୍ରାର୍ଥୀ କେତେକ ଜୋନରେ ଆଗରେ ରହୁଥିଲେ। ହେଲେ ଏହି ପର୍ଯ୍ୟାୟ ସେମାନଙ୍କର ସ୍ଥିତି ପୁରା ଲିଭି ଯାଇଛି।
ପ୍ରଥମ ପର୍ଯ୍ୟାୟ ଗଣତିରେ ମଧ୍ୟ ବିଜେଡି ବହୁ ବହୁ ଆଗରେ ରହିଛି। ଚୁଡାନ୍ତ ତଥ୍ୟ ଅନୁସାରେ ମୋଟ ଘୋଷିତ ୩୧୪ ଟି ଜୋନ ମଧ୍ୟରୁ ବିଜେଡିକୁ ମିଳିଛି ୨୮୧, ବିଜେପିକୁ ମିଳିଛି ୧୫ଟି, କଂଗ୍ରେସକୁ ୧୪ଟି, ସ୍ବାଧୀନ ୨ଟି ଏବଂ ଅନ୍ୟାନ୍ୟ ୨ଟି ଜୋନରେ ବିଜୟ ଲାଭ କରିଛନ୍ତି।
ସେହିପରି ଦ୍ବିତୀୟ ପର୍ଯ୍ୟାୟ ଗଣତିରେ ମଧ୍ୟ ବିଜେଡି ବାଜିମାତ କରିଛି। ଏହି ପର୍ଯ୍ୟାୟରେ ସମୁଦାୟ ୩୦୫ ଜିଲ୍ଲା ପରିଷଦ ଜୋନର ଭୋଟ ଗଣତି କରାଯାଇଥିଲା। ହେଲେ ୨୯୫ ଫଳାଫଳ ଘୋଷିତ ହୋଇଛି। ଏଥିରେ ବିଜେଡି ୨୬୦, ବିଜେପି ୧୬, କଂଗ୍ରେସ ୧୬, ସ୍ବାଧୀନ ୦୧ ଏବଂ ଅନ୍ୟାନ୍ୟ ୦୨ଟି ଜୋନରେ ବିଜୟ ଲାଭ କରିଛନ୍ତି।
ବର୍ତ୍ତମାନ ପରିସ୍ଥିତିକୁ ଅନୁଧ୍ୟାନ କଲେ ସାରା ଓଡିଶାରେ ପୁଣି ଥରେ ବିଜେଡି ବର୍ଷା ହୋଇଛି। ଆଉ ଏହି ବର୍ଷାରେ ଓଡିଶାର ବିରୋଧୀ ଦଳ ପୁରା ଧୋଇ ହୋଇଯିବାର ନିଶ୍ଚିତ ସମ୍ଭାବନା ସୃଷ୍ଟି ହୋଇଛି। ଆଜି ସଂଧ୍ୟାରେ ଚୁଡାନ୍ତ ଫଳାଫଳ ଆସିଲା ପରେ ଏହି ଚିତ୍ର ସ୍ପଷ୍ଟ ହେବ।
ଚିଲିକା: ରାଜ୍ୟରେ ତ୍ରୀସ୍ତରୀୟ ପଞ୍ଚାୟତ ନିର୍ବାଚନ ଭୋଟ ଗଣତି ଜାରି ରହିଛି। ବର୍ତ୍ତମାନ ଏହି ଗଣତିରେ ବିଜେଡ଼ିର ବିପୁଳ ବିଜୟ ଦେଖିବାକୁ ମିଳିଛି। କିନ୍ତୁ ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ୧୪ ନଂ ଜିଲ୍ଲା ପରିଷଦ ଆସନରେ ବିଜେପି ବାଜିମାତ କରିଛି। ସେଠାରେ ବିଜେଡି ପ୍ରାର୍ଥୀ ଲିଲିବାଳା ଭୋଳଙ୍କୁ ବିଜେପି ପ୍ରାର୍ଥୀ ରୋଜିତା ପ୍ରଧାନ ପରାଜିତ କରିଛନ୍ତି। ରୋଜିତା ୧୬୮୪ ଭୋଟ ବ୍ୟବଧାନରେ ବିଜୟ ଲାଭ କରିଛନ୍ତି।
ତେବେ ବାଣପୁର ବ୍ଲକର ୧୩ ନଂ ଜୋନର ଜିଲ୍ଲାପରିଷଦ ପ୍ରାର୍ଥୀ ଟିକି ଶବର ବିଜୟ ଲାଭ କରିଥିବା ବେଳେ ଚିଲିକା ବ୍ଲକର ୨ ଜଣ ବିଜେଡ଼ି ପ୍ରାର୍ଥୀ ବିଜୟ ଲାଭ କରିଛନ୍ତି। ବର୍ତ୍ତମାନ ଚିଲିକା ନିର୍ବାଚନମଣ୍ଡଳୀରେ ଘୋଷଣା ହୋଇଥିବା ୪ ଟି ଆସନ ମଧ୍ୟରୁ ୨ଟି ଆସନରେ ବିଜେଡ଼ି ଜିତିଥିବା ବେଳେ ୨ ଟି ଆସନରେ ବିଜେପି ଜିତିପାରିଛି। ଆଜି ଆଉ ୨ ଟି ଆସନ ପାଇଁ ଭୋଟ ଗଣତି ଆରମ୍ଭ ହୋଇଯାଇଛି। କିଛି ସମୟ ପରେ ସମୀକ୍ଷା ନିୟୁଜ ମାଧ୍ୟମରେ ଅପଡେଟ ପ୍ରଦାନ କରାଯିବ।
ରୋଜିତା ପ୍ରଧାନ- ବିଜେପି- ୧୨୮୫୩
ଲିଲିବାଳା ଭୋଳ- ବିଜେଡ଼ି- ୧୧୧୬୯
ରଶ୍ମିତା ମହାପାତ୍ର- କଂଗ୍ରେସ- ୧୧୭୬
ଭୁବନେଶ୍ବର: ଆଜି ସକାଳୁ ଚାଲିଛି ପଞ୍ଚାୟତ ନିର୍ବାଚନର ଭୋଟ ଗଣତି। ଏଥିରେ ଆଜି ରାଜ୍ୟର ୩୧୪ ବ୍ଲକର ୩୧୫ ଜିଲ୍ଲା ପରିଷଦ ଆସନରେ ଭୋଟ ଗଣତି ଚାଲିଛି। ତେବେ ପ୍ରାରମ୍ଭିକ ସୂଚନା ଅନୁସାରେ ବିଜେଡି ବର୍ତ୍ତମାନ ବେଶ୍ ଆଗରେ ରହିଛି। ବିଭିନ୍ନ ଗଣମାଧ୍ୟମ ରିପୋର୍ଟ ଅନୁସାରେ ବର୍ତ୍ତମାନର ବିଭିନ୍ନ ଦଳର ଯେଉଁ ସ୍ଥିତି ରହିଛି ତାହା ହେଲା
ବିଜେଡି-୨୪୮ ଟିରେ ଆଗୁଆ
ବିଜେପି- ୩୦ ଟିରେ ଆଗୁଆ
କଂଗ୍ରେସ- ୧୩ ଟିରେ ଆଗୁଆ
ଅନ୍ୟାନ୍ୟ-୦୫ ଟିରେ ଆଗୁଆ
ଭୁବନେଶ୍ୱର: ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ବଡ ବ୍ୟବଧାନରେ ପରାଜୟ ଜାଣିବାପରେ ଓଡ଼ିଶା ବିଜେପିର କର୍ମୀମାନେ ଗଭୀର ଅବସାଦଗ୍ରସ୍ତ ଓ ହତାଶ ହୋଇଛନ୍ତି। ମନୋବଳ ଭାଙ୍ଗି ଯାଇଥିବା ଏହି କର୍ମକର୍ତ୍ତାଙ୍କୁ ଉତ୍ସାହିତ କରିବାପାଇଁ ଓଡିଶା ବିଜେପି ସଭାପତି ଉଦ୍ୟମ ଚଳାଇଥିବା କହିଛନ୍ତି ବିଜେଡି ପ୍ରବକ୍ତା ସୁଲତା ଦେଓ।
ବିଜେପି ସାମ୍ବାଦିକ ସମ୍ମିଳନୀର ଜବାବ ଦେଇ ବିଜେଡି ପ୍ରବକ୍ତା ଶ୍ରୀମତୀ ଦେଓ କହିଛନ୍ତି ଯେ ଓଡିଶା ବିଜେପି ସଭାପତିଙ୍କର ଆଜିର ସାମ୍ବାଦିକ ସମ୍ମିଳନୀ ହତାଶ ହୋଇ ପଡିଥିବା ବିଜେପି କର୍ମୀଙ୍କୁ କୌଣସି ପ୍ରକାରେ ଉତ୍ସାହିତ କରିବା ପାଇଁ ଏକ ପ୍ରୟାସ ଥିଲା। ତେବେ ସେ ତାହା କରିବାରେ ବିଫଳ ହୋଇଛନ୍ତି।
ଓଡ଼ିଶାର ଲୋକ ଏକ ସ୍ୱରରେ ଓଡ଼ିଶା ବିଜେପିକୁ ପଞ୍ଚାୟତ ନିର୍ବାଚନରେ ପ୍ରତ୍ୟାଖାନ କରିଛନ୍ତି ଏବଂ ଆଗାମୀ ପୌର ନିର୍ବାଚନରେ ମଧ୍ୟ ଓଡିଶା ବିଜେପିକୁ ପରାସ୍ତ ପାଇଁ ପ୍ରସ୍ତୁତ ଅଛନ୍ତି ବୋଲି ଶ୍ରୀମତୀ ଦେଓ କହିଛନ୍ତି।