Tag: ବିଧାୟକ ପ୍ରଶାନ୍ତ ଜଗଦ୍ଦେବ

ଭୁବନେଶ୍ବର: ଚିଲିକାର ବିଜେଡି ରାଜନୀତି ବର୍ତ୍ତମାନ ବଡ ବିଷମ ସମସ୍ୟା ଦେଇ ଗତି କରୁଛି। କାରଣ ବର୍ତ୍ତମାନର ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବ ବିବାଦୀୟ ପରିସ୍ଥିତିରେ ନିର୍ବାଚନ ମଣ୍ଡଳି ଗସ୍ତ କରିପାରୁ ନାହାଁନ୍ତି। ପୂର୍ବରୁ କୋର୍ଟ କଟକଣା ଥିଲା, ତାହା ହଟିଯିବା ପରେ ଏବେ ଦଳୀୟ କଟକଣା। ସେ ବିଜେଡିରେ ନ ଥିଲେ ମଧ୍ୟ ବର୍ତ୍ତମାନ ମଧ୍ୟ ବିଜେଡି କଥା ମାନି କାମ କରୁଛନ୍ତି। ଫଳରେ ଏବେ ସେ ଦଳିୟ ନିର୍ଦ୍ଦେଶ ମାନି ଖୋଲମଖୁଲା ଚିିଲିକା ଯାଇପାରୁ ନାହାଁନ୍ତି।

ତାଙ୍କର ଏପରି ପରିସ୍ଥିତିରେ ବର୍ତ୍ତମାନ ଚିଲିକାର ବିଜେଡି ମଙ୍ଗ କିଏ ଧରିବ କିଏ ଟିକେଟ ପାଇବ, ତାହାକୁ ନେଇ ସସପେନସ୍ ଜାରୀ ରହିଛି। ଏପରି କ୍ଷେତ୍ରରେ ବିଧାୟକ ପ୍ରାର୍ଥୀ ହେବା ପାଇଁ ଅନେକଙ୍କ ନାମ ଦୀର୍ଘଦିନ ଧରି ଚର୍ଚ୍ଚା ଚାଲିଛି। ହେଲେ ସେମାନେ ବିଜେଡି ପାଇଁ କେତେ ଲାଭ ଦାୟକ ହେବେ ସେ ନେଇ ଚାଲିଛି ହିସାବ ନିକାଶ। ତେବେ ଯେଉଁମାନଙ୍କ ନାମ ଚର୍ଚ୍ଚାର ସର୍ବାଗ୍ରେ ରହିଛି ସେମାନଙ୍କ ରାଜନୈତିକ ସମୀକରଣ କଣ କହୁଛି ତାହାର ସମୀକ୍ଷା ହେବା ଆବଶ୍ୟକ।

ପ୍ରଶାନ୍ତ ଜଗଦ୍ଦେବ–  ଯଦି କୌଣସି ପରିସ୍ଥିତିରେ ବିଧାୟକ ପ୍ରଶାନ୍ତ ଜଗଦ୍ଦେବଙ୍କୁ ପୁଣିଥରେ ଦଳ ଟିକେଟ ଦିଏ ତେବେ ତାହା ଦଳ ପାଇଁ ଲାଭଦାୟକ ହେବ ନାହିଁ। କାରଣ ସେ ପ୍ରଥମତଃ ଚିଲିକା ଅଞ୍ଚଳର ନୁହଁନ୍ତି। ସେତେବେଳେ ପରିସ୍ଥିତିରେ ପଡି ସେ ଚିଲିକାରେ ଛିଡା ହୋଇଥିଲେ। ଆଉ ଶେଷ ମୂର୍ହୁର୍ତ୍ତରେ କର୍ମିମାନେ କିଛି ଉପାୟ ନ ପାଇ ତାଙ୍କୁ ସମର୍ଥନ କରି ଜିତାଇଥିଲେ। ହେଲେ ବର୍ତ୍ତମାନ ସେହି ପରିସ୍ଥିତି ଆଉ ନାହିଁ। ଅନ୍ୟପକ୍ଷରେ ସେ ଚିଲିକା ନିର୍ବାଚନ ମଣ୍ଡଳୀରୁ ଦୂରେଇ ଯିବା ପରେ ତାଙ୍କର ବହୁ ବିରୋଧୀ ଇତିମଧ୍ୟରେ ବାହାରି ସାରିଲେଣି। ତେଣୁ ବର୍ତ୍ତମାନ ସେ ଚିଲିକାରେ ଛିଡା ହେଲେ ଜିତିବା କଷ୍ଟକର ହୋଇପଡିବ।

ରଘୁନାଥ ସାହୁ- ବିଜେଡିର ପୂର୍ବତନ ବିଧାୟକ ହେଉଛନ୍ତି ରଘୁନାଥ ସାହୁ। ସେ ହେଉଛନ୍ତି ଚିଲିକା ଅଞ୍ଚଳର ଏବଂ ତାଙ୍କର ମଧ୍ୟ ସଂଗଠନ ରହିଛି। ହେଲେ ସେ ଗତ ପୌର ଓ ପଞ୍ଚାୟତ ନିର୍ବାଚନରେ ଯେପରି ଅର୍ନ୍ତଘାତିକ କାମ କଲେ ତାହା ପ୍ରତିଟି ବିଜେଡି କର୍ମି ମର୍ମେ ମର୍ମେ ଅନୁଭବ କରିଛନ୍ତି। ଏହି ଘଟଣା ପରେ ଚିଲିକାରେ ରଘୁନାଥଙ୍କ ସମର୍ଥକ ଯେତିକି ତାହାଠାରୁ ବେଶୀ ହେଉଛନ୍ତି ବିରୋଧୀ। ଯଦି ଦଳ କୌଣସି ପରିସ୍ଥିତିରେ ରଘୁନାଥଙ୍କୁ ଟିକେଟ ଦିଏ ତେବେ ସେ ଏପରି ପରିସ୍ଥିତିରେ ଜିତିବା କଷ୍ଟକର ବ୍ୟାପର ହୋଇପଡିବ।

ପୌର ଏବଂ ଜିଲ୍ଲା ପରିଷଦର ନିର୍ବାଚିତ ପ୍ରତିନିଧୀମାନେ- ବର୍ତ୍ତମାନ ଚିଲିକାରେ ପୌର ଏବଂ ଜିଲ୍ଲା ପରିଷଦ ନିର୍ବାଚନରେ ଜିତିଥିବା ନେତାମାନେ ମଧ୍ୟ ବିଧାୟକ ହେବାରେ ସ୍ବପ୍ନରେ ବିଭୋର ହୋଇ ସାରିଲେଣି। ବାଘ ନ ଥିଲେ ମିରିଗ ନାଟ ପରି ବିଧାୟକ ଜଗଦ୍ଦେବଙ୍କୁ ଆଉ ଟିକେଟ ମିଳିବ ନାହିଁ ବୋଲି ଭାବି ସେମାନେ ବିଧାୟକ ପ୍ରାର୍ଥୀ ହେବେ ବୋଲି ଆଶା ବାନ୍ଧି ବସିଛନ୍ତି। ସେମାନଙ୍କୁ ବିଧାୟକ ହେବା ନିଶା ପୁରା ଘାଇଲା କରି ସାରିଲାଣି।

ଏହି ଆଶାୟୀଙ୍କ ସଂଖ୍ୟା ପ୍ରାୟ ୮ରୁ ଅଧିକ ହେବ। ହେଲେ ଏମାନଙ୍କ ମଧ୍ୟରେ ବିଲକୁଲ୍ ତାଳମେଳ ନାହିଁ। ସମସ୍ତେ ଭିତରେ ଭିତରେ ପରସ୍ପରକୁ ବିରୋଧ କରନ୍ତି। ଯଦି ଦଳ ଏମାନଙ୍କୁ ଭିତରୁ ଜଣକୁ କାହାକୁ ପ୍ରାର୍ଥୀ କରି ଦିଏ, ତେବେ ତା ବିରୋଧରେ ଅନ୍ୟମାନ ଏକାଠି ହୋଇ ପଛରେ ଲାଗି ପଡିବେ। ଏପରିକି ଦଳିୟ ନିର୍ଦ୍ଦେଶକୁ ନ ମାନି ସେମାନେ ବିକଳ୍ପ ରାସ୍ତା ମଧ୍ୟ ଆବୋରି ନେବାର ସମ୍ଭାବନା ରହିଛି। ତେଣୁ ଏମାନଙ୍କ ମଧ୍ୟରୁ କାହାକୁ ଚିଲିକାର ବିଧାୟକ ପ୍ରାର୍ଥୀ କରିବା ଦଳ ପାଇଁ ବୁମେରାଂ ହୋଇପାରେ।

ସଂପୂର୍ଣ୍ଣ ନୂଆ ପ୍ରାର୍ଥୀ କେତେ ସମ୍ଭାବନା- ବିଭିନ୍ନ ସମୟରେ ମାଷ୍ଟର ଷ୍ଟ୍ରୋକ ମାରୁଥିବା ବିଜେଡି ହୁଏତ ଶେଷ ମୂହୁର୍ତ୍ତରେ କୌଣସି ନୂଆ ପ୍ରାର୍ଥୀକୁ ଛିଡା କରିପାରେ। ହେଲ ସେ ପ୍ରାର୍ଥୀଙ୍କର ଯଦି ନିଜସ୍ବ ପ୍ରତିଷ୍ଠା ନ ଥିବା ତେବେ ତାଙ୍କୁ ମଧ୍ୟ ଜିତିବା କଷ୍ଟକର ହେବ। ଯାହାକୁ ପାରେ ତାକୁ ଛିଡା କଲେ ସେ ନବୀନଙ୍କ ହାୱାରେ ଜିତିଯିବ ବୋଲି ଯଦି ଦଳ ଭାବୁଥାଏ ତେବେ ଚିଲିକା ପାଇଁ ତାହା ବଡ ଭୁଲ ହେବ।

ବର୍ତ୍ତମାନ ଚିଲିକାରେ ଯେପରି ଛକାପଞ୍ଚା ଚାଲିଛି ସେଥିରେ ଜଣେ ଅଜଣାଅଶୁଣା ଏବଂ ଆମଦାନୀ ବ୍ୟକ୍ତି ପ୍ରାର୍ଥୀ ହେଲେ କର୍ମିମାନେ ଏଥର ନିଶ୍ଚିତ ମୁହଁ ମୋଡି ଦେବେ। ଅନ୍ୟପକ୍ଷରେ ବର୍ତ୍ତମାନ ସେଠାକାର ଯେଉଁ ପରିସ୍ଥିତି ସେଥିରେ ଯଦି ନୂଆ ବ୍ୟକ୍ତିଙ୍କର କିଛି ପ୍ରତିଷ୍ଠା ନ ଥିବ ଏବଂ ସେ ସେହି ଅଞ୍ଚଳର ଜଣେ ଜଣାଶୁଣା ବ୍ୟକ୍ତି ହୋଇ ନ ଥିବେ, ତେବେ ମଧ୍ୟ କଥା ସରିଲା। କର୍ମିମାନେ ଅଗା ଭଗା ଖଗାକୁ ସମର୍ଥନ କରିବା ଅପେକ୍ଷା ବିଜେପି ମୁହାଁ ହେବାର ସମ୍ଭାବନା ଅଧିକ ଦେଖା ଦେବ।

ପ୍ରକୃତ ପକ୍ଷେ ଦେଖିବାକୁ ଗଲେ ଚିଲିକା ନିର୍ବାଚନ ମଣ୍ଡଳୀରେ ଖଣ୍ଡାୟତ ଭୋଟ ପ୍ରତିଶତ ସର୍ବାଧିକ। ଏଥିସହିତ ଖଣ୍ଡାୟତ ବ୍ୟକ୍ତିଙ୍କର ବନ୍ଧୁବାନ୍ଧବମାନଙ୍କ ମଧ୍ୟରେ ସଂପର୍କ ବଡ ନିବିଡିତର, ଯାହା ଭୋଟରେ ପରିଣତ ହୋଇଥାଏ। ଏହି ଖଣ୍ଡାୟତ କାର୍ଡ ଖେଳି ଗତଥର ପ୍ରଶାନ୍ତ ଜଗଦ୍ଦେବ ବାହାରୀ ନେତା ହୋଇଥିଲେ ମଧ୍ୟ ବିପୁଳ ଭୋଟରେ ବିଜୟ ଲାଭ କରିଥିଲେ। ତାଙ୍କର ବିଜୟ ପଛରେ ଯେଉଁ କେତୋଟି କାରଣ ଥିଲା ସେଥିରେ ଏହି ଜାତି କାର୍ଡ ପ୍ରମୁଖ ଭୂମିକା ଗ୍ରହଣ କରିଥିଲା। ସେଥିପାଇଁ ବିଜେଡି ଯଦି ଏଥର ଚିଲିକାରେ ଭାବିଚିନ୍ତି ନିଷ୍ପତି ନ ନିଏ ତେବେ ବିଜେପି ଉପରେ ହୁଏତ ହାତୀ ଠନଠାନ୍ କରି ସୁନା କଳସ ଢାଳି ଦେବ।

ଭୁବନେଶ୍ବର: ଚିଲିକାର ପୂର୍ବତନ ବିଧାୟକ ରଘୁନାଥ ସାହୁଙ୍କୁ ବିଜେଡି ବହିସ୍କାର କରିବା ପରିବର୍ତ୍ତେ ପୁରସ୍କାର ଦେଇଛି। କାରଣ ନିକଟରେ ଶଙ୍ଖ ଭବନରେ ଆୟୋଜିତ ହୋଇଥିବା ଖୋର୍ଦ୍ଧା ଜିଲ୍ଲା ସଂଗଠନର ସମୀକ୍ଷା ବୈଠକରେ ସେ ସାମିଲ ହୋଇଛନ୍ତି। ବଡ ନେତାଙ୍କ ଗହଣରେ ତାଙ୍କୁ ସ୍ଥାନ ମିଳିଛି। ଯାହା ତାଙ୍କ ପାଇଁ ବିଜେଡିର ବଡ ପୁରସ୍କାର ବୋଲି କହିଲେ ଅତ୍ୟୁକ୍ତି ହେବ ନାହିଁ।

କାରଣ ସେ ବିଗତ ଦିନରେ ବିଜେଡିର ବହୁ ନେତାଙ୍କୁ ଗାଳି କରିଥିଲେ, ପଞ୍ଚାୟତ ପୌର ନିର୍ବାଚନରେ ବିଜେଡି ପ୍ରାର୍ଥୀ ହାରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ସେଥିପାଇଁ ସମସ୍ତେ ଭାବି ଥିଲେ ତାଙ୍କ ବିରୋଧରେ ବିଜେଡି କାର୍ଯ୍ୟାନୁଷ୍ଠାନ ନେବ। ହେଲେ ତାହା ହେଲା ନାହିଁ । ବଂର ତାଙ୍କୁ ନିମନ୍ତ୍ରଣ କରି ଶଙ୍ଖ ଭବନରେ ବସାଇଲେ। ଯାହାକୁ ନେଇ ବହୁ ବିଜେଡି କର୍ମି ଏବଂ ନିର୍ବାଚିତ ପ୍ରତିନିଧ ଦଳର ଏପରି ପଦକ୍ଷେପକୁ ନାମପସନ୍ଦ କରିଛନ୍ତି।

ରଘୁନାଥ ଏକଦା ଏକ ସାମ୍ବାଦିକ ସମ୍ମିଳନୀ କରି ସାଂସଦ ପିନାକୀ ମିଶ୍ର, ବିଧାୟକ ପ୍ରଶାନ୍ତ ଜଗଦ୍ଦେବ ଏବଂ ଜିଲ୍ଲା ସଭାପତି ବିଭୂତି ବଳବନ୍ତରାୟଙ୍କୁ ଗାଳି କରିଥିଲେ। ପରୋକ୍ଷରେ ନୁହେଁ ସିଧା ସେମାନଙ୍କ ନାଁ ଧରି ସେମାନେ ଦୁର୍ନିତିଗସ୍ତ ନେତା ବୋଲି କହିଥିଲେ। ସେମାନେ ପିସି କାରବାର କରୁଛନ୍ତି ବୋଲି କହିଥିଲେ। ଏହାର ଉଚିତ ଜବାବ ଦିଆଯିବ ବୋଲି ଜିଲ୍ଲା ସଭାପତି ବିଭୂତି ବଳବନ୍ତରାୟ ବାଲୁଗାଁରେ ଆୟୋଜିତ ବିଜେଡି ବୈଠକରେ କହିଥିଲେ। ହେଲେ ସେଥିରେ ମଧ୍ୟ କିଛି କିଛି ହେଲା ନାହିଁ।

ବିଜେଡିର ନେତାମାନଙ୍କୁ ଖୋଲମଖୁଲା ଗାଳି କରିବା, ସେମାନେ ଦୁର୍ନିତି ଗସ୍ତ ବୋଲି କହିବା, ସେହି ଦୁର୍ନିତିଗସ୍ତ ନେତାଙ୍କ ପାଇଁ ଚିଲିକାରେ ବିଜେଡି ହାରିବ ବୋଲି କହିବା ପରେ ମଧ୍ୟ ରଘୁନାଥଙ୍କୁ ବିଜେଡି କୋଳରେ ବସାଇଲା। ଫଳରେ କର୍ମିମାନେ ଭାବିଲେଣି ଯେ, ଦଳରେ ରହି ଦଳ ବିରୋଧୀ କାମ କଲେ ବୋଧହୁଏ ବିଜେଡି ଖୁସି ହେଉଛି। ବିଜେଡିକୁ ରଘୁନାଥ କି ପ୍ରକାରର ଗଦ ଶୁଙ୍ଘାଇଲେ ତାହା ସମସ୍ତଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି।

ଯଦି ଚିଲିକାର ବିଜେଡି ରାଜନୀତିକୁ ନିରେକ୍ଷୀ ଦେଖାଯାଏ ତେବେ ବିଜେଡିରୁ ବହିସ୍କାର ହୋଇଥିଲେ ମଧ୍ୟ ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ସପକ୍ଷରେ ବହୁ କର୍ମି ଓ ନେତା ରହିଛନ୍ତି। ଏବେ ବି ସେମାନେ ବିଧାୟକଙ୍କୁ ସମର୍ଥନ କରୁଛନ୍ତି। ରଘୁନାଥଙ୍କୁ ବିରୋଧ କରୁଛନ୍ତି। ଯଦି ଆଗାମୀ ଦିନରେ ବିଜେଡି ରଘୁନାଥଙ୍କୁ ଟିକେଟ ଦିଏ, ତେବେ ବିରୋଧୀ ଗୋଷ୍ଠୀଙ୍କୁ ସେ କିପରି ସାଥୀରେ ନେବେ ଏବଂ ସେମାନେ ରଘୁନାଥଙ୍କୁ କିପରି ସାହାଯ୍ୟ କରିବେ ତାହା ସନ୍ଦେହ ଯୁକ୍ତ।

ଭୁବନେଶ୍ବର: ଆଜି ବାଣପୁର ପଲଟନ ପଡିଆରେ ଚାଲିଛି ପଞ୍ଚୁଦୋଳ। ଠିକ ବର୍ଷକ ପୂର୍ବେ ଆଜିର ଦିନରେ ଏହି ସ୍ଥାନରେ ଘଟିଥିଲା ଏକ ରାଜନୈତିକ ହିଂସାକାଣ୍ଡ। ଯାହା ସାରା ରାଜ୍ୟରେ ସୃଷ୍ଟି କରିଥିଲା ହଟଚମଟ। ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବଙ୍କୁ ଏହି ସ୍ଥାନରେ ପ୍ରବଳ ମାଡ ମାରି ଲହୁଲୁହାଣ କରିଥିଲେ ବିଜେପି କର୍ମି।

ସେଦିନ ଥିଲା ୨୦୨୨ ମାର୍ଚ୍ଚ ୧୨ ତାରିଖ। ବର୍ତ୍ତମାନ ବର୍ଷକର ଏହି ଲମ୍ବା ସମୟ ମଧ୍ୟରେ ଚିଲିକା ନିର୍ବାଚନ ମଣ୍ଡଳୀରେ ପରିସ୍ଥିତି କଣ ରହିଛି, ଖୋଦ ବିଧାୟକଙ୍କ ସ୍ଥିତି କିପରି, ତାହାର ହିସାବ ନିକାସ କରିବାର ସମୟ ଆସିଛି।

ବିଧାୟକଙ୍କ ଉପରେ ଆରୋପ ଥିଲା ଯେ, ସେ ଲୋକଙ୍କୁ ଗାଡି ମଡାଇ ଦେଇଥିଲେ। ବର୍ତ୍ତମାନ କୋର୍ଟରେ ଏହି ମାମଲା ଚାଲିଥିବା ବେଳେ ଏହା କେତେ ସତ ତାହାର ରାୟ ଏ ପର୍ଯ୍ୟନ୍ତ ଆସି ନାହିଁ। ତେବେ ପୋଲିସ ରିପୋର୍ଟ ଆଧାରରେ ବିଧାୟକଙ୍କୁ ଗିରଫ କରାଗଲା। ସେ ଜେଲ ଗଲେ।

ସେତିକିରେ କଥା ସରିଲା ନାହିଁ, ତାଙ୍କୁ ଦଳରୁ ବହିସ୍କାର ମଧ୍ୟ କରି ଦିଆଗଲା। ଶେଷରେ ବିଧାୟକଙ୍କୁ ବର୍ଷକ ପାଇଁ ନିର୍ବାଚନ ମଣ୍ଡଳୀ ଯିବାକୁ କୋର୍ଟ ବାରଣ କରିଦେଲେ। ଗୋଟିଏ ପଟେ ମାଡଖାଇ ରକ୍ତାକ୍ତ ହେବା, ଜେଲ ଯିବା, ଦଳରୁ ବହିସ୍କାର ହେବା ଏବଂ ନିର୍ବାଚନ ମଣ୍ଡଳି ଭିତରେ ପଶି ନ ପାରିବା ପ୍ରଭୃତି ନେଇ ବିଧାୟକ ପ୍ରଶାନ୍ତ ଜଗଦ୍ଦେବଙ୍କୁ ଚିଲିକାରେ ବହୁ ମୂଲ୍ୟ ଦେବାକୁ ପଡିଛି।

ସେପଟେ ପ୍ରଶାନ୍ତ ଜଗଦ୍ଦେବଙ୍କ ଏପରି ଅବସ୍ଥାରେ ଚିଲିକା ନିର୍ବାଚନ ମଣ୍ଡଳ ସଂପୂର୍ଣ୍ଣ ଭାବେ ନେତୃତ୍ବ ଛେଉଣ୍ଡ ହୋଇଯାଇଛି। କର୍ମିମାନେ କିଏ କାହାକୁ କିପରି ଗୁହାରି କରିବେ ତାହାର କେହି କିଛି ଥଳକୁଳ ପାଉ ନାହିଁନ୍ତି। ଏପରିକି ବିଜେଡିର ନିର୍ବାଚିତ ପଞ୍ଚାୟତ ଓ ପୌର ପ୍ରତିନିଧିମାନେ ମଧ୍ୟ କଣ କରିବେ କାହାକୁ କହିବେ, ରାସ୍ତା ନ ପାଇ ବାଉଳେଇ ହେଉଛନ୍ତି।

ହେଲେ ଏପରି ପରିସ୍ଥିତିରେ ବିଧାୟକ ନ ଆସିଲେ ନାହିଁ, ଯଦି ସାଂସଦ ପିନାକୀ ମିଶ୍ର ଆସି ଥାଆନ୍ତେ ତେବେ ହୁଏତ ଚିଲିକା କର୍ମି ନେତୃତ୍ବ ଛେଉଣ୍ଡ ହୋଇ ନ ଥାଆନ୍ତେ। ବିଧାୟକ ବଦଳରେ ତାଙ୍କ ନିର୍ଦ୍ଦେଶରେ ହୁଏତ କର୍ମିମାନେ କାମ କରିଥାଆନ୍ତେ। କିନ୍ତୁ ଦୁଃଖର କଥା ସେ ମଧ୍ୟ ଚିଲିକା ନିର୍ବାଚନ ମଣ୍ଡଳିକୁ ହେୟ ଜ୍ଞାନ କଲେ। ତାଙ୍କୁ ଚିଲିକା ନିର୍ବାଚନ ମଣ୍ଡଳୀରେ କର୍ମିମାନେ ସ୍ବଦେହରେ ଦେଖିବା ସ୍ବପ୍ନରେ ପରିଣତ ହୋଇଗଲା। ଚିଲିକାରେ ପିନାକୀଙ୍କ ପାଇଁ ପ୍ରଚାର କରି ଭୁଲ କରିଛୁ ବୋଲି କର୍ମିମାନେ ଭାବି ସାରିଲେଣି।

ଏ ସବୁ ପରିସ୍ଥିତି ଭିତରେ ଦୀର୍ଘ ଦିନ ଧରି ଚୁପ ରହିଥିବା ଚିଲିକାର ପୂର୍ବତନ ବିଧାୟକ ରଘୁନାଥ ସାହୁ ହଠାତ୍ ମୁଣ୍ଡ ଟେକିବା ଆରମ୍ଭ କଲେ। ତେବେ ହାସ୍ୟସ୍ପଦ କଥା ଯେ, ସେ ଏପରି ଅସୁବିଧା ସମୟରେ କର୍ମିମାନଙ୍କୁ ସାଥ୍ ଦେବେ କଣ ଓଲଟି ତାଙ୍କୁ ଗାଳି କରିବା ଆରମ୍ଭ କଲେ। ଯେଉଁମାନେ ରଘୁଙ୍କଆଡକୁ ଟିକିଏ ଢଳିବାକୁ ଚାହୁଁଥିଲେ ସେମାନେ ସବୁ ଫିଡିକି ଗଲେ। ଫଳରେ ଚିଲିକାର ରାଜନୈତିକ ପାଣିକୁ ରଘୁ ପରିସ୍କାର କରିବେ କଣ ତାହାକୁ ଆହୁରି ଗୋଳିଆ କରି ଦେଲେ।

ସର୍ବୋପରି କହିବାକୁ ଗଲେ ଗତବର୍ଷ ଆଜିର ଦିନରେ ବାଣପୁର ପଲଟନ ପଡିଆରେ ଯାହା ଘଟିଲା ତାହା ଥିଲା ଚିଲିକା ରାଜନୈତିକ ଇତିହାସରେ ଏକ ସ୍ମରଣୀୟ ଘଟଣା। ଯାହା କେବେ ପୂର୍ବରୁ ହୋଇ ନ ଥିଲା କିମ୍ବା ଭବିଷ୍ୟତରେ ଏପରି ହେବ ବୋଲି ଆଶା କରାଯାଉ ନାହିଁ। କିନ୍ତୁ ଚିଲିକାର ବିଜେଡି କର୍ମି ଓ ନେତାଙ୍କୁ ଏପରି ବିପଦ ସମୟରେ ନା ବିଧାୟକ, ନା ସାଂସଦ, ନା ପୂର୍ବତନ ବିଧାୟକ, ନା ବିଜୁ ଜନତା ଦଳ, କେହି ଛିଡା ନ ହେବା ହିଁ ସବୁଠୁ ବଡ ଦୁଃଖଦାୟକ ଘଟଣା କହିଲେ ଅତ୍ୟୁକ୍ତି ହେବ ନାହିଁ।