Tag: ଭାଲୁ ଆକ୍ରମଣ

କନ୍ଦର୍ପ ବେହେରା
ରେଢାଖୋଲ: ନାକଟିଦେଉଳ ରେଞ୍ଜ ଅଂଚଳରେ ଦିନକୁ ଦିନ ବନ୍ୟଜନ୍ତୁମାନଙ୍କର ପ୍ରାର୍ଦୁଭାବରେ ଲୋକମାନେ ନାହିଁ  ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଗତକାଲି ରେଢାଖୋଲ ବନଖଣ୍ଡ ଡଇଁଚା ପଂଚାୟତ ଗୋପାଳପୁର ଗ୍ରାମରେ ଜଣେ ବୃଦ୍ଧା କେନ୍ଦୁପତ୍ର ତୋଳିବା ପାଇଁ ଜଙ୍ଗଲକୁ ଯାଇଥିବା ବେଳେ ଏକ ଦନ୍ତା ହାତୀ ଆକ୍ରମଣରେ ମୃତ୍ୟୁ ବରଣ କରିଥିଲେ। କିନ୍ତୁ ଆଜି ନାକଟିଦେଉଳ ରେଞ୍ଜ ଅଧିନସ୍ଥ ବାଟଗାଁ ସେକସନର ଚଡଚଡି ଗ୍ରାମରେ ଜନୈକ ବ୍ୟକ୍ତି ଦିନ ଦି ପହରରେ ଭାଲୁ ଆକ୍ରମଣର ଶିକାର ହୋଇଥିବା ବନବିଭାଗ ସୂତ୍ରରୁ ଜଣା ପଡିଛି। ଗୁରୁତର ଆହତ ଜଣଙ୍କ ଚଡଚଡି ଗ୍ରାମର ରମେଶ ପ୍ରଧାନ ବୋଲି ଜଣା ପଡିଛି।

ବନବିଭାଗ ସୂତ୍ରରୁ ପ୍ରକାଶ ଯେ, ନାକଟିଦେଉଳ ରେଞ୍ଜ ଅଧିନସ୍ଥ ବାଟଗାଁ ସେକସନ୍ ଅନ୍ତର୍ଗତ ଚଡଚଡି ଗ୍ରାମର ରମେଶ ପ୍ରଧାନ (୫୦) ବନବିଭାଗର କାମ କରିବାକୁ ବନବିଭାଗର କର୍ମଚାରୀମାନଙ୍କ ସହ ନିକଟସ୍ଥ ଜଙ୍ଗଲକୁ ଯାଇଥିଲେ। କାମ ସାରି ଦିନ ୧୨.୨୦ ମିନିଟରେ ନିଜ ଘରକୁ ଫେରୁଥିବା ସମୟରେ ଜଙ୍ଗଲରେ ଏକ ଭାଲୁ ଅଚାନକ ତାଙ୍କୁ ଆକ୍ରମଣ କରିଥିଲା। ଅନ୍ୟ କର୍ମଚାରୀମାନେ ଦୂରରେ ଥିବାରୁ ସେମାନେ କିଛି ଜାଣି ପାରି ନ ଥିଲେ। କିଛି ସମୟ ପରେ ଆସି ଦେଖିଲା ବେଳକୁ ରମେଶକୁ ଭାଲୁ ଆକ୍ରମଣ କରୁଥିଲା। ଭାଲୁ କର୍ମଚାରୀମାନଙ୍କୁ ଦେଖିପାରି ପଳାଇଯାଇଥିଲା।

ଗରୁତର ଆହତ ରମେଶକୁ ତୁରନ୍ତ ନାକଟିଦେଉଳ ଡାକ୍ତରଖାନାକୁ ନେଇ ପ୍ରାଥମିକ ଚିକିତ୍ସା କରିଥିଲେ ବନବିଭାଗର କର୍ମଚାରୀମାନେ । ଅବସ୍ଥା ଗୁରୁତର ହେବାରୁ ବୁର୍ଲା ଡାକ୍ତରଖ।।ନକୁ ପଠାଇଥିବା ଜଣା ପଡିଛି । ମୁହଁ ରେ ଗଭୀର କ୍ଷତ ହୋଇଥିବା ଜଣା ପଡିଛି ।

କନ୍ଦର୍ପ ବେହେରା
ରେଢାଖୋଲ: ଆଜି ସକାଳେ ଚାରମାଳ ଥାନା ବଡମୁଗପାଳ ଗ୍ରାମରେ ଜଣେ ବ୍ୟକ୍ତିକୁ ଭାଲୁ ଆକ୍ରମଣ କରିଥିବା ଖବର ହସ୍ତଗତ ହୋଇଛି।

ପ୍ରକାଶ ଯେ, ଆଜି ସକାଳୁ ଚାରମାଳ ଥାନା ବଡମୁଗପାଳ ଗ୍ରାମର ପରମେଶ୍ୱର ପ୍ରଧାନ (୬୫) ନାମକ ଚାଷୀ ନିଜ ଚାଷ ଜମିକୁ ଧାନ ଦେଖି ଯାଇଥିଲେ। ଚାଷ ଜମି ପାଖକୁ ଲାଗି ଜଙ୍ଗଲ ଥିବାରୁ ପରମେଶ୍ୱର କାଠି ଭାଙ୍ଗିବାକୁ ଯାଇଥିଲେ। ଜଙ୍ଗଲରେ ଭାଲୁ ଦୁଇଟିକୁ ଦେଖି ସେ ଶୋଇପଡିଥିଲେ। କାହିଁ କି ନା ମଣିଷ ଶୋଇ ପଡିଲେ କୁଆଡେ ଭାଲୁ ଆକ୍ରମଣ କରିନଥାଏ ବୋଲି ଲୋକମାନଙ୍କର ବିଶ୍ୱାସ ରହିଛି। ସତକୁ ସତ ଭାଲୁଟି ପରମେଶ୍ୱର ପାଖକୁ ଆସି ତାର ମୁଣ୍ଡ ଉପରେ ଗୋଡ ରଖି ତାଙ୍କୁ ଶୁଙ୍ଘାବା ପରେ ପରମେଶ୍ୱରଙ୍କ ହାତକୁ ସାମାନ୍ୟ କାମୁଡିଦେଇ ଥିଲା।

ସେ ଶୋଇ ପଡିବାରୁ ଭାଲୁ ବିଶେଷ କ୍ଷତି କରିପାରି ନ ଥିଲା। ଭାଲୁ ଦୂରକୁ ପଳାଇବାରୁ ସେ ଉଠି ପଡି ଜୀବନ ବିକଳରେ ପଳାଇ ଆସୁଥିବା ବେଳେ ପୁଣି ଭାଲୁ ଦୁଇଟି ଆକ୍ରମଣ ଉଦ୍ୟମ କରିଥିଲେ। ହେଲେ ସେ କୌଶଳ କ୍ରମେ ପଳାଇବାରେ ସକ୍ଷମ ହୋଇଥିବା ବେଳେ ଚାରମାଳ ଡାକ୍ତରଖାନାକୁ ଆସି ଚିକିତ୍ସିତ ହୋଇଥିଲେ।

ଦିନକୁ ଦିନ ରେଢାଖୋଲ ଉପଖଣ୍ଡରେ ହାତୀ ଓ ଭାଲୁ ମାନଙ୍କର ପ୍ରାଦୃର୍ଭାବ ଯୋଗୁଁ ଲୋକମାନେ ନାହିଁ ନ ଥିବା ଦୁର୍ଦ୍ଦଶା ଭୋଗୁଛନ୍ତି। ବର୍ତ୍ତମାନ ପରମେଶ୍ୱର ସୁସ୍ଥ ଥିବା ଜଣା ପଡିଛି।

କନ୍ଦର୍ପ ବେହେରା
ରେଢାଖୋଲ: ରେଢାଖୋଲ ଥାନା ବଂଶାଜାଲ ପଂଚାୟତର ହେଲେଇ ଗ୍ରାମରେ ଜଣେ ଚାଷୀକୁ ଭାଲୁ ଆକ୍ରମଣ କରିବା ଫଳରେ ସେ ଆହତ ହୋଇ ରେଢାଖୋଲ ଡାକ୍ତରଖାନାରେ ଚିକିତ୍ସିତ ହେଉଥିବା ଜଣା ପଡିଛି।

ପ୍ରକାଶ ଯେ, ରେଢାଖୋଲ ଥାନା ହେଲେଇ ଗ୍ରାମର ଚାଷୀ ସିତାନୁ ପ୍ରଦାନ (୨୬) ନିଜ ଚାଷ ଜମିକୁ ଯାଇଥିବା ବେଳେ ନିକଟସ୍ଥ ଜଙ୍ଗଲରୁ ଏକ ଭାଲୁ ଆସି ତାଙ୍କୁ ହଠାତ୍ ଆକ୍ରମଣ କରିଥିଲା। ଭାଲୁଟି ଚାଷୀଙ୍କର ଦୁଇ ଗୋଡକୁ କାମୁଡି ଦେଇଥିଲା। ଚାଷୀ ଜଣଙ୍କ ବହୁତ ପାଟି କରିଥିଲେ ମଧ୍ୟ ନିକଟରେ କେହି ନଥିବାରୁ ସେ ସାହସର ସହ ଭାଲୁକୁ ଏକ ଖାଲରେ ଠେଲିଦେଇ ଗାଁ କୁ ପଳାଇ ଆସିବାରେ ସଫଳ ହୋଇଥିଲା। ରକ୍ତ ଜୁଡୁବୁଡୁ ଚାଷୀ ଜଣଙ୍କୁ ୧୦୮ ଆମ୍ବୁଲାନସ୍ ରେ ରେଢାଖୋଲ ଡାକ୍ତରଖାନାକୁ ଚିକିତ୍ସା ପାଇଁ ଆଣିଥିଲେ ପରିବାର ଲୋକେ । ସେ ସୁସ୍ଥ ଥିବା ଜଣା ପଡିଛି।

କନ୍ଦର୍ପ ବେହେରା

ରେଢାଖୋଲ: ଆଜି ସକାଳୁ ସକାଳୁ ବାଟଗାଁ ପଂଚାୟତର ଗଦାଧରପୁର ଗାଁରେ ନିଜ ବିଲକୁ ଚାଷ କାମରେ ଯାଇଥିବା ବେଳେ ୨ ଜଣଙ୍କୁ ଭାଲୁ ଆକ୍ରମଣ କରିଥିବା ବନବିଭାଗ ତରଫରୁ ସୂଚନା ମିଳିଛି।

ବନବିଭାଗ ସୂତ୍ରରୁ ପ୍ରକାଶ ଯେ, ନାକଟିଦେଉଳ ରେଞ୍ଜ ଅଧିନସ୍ଥ ବାଟଗାଁ ପଂଚାୟତର ଗଦାଧରପୁର ଗ୍ରାମର ରବି ବେହେରା(୫୫), ଏବଂ ସେହି ଗାଁର ସର ବେହେରା (୪୫) ଜମିକୁ ଚାଷ କାମରେ ଯାଇଥିବା ବେଳେ ସେମାନଙ୍କୁ ଗୋଟିଏ ଭାଲୁ ଆସି ଅଚାନକ ଆକ୍ରମଣ କରିିଥିଲା। ସେମାନଙ୍କୁ ଗ୍ରାମବାସୀ ଉଦ୍ଧାର କରି ସଙ୍ଗେ ସଙ୍ଗେ ନାକଟିଦେଉଳ ଡାକ୍ତରଖାନାକୁ ନେଇ ପ୍ରାଥମିକ ଚିକିତ୍ସା କରିବା ପରେ ଅବସ୍ଥା ଗୁରୁତର ହେବାରୁ ସେମାନଙ୍କୁ ବୁର୍ଲା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିବା  ସୂଚନା ମିଳିଛି। ରବି ବେହେରାଙ୍କର ଜଙ୍ଘରେ ଗଭୀର ଆଘାତ ଲାଗିଥିବା ବେଳେ ସର ବେହେରାଙ୍କର ହାତରେ ମଧ୍ୟ ଆଘାତ ଲାଗିଥିବା ଜଣା ପଡିଛି। ବର୍ତ୍ତମାନ’ ସେମାନଙ୍କ ଅବସ୍ଥା ଠିକ୍ ଥିବା ଜଣା ପଡିଛି। ବନ ବିଭାଗ ତରଫରୁ ସେମାନଙ୍କୁ ସରକାରଙ୍କର ତରଫରୁ ଆବଶ୍ୟକ ସାହାଯ୍ୟ ଯୋଗାଇ ଦିଆଯିବ ବୋଲି ବାଟଗାଁ ଫରେଷ୍ଟର ଅନିଲ୍ କିସାନ୍ ପ୍ରକାଶ କରିଛନ୍ତି।

ସୂଚନା ଯୋଗ୍ୟ ଯେ କିଛି ଦିନ ତଳେ ତା୧୬/୭/୨୦୨୧ ରେ ନାକଟିଦେଉଳ ରେଞ ଅଧିନସ୍ଥ ଅଙ୍ଗାବିରା ଗ୍ରାମର ରାଜା ସ୍ୱାଇଁ ନାମକ ବ୍ୟକ୍ତି ଜଙ୍ଗଲକୁ ଯାଇଥିବା ବେଳେ ଏକ ଭାଲୁ ତାଙ୍କୁ ଆକ୍ରମଣ କରିଥିଲା। ତାଙ୍କୁ ଗ୍ରାମବାସୀ ଉଦ୍ଧାର କରି ସଙ୍ଗେ ସଙ୍ଗେ ନାକଟିଦେଉଳ ଡାକ୍ତରଖାନାକୁ ନେଇଥିଲେ। ନାକଟିଦେଉଳ ରେଞର ବାଟଗାଁ ଓ ଜାମୁଜୋରି ପଂଚାୟତରେ ଭାଲୁ ଓ ହାତୀ ମାନଙ୍କର ଉପଦ୍ରବରେ ଲୋକମାନେ ଅତିଷ୍ଠ ହୋଇ ପଡିଥିବା ବେଳେ ବହୁ ଜଣଙ୍କର ଜୀବନ ମଧ୍ୟ ଯାଇଛି । ଜଙ୍ଗଲକୁ ନ ଯିବା ପାଇଁ ବନ ବିଭାଗ ବାରମ୍ବାର ସଚେତନ କରୁଥିଲେ ମଧ୍ୟ ଏଠାକାର ଜନସାଧାରଣ ମାନୁ ନ ଥିବାରୁ ହିଂସ୍ର ଜନ୍ତୁଙ୍କର ଆକ୍ରମଣର ଶିକାର ହେଉଛନ୍ତି।

କନ୍ଦର୍ପ ବେହେରା
ରେଢାଖୋଲ: ନାକଟିଦେଉଳ ରେଞ୍ଜ ଅଧିନସ୍ଥ ଅଙ୍ଗାବିରା ଗ୍ରାମରେ ଜନୈକ ବ୍ୟକ୍ତିକୁ ଭାଲୁ ଆକ୍ରମଣ କରିଥିବା ଜଣା ପଡିଛି।

ଖବରରୁ ପ୍ରକାଶ ଯେ, ନାକଟିଦେଉଳ ରେଞ୍ଜ ଅଧିନସ୍ଥ ଅଙ୍ଗାବିରା ଗ୍ରାମର ରାଜା ସ୍ୱାଇଁ ନାମକ ବ୍ୟକ୍ତି ଜଙ୍ଗଲକୁ ଯାଇଥିବା ବେଳେ ଏକ ଭାଲୁ ତାଙ୍କୁ ଆକ୍ରମଣ କରିଥିଲା। ତାଙ୍କର ଜଙ୍ଘରେ ଗଭୀର ଆଘାତ ଲାଗିଥିବା ଜଣା ପଡିଛି। ତାଙ୍କୁ ଗ୍ରାମବାସୀ ଉଦ୍ଧାର କରି ସଙ୍ଗେ ସଙ୍ଗେ ନାକଟିଦେଉଳ ଡାକ୍ତରଖାନାକୁ ନେଇଥିବା ବେଳେ ସେଠାରେ ପ୍ରାଥମିକ ଚିକିତ୍ସା କରି ତାକୁ ପୁଣି ରେଢାଖୋଲ ଡାକ୍ତରଖାନାକୁ ସ୍ଥାନାନ୍ତରିତ କରଯାଇଥିବା ଜଣା ପଡିଛି।

କନ୍ଦର୍ପ ବେହେରା
ରେଢାଖୋଲ: ନାକଟିଦେଉଳ ବ୍ଲକ୍ ଜାମୁଯୋରୀ ଗାଁ ରେ ନିଜ ଜମିକୁ ଯାଇଥିବା ବେଳେ ଜଣେ ଚାଷୀକୁ ଭାଲୁ କାମୁଡିବାରୁ ଗୁରୁତର ଆହତ ହୋଇ ରେଢାଖୋଲ ଡାକ୍ତରଖାନାରେ ଚିକିତ୍ସିତ ହେଉଥିବା ଖବର ହସ୍ତଗତ ହୋଇଛି।

ବନବିଭାଗ ସୂତ୍ରରୁ ପ୍ରକାଶ ଯେ, ନାକଟିଦେଉଳ ବନଖଣ୍ଡ ଜାମୁଜୋରୀ ଗ୍ରାମର ଗୋବିନ୍ଦ ଓରାମ(୪୫) ନିଜ ଜମିକୁ ଚାଷକାମରେ ଯାଇଥିବା ବେଳେ ଜଙ୍ଗଲରୁ ଏକ ଭାଲୁ ଆସି ତାଙ୍କର ବାମ ଗୋଡ ଜଙ୍ଘରେ କାମୁଡି ଦେଇଥିଲା। ଗ୍ରାମବାସୀ ଖବର ପାଇ ତାଙ୍କୁ ତୁରନ୍ତ ଉଦ୍ଧାର କରି ଆମ୍ବୁଲାନସ୍‌ରେ ରେଢାଖୋଲ ଡାକ୍ତରଖାନାକୁ ପଠାଇ ସେଠାରେ ଚିକିତ୍ସିତ କରାଇଥିଲେ। ଜଙ୍ଘରେ ଗଭୀର କ୍ଷତ ହୋଇଥିବା ଜଣା ପଡିଛି।

ବର୍ତ୍ତମାନ ତାଙ୍କର ଅବସ୍ଥା ଠିକ୍ ଥିବା ଜଣା ପଡିଛି। ସରକାରଙ୍କ ବନବିଭାଗ ତରଫରୁ ଆବଶ୍ୟକୀୟ ଆର୍ଥିକ ସହଯୋଗ ଆହତ ଗୋବିନ୍ଦଙ୍କୁ ଦିଆଯିବ ବୋଲି ବାଟଗାଁ ଫରେଷ୍ଟର ଅନିଲ କିସାନ୍ ପ୍ରକାଶ କରିଛନ୍ତି।

କନ୍ଦର୍ପ ବେହେରା
ରେଢାଖୋଲ: ଆଜି ରେଢାଖୋଲ ବ୍ଲକ୍ ବଣୀଆଁବନ୍ଧରେ ଭାଲୁ ଆକ୍ରମଣରେ ୨ ଜଣ ବ୍ୟକ୍ତିଙ୍କର ମୃତ୍ୟୁହୋଇଥିବା ବେଳେ ଜଣେ ଆହତ ହୋଇଥିବା ଖବର ହସ୍ତଗତ ହୋଇଛି।

ପ୍ରକାଶ ଯେ ରେଢାଖୋଲ ବ୍ଲକ୍ ବଡବାହାଳ ରେଞ ଅଧିନସ୍ଥ ବଣିଆଁବନ୍ଧ ଗ୍ରାମରେ ୫ ଜଣ ମହୁଖାଇବା ପାଇଁ ଜଙ୍ଗଲକୁ ଯାଇଥିବା ସମୟରେ ଭାଲୁ ହାବୁଡରେ ପଡିଯାଇଥିଲେ। ସେଇ ସମୟରେ ଭାଲୁଟି ୨ଜଣ ବ୍ୟକ୍ତିଙ୍କୁ ମାରି ଦେଇଥିବା ବେଳେ ଜଣେ ଗୁରୁତର ଆହତ ହୋଇଥିବା ଜଣା ପଡିଛି। ଆଉ ୨ ଜଣ ବ୍ୟକ୍ତି ଗଛ ଉପରକୁ ଚଢି ଜୀବନ ରକ୍ଷା କରିଥିବା ବେସରକାରୀ ସୂତ୍ରରୁ ପ୍ରକାଶ। ମୃତ୍ୟୁବରଣ କରିଥିବା ବ୍ୟକ୍ତି ଦୁଇ ଜଣ ହେଲେ ଚେରୁ ମୁଣ୍ଡା(୫୮) ଏବଂ କୃଷ୍ନ ମୁଣ୍ଡା(୩୮) ବୋଲି ଜଣା ପଡିଛି। ଆହତ ବ୍ୟକ୍ତି ଜଣଙ୍କ ଆଶାଢୁ ମୁଣ୍ଡା(୩୬)। ଆହତ ଅଶାଢୁ ମୁଣ୍ଡା ଘୁଷୁରୁ ଘୁଷୁରି ଆସି ଜୀବନ ରକ୍ଷା କରିଥିବା ଜଣା ପଡିଛି। ଗଛ ଉପରେ ଚଢି ରହିଥିବା ଲୋକ ଦୁଇ ଜଣଙ୍କର ପରିଚୟ ମିଳିପାରି ନାହିଁ।

ରଜ ପର୍ବକୁ ଆଖି ଆଗରେ ରଖି ରେଢାଖୋଲ ଅଂଚଳର ଲୋକମାନେ ମହୁସଂଗ୍ରହ ପାଇଁ ଜଙ୍ଗଲ ଯାଇଥାନ୍ତି। ମହୁସଂଗ୍ରହ କରି ଘରକୁ ଆସି ସାହି ପଡିଶା ଓ ସଂପର୍କିୟମାନଙ୍କୁ ଦେଇଥାନ୍ତି। ରେଢାଖୋଲ ଅଂଚଳରେ ରଜ ସଂକ୍ରାନ୍ତି ଦିନ ମହୁଖାଇବା ପରଂପରା କେଉଁ ଆବାହାମାନ କାଳରୁ ରହି ଆସିଛି। ତେଣୂ ବଣୀଆଁବନ୍ଧ ଗ୍ରାମର ଲୋକମାନେ ଏହି ପରଂପରାକୁ ବଜାୟ ରଖିବା ପାଇଁ ମହୁ ସଂଗ୍ରହପାଇଁ ଜଙ୍ଗଲକୁ ଯାଇଥିଲେ।