ଭୁବନେଶ୍ବର: ଆସନ୍ତାକାଲି ମହାଶିବ ରାତ୍ରି। ସେଥିପାଇଁ ରାଜ୍ୟର ସମସ୍ତ ଶୈବ୍ୟପିଠରେ ଚାଲିଛି ପ୍ରସ୍ତୁତି। କାରଣ ଆସନ୍ତାକାଲି ବହୁ ଭକ୍ତଙ୍କର ସମାଗମ ହେବା ସହିତ ରାତିସାରା ଦୀପ ଜାଳି ଉପବାସ କରିବେ। ସେଥିପାଇଁ ଭକ୍ତମାନେ ଠିକ ଭାବେ ପୂଜାବିଧି କରିବା ପାଇଁ ଶିବ ମନ୍ଦିରରେ ବ୍ୟବସ୍ଥା କରାଯାଇଛି।
ଓଡିଶାର ପ୍ରସିଦ୍ଧ ଶୈବ୍ୟପିଠ ପ୍ରଭୃ ଲିଙ୍ଗରାଜଙ୍କ ମନ୍ଦିରରେ ମଧ୍ୟ ବ୍ୟାପକ ବ୍ୟବସ୍ଥା କରାଯାଇଛି। ଶିବରାତ୍ରି ଦିନ ସ୍ବତନ୍ତ୍ର ନୀତିକାନ୍ତି କରାଯିବ। ସେଥିପାଇଁ ମନ୍ଦିର ପ୍ରଶାସନ ବୈଠକ ବସି ନୀତିକାନ୍ତି ସମୟ ନିର୍ଘଣ୍ଟ କରାଯାଇଛି।
ସେହି ଅନୁସାରେ ଆସନ୍ତା କାଲି ରାତି ଦଶଟାରେ ଉଠିବ ମହାଦ୍ବୀପ। ସେହିଦିନ ଭୋର 3ଟାରୁ ଦିନ 11 ଟା ପର୍ଯ୍ୟନ୍ତ ହେବ ସାହାଣମେଲା। ଏହାପରେ ବିଭିନ୍ନ ନୀତିକାନ୍ତି କରାଯିବ।ସେହିପରି ରାତିରେ ମହାଦ୍ବୀପ ଉଠିସାରିବା ପରେ ଭୋର 3ଟା 45 ରେ ହରିହର ଭେଟ କାର୍ଯ୍ୟକ୍ରମ ରହିଛି।
ସାରା ଓଡିଶାରୁ ଏହି ପିଠକୁ ଭକ୍ତମାନଙ୍କର ସୁଅ ଛୁଟିବ। ସେଥିପାଇଁ ମନ୍ଦିର ପ୍ରଶାସନ ତରଫରୁ ସବୁ ବନ୍ଦୋବସ୍ତ କରାଯାଇଛି। ଏପରିକି ପୋଲିସ ପ୍ରଶାସନ ତରଫରୁ ମଧ୍ୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି।