Tag: ରିଲାଏନ୍ସ

ମୁମ୍ବାଇ: ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍‌, ଭାୟାକମ୍ ଏଇଟିନ ମିଡିଆ ପ୍ରାଇଭେଟ ଲିମିଟେଡ୍ ଏବଂ ୱାଲ୍ଟ ଡିଜନି କମ୍ପାନୀ ପକ୍ଷରୁ ଘୋଷଣା କରାଯାଇଛି ଯେ ଭାୟାକମ୍ ଏଇଟିନର ମିଡିଆ ଏବଂ ଜିଓ ସିନେମା ବ୍ୟବସାୟର ଷ୍ଟାର୍ ଇଣ୍ଡିଆ ପ୍ରାଇଭେଟ ଲିମିଟେଡ୍ ସହିତ ମିଶ୍ରଣ ସମାପ୍ତ ହୋଇଛି। ଏନସିଏଲଟି ମୁମ୍ବାଇ, ସିସିଆଇ ଏବଂ ଅନ୍ୟାନ୍ୟ ନିୟାମକ କର୍ତ୍ତୃପକ୍ଷଙ୍କ ଅନୁମୋଦନ ପରେ ଏହି ଘୋଷଣା କରାଯାଇଛି। ଏହା ସହିତ ରିଲାଏନ୍ସ ଏହି ମିଳିତ ଉଦ୍ୟୋଗରେ, ୧୧,୫୦୦ କୋଟି ଟଙ୍କା ନିବେଶ କରିଛି। ମିଳିତ ଉଦ୍ୟୋଗ ପକ୍ଷରୁ ଭାୟାକମ ୧୮ ଏବଂ ରିଲାଏନ୍ସ ଇଣ୍ଡଷ୍ଟ୍ରିଜକୁ ସେୟାର ଆବଣ୍ଟିତ କରାଯାଇଛି।

ଏହି କାରବାରରେ ପୋଷ୍ଟ-ମନି ଆଧାରରେ ମିଳିତ ଉଦ୍ୟୋଗର ମୂଲ୍ୟ ୭୦,୩୫୨ କୋଟି ଟଙ୍କା (୮.୫ ବିଲିୟନ ଡଲାର) ଭାବେ ଗ୍ରହଣ କରାଯାଇଛି। ମିଳିତ ଉଦ୍ୟୋଗରେ ଆରଆଇଏଲର ନିୟନ୍ତ୍ରଣ ରହିବ । ଏଥିରେ, ଆରଆଇଏଲ ର ୧୬.୩୪%, ଭାୟାକମ ୧୮ ର ୪୬.୮୨% ଏବଂ ଡିଜନି ର ୩୬.୮୪% ଭାଗିଦାରୀ ରହିବ।

ମିଳିତ ଉଦ୍ୟୋଗର ଚେୟାରପର୍ସନ ନୀତା ଏମ. ଅମ୍ବାନୀ ରହିଥିବାବେଳେ ଉଦୟ ଶଙ୍କରଙ୍କୁ ରଣନୀତିକ ମାର୍ଗଦର୍ଶନ ପାଇଁ ମିଳିତ ଉଦ୍ୟୋଗର ଉପାଧ୍ୟକ୍ଷ କରାଯାଇଛି।

ଏହି ମିଳିତ ଉଦ୍ୟୋଗରେ ଭାରତର ଟିଭି ଏବଂ ଡିଜିଟାଲ୍ ପ୍ଲାଟଫର୍ମରେ ସବୁଠାରୁ ପ୍ରତିଷ୍ଠିତ ଏବଂ ଆକର୍ଷଣୀୟ ମିଡିଆ ବ୍ରାଣ୍ଡ ସମୂହ ରହିଛି। ଟିଭି ଚ୍ୟାନେଲ ‘ଷ୍ଟାର’ ଏବଂ ‘କଲର୍ସ’ ବ୍ୟତୀତ ଡିଜିଟାଲ୍ ପ୍ଲାଟଫର୍ମରେ ‘ଜିଓ ସିନେମା’ ଏବଂ ‘ହଟଷ୍ଟା’ର୍ ଦର୍ଶକଙ୍କୁ ମନୋରଞ୍ଜନ ଏବଂ କ୍ରୀଡା ସମ୍ବନ୍ଧୀୟ ବିଷୟବସ୍ତୁର ଏକ ବ୍ୟାପକ ପସନ୍ଦ ପ୍ରଦାନ କରିବ।

ଏହି ମିଳିତ ଉଦ୍ୟୋଗ ଭାରତର ଅନ୍ୟତମ ବୃହତ୍ତମ ମିଡିଆ ଏବଂ ମନୋରଞ୍ଜନ କମ୍ପାନୀ ହେବ ଯାହାର ମାର୍ଚ୍ଚ ୨୦୨୪ ରେ ଶେଷ ହୋଇଥିବା ଆର୍ôଥକ ବର୍ଷରେ ପ୍ରୋ-ଫର୍ମା ମିଳିତ ଆୟ ପ୍ରାୟ ୨୬,୦୦୦ କୋଟି ଟଙ୍କା ରହିଥିଲା। ମିଳିତ ଉଦ୍ୟୋଗ ୧୦୦ ରୁ ଅଧିକ ଟିଭି ଚ୍ୟାନେଲ ପରିଚାଳନା କରୁଥିବା ବେଳେ ବାର୍ଷିକ ୩୦,୦୦୦ ଘଣ୍ଟାରୁ ଅଧିକ ଟିଭି ମନୋରଞ୍ଜନ ବିଷୟବସ୍ତୁ ପ୍ରସ୍ତୁତ କରିଥାଏ। ଜିଓସିନେମା ଏବଂ ହଟଷ୍ଟାର ଡିଜିଟାଲ୍ ପ୍ଲାଟଫର୍ମର ମୋଟ ସବସ୍କ୍ରିପସନ ସଂଖ୍ୟା ୫ କୋଟିରୁ ଅଧିକ ରହିଛି। ମିଳିତ ଉଦ୍ୟୋଗ ନିକଟରେ କ୍ରିକେଟ୍‌, ଫୁଟବଲ୍ ଏବଂ ଅନ୍ୟ କ୍ରୀଡାରେ କ୍ରୀଡ଼ା ଅଧିକାରର ଏକ ବୃହତ ପୋର୍ଟଫୋଲିଓ ରହିଛି।

୨୭ ଅଗଷ୍ଟ ୨୦୨୪ ରେ ସିସିଆଇ ଏହି କାରବାରକୁ ଅନୁମୋଦନ ପ୍ରଦାନ କରିଥିଲା। ସିସିଆଇ ବ୍ୟତୀତ ୟୁରୋପୀୟ ୟୁନିଅନ୍‌, ଚୀନ୍‌, ତୁର୍କୀ, ଦକ୍ଷିଣ କୋରିଆ ଏବଂ ୟୁକ୍ରେନର ଏଣ୍ଟି-ଟ୍ରଷ୍ଟ ଅଧିକାରୀଙ୍କ ଅନୁମୋଦନ ମଧ୍ୟ ମିଳିସାରିଛି।

ମିଳିତ ଉଦ୍ୟୋଗ ସମ୍ବନ୍ଧରେ ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ମୁକେଶ ଡି ଅମ୍ବାନୀ କହିଛନ୍ତି, “ଏହି ମିଳିତ ଉଦ୍ୟୋଗ ଗଠନ ହେବା ସହିତ ଭାରତୀୟ ଗଣମାଧ୍ୟମ ଏବଂ ମନୋରଞ୍ଜନ ଶିଳ୍ପ ଏକ ପରିବର୍ତ୍ତନକାରୀ ଯୁଗରେ ପ୍ରବେଶ କରୁଛି। ଡିଜନି ସହିତ ଆମର ସମ୍ପର୍କ ବ୍ୟତୀତ, ଆମର ଗଭୀର ସୃଜନଶୀଳ ଅଭିଜ୍ଞତା ଏବଂ ଭାରତୀୟ ଗ୍ରାହକଙ୍କୁ ଜାଣିବାରେ ଆମର ଅଭିଜ୍ଞତା ଭାରତୀୟ ଦର୍ଶକଙ୍କ ପାଇଁ ସୁଲଭ ମୂଲ୍ୟରେ ପରିପୂର୍ଣ୍ଣ ବିଷୟବସ୍ତୁ ସୁନିଶ୍ଚିତ କରିବ। ମିଳିତ ଉଦ୍ୟୋଗର ଭବିଷ୍ୟତକୁ ନେଇ ମୁଁ ବେଶ ଉତ୍ସାହିତ ଏବଂ ଏହାର ସଫଳତା କାମନା କରୁଛି।”

ୱାଲ୍ଟ ଡିଜନି ସିଇଓ ରବର୍ଟ ଏ. ଇଗର୍ କହିଛନ୍ତି, “ଏହା ଆମ ସହିତ ଭାରତର ଗ୍ରାହକମାନଙ୍କ ପାଇଁ ଏକ ରୋମାଞ୍ଚକ ମୁହୂର୍ତ୍ତ, କାରଣ ଏହି ମିଳିତ ଉଦ୍ୟୋଗ ମାଧ୍ୟମରେ ଆମେ ଦେଶରେ ଅନ୍ୟତମ ପ୍ରମୁଖ ମନୋରଞ୍ଜନ ସଂସ୍ଥା ସୃଷ୍ଟି କରୁଛୁ। ରିଲାଏନ୍ସ ସହିତ ମିଳିତ ଭାବରେ ଆମେ ଏହି ଗୁରୁତ୍ତ୍ୱପୂର୍ଣ୍ଣ ମିଡ଼ିଆ କ୍ଷେତ୍ରରେ ଦର୍ଶକଙ୍କୁ ମନୋରଞ୍ଜନ, କ୍ରୀଡା ବିଷୟବସ୍ତୁ ଏବଂ ଡିଜିଟାଲ୍ ସେବାଗୁଡିକର ଆହୁରି ଅଧିକ ଶକ୍ତିଶାଳୀ ପୋର୍ଟଫୋଲିଓ ପ୍ରଦାନ କରିବୁ।”

ବୋଧି ଟ୍ରି ସିଷ୍ଟମର ସହ-ପ୍ରତିଷ୍ଠାତା ଉଦୟ ଶଙ୍କର କହିଛନ୍ତି, “ଭାରତରେ ମିଡିଆ ଏବଂ ମନୋରଞ୍ଜନ ଶିଳ୍ପରେ ପରିବର୍ତ୍ତନ ଆଣିବାର ଏହି ଯାତ୍ରାରେ ଭାଗିଦାର ହୋଇ ଜେମ୍ସ ଓ ମୁଁ ବେଶ ଉତ୍ସାହିତ ଅଛୁ। ସୃଜନଶୀଳତା, ପରିବର୍ତ୍ତନ ତଥା ନୂତନ ଯୁଗର ଗ୍ରାହକଙ୍କୁ ଅଭୁତପୁର୍ବ ସ୍ତରର ଅନୁଭବ ପ୍ରଦାନ କରିବ ପାଇଁ ଆମେ ପ୍ରତିବଦ୍ଧ। ମିଳିତ ଭାବରେ ଭାରତର ସର୍ବବୃହତ ସମନ୍ୱିତ ମିଡିଆ ପ୍ଲାଟଫର୍ମ ନିର୍ମାଣ କରିବାକୁ ଆମେ ଲକ୍ଷ୍ୟ ରଖିଛୁ ଯାହା ଅଭିନବ ତଥା ରୋମାଞ୍ଚକ ଉପାୟରେ ଅପୂର୍ବ ଅନୁଭୂତି ପ୍ରଦାନ କରିବ।”

ଏହି ମିଳିତ ଉଦ୍ୟୋଗରେ ତିନିଜଣ ସିଇଓ ନେତୃତ୍ୱ ନେବେ। କେଭିନ୍ ୱାଜ୍ ସମସ୍ତ ପ୍ଲାଟଫର୍ମରେ ମନୋରଞ୍ଜନ ସଂଗଠନର ନେତୃତ୍ୱ ନେବେ। ମିଳିତ ଡିଜିଟାଲ ସଂଗଠନର ଦାୟିତ୍ୱ କିରଣ ମଣି ଗ୍ରହଣ କରିବେ। ସଂଯୋଗ ଗୁପ୍ତା ମିଳିତ କ୍ରୀଡ଼ା ସଂଗଠନର ନେତୃତ୍ୱ ନେବେ। ମିଳିତ ଭାବେ ସେମାନେ ଶିଳ୍ପରେ ନୂତନ ମାନଦଣ୍ଡ ସ୍ଥିର କରିବେ।

ଏକ ପୃଥକ କାରବାରରେ, ଆରଆଇଏଲ ଭାୟାକମ୍ ୧୮ ରେ ପାରାମାଉଣ୍ଟ୍ ଗ୍ଲୋବାଲର ୧୩.୦୧% ଅଂଶଧନ ୪,୨୮୬ କୋଟି ଟଙ୍କାରେ କିଣିଛି। ଫଳସ୍ୱରୂପ, ଭାୟାକମ ୧୮ ର ମାଲିକାନା ଭାବରେ ବର୍ତ୍ତମାନ ଆରଆଇଏଲ ନିକଟରେ ୭୦.୪୯%, ନେଟୱାର୍କ ୧୮ ମିଡିଆ ଆଣ୍ଡ ଇନଭେଷ୍ଟମେଣ୍ଟ ଲିମିଟେଡ ନିକଟରେ ୧୩.୫୪% ଏବଂ ବୋଧି ଟ୍ରି ସିଷ୍ଟମ୍ସ ନିକଟରେ ୧୫.୯୭% ରହିବ।

ମୁମ୍ବାଇ: ଆର୍ଟିଫିସିଆଲ୍ ଇଣ୍ଟେଲିଜେନ୍ସ କ୍ଷେତ୍ରରେ ଏକ ବିଶ୍ୱସ୍ତରୀୟ କମ୍ପାନୀ ଏନଭିଡିଆର ମୁଖ୍ୟ ଜେନସେଙ୍ଗ ହୁଆଙ୍ଗ ଏବଂ ରିଲାଏନ୍ସ ଇଣ୍ଡଷ୍ଟ୍ରିଜର ଅଧ୍ୟକ୍ଷ ମୁକେଶ ଅମ୍ବାନୀ ଘୋଷଣା କରିଛନ୍ତି ଯେ ଉଭୟ କମ୍ପାନୀ ଭାରତରେ ଏଆଇ ଆଣିବା ପାଇଁ ଚୁକ୍ତି ସ୍ୱାକ୍ଷର କରିଛନ୍ତି। ମୁମ୍ବାଇର ଜିଓ ୱାର୍ଲ୍ଡ କନଭେନସନ୍ ସେଣ୍ଟରରେ ଉଭୟ ଏହି ଘୋଷଣା କରିଛନ୍ତି ଯେଉଁଠାରେ ଅକ୍ଟୋବର ୨୩ ରୁ ୨୫ ପର୍ଯ୍ୟନ୍ତ ‘ଏନଭିଡିଆ ସମିଟ ଇଣ୍ଡିଆ’ କାର୍ଯ୍ୟକ୍ରମ ଚାଲିଛି। ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ (ଆରଏଲ) ର ଅଧ୍ୟକ୍ଷ ମୁକେଶ ଅମ୍ବାନୀ କହିଛନ୍ତି ଯେ ଜିଓ ବର୍ତ୍ତମାନ ବିଶ୍ୱର ସର୍ବବୃହତ ଡାଟା କମ୍ପାନୀରେ ପରିଣତ ହୋଇଛି। ଏନଭିଡିଆ ପ୍ରତିଷ୍ଠାତା ତଥା ସିଇଓ ଜେନସେଙ୍ଗ ହୁଆଙ୍ଗ ଘୋଷଣା କରିଛନ୍ତି ଯେ ରିଲାଏନ୍ସ ଏବଂ ଏନଭିଡିଆ ମିଳିତ ଭାବେ ଭାରତରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) ଭିତ୍ତିଭୂମି ସୃଷ୍ଟି କରୁଛନ୍ତି। ଏହି ସହଭାଗିତା ଭାରତକୁ ଏଆଇ କ୍ଷେତ୍ରରେ ଏକ ଅଗ୍ରଣୀ ଦେଶ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ।

ଜେନସେଙ୍ଗ ହୁଆଙ୍ଗଙ୍କୁ ଭାରତକୁ ସ୍ୱାଗତ କରି ମୁକେଶ ଅମ୍ବାନୀ କହିଛନ୍ତି ଯେ ଭାରତର ବଡ଼ ସ୍ୱପ୍ନ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ଯୋଗୁଁ ଆଜି ଭାରତ ଡିଜିଟାଲ ବିପ୍ଳବର ଏକ ନୂଆ ଯୁଗରେ ପ୍ରବେଶ କରୁଛି। ଭାରତକୁ ଏକ ଡିପ୍ ଟେକ୍ନୋଲୋଜି ହବ୍ କରିବା ଦିଗରେ ମୁକେଶ ଅମ୍ବାନୀଙ୍କ ଉଦ୍ୟମକୁ ଏନଭିଡିଆ ପ୍ରତିଷ୍ଠାତା ତଥା ସିଇଓ ଜେନସେଙ୍ଗ ହୁଆଙ୍ଗ ପ୍ରଶଂସା କରିଛନ୍ତି। ହୁଆଙ୍ଗ ଭାରତର ଆଇଟି କ୍ଷେତ୍ରର ସମ୍ଭାବନାକୁ ପ୍ରଶଂସା କରି କହିଛନ୍ତି, “ଦୁନିଆରେ ବହୁତ କମ୍ ଦେଶ ଅଛି ଯେଉଁଠାରେ କମ୍ପ୍ୟୁଟର ସାଇନ୍ସ ଏବଂ ଆଇଟି କ୍ଷେତ୍ରରେ ଅନେକ ତାଲିମପ୍ରାପ୍ତ ଲୋକ ଅଛନ୍ତି।” ଜେନସେଙ୍ଗ ହୁଆଙ୍ଗ କହିଛନ୍ତି, “ଏହା ଏକ ଅସାଧାରଣ ସମୟ, ଯେଉଁଠାରେ ଭାରତରେ ବହୁସଂଖ୍ୟକ କମ୍ପ୍ୟୁଟର ଇଞ୍ଜିନିୟର ଏବଂ ଏକ ବିଶାଳ ଜନସଂଖ୍ୟା ରହିଛି। ଏହି ସହଭାଗିତା ଯୋଗୁଁ ମୁକେଶ ଅମ୍ବାନୀଙ୍କ ସହିତ କାମ କରିବା ନେଇ ମୁଁ ଗର୍ବିତ ଅନୁଭବ କରୁଛି।”

ମୁକେଶ ଅମ୍ବାନୀ ଜେନସେଙ୍ଗଙ୍କ ସହ ଏହି ବାର୍ତ୍ତାଳାପରେ କହିଛନ୍ତି ଯେ ଆମକୁ ମନେ ରଖିବାକୁ ହେବ ଯେ ଆର୍ଟିଫିସିଆଲ ଇଣ୍ଟେଲିଜେନ୍ସର ଲାଭ ପ୍ରତ୍ୟେକ ଭାରତୀୟଙ୍କ ନିକଟରେ ପହଞ୍ଚିବା ସହିତ ଏହା ସୁଲଭ ମୂଲ୍ୟରେ ଉପଲବ୍ଧ ହେବା ଉଚିତ। ମୁକେଶ ଅମ୍ବାନୀ କହିଛନ୍ତି ଯେ ଆମକୁ ନିଶ୍ଚିତ କରିବାକୁ ପଡିବ ଯେ ଲୋକମାନେ ନିଜ ଫୋନ୍ ଏବଂ କମ୍ପ୍ୟୁଟରରେ ଏଆଇ ପାଇପାରିବେ। ଏହି ନୂତନ ଟେକ୍ନୋଲୋଜିକୁ ଲୋକଙ୍କ ନିକଟରେ ସହଜରେ ଉପଲବ୍ଧ କରାଇବା ଆମର ଦାଇତ୍ୱ ଏବଂ ଆମକୁ ଏହାକୁ ମିଳିତ ଭାବରେ କରିବାକୁ ହେବ।

ମୁକେଶ ଅମ୍ବାନୀ କହିଛନ୍ତି ଯେ ଏଆଇ ହେଉଛି ଏକ ଜ୍ଞାନ କ୍ରାନ୍ତି ଯାହା ବିଶ୍ୱସ୍ତରରେ ସମୃଦ୍ଧିର ପଥ ଖୋଲିଥାଏ। ସେ କହିଛନ୍ତି ଯେ ଭାରତର ଯୁବ ଜନସଂଖ୍ୟା ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱ ଦେଶକୁ ଡିଜିଟାଲ ସମାଜରେ ପରିଣତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଅମ୍ବାନୀ କହିଛନ୍ତି ଯେ, ଭାରତ ହେଉଛି ବିଶ୍ୱର ଅନ୍ୟତମ ସବୁଠାରୁ ଯୁବବହୁଳ ଦେଶ। ଭାରତ ଦ୍ରୁତ ଗତିରେ ବିଶ୍ୱର ନବସୃଜନ ବା ଇନୋଭେସନ ହବରେ ପରିଣତ ହେଉଛି ଏବଂ ଆମ ପାଖରେ ବିଶ୍ୱର ସର୍ବୋତ୍ତମ ଡିଜିଟାଲ୍ ସଂଯୋଗୀକରଣ ଭିତ୍ତିଭୂମି ରହିଛି।

ସେ କହିଛନ୍ତି ଯେ ରିଲାଏନ୍ସ ଜିଓ ବିଶ୍ୱସ୍ତରରେ ସବୁଠାରୁ ବଡ ଡାଟା କମ୍ପାନୀ ଅଟେ। ଏହା ଜିବି ପିଛା ୧୫ ସେଣ୍ଟ ଭଳି କମ୍ ମୂଲ୍ୟରେ ଡାଟା ପ୍ରଦାନ କରୁଥିବାବେଳେ ଆମେରିକାରେ ଏହା ଜିବି ପିଛା ପାଞ୍ଚ ଡଲାର ରହିଥିବା ସେ କହିଛନ୍ତି। ସେ କହିଛନ୍ତି ଯେ ଜିଓ ଯେପରି ଡାଟା କ୍ଷେତ୍ରରେ କ୍ରାନ୍ତି ଆଣିଥିଲା ସେହିଭଳି ଆର୍ଟିଫିସିଆଲ୍ ଇଣ୍ଟେଲିଜେନ୍ସ କ୍ଷେତ୍ରରେ ମଧ୍ୟ ସମାନ ଧରଣର ବିପ୍ଳବ ଆଣିବାର ଆବଶ୍ୟକତା ରହିଛି।

ମୁମ୍ବାଇ: ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ (ଆରଆଇଏଲ) ର ୪୭ତମ ବାର୍ଷିକ ସାଧାରଣ ବୈଠକ (ଏଜିଏମ୍) ରେ ଅନେକ ପ୍ରମୁଖ ଘୋଷଣା କରାଯାଇଛି। କମ୍ପାନୀର ଆଗାମୀ ନିର୍ଦ୍ଦେଶକ ମଣ୍ଡଳୀ (ବୋର୍ଡ ଅଫ୍ ଡାଇରେକ୍ଟର୍ସ) ବୈଠକରେ ସେୟାରଧାରକ ମାନଙ୍କୁ ୧:୧ ଅନୁପାତରେ ବୋନସ ସେୟାର ଦେବା ପାଇଁ ସୁପାରିଶ କରାଯିବ। ଏଥିନେଇ ନିର୍ଦ୍ଦେଶକ ମଣ୍ଡଳୀର ବୈଠକ ସେପ୍ଟେମ୍ବର ୫ ରେ ଅନୁଷ୍ଠିତ ହେବ। ଅଧ୍ୟକ୍ଷ ଓ ପରିଚାଳନା ନିର୍ଦ୍ଦେଶକ ମୁକେଶ ଅମ୍ବାନୀ କହିଛନ୍ତି ଯେ ରିଲାଏନ୍ସ ୨୦୨୩-୨୪ ଆର୍ଥିକ ବର୍ଷରେ ୧.୭ ଲକ୍ଷ ନୂତନ ନିଯୁକ୍ତି ସୃଷ୍ଟି କରିଛି, ଯାହା ଫଳରେ କମ୍ପାନୀର ମୋଟ କର୍ମଚାରୀଙ୍କ ସଂଖ୍ୟା ୬.୫ ଲକ୍ଷରୁ ଅଧିକରେ ପହଞ୍ଚିଛି।

୮ ବର୍ଷରେ ବିଶ୍ୱର ସର୍ବବୃହତ ମୋବାଇଲ୍ ଡାଟା କମ୍ପାନୀ ହେବାରେ ରିଲାଏନ୍ସ ଜିଓର ସଫଳତା ଉପରେ ମୁକେଶ ଅମ୍ବାନୀ ମଧ୍ୟ ଗୁରୁତ୍ୱାରୋପ କରିଥିଲେ। ସେ କହିଛନ୍ତି ଯେ, ବିଶ୍ୱର ୮ ପ୍ରତିଶତ ମୋବାଇଲ୍ ଡାଟା ଟ୍ରାଫିକ୍ ଜିଓ ନେଟୱାର୍କରେ ଚାଲିଥାଏ। ଏଥି ସହିତ, ଜିଓ ଏୟାର ଫାଇବର ପ୍ରତି ୩୦ ଦିନରେ ୧୦ ଲକ୍ଷ ଘରକୁ ସଂଯୋଗ କରି ରେକର୍ଡ ସମୟରେ ୧୦ କୋଟି ଘରେ ପହଞ୍ଚିବାକୁ ଲକ୍ଷ୍ୟ ରଖିଛି।

ଏହି ଅବସରରେ ଅମ୍ବାନୀ ଜିଓ ଏଆଇ-କ୍ଲାଉଡ୍ ୱେଲକମ ଅଫର ନେଇ ମଧ୍ୟ ଘୋଷଣା କରିଥିଲେ। ଏହା ଅଧୀନରେ, ସମସ୍ତ ଡିଜିଟାଲ୍ ବିଷୟବସ୍ତୁ ଏବଂ ତଥ୍ୟକୁ ସୁରକ୍ଷିତ ଭାବରେ ସଂରକ୍ଷଣ କରିବାକୁ ୧୦୦ ଜିବି ମାଗଣା କ୍ଲାଉଡ୍ ଷ୍ଟୋରେଜ୍ ପ୍ରଦାନ କରାଯିବ।

ରିଲାଏନ୍ସ “ଜିଓ ବ୍ରେନ୍” ଅଧୀନରେ “ଏଆଇ ସବୁଠାରେ ସମସ୍ତଙ୍କ ପାଇଁ” ଥିମ୍ ଉପରେ ଆଧାର କରି ଆର୍ଟିଫିସିଆଲ୍ ଇଣ୍ଟେଲିଜେନ୍ସ (ଏଆଇ) ସେବା ଆରମ୍ଭ କରିବ। କମ୍ପାନୀ ମଧ୍ୟ ଜାମନଗରରେ ଏକ ଗିଗାୱାଟ-ସ୍କେଲ ଏଆଇ-ପ୍ରସ୍ତୁତ ଡାଟା ସେଣ୍ଟର ସ୍ଥାପନ କରିବାକୁ ଯୋଜନା ପ୍ରସ୍ତୁତ କରୁଛି। ଏହା ସହିତ, ରିଲାଏନ୍ସ ଏହାର ନୂତନ ଶକ୍ତି ବ୍ୟବସାୟକୁ ୫ ରୁ ୭ ବର୍ଷ ମଧ୍ୟରେ ତୈଳ-ରସାୟନ (ଅଏଲ ଟୁ କେମିକାଲ) ବ୍ୟବସାୟ ସମକକ୍ଷ ସମାନ ରୋଜଗାର ସ୍ତରକୁ ନେବାକୁ ଲକ୍ଷ୍ୟ ରଖିଛି।

ମୁକେଶ ଅମ୍ବାନୀ କହିଛନ୍ତି ଯେ, କମ୍ପାନୀ ୨୦୨୫ ସୁଦ୍ଧା ୫୫ ଟି ଅପରେଟିଂ କମ୍ପ୍ରେସଡ ବାୟୋଗ୍ୟାସ୍ ପ୍ଲାଣ୍ଟ ସ୍ଥାପନ କରିବ ଯାହା କୃଷକମାନଙ୍କୁ ଶକ୍ତିର ଉତ୍ସ ବନାଇବା ସହିତ ଗ୍ରାମାଞ୍ଚଳରେ ୩୦,୦୦୦ ରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି କରିବ।

ଭୁବନେଶ୍ୱର: ରିଲାଏନ୍ସ ନିଜର ଅବିରତ ବିକାଶର ଧାରା ଜାରି ରଖି ଆଗକୁ ବଢିବା ସହିତ ବିଶ୍ୱର ଶ୍ରେଷ୍ଠ ୧୦ ବ୍ୟବସାୟ ସମୂହ ମଧ୍ୟରେ ସ୍ଥାନିତ ହେବ ବୋଲି ରିଲାଏନ୍ସ ଇଣ୍ଡଷ୍ଟ୍ରିଜର ଅଧକ୍ଷ ମୁକେଶ ଅମ୍ବାନୀ ପ୍ରକାଶ କରିଛନ୍ତି। ରିଲାଏନ୍ସର ପ୍ରତିଷ୍ଠାତା ଧିରୁଭାଇ ଅମ୍ବାନିଙ୍କ ଜନ୍ମତିଥିରେ ପାଳନ କରାଯାଉଥିବା ରିଲାଏନ୍ସ ପରିବାର ଦିବସ ଅବସରରେ କର୍ମଚାରୀଙ୍କୁ ସମ୍ବୋଧନ କରି ସେ ଏହା କହିଛନ୍ତି।

ରିଲାଏନ୍ସ ଏବେ ଡିଜିଟାଲ ଡାଟା ପ୍ଲାଟଫର୍ମ ଏବଂ ଆର୍ଟିଫିସିଆଲ ଇଂଟେଲିଜେନ୍ସ, ଆପଣାଇବାରେ ବିଶ୍ୱର ଅଗ୍ରଣୀ ସଂସ୍ଥାମାନଙ୍କ ମଧ୍ୟରୁ ଅନ୍ୟତମ ହେବା ପାଇଁ ଲକ୍ଷ୍ୟ ରଖିଥିବା ସେ କହିଛନ୍ତି । ଡିଜିଟାଲ ପ୍ଲାଟଫର୍ମ ଯୁଗରେ ଡାଟା ଏବେ ପ୍ରତିଭା ଓ ଅର୍ଥ ସହିତ ଉତ୍ପାଦନର ନୂଆ ମାଧ୍ୟମ ହୋଇଛି । ଏଥି ନିମନ୍ତେ ଡାଟା ବ୍ୟବହାର ରେ ଆମେ ସର୍ବଦା ଅଗ୍ରଣୀ ରହିବା ସହିତ ଏଆଇ ବଳରେ ଉତ୍ପାଦକତା ଓ ଦକ୍ଷତାରେ ଅନେକ ଗୁଣ ଉନ୍ନତି ହାସଲ କରିପାରିବା ବୋଲି କର୍ମଚାରୀମାନଙ୍କୁ ସମ୍ବୋଧନ କରି ସେ କହିଛନ୍ତି ।

ରିଲାଏନ୍ସ ସବୁବେଳେ ଆତ୍ମସନ୍ତୁଷ୍ଟି ଠାରୁ ଆଗରେ ରହିଥିବା ପ୍ରକାଶ କରି ଆଜିକା ଦିନରେ ଉଭୟ ଘରୋଇ ଏବଂ ବିଶ୍ୱ ସ୍ତରରେ ବ୍ୟବସାୟ ପରିବେଶ ଦ୍ରୁତ ପରିବର୍ତ୍ତନଶୀଳ ହୋଇଥିବା ସେ କହିଛନ୍ତି । ସବୁ ସମୟ ଭଳି ଆଗାମୀ ଦିନରେ ମଧ୍ୟ ଗ୍ରାହକମାନଙ୍କୁ ପ୍ରାଥମିକତା ଦେବା ନେଇ ସର୍ବଦା ଧ୍ୟାନକେନ୍ଦ୍ରିତ କରିବା ପାଇଁ ସେ କର୍ମଚାରୀଙ୍କୁ ଆହ୍ୱାନ ଦେଇଛନ୍ତି । ଭାରତ ବିଶ୍ୱର ତୃତୀୟ ବୃହତ ଅର୍ଥନୀତି ହେବା ଦିଗରେ ଆଗକୁ ବଢୁଥିବା ବେଳେ ଆମପାଇଁ ବିଶ୍ୱର ଶ୍ରେଷ୍ଠ ୧୦ ବ୍ୟବସାୟ ସମୂହ ମଧ୍ୟରେ ସ୍ଥାନ ହାସଲ କରିବାର ଅପୂର୍ବ ସୁଯୋଗ ରହିଥିବା ସେ କହିଛନ୍ତି । ଡିଜିଟାଲ ସେବା, ସବୁଜ ଶକ୍ତି ଓ ବୟ ଏନର୍ଜି, ରିଟେଲ ଓ କଂଜୁମର ବ୍ରାଣ୍ଡ ସମୂହ, ତୈଳ ଓ କେମିକାଲ, ସ୍ୱାସ୍ଥ୍ୟ ଓ ଲାଇଫ ସାଇନ୍ସେସ ଭଳି ରିଲାଏନ୍ସ ର ସମସ୍ତ ଅଭିବୃଢ଼ହି ଇଂଜିନ ଗୁଡିକୁ ଆସନ୍ତା ବର୍ଷ ମଧ୍ୟରେ ପରିବର୍ତିତ ହେବାକୁ ପଡିବ ବୋଲି ସେ କହିଛନ୍ତି । ଏଥିସହିତ ଏଆଇ କୁ ବିକଶିତ ଓ ବ୍ୟାପକ କରିବା ଦିଗରେ ରିଲାଏନ୍ସର ଉଦ୍ୟମକୁ ତ୍ୱରାନ୍ୱିତ କରି ଭାରତର ଶିକ୍ଷା , ସ୍ୱାସ୍ଥ୍ୟ, କୃଷି ଓ ନିଯୁକ୍ତି ସୃଷ୍ଟି କ୍ଷେତ୍ରରେ ରହିଥିବା ଜାତୀୟ ଆବଶ୍ୟକତା ପୁରଣ ପାଇଁ କାର‌୍ୟ୍ୟ କରିବାକୁ ସେ ଆହ୍ୱାନ ଦେଇଛନ୍ତି ।

ଭୁବନେଶ୍ୱର/ ବିଶାଖପାଟଣା: ରିଲାଏନ୍ସ ଇଣ୍ଡଷ୍ଟ୍ରିଜ୍ ଆନ୍ଧ୍ରପ୍ରଦେଶରେ ୧୦ ଗିଗାୱାଟ୍ ସୋଲାର ପାୱାର ପ୍ଲାଂଟ୍‌ରେ ପୁଂଜିନିବେଶ କରିବ। ଆନ୍ଧ୍ର ପ୍ରଦେଶର ଉତ୍ପାଦଗୁଡ଼ିକୁ ସାରା ଦେଶରେ ପହଂଚାଇବା ଲାଗି ରିଲାଏନ୍ସ ରିଟେଲ୍ ଏହାର କୃଷି ଆଧାରିତ ଉତ୍ପାଦ ଓ ଅନ୍ୟାନ୍ୟ ସାମଗ୍ରୀଗୁଡିକୁ ଅଧିକରୁ ଅଧିକ ମାତ୍ରାରେ କିଣିବ। ରିଲାଏନ୍ସର ଏହି ପଦକ୍ଷେପଗୁଡ଼ିକ ପ୍ରଭାବରେ ଆନ୍ଧ୍ର ପ୍ରଦେଶରେ ୫୦ହଜାର ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ‘ଆନ୍ଧ୍ରପ୍ରଦେଶ ଗ୍ଲୋବାଲ୍ ନିବେଶକ ସମ୍ମିଳନୀ ୨୦୨୩’ ରେ ଯୋଗଦେଇ ରିଲାଏନ୍ସ ଇଣ୍ଡଷ୍ଟ୍ରିଜ୍‌ର ଅଧ୍ୟକ୍ଷ ମୁକେଶ ଅମ୍ବାନି କହିଛନ୍ତି।

ଆନ୍ଧ୍ରପ୍ରଦେଶର ମୁଖ୍ୟମନ୍ତ୍ରୀ ଜଗନମୋହନ ରେଡ୍ଡିଙ୍କ ଉପସ୍ଥିତିରେ ଏହି ସମ୍ମିଳନୀରେ ରିଟେଲ୍ କ୍ଷେତ୍ର ସମ୍ପର୍କରରେ ଉପସ୍ଥାପନା କରି ମୁକେଶ ଅମ୍ବାନି କହିଛନ୍ତି ଯେ ଆନ୍ଧ୍ରପ୍ରଦେଶର ୬ ହଜାର ଗ୍ରାମର ୧ ଲକ୍ଷ ୨୦ ହଜାରରୁ ଅଧିକ କିରାନା ବ୍ୟବସାୟୀଙ୍କ ସହ ରିଲାଏନ୍ସ ରିଟେଲ୍ ସହଯୋଗିତା ସ୍ଥାପନ କରିଛି। ଡିଜିଟାଲ୍ ଯୁଗରେ ଛୋଟ ବ୍ୟବସାୟୀମାନେ ଯେଭଳି ସମୃଦ୍ଧ ହୋଇପାରିବେ ସେଥିପାଇଁ ସେମାନଙ୍କ ଲାଗି ଆବଶ୍ୟକ ଉପକରଣ ଉପଲବ୍ଧ କରାଯାଇଛି। ରିଲାଏନ୍ସ ରିଟେଲ୍ ଆନ୍ଧ୍ରପ୍ରଦେଶରେ ୨୦,୦୦୦ରୁ ଅଧିକ ପ୍ରତ୍ୟକ୍ଷ ନିଯୁକ୍ତି ଏବଂ ବହୁ ସଂଖ୍ୟାରେ ପରୋକ୍ଷ ନିଯୁକ୍ତି ସୃଷ୍ଟି କରିପାରିଛି।

ରିଲାଏନ୍ସ ଜିଓ ବିଷୟରେ ପ୍ରକାଶ କରି ମୁକେଶ ଅମ୍ବାନି କହିଛନ୍ତି ଯେ ଆନ୍ଧ୍ରପ୍ରଦେଶ ସମେତ ସାରା ଦେଶରେ ୨୦୨୩ ଶେଷ ସୁଦ୍ଧା ଜିଓ ଟ୍ରୁ-୫ଜିର ଶୁଭାରମ୍ଭ କାର୍ଯ୍ୟ ସମ୍ପୂର୍ଣ୍ଣ ହୋଇଯିବ। ୪୦ ହଜାର କୋଟି ଟଙ୍କାରୁ ଅଧିକ ନିବେଶ କରି ଜିଓ ଆନ୍ଧ୍ରପ୍ରଦେଶରେ ସବୁଠୁ ବଡ଼ ଏବଂ ଉନ୍ନତ ଡିଜିଟାଲ୍ ନେଟ୍‌ୱର୍କ ପ୍ରସ୍ତୁତ କରିଛି ଯାହା ରାଜ୍ୟର ୯୮ ପ୍ରତିଶତ ଲୋକମାନଙ୍କ ପାଖରେ ପହଂଚିପାରିଛି। ଜିଓ ଟ୍ରୁ-୫ଜି ଜରିଆରେ ଅର୍ଥନୀତିକୁ ନୂଆ ଗତି ମିଳିବ ଏବଂ ବଡ଼ ଧରଣର ବ୍ୟବସାୟ ଓ ରୋଜଗାର ସୁଯୋଗ ସୃଷ୍ଟି ହେବ।

ଆନ୍ଧ୍ରପ୍ରଦେଶର ବିଶାଳ ଆର୍ଥିକ କ୍ଷମତାକୁ ପ୍ରଶଂସା କରି ମୁକେଶ ଅମ୍ବାନି କହିଛନ୍ତି ଯେ ରାଜ୍ୟର ଆର୍ଥିକ କ୍ଷମତା ଉପରେ ପ୍ରଥମେ ବିଶ୍ୱାସ ପ୍ରକଟ କରିଥିବା କିଛି ହାତଗଣତି ଭାରତୀୟ କଂପାନିଙ୍କ ମଧ୍ୟରୁ ରିଲାଏନ୍ସ ଅନ୍ୟତମ। ରାଜ୍ୟର କେଜି-ଡି୬ ବେସିନ୍ ଓ ତାହାର ପାଇପ୍‌ଲାଇନ୍‌ରେ ଆମେ ୧,୫୦,୦୦୦ କୋଟି ଟଙ୍କାର ପୁଞ୍ଜିନିବେଶ କରିଛୁ। ଦେଶର ମୋଟ ଗ୍ୟାସ୍ ଉତ୍ପାଦନରେ କେଜି-ଡି୬ର ପ୍ରାୟ ୩୦ ପ୍ରତିଶତ ଯୋଗଦାନ ରହିଛି।

ଆନ୍ଧ୍ରପ୍ରଦେଶର ବିଶେଷ ଗୁଣଗୁଡ଼ିକ ବିଷୟରେ ଉଲ୍ଲେଖ କରି ରିଲାଏନ୍ସ ଇଣ୍ଡଷ୍ଟ୍ରିଜ୍‌ର ଅଧ୍ୟକ୍ଷ ମୁକେଶ ଅମ୍ବାନି କହିଛନ୍ତି ଯେ ଏଠାରେ ଫାର୍ମା ଓ ଭିତିଭୂମି କ୍ଷେତ୍ରରେ ଉଦ୍ୟୋଗ ଓ ଉଦ୍ୟୋଗପତିମାନଙ୍କ ଲମ୍ବା ଧାଡ଼ି ରହିଛି ଏବଂ ସବୁଠୁ ବଡ଼ କଥା ହେଉଛି ଆନ୍ଧ୍ରପ୍ରଦେଶ ପାଖରେ ବିଶାଳ ସମୁଦ୍ର ଉପକୂଳ ରହିଛି ଯାହା ତାହାକୁ ବ୍ଲୁ ଅର୍ଥନୀତିରେ ପରିଣତ କରିବାର କ୍ଷମତା ରଖୁଛି। ନୂଆ ଭାରତର ବିକାଶ କାହାଣୀରେ ଆନ୍ଧ୍ରପ୍ରଦେଶ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି ସେ ଭରସା ପ୍ରକଟ କରିଛନ୍ତି।

ମୁମ୍ବାଇ: ରିଲାଏନ୍ସ ବ୍ରାଣ୍ଡ୍‌ସ ଲିମିଟେଡ଼(ଆର୍‌ବିଏଲ୍‌) ଏବଂ ଇଟାଲିର ପ୍ଲାଷ୍ଟିକ ଲେଗ୍ନୋ ଏସ୍‌ପିଏ ମଧ୍ୟରେ ଏକ ଯୌଥ ଉଦ୍ୟୋଗ ଘୋଷଣା କରାଯାଇଛି। ଏଥିପାଇଁ ଉଭୟ କମ୍ପାନି ମଧ୍ୟରେ ଚୁକ୍ତି ସ୍ଵାକ୍ଷର ହୋଇଛି। ଚୁକ୍ତି ଅନୁସାରେ ପ୍ଲାଷ୍ଟିକ ଲେଗ୍ନୋ ଏସ୍‌ପିଏର ଭାରତୀୟ ଖେଳନା ନିର୍ମାଣବ୍ୟବସାୟରେ ଆର୍‌ବିଏଲ୍ ୪୦% ଅଂଶଧନ ଅଧିଗ୍ରହଣ କରିବ। ରିଲାଏନ୍ସ ବ୍ରାଣ୍ଡ୍‌ସର ଏହି ନିଵେଶ କମ୍ପାନିର ଖେଳନା ବ୍ୟବସାୟକୁ ଆହୁରି ମଜଭୂତକରିବ।

ସୂଚନାଯୋଗ୍ୟ, ଆର୍‌ବିଏଲ୍‌ ହେଉଛି ରିଲାଏନ୍ସ ରିଟେଲ ଭେଞ୍ଚର୍ସର ପୂର୍ଣ୍ଣ ଅଧିକୃତ କମ୍ପାନି। ଆର୍‌ବିଏଲ୍‌ର ଖେଳନା ଉଦ୍ୟୋଗରେ ଦୃଢ ଉପସ୍ଥିତି ରହିଛି। ଏହାର ପୋର୍ଟଫୋଲିଓରେ ହାମଲେଜ୍‌ (ବ୍ରିଟିଶ ଖେଳନା ରିଟେଲର) ଏବଂ ଘରୋଇ ଖେଳନାବ୍ରାଣ୍ଡ ରୋୱନ ସାମିଲ ଅଛି। ୧୫ଟି ଦେଶରେ ହାମଲେଜ୍‌ ର ୨୧୩ଟି ଷ୍ଟୋର ରହିଛି। ଭାରତରେ ଏହା ଖେଳନା ଷ୍ଟୋରର ସବୁଠାରୁ ବଡ଼ ଚେନ ଭାବେ ପରିଚିତ।

ରିଲାଏନ୍ସ ବ୍ରାଣ୍ଡ୍‌ସ ଲିମିଟେଡ୍‌ର ମୁଖପାତ୍ର କହିଛନ୍ତି, ଏହି ସହଯୋଗିତା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆତ୍ମନିର୍ଭର ଭାରତର ଦୃଷ୍ଟିକୋଣ ଅନୁରୂପ ବିଶ୍ୱସ୍ତରୀୟ ଖେଳନା ନିର୍ମାଣ କ୍ଷେତ୍ରରେ ପ୍ଲାଷ୍ଟିକ ଲେଗ୍ନୋର ବ୍ୟାପକ ଅଭିଜ୍ଞତା ସହ ବିଶ୍ୱସ୍ତରୀୟ ଖେଳନାର ଖୁଚୁରା ଉଦ୍ୟୋଗରେ ଆମର ମଜଭୁତ ଉପସ୍ଥିତି ବଳରେ ଭାରତରେ ନିର୍ମିତଖେଳନା ପାଇଁ ନୂଆ ପଥ ଏବଂ ଅଦ୍ଵିତୀୟ ସୁଯୋଗ ସୃଷ୍ଟି ହେବ। ଏହା କେବଳ ଘରୋଇ ଚାହିଦା ପୂରଣ କରିବ ନାହିଁ ବରଂ ବିଶ୍ୱ ବଜାର ପାଇଁ ଦେଶରେ ଏକ ମଜଭୁତ ଖେଳନା ନିର୍ମାଣ ଇକୋସିଷ୍ଟମ  ପ୍ରସ୍ତୁତ ହେବ। ପ୍ଲାଷ୍ଟିକ ଲେଗ୍ନୋ ଏସପିଏର ମାଲିକାନା ସୁନିନୋ ଗ୍ରୁପ ନିକଟରେ ରହିଛି, ଯାହାପାଖରେ ଇଉରୋପରେ ଖେଳନା ନିର୍ମାଣର ୨୫ ବର୍ଷରୁ ଅଧିକ ଅଭିଜ୍ଞତା ରହିଛି। ଅଭିବୃଦ୍ଧିଶୀଳ ଭାରତୀୟ ଖେଳନା ବଜାରରେ ଉପସ୍ଥିତି ବଢ଼ାଇବା ଏବଂ ଭାରତୀୟ ଖେଳନା ବଜାରକୁ ବିଶ୍ୱ ହବ ଭାବେ ଗଢିତୋଳିବା ଉଦ୍ଦେଶ୍ୟରେ ଗ୍ରୁପ ପକ୍ଷରୁ ଭାରତରେ ବ୍ୟବସାୟ ଆରମ୍ଭ କରାଯାଇଥିଲା।

ସୁନିନୋ ଗ୍ରୁପର ସହ-ସତ୍ୱାଧିକାରୀ ପାଓଲୋ ସୁନିନୋ କୁହନ୍ତି, ଆମେ ଏହି ଯୌଥ ଉଦ୍ୟୋଗରେ ଆର୍‌ବିଏଲ୍‌କୁ ଭାଗୀଦାର ଭାବେ ପାଇ ଅତ୍ୟନ୍ତ ଗୌରାବାନ୍ୱିତ। ଆମର ବିଶ୍ୱାସ, ଖେଳନା ଉତ୍ପାଦନରେ ପ୍ଲାଷ୍ଟିକ ଲେଗ୍ନୋର ଅଭିଜ୍ଞତା ଏବଂ ହାମଲେଜ୍‌ର ବ୍ୟବସାୟିକ ପହଞ୍ଚ ଏହି ଯୌଥଉଦ୍ୟୋଗ କମ୍ପାନିକୁ ନୂଆ ଉଚ୍ଚତାକୁ ନେଇଯିବ ଏବଂ ବିପୁଳ ସଫଳତା ଲାଗିଏହାକୁ ସକ୍ଷମ କରିବ। ଭାରତ ପାଇଁ ଆମ ନିକଟରେ ମହତ୍ୱପୂର୍ଣ୍ଣ ବିକାଶଯୋଜନା ରହିଛି। ଭବିଷ୍ୟତର ଆହ୍ୱାନଗୁଡ଼ିକୁ ସାମ୍ନା କରିବା ପାଇଁ ଆମେ ପ୍ରସ୍ତୁତ ଅଛୁ କିନ୍ତୁ ଯେତେବେଳେ ଆରଵିଏଲ ଭଳି ଗ୍ରୁପ ଆମ ସାଙ୍ଗରେ ଅଛି ତେଵେ ବିଶ୍ୱାସ ଅଛି ଯେ, ଆମେ ମିଳିତ ହୋଇ କିଛି ବଡ଼ କରିପାରିବୁ।