ମୁମ୍ବାଇ: ମହାରାଷ୍ଟ୍ରର ଅମ୍ରାବତୀ ସାଂସଦ ନବନୀତ୍ ରାଣାଙ୍କ ସମସ୍ୟା ସମାପ୍ତ ହେବାର ନାମ ନେଉନାହିଁ। ମୁମ୍ବାଇର ଶିଭଡି କୋର୍ଟ ନବନୀତ୍ ରାଣାଙ୍କ ବିରୋଧରେ ଜାମିନ ବିହୀନ ୱାରେଣ୍ଟ ଜାରି କରିଛନ୍ତି। ଏହି ୱାରେଣ୍ଟକୁ କାର୍ଯ୍ୟକାରୀ କରିବାକୁ କୋର୍ଟ ମୁଲୁଣ୍ଡ ପୋଲିସକୁ ନିର୍ଦ୍ଦେଶ ଦେଇଛନ୍ତି, ଯେଉଁଥିପାଇଁ ଦିୱାଲୀ ଅବସରରେ ନବନୀତ୍ ରାଣାଙ୍କ ଉପରେ ଗିରଫର ଖଣ୍ଡା ଝୁଲୁଛି। ଶିଭଡି କୋର୍ଟ ଦ୍ଵାରା ଜାରି ହୋଇଥିବା ଜାମିନ ବିହୀନ ୱାରେଣ୍ଟ ମାମଲାରେ ସାଂସଦ ନବନୀତ୍ ରାଣାଙ୍କ କୌଣସି ସରକାରୀ ପ୍ରତିକ୍ରିୟା ସାମ୍ନାକୁ ଆସି ନାହିଁ।
ସାଂସଦ ନବନୀତ୍ ରାଣାଙ୍କ ଉପରେ ଅଭିଯୋଗ ହୋଇଛି ଯେ, ସେ ତାଙ୍କ ନିର୍ବାଚନ ଆଫିଡେଭିଟରେ ଯୋଡିଥିବା ଜାତି ପ୍ରମାଣପତ୍ର ନକଲି। ଶିବସେନାର ପୂର୍ବତନ ସାଂସଦ ଆନନ୍ଦରାଓ ଅଡସୁଲ ଏବଂ ସୁନୀଲ ଭାଲେରାଓ ଏହି ମାମଲାରେ ବମ୍ବେ ହାଇକୋର୍ଟଙ୍କ ନିକଟରେ ପହଞ୍ଚି ସାରିଛନ୍ତି। ଏହି ମାମଲାର ଶୁଣାଣି ସମୟରେ ୨୦୨୧ ମସିହାରେ ହାଇକୋର୍ଟ ନବନୀତ୍ ରାଣାଙ୍କ ଜାତି ପ୍ରମାଣପତ୍ରକୁ ବାତିଲ କରିଦେଇଥିଲେ। ଏହି କାରଣରୁ ତାଙ୍କର ଲୋକସଭା ସଦସ୍ୟତା ବିପଦରେ ପଡିଥିଲା। ତେବେ ନବନୀତ୍ ରାଣା ସୁପ୍ରିମକୋର୍ଟରେ ମୁମ୍ବାଇ ହାଇକୋର୍ଟଙ୍କ ନିଷ୍ପତ୍ତିକୁ ଚ୍ୟାଲେଞ୍ଜ କରିବା ପରେ ସୁପ୍ରିମକୋର୍ଟ ବର୍ତ୍ତମାନ ପର୍ଯ୍ୟନ୍ତ ହାଇକୋର୍ଟଙ୍କ ନିଷ୍ପତ୍ତିକୁ ସ୍ଥଗିତ ରଖିଛନ୍ତି।
ନକଲି ଜାତି ପ୍ରମାଣପତ୍ର ମାମଲାରେ ସାଂସଦ ନବନୀତ୍ ରାଣାଙ୍କ ପରିବାର ସଦସ୍ୟ ମଧ୍ୟ ଗୁରୁତର ଅଭିଯୋଗର ସମ୍ମୁଖୀନ ହୋଇଛନ୍ତି। ନକଲି ଜାତିର ପ୍ରମାଣପତ୍ର ପାଇବା ପାଇଁ ନବନୀତ୍ଙ୍କ ବାପା ସ୍କୁଲ ଆଡମିସନର ମିଥ୍ୟା ଦଲିଲ ତିଆରି କରିଥିବା ଅଭିଯୋଗ ହୋଇଛି। ମୁମ୍ବାଇର ଶିବଡି କୋର୍ଟ ଦ୍ଵାରା ଜାରି ହୋଇଥିବା ଜାମିନ ବିହୀନ ୱାରେଣ୍ଟକୁ ନେଇ ପୋଲିସ କ’ଣ ପଦକ୍ଷେପ ନେଇଛି, ଏହା ହେଉଛି ସବୁଠାରୁ ବଡ ପ୍ରଶ୍ନ।