Tag: bjpodisha

ସମୀକ୍ଷା ବ୍ୟୁରୋ

ଅପରାଜିତା ଷଡଙ୍ଗୀଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଖୁର୍ଦ୍ଧା ସଭାରେ କୌଣସି ବିଶେଷ ଭୂମିକାରେ ଦେଖିବାକୁ ମିଳିନଥିଲା। ଏହି ସଭାରେ ତାଙ୍କୁ ଗୋଟେ ବଡ ଭୂମିକା ନେବାକୁ ହୁଏତ ସୁଯୋଗ ସୃଷ୍ଟି କରାଯାଇପାରେ ବୋଲି ଯେଉଁ ଚର୍ଚ୍ଚା ହେଉଥିଲା, ସେ ଚର୍ଚ୍ଚା ଏହା ଫଳରେ ଥମି ଯାଇଛି। ଏପରିକି ତାଙ୍କୁ ମୋଦୀ ଆସିବା ପୂର୍ବରୁ ଭାଷଣ ଦେବାକୁ ଡକାଯାଇନଥିଲା।ବେମାନ ବନ୍ଦର କିମ୍ବା ହେଲିପ୍ୟାଡରେ  ମୋଦୀଙ୍କୁ ସ୍ଵାଗତ କରିବା ଲାଗି ମଧ୍ୟ ସେ ସୁଯୋଗ ପାଇନଥିଲେ। ବରଂ ଅପରାଜିତାଙ୍କ ଜାଗାରେ ବିଜେପିର ପୁରୁଣା ମହିଳା ନେତ୍ରୀ ସଞ୍ଚିତା ମହାନ୍ତି ଓ ସୁରମା ପାଢି ପ୍ରଧାନମନ୍ତ୍ରୀଙ୍କ ଗସ୍ତବେଳେ ଅଧିକ ସୁଯୋଗ ପାଇଥିଲେ। ଅପରାଜିତାଙ୍କର ଭୂମିକାକୁ ସଙ୍କୁଚିତ କରିବା ଲାଗି ରାଜ୍ୟ ନେତୃତ୍ୱ ସଚେତନ ଭାବରେ ପ୍ରୟାସ କରିଥିଲା ନା ଅପରାଜିତାଙ୍କ ଭୂମିକା ମୂଳରୁ ଅନାବଶ୍ୟକ ଭାବରେ ବଡ ଦିଶୁଥିଲା, ସେ କଥାକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି। ଅପରାଜିତା ନିଜକୁ ରାଜ୍ୟ ବିଜେପିର ଏଲିଟ ଗୋଷ୍ଠୀର ବୋଲି ଏକପ୍ରକାର ଧାରଣା ସୃଷ୍ଟି କରୁଥିଲେ। ସେ ସିଧାସଳଖ ଉପର ମହଲରୁ ନିର୍ଦ୍ଦେଶ ପାଇ ଆସିଛନ୍ତି ଓ ତାଙ୍କୁ ସେ ଭୂମିକା ଦେବାକୁ ରାଜ୍ୟ ନେତୃତ୍ୱ ଏକପ୍ରକାର ବାଧ୍ୟ ବୋଲି ଏକ ଖବର ବ୍ୟାପକ ହୋଇଥିଲା। ତେଣୁ ତୁରନ୍ତ ତାଙ୍କର ପକ୍ଷ ଛେଦନ ଦରକାର ବୋଲି ଜଣେ ତୁଙ୍ଗ ବିଜେପି ନେତା ତାଙ୍କର ଅନୁଗତ ମାନଙ୍କୁ ନିର୍ଦ୍ଦେଶ ଦେଇଥିଲେ।

ଏପରିକି ଅପରାଜିତାଙ୍କ ନୂଆପଲ୍ଲୀ କାର୍ୟାଳୟ ଉପରେ ରାଜ୍ୟ ନେତୃତ୍ୱ ତରଫରୁ ସତର୍କ ଦୃଷ୍ଟି ରଖାଯାଇଛି। ତାଙ୍କ ସହିତ ଭେଟା ହେଉଥିବା ଦଳୀୟ ନେତା ଓ ସାମ୍ବାଦିକଙ୍କ ଖବର ତୁରନ୍ତ ରାଜ୍ୟ ନେତୃତ୍ୱ ପାଖରେ ପହଞ୍ଚି ଯାଉଛି। ଗତ ପନ୍ଦର ଦିନ ଧରି ଗଣମାଧ୍ୟମରେ ଅପରାଜିତାଙ୍କ ପ୍ରଭାବ ଦଳ ଭିତରେ ଏକପ୍ରକାର ଗୋଷ୍ଠୀ ବିବାଦକୁ ତୀବ୍ରତର କରିଛି। ସେଥିପାଇଁ ବୋଧହୁଏ ଅପରାଜିତାଙ୍କୁ ଦଳୀୟ ନେତୃତ୍ୱ ତାଙ୍କ ସୀମା ସମ୍ପର୍କରେ ସଚେତନ କରିଦେଇଛନ୍ତି। ସମୀକ୍ଷା ସହ କଥାବାର୍ତ୍ତା ବେଳେ ଜନୈକ ସଂଘ କର୍ମକର୍ତ୍ତା କହିଛନ୍ତି ଯେ ଅପରାଜିତା ନିଜର ପ୍ରଶାସକୀୟ ଆଦବ କାଇଦା ଦଳ ଭିତରେ ଯଦି ଦେଖେଇବେ ତାହେଲେ ତାଙ୍କୁ କୌଣସି ବିଶେଷ ସୁଯୋଗ ମିଳିବ ନାହିଁ।

ଏପରିକି ଭୁବନେଶ୍ୱର ଲୋକସଭା ଆସନରେ ବିଜେପି ପ୍ରାର୍ଥୀ ଭାବରେ ଅପରାଜିତାଙ୍କୁ ଟିକେଟ ମିଳିବା ଏତେ ସହଜ ନୁହଁ ବୋଲି କୁହାଯାଉଛି। ପାଇକ ବିଦ୍ରୋହକୁ ନିର୍ବାଚନର କେନ୍ଦ୍ରୀୟ ବିଷୟ କରିବାକୁ ବିଜେପି ଚାହୁଁ ଥିବାରୁ ଓ ଖୁର୍ଦ୍ଧା ରେ ଖଣ୍ଡାୟତ ଭୋଟରଙ୍କର ନିର୍ଣ୍ଣାୟକ ଭୂମିକା ରହୁଥିବାରୁ ଗତ କାଲି ପ୍ରଧାନମନ୍ତ୍ରୀଙ୍କ ସଭାରେ ପୁରୁଖା ନେତା ବିଶ୍ଵ ଭୂଷଣ ହରିଚନ୍ଦନଙ୍କୁ ଅଧିକ ଗୁରୁତ୍ଵ ଦିଆ ଯାଇଥିଲା। ବିଶ୍ବଭୂଷଣଙ୍କ ପରିବାର ଖୁର୍ଦ୍ଧା ରାଜନୀତିରେ ସବୁବେଳେ ପ୍ରମୁଖ ଭୂମିକା ନେଇ ଆସୁଛନ୍ତି। ୨୦୧୪ ନିର୍ବାଚନରେ ଭୁବନେଶ୍ୱର ଲୋକସଭା ଆସନରୁ ବିଶ୍ବଭୂଷଣଙ୍କ ପୁଅ ପୃଥ୍ବୀରାଜ ହରିଚନ୍ଦନ ବିଜେପି ଟିକେଟରେ ଲଢିଥିଲେ। ଅପରାଜିତାଙ୍କ ଆଗମନ ହରିଚନ୍ଦନ ପରିବାର ଭିତରେ ଅସନ୍ତୋଷ ସୃଷ୍ଟି କରିଛି।

ଏତେ ସବୁ ଜଟିଳ ରାଜନୈତିକ ସମୀକରଣ ଭିତରେ ଅପରାଜିତା କିନ୍ତୁ ନିଜର ରାଜନୈତିକ ଲକ୍ଷ୍ୟ ସ୍ଥିର କରି ଆଗେଇ ଚାଲିଛନ୍ତି। ଗତ କାଲିର ସଭା ଆଦୌ ଅନ୍ତିମ ଦୃଶ୍ୟ ନୁହେଁ, ବରଂ ଆଗକୁ ଆହୁରି ଅନେକ ଚକିତ କଲା ପରି ଖବର ଅପରାଜିତାଙ୍କ ଶିବିରରୁ ଆସିପାରେ ବୋଲି ସୂଚନା ମିଳୁଛି!

କେଦାର ମିଶ୍ର

ଗତ କିଛିଦିନ ହେବ ରାଷ୍ଟ୍ରୀୟ ସ୍ଵୟଂ ସେବକ ସଂଘର ମୁଖିଆ ମୋହନ ଭାଗବତ ଓଡିଶାରେ ଅଛନ୍ତି। ତାଙ୍କ ରହଣି କାଳରେ ସେ ଓଡିଶାର ଦୁଇଜଣ ବିଶିଷ୍ଟ ମହିଳାଙ୍କୁ ସାକ୍ଷାତ କରିବାକୁ ନେଇ ବିଜେପି ରାଜନୀତିରେ ସମୀକରଣ ବଦଳିବାର ସୂଚନା ମିଳୁଛି। ଭାଗବତ ପ୍ରଥମେ ଓଟିଭିର ମାଲିକାଣୀ ଜାଗୀ ମଙ୍ଗତ ପଣ୍ଡାଙ୍କ ସହ ସାକ୍ଷାତ କରିଥିଲେ। ଆସନ୍ତା ୨୪ ତାରିଖ ଦିନ ପ୍ରଧାନମନ୍ତ୍ରୀ ମୋଦୀଙ୍କ ଓଡିଶା ଗସ୍ତ ସମୟରେ ବୈଜୟନ୍ତ ପଣ୍ଡା ବିଜେପିରେ ଯୋଗଦାନ କରିପାରନ୍ତି ବୋଲି ଯେଉଁ ଗୁଞ୍ଜରଣ ଶୁଭୁଛି, ସେହି ପରିପ୍ରେକ୍ଷୀରେ ଭାଗବତଙ୍କ ସହ ଜାଗୀଙ୍କ ସାକ୍ଷାତକାରର ସ୍ଵତନ୍ତ୍ର ଗୁରୁତ୍ଵ ରହିଛି। ତେବେ ରାଜ୍ୟ ବିଜେପି ନେତାଙ୍କୁ ବିଶେଷ ଗୁରୁତ୍ଵ ନଦେଇ ନିକଟରେ ଦଳକୁ ଆସିଥିବା ପୂର୍ବତନ ଆଇଏଏସ ଅଧିକାରୀ ଅପରାଜିତା ଷଡଙ୍ଗୀଙ୍କୁ ସଂଘ ମୁଖିଆ ଭେଟି ଆଲୋଚନା କରିବା ପ୍ରସଙ୍ଗ, ଏବେ ବିଜେପି ରଣନୀତିର ପରିବର୍ତ୍ତନ ବିଷୟରେ ସ୍ପଷ୍ଟ ସୂଚନା ଦେଉଛି।

୨୦୧୯ ନିର୍ବାଚନରେ ଓଡିଶା ବିଧାନସଭା ଲାଗି ଦିଲ୍ଲୀ ମୋଡେଲ କାର୍ୟକାରୀ କରାଯିବାର ସମ୍ଭାବନା ରହିଛି ବୋଲି ଆମେ ପୂର୍ବରୁ ସୂଚନା ଦେଇଥିଲୁ। କିରଣ ବେଦୀଙ୍କୁ ଶେଷ ମୁହୂର୍ତ୍ତରେ ଦିଲ୍ଲୀର ମୁଖ୍ୟମନ୍ତ୍ରୀ ପ୍ରାର୍ଥୀ କରାଗଲା ପରି ଅପରାଜିତା ଓଡିଶା ପାଇଁ ମୁଖ୍ୟମନ୍ତ୍ରୀ ପ୍ରାର୍ଥୀ ହେବାର ସମ୍ଭାବନାକୁ ଏଡାଇ ଦିଆଯାଇନପାରେ। ଉଭୟ ଓଡିଆ କେନ୍ଦ୍ରମନ୍ତ୍ରୀ ଜୁଏଲ ଓରାମ ଓ ଧର୍ମେନ୍ଦ୍ର ପ୍ରଧାନ ରାଜ୍ୟ ରାଜନୀତିରେ ନିଜର ପ୍ରତିଷ୍ଠା ତିଆରି କରିବାରେ ବିଫଳ ହୋଇଛନ୍ତି ବୋଲି ସଂଘ ଓ ବିଜେପି ନେତୃତ୍ୱ ଏକପ୍ରକାର ବୁଝି ସାରିଛନ୍ତି। ତେଣୁ ଜଣେ ନୂଆ ମୁହଁ ମାଧ୍ୟମରେ ଭୋଟରଙ୍କ ପାଖକୁ ଯିବାଲାଗି ସଂଘ ପରିବାର ବିଜେପିକୁ ପରାମର୍ଶ ଦେଇଥିବାର ଚର୍ଚ୍ଚା ଏବେ ଶୁଣିବାକୁ ମିଳୁଛି। ଅପରାଜିତା ଷଡଙ୍ଗୀ ଆଗାମୀ ଦିନରେ ବିଜେପିର ମୁଖ୍ୟମନ୍ତ୍ରୀ ପ୍ରାର୍ଥୀ ଭାବରେ ଘୋଷିତ ହେବାର ସମ୍ଭାବନା ଏବେ ଅଧିକ।

ଏହା ସହିତ ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ଵରେ ମହିଳା ଆରକ୍ଷଣ ବିଲ ସପକ୍ଷରେ ଯେଉଁ ଅଭିଯାନ ଚାଲିଛି, ତାର ମୁକାବିଲା ପାଇଁ ବିଜେପି ଜଣେ ମହିଳାଙ୍କୁ ପ୍ରାର୍ଥୀ କରି ବିଜେଡି କୁ ନୈତିକ ଭାବରେ ଆହ୍ଵାନ ଦେଇପାରେ। ଆମେ କେବଳ ସଂରକ୍ଷଣ ନୁହେଁ, ବରଂ ସିଧା ସଳଖ ଜଣେ ମହିଳାଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ କରୁଛୁ ବୋଲି କହି  ବିଜେପି ନିଜର ପ୍ରଚାର ଅଭିଯାନକୁ ଗୋଟେ ନୂଆ ଟୁଇଷ୍ଟ ଦେବାର ସମ୍ଭାବନା ଏବେ ସ୍ପଷ୍ଟ ଦିଶୁଛି। ମହିଳାଙ୍କ ନୂଆ ନେତୃତ୍ୱ ପାଇଁ ଧର୍ମେନ୍ଦ୍ର ବାବୁ ନିଜର ଅଭିଳାଷକୁ ବଳି ପକେଇଲେ ବୋଲି ଏକ ଧାରଣା ମଧ୍ୟ ସୃଷ୍ଟି କରାଯିବ। ନବୀନଙ୍କୁ ମୁକାବିଲା କରିବାରେ ଦଳର ପୁରୁଖା ନେତା ସମର୍ଥ ହେଉନଥିବାରୁ, ନୂଆ ନେତାଙ୍କୁ ନେଇ ପରୀକ୍ଷା ନିରୀକ୍ଷା କରିବାରେ କିଛି ଅସୁବିଧା ନାହିଁ ବୋଲି ସଂଘ ବିଶ୍ଵାସ କରୁଛି।

ତେବେ ସବୁଠୁ ବଡ କଥା ହେଉଛି, ଭାଗବତ ନିଜ ଓଡିଶା ଗସ୍ତ ସମୟରେ ଯେଉଁ ଦୁଇଜଣ ବିଶିଷ୍ଟ ମହିଳାଙ୍କୁ ଭେଟିଛନ୍ତି, ଦୁହେଁ ଓଡିଆ ଘରର ବୋହୁ ହୋଇଥିଲେ ମଧ୍ୟ ଉଭୟ ଅଣ ଓଡିଆ। ଯଦି ଅଣ ଓଡିଆ ବୋହୁଙ୍କୁ ଓଡିଆ ବୋଲି ଗ୍ରହଣ କରିବାକୁ ସଂଘ ଓ ବିଜେପି ଓଡିଶାବାସୀଙ୍କୁ ଆହ୍ଵାନ ଦେବେ, ତାହେଲେ କେଉଁ ମୁହଁରେ ସେମାନେ ସୋନିଆଁ ଗାନ୍ଧୀଙ୍କୁ ବିଦେଶିନୀ ବୋଲି କହିବେ? ଅନ୍ୟ ଏକ ଘଟଣାକ୍ରମରେ ବିଜେପି ଓ ସଂଘର ଜଣେ ବହୁ ପୁରୁଖା ନେତା ମୋହନ ଭାଗବତଙ୍କ ସହ ଦେଖା କରିବାକୁ ଚେଷ୍ଟା କରିଥିଲେ ମଧ୍ୟ ତାଙ୍କୁ ଭାଗବତ ସମୟ ଦେଇନଥିଲେ। ନାରାଜ ନେତା ଜଣକ ପାର୍ଟି ଅଫିସରେ ଏହାକୁ ନେଇ ପାଟିତୁଣ୍ଡ କଲାପରେ ପରଦିନ ପ୍ରାର୍ଥନାସଭାକୁ ତାଙ୍କୁ ଡକାଯାଇଥିଲା । ମାତ୍ର ଅଳ୍ପ ସମୟ ପାଇଁ ସେ ସଂଘ ମୁଖିଆଙ୍କୁ ଦେଖା କରିଥିଲେ।

ସାଧାରଣ ନିର୍ବାଚନ ଯେତିକି ପାଖେଇ ଆସୁଛି, ବିଜେପି ର ପୁରୁଣା ନେତୃତ୍ୱ ସେତିକି ଅସୁରକ୍ଷିତ ହୋଇପଡୁଛନ୍ତି। ଏବେ ଅପରାଜିତାଙ୍କ କର୍ୟାଳୟରେ ବେଶ ଭିଡ ଜମୁଛି। ଗଣମାଧ୍ୟମରେ ତାଙ୍କୁ ଅଧିକରୁ ଅଧିକ ଗୁରୁତ୍ଵ ଦିଆଯାଉଛି। ଖୋଦ ବିଜେପିର ଭୁବନେଶ୍ୱର କାର୍ୟାଳୟ ଆଗରେ ଅପରାଜିତାଙ୍କର ଏକ ବିଶାଳକାୟ ପୋଷ୍ଟର ଲାଗିଛି। ଏହି ସବୁ ପୃଷ୍ଟଭୂମିରେ ଅପରାଜିତା ଯେତେବେଳେ ସଂଘ ମୁଖିଆଙ୍କ ସହ ପ୍ରାୟ ୨୫ ମିନିଟ ଆଲୋଚନା କରୁଛନ୍ତି, ସେଠି ରାଜ୍ୟ ବିଜେପି ନେତୃତ୍ୱ ଯେ କ୍ରମଶଃ ତାଙ୍କ ହାତମୁଠାକୁ ଚାଲିଯାଉଛି, ସେ କଥା ଜଳ ଜଳ ହୋଇ ଦେଖାଯାଉଛି। ଅପରାଜିତା ଯଦି ବିଜେପିର ମୁଖ୍ୟମନ୍ତ୍ରୀ ପ୍ରାର୍ଥୀ ହୁଅନ୍ତି କିମ୍ବା ଜାଗୀ ମଙ୍ଗତ ପଣ୍ଡା ଯଦି ବିଜେପିରେ ଯୋଗ ଦିଅନ୍ତି, ତାହେଲେ ଓଡିଶାରେ ବିଜେପିର ଜ୍ୟାମିତି ପୂରା ବଦଳିଯିବ। ୨୦୧୯ ସାଧାରଣ ନିର୍ବାଚନରେ ନୂଆ ବାଜି ଲଗେଇବାକୁ ବିଜେପି ଏବେ ମନସ୍ଥ କରିଛି ବୋଲି ଏବେ ଆଭାସ ମିଳୁଛି।