The Samikhsya Odia
ଭୁବନେଶ୍ବର : ରାଜ୍ୟରେ ଆଉ 30 ଜଣ କରୋନା ଆକ୍ରାନ୍ତ ସୁସ୍ଥ ହୋଇଛନ୍ତି । ରାଜ୍ୟ ସରକାରଙ୍କ ପକ୍ଷରୁ ଏକ ପ୍ରେସ୍ମିଟ୍ କରି ଏହି ସୂଚନା ପ୍ରଦାନ କରିଛନ୍ତି ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର । ଏହି 30 ଜଣଙ୍କୁ ମିଶାଇ ରାଜ୍ୟରେ ସମୁଦାୟ ସୁସ୍ଥ ବ୍ୟକ୍ତିଙ୍କ ସଂଖ୍ୟା 196ରେ ପହଞ୍ଚିଛି । ଉଲ୍ଲେଖମଯୋଗ୍ୟ ଯେ, ରାଜ୍ୟରେ ସମୁଦାୟ 737 ଆକ୍ରାନ୍ତ ଚିହ୍ନଟ ହୋଇଥିବା ବେଳେ ତନ୍ମଧ୍ୟରୁ 196 ଜଣ ସୁସ୍ଥ ହୋଇଛନ୍ତି ଏବଂ 3 ଜଣଙ୍କର ପ୍ରାଣହାନି ଘଟିଛି ।
ଅଗରତାଲା : ଉତ୍ତର ପୂର୍ବୀୟ ରାଜ୍ୟ ମାନଙ୍କରେ କରୋନା ସଂକ୍ରମଣ ଅପେକ୍ଷାକୃତ କମ୍ ରହିଥିବା ବେଳେ ବିଗତ 48 ଘଣ୍ଟା ମଧ୍ୟରେ 7 ଜଣ ବିଏସ୍ଏଫ୍ ଯବାନ କରୋନା ପଜିଟିଭ୍ ସାବ୍ୟସ୍ତ ହୋଇଛନ୍ତି । ଉତ୍ତର ପୂର୍ବୀୟ ରାଜ୍ୟ ତ୍ରିପୁରାରେ 7 ଜଣ ବିଏସଏଫ୍ ଯବାନଙ୍କ ସମେତ 11 ଜଣ ବ୍ୟକ୍ତି କରୋନା ଦ୍ବାରା ଆକ୍ରାନ୍ତ ହୋଇଛନ୍ତି । ବିଗତ 48 ଘଣ୍ଟା ମଧ୍ୟରେ 625ଟି ନମୂନା ପରୀକ୍ଷଣ ହୋଇଥିବା ବେଳେ ତନ୍ମଧ୍ୟରୁ ସୁମଦାୟ 11ଟି ନମୂନା ପଜିଟିଭ୍ ଆସିଛି । ଏହି 11ଟି ନମୂନା ମଧ୍ୟରୁ 159 ସୀମା ସୁରକ୍ଷା ବଳର 7ଜଣ ଯବାନ ରହିଥିବା ଜଣାପଡିଛି । ଅନ୍ୟ ଚାରି ବ୍ୟକ୍ତିଙ୍କ ମଧ୍ୟରୁ ଦୁଇ ଜଣ ଟ୍ରକ୍ ଡ୍ରାଇଭର୍ ରହିଥିବା ନେଇ ମୁଖ୍ୟମନ୍ତ୍ରୀ ବିପ୍ଲବ୍ ଦେବ ସୂଚନା ଦେଇଛନ୍ତି । (ଏଜେନ୍ସି)
ନୂଆଦିଲ୍ଲୀ : କରୋନା ଭାଇରସ୍ ସଙ୍କଟରୁ ଦେଶରେ ଦେଖାଦେଇଥିବା ଅର୍ଥନୈତିକ ସଙ୍କଟକୁ ନେଇ ପୁଣିଥରେ ଆକ୍ରମଣ କରିଛନ୍ତି ରାହୁଲ ଗାନ୍ଧୀ । ପୁନର୍ବାର ପ୍ରବାସୀ ଶ୍ରମିକ ଏବଂ କୃଷକଙ୍କ ଆକାଉଣ୍ଟକୁ ସିଧା ପଇସା ପଠେଇବା ଦାବି ଦେହରାଇଥିଲେ ରାହୁଲ । ଏହା ସହିତ ନିଜ ରାଜ୍ୟକୁ ଫେରିଥିବା ପ୍ରବାସୀ ଶ୍ରମିକଙ୍କୁ ଅନ୍ୟୁନ 200 ଦିନର ମନରେଗା କାମ ପ୍ରଦାନ କରିବା ପାଇଁ ଦାବି କରିଥିଲେ ରାହୁଲ । ଭାରତରେ ଚାଷୀ, ଶ୍ରମିକ ଏବଂ କ୍ଷୁଦ୍ର ବ୍ୟବସାୟୀ ଅର୍ଥନୀତିର ପ୍ରମୁଖ ଅଙ୍ଗ । ତେଣୁ ଅର୍ଥନୀତିରେ ସୁଧାର ପାଇଁ ଏମାନେ ସଶକ୍ତ ରହିବା ଆବଶ୍ୟକ ବୋଲି ଦାବି କରି ରାହୁଲ ଆକାଉଣ୍ଟକୁ ପଇସା ପଠାଇବାର ଦାବି କରିଛନ୍ତି । ସେହିପରି ସ୍ପଷ୍ଟ ଯୋଜନା ସହିତ ଲକ୍ଡାଉନ୍ରୁ ବାହାରିବା ଉଚିତ୍ ବୋଲି ରାହୁଲ କହିଛନ୍ତି । (ଏଜେନ୍ସି)
ନୂଆଦିଲ୍ଲୀ : ସାରା ଦୁନିଆରେ କରୋନା ପ୍ରଭାବ ବିସ୍ତାର କରି ଚାଲିଥିବାବେଳେ ଏହା ମଧ୍ୟରେ ଦୁନିଆର ସବୁଠୁ ବଡ ଶରଣାର୍ଥୀ କ୍ୟାମ୍ପ୍ରେ ଏବେ କରୋନା ସଂକ୍ରମଣର ମାମଲା ସାମ୍ନାକୁ ଆସିଛି। ବାଂଲାଦେଶର ରୋହିଙ୍ଗ୍ୟା ଶରଣାର୍ଥୀ କ୍ୟାମ୍ପ୍ରେ କରୋନା ଏବେ ପହଞ୍ଚି ଯାଇଛି। ଏହି ଶିବିରରେ ପ୍ରାୟ ୧୦ ଲକ୍ଷ ରୋହିଙ୍ଗ୍ୟା ଶରଣାର୍ଥୀ ରହୁଛନ୍ତି ।
ମିଳିଥିବା ସୂଚନା ଅନୁସାରେ ବାଂଲାଦେଶ ଶରଣାର୍ଥୀ ସହାୟତା ଆୟୋଗର ଅଧ୍ୟକ୍ଷ ମହବୁବ ଆଲମ୍ ତାଲୁକଦାର ଗୁରୁବାର ଦିନ କକ୍ସ ବଜାରସ୍ଥିତି ଶରଣାର୍ଥୀ କ୍ୟାମ୍ପ୍ରେ କରୋନା ମାମଲା ସାମ୍ନାକୁ ଆସିଥିବାର କହିଛନ୍ତି । ଶରଣାର୍ଥୀଙ୍କ ସମେତ ଅନ୍ୟ ଜଣେ ବ୍ୟକ୍ତି କରୋନା ପଜିଟିଭ୍ ଚିହ୍ନଟ ହୋଇଛନ୍ତି । ଦୁହିଁଙ୍କୁ ଆଇସୋଲେସନ କେନ୍ଦ୍ରକୁ ପଠାଯାଇଛି ।
ଏହି ଦୁଇଜଣଙ୍କ ସମ୍ପର୍କରେ ଆସିଥିବା ବ୍ୟକ୍ତିଙ୍କର ଚିହ୍ନଟ କରାଯାଉଛି। ଆକ୍ରାନ୍ତ ଦୁଇଜଣଙ୍କ ମଧ୍ୟରୁ ଜଣେ ଏହି ଶିବିରରେ ରହୁନଥିବାବେଳେ ସେ କକ୍ସ ବଜାର ଜିଲ୍ଲାରେ ରହୁଥିବାର ସୂଚନା ରହିଛି। ଏହି କ୍ୟାମ୍ପ୍ରେ 10 ଲକ୍ଷରୁ ଅଧିକ ରୋହିଙ୍ଗ୍ୟା ମୁସଲମାନ ରହୁଛନ୍ତି। ଏହି ଶିବିରରୁ କରୋନା ମାମଲା ଆସିବା ପରେ ଚିନ୍ତା ବଢି ଯାଇଛି। ଏହି ଅଞ୍ଚଳଟି ଭିଡ ଅଞ୍ଚଳ ହୋଇଥିବାବେଳେ ଏଠାରେ ସଫା ସୁତୁରା ଓ ନିର୍ମଳ ଜଳର ଅସୁବିଧା ଲାଗି ରହିଥାଏ। ଏଠାରେ କରୋନାରୁ ବଞ୍ଚିବା ପାଇଁ ଉପାୟ କରିବା ବହୁ କଷ୍ଟକର ହୋଇପଡିବ ।
ମିଳିଥିବା ରିପୋର୍ଟ ଅନୁସାରେ ଏଠାରେ ଏହି ଶିବିରରେ ଜନସଂଖ୍ୟା ଘନତ୍ୱରେ ବର୍ଗ କିଲୋମିଟର ପ୍ରତି 40,000 ଲୋକ ବାସ କରନ୍ତି (ବର୍ଗ ମାଇଲ ପ୍ରତି 103,600) । ଏହା ବାଂଲାଦେଶର ହାରାହାରି ଘନତ୍ୱର 40 ଗୁଣ । (ଏଜେନ୍ସି)
ନୂଆଦିଲ୍ଲୀ : ଦେଶରେ କରୋନା ସଂକ୍ରମିତଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ସ୍ବାସ୍ଥ୍ୟ ମନ୍ତ୍ରାଳୟ ତରଫରୁ ମିଳିଥିବା ସୂଚନା ଅନୁସାରେ ଏପର୍ଯ୍ୟନ୍ତ 81,970ଜଣ ସଂକ୍ରମିତ ହୋଇଛନ୍ତି । ସେହିପରି 2649ଜଣଙ୍କର ମୃତ୍ୟୁ ହୋଇଛି । ସେହିପରି 27,919ଜଣ ସୁସ୍ଥ ହୋଇଛନ୍ତି । ଏବେ ଦେଶରେ 50 ହଜାରରୁ ଅଧିକ ଆକ୍ଟିଭ୍ କେସ୍ ରହିଛି । ଗତ 24 ଘଣ୍ଟାରେ 100ରୁ ଉର୍ଦ୍ଧ୍ବଙ୍କ ଜୀବନ ଯାଇଛି । ସେହିପରି 3967ଟି ନୂତନ ମାମଲା ଆସିଛି ।
ସ୍ବାସ୍ଥ୍ୟ ମନ୍ତ୍ରାଳୟ ସୂଚନା ଅନୁସାରେ ମହାରାଷ୍ଟ୍ରରେ ସର୍ବାଧିକ 1019ଜଣଙ୍କର ମୃତ୍ୟୁ ହୋଇଥିବାବେଳେ ଗୁଜୁରାଟରେ 586, ମଧ୍ୟପ୍ରଦେଶରେ 237, ପଶ୍ଚିମବଙ୍ଗରେ 213, ରାଜସ୍ଥାନରେ 125, ଦିଲ୍ଲୀରେ 115, ଉତ୍ତରପ୍ରଦେଶରେ 88, ଆନ୍ଧ୍ରପ୍ରଦେଶରେ 38, ତାମିନାଡୁରେ 6, ତେଲେଙ୍ଗାନାରେ 34, କର୍ଣ୍ଣାଟକରେ 35, ପଞ୍ଜାବରେ 32, ଜମ୍ମୁକାଶ୍ମୀରରେ 11, ହରିୟାଣରେ 11, ବିହାରରେ 7, କେରଳରେ 4, ଝାଡଖଣ୍ଡରେ 3, ଓଡ଼ିଶାରେ 3, ଚଣ୍ଡୀଗଡରେ 3, ହିମାଚଳ ପ୍ରଦେଶରେ 2, ଆସାମରେ 2 ଓ ମେଘାଳୟରେ ଜଣକର ମୃତୃୁ ଘଟିଛି । (ଏଜେନ୍ସି)
ଭୁବନେଶ୍ବର : ରାଜ୍ୟରେ ଆଉ 15 ଜଣ କରୋନା ଆକ୍ରାନ୍ତ ସୁସ୍ଥ ହୋଇଛନ୍ତି । ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁଏହି ସୂଚନା ପ୍ରଦାନ କରାଯାଇଛି । ସୁସ୍ଥ ହୋଇଥିବା ସମସ୍ତ ବ୍ୟକ୍ତି ଯାଜପୁର ଜିଲ୍ଲାର ବୋଲି ଜଣାପଡିଛି । ଏହାକୁ ମିଶାଇ ରାଜ୍ୟରେ ସମୁଦାୟ ସୁସ୍ଥ ବ୍ୟକ୍ତିଙ୍କ ସଂଖ୍ୟା 158ରେ ପହଞ୍ଚିଛି । ଉଲ୍ଲେଖଯୋଗ୍ୟ ଯେ ରାଜ୍ୟରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା 624 ରହିଥିବା ବେଳେ ତନ୍ମଧ୍ୟରୁ 158 ଜଣ ସୁସ୍ଥ ହୋଇଛନ୍ତି ଏବଂ 3 ଜଣଙ୍କ ଦେହାନ୍ତ ଘଟିଛି । ଏହା ସହ ବର୍ତ୍ତମାନ ରାଜ୍ୟରେ 463ଟି ସକ୍ରିୟ ଆକ୍ରାନ୍ତ ରହିଛନ୍ତି ।
ଭୁବନେଶ୍ବର : କେନ୍ଦ୍ରାପଡା ଜିଲ୍ଲାରୁ 13 ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । କେନ୍ଦ୍ରାପଡା ଜିଲ୍ଲାପାଳ ଟ୍ବିଟ କରି ଏହି ସୂଚନା ଦେଇଛନ୍ତି । ନୂତନ ଆକ୍ରାନ୍ତକୁ ମିଶାଇ କେନ୍ଦ୍ରାପଡାରେ ଆକ୍ରାନ୍ତଙ୍କ ସଂଖ୍ୟା 22ରେ ପହଞ୍ଚିଛି । ଏହାକୁ ମିଶାଇ ରାଜ୍ୟରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା 624ରେ ପହଞ୍ଚିଛି । ସମସ୍ତ ଆକ୍ରାନ୍ତ ସୁରତ ଫେରନ୍ତା ଏବଂ ସେମାନେ ମହାକାଳପଡା, କେନ୍ଦ୍ରାପଡା ଏବଂ କନିକା ବ୍ଲକ୍ର କ୍ବାରେଣ୍ଟାଇନ୍ ସେଣ୍ଟରରେ ଅବସ୍ଥାନ କରୁଥିଲେ ବୋଲି ଜିଲ୍ଲାପାଳ ଟ୍ବିଟ୍ କରିଛନ୍ତି । ଉଲ୍ଲେଖଯୋଗ୍ୟ ଯେ ରାଜ୍ୟରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା 624 ରହିଥିବା ବେଳେ ତନ୍ମଧ୍ୟରୁ 143 ଜଣ ସୁସ୍ଥ ହୋଇଛନ୍ତି ଏବଂ 3 ଜଣଙ୍କ ଦେହାନ୍ତ ଘଟିଛି ।
ନୂଆଦିଲ୍ଲୀ : ଦେଶରେ ମହାମାରୀ କରୋନା ପ୍ରକୋପ ଜାରି ରଖିଛି । କରୋନା ସଂକ୍ରମିତଙ୍କ ସଂଖ୍ୟା ଦିନକୁ ଦିନ ବଢିବାରେ ଲାଗିଛି । ସ୍ବାସ୍ଥ୍ୟ ମନ୍ତ୍ରାଳୟ ତରଫରୁ ମିଳିଥିବା ସୂଚନା ଅନୁସାରେ ଏବେ ଦେଶରେ କରୋନା ସଂକ୍ରମିତଙ୍କ ସଂଖ୍ୟା 78 ହଜାର ପାର ହୋଇଥିବା ବେଳେ କରୋନା ଆକ୍ରାନ୍ତଙ୍କ ମୃତ୍ୟୁ ସଂଖ୍ୟା 25 ଶହ ଟପିଛି ।
ଗତ 24 ଘଣ୍ଟାରେ ଦେଶରେ 3722 ଟି ନୂଆ କରୋନା ଆକ୍ରାନ୍ତଙ୍କ ମାମଲା ସାମନାକୁ ଆସିଥିବା ବେଳେ 134 ଜଣ ପ୍ରାଣ ହରାଇଥିବା ଜଣାପଡ଼ିଛି । ଏବେ ଦେଶରେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇ 78 ହଜାର 003ରେ ପହଂଚିଛି । ଏପର୍ଯ୍ୟନ୍ତ ଭାରତରେ 2549 ଜଣଙ୍କ ମୃତ୍ୟୁ ଘଟିଛି । ସେହିପରି ମୋଟ୍ ଆକ୍ରାନ୍ତଙ୍କ ମଧ୍ୟରୁ 26,235ଜଣ ସୁସ୍ଥ ହୋଇଛନ୍ତି। ମୋଟ ଆକ୍ରାନ୍ତଙ୍କ ମଧ୍ୟରୁ 49, 219 ସକ୍ରିୟ ଅଛନ୍ତି।
ମହରାଷ୍ଟ୍ରରେ ସ୍ଥିତି ସଙ୍ଗୀନ ହେବାରେ ଲାଗିଛି। ଦିଲ୍ଲୀ ଓ ଗୁଜୁରାଟରେ ମଧ୍ୟ ସ୍ଥିତି ଭୟଙ୍କର ରହିଛି । ମହାରାଷ୍ଟ୍ରରେ ମୃତ୍ୟୁ ସଂଖ୍ୟା 975କୁ ବୃଦ୍ଧି ହୋଇଛି । ମଧ୍ୟପ୍ରଦେଶରେ 232, ଗୁଜୁରାଟରେ 566, ଦିଲ୍ଲୀରେ 106, ତାମିଲନାଡୁରେ 64, ତେଲେଙ୍ଗାନାରେ 34, ଆନ୍ଧ୍ରପ୍ରଦେଶରେ 47, କର୍ଣ୍ଣାଟକରେ 33, ଉତ୍ତରପ୍ରଦେଶରେ 83, ପଞ୍ଜାବରେ 32, ପଶ୍ଚିମବଙ୍ଗରେ 207, ରାଜସ୍ଥାନରେ 121, ଜମ୍ମୁକାଶ୍ମୀରର 11, ହରିୟାଣାରେ 11, କେରଳରେ 4, ଝାଡଖଣ୍ଡରେ 3, ବିହାରରେ 7, ଓଡ଼ିଶାରେ 3, ହିମାଚଳ ପ୍ରଦେଶରେ 2, ମେଘାଳୟରେ ଜଣଙ୍କର ମୃତ୍ୟୁ ହୋଇଛି । (ଏଜେନ୍ସି)
ନୂଆଦିଲ୍ଲୀ : ରେଳ ମନ୍ତ୍ରାଳୟ ଭ୍ରମଣ କରିଥିବା ଜନୈକ ଅଧିକାରୀ କରୋନା ପଜିଟିଭ୍ ସାବ୍ୟସ୍ତ ହୋଇଛନ୍ତି । ଆରପିଏଫ୍ର ଅଧିକାରୀ ଜଣକ ଏକ ସପ୍ତାହ ପୂର୍ବରୁ ରେଳ ମନ୍ତ୍ରାଳୟ ଭ୍ରମଣ କରିଥିଲେ । ଆରପିଏଫ୍ ଡିଜି ଅରୁଣ କୁମାର ଜନୈକ ଅଧିକାରୀ କରୋନା ପଜିଟିଭ୍ ସାବ୍ୟସ୍ତ ହୋଇଥିବା ନେଇ ସୂଚନା ଦେଇଛନ୍ତି । ଏହି ସୂଚନା ମିଳିବା ପରେ ଉକ୍ତ ବ୍ୟକ୍ତିଙ୍କ କଣ୍ଟାକ୍ଟ ଟ୍ରେସିଂ ଜାରି କରାଯାଇଛି । ଏହା ସହିତ ଅଧିକାରୀଙ୍କ ସଂସ୍ପର୍ଶରେ ଆସିଥିବା ଅନ୍ୟ ବ୍ୟକ୍ତିଙ୍କୁ କ୍ବାରଣ୍ଟିନ୍ରେ ରଖାଯାଉଛି । ଉଲ୍ଲେଖଯୋଗ୍ୟ ଯେ ବର୍ତ୍ତମାନ ସୁଦ୍ଧା 70 ଆରପିଏଫ୍ ଅଧିକାରୀ କରୋନା ପଜିଟିଭ୍ ସାବ୍ୟସ୍ତ ହୋଇଥିବା ବେଳେ ତନ୍ମଧ୍ୟରୁ 30 ଜଣ ସୁସ୍ଥ ହୋଇଛନ୍ତି । (ଏଜେନ୍ସି)
ହେମାଙ୍ଗ ପ୍ରସାଦ ରାଉଳ
ଗଂଜାମ ଜିଲ୍ଲା ନେତୃତ୍ୱରେ ଆଗୁଆ, ବିକାଶରେ ପଛୁଆ ଶୀର୍ଷକରେ ଅନୁଷ୍ଠିତ ହୋଇଛି ଅନେକ ଆଲୋଚନା ଚକ୍ର। ଏଠାକାର ସହରରେ ଶ୍ରେଷ୍ଠ ବ୍ୟକ୍ତିତ୍ୱ ପରିଚୟରେ ଆଗଧାଡ଼ିର କିଛି ନାମ ଯୋଡ଼ି ହୋଇ ଅନେକ ବିକାଶ ମଂଚ ଅନେକ ଫୋରମ୍ ଅନେକ ସଂଗଠନ ରହିଛି। ଯେଉଁମାନେ ରାତିପାହିଲେ ଖବର ପୃଷ୍ଠାରେ ଖବର ପାଇଁ ମନବଳାଇ ନିଜ ଉଦ୍ଦେଶ୍ୟକୁ ଚରିତାର୍ଥ କରି ଧନ୍ୟ ମନେ କରି ଆସୁଥିଲେ, ଆଜି କରୋନା ରୋଗର ମହାମାରୀ ରୂପ ଆଗରେ ଏଇ ସଂଗଠନ ଗୁଡ଼ିକ ଆବଦ୍ଧ କୋଠରୀରେ କେବଳ ସମୟକୁ ସାଥୀରେ ନେଇ ନୀରବ। ବିଡ଼ମ୍ବନା ଗଂଜାମ ପାଇଁ ଚିନ୍ତା କରୁଥିବା ଚିନ୍ତାନଶୀଳ ବ୍ୟକ୍ତିମାନେ ଗଂଜାମରେ ସଂପ୍ରତି ଉପୁଜିଥିବା ଭୟଙ୍କର ପରିସ୍ଥିତି ପାଇଁ ସ୍ୱର ଉଠାଇବାରେ ଦୁର୍ବଳ କାହିଁକି। ନିଜ ନିଜ ସ୍ୱାର୍ଥ, ସମ୍ମାନ, ଉପାଧି ଓ ମାନପତ୍ର ଯୋଗାଡ଼ିବାର ଲାଳସାକୁ ଚରିତାର୍ଥ କରୁଥିବା ବିଭିନ୍ନ ସଂଗଠନ ଓ ଭିନ୍ନ ଭିନ୍ନ ବ୍ୟକ୍ତିତ୍ୱ ରୂପେ ପଦାରେ ପଡ଼ୁଛି। ସୁରାଟରୁ ପ୍ରବାସୀ ଓଡ଼ିଆଙ୍କୁ ଆଣି ଯେଉଁ ଭୟଙ୍କର ବିପତ୍ତି ଗଂଜାମବାସୀଙ୍କ ମୁଣ୍ଡ ଉପରେ ଚିନ୍ତାର ପାହାଡ଼ ପରି ଲଦି ଦିଆଯାଇଛି ସେ ସମୟରେ କୌଣସି ବୁଦ୍ଧିଜୀବୀ, ନାଗରିକ, ଶିକ୍ଷାବିତ୍, ସଂଗଠକ, ବିଭିନ୍ନ ସମସ୍ୟାର ବିଭିନ୍ନ ଆନ୍ଦୋଳନ କରି ଖବର ଖୋଜୁଥିବା ତଥାକଥିତ ଗୁଣୀମାନେ ତୁନି ପଡ଼ିବା ଦୁର୍ଭାଗ୍ୟଜନକ ନୁହେଁ ଲଜ୍ଜାଜନକ। ଗଂଜାମକୁ ୪୫ ଦିନର ଲକଡ଼ାଉନ୍ ପୂରଣ ପରେ ଗଂଜାମ ପାଇଛି କ’ଣ ଓ ହରାଇଛି କ’ଣ?
ଆଜି ଗଂଜାମ ଜିଲ୍ଲାର ସ୍ଥିତି ଏକ ପ୍ରକାର ସଂଗୀନ ଅବସ୍ଥାକୁ ଟାଣି ହୋଇଯିବାର ଦୃଶ୍ୟ ଜଳଜଳ ହୋଇ ଦିଶୁଛି। ରାଜ୍ୟ ସରକାରଙ୍କ ସବୁଠୁ ଚର୍ଚ୍ଚିତ ଜିଲ୍ଲାରେ କରୋନାକୁ ନେଇ ଆଲୋଚନା ଦେଶରୁ ବିଦେଶରେ। ପ୍ରଶାସନ କଳର ତତ୍ପରତାରୁ ଦେଢ଼ମାସ ଭିତରେ ଏଠାକାର କୌଣସି ଲୋକ ଦେହରେ କରୋନା ଭୂତାଣୁ ସଂକ୍ରମଣ ଲକ୍ଷଣ ପ୍ରକାଶ ପାଇବା କିମ୍ବା ବିନା ଲକ୍ଷଣରେ ରୋଗୀ ଚିହ୍ନଟ ଗତସପ୍ତାହ ପର୍ଯ୍ୟନ୍ତ ହୋଇନଥିଲା। ଆଜି ପ୍ରାୟ ୨୦୦ରୁ ଅଧିକ ରୋଗୀ ଚିହ୍ନଟ କରାଗଲାଣି। ଏହି ସଂଖ୍ୟା ମଧ୍ୟ ହଜାର ଆଡ଼କୁ ଟପିବା ପାଇଁ ଆଉ କିଛି ଦିନର ଅପେକ୍ଷା। ଏହା କେବଳ ପ୍ରବାସୀ ଓଡ଼ିଆଙ୍କ ପାଇଁ। ଏପରି ସମୟରେ କୌଣସି ବୁଦ୍ଧିଜୀବୀଙ୍କ ପ୍ରତିକ୍ରିୟା ଶୂନ୍ୟ ବିଚାର ନିଶ୍ଚୟ ଅନୁଶୀଳନୀୟ। ବୁଦ୍ଧିଜୀବୀମାନଙ୍କ ବୁଦ୍ଧି ଖଟିଥାଏ କେବଳ ନିଜର ସ୍ୱାର୍ଥ ଓ ଆତ୍ମ ପ୍ରଜ୍ଞାପନର ପ୍ରଶସ୍ତି ପାଠ ପାଇଁ। ଘଣ୍ଟୁଆମାନେ ଘଣ୍ଟ ଧରୁଥିଲେ ସ୍ୱାସ୍ଥ୍ୟସେବାକୁ ବିପର୍ଯ୍ୟସ୍ତ କରିବା ବିରୁଦ୍ଧରେ। ଘଣ୍ଟ ବାଜୁଥିଲେ ଖବର ପୃଷ୍ଠାରେ ପାଠ ପୋତି ହୋଇଯାଉଥିଲା। ପୁଣି କିଏ ରାତିରେ ମଂଜିପୋତିଲେ ସକାଳେ ଖବର କାଗଜରେ ଗଛ ହୋଇ ମହମହ ବାସୁଥିଲା। ପ୍ରକୃତି ପ୍ରେମୀ ଓ ସବୁଜପ୍ରେମୀର ବାର୍ତ୍ତାଦେଇ। ସଚିବାଳୟରୁ ଆର୍ଡ଼ିସି ଅଫିସ ପର୍ଯ୍ୟନ୍ତ ଏଇ ତଥାକଥିତ ଫୋରମ୍ଗୁଡ଼ିକ ଏକ ପ୍ରକାର ନିଜ ବିଚାରରେ ନିଜେ ଯେମିତି ବଳୀୟାନ ହୋଇ ଖବର ଗୋଟାଇବାରେ ଥିଲେ ଜଣେ ଜଣେ ଆତ୍ମପ୍ରଶସ୍ତି ପାଠ ପଠନର ଭିନ୍ନ ଏକ ବ୍ୟକ୍ତିତ୍ୱ। ଆଜି କେବଳ ଏମାନଙ୍କ ବିଚାର ଆଣ୍ଡ୍ରଏଡର ତର୍କ ଓ ବିତର୍କ।
କମିଶନର, ଜିଲ୍ଲାପାଳ କାର୍ଯ୍ୟାଳୟରେ ବସି ନିଜ ନିଜ ଲୋକଙ୍କୁ ନେଇ ଜଣଙ୍କ ପାଇଁ ଅଧିକ ଚିନ୍ତା କରିବାର ବାହାନା ଦେଖାଇ ସହରକୁ ସ୍ୱଚ୍ଛ କରିବା ପାଇଁ ଯେଉଁ ଚରିତ୍ର ମାନେ ବ୍ରହ୍ମପୁରରେ ଏକ ପ୍ରକାର ଆଡ୍ଡା ଜମାଇଥିଲେ ସେମାନେ କୋଭିଡ଼୍-୧୯ ଯୁଦ୍ଧରେ ନୀରବ କାହିଁକି ? ଗଂଜାମ ଜିଲ୍ଲାରେ ଭୟଙ୍କର ବିପର୍ଯ୍ୟୟ ବିଗତ ଦଶବର୍ଷ ଭିତରେ ଅନେକ ଆସିଛି। ଏଇ ମଧ୍ୟ ଫାଇଲିନ୍, ଫନି, ହୁଡ଼୍ହୁଡ଼୍ ବାତ୍ୟାକୁ କ’ଣ ମୁକାବିଲା କରିବାରେ ପ୍ରଶାସନ ସିଦ୍ଧହସ୍ତ ଥିଲା ଏହାର ପ୍ରମାଣପତ୍ର ମଧ୍ୟ ଜିଲ୍ଲାକୁ ମିଳିଥିଲା। ଆଜି କିନ୍ତୁ ଜୀବନ ସ୍ୱାସ୍ଥ୍ୟ ସଂକଟକୁ ଡ଼ାକି ଆଣି ଲୋକଙ୍କ ଉପରେ ଲଦି ଦେଲେ ତଥାପି ଜିଲ୍ଲାବାସୀ ନୀରବରେ କ’ଣ ସହ୍ୟ କରିଯିବେ? ଦେଢ଼ମାସ ଆଗରୁ ପ୍ରବାସୀ ଓଡ଼ିଆ ଜିଲ୍ଲାବାସୀଙ୍କୁ ଆଣିଥିଲେ ଟଳି ଯାଇଥାନ୍ତା ଆତଙ୍କର ସଂକଟ। ଶିଳ୍ପ ନାହିଁ କି ପାଣି ନାହିଁ ବୋଲି କେତେ ନେତା ସ୍ୱର ଉଠାଇ କ୍ଷମତାର ଦୁର୍ଗରେ ପ୍ରବେଶ କରିଲେ।
ଏଇ କ୍ଷମତାକେନ୍ଦ୍ର ଗଂଜାମରେ କିଏ ବିରୋଧୀ କିଏ ଶାସନ କଳର ମିତ୍ର ବାରିବା ମଧ୍ୟ ଆଦୌ ସହଜ ନୁହେଁ। ଏମାନେ ଦିନରେ ବସନ୍ତ, ରାତିରେ ବାସନ୍ତୀ ପରି ଜୀବନ୍ତ ଅଭିନୟ କରନ୍ତି। ଆଜି ଯଦି ଗଂଜାମ ଜିଲ୍ଲାବାସୀ କରୋନା ବିପତ୍ତି ମୁହଁକୁ ଠେଲି ହୋଇଯାଏ ବୁଦ୍ଧିଜୀବୀ ସମାଜ ପଳାତକ ନ ସାଜି ଏଇ କୋଭିଡ଼୍ ଯୁଦ୍ଧ ସମୟରେ ଠିକ୍ ଓ ଭୁଲ ବ୍ୟବଧାନକୁ ବୁଝି ସରକାରଙ୍କୁ ଠିକଣା ପରାମର୍ଶ ଦେବାର ଆଜି ଅବସର ଆସିଛି। ପ୍ରଶାସନ କଳର ପାରିବାର ପଣିଆ ଦିନକୁ ଦିନ ଢ଼ିଲା ହେବା ଫଳରେ ଏଠାକୁ ତିନ ତିନୋଟି ଆଇଏଏସ୍ ପଦାଧିକାରୀଙ୍କୁ ଦାୟିତ୍ୱ ଦିଆଯାଇଛି। ଏଇ ପ୍ରଶାସନ ଚାହିଁଥିଲେ ପ୍ରବାସୀ ଓଡ଼ିଆଙ୍କୁ ବହୁ ଆଗରୁ ଗଂଜାମକୁ ଫେରାଇ ଆଣିବାରେ ସମର୍ଥ ହୋଇ ଜିଲ୍ଲାବାସୀଙ୍କୁ ସୁରକ୍ଷିତ ଆଶ୍ୱାସନା ଦେବାର ସାମର୍ଥ୍ୟ ପ୍ରକାଶ କରିଥାନ୍ତା। ଆଜି ଛତୁଫୁଟିଲା ପରି କରୋନା ରୋଗୀଙ୍କୁ ଅଣ୍ଟିରେ ଧରିଛି ଗଂଜାମ ଜିଲ୍ଲା ପ୍ରଶାସନ। ଅଧିକାଂଶ ରୋଗୀ ଉଦ୍ଧତ। ଟିକିଏ ଗଳାବାଟ ମିଳିଲେ ବୁଣିଦେବେ ବିହନ। ସରିଯିବ ଅନେକ ସଂସାର ବଦଳିଯିବ ଭାଗ୍ୟ। ଆଗକୁ ଆସନ୍ତୁ ସଂଗଠନ, ବୁଦ୍ଧିଜୀବୀ ବିଚାର କରନ୍ତୁ। ଗଂଜାମ ଜିଲ୍ଲାକୁ ବିପଦ ମୁହଁରୁ ଟାଳିବା ପାଇଁ ନିଅନ୍ତୁ ଶପଥ। ଯଦି ସଂଗଠନ ଗୁଡ଼ିକ ପରସ୍ପର ଏକତାର ସୂତ୍ରରେ ବାନ୍ଧି ହୋଇ କୋବିଡ଼ ଯୁଦ୍ଧରେ ଯୋଦ୍ଧା ହୋଇ ଠିଆ ହେବେ ନିଶ୍ଚୟ ଜିଲ୍ଲାର ମହାବିପତ୍ତି ଟଳିବ ଏବଂ କରୋନା ହାରିବ।
ଭୁବନେଶ୍ବର: ଆଜି ଓଡିଶାରେ ଆଉ ୨୭ ଜଣ କରୋନା ଆକ୍ରାନ୍ତ ସୁସ୍ଥ ହୋଇଛନ୍ତି। ଏହି ସୁସ୍ଥ ଆକ୍ରାନ୍ତ କୁ ମିଶାଇ ରାଜ୍ୟରେ ମୋଟ ସୁସ୍ଥ ହୋଇଥିବା ଆକ୍ରାନ୍ତଙ୍କ ସଂଖ୍ୟା ୧୪୩କୁ ବୃଦ୍ଧି ହୋଇଛି। ବାଲେଶ୍ଵର ରେ ୯ ଜଣ , ଭୁବନେଶ୍ବର ରେ ୮ ଜଣ, ଭଦ୍ରକରେ ୪ଜଣ, ଗଞ୍ଜାମ ରେ ୨ଜଣ , ସୁନ୍ଦରଗଡ ରେ ୨ଜଣ, କେଉଁଝର ଏବଂ କୋରାପୁଟ ରେ ଜଣେ ଲେଖାଏଁ କରୋନା ଆକ୍ରାନ୍ତ ସୁସ୍ଥ ହୋଇଛନ୍ତି। ସୂଚନାଯୋଗ୍ୟ ଯେ ରାଜ୍ୟରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା ୫୩୮ ଥିବା ବେଳେ, ସୁସ୍ଥ ସଂଖ୍ୟା ୧୪୩ରେ ପହଞ୍ଚିଛି। ୩ ଜଣ ଆକ୍ରାନ୍ତଙ୍କ ମୃତ୍ୟୁ ଘଟିଥିବା ବେଳେ ରାଜ୍ୟରେ ବର୍ତ୍ତମାନ ୩୯୨ ଜଣ ସକ୍ରିୟ ଆକ୍ରାନ୍ତ ରହିଛନ୍ତି।
ଭୁବନେଶ୍ବର : ରାଜ୍ୟରେ ଆଉ 31 ଜଣ କରୋନା ଆକ୍ରାନ୍ତ ସୁସ୍ଥ ହୋଇଛନ୍ତି । ସୁସ୍ଥ ହୋଇଥିବା ସମସ୍ତ ବ୍ୟକ୍ତି ଯାଜପୁର ଜିଲ୍ଲାର ବୋଲି ଜଣାପଡିଛି । ଏହି 31 ଜଣଙ୍କୁ ମିଶାଇ ରାଜ୍ୟରେ ସମୁଦାୟ ସୁସ୍ଥ ବ୍ୟକ୍ତିଙ୍କ ସଂଖ୍ୟା 116ରେ ପହଞ୍ଚିଛି । ଉଲ୍ଲେଖଯୋଗ୍ୟ ଯେ, ରାଜ୍ୟରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା 437ରେ ପହଞ୍ଚିଥିବା ବେଳେ ତନ୍ମଧ୍ୟରୁ 116 ଜଣ ସୁସ୍ଥ ହୋଇଥିବା ବେଳେ 3 ଜଣଙ୍କର ପ୍ରାଣହାନି ଘଟିଛି ।
ମୁମ୍ବାଇ : ମୁମ୍ବାଇରେ କାର୍ଯ୍ୟ କରୁଥିବା ଜଣେ ମହିଳା ଡାକ୍ତର ନିଜର କରୋନା ତଥ୍ୟ ଲୁଚାଇ ଅଡୁଆରେ ପଡିଛନ୍ତି । 22 ବର୍ଷୀୟା ଡାକ୍ତର ଜଣକ କରୋନା ପଜିଟିଭ୍ ସାବ୍ୟସ୍ତ ହୋଇଥିବା ବେଳେ ମୁମ୍ବାଇରୁ ଭୁଜ୍ ଯାତ୍ରା କରି ଅଡୁଆରେ ପଡିଛନ୍ତି । ଜେଜେ ହସ୍ପିଟାଲରେ କାର୍ଯ୍ୟରତ ଏହି ଡାକ୍ତର ଜଣକ ମେ 4 ତାରିଖରେ କରୋନା ପଜିଟିଭ୍ ସାବ୍ୟସ୍ତ ହୋଇଥିଲେ । କରୋନା ପଜିଟିଭ୍ ଜଣାପଡଇବା ପରେ ତାଙ୍କୁ ହୋମ୍ କ୍ବାରେଣ୍ଟିନ୍ରେ ରହିବା ପାଇଁ ନିର୍ଦ୍ଦେଶ ଦିଆଯାଇଥିଲା । ମାତ୍ର ଏହାକୁ ଅବମାନନା କରିବା ସହିତ 5 ତାରିଖରେ ନିଜ ଗାଁ କଚ୍ଛକୁ ଫେରିଥିଲେ । ଏପରିକି କଚ୍ଛ ଫେରିବା ପାଇଁ ସେ ଏକ ନକଲି ଆଇଡି ମଧ୍ୟ ବ୍ୟବହାର କରିଥିଲେ । ଏହି ଘଟଣା ପରେ ମହିଳାଙ୍କ ବିରୋଧରେ ଏପିଡେମିକ୍ ଆକ୍ଟ 2005 ଅନୁଯାୟୀ 3ଟି ମାମଲା ରୁଜୁ କରାଯାଇଛି । (ଏଜେନ୍ସି)
ଭୁବନେଶ୍ବର : ଆସନ୍ତା ଜୁନ୍ 22 ସୁଦ୍ଧା ରଥ କାମ ଶେଷ କରିବା ପାଇଁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ଏ ସମ୍ପର୍କିତ ଏକ ଜନସ୍ବାର୍ଥ ମାମଲାର ବିଚାର କରି ଓଡିଶା ହାଇକୋର୍ଟ ଏହି ନିର୍ଦ୍ଦେଶ ଦେଇଛନ୍ତି । ରଥ ନିର୍ମାଣ ତ୍ବାରାନ୍ବିତ ଗତିରେ ଚାଲିଥିବା ନେଇ ଏଜିଙ୍କ ରିପୋର୍ଟ ପରେ ହାଇକୋର୍ଟ ଏହି ନିର୍ଦ୍ଦେଶନାମା ଜାରି କରିଛନ୍ତି । ଉଲ୍ଲେଖଯୋଗ୍ୟ ଯେ, କରୋନା ମହାମାରୀ କାରଣରୁ ରଥ ନିର୍ମାଣ କାର୍ଯ୍ୟ ବିଳମ୍ବ ହୋଇଥିବା ବେଳେ ଗୃହ ବିଭାଗର ଅନୁମତି ପରଠାରୁ ସାମାଜିକ ଦୂରତ୍ବ ସହିତ ରଥ କାମ ଆରମ୍ଭ କରାଯାଇଛି ।
ଅଜମେର : କରୋନା ସନ୍ଦେହରେ ଜଣେ ଯୁବକ ଆତ୍ମହତ୍ୟା କରିଥିବାର ଖବର ଶୁଣିବାକୁ ମିଳିଛି । ଜେଏଲ୍ଏନ୍ ହସ୍ପିଟାଲର କରୋନା ଓ୍ବାର୍ଡରେ ଭର୍ତ୍ତି ହୋଇଥିବା ଜଣେ ଯୁବକ କରୋନା ସନ୍ଦେହର ହସ୍ପିଟାଲ ଶୌଚାଳୟରେ ଆତ୍ମହତ୍ୟା କରିଛନ୍ତି । କିନ୍ତୁ ତାଙ୍କର ରିପୋର୍ଟ ନେଗେଟିଭ୍ ଆସିଛି ।
କରୋନା ସନ୍ଦେହରେ ଆତ୍ମହତ୍ୟା କରିଥିବା ଯୁବକ ଜଣକ ୟୁପିର ରାୟବରେଲୀର ବୋଲି ହୋଇଥିବାବେଳେ ତାଙ୍କର ବୟସ 30 ବର୍ଷ ବୋଲି ଜଣାପଡିଛି । ସେ ରବିବାର ସକାଳୁ ଗୁଜୁରାଟରୁ ନିଜ ଘର ରାୟବରେଲୀ ଯାଉଥିଲେ । ବସ୍ରେ ଯାଉଥିବା ସମୟରେ ଯୁବକଙ୍କୁ ଥଣ୍ଡା ଓ କାଶ ହୋଇଥିଲା । ଏହାପରେ ବସ୍ରେ ଥିବା ଯାତ୍ରୀମାନେ ତାଙ୍କୁ କରୋନା ପଜିଟିଭ୍ ଭାବି ତାଙ୍କୁ ପର୍ବତପୁରା ବାଇପାସ୍ ନିକଟରେ ପୋଲିସ୍ ହାତରେ ଜିମା ଦେଇଥିଲେ ।
ଏହାପରେ ପୋଲିସ୍ ତାଙ୍କୁ ଜେଏଲ୍ଏନ୍ ହସ୍ପିଟାଲ ନେଇଥିଲେ । ଏଠାରେ ତାଙ୍କୁ ବାରମ୍ବାର କାଶ ଓ ଥଣ୍ଡା ଥିବା ଯୋଗୁଁ କରୋନା ଓ୍ବାର୍ଡରେ ଭର୍ତ୍ତି କରାଯାଇଥିଲା । ଏହାପରେ ଯୁବକଙ୍କ ନମୁନା ପରୀକ୍ଷା ପାଇଁ ପଠାଯାଇଥିଲା । କିନ୍ତୁ ରିପୋର୍ଟ ଆସିବା ପୂର୍ବରୁ ଯୁବକ ଜଣକ ଆତ୍ମହତ୍ୟା କରିଦେଇଛନ୍ତି । ରିପୋର୍ଟ ନେଗେଟିଭ୍ ଆସିଥିବାବେଳେ ଯୁବକ ଜଣକ ଆତ୍ମହତ୍ୟା କରିଥିବାର ଖବର ଏବେ ଅଞ୍ଚଳରେ ଚର୍ଚ୍ଚା ସୃଷ୍ଟି କରିଛି ।
ଭୁବନେଶ୍ବର : ଆଜି ପ୍ରଦେଶ କଂଗ୍ରେସ କମିଟି ସଭାପତି ନିରଞ୍ଜନ ପଟ୍ଟନାୟକ ପ୍ରେସବାର୍ତ୍ତା ଜରିଆରେ କହିଛନ୍ତି ଯେ ଓଡିଶାରେ କରୋନା ପରିସ୍ଥିତି ଜଟିଳ ହେବାରେ ଲାଗିଛି । ବିଶେଷକରି ଗଞ୍ଜାମ ଜିଲ୍ଲାରେ 40 ହଜାରରୁ ଅଧିକ ଲୋକ ଆସି ପହଂଚିଲେଣି । ଆହୁରି ମଧ୍ୟ ଆସିବେ । ସେମାନଙ୍କର ସଂପୂର୍ଣ୍ଣ ବ୍ୟବସ୍ଥା ଖାଲି 3 ଜଣ ପ୍ରଶାସନିକ ଅଧିକାରୀଙ୍କୁ ଦେଇଦେଲେ ହେବନାହିଁ । ଅନ୍ୟାନ୍ୟ ସହଯୋଗୀ କାର୍ଯ୍ୟକ୍ରମ ସେଠାରେ ଆରମ୍ଭ କରିବାର ଆବଶ୍ୟକତା ରହିଛି । ବାଚସ୍ପତି ମହାଶୟ ନିଜେ କାଲି ଗଣମାଧ୍ୟମ ଜରିଆରେ କହିଥିଲେ ଯେ ଗାଁ ମଝିରେ କ୍ୱାରେଣ୍ଟାଇନ୍ ସେଣ୍ଟର ଖୋଲାଯାଇଛି । ରାତିରେ କେହି ରହୁନାହାନ୍ତି, ଘରକୁ ପଳାଉଛନ୍ତି । ତେଣୁ ଏ ସବୁ କାର୍ଯ୍ୟକ୍ରମକୁ ଆହୁରି ସୂଚାରୁ ରୂପେ କରିବାକୁ ସରକାରଙ୍କୁ ନିବେଦନ କରିଛନ୍ତି ନିରଞ୍ଜନ ପଟ୍ଟନାୟକ ।
ସେ ଆହୁରି କହିଛନ୍ତି ଯେ ଆମେ ଯାହା ସରକାରଙ୍କୁ ପ୍ରସ୍ତାବ ଦେଲୁ ସରକାର ଆମ କଥା ଶୁଣିଲେ ନାହିଁ । ସେଠାକାର ବିଭିନ୍ନ ରାଜନୈତିକ ଲୋକ, ସେବାକାରୀ ସଂସ୍ଥା, ନାଗରିକ ସମାଜକୁ ନେଇ ଲୋକଙ୍କ ମନୋବଳ କରାଯାଉ । ଅନ୍ୟାନ୍ୟ ଜିଲ୍ଲାର ଯେଉଁମାନେ ଦାଦନ ଶ୍ରମିକ ଖଟିବାକୁ ରାଜ୍ୟ ବାହାରକୁ ଯାଇଛନ୍ତି, ସେମାନେ ଫେରି ନାହାନ୍ତି । ଫେରିଲେ ଗଞ୍ଜାମ ଭଳି ଭୟାବହ ସ୍ଥିତି ଦେଖାଯାଇପାରେ । ଏହାଛଡା ଗଞ୍ଜାମ ଜିଲ୍ଲାରେ ମାତ୍ର 200 ବେଡ୍ ଥିବା ହସ୍ପିଟାଲ ବ୍ୟବସ୍ଥାକୁ ନେଇ ନିରାଶା ଜାହିର କରିଛନ୍ତି ନିରଞ୍ଜନ । ଯେଉଁଠି ଆବଶ୍ୟକତା ନାହିଁ, ସେଠରେ ଅଧିକ ବେଡ୍ର କୋଭିଡ୍ ବ୍ୟବସ୍ଥା କରିଛନ୍ତି ସରକାର । ଗରିବ ଓଡିଆକୁ ବଞ୍ଚାଇବା ପାଇଁ ସରକାର ପଦକ୍ଷେପ ଗ୍ରହଣ କରନ୍ତୁ ବୋଲି ନିରଞ୍ଜନ କହିଛନ୍ତି ।
ଭୁବନେଶ୍ବର : କରୋନା ଆକକ୍ରାନ୍ତଙ୍କୁ ନେଇ ରାଜ୍ୟ ସରକାର ଏକ ବଡ ନିଷ୍ପତ୍ତି ନେଇଛନ୍ତି । ଏଣିକି ଲକ୍ଷଣ ନଥିବା ରୋଗୀ ମାନେ ଘରେ ରହି ନିଜର ଚିକିତ୍ସା କରି ପାରିବେ ବୋଲି ସ୍ବାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ ମହାପାତ୍ର ସୂଚନା ଦେଇଛନ୍ତି । ପଜିଟିଭି୍ ଆସିଥିବା ବ୍ୟକ୍ତିଙ୍କର ଯଦି କୌଣସି ଲକ୍ଷଣ ନଥାଏ ତେବେ ସେ ଘରେ ରହି ଚିକିତ୍ସିତ ହୋଇ ପାରିବେ । ସାମାନ୍ୟ ଲକ୍ଷଣ ଥିବା ରୋଗୀଙ୍କ ପାଇଁ ମଧ୍ୟ ସମାନ ନିୟମ ପ୍ରଯୁଜ୍ୟ । ଘରେ ରହି ଚିକିତ୍ସିତ ହେବାକୁ ହେଲେ ଉକ୍ତ ଆକ୍ରାନ୍ତଙ୍କ ପାଇଁ ଅଲଗା ଘର ଏବଂ ଅଲଗା ପାଇଖାନା ଜରୁରୀ ବୋଲି ମହାପାତ୍ର ସ୍ପଷ୍ଟ କରିଛନ୍ତି । ଆକ୍ରାନ୍ତଙ୍କ ହାତରେ ଷ୍ଟାମ୍ପ ଓ ବ୍ୟାଣ୍ଡ ଲଗାଯିବା ସହିତ ଘର ସାମ୍ନାରେ ଷ୍ଟିକର ଲଗାଯିବ । ଆକ୍ରାନ୍ତଙ୍କ ଦାୟିତ୍ବ ନେବାଲାଗି ସ୍ବତନ୍ତ୍ର ଭାବରେ ଘରର ଜଣେ ଲୋକ ରହିବ । ସରକାରଙ୍କୁ ନିଜର ସ୍ବେଚ୍ଛାପତ୍ର ପ୍ରଦାନ କରିବା ପରେ ସାମାନ୍ୟ କିମ୍ବା ଲକ୍ଷଣ ନଥିବା ବ୍ୟକ୍ତି ନିଜ ଘରେ ରହି ଚିକିତ୍ସିତ ହୋଇପାରିବେ ।
ଭୁବନେଶ୍ବର : ରାଜ୍ୟରେ ଆଉ ତିନି ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ତିନି ଜଣ ଆକ୍ରାନ୍ତ ଯାଜପୁର, ମୟୁରଭଞ୍ଜ ଏବଂ କଟକର ବୋଲି ଜଣାପଡିଛି । ଏହାକୁ ମିଶାଇ ରାଜ୍ୟରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା 394ରେ ପହଞ୍ଚିଛି । 394 ଆକ୍ରାନ୍ତଙ୍କ ମଧ୍ୟରୁ 85 ଜଣ ସୁସ୍ଥ ହୋଇଛନ୍ତି ଏବଂ 3 ଜଣଙ୍କର ପ୍ରାଣହାନି ଘଟିଛି । ଏହାକୁ ମିଶାଇ ରାଜ୍ୟରେ ସକ୍ରିୟ କରୋନା ଆକ୍ରାନ୍ତଙ୍କ ସଂଖ୍ୟା 306ରେ ପହଞ୍ଚିଛି । ଏହି ଆକ୍ରାନ୍ତଙ୍କୁ ମିଶାଇ ଯାଜପୁରରେ ଆକ୍ରାନ୍ତଙ୍କ ସଂଖ୍ୟା 61ରେ ପହଞ୍ଚିଥିବା ବେଳେ ମୟୁରଭଞ୍ଜରେ 9 ଏବଂ କଟକରେ 3ରେ ପହଞ୍ଚିଛି ।
ଭୁବନେଶ୍ବର : ରାଜ୍ୟରେ ସୁସ୍ଥ ହୋଇଛନ୍ତି 17 କରୋନା ଆକ୍ରାନ୍ତ । ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା ବଢି ଚାଲିଥିବା ବେଳେ ଏକା ସାଙ୍ଗରେ ଏତେ ରୋଗୀ ସୁସ୍ଥ ହେବା ଉତ୍ସାହଜନକ ରହିଛି । ସୋମବାର ସୁସ୍ଥ ବ୍ୟକ୍ତିଙ୍କୁ ମିଶାଇ ରାଜ୍ୟରେ ସମୁଦାୟ 85 ଜଣ କରୋନା ଆକ୍ରାନ୍ତ ସୁସ୍ଥ ହୋଇଛନ୍ତି । ସୁସ୍ଥ ବ୍ୟକ୍ତିଙ୍କ ମଧ୍ୟରେ ସୁନ୍ଦରଗଡ ଜିଲ୍ଲାରୁ ସର୍ବାଧିକ 7 ଜଣ ବ୍ୟକ୍ତି ରହିଛନ୍ତି । ଖୋର୍ଦ୍ଧା ଜିଲ୍ଲାରୁ 5 ଜଣ ଆକ୍ରାନ୍ତ ସୁସ୍ଥ ହୋଇଥିବା ବେଳେ ଭଦ୍ରକରୁ ତିନି ଜଣ ଏବଂ ବାଲେଶ୍ବରରୁ ଦୁଇ ଜଣ ଆକ୍ରାନ୍ତ ସୁସ୍ଥ ହୋଇଛନ୍ତି । ଉଲ୍ଲେଖଯୋଗ୍ୟ ଯେ, ରାଜ୍ୟରେ ବର୍ତ୍ତମାନ ସମୁଦାୟ 391 ଜଣ ଆକ୍ରାନ୍ତ ରହିଥିବା ବେଳେ ତନ୍ମଧ୍ୟରୁ 85 ଜଣ ସୁସ୍ଥ ହୋଇଛନ୍ତି ଏବଂ 3 ଜଣଙ୍କର ପ୍ରାଣହାନି ଘଟିଛି ।
ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ପୁଣିଥରେ କରୋନା ସଂକଟକୁ ନେଇ ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବେ ବୋଲି ଜଣାପଡିଛି । ପ୍ରଧାନମନ୍ତ୍ରୀ ମୋଦି ଲକଡାଉନ୍ 3.0 ପରେ ମୁଖ୍ୟମନ୍ତ୍ରୀଙ୍କ ସହ ପ୍ରଥମ ଥର ପାଇଁ ଆଲୋଚନା କରିବେ। ମୁଖ୍ୟମନ୍ତ୍ରୀ ମାନଙ୍କ ସହ ପ୍ରଧାନମନ୍ତ୍ରୀଙ୍କ ଏହି ବୈଠକ ସୋମବାର ଅପରାହ୍ନ 3 ଟାରେ ଭିଡିଓ କନଫରେନ୍ସିଂ ମାଧ୍ୟମରେ ଅନୁଷ୍ଠିତ ହେବ ବୋଲି ସୂଚନା ମିଳିଛି।
ଏପ୍ରିଲ୍ 28 ରେ ପ୍ରଧାନମନ୍ତ୍ରୀ ମୋଦି ଚତୁର୍ଥ ଥର ପାଇଁ ଭିଡିଓ କନଫରେନ୍ସିଂ ମାଧ୍ୟମରେ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରି ଦେଶରେ କରୋନା ମୁକାବିଲା ପାଇଁ ଲାଗୁ ହୋଇଥିବା ଲକଡାଉନର ଅବଧିକୁ 17 ମଇ ପର୍ଯ୍ୟନ୍ତ ବୃଦ୍ଧି କରିଥିଲେ ।
ମେ‘ 17 ପରେ କରୋନା ସହ ଦେଶ କିପରି ଲଢେଇ କରିବ ତାହା ସମ୍ପର୍କରେ ଚର୍ଚ୍ଚା ହେବ । କରୋନର ସ୍ଥିତି ସଙ୍ଗୀନ୍ ଥିବା ସମୟରେ ଆଗାମୀ ରଣନୀତି କିପରି ରହିବେ ସେ ନେଇ ପ୍ରଧାନମନ୍ତ୍ରୀ ସମସ୍ତ ମୁଖ୍ୟମନ୍ତ୍ରୀମାନଙ୍କ ସହିତ ଆଲୋଚନା କରି ନିଷ୍ପତ୍ତି ନେବେ ବୋଲି ଆଶା କରାଯାଉଛି । (ଏଜେନ୍ସି)
ଭୁବନେଶ୍ବର : ରାଜ୍ୟରେ ଆହୁରି 15 ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହି 15 ଜଣଙ୍କୁ ମିଶାଇ ରାଜ୍ୟରେ ଆକ୍ରାନ୍ତଙ୍କ ସଂଖ୍ୟା 377ରେ ପହଞ୍ଚିଛି । ପ୍ରଥମ ଥର ପାଇଁ ବୌଦ୍ଧ ଜିଲ୍ଲାକୁ ଛୁଇଁଛି କରୋନା । ବୌଦ୍ଧ ଜିଲ୍ଲାର 3 ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଗଞ୍ଜାମରୁ ସର୍ବାଧିକ 7 ଜଣ ଆକ୍ରାନ୍ତ ବାହାରିଥିବା ବେଳେ ଅନୁଗୁଳ ଏବଂ ପୁରୀରୁ ଦୁଇ ଜଣ ଲେଖାଏଁ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହାକୁ ମିଶାଇ ରାଜ୍ୟରେ ଆଜି ସମୁଦାୟ ଆକ୍ରାନ୍ତଙ୍କ ସଂଖ୍ୟା 83ରେ ପହଞ୍ଚିଛି । ଉଲ୍ଲେଖଯୋଗ୍ୟ ଯେ, ରାଜ୍ୟରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା 377ରେ ପହଞ୍ଚିଥିବା ବେଳେ ତନ୍ମଧ୍ୟରୁ 63 ଜଣ ସୁସ୍ଥ ହୋଇଛନ୍ତି ଏବଂ 3 ଜଣଙ୍କର ପ୍ରାଣହାନି ଘଟିଛି ।