The Samikhsya Odia
ସମୀକ୍ଷା ବ୍ୟୁରୋ
ନୂଆଦିଲ୍ଲୀ: ଆଜି ଦେଶରେ କରୋନା ରୋଗୀଙ୍କ ସଂଖ୍ୟା ୧୫୦୦ ଟପି ଯାଇଛି। ରାତି ନଅଟା ସୁଦ୍ଧା ଦେଶରେ ୧୫୬୮ଜଣଙ୍କର ଦେହରେ କରୋନା ଭୂତାଣୁ ଚିହ୍ନଟ ହୋଇଛି। ଆଜି ମହାରାଷ୍ଟ୍ରରେ ଆକ୍ରାନ୍ତଙ୍କ ସଂଖ୍ୟା ୩୦୦ ଟପିଛି। ଦେଶରେ ମୋଟ ୧୫୬୮ ଆକ୍ରାନ୍ତ ଚିହ୍ନଟ ହୋଇଛନ୍ତି ଓ ୪୧ ଜଣ ମୃତ୍ୟୁ ବରଣ କରିଛନ୍ତି ବୋଲି “ଇଣ୍ଡିଆ ଟୁଡେ” ସୂତ୍ରରୁ ଜଣା ପଡିଛି। ସେହିପରି ପୃଥିବୀରେ ୮ ଲକ୍ଷରୁ ଅଧିକ କରୋନା ଆକ୍ରାନ୍ତ ହୋଇଥିବା ବେଳେ ୩୯,୦୩୩ ଲୋକ ପ୍ରାଣ ହରାଇଛନ୍ତି।
ପାକିସ୍ତାନ : ସାରା ବିଶ୍ବରେ ବେଶ ଭୟଙ୍କର ଭାବରେ ବ୍ୟାପୁଥିବା କରୋନା ଭାଇରସ୍ ପାକିସ୍ତାନରେ ବି ବେଶ୍ ଭୟଙ୍କର ଭାବରେ ବ୍ୟାପି ଚାଲିଛି । ଏହି ଭାଇରସ୍ ଯୋଗୁଁ ପାକିସ୍ତାନରେ 21 ଜଣଙ୍କର ମୃତ୍ୟୁ ହୋଇଥିବାବେଳେ ଗତ 12 ଘଣ୍ଟା ମଧ୍ୟରେ 54ରୁ ଅଧିକ ମାମଲା ସାମ୍ନାକୁ ଆସିଛି । ଦେଶରେ ମୋଟ ସଂକ୍ରମିତଙ୍କ ସଂଖ୍ୟା 1664ରେ ପହଞ୍ଚିଛି ।
ଜାଣନ୍ତୁ କେଉଁଠାରେ କିପରି ରହିଛି ସ୍ଥିତି :
ପଞ୍ଜାବ – 683, ସିନ୍ଧ – 508, ଖୈବର୍ ପଖ୍ତୁନଖାହ – 192, ବେଲୁଚିସ୍ତାନର -141, ଗିଲଗିଟ୍-ବାଲ୍ଟିସ୍ତାନ – 128, ଇସଲାମବାଦ-51, ପାକିସ୍ତାନ ଅଧିକୃତ କାଶ୍ମୀରେ 6ଟି ମାମଲା ସାମ୍ନାକୁ ଆସିଥିବାବେଳେ ଏଠାରେ 21 ଜଣଙ୍କର ମୃତ୍ୟୁ ହୋଇଛି । ଗତ 24 ଘଣ୍ଟାରେ ପାକିସ୍ତାନରେ ଚାରିଜଣଙ୍କର ମୃତ୍ୟୁ ହୋଇଥିବାବେଳେ ଦେଶରେ ସର୍ବମୋଟ 28 ଜଣ ସୁସ୍ଥ ହୋଇଛନ୍ତି । ସେହିପରି 11 ଜଣଙ୍କର ଅବସ୍ଥା ବେଶ୍ ସଂକଟାପନ୍ନ ରହିଛି ।
କରୋନା ସଂକ୍ରମଣକୁ ରୋକିବା ପାଇଁ ପାକିସ୍ତାନ ସରକାର ବେଶ୍ ପଦକ୍ଷେପ ନେଇଥିବାବେଳେ 27 ପ୍ରତିଶତ ସ୍ଥାନୀୟ ସଂକ୍ରମିତ ମାମଲା ବୋଲି ଜଣାପଡିଛି । ପାକିସ୍ତାନରେ ଅନ୍ତର୍ରାଷ୍ଟ୍ରୀୟ ଉଡାଣ ଉପରେ ପ୍ରତିବନ୍ଧକ ଲଗାଯାଇଛି । ପାକିସ୍ତାନରେ କରୋନା ଭାଇରସ୍ ସହ ମୁକାବିଲା କରିବା ପାଇଁ ଲକ୍ ଡାଉନ୍ ମଧ୍ୟ ଘୋଷଣା କରାଯାଇଛି । ଏହି ଲକ୍ ଡାଉନ୍ ଉଲ୍ଲଂଘନ ଅଭିଯୋଗରେ 163ଜଣଙ୍କୁ ଅଟକ ରଖାଯାଇଛି । (ଏଜେନ୍ସି)
କେରଳ: ଦେଶରେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇଁ ୯୦୦ ଡେଇଁ ଯାଇଥିବା ବେଳେ କେରଳରେ କରୋନା ଯୋଗୁଁ ପ୍ରଥମ ମୃତ୍ୟୁ ହୋଇଛି। ସାରା ଭାରତରେ କରୋନା ମୃତ୍ୟୁ ୨୦ରେ ପହଞ୍ଚିଛି। କରୋନା ମୁକାବିଲା ପାଇଁ ଦେଶରେ ଲକ୍ ଡାଉନ୍ ଜାରି ହୋଇଥିବାବେଳେ ଆଜି ଏହା ଚତୁର୍ଥ ଦିନରେ ପହଞ୍ଚିଛି।
ଲକ୍ଡାଉନ୍ ଯୋଗୁଁ ଦେଶର ବିଭିନ୍ନ ଅଂଶରେ ଖଟିଖିଆ ତଥା ଶ୍ରମିକମାନେ ନିଜ ଭିଟାମାଟିକୁ ପଳାୟନ କରୁଛନ୍ତି। ଏହି ଖଟିଖିଆ ତଥା ଶ୍ରମିକମାନେ ପାଦରେ ଚାଲି ଚାଲି ନିଜ ଘରକୁ ଫେରୁଛନ୍ତି। ଏନେଇ ଏକ ଜନହିତ ଯାଚିକା ସୁପ୍ରିମକୋର୍ଟରେ ଦାଖଲ କରାଯାଇଛି। ଏହି ଲୋକମାନଙ୍କୁ ବିଭିନ୍ନ ସ୍ଥାନରେ ଆଶ୍ରୟସ୍ଥଳରେ ରଖିବା ସହ ସେମାନଙ୍କ ପାଇଁ ସମସ୍ତ ସୁବିଧା କରିବା ପାଇଁ ପ୍ରଶାସନକୁ ନିର୍ଦ୍ଦେଶ ଦେବା ପାଇଁ କୋର୍ଟରେ ଅପିଲ୍ କରାଯାଇଛି।
ସୂଚନାଯୋଗ୍ୟ, ଦେଶରେ ସର୍ବାଧିକ କରୋନା ଆକ୍ରାନ୍ତ କେରଳରୁ ହିଁ ଚିହ୍ନଟ ହୋଇଛନ୍ତି। କେରଳ ପଛକୁ ମହାରାଷ୍ଟ୍ର ରହିଛି। ଦେଶରେ ସମୁଦାୟ ଆକ୍ରାନ୍ତଙ୍କ ସଂଖ୍ୟା ୯୦୬ରେ ପହଞ୍ଚିଛି। ବର୍ତ୍ତମାନ ସାରା ଦେଶରେ ୮୦୩ ଜଣ କରୋନା ଆକ୍ରାନ୍ତଙ୍କ ଚିକିତ୍ସା ଚାଲିଥିବାବେଳେ ୮୩ ଜଣ ସୁସ୍ଥ ହୋଇ ଫେରିଯାଇଛନ୍ତି।
ସେହିପରି ମହାରାଷ୍ଟ୍ରରେ ଚାରି, ଗୁଜୁରାଟ ଓ କର୍ଣ୍ଣାଟକରେ ତିନି, ମଧ୍ୟପ୍ରଦେଶରେ ଦୁଇ, ତାମିଲନାଡୁ, ବିହାର, ପଞ୍ଜାବ, ଦିଲ୍ଲୀ, ପଶ୍ଚିମ ବଙ୍ଗ, ଜମ୍ମୁକାଶ୍ମୀର ଓ ହିମାଚଳ ପ୍ରଦେଶରେ ଜଣେ ଜଣେ କରୋନା ଯୋଗୁଁ ମୃତ୍ୟୁବରଣ କରିଛନ୍ତି। ଦେଶରେ ସର୍ବାଧିକ ମହାରାଷ୍ଟ୍ରରେ ଚାରିଜଣଙ୍କର କରୋନା ଜନିତ ମୃତ୍ୟୁ ଘଟିଛି। ଭାରତରେ କରୋନା ଦ୍ବିତୀୟ ଷ୍ଟେଜ୍ରେ ରହିଥିବାବେଳେ ଏହା ଯେପରି ତୃତୀୟ ଷ୍ଟେଜ୍କୁ ନ ବ୍ୟାପେ ସେଥିପାଇଁ ସାମାଜିକ ଦୂରତ୍ବ ଓ ସଙ୍ଗରୋଧକୁ ବେଶ୍ କଡାକଡି କରାଯାଇଛି। (ଏଜେନ୍ସି)
ନୂଆଦିଲ୍ଲୀ : ଚୀନରୁ ବୁହାନ ସହରରୁ ଆରମ୍ଭ ହୋଇଥିବା ମହାମାରୀ କରୋନା ଏବେ ୟୁରୋପରେ ତାଣ୍ଡବ ରୁଚିଛି । ବୁହାନ ସହର ପରେ ଇଟାଲୀରେ ଏବେ ଏହାର କେନ୍ଦ୍ରସ୍ଥଳ ପାଲଟିଯାଇଛି। ଶୁକ୍ରବାର ଦିନ ଇଟାଲୀରେ ସର୍ବାଧିକ ମୃତ୍ୟୁ ହୋଇଥିବାର ସୂଚନା ମିଳିଛି । ଏଠାରେ ପ୍ରାୟ 1000 ଲୋକଙ୍କ ମୃତ୍ୟୁ ଘଟିଛି । କେବଳ ଇରାନ୍ ନୁହେଁ, ଜର୍ମାନୀ, ସ୍ପେନ, ଆମେରିକା, ବ୍ରିଟେନ୍ ପ୍ରମୁଖ ଦେଶଗୁଡିକ ଏବେ କରୋନା କବଳରେ । କେବଳ ଇଟାଲୀରେ 86 ହଜାର ଲୋକ ଏହିରୋଗରେ ସଂକ୍ରମିତ ହୋଇଛନ୍ତି । ସାରା ବିଶ୍ବରେ ଏବେ 597,262 ଜଣ ସଂକ୍ରମିତ ହୋଇଥିବାବେଳେ ମୃତ୍ୟୁ ସଂଖ୍ୟା 27,365ରେ ପହଞ୍ଚିଛି । ସେହିପରି ଏହି ରୋଗରେ ସୁସ୍ଥ ହୋଇଛନ୍ତି 133,363ଜଣ ।
ସମୀକ୍ଷା ତରଫରୁ କରୋନା ଅପଡେଟ୍ :
ମୁମ୍ବାଇ : କରୋନା ଭାଇରସ ବିରୋଧରେ ଲଢାଇ କରିବା ପାଇଁ ଲୋକମାନେ ସହଯୋଗ କରୁଥିବାବେଳେ ଅପର ପକ୍ଷରେ ସରକାରଙ୍କୁ ଆର୍ଥିକ ସାହାଯ୍ୟ ମଧ୍ୟ କରାଯାଉଛି। ସେଲିବ୍ରିଟି, ଖେଳ ତାରକା ମାନେ ପ୍ରଧାନମନ୍ତ୍ରୀଙ୍କ ରିଲିଫ୍ ଫଣ୍ଡ୍ ଓ ମୁଖ୍ୟମନ୍ତ୍ରୀଙ୍କ ରିଲିଫ୍ ଫଣ୍ଡ୍କୁ ଆର୍ଥିକ ସହାୟତା ଯୋଗାଉଥିବାବେଳେ ଶିରିଡିର ସାଇ ଟ୍ରଷ୍ଟ୍ ମଧ୍ୟ ଆଗେଇ ଆସିଛି। କରୋନା ମୁକାବିଲା ପାଇଁ ଶିରିଡିର ସାଇ ସଂସ୍ଥାନ ରାଜ୍ୟ ସରକାରଙ୍କୁ 51 କୋଟି ଟଙ୍କା ସହାୟତା ଦେବା ପାଇଁ ଘୋଷଣା କରିଛି। ଶିରିଡି ସାଇ ମନ୍ଦିରରେ ପ୍ରତ୍ୟେକ ବର୍ଷ କୋଟି କୋଟି ଟଙ୍କାର ଚାନ୍ଦା ମିଳିଥାଏ।
ସୂଚନାଯୋଗ୍ୟ, ମହାରାଷ୍ଟ୍ରରେ ସର୍ବାଧିକ କରେନା ଆକ୍ରାନ୍ତଙ୍କ ସୂଚନା ମିଳିଛି। ମହାରାଷ୍ଟ୍ରରେ କରୋନା ସଂକ୍ରମିତଙ୍କ ସଂଖ୍ୟା 137ରେ ପହଞ୍ଚିଛି। ସରକାର ଲକ୍ ଡାଉନ୍ ଘୋଷଣା କରିବା ପରେ ଶିରିଡିରେ ମଧ୍ୟ ଏନେଇ ପ୍ରତିବନ୍ଧକ ଲଗାଯାଇଛି। ପ୍ରଧାନମନ୍ତ୍ରୀଙ୍କ ଲକ୍ ଡାଉନ୍ ଘୋଷଣା ଆଗରୁ ମହାରାଷ୍ଟ୍ର ସରକାର ଆଗୁଆ ମହାରାଷ୍ଟ୍ରର ମୁଖ୍ୟ ଚାରୋଟି ସହରରେ ଲକ୍ ଡାଉନ୍ର ଘୋଷଣା କରିଥିଲେ। (ଏଜେନ୍ସି)
ସମୀକ୍ଷା ବ୍ୟୁରୋ
ଭୁବନେଶ୍ବର: କରୋନା ସଂକ୍ରମଣ ଆଶଙ୍କାରେ ବିଧାନସଭା କାର୍ଯ୍ୟ ସ୍ଥାନାନ୍ତର ହେବ। ଲୋକସେବା ଭବନର କନ୍ଭେନସନ୍ ହଲ୍କୁ ଯିବ ବିଧାନସଭା। ବଜେଟ୍ ଅଧିବେଶନର ବାକି କାର୍ଯ୍ୟ ଦିବସ କନ୍ଭେନସନ୍ ହଲ୍ରେ ହେବ ବୋଲି ସୂଚନା ମିଳିଛି। ବିଧାନସଭାର ବାଚସ୍ପତି ସୂର୍ଯ୍ୟ ନାରାୟଣ ପାତ୍ର ଏହା ସମ୍ପର୍କରେ ସୂଚନା ଦେଇଛନ୍ତି। ତୃତୀୟ ପଜିଟିଭିଙ୍କ ସଂସ୍ପର୍ଶରେ ବିଧାନସଭାର ଜଣେ କର୍ମଚାରୀ ଆସିଛନ୍ତି। ଏଥିପାଇଁ ବିଧାନସଭାର ସମସ୍ତ କର୍ମଚାରୀଙ୍କୁ କ୍ବାରେଣ୍ଟାଇନ୍ରେ ରଖାଯିବ। ଏଥିସହ ବିଧାନସଭା କୋଠାକୁ ସଂକ୍ରମଣମୁକ୍ତ କରାଯିବ ଦରକାର। ଏଥିପାଇଁ ବିଧାନସଭା କୋଠାରେ ବିଧାନସଭା ନ କରିବାକୁ ନିଷ୍ପତ୍ତି ନିଆଯାଇଛି। କନ୍ଭେନସନ୍ ହଲ୍ରେ ଦୁଇ ମିଟର ଅନ୍ତରରେ ବିଧାୟକମାନେ ବସିବେ ବୋଲି ନିର୍ଦ୍ଦେଶ ରହିଛି। ସେହିପରି କେତେ ବିଧାୟକ ବିଧାନସଭା ଆସିବେ, ସେନେଇ ନେତାମାନଙ୍କୁ କୁହାଯାଇଛି। ୩୦ପ୍ରତିଶତ ବିଧାୟକଙ୍କୁ ବିଧାନସଭାରେ ରହିବେ ବୋଲି ସୂଚନା ରହିଛି। ସେହିପରି ରାସ୍ତାରେ କୌଣସି ବିଧାୟକଙ୍କୁ ନ ଅଟକାଇବାକୁ ଜିଲ୍ଲାପାଳ ଓ ଏସ୍ପିଙ୍କୁ ନିର୍ଦ୍ଦେଶ ଦିଆଯାଇଛି।
ଜମ୍ମୁକାଶ୍ମୀର : ଦେଶରେ କରୋନା ମହାମାରୀ ବ୍ୟାପି ଚାଲିଥିବାବେଳେ ପୁଣି ଆଉ ଜଣଙ୍କର ମୁଣ୍ଡ ନେଇଛି। ଜମ୍ମୁକାଶ୍ମୀରରୁ କରୋନା ଯୋଗୁଁ ପ୍ରଥମ ମୃତ୍ୟୁ ହୋଇଛି । ଏହି ମୃତ୍ୟୁ ପରେ ଦେଶରେ ମୃତ୍ୟୁ ସଂଖ୍ୟା 14ରେ ପହଞ୍ଚିଛି। ଶ୍ରୀନଗରର ସିଡି ହସ୍ପିଟାଲ୍ରେ ଚିକିତ୍ସିତ ହେଉଥିବା ଏହି ରୋଗୀଙ୍କ ସମ୍ପର୍କରେ 4 ଜଣଙ୍କ ଲୋକ ଟେଷ୍ଟ ରିପୋର୍ଟ ମଧ୍ୟ ପଜିଟିଭି ଆସିଛି। ଦେଶରେ କରୋନାକୁ ମୁକାବିଲା କରିବା ପାଇଁ ଲକ୍ଡାଉନ୍ ଜାରି କରାଯାଇଥିବାବେଳେ ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଛି। ଗତ 24 ଘଣ୍ଟା ମଧ୍ୟରେ ଦେଶରେ ନୂତନ ଭାବରେ 66ଟି ମାମଲା ସାମ୍ନାକୁ ଆସିଛି। ଏବେ ଆକ୍ରାନ୍ତଙ୍କ ସଂଖ୍ୟା 629 ରେ ପହଞ୍ଚିଛି। ଗତକାଲି କରୋନା ଯୋଗୁଁ ତିନିଜଣଙ୍କର ମୃତ୍ୟୁ ଘଟିଥିଲା । ଇନ୍ଦୋରର ଜଣେ 60 ବର୍ଷ ବୟସ୍କଙ୍କ ମୃତ୍ୟୁ ହୋଇଥିବାବେଳେ ତାମିଲନାଡୁର ଜଣେ ବୟସ୍କଙ୍କ ମୃତ୍ୟୁ ଘଟିଥିଲା। ସେହିପରି ଗୁଜୁରାଟର ଜଣେ 85 ବର୍ଷୀୟା ମହିଳାଙ୍କର ମଧ୍ୟ କରୋନା ଯୋଗୁଁ ମୃତ୍ୟୁ ହୋଇଥିଲା। କରୋନା ଯୋଗୁଁ ଦେଶର 25ଟି ରାଜ୍ୟ ପ୍ରଭାବିତ ହୋଇଛି । ମହାରାଷ୍ଟ୍ରରେ ସର୍ବାଧିକ ଆକ୍ରାନ୍ତଙ୍କ ଚିହ୍ନଟ କରାଯାଇଛି। ମହାରାଷ୍ଟ୍ରରେ 125ଟି ମାମଲା ଆସିଥିବାବେଳେ କେରଳରେ 109ଟି ମାମଲା ସାମ୍ନାକୁ ଆସିଛି।
କେଦାର ମିଶ୍ର
କଥା କଥାକେ କୁହାଯାଏ, ମୁକେଶ ଅମ୍ବାନୀ ହେଉଛନ୍ତି ଏସିଆର ସବୁଠୁ ଧନୀ ବ୍ୟକ୍ତି। ବଜାରରେ ଯେତେବେଳେ ସେନସେକ୍ସର ଉଠାପକା ଖେଳ ଚାଲେ ସେତେବେଳେ ମୁକେଶଙ୍କ ଲାଭ ଓ କ୍ଷତିକୁ ନେଇ ଆମେ ଚର୍ଚ୍ଚା କରିଥାଉ। ଏସିଆ ମହାଦେଶରେ ଚୀନର ଜ୍ୟାକ ମା ଏବଂ ଭାରତର ମୁକେଶ ଅମ୍ବାନୀ ସବୁବେଳେ ଏକ ନମ୍ବର ଓ ଦୁଇ ନମ୍ବର ଧନୀ ଲୋକ ହିସାବରେ ରହି ଆସିଛନ୍ତି। ଚୀନର କର୍ପୋରେଟ ଟାଇକୁନ ଜ୍ୟାକ ମା ତାଙ୍କ ପ୍ରତିଷ୍ଠିତ ଆଲିବାବା କମ୍ପାନୀରୁ ଇସ୍ତଫା ଦେଇ ଏବେ କେବଳ ଲୋକସେବା ପାଇଁ ନିଜର ସମ୍ବଳ ଓ ସମୟର ବିନିଯୋଗ କରୁଛନ୍ତି। ଚୀନରେ କରୋନା ଭୂତାଣୁର ଭୟଙ୍କର ପ୍ରଭାବରୁ ନିଜ ଲୋକଙ୍କୁ ମୁକୁଳାଇବାରେ ଜ୍ୟାକ ମା ଫାଉଣ୍ଡେସନ ବହୁତ ବଡ ଅବଦାନ ଦେଉଛି। କେବଳ ଚୀନରେ ନୁହେଁ, ଏବେ ବିଶ୍ଵର ବିଭିନ୍ନ ଦେଶକୁ ଏହି ଭୂତାଣୁ ବ୍ୟାପିବା ପରେ ଜ୍ୟାକ ମା ଫାଉଣ୍ଡେସନ ଅନ୍ୟ ଦେଶମାନଙ୍କୁ ମଧ୍ୟ ସାହାଯ୍ୟର ହାତ ବଢାଇଛି।
ପ୍ରଥମେ ଆମେରିକାକୁ ଜ୍ୟାକ ମା ଫାଉଣ୍ଡେସନ ତରଫରୁ ଯୁକ୍ତରାଷ୍ଟ୍ର ଆମେରିକାକୁ ୫ ଲକ୍ଷ କରୋନା ଭୂତାଣୁ ପରୀକ୍ଷା ଉପକରଣ ଏବଂ ୧୦ ଲକ୍ଷ କୀଟାଣୁ ନିରୋଧକ ମୁଖା ପଠା ଯାଇଥିଲା। ଏହା ପରେ ଏସିଆର ଦଶଟି ଦେଶ- ଶ୍ରୀଲଙ୍କା, ବାଂଲାଦେଶ, ଆଫଗାନିସ୍ତାନ, ପାକିସ୍ତାନ, କାମବିଡିଆ, ଲାଓସ, ମାଲଦ୍ଵୀପ, ମଙ୍ଗୋଲିଆ, ନେପାଳ ଓ ମିଆଁମାରକୁ ୧୮ ଲକ୍ଷ ମୁଖା, ୨.୧୦ଲକ୍ଷ ପରୀକ୍ଷା ଉପକରଣ, ୩୬ ହଜାର ଡାକ୍ତରଙ୍କ ସୁରକ୍ଷା ସୁଟ, ଭେଣ୍ଟିଲେଟର ଓ ଥର୍ମୋମିଟର ପଠା ଯାଇଛି। ଆଫ୍ରିକାର ଦେଶମାନଙ୍କୁ ମଧ୍ୟ ଜାକ ମା ଫାଉଣ୍ଡେସନ ସାହାଯ୍ୟ କରୁଛି। ବିଶ୍ଵ ସାମ୍ନା କରୁଥିବା ଏହି ଭୟଙ୍କର ସଙ୍କଟ ବେଳରେ ସବୁ ଧନୀ କର୍ପୋରେଟ ଗୁଡିକ ଲୋକଙ୍କୁ ସାହାଯ୍ୟ କରିବାକୁ ଆଗେଇ ଆସିବାକୁ ଜ୍ୟାକ ମା ନିବେଦନ କରିଛନ୍ତି।
ଚୀନର ଜଣେ କର୍ପୋରେଟ ଟାଇକୁନ ଯାହା କରୁଛନ୍ତି, ସେଥିରୁ ଆମର ଦେଶୀ କର୍ପୋରେଟମାନେ ଶିଖିବେ କି? ଜ୍ୟାକ ମା ଏତେ କଥା କରୁଥିବା ବେଳେ ମୁକେଶ ଅମ୍ବାନୀ କଣ କରୁଛନ୍ତି ବୋଲି ପଛରନ୍ତୁ ନାହିଁ। ଅବଶ୍ୟ ଗତକାଲି ପ୍ରଧାନମନ୍ତ୍ରୀଙ୍କ ଆହ୍ଵାନ କ୍ରମେ ମୁକେଶ ଅମ୍ବାନୀ ତାଙ୍କ ଛାତରେ ରହି ଘଣ୍ଟା ବଜେଇଛନ୍ତି!! ଗତ ମାସେ ହେଲା ଦେଶରେ କରୋନା ଭୂତାଣୁ ର ପ୍ରଭାବ ଆରମ୍ଭ ହୋଇଛି। ଦେଶର ସାମାଜିକ ଓ ଅର୍ଥନୈତିକ ସ୍ଥିତିକୁ ଦୋହଲାଇ ଦେଉଥିବା ଏହି ମହାମାରୀର ପ୍ରକୋପ ସମୟରେ ଭାରତର ଜ୍ୟାକ ମା ମାନେ କେଉଁଠି ଅଛନ୍ତି? ଦେଶର ସର୍ବାଧିକ ଲାଭ ଉଠାଇ ଧନୀ ହୋଇଥିବା ଆମ୍ବାନୀ, ଆଦାନି, ଟାଟା, ବିରଳା, ବେଦାନ୍ତ, ଜିନ୍ଦଲମାନେ ଏବେ କେଉଁଠି? କରୋନା ଭୂତାଣୁର ପ୍ରଭାବ ଆରମ୍ଭ ହେବା ଆଗରୁ ଦେଶର ସବୁ ବଜାରରୁ ସାନିଟାଇଜର ଓ ମୁଖା ଗାଏବ ହୋଇଗଲା। ଆଜି ହାତ ସଫା କରିବାକୁ ଆମେ ଭାରତୀୟମାନେ କଳା ବଜାରରେ ଚଢା ଦାମ ଦେଇ ସାନିଟାଇଜର କିଣୁଛୁ। ଦୁଇ ଟଙ୍କାର ମୁଖାକୁ ୫୦ ଟଙ୍କା ଦେଇ ସର୍ବସ୍ଵାନ୍ତ ହେଉଛୁ। ସେତେବେଳେ ଆମର ବଜାରର ବଡ ନେତାମାନେ ଗାୟବ। ସେମାନେ ଦେଶର ଅସମୟରେ ଛିଡା ହେବାର କୌଣସି ଉଦାହରଣ କେହି ଦେଇ ପାରିବେ ନାହିଁ।
ଲୋକଙ୍କୁ ସର୍ବନିମ୍ନ ସହାୟତା ଦେବାର ଆଗ୍ରହ ବା ନୈତିକତା ଭାରତୀୟ କର୍ପୋରେଟମାନଙ୍କର କେବେ ବି ନଥିଲା। କେବେ କେମିତି ୫/୧୦ କୋଟି ଟଙ୍କା ପ୍ରଧାନମନ୍ତ୍ରୀ/ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ଦେଇ ଫଟୋ ଉଠାଇବାରେ ସେମାନଙ୍କର ଦାୟିତ୍ଵ ସରିଯାଏ। ଅଥଚ ଏମାନେ ଯେତେବେଳେ ସଙ୍କଟରେ ପଡନ୍ତି ସେତେବେଳେ ଲୋକଙ୍କ ଟଙ୍କାରୁ ଏମାନଙ୍କର କ୍ଷତି ଭରଣା କରାଯାଏ। ସେମାନଙ୍କୁ ହଜାର ହଜାର କୋଟି ଟଙ୍କାର ଟିକସ ରିହାତି, ଶାଗ ମାଛ ମୂଲ୍ୟରେ ପ୍ରାକୃତିକ ସମ୍ପଦର ଅଧିକାର ଏବଂ ସବୁ ପ୍ରକାର ଅର୍ଥନୈତିକ ଅପରାଧକୁ ମାଫି ଦେବାରେ ଏ ଦେଶ କେବେ ଅବହେଳା କରିନାହିଁ। “ଲାଭ ହେଲେ ଆମର, କ୍ଷତି ହେଲେ ଦେଶର” ବୋଲି ବିଚାର କରୁଥିବା ଆମର କର୍ପୋରେଟ ମାନେ ଲୋକଙ୍କ ପାଇଁ କରୁଛନ୍ତି କଣ? ବଜାରରେ ସୁଲଭ ଓ ସହଜ ଭାବରେ ଲୋକଙ୍କର ଆବଶ୍ୟକତା ମେଣ୍ଟାଇ ପାରୁନଥିବା ଏହି ବ୍ୟବସାୟୀମାନେ ଜ୍ୟାକ ମା ହେବାର ସ୍ଵପ୍ନ ଦେଖିପାରିବେ ନାହିଁ। ଲୋକଙ୍କ ଭିତରେ ଯେଉଁ ଭୟ ଓ ଉଦବିଗ୍ନତା ରହିଛି, ସେଥିରୁ କେମିତି ଅଧିକ ଫାଇଦା ଉଠାଇହେବ, ଏବେ ସେ ଚିନ୍ତା ସେମାନଙ୍କୁ ଘାରିଥିବ।
ଭାରତରେ ଆଜି କରୋନା ପରୀକ୍ଷଣ ଲାଗି ଅଧିକ ଉପକରଣ ଦରକାର। ଲୋକଙ୍କୁ ସୁରକ୍ଷିତ ରଖିବା ଲାଗି ମୁଖା ଓ ସାନିଟାଇଜର ଦରକାର। ଦେଶରେ ପ୍ରାୟ ୪୦ ହଜାର ଭେଣ୍ଟିଲେଟର ରହିଛି। ଅତି କମରେ ୨ ଲକ୍ଷ ଭେଣ୍ଟିଲେଟର ଆଜି ଆମର ଆବଶ୍ୟକତା। ସେହିପରି ଅସୁରକ୍ଷିତ ଅବସ୍ଥାରେ କାମ କରୁଥିବା ଆମ ଡାକ୍ତର ଓ ପାରା ମେଡିକାଲ କର୍ମଚାରୀଙ୍କୁ ସୁରକ୍ଷା ସୁଟ ଦରକାର। ଏ ସବୁ ଯୋଗାଇ ଦେବା କଥା ଆମର କର୍ପୋରେଟ ଜଗତ କେବେ ଚିନ୍ତା କରିବ କି? କେବଳ ରାଜନୈତିକ ଦଳକୁ ଚାନ୍ଦା ଦେଇ ନିଜର ଫାଇଦା ଉଠାଉଥିବା ଦେଶର ଧନୀ ବ୍ୟବସାୟୀମାନେ ନିଜର ବିବେକକୁ ଆଜି ପ୍ରଶ୍ନ ପଚାରିବେ କି?
ଦେଶର ଅର୍ଥନୀତିରେ ଉଦାରବାଦୀ ପରମ୍ପରା ଆରମ୍ଭ ହେବା ପରଠୁ ଲକ୍ଷ ଲକ୍ଷ କୋଟି ଟଙ୍କା ଦେଶର ୧୦୦ ଟି ବଡ କମ୍ପାନୀ ହାତକୁ ଯାଇଛି। ଆଜି ସେ ଲାଭରୁ କିଛି ତ ଦେଶବାସୀଙ୍କର ପାଇବାର ହକ ରହିଛି। ଏ କଥା କହିବାର କୌଣସି ଅର୍ଥ ନାହିଁ, ଆମେ ଜାଣିଛୁ। କରୋନା ମୁକାବିଲା କରିବାକୁ ଏ ଦେଶର ସାଧାରଣ ଜନତା ନିଜେ ହିଁ ଅଣ୍ଟା ଭିଡି ଠିଆ ହେବ। ଆମ ଭିତରେ କେହି ଜଣେ ଜ୍ୟାକ ମା ବାହାରିବେ ବୋଲି ଅନ୍ତତଃ ଆଜି ଆଶା କରିବା ବୃଥା!!
ଭୁବନେଶ୍ବର, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆହ୍ବାନରେ ଆଜି ଦେଶ ସାରା ସ୍ବାସ୍ଥ୍ୟ କର୍ମିଙ୍କୁ ତାଳିମାରି, ଘଣ୍ଟାଘଣ୍ଟି ବଜାଇ ସ୍ବାଗତ କରାଯାଇଛି। ସେହିପରି ଓଡିଶାରେ ମଧ୍ୟ ବିଭିନ୍ନ ସ୍ଥାନରେ ଆପାର୍ଟମେଣ୍ଟରେ ଲୋକମାନେ ତାଳି ମାରି ହୁଳହୁଳି ଦେଇ ସେମାନଙ୍କ କାମକୁ ଉତ୍ସାହିତ କରିଛନ୍ତି। ତେବେ ଭୁବନେଶ୍ବରର ଲୋକସେବା ଭବନରେ ପରିବେଶ ଥିଲା ସଂପୂର୍ଣ୍ଣ ନିଆରା।
ମୋଦୀଙ୍କ ଆହ୍ବାନରେ ଆଜି ଠିକ ପାଞ୍ଚଟା ବେଳେ ଲୋକସେବା ଭବନରେ ଏକଠି ହୋଇଥିଲେ ଓଡିଶା ସରକାରଙ୍କ ପାୱାରଫୁଲ ଅଫିସରଗଣ। ସେମାନଙ୍କ ମଧ୍ୟରେ ଥିଲେ ରାଜ୍ୟ ସରକାରଙ୍କ ମୁଖ୍ୟ ମୁଖପାତ୍ର ସୁବ୍ରତୋ ବାଗଚୀ, ମୁଖ୍ୟଶାସନ ସଚିବ ଅସୀତ ତ୍ରିପାଠୀ, ଉନ୍ନୟନ କମିଶନର ସୁରେଶ ମହାପାତ୍ର ଏବଂ 5ଟି ସଚିବ ଭି କେ ପାଣ୍ଡିୟାନ। ଏଥିସହିତ ସ୍ବାସ୍ଥ୍ୟ ବିଭାଗର ସଚିବ ନିକୁଞ୍ଜ ଧଳ ଏବଂ ଶାଳୀନି ପଣ୍ଡିତ ମଧ୍ୟ ଥିଲେ। ଠିକ ପାଞ୍ଚଟା ବାଜିବା ବେଳେ ସମସ୍ତେ ତାଳି ମାରି ସ୍ବାସ୍ଥ୍ୟ ସେବାକାରୀଙ୍କ ଉତ୍ସାହିତ କରିଥିଲେ।
ଏପରିକି ପାଣ୍ଡିୟାନଙ୍କ ସହିତ କେତେକ ଅଧିକାରୀ ହାତରେ ସ୍ବାସ୍ଥ୍ୟ କର୍ମିଙ୍କୁ ଉତ୍ସାହିତ ପାଇଁ ଲେଖାଥିବା ପ୍ଲାକାର୍ଡ ଧରି ଛିଡା ହୋଇଥିଲେ। ପାଣ୍ଡିୟାନ, ବାଗଚୀ, ଶାଳୀନି ଧରିଥିବା ପ୍ଲାକାର୍ଡ ଇଂରାଜୀ ଲେଖିଥିବା ବେଳେ , ଡିସି ଏବଂ ସ୍ବାସ୍ଥ୍ୟ ସଚିବଙ୍କ ପ୍ଲାକାର୍ଡ ଓଡିଆରେ ଲେଖାଥିଲା।
ତେବେ ସବୁଠାରୁ ଗୁରୁତ୍ବପୂର୍ଣ୍ଣ ଦିଗଟି ହେଲା ଯେ ଏମାନେ ସମସ୍ତେ ଦୁଇ ମିଟର ଦୂରତାରେ ଛିଡା ହୋଇଥିଲେ। ରାଜ୍ୟ ସରକାରଙ୍କ ତରଫରୁ ମୁଖ୍ୟ ମୁଖପାତ୍ର ସୁବ୍ରତୋ ବାଗଚୀ ଦୂରତା ରଖି କଥାବାର୍ତ୍ତା କରନ୍ତୁ ବୋଲି ଜନସାଧାରଣଙ୍କୁ କହି ଆସୁଛନ୍ତି। ସେହି ନିୟମ ସେମାନେ ମଧ୍ୟ ପାଳନ କରିଥିବାର ପରିଲକ୍ଷିତ ହୋଇଥିଲା।
ମୁମ୍ବାଇ : କରୋନାକୁ ଦୃଷ୍ଟିରେ ମହାରାଷ୍ଟ୍ର ସରକାର ବଡ ଘୋଷଣା କରିଛନ୍ତି । ମହାରାଷ୍ଟ୍ରର 4 ବଡ ସହରରେ ସମସ୍ତ ସେବାକୁ ସମ୍ପୂର୍ଣ୍ଣ ରୂପେ ବନ୍ଦ କରିବାକୁ ନିଷ୍ପତ୍ତି ଗ୍ରହଣ କରାଯାଇଛି । କେବଳ ଜରୁରୀ ସେବାକୁ ଛାଡି ଅନ୍ୟ ସମସ୍ତ ସେବାକୁ ବନ୍ଦ କରାଯିବା ନେଇ ନିର୍ଦ୍ଦେଶ ଦିଆଯାଇଛି। ମୁମ୍ବାଇ, ନାଗପୁର, ପୁଣେ, ପିମ୍ପରୀ ଚିଞ୍ଚଓ୍ବଡାରେ ମାର୍ଚ୍ଚ 31 ପର୍ଯ୍ୟନ୍ତ ସେବା ବନ୍ଦ ରଖିବାକୁ ନିଷ୍ପତ୍ତି ନିଆଯାଇଛି। ମହାରାଷ୍ଟ୍ରରେ କରୋନା ଆକ୍ରାନ୍ତଙ୍କ ସଂଖ୍ୟା 52ରେ ପହଞ୍ଚିଥିବାବେଳେ ମହାରାଷ୍ଟ୍ର ସରକାର ଏପରି ନିଷ୍ପତ୍ତି ନେଇଛନ୍ତି । ତେବେ ଅତ୍ୟାବଶ୍ୟକ ଜିନିଷ ପାଇଁ ଦୋକାନ ଖୋଲା ରହିବ । ଜୀବନ ରକ୍ଷକ ସେବା, ବ୍ୟାଙ୍କ, ଗ୍ରୋସରୀ ଷ୍ଟୋର ଓ ମେଡ଼ିକାଲ ଷ୍ଟୋର ଖୋଲା ରହିବ । ସେହିପରି ରେଳ ସେବାକୁ ନେଇ ଏପର୍ଯ୍ୟନ୍ତ କୌଣସି ପ୍ରତିବନ୍ଧକ ଲଗାଯାଇନାହିଁ। ପୂର୍ବରୁ ବହୁ କମ୍ପାନୀମାନଙ୍କୁ ଘରୁ କାମ କରିବାକୁ ନିର୍ଦ୍ଦେଶ ଦିଆଯାଇଥିଲା । ଭିଡ ନିୟନ୍ତ୍ରଣ କରିବାକୁ ସରକାରଙ୍କ ତରଫରୁ ଏପରି ନିର୍ଦ୍ଦେଶ ଦିଆଯାଇଛି । ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା 195ରେ ପହଞ୍ଚିଥିବାବେଳେ 5ଜଣ ମୃତ୍ୟୁବରଣ କରିଛନ୍ତି ।
କେଦାର ମିଶ୍ର
ପ୍ରତିଦିନ ପୃଥିବୀରେ କରୋନା ଭୂତାଣୁର ପ୍ରକୋପ ବଢି ଚାଲିଛି। ବିକଶିତ ଓ ବୈଜ୍ଞାନିକ ଦୃଷ୍ଟିରୁ ଉନ୍ନତ ଦେଶମାନେ ମଧ୍ୟ ଏହି ଭୂତାଣୁକୁ ରୋକିବାରେ ସଫଳ ହେଉନାହାନ୍ତି। ଆମେରିକା ଭଳି ପୃଥିବୀର ସବୁଠୁ ସମୃଦ୍ଧ ଓ ସମ୍ପନ୍ନ ରାଷ୍ଟ୍ର ମଧ୍ୟ କରୋନା ରୋକିବାରେ ସଫଳ ହୋଇ ପାରିନାହିଁ। ଅପରପକ୍ଷରେ ବିକାଶଶୀଳ ଓ ଦରିଦ୍ର ଦେଶଗୁଡିକ ଆଗୁଆ ସତର୍କତା ମୂଳକ ପଦକ୍ଷେପ ନେଇ ନିଜକୁ ସୁରକ୍ଷିତ ରଖିବାକୁ ଚେଷ୍ଟା କରୁଛନ୍ତି। ଚୀନ ପରେ ଆମେରିକା ଓ ୟୁରୋପରେ ଏହି ରୋଗର ପ୍ରବଳ ପ୍ରଭାବ ବଢି ଚାଲିଛି।
ନ୍ୟୁୟର୍କ ସହରରେ ଗତ ୧୮ ତାରିଖ ଦିନ ୨୪ ଘଣ୍ଟାରେ ୧୦୦୮ଟି ନୂଆ କରୋନା ସଂକ୍ରମଣ ଚିହ୍ନଟ ହୋଇଥିଲା। ଇଟାଲୀ, ସ୍ପେନ, ଫ୍ରାନ୍ସ, ଇଂଲାଣ୍ଡ ଓ ଜର୍ମାନୀ ଏବେ ଭୟଙ୍କର ସମୟର ସାମ୍ନା କରୁଛନ୍ତି। ତୁଳନାତ୍ମକ ଭାବରେ ଦକ୍ଷିଣ-ପୂର୍ବ ଏସିଆ( ଭାରତ, ନେପାଲ, ଭୁଟାନ, ଶ୍ରୀଲଙ୍କା, ବାଂଲାଦେଶ, ମାଳଦ୍ଵୀପ, ଥାଇଲାଣ୍ଡ ଓ ଇଣ୍ଡୋନେସିଆ)ରେ ଏହାର ପ୍ରଭାବ କମ ରହିଛି। ଭାରତରେ ୧୭୦ ଜଣ କରୋନା ସଂକ୍ରମିତ ବ୍ୟକ୍ତି ଚିହ୍ନଟ ହୋଇଥିବା ବେଳେ ୪ ଜଣ ପ୍ରାଣ ହରାଇ ସାରିଲେଣି। ଭୟ ଓ ଆଶଙ୍କା ଅନେକ ସମୟରେ ଲୋକଙ୍କ ମନରେ ପ୍ରବଳ ନିରାଶା ଭାବ ସୃଷ୍ଟି କରୁଛି। ଭୟର ଚାପରେ ଦିଲ୍ଲୀ ରେ ଜଣେ ସନ୍ଦିଗ୍ଧ ଯୁବକ ଡାକ୍ତରଖାନା ଛାତରୁ ଡେଇଁ ଆତ୍ମହତ୍ୟା କରିଛନ୍ତି।
ସାରା ପୃଥିବୀ ଲାଗି ଏବେ ଏକ ଅଗ୍ନି ପରୀକ୍ଷାର ସମୟ ଚାଲିଛି। ବିଶେଷକରି ଭାରତ ଭଳି ଜନ ବହୁଳ ଦେଶ ପାଇଁ ଏହା ଆହୁରି ବଡ ପରୀକ୍ଷାର ସମୟ। ଦେଶବାସୀଙ୍କୁ ସୁରକ୍ଷିତ ରଖିବା ଲାଗି ଆମକୁ ହୁଏତ ବହୁ ମୂଲ୍ୟ ଦେବାକୁ ପଡିବ। ଅର୍ଥନୀତି ଦୃଷ୍ଟିରୁ ଆଗାମୀ ସମୟ ଆମକୁ ବହୁତ ବଡ ସଙ୍କଟରେ ପକାଇପାରେ। ତେବେ ଲୋକଙ୍କ ଜୀବନର ମୂଲ୍ୟ ତୁଳନାରେ ସେତକ କ୍ଷତି ସହିବା ଆଜି ପାଇଁ ଅପରିହାର୍ଯ୍ୟ। କେଉଁଠି ନା କେଉଁଠି ଦେଶର ପୂରା ବ୍ୟାବସାୟିକ ପ୍ରତିଷ୍ଠାନକୁ ବନ୍ଦ କରିବାକୁ ପଡିବ ଓ ଆମର ପ୍ରମୁଖ ସହର ଗୁଡିକ ଅନ୍ତତଃ ଆଗାମୀ ଦୁଇ ସପ୍ତାହ ଲାଗି ସ୍ଥାଣୁ ହୋଇଯାଇ ପାରନ୍ତି। ଏହା ଆଜିର ସମୟ ଲାଗି ସବୁଠୁ ବେଶୀ ଉପଯୋଗୀ।
କେବଳ ଇଣ୍ଟରନେଟ ଓ ଟେଲିଫୋନ ବ୍ୟତୀତ ଅନ୍ୟ ସବୁ ପ୍ରକାର ପ୍ରତ୍ୟକ୍ଷ ଯୋଗାଯୋଗ ବିଛିନ୍ନ କରିବାକୁ ସରକାର ବାଧ୍ୟ ହେବେ। ଏ ପ୍ରକାର ବ୍ୟବସ୍ଥାର ବହୁ ମୂଲ୍ୟ ଆମର ଅର୍ଥନୀତି ଉପରେ ପଡିବ। ତେବେ ତାହା ନ ଅନ୍ୟ ବାଟ ନାହିଁ। ସପ୍ତାହେ ଭିତରେ କାରୋନା ଆକ୍ରାନ୍ତଙ୍କ ସଂଖ୍ୟା ଦେଶରେ ୧୭୦ରେ ପହଞ୍ଚିଲାଣି। ଭାରତ ସରକାରଙ୍କ ସ୍ୱାସ୍ଥ୍ୟ ମନ୍ତ୍ରଣାଳୟର ସୂଚନା ଅନୁସାରେ ୧୪ ଜଣ ରୋଗୀ ସୁସ୍ଥ ମଧ୍ୟ ହେଲେଣି। ଆକ୍ରାନ୍ତଙ୍କ ସଂଖ୍ୟାକୁ ସୀମିତ ରଖିବା ଓ ଯେଉଁମାନେ ଆକ୍ରାନ୍ତ ସେମାନଙ୍କୁ ଉନ୍ନତ ଚିକିତ୍ସା ସୁବିଧା ଦେବାଲାଗି, ଆମକୁ ଅଧିକ ସୁଯୋଗ ସୃଷ୍ଟି କରିବାକୁ ପଡିବ। ଇତି ମଧ୍ୟରେ ଓଡିଶା ସରକାର ସବୁ ପ୍ରକାର ଧାର୍ମିକ ସ୍ଥଳକୁ ସାଧାରଣ ଲୋକଙ୍କ ପରିଦର୍ଶନ ନିଷିଦ୍ଧ କରିଛନ୍ତି। ଗତ ସପ୍ତାହେ ଭିତରେ ଓଡିଶାରେ ଦୁଇ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ଓ ଅନ୍ତତଃ ଆଜି ପର୍ୟନ୍ତ ସଂକ୍ରମଣ ସେତିକିରେ ସୀମିତ ରହିଛି। ତେବେ ଭାରତର ଚାରୋଟି ପ୍ରମୁଖ ରାଜ୍ୟ ମହାରାଷ୍ଟ୍ରରେ ଆକ୍ରାନ୍ତଙ୍କ ସଂଖ୍ୟା ୪୨, କେରଳରେ ୨୫, କର୍ଣ୍ଣାଟକରେ ୧୪, ଦିଲ୍ଲୀରେ ୧୧, ଉତ୍ତର ପ୍ରଦେଶରେ ୧୬,ଜାମ୍ମୁ-କାଶ୍ମୀରରେ ୪ ଓ ଲଦାଖରେ ୮ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି।
ଅନେକ ସମୟରେ ଦେଖା ଯାଉଛି, ଭୟ କାରଣରୁ ହେଉ ବା ମୂର୍ଖାମି ଯୋଗୁଁ ଅନେକ ଆକ୍ରାନ୍ତ ଡାକ୍ତରଖାନାରୁ ଫେରାର ହୋଇ ଯାଉଛନ୍ତି। ଏହା ସବୁଠୁ ବଡ ବିପଦ ସୃଷ୍ଟି କରିବ। ଦେଶରେ ସର୍ବ ପ୍ରଥମେ କେରଳରେ ଏହାର ପ୍ରକୋପ ବଢିଥିବା ବେଳେ କେରଳ ସରକାର ତତ୍ପରତାର ସହିତ ଏହାର ଦ୍ଵିତୀୟ ପର୍ୟାୟ ସଂକ୍ରମଣକୁ ରୋକିବାରେ ସଫଳ ହୋଇଛନ୍ତି।
ତେବେ ଚୀନ, ୟୁରୋପ ଏବଂ ଆମେରିକାର ଅନୁଭବରୁ ଆମକୁ ଗୋଟିଏ କଥା ମାନି ଚଳିବାକୁ ପଡିବ। ପୂରା ଦେଶରେ ସାମାଜିକ ସମାଗମ ଓ ଭିଡକୁ ନିୟନ୍ତ୍ରିତ କରିବାକୁ ପଡିବ। ମହାରାଷ୍ଟ୍ର ଓ ଓଡିଶା ସରକାର ସବୁ ଧାର୍ମିକ ସ୍ଥଳ ଉପରେ ଏ ପ୍ରକାର ନିୟନ୍ତ୍ରଣ ଲାଗୁ କରି ସାରିଛନ୍ତି।
ଏ କ୍ଷେତ୍ରରେ ଉତ୍ତର ପ୍ରଦେଶ ସରକାର କିନ୍ତୁ ଅତ୍ୟନ୍ତ ଦାୟିତ୍ଵହୀନ କାମ କରୁଛନ୍ତି। ଉତ୍ତର ପ୍ରଦେଶରେ ସଂକ୍ରମିତ ଲୋକଙ୍କ ସଂଖ୍ୟା ୧୬ରେ ପହଞ୍ଚିଥିବା ବେଳେ, ମାର୍ଚ୍ଚ ୨୫ରୁ ଏପ୍ରିଲ ୨ ତାରିଖ ପର୍ୟନ୍ତ ଅଯୋଧ୍ୟାରେ ରାମ ନବମୀ ମେଳା ପାଇଁ ଆଦିତ୍ୟନାଥ ସରକାର ଅନୁମତି ଦେଇଛନ୍ତି।
ଏହାକୁ ଧାର୍ମିକ ଭାବ ପ୍ରବଣତା ବୋଲି କହି ଜଣେ ମୁଖ୍ୟମନ୍ତ୍ରୀ ପୂରା ଦେଶର ଲୋକଜୀବନ ସହିତ ଖେଳ ଖେଳୁଛନ୍ତି। କେନ୍ଦ୍ର ସରକାର ତୁରନ୍ତ ଏଥିରେ ହସ୍ତକ୍ଷେପ କରି ଏହି ମେଳାକୁ ବନ୍ଦ କରିବା ଉଚିତ ହେବ।
ଅହି ଅଗ୍ନି ପରୀକ୍ଷା ସମୟରେ ରାଜନୈତିକ ଦଳ ଓ ଧାର୍ମିକ ବ୍ୟକ୍ତି ବିଶେଷଙ୍କର ବୟାନ ଉପରେ ମଧ୍ୟ କଟକଣା ରହିବା ଉଚିତ। ସାମାଜିକ ଗଣମାଧ୍ୟମ ଓ ମୁଖ୍ୟ ଧାରାର ଗଣମାଧ୍ୟମ ଏ କ୍ଷେତ୍ରରେ ଅଧିକ ସତର୍କ ରହିବା ମଧ୍ୟ ଜରୁରୀ। ଦେଶର ସ୍ୱାସ୍ଥ୍ୟ ରାଷ୍ଟ୍ରମନ୍ତ୍ରୀ ଅଶ୍ବିନୀ ଚୌବେ, ଲୋକ ଖରାରେ ଠିଆ ହେଲେ କରୋନାରୁ ରକ୍ଷା ପାଇବେ ବୋଲି କହିବା, ଅତ୍ୟନ୍ତ ହାସ୍ୟାସ୍ପଦ। ସରକାରରେ ଥିବା ମନ୍ତ୍ରୀ ଓ ଅଧିକାରୀମାନେ ଏ ପ୍ରସଙ୍ଗରେ ଅଧିକ ସଚେତନ ହେବେ ବୋଲି ଆମେ ଆଶା କରିବା।
ଗତକାଲି ଜାତି ଉଦ୍ଦେଶ୍ୟରେ ବାର୍ତ୍ତା ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶକୁ ସଂଯମ ଓ ସାହସର ବାର୍ତ୍ତା ଦେଇଛନ୍ତି।
ସ୍ପେନ୍ : ସାରା ବିଶ୍ବରେ କରୋନା ଭୟର ତାଣ୍ଡବ ରଚୁଥିବାବେଳେ ସ୍ପେନର ଜଣେ ଯୁବ ଫୁଟବଲ୍ କୋଚଙ୍କ ପ୍ରାଣ ନେଇଛି । ସ୍ପେନର ଫୁଟବଲ୍ କୋଚ୍ ଫ୍ରାନ୍ସିସ୍କୋ ଗ୍ରୋର୍ସିଆଙ୍କ କରୋନା ଯୋଗୁଁ ମୃତ୍ୟୁ ହୋଇଛି ବୋଲି ଜଣା ପଡିଛି । ମୃତ୍ୟୁବେଳକୁ ତାଙ୍କୁ ମାତ୍ର 21 ବର୍ଷ ହୋଇଥିଲା। କିଛିଦିନ ପୂର୍ବରୁ ତାଙ୍କ ଦେହରେ କରୋନା ସଂକ୍ରମଣର ସୂଚନା ମିଳିଥିଲା । ଗ୍ରୋର୍ସିଆ ୟୁଥ୍ ଟିମ୍ର ହେଡ୍ କୋଚ ରହିଥିଲେ । ଗ୍ରୋସିଆ ସ୍ପେନ୍ର ଜଣେ ପ୍ରତିଭାଶାଳୀ ଖେଳାଳୀ ରୂପେ ପରିଚିତ । ସେ କୋଚ୍ ଦାୟିତ୍ବ ସହ ମ୍ୟାନେଜର୍ର ପଦବୀ ମଧ୍ୟ ସମ୍ଭାଳିଥିଲେ । ମାତ୍ର 21 ବର୍ଷ ବୟସରେ ଗ୍ରୋର୍ସିଆ ଜଣେ ପ୍ରଶିକ୍ଷକ ତଥା ମ୍ୟାନଜେର୍ ଭାବରେ ବେଶ ଧୂରୀଣ ଥିଲେ । ୟୁଥ୍ କ୍ଲବ୍ର କୋଚ୍ ରୂପେ ସେ ଦଳକୁ ଏକ ନୂତନ ଦିଶା ପ୍ରଦାନ କରିଥିଲେ ।
ମଙ୍ଗଳବାର ଦିନ ସ୍ପେନ୍ରେ କରୋନା ସଂକ୍ରମିତଙ୍କ ସଂଖ୍ୟା 9,942ରେ ପହଞ୍ଚି ଥିବାବେଳେ ଏହି ରୋଗରେ 342ଜଣଙ୍କର ମୃତ୍ୟୁ ହୋଇଛି । 532ଜଣଙ୍କର ଚିକିତ୍ସା ପରେ ଏବେ ସୁସ୍ଥ ରହିଥିବାର ଜଣାପଡିଛି । (ଏଜେନ୍ସି)
ଗଂଜାମ, ଜିଲ୍ଲାର ପ୍ରସିଦ୍ଧ ମା ତାରାତାରେଣୀ ପିଠରେ ଆସନ୍ତା ମଙ୍ଗଳବାରରେ ହେବାକୁ ଥିବା ଚଇତି ପର୍ବ ଜାକଜମକରେ କରାଯିବ ନାହିଁ। କେବଳ ମାଙ୍କ ସ୍ବତନ୍ତ୍ର ପୂଜାବିଧି କରାଯାଇ ଚଇତ ପର୍ବର କାମ ଶେଷ କରାଯିବ। କୋରୋନା ଭୟରେ ସରକାର ବର୍ତ୍ତମାନ ଏକାଠି ହେବାକୁ ମନା କରିଥିବାରୁ ମନ୍ଦିର ପ୍ରଶାସନ ଏପରି ପଦକ୍ଷେପ ନେଇଛି।ସେଥିପାଇଁ ଭକ୍ତମାନେ ନ ଆସିବା ପାଇଁ ମନ୍ଦିର କର୍ତ୍ତୁପକ୍ଷ ନିବେଦନ କରିଛନ୍ତି।
ଚୈତ୍ରମାସର ପ୍ରତି ମଙ୍ଗଳବାର ଦିନ ମାଙ୍କ ପିଠରେ ଚଇତି ପର୍ବ ବେଶ ଧୂମଧାମରେ ପାଳିତ ହୋଇଥାଏ। ଏଥର ମଧ୍ୟ ପ୍ରଥମ ମଙ୍ଗଳବାରରେ ଏହି ପର୍ବ ବେଶ୍ ଜାକଜମକରେ ପାଳନ କରାଯାଇଥିଲା। ହଜାରହଜାର ଭକ୍ତ ଏହି ଦିନ ଏକାଠି ହୋଇ ମାଙ୍କ ପୂଜାର୍ଚ୍ଚନା କରିଥିଲେ। ମୁଖ୍ୟତଃ ମାନସିକ ପୁରଣ ହେଲେ ମାଙ୍କ ନିକଟକୁ ଆସି ବ୍ରତଧାରୀମାନେ ପୂଜା କରିଥାନ୍ତି। ହେଲେ କୋରୋନା ପାଇଁ ଆସନ୍ତା ମଙ୍ଗଳବାରରେ ଏହି ପର୍ବକୁ ସଂପୂର୍ଣ୍ଣ ନିରାଡମ୍ବର ଭାବେ ପାଳନ କରାଯିବ। ସେଥିପାଇଁ ଭକ୍ତମାନେ ମନ୍ଦିରକୁ ନ ଆସିବା ପାଇଁ ମନ୍ଦିର ତରଫରୁ ନିବେଦନ କରାଯାଇଛି।
ପର୍ତ୍ତୁଗାଲ : ଫୁଟବଲ୍ ଷ୍ଟାର କ୍ରିଷ୍ଟିଆନୋ ରୋନାଲ୍ଡୋ ପୁଣିଥରେ ନିଜର ବଦାନ୍ୟତାର ଏକ ଉଦାହରଣ ଦେଇଛନ୍ତି । ସର୍ବଦା ନିଜର ଦାନ ପାଇଁ ଚର୍ଚ୍ଚିତ ରହୁଥିବା ରୋନାଲ୍ଡୋ ନିଜର ହୋଟେଲ୍ ଗୁଡିକୁ ହସ୍ପିଟାଲରେ ପରିଣତ କରିଛନ୍ତି । ପର୍ତ୍ତୁଗାଲରେ କୋରୋନା ମୁକାବିଲା ପାଇଁ ରୋନାଲ୍ଡୋ ନିଜର ସମସ୍ତ ହୋଟେଲକୁ ହସ୍ପିଟାଲରେ ପରିଣତ କରାଇବା ସହିତ ମାଗଣା ଚିକିତ୍ସା ବ୍ୟବସ୍ଥା ଲାଗୁ କରିଛନ୍ତି । ଉଲ୍ଲେଖଯୋଗ୍ୟ ଯେ, ପର୍ତ୍ତୁଗାଲ୍ରେ ରୋନାଲ୍ଡୋଙ୍କ ସିଆର 7 ଚେନ୍ର ପ୍ରାୟ 50ଟି ହୋଟେଲ୍ ରହିଛି । ସମସ୍ତ ହୋଟେଲ୍ରେ ଡାକ୍ତର ଏବଂ ସ୍ବାସ୍ଥ୍ୟକର୍ମୀଙ୍କୁ ନିଯୁକ୍ତି ଦେଇଛନ୍ତି ନିଜେ ରୋନାଲ୍ଡୋ । ଡାକ୍ତର ଏବଂ ସ୍ବାସ୍ଥ୍ୟକର୍ମୀଙ୍କ ବେତନ ସହିତ ଲୋକଙ୍କ ଚିକିତ୍ସା ଖର୍ଚ୍ଚ ମଧ୍ୟ ରୋନାଲ୍ଡୋ ବହନ କରିବେ ବୋଲି ଜଣାପଡିଛି ।
ଆଗ୍ରା: ଜଣେ କରୋନାଭାଇରସ୍ ରୋଗୀ ଏବଂ ତାଙ୍କ ପରିବାର ବିରୋଧରେ ମାମଲା ଦାୟର ହୋଇଥିବା ଘଟଣା ସାମ୍ନାକୁ ଆସିଛି। ଏହି ଘଟଣା ଉତ୍ତରପ୍ରଦେଶର ଆଗ୍ରା ଜିଲ୍ଲାରେ ହୋଥିବାର ସୂଚନା ରହିଛି। କରୋନାଭାଇରସ୍ ରୋଗୀ ଏବଂ ତାଙ୍କ ପରିବାର ବିରୋଧରେ ଆଗ୍ରା ଜିଲ୍ଲା ପ୍ରଶାସନ ଦ୍ଵାରା ଏହି ମାମଲା ରୁଜୁ କରାଯାଇଛି।
ମିଳିଥିବା ସୂଚନା ଅନୁଯାୟୀ, ଆଗ୍ରା କ୍ୟାଣ୍ଟନମେଣ୍ଟ ରେଳ କଲୋନୀରେ ରହୁଥିବା ଏକ ଦମ୍ପତି ହନିମୁନ୍ ପାଇଁ ନିକଟରେ ଇଟାଲୀ ଯାଇଥିଲେ। ସେମାନେ ଫେରିବା ପରେ ତାଙ୍କ ସ୍ୱାମୀ ବେଙ୍ଗାଲୁରୁରେ ଭାଇରସ ପରୀକ୍ଷା କରି ରିପୋର୍ଟ ଆସିବା ପୂର୍ବରୁ ସେ ତାଙ୍କ ପରିବାରକୁ ଫେରିଥିଲେ। ତେବେ ପରୀକ୍ଷା ରିପୋର୍ଟରେ ତାଙ୍କର କରୋନାଭାଇରସ୍ ପଜିଟିଭ ଜଣାପଡିଥିଲା। ସ୍ୱାସ୍ଥ୍ୟ ବିଭାଗର ସଦସ୍ୟଙ୍କ ଏକ ଟିମ୍ ଯିଏ ତତ୍କାଳୀନ ସନ୍ଦିଗ୍ଧ ରୋଗୀଙ୍କ ଘରେ ପହଞ୍ଚି ତାଙ୍କ ଅବସ୍ଥା ବିଷୟରେ ପଚାରିବାରୁ ପୀଡିତ ରୋଗୀଙ୍କ ସ୍ତ୍ରୀ ଏହି ବାବଦରେ ଲୁଚାଇଥିଲେ।
ଏନେଇ ଜିଲ୍ଲା ପ୍ରଶାସନ ପକ୍ଷରୁ ଆଗ୍ରା ସଦର ବଜାର ପୋଲିସ ଷ୍ଟେସନରେ ସିଆରପିସି ର ଧାରା ୨୬୯ ଏବଂ ୨୭୦ ଅନୁଯାୟୀ ମାମଲା ରୁଜୁ କରାଯାଇଛି।
ଗତ ସପ୍ତାହରେ ବିଶ୍ୱ ସ୍ୱାସ୍ଥ୍ୟ ସଂଗଠନ କରୋନାଭାଇରସକୁ ବିଶ୍ୱ ମହାମାରୀ ଘୋଷଣା କରିଛି। ସମଗ୍ର ବିଶ୍ୱରେ ଅତି କମରେ ୧,୪୫,୩୭୪ଜଣ ଏହି ରୋଗରେ ଆକ୍ରାନ୍ତ ହୋଇଥିବାବେଳେ ୫,୪୦୦ରୁ ଉର୍ଦ୍ଧ୍ଵ ଲୋକ ଏହି ଜୀବାଣୁ ଯୋଗୁଁ ପ୍ରାଣ ହରାଇଛନ୍ତି। ଏପର୍ଯ୍ୟନ୍ତ ଭାରତରେ ୧୦୭ ରୁ ଅଧିକ ମାମଲା ଚିହ୍ନଟ ହୋଇଛି। (ଏଜେନ୍ସି)
ହାଇଦ୍ରାବାଦ: କରୋନାଭାଇରସର ମିଥ୍ୟା ଖବର ଏବଂ ଗୁଜବ ପ୍ରଚାର କରୁଥିବା ବ୍ୟକ୍ତିଙ୍କୁ ଏକ ବର୍ଷ ପର୍ଯ୍ୟନ୍ତ ଜେଲ ଦଣ୍ଡ ହୋଇପାରେ ବୋଲି ହାଇଦ୍ରାବାଦ ପୋଲିସ ଚେତାବନୀ ଦେଇଛି। କରୋନାଭାଇରସ୍ କୁ ପ୍ରତିରୋଧ ପାଇଁ ରାଜ୍ୟ ସରକାର ବନ୍ଦ ଘୋଷଣା କରିଥିବାବେଳେ ତେଲେଙ୍ଗନା ପୋଲିସ ମଧ୍ୟ ଗୁଜବ ଏବଂ ମିଥ୍ୟା ଖବର ବିରୋଧରେ କଡା ଚେତାବନୀ ଦେଇଛି।
ମିଥ୍ୟା ଖବର ଏବଂ ଗୁଜବ ସମାଜ ପାଇଁ ଖରାପ ବୋଲି ପୋଲିସ କମିଶନର ଅଞ୍ଜାନୀ କୁମାର କହିଛନ୍ତି। ସେ କହିଛନ୍ତି ଯେଉଁମାନେ ସୋସିଆଲ ମିଡିଆରେ ମିଥ୍ୟା ତଥ୍ୟ ପ୍ରଚାର କରୁଛନ୍ତି ଏବଂ କରୋନାଭାଇରସରେ ଆତଙ୍କ ସୃଷ୍ଟି କରୁଛନ୍ତି, ସେମାନେ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ ଅଧିନିୟମ ଅନୁଯାୟୀ ଦଣ୍ଡବିଧାନ କରାଯିବ। ଏହି ଅଧିନିୟମ ଅନୁଯାୟୀ ଦଣ୍ଡ ଏକ ବର୍ଷ ପର୍ଯ୍ୟନ୍ତ ଜେଲ ଓ ଜୋରିମାନା ହୋଇପାରେ ବୋଲି ସେ କହିଛନ୍ତି।
ସମସ୍ତ ଶିକ୍ଷାନୁଷ୍ଠାନ ବନ୍ଦ ହେବା ଏବଂ ସାଧାରଣ ସଭାକୁ ନିଷିଦ୍ଧ କରିବା ଘୋଷଣା କରି ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଶନିବାର ରାତିରେ କରୋନାଭାଇରସ୍ ମାମଲା ସମ୍ବନ୍ଧରେ ଅନିଶ୍ଚିତ ଖବର ପ୍ରକାଶନ କିମ୍ବା ପ୍ରସାରଣ ନକରିବାକୁ ଗଣମାଧ୍ୟମକୁ ଚେତାବନୀ ଦେଇଛନ୍ତି। କରୋନାଭାଇରସ୍ ମାମଲା ସମ୍ପର୍କରେ ସ୍ୱାସ୍ଥ୍ୟ ବିଭାଗ ପକ୍ଷରୁ ପ୍ରକାଶିତ ତଥ୍ୟକୁ କଡାକଡି କରିବାକୁ ସେ ଗଣମାଧ୍ୟମକୁ କହିଛନ୍ତି। ମିଥ୍ୟା ଖବର ପ୍ରଚାର କରୁଥିବା ବ୍ୟକ୍ତିମାନେ କଠୋର କାର୍ଯ୍ୟାନୁଷ୍ଠାନର ସମ୍ମୁଖୀନ ହେବେ ବୋଲି ସେ କହିଛନ୍ତି।
ନୂଆଦିଲ୍ଲୀ: କରୋନାଭାଇରସ୍ ରେ ପ୍ରଭାବିତ ଇରାନରେ ଫସି ରହିଥିବା ୨୩୪ ଜଣ ଭାରତୀୟ ଆଜି ଭାରତରେ ପହଞ୍ଚିଛନ୍ତି ବୋଲି ବୈଦେଶିକ ବ୍ୟାପାର ମନ୍ତ୍ରୀ ଏସ. ଜୟଶଙ୍କର କହିଛନ୍ତି।
ମନ୍ତ୍ରୀ କହିଛନ୍ତି ଯେ ଏହି ବ୍ୟାଚରେ ୧୩୧ ଜଣ ଛାତ୍ର ଏବଂ ୧୦୩ ଜଣ ତୀର୍ଥଯାତ୍ରୀ ଅଛନ୍ତି। ଇରାନରୁ ବହିଷ୍କୃତ ହୋଇଥିବା ଭାରତୀୟମାନଙ୍କର ଏହା ହେଉଛି ତୃତୀୟ ବ୍ୟାଚ୍। ଶୁକ୍ରବାର ଦିନ ଦ୍ୱିତୀୟ ବ୍ୟାଚ୍ ରେ ଇରାନରୁ ୪୪ ଭାରତୀୟ ପହଞ୍ଚିଥିବାବେଳେ, ମଙ୍ଗଳବାର ଦିନ ପ୍ରଥମ ବ୍ୟାଚ୍ ରେ ୫୮ ଜଣ ଭାରତୀୟ ସ୍ଵଦେଶ ଫେରିଛନ୍ତି।
ଏହି ଅବସରରେ ଏସ. ଜୟଶଙ୍କର ଟ୍ଵୀଟ୍ଟ କରି ରାଷ୍ଟ୍ରଦୂତ ଧାମୁ ଗାଡାମଙ୍କୁ ଧନ୍ୟବାଦ ଦେବା ସହିତ ଭାରତ ଏବଂ ଇରାନ ଦଳକୁ ମଧ୍ୟ ଧନ୍ୟବାଦ ପ୍ରଦାନ କରିଛନ୍ତି।
ଡବ୍ଲୁ. ଏଚ. ଓ ଦ୍ଵାରା କରୋନାକୁ ମହାମାରୀ ଘୋଷିତ କରାଯାଇଥିବା ବେଳେ ଏବେ ମଧ୍ୟ ଇଟାଲୀ ଭଳି କରୋନା ପ୍ରଭାବିତ ଦେଶରେ ବହୁ ସଂଖ୍ୟାରେ ଭାରତୀୟ ଫସି ରହିଛନ୍ତି।
ବର୍ତ୍ତମାନ ପର୍ଯ୍ୟନ୍ତ ଭାରତରେ କରୋନାଭାଇରସ୍ କବଳରେ ଅତି କମରେ ୯୩ ଟି ନିଶ୍ଚିତ ମାମଲା ରୁଜୁ ହୋଇଛି ବୋଲି ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଏହାର ଅଫିସିଆଲ ୱେବସାଇଟରେ କହିଛି। (ଏଜେନ୍ସି)
ମୁମ୍ବାଇ: ମହାରାଷ୍ଟ୍ରରେ କରୋନାଭାଇରସ୍ ପଜିଟିଭ୍ ମାମଲା ସଂଖ୍ୟା ୩୧ କୁ ବୃଦ୍ଧି ପାଇଥିବାର ସୂଚନା ରହିଛି। ମହାରାଷ୍ଟ୍ର ଦେଶରେ କରୋନାଭାଇରସ୍ ଦ୍ୱାରା ସବୁଠାରୁ ଅଧିକ ପ୍ରଭାବିତ ରାଜ୍ୟ ଭାବରେ ଉଭା ହୋଇଛି। ଶନିବାର ବିଳମ୍ବିତ ରାତିରେ ପୁଣେ ଜିଲ୍ଲାର ପିମ୍ପ୍ରି-ଚିଞ୍ଚୱାଡରେ ପାଞ୍ଚଟି ନୂଆ ମାମଲା ଚିହ୍ନଟ ହୋଇଥିବା ଜଣେ ସ୍ୱାସ୍ଥ୍ୟ ଅଧିକାରୀ କହିଛନ୍ତି। ଗତକାଲି ଅହମ୍ମଦନଗର ସିଭିଲ ହସପିଟାଲର ବିଚ୍ଛିନ୍ନତା ୱାର୍ଡରୁ ପଳାଇ ଆସିଥିବା ତିନିଜଣ କରୋନାଭାଇରସ ସନ୍ଦିଗ୍ଧ ଆଜି ହସପିଟାଲଫେରିଛନ୍ତି। ସେହିଭଳି ନାଗପୁରର ମାୟୋ ହସ୍ପିଟାଲରୁ ପଳାଇ ଆସିଥିବା ଚାରିଜଣ କରୋନାଭାଇରସ୍ ସନ୍ଦିଗ୍ଧଙ୍କ ମଧ୍ୟରୁ ତିନିଜଣ ମଧ୍ୟ ଫେରି ଆସିଛନ୍ତି ଏବଂ ଚତୁର୍ଥକୁ ଖୋଜିବା ପାଇଁ ଉଦ୍ୟମ ଜାରି ରହିଛି।
ମାର୍ଚ୍ଚ ୩୧ ପର୍ଯ୍ୟନ୍ତ ସମସ୍ତ ବିଦ୍ୟାଳୟ, କଲେଜ, ମଲ୍, ସୁଇମିଂ ପୁଲ୍, ଜିମ୍ ଏବଂ ଫିଟନେସ୍ ସେଣ୍ଟର, ସର୍ବସାଧାରଣ ସ୍ଥାନ, ଧାର୍ମିକ ପ୍ରକ୍ରିୟା ଇତ୍ୟାଦି ବନ୍ଦ ହେବା ସହିତ ମହାରାଷ୍ଟ୍ର ଏକ ବନ୍ଦ ମୋଡକୁ ଯାଇଛି। (ଏଜେନ୍ସି)
ନୂଆଦିଲ୍ଲୀ : କରୋନା ସାରା ବିଶ୍ବରେ ଆତଙ୍କ ସୃଷ୍ଟି କରିଥିବାବେଳେ ଧିରେ ଧିରେ ଭାରତରେ ନିୟନ୍ତ୍ରଣ ବାହରକୁ ଯିବାରେ ଲାଗିଛି କରୋନା ଭାଇରସ । ପ୍ରତ୍ୟେକ ଦିନ କରୋନା ଭାଇରସରେ ଆକ୍ରାନ୍ତ ହୋଇଥିବା ନୂଆ ନୂଆ ରୋଗୀଙ୍କ ସଂଖ୍ୟାରେ । କର୍ଣ୍ଣାଟକାରେ ମହାମାରୀ କରୋନା ଭାଇରସ ପ୍ରଥମ ମୁଣ୍ଡ ନେଇଛି। ଗତକାଲି କର୍ଣ୍ଣାଟକାର ଜଣେ ୭୬ ବର୍ଷ ବୟସ୍କ ବ୍ୟକ୍ତିଙ୍କର ମୃତ୍ୟୁ ଘଟିଥିଲା। ବୃଦ୍ଧା ଜଣଙ୍କ କରୋନାରେ ଆକ୍ରାନ୍ତ ଥିବା ଓ ଏହି କାରଣରୁ ତାଙ୍କ ମୃତ୍ୟୁ ଘଟିଥିବା କର୍ଣ୍ଣାଟକା ସ୍ୱାସ୍ଥ୍ୟ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି।ମୃତକଙ୍କ ନାମ ମହମ୍ମଦ ହୁସେନ୍ ସିଦ୍ଦିକି। ସିଦ୍ଦିକି ନିକଟରେ ସାଉଦି ଆରବରୁ ଫେରିଥିଲେ। ଏହାପରେ ତାଙ୍କୁ ଆଇସୋଲେସନରେ ରଖି ଚିକିତ୍ସା କରାଯାଉଥିଲା। ସେଠାରେ ହିଁ ତାଙ୍କର ମୃତ୍ୟୁ ଘଟିଛି।
ସେହିପରି ସ୍ଥିତି ନିୟନ୍ତ୍ରଣ କରିବା ପାଇଁ କରୋନା ଭାଇରସକୁ ମହାମାରୀ ଭାବେ ଘୋଷଣା କରିଛନ୍ତି ଦିଲ୍ଲୀ ସରକାର । କରୋନା ଭାଇରସକୁ ମହାମାରୀ ଭାବେ ଘୋଷଣା କରିବା ସହ ଦିଲ୍ଲୀର ସମସ୍ତ ସିନେମା ଘରକୁ ମାର୍ଚ୍ଚ31 ତାରିଖ ପର୍ଯ୍ୟନ୍ତ ବନ୍ଦ କରିଦେଇଛନ୍ତି ସରକାର । ଭାରତରେ କରୋନା ଭାଇରସରେ ଆକ୍ରାନ୍ତଙ୍କ ସଂଖ୍ୟା ୭୪କୁ ବୃଦ୍ଧି ପାଇଥିବା ବେଳେ ପ୍ରଥମ ମୃତ୍ୟୁ ଲୋକଙ୍କ ମନରେ କୋକୁଆ ଭୟ ସୃଷ୍ଟି କରିଛି। । (ଏଜେନ୍ସି)
ଦିଲ୍ଲୀ: ଦିଲ୍ଲୀ ସରକାର ଗୁରୁବାର ଦିନ କରୋନାଭାଇରସକୁ ମହାମାରୀ ବୋଲି ଘୋଷଣା କରିଛନ୍ତି। ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ମାର୍ଚ୍ଚ 31 ତାରିଖ ପର୍ଯ୍ୟନ୍ତ ସମସ୍ତ ସିନେମା ହଲ ବନ୍ଦ ରହିବା ନେଇ ଆଦେଶ ଦେଇଛନ୍ତି।
ଯେଉଁ ସ୍କୁଲରେ କୌଣସି ପରୀକ୍ଷା ଚାଲିନାହିଁ ସେହି ସ୍କୁଲ ଏବଂ କଲେଜଗୁଡ଼ିକୁ ମଧ୍ୟ ବନ୍ଦ କରାଯିବ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଦିଲ୍ଲୀ ଉପ ରାଜ୍ୟପାଳଙ୍କୁ ଭେଟିବା ପରେ କେଜ୍ରିୱାଲ ଏହି ଘୋଷଣା କରିଛନ୍ତି।
କେଜ୍ରିୱାଲ ଗଣମାଧ୍ୟମକୁ କହିଛନ୍ତି, “ଦିଲ୍ଲୀରେ କରୋନାଭାଇରସର ବିସ୍ତାର ଯାଞ୍ଚ ପାଇଁ ଆମେ ପଦକ୍ଷେପ ଜାରି ରଖିଛୁ। ଚିକିତ୍ସା ପାଇଁ ପର୍ଯ୍ୟାପ୍ତ ଶଯ୍ୟା ଅଛି ବୋଲି ସେ କହିଛନ୍ତି। ଖାଲି ଫ୍ଲାଟ ଏବଂ ନିର୍ମାଣାଧୀନ ଡାକ୍ତରଖାନାରେ ମଧ୍ୟ ରୋଗୀଙ୍କୁ ରଖାଯାଇ ଚିକିତ୍ସା କରାଯିବ ବୋଲି ମୁଖ୍ୟମନ୍ତ୍ରୀ କେଜ୍ରିୱାଲ ଘୋଷଣା କରିଛନ୍ତି। (ଏଜେନ୍ସି)