Tag: dharmendrapradhan
ସମୀକ୍ଷା ବ୍ୟୁରୋ
ଓଡିଶାରେ ପ୍ରାୟ 50 ଲକ୍ଷ ସଦସ୍ୟ କରାଯିବା ଲକ୍ଷ୍ୟ ନେଇ ଭୁବନେଶ୍ବରରେ ରାଜ୍ୟ ବିଜେପି ଆରମ୍ଭ କରିଛି ସଦସ୍ୟତା ଅଭିଯାନ। ଜନସଂଘର ପ୍ରତିଷ୍ଠାତା ଶ୍ୟାମପ୍ରସାଦ ମୁଖାର୍ଜିଙ୍କ ଜନ୍ମତିଥୀରୁ ଆରମ୍ଭ ହୋଇଛି ଏହି ସଦସ୍ୟତା ଅଭିଯାନ। ଭୁବନେଶ୍ବରର ଭୀମଟାଙ୍ଗୀ ଅଞ୍ଚଳରେ ଆୟୋଜିତ ଏହି ଅଭିଯାନ ସଭାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗଦେଇ ସଦସ୍ୟତା ସଂଗ୍ରହର ଶୁଭାରମ୍ଭ କରିଥିଲେ। ପ୍ରତିବୁଥ ସ୍ତରରେ ଏହି ଅଭିଯାନ କରାଯିବା ସହିତ ସେଠାରେ ପାଞ୍ଚୋଟି ଗଛ ଲଗାଇବା ପାଇଁ ମଧ୍ୟ ବ୍ୟବସ୍ଥା କରାଯାଇଛି। ଯେଉଁମାନେ ବିଜେପିର ସଦସ୍ୟ ହେବାକୁ ଚାହିଁବେ ସେମାନେ ମୋବାଇଲ ନମ୍ବର 8980808080 କୁ ମିସ କଲ କଲେ ସେମାନଙ୍କ ସଦସ୍ୟ ଭାବେ ଗ୍ରହଣ କରାଯିବ। ଗୋଟିଏ ମୋବାଇଲ ନମ୍ବରରୁ କେବଳ 4 ଜଣ ସଦସ୍ୟତା ଗ୍ରହଣ କରିପାରିବେ। ସେହିପରି ଅନଲାଇନ ଏବଂ ଅପ ଲାଇନରେ ମଧ୍ୟ ସଦସ୍ୟତା ଗ୍ରହଣ କରିବାର ବ୍ୟବସ୍ଥା କରାଯାଇଛି।ବର୍ତ୍ତମାନ ଦେଶର 11 କୋଟି ଏବଂ ରାଜ୍ୟ 36 ଲକ୍ଷ ସଦସ୍ୟ ବିଜେପିରେ ସାମିଲ ହୋଇଛନ୍ତି। ଏହାକୁ ଆହୁରି ବ୍ୟାପକ କରାଯିବ ବୋଲି ଧର୍ମେନ୍ଦ୍ର ପ୍ରଧାନ କହିଛନ୍ତି। ଏହି ଅଭିଯାନ ବୈଠକରେ ବିଜେପି ରାଜ୍ୟସଭା ସାଂସଦ ଅଶ୍ବନୀ ବୈଷ୍ଣବ,ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ,ପ୍ରକାଶ ମିଶ୍ର, ଖାରବେଳ ସ୍ବାଇଁ,ସମୀର ମହାନ୍ତି ଏବଂ ଦାମୋଦର ରାଉତ ପ୍ରମୁଖ ଯୋଗଦେଇଥିଲେ।
କେଦାର ମିଶ୍ର
ଏମିତି ଦେଖିଲେ ଓଡିଶାର ଦୁଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ପ୍ରତାପ ଷଡଙ୍ଗୀଙ୍କର କୌଣସି ତୁଳନା ସମ୍ଭବ ନୁହେଁ। ସରକାର ଭିତରେ ଧର୍ମେନ୍ଦ୍ରଙ୍କ ସ୍ଥାନ ଢେର ଉଚ୍ଚରେ। ମୋଦୀ ସରକାରରେ ମୂଳରୁ ପେଟ୍ରୋଲିୟମ ମନ୍ତ୍ରୀ ରହିଥିବା ଧର୍ମେନ୍ଦ୍ର ଏକ ବିରଳ ରେକର୍ଡର ଅଧିକାରୀ। ପେଟ୍ରୋଲିୟମ ମନ୍ତ୍ରୀ ଭାବରେ ଗତ କିଛି ବର୍ଷ ଭିତରେ କେହି ବି ଏତେ ବର୍ଷ ନିରନ୍ତର କାମ କରିବାର ସୁଯୋଗ ପାଇନଥିଲେ। ପ୍ରଥମ ମୋଦୀ ସରକାରରେ ଧର୍ମେନ୍ଦ୍ର ପେଟ୍ରୋଲିୟମ ସହିତ ଦକ୍ଷତା ବିକାଶ ଓ ଦ୍ଵିତୀୟ ପାଳିରେ ଇସ୍ପାତ ବିଭାଗର ଦାୟିତ୍ଵ ମଧ୍ୟ ପାଇଛନ୍ତି। ଓଡିଶାରୁ ବହୁ ବର୍ଷ ହେଲା ସେ ନିର୍ବାଚନ ଜିତିନାହାନ୍ତି କି ଲଢି ନାହାନ୍ତି, ତଥାପି ବିଜେପି ତାଙ୍କୁ ପ୍ରଥମେ ବିହାର ଓ ପରେ ମଧ୍ୟ ପ୍ରଦେଶରୁ ରାଜ୍ୟସଭାକୁ ପଠେଇଛି। ଏଥିରୁ ଦଳ ଓ ସରକାରରେ ତାଙ୍କର ପତିଆରା ସ୍ପଷ୍ଟ ପ୍ରମାଣିତ। ହେଲେ ଓଡିଶା ରାଜନୀତିରେ ଧର୍ମେନ୍ଦ୍ର ସବୁବେଳେ ପରାଜିତ ନାୟକ ହୋଇ ରହୁଛନ୍ତି ଓ ଓଡିଶାରେ ବିଜେପି ଆଶାନୁରୂପ ସଫଳତା ପାଉନାହିଁ। ଓଡିଶାର ବହୁ ବରିଷ୍ଠ ବିଜେପି ନେତା ଧର୍ମେନ୍ଦ୍ରଙ୍କୁ ନିଜର ନେତା ମାନିବାକୁ ନାରାଜ। ୨୦୧୯ ବିଧାନସଭା ନିର୍ବାଚନରେ ବିଜେପିର ଶୋଚନୀୟ ପରାଜୟ ପରେ ଧର୍ମେନ୍ଦ୍ରଙ୍କ ନେତୃତ୍ଵ ସବୁଠୁ ବଡ ଆହ୍ୱାନର ସମ୍ମୁଖୀନ ହୋଇଛି।
୨୦୧୯ ନିର୍ବାଚନରେ ଓଡିଶାରୁ ବିଜେପିର ଆଠ ଜଣ ଲୋକସଭା ପ୍ରାର୍ଥୀ ଜିଣିକି ଯାଇଥିବା ବେଳେ ହଠାତ ଜାତୀୟ ଗଣମାଧ୍ୟମରେ ବାଲେଶ୍ଵର ସାଂସଦ ପ୍ରତାପ ଷଡଙ୍ଗୀଙ୍କୁ ନେଇ ଏକ ପ୍ରଚାର ଅଭିଯାନ ଆରମ୍ଭ ହେଲା। ତାଙ୍କୁ ଜାତୀୟ ଗଣମାଧ୍ୟମରେ ଓଡିଶାର ମୋଦୀ ବୋଲି ପ୍ରଚାର କରିବା ପଛରେ ଏକ ବଡ ଶକ୍ତିର ହାତ ରହିଥିବା ସୁନିଶ୍ଚିତ। ଯୋଜନାବଦ୍ଧ ଭାବରେ ପ୍ରତାପ ଷଡଙ୍ଗୀଙ୍କୁ ତ୍ୟାଗୀ, ତପସ୍ଵୀ, ବାଗ୍ମୀ ଓ ଓଜସ୍ଵୀ ବୋଲି କୁହାଯାଉଛି। ଯେଉଁ ଓଡିଆ ଗଣମାଧ୍ୟମ ତାଙ୍କୁ ଗତ ୨୦ ବର୍ଷ ଭିତରେ ବିଶେଷ କିଛି ଗୁରୁତ୍ଵ ଦେଉନଥିଲେ, ସେମାନେ ହଠାତ୍ ପ୍ରତାପଙ୍କ ଜୟଗାନ ଆରମ୍ଭ କଲେ। ଏହା ପୂର୍ବରୁ ଓଡିଶା ବିଜେପି ସଭାପତି ପଦ ଲାଗି ଯେବେ ବି ପ୍ରତାପ ଷଡଙ୍ଗୀଙ୍କ ନାମ ଉଠିଛି, ତାକୁ କଳେ ବଳେ କୌଶଳେ ଚାପି ଦିଆଯାଉଥିଲା। ଏପରିକି ପ୍ରତାପ ଷଡଙ୍ଗୀଙ୍କୁ ଟିକେ ଅଧିକ ଟିଭି ଫୁଟେଜ ଦେଇଥିବାରୁ ଜଣେ ବରିଷ୍ଠ ସମ୍ପାଦକଙ୍କ ଚାକିରି ଚାଲିଯାଇଥିବା କଥା ମଧ୍ୟ ଶୁଣାଯାଏ। ପ୍ରତାପ ଓ ଧର୍ମେନ୍ଦ୍ରଙ୍କ ଭିତରେ ଖୁବ ଗୋଟେ ମଧୁର ସମ୍ପର୍କ ଯେ ନଥିଲା, ଏକଥା ବିଜେପି ନେତା ଓ ବିଜେପି କଥା ରିପୋର୍ଟ କରୁଥିବା ସାମ୍ବାଦିକ ମାନେ ଭଲ ଭାବରେ ଜାଣନ୍ତି।
ହଠାତ ପ୍ରତାପଙ୍କୁ ହିରୋ ଭାବରେ ଉପସ୍ଥାପନ କରିବା, ତାଙ୍କୁ ମନ୍ତ୍ରୀ ଭାବରେ ଦାୟିତ୍ଵ ଦେବା, ତାଙ୍କ ସଂସ୍କୃତ କୁ ନେଇ ବଢେଇ ଚଢେଇ ଆଲୋଚନା କରିବା ଓ ସର୍ବ ଶେଷରେ ଲୋକସଭାରେ ରାଷ୍ଟ୍ରପତିଙ୍କ ପାଇଁ ଧନ୍ୟବାଦ ପ୍ରସ୍ତାବ ବିତର୍କକୁ ଆରମ୍ଭ କରିବାର ସୁଯୋଗ ଦେବା ଭଳି ଘଟଣାକ୍ରମରେ ଏକ ଭିନ୍ନ ରାଜନୀତିର ଆଭାସ ସ୍ପଷ୍ଟ ବାରି ହୋଇ ପଡୁଛି। ଓଡିଶା ରାଜନୀତିରେ ଧର୍ମେନ୍ଦ୍ରଙ୍କୁ ଅଲଗା କରି ରଖିବାକୁ ଓ ପ୍ରତାପ ଷଡଙ୍ଗୀଙ୍କୁ ଅଧିକରୁ ଅଧିକ ରାଜନୈତିକ ଗୁରୁତ୍ଵ ଦେବାକୁ ବୋଧେ ବିଜେପି ଶୀର୍ଷ ନେତୃତ୍ଵ ଉଦ୍ୟମ ଆରମ୍ଭ କରିଛନ୍ତି। ରାଜ୍ୟରେ ଧର୍ମେନ୍ଦ୍ର ଆଦୌ ଗ୍ରହଣୀୟ ନେତୃତ୍ଵ ନୁହନ୍ତି ଓ ତାଙ୍କ ନେତୃତ୍ବରେ ଦଳ ଓଡିଶାରେ କେବେହେଲେ କ୍ଷମତା ଦାଖଲ କରିପାରିବ ନାହିଁ ବୋଲି ବିଜେପିର ହୃଦବୋଧ ହୋଇ ସାରିଛି। ପ୍ରତାପ ଷଡଙ୍ଗୀଙ୍କୁ ଅଧିକରୁ ଅଧିକ ମିଡିଆ ପ୍ରଚାରର କେନ୍ଦ୍ରରେ ରଖି ତାଙ୍କର ଏକ ନୂଆ ବ୍ରାଣ୍ଡ ପ୍ରସ୍ତୁତ କରାଯାଉଛି।
ଓଡିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ବିଜେପି ପୂର୍ଣ୍ଣ ସନ୍ତୁଷ୍ଟ କରି ରଖିବା ସହିତ ନବୀନଙ୍କ ବିରୋଧରେ ବିଜେପିର କୌଣସି ଶୀର୍ଷ ନେତା କିଛି ନ କହିବାକୁ କୁହାଯାଇଛି। ତାହା ସହିତ ପ୍ରତାପ ଷଡଙ୍ଗୀଙ୍କର ଏକ ସକାରାତ୍ମକ ଭାବମୂର୍ତ୍ତି ନିର୍ମାଣର ଉଦ୍ୟମ ମଧ୍ୟ ଚାଲିଛି। ଏହା ପୂର୍ବରୁ ପ୍ରତାପଙ୍କୁ ଜଣେ ଉଗ୍ର ହିନ୍ଦୁତ୍ଵବାଦୀ ନେତା ଭାବରେ ଓଡିଶାର ଗଣମାଧ୍ୟମ ଚିତ୍ରିତ କରୁଥିଲା। ଏବେ ହଠାତ ତାଙ୍କୁ ସନ୍ଥ ଓ ମହାତ୍ମାର ସ୍ତରକୁ ଉନ୍ନୀତ କରିବାର ଉଦ୍ୟମ ଚାଲିଛି। ଏହି ଉଦ୍ୟମର ଦୁଇଟି ରାଜନୈତିକ ଉଦ୍ଦେଶ୍ୟ ରହିଛି। ପ୍ରଥମରେ ଏହା ଦ୍ଵାରା ନବୀନ ପଟ୍ଟନାୟକଙ୍କ ଏକ ବିକଳ୍ପ ନିର୍ମାଣ ଓ ଦ୍ବିତୀୟରେ ରାଜ୍ୟ ରାଜନୀତିରୁ ଧର୍ମେନ୍ଦ୍ରଙ୍କ ଅପସାରଣ। ଧର୍ମେନ୍ଦ୍ରଙ୍କୁ ଜାତୀୟ ରାଜନୀତିରେ ଉପଯୋଗ କରି ଓଡିଶାରେ ପ୍ରତାପ ଷଡଙ୍ଗୀଙ୍କୁ ସର୍ବଜନ ଗ୍ରହଣୀୟ କରିବାର ଯୋଜନାବଦ୍ଧ ଉଦ୍ୟମ ନିର୍ବାଚନ ପରେ ପରେ ହିଁ ଆରମ୍ଭ ହୋଇଛି। ନିର୍ବାଚନ ସମୟରୁ ହିଁ ଓଡିଶାରେ ଧର୍ମେନ୍ଦ୍ରଙ୍କ ନେତୃତ୍ଵ ସଫଳ ହେବ ନାହିଁ ବୋଲି ବିଜେପି ନେତୃତ୍ଵ ଜାଣି ସାରିଥିଲେ। ତେଣୁ ତାଙ୍କର ବିକଳ୍ପ ଭାବରେ କେତେବେଳେ ଅପରାଜିତା ଷଡଙ୍ଗୀ ତ ପୁଣି କେବେ ବୈଜୟନ୍ତ ପଣ୍ଡାଙ୍କ ନାଁ ଚର୍ଚ୍ଚାକୁ ଆସୁଥିଲା। ତେବେ ଏ ଦୁହେଁ ସଂଘ ବିଚାର ଓ ହିନ୍ଦୁତ୍ଵ ରାଜନୀତିରୁ ଆସିନଥିବାରୁ ପ୍ରତାପ ହିଁ ପରିଶେଷରେ ଧର୍ମେନ୍ଦ୍ରଙ୍କ ବିକଳ୍ପ ଭାବରେ ବିଜେପି ଶୀର୍ଷ ନେତୃତ୍ବର ସମର୍ଥନ ପାଇଛନ୍ତି।
ନିର୍ବାଚନ ହେବାକୁ ଆଉ ଅଳ୍ପ ସମୟ। ପ୍ରଥମ ପର୍ଯ୍ୟାୟ ନିର୍ବାଚନ ଆସନ୍ତା ୧୧ ତାରିଖରୁ ଆରମ୍ଭ ହେବାକୁ ଯାଉଛି। ପ୍ରତ୍ୟେକ ଦଳ ନିଜର ରଣନୀତି ପ୍ରସ୍ତୁତ କରିସାରି ରଣାଙ୍ଗନକୁ ଓହ୍ଲାଇଲେଣି। ଏବେ ଓଡ଼ିଶାରେ ରାଜନୀତି ପରିବେଶ ବେଶ୍ ଉଷ୍ମ। ଓଡ଼ିଶା ରାଜନୀତିରେ ବିଜେଡ଼ି, ବିଜେପି ଓ କଂଗ୍ରେସ ମଧ୍ୟରେ ଜୋର୍ସୋର୍ରେ ଚାଲିଛି ରାଜନୀତି ପ୍ରତିଦ୍ବନ୍ଦ୍ବିତା। ଉଭୟ ଉଭୟଙ୍କୁ ଟାର୍ଗେଟ୍ କରିବା ସହ ଆରୋପ ପ୍ରତ୍ୟାରୋପ ଜୋର୍ସୋର୍ ଚାଲିଛି। ତେବେ ଏହି କ୍ଷେତ୍ରରେ ଶାସକ ବିଜେଡ଼ି ଓ ବିଜେପି ବେଶ୍ ଚର୍ଚ୍ଚାରେ ରହିଛନ୍ତି। ରାଜ୍ୟର ବିଭିନ୍ନ ପ୍ରସଙ୍ଗରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରାୟ ସବୁସମୟରେ ବିଜେଡ଼ିକୁ ଘେରୁଥିବାବେଳେ ଆଜି ବିଜେଡ଼ି ମୁଖପାତ୍ର ସସ୍ମିତ ପାତ୍ର ଧର୍ମେନ୍ଦ୍ରଙ୍କୁ ଟାର୍ଗେଟ କରିଛନ୍ତି। ଓଡ଼ିଶା ପାଇଁ ବିଜେପି ପ୍ରାୟ ସମସ୍ତ ପ୍ରାର୍ଥୀ ତାଲିକା ଘୋଷଣା କରିସାରିଥିବାବେଳେ ଧର୍ମେନ୍ଦ୍ର ପ୍ରଧାନଙ୍କ ନାଁ ଏପର୍ଯ୍ୟନ୍ତ ଘୋଷଣା କରାଯାଇନାହିଁ। ଏହି ପରିପ୍ରେକ୍ଷୀରେ ସସ୍ମିତ ପାତ୍ର ତାଙ୍କୁ ଆଜି ଘେରିଛନ୍ତି। ସେ କହିଛନ୍ତି ଯେ, ଧର୍ମେନ୍ଦ୍ର ବାବୁ ଡରୁଛନ୍ତି, ଓଡ଼ିଶାର ହାରିଯିବାର ଭୟ ତାଙ୍କୁ ନିର୍ବାଚନ ରଣାଙ୍ଗନକୁ ଓହ୍ଲାଇବାକୁ ଦେଉନାହିଁ। ୨୦୦୦, ୨୦୦୪ରେ ନବୀନ ବାବୁଙ୍କ ହାତ ଧରି ଲଢ଼ିଥିଲେ, ୨୦୧୪ରେ ଓଡ଼ିଶାରୁ ନିର୍ବାଚନ ଲଢ଼ି ନଥିଲେ। ଚଳିତ ଥର ମଧ୍ୟ ପ୍ରାର୍ଥୀ ତାଲିକାରେ ତାଙ୍କର ନା ନାହିଁ, ନିର୍ବାଚନ ଲଢ଼ିଲେ ଧର୍ମେନ୍ଦ୍ର ପ୍ରଧାନ ହାରିଯିବେ। ଏବଂ ସାଂସଦ ପଦ ମଧ୍ୟ ପଳାଇବ ବୋଲି କହିଛନ୍ତି ସସ୍ମିତ। ଯଦି ଧର୍ମେନ୍ଦ୍ରଙ୍କ ସତ୍ସାହସ ଅଛି ନିର୍ବାଚନ ଲଢ଼ନ୍ତୁ, ପଛୁଆ ରାଜନୀତି କଲେ ଚଳିବ ନାହିଁ କହିଛନ୍ତି ବିଜେଡ଼ି ମୁଖପାତ୍ର ସସ୍ମିତ ପାତ୍ର।
ପ୍ରାୟ ସମସ୍ତ ଦଳ ନିଜର ପ୍ରାର୍ଥୀ ତାଲିକା ପ୍ରକାଶ କରିସାରିବା ପରେ ଓଡିଶାରେ ଦଳବଦଳ ଓ କାଦୁଅ ଫିଙ୍ଗା ରାଜନୀତି ଜୋର୍ସୋର୍ରେ ଚାଲିଛି। ଟିକେଟ୍ ପାଇନଥିବା ଆଶାୟୀ ପ୍ରାର୍ଥୀମାନେ ଦଳ ବଳଦ କରୁଛନ୍ତି ତ ପୁଣି କେତେକ ଦଳରୁ ଇସ୍ତଫା ପ୍ରଦାନ କରୁଛନ୍ତି। ଗତକାଲି ବିଜେପିରୁ ଇସ୍ତଫା ପ୍ରଦାନ କରିଥିବା ଉପସଭାପତି ରାଜକିଶୋର ଦାଶ ଆଜି ନିଜର କ୍ଷୋଭ ପ୍ରକାଶ କରିଛନ୍ତି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ କଡା ସମାଲୋଚନା କରି ଔରଙ୍ଗଜେବଙ୍କ ସହିତ ତୁଳନା କରିଛନ୍ତି ରାଜକିଶୋର। ସ୍ବାର୍ଥ ପାଇଁ ବରିଷ୍ଠଙ୍କୁ ଧର୍ମନ୍ଦ୍ରେ ହତ୍ୟା କରୁଛନ୍ତି କହିବା ସହିତ ତାଙ୍କୁ ଗୁଣ୍ଡା ଲଗାଇ ହଇରାଣ କରାଯାଉଥିବା ନେଇ ଅଭିଯୋଗ କରିଛନ୍ତି। ରାଜକିଶୋର ବହୁ ସମୟ ଧରି ମୟୂରଭଞ୍ଜରେ ବିଜେପି ପାଇଁ କାର୍ଯ୍ୟ କରିଥିବାବେଳେ ସେ ମୟୂରଭଞ୍ଜର ମୋରଣା ଆସନ ପାଇଁ ଆଶାୟୀ ଥିଲେ। ସେ ଦଳର ପ୍ରାଥମିକ ସଦସ୍ୟ ପଦରୁ ମଧ୍ୟ ଇସ୍ତଫା ଦେଇଛନ୍ତି। ସେ ତାଙ୍କ ଇସ୍ତଫା ପତ୍ର ବିଜେପି ରାଜ୍ୟ ସଭାପତି ବସନ୍ତ ପଣ୍ଡାଙ୍କ ନିକଟକୁ ପଠାଇଦେଇଛନ୍ତି। ସେ ୪୦ ବର୍ଷ ଆରଏସ୍ଏସ୍ର ସଦସ୍ୟ ରହିଛନ୍ତି ଏବଂ ଆଜୀବନ ସେ ଆରଏସ୍ଏସ୍ ସଦସ୍ୟ ରହିବେ ବୋଲି ଶ୍ରୀ ଦାଶ କହିଛନ୍ତି। ସେହିପରି ଗତକାଲି ବିଜେପିର ବରିଷ୍ଠ ନେତା ଦୁର୍ଯ୍ୟାଧନ ମାଝୀ ଟିକେଟ ନ ପାଇବାରୁ କ୍ଷୋଭ ପ୍ରକାଶ କରି ଇସ୍ତଫା ପ୍ରଦାନ କରିଛନ୍ତି।