ରିଲାଏନ୍ସ ଇଣ୍ଡଷ୍ଟ୍ରିଜ୍ର ସହଯୋଗୀ କମ୍ପାନୀ ରିଲାଏନ୍ସ ଜିଓ ହାପ୍ଟିକ୍ର ୮୭ ପ୍ରତିଶତ ଅଂଶଧନ କ୍ରୟ କରିଛି। ୭୦୦ କୋଟି ମୂଲ୍ୟରେ କମ୍ପାନୀ ଏହି ୮୭ ପ୍ରତିଶତ ଅଂଶଧନ କିଣିଥିବା ବେଳେ ପ୍ରାରମ୍ଭିକ ଭାବରେ ହାପ୍ଟିକକୁ ୨୩୦ କୋଟି ପ୍ରଦାନ କରିଛି ଜିଓ। ବଳକା ୪୭୦ କୋଟିର ଅର୍ଥରାଶି ଆସନ୍ତା ୫ ବର୍ଷ ମଧ୍ୟରେ ପ୍ରଦାନ କରାଯିବ ବୋଲି ଜଣାପଡିଛି। କମ୍ପାନୀର ବଳକା ୧୩ ପ୍ରତିଶତ ଅଂଶଧନ କମ୍ପାନୀର ପ୍ରତିଷ୍ଠାତା ଅକ୍ରିତ୍ ବୈଶ ଏବଂ କିଛି କର୍ମଚାରୀଙ୍କ ନିକଟରେ ରହିବ। ଏହି କମ୍ପାନୀ ଅଧିଗ୍ରହଣ ପରେ ଖୁବ୍ଶୀଘ୍ର ଜିଓ ନିଜର ସ୍ବତନ୍ତ୍ର ଆପ୍ର ଲଞ୍ଚ କରିବ ବୋଲି ଜିଓର ନିର୍ଦ୍ଦେଶକ ଆକାଶ ଅମ୍ବାନୀ କହିଛନ୍ତି। ସ୍ବଦେଶୀ ବୈଷୟିକ କୌଶଳ ବ୍ୟବହାର କରି ଆମାଜନ୍ର ଆଲେକ୍ସା କିମ୍ବା ଆପଲ୍ର ସିରି ପରି ଏହି ଆପ୍ ହେବ ଯେଉଁଥିରେ କି ବିଭିନ୍ନ ଭାରତୀୟ ଭାଷା ଅନ୍ତର୍ଭୁକ୍ତ ରହିବ ବୋଲି ଶ୍ରୀ ଅମ୍ବାନୀ ପ୍ରକାଶ କରିଛନ୍ତି। ବିଗତ ଦୁଇ ମାସ ମଧ୍ୟରେ ରିଲାଏନ୍ସ ଜିଓର ଏହା ଷଷ୍ଠ ଷ୍ଟାର୍ଟଅପ୍ ଅଧିଗ୍ରହଣ। ୨୦୧୭-୧୮ ଆର୍ଥିକ ବର୍ଷରେ ହାପ୍ଟିକ୍ର ଆୟ ୪.୬ କୋଟି ରହିଥିଲା ଏବଂ କମ୍ପାନୀ ୨୨.୫ କୋଟିର କ୍ଷତି ସହିଥିଲା।
