ନୂଆଦିଲ୍ଲୀ: ଆଜି ଦେଶର ପ୍ରମୁଖ ଶିଳ୍ପପତି ତଥା ଶିଳ୍ପ ସଂସ୍ଥା ସଂଘ ଫିକି ର ସଭାପତି ଭାବେ ଦାୟିତ୍ବ ନେଲେ ଓଡିଆ ଶିଳ୍ପପତି ଶୁଭ୍ରକାନ୍ତ ପଣ୍ଡା। ସେ ହେଉଛନ୍ତି ପ୍ରଥମ ଓଡିଆ, ଯେ କି ଦେଶର ପ୍ରମୁଖ ଶିଳ୍ପ ସଂସ୍ଥା ସଂଘର ମୁଖ୍ୟ ଭାବେ ଦାୟିତ୍ବ ଗ୍ରହଣ କରିଛନ୍ତି।
ଫିକି ବା Federation of Indian Chambers of Commerce and Industry ହେଉଛି ଦେଶର ଏକ ପ୍ରମୁଖ ଶିଳ୍ପ ସଂସ୍ଥା ଯେଉଁଥିରେ ଦେଶର ବହୁ ଶିଳ୍ପପତି ସଭ୍ୟ ଅଛନ୍ତି। ନିକଟରେ ଓଡିଶାରେ ଆୟୋଜିତ ହୋଇଥିବା ମେକ ଇନ ଓଡିଶାର ସମସ୍ତ ଦାୟିତ୍ବ ଫିକି ଇଣ୍ଡିଆ ଗ୍ରହଣ କରିଥିଲା। ଶୁଭ୍ରକାନ୍ତ ବର୍ତ୍ତମାନ ଫେରୋ ଆଲାଇସ୍ କଂପାନୀ ଇମ୍ଫା ର ପରିଚାଳନା ନିର୍ଦ୍ଦେଶକ ଅଛନ୍ତି।
ପୂର୍ବରୁ ଶୁଭ୍ରକାନ୍ତ ଫିକିର ବରିଷ୍ଠ ଉପସଭାପତି ଭାବେ କାର୍ଯ୍ୟ କରୁଥିଲେ। ଶୁଭ୍ରକାନ୍ତ ବହୁ ବର୍ଷ ଧରି ଫିକି ସହିତ ଜଡିତ ଅଛନ୍ତି। ସେ ଫିକି ଓଡିଶା ଚ୍ୟାପଟରର ଅଧ୍ୟକ୍ଷ ଭାବେ ମଧ୍ୟ କାର୍ଯ୍ୟ କରିଥିଲେ। ଫିକି କାର୍ଯ୍ୟକାଳ ମଧ୍ୟରେ ଶୁଭ୍ରକାନ୍ତ ଦେଶର ଶିଳ୍ପ ଜଗତର ସମୃଦ୍ଧି ପାଇଁ ବେଶ କିଛି କାର୍ଯ୍ୟ କରିଛନ୍ତି।
ଦାୟିତ୍ବ ଗ୍ରହଣ କରିବା ପରେ ସେ କହିଛନ୍ତି ଯେ, ଫିକିର ଏକ ସ୍ଲୋଗାନ ରହିଛି ତାହା ହେଲା voice of India’s business and industry and accordingly. ତାହାକୁ ଧ୍ୟାନରେ ରଖି କାର୍ଯ୍ୟ କରିବାକୁ ପଡିବ। ସେହିପରି ଓଡିଶାର ଶିଳ୍ପ ସମୃଦ୍ଧ ପାଇଁ ଫିକି ସ୍ବତନ୍ତ୍ର ଧ୍ୟାନ ଦେବ। ମୋର ପୂର୍ବାଞ୍ଚଳ ଏବଂ ଏମଏସଏମଇ ମୁଖ୍ୟ ଫୋକସ ରହିବ ବୋଲି ଶୁଭ୍ରକାନ୍ତ କହିଛନ୍ତି। ଆସନ୍ତା ବର୍ଷ ଠାରୁ ଓଡିଶା ପ୍ରତି ମୋର ସ୍ବତନ୍ତ୍ର ଧ୍ୟାନ ରହିବ ବୋଲି ସେ କହିଛନ୍ତି।
ଶୁଭ୍ରକାନ୍ତ ବୋଷ୍ଟନ ବିଶ୍ବବିଦ୍ୟାଳୟର କ୍ୟୁଷ୍ଟର୍ମ ସ୍କୁଲ ଅଫ ବିଜେନେସରୁ ଗ୍ରାଜୁଏସନ କରିଛନ୍ତି। ଏଥିରେ ଶୁଭ୍ରକାନ୍ତ ଉଭୟ ମ୍ୟାନେଜମେଣ୍ଟ ଏବଂ ଆର୍ଥିକ ପରିଚାଳନା ଉପରେ ଶିକ୍ଷାଲାଭ କରିଛନ୍ତି। ଏହାପରେ ସେ ନିଜ ସଂସ୍ଥା ଇମ୍ଫାର ବିଭିନ୍ନ ପଦପଦବୀରେ ସଫଳତାର ସହ କାର୍ଯ୍ୟ କରିଛନ୍ତି।