ନୂଆଦିଲ୍ଲୀ : ରାଜଧାନୀ ଦିଲ୍ଲୀରେ କରୋନାର ମାମଲା ବଢିବାରେ ଲାଗିଛି । ଦିଲ୍ଲୀ ଉପ ରାଜ୍ୟପାଳ ଅନୀଲ୍ ବୈଜଲ୍ଙ୍କ ବାସଭବନରେ ଚାରିଜଣଙ୍କଠାରେ କରୋନା ପଜିଟିଭ୍ ଚିହ୍ନଟ ହୋଇଛି । ଶୁକ୍ରବାର ଦିନ ଏନେଇ ସୂଚନା ମିଳିଛି। ଏଠାରେ ଚାରି କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏହି ଚାରି ଆକ୍ରାନ୍ତଙ୍କ ମଧ୍ୟରୁ ତିନି ଜଣ ଅଫିସ୍ରେ କିରାଣୀ ଭାବେ କାର୍ଯ୍ୟ କରୁଥିବାବେଳେ ଜଣେ ସଫାଇ କର୍ମଚାରୀ ରହିଛନ୍ତି । ରାଜ ଭବନରୁ ଚାରି ଜଣ ଆକ୍ରାନ୍ତ ଚିହ୍ନଟ ହେବା ପରେ ଏବେ ସମସ୍ତଙ୍କୁ ସ୍କାନରରେ ରଖାଯାଇଛି । ଚିହ୍ନଟ ହୋଇଥିବା ଚାରି ଆକ୍ରାନ୍ତଙ୍କ ଯାତ୍ରା ବିବରଣୀ ଖୋଜାଚାଲିଛି । ଏହାପରେ ଉପରାଜ୍ୟପାଳଙ୍କ ଅଫିସ୍ରେ ସମସ୍ତ କର୍ମଚାରୀଙ୍କ କରୋନା ଟେଷ୍ଟ କରାଯିବ ।
ଏତଦ୍ବ୍ୟତୀତ ଦିଲ୍ଲୀର ମେୟର ହାଉସ୍ରେ ସିକ୍ୟୁରିଟି ଗାର୍ଡ ମଧ୍ୟ କରୋନାରେ ଆକ୍ରାନ୍ତ ହୋଇଥିବାର ସୂଚନା ରହିଛି । ଏହା ପରେ ନର୍ଥ ଏମ୍ସିଡି ମେୟର ଅବତାର ସିଂଙ୍କ ସମେତ 21 ଜଣ କର୍ମଚାରୀଙ୍କୁ ହୋମ୍ କ୍ବାରେଣ୍ଟାଇନ୍ କରାଯାଇଛି ।
ସୂଚନାଯୋଗ୍ୟ, ଦିଲ୍ଲୀରେ କରୋନା ଯୋଗୁଁ 398ଜଣଙ୍କ ମୃତ୍ୟୁ ହୋଇଛି । ଦିଲ୍ଲୀରେ ଲକ୍ଡାଉନ୍ 4ରେ କୋହଳ କଟକଣା ଯୋଗୁଁ ମାମଲା ବେଶ୍ ବଢିବାରେ ଲାଗିଛି । ଦିଲ୍ଲୀରେ ଏବେ ସଂକ୍ରମିତଙ୍କ ସଂଖ୍ୟା 16,281 ରହିଛି । (ଏଜେନ୍ସି)