Tag: PanchayatElection

ଭୁବନେଶ୍ୱର : ଦୁଇ ଶାସକ ଦଳ ବ୍ୟାପକ ଭାବେ ନିର୍ବାଚନ ଆଚରଣବିଧି ଉଲଙ୍ଘନ କରୁଥିବା ବେଳେ, ରାଜ୍ୟ ନିର୍ବାଚନ ଆୟୋଗ ସେମାନଙ୍କ ଉପରେ ଦୃଢ କାର୍ଯ୍ୟାନୁଷ୍ଠଶନ ଗ୍ରହଣ କରିବାରେ ବିଫଳ ହୋଇଛନ୍ତି ବୋଲି ଜଟଣୀ ବିଧାୟକ ପ୍ରଦେଶ କଂଗ୍ରେସ କାର୍ଯ୍ୟାଳୟରେ ଏକ ସାମ୍ବାଦିକ ସମ୍ମିଳନୀରେ କ୍ଷୋଭ ପ୍ରକାଶ କରିଛନ୍ତି ।

ଶ୍ରୀ ରାଉତରାୟ କହିଛନ୍ତି ଯେ, ଜଟଣୀ, ଖୋର୍ଦ୍ଧାଜିଲ୍ଲା ଏବଂ ରାଜ୍ୟର ଅନ୍ୟ ଅଞ୍ଚଳକୁ ନିର୍ବାଚନ ପ୍ରଚାର ପାଇଁ ଘନଘନ ଗସ୍ତ କରୁଛନ୍ତି । ସେ ସେଠାରେ ବିଜେଡ଼ି, ବିଜେପି ଦଳର ଆଚରଣ ବିଧିର ଖୋଲା ଉଲଙ୍ଘନ ପ୍ରତ୍ୟକ୍ଷ ଭାବରେ ଦେଖୁଛନ୍ତି । ବିଜେଡ଼ି, ବିଜେପି ଦଳର ପୂର୍ବତନ ସାଂସଦ, ପୂର୍ବତନ ବିଧାୟକ, ବିଧାୟକ, ସାଂସଦ, ମନ୍ତ୍ରୀ ଓ ଦଳୀୟ ପଦାଧିକାରୀମାନେ ଟଙ୍କାଥଳି ଧରି ବୁଲୁଛନ୍ତି । ଚାରିଆଡ଼େ ମଦ, ମାଂସର ଆସର ଚାଲିଥିଲା ବେଳେ, ପୁଲିସ୍ ନୀରବଦ୍ରଷ୍ଟା ।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କୁଶାସନ ପାଇଁ ଜନପ୍ରିୟତା ହରାଇଛନ୍ତି । ଏଣୁ ସାଧାରଣ ଲୋକଙ୍କୁ ଅର୍ଥ ବଳରେ କିଣିବା ପାଇଁ ଶାସକ ଦଳ ଆପ୍ରାଣ ଉଦ୍ୟମ କରୁଛି । ସାଧାରଣ ଭୋଟରଙ୍କ ଉପରେ ପୋଲିସ୍ ମାଧ୍ୟମରେ ମିଥ୍ୟା ମୋକଦ୍ଦମା ରୁଜୁର ଧମକ ଦିଆଯାଉଛି । ଶାସକ ଦଳର ଗୁଣ୍ଡାମାନେ ବିଭିନ୍ନ ସ୍ଥାନରେ ଆତଙ୍କରାଜ ଚଳାଇଛନ୍ତି । ମାତ୍ର ନିର୍ବାଚନ ଆୟୋଗ ଓ ପୋଲିସ୍ ନୀରବଦ୍ରଷ୍ଟା ସାଜିଛନ୍ତି ।

ବିଜେଡ଼ି ଦଳୀୟ ବିଧାୟକ ଓ ପଦାଧିକାରୀମାନେ ଭୋଟନଦେଲେ ଭତ୍ତା କାଟିଦେବା, ରାସନକାର୍ଡ଼ କାଟି ଦେବାକୁ ଧମକ ଦେଇଛନ୍ତି । ଅନେକ ସ୍ଥାନରେ ରାସନକାର୍ଡ଼ର ଆବେଦନ ଫର୍ମ, ବାର୍ଦ୍ଧକ୍ୟ ଭତ୍ତା, ବିଧବା ଭତ୍ତାର ଫର୍ମ ପୂରଣ କରାଇ ଭୋଟ ଦେବାକୁ ପ୍ରଲୋଭନ ଦେଖାଉଛନ୍ତି । ପ୍ରଧାନମନ୍ତ୍ରୀ ଆବାସ, ବିଜୁ କୁୁଡ଼ିଆର ଥୋପ ଦେଖାଇ ଭୋଟ ହାତେଇବାକୁ ଉଦ୍ୟମ କରୁଛନ୍ତି ।

ବିଶେଷକରି ଶାସକ ଦଳ ପକ୍ଷରୁ ଏହି ପଞ୍ଚାୟତ ନିର୍ବାଚନରେ ଜୟଦେବ ନିର୍ବାଚନ ମଣ୍ଡଳୀରେ ବାଲିମାଫିଆ, ଖୋର୍ଦ୍ଧାର ପଥରମାଫିଆ, ନିଶା ମାଫିଆ ଏବଂ କୁଖ୍ୟାତ ଅପରାଧିମାନଙ୍କ ପ୍ରତ୍ୟକ୍ଷ ସହଯୋଗରେ ନିର୍ବାଚନ ଲଢାଯାଉଛି । ନବୀନ ବାବୁ ରାଜ୍ୟରେ ଅବାଧ ଓ ମୁକ୍ତ ନିର୍ବାଚନ କରାଇ ଦେଉନାହାଁନ୍ତି । ଆମ୍ଭେମାନେ ଉଚ୍ଚଶିକ୍ଷିତ, ଡ଼ାକ୍ତର, ଇଞ୍ଜିନିୟର, ଖେଳାଳୀ ଓ ଶିକ୍ଷାବିତ୍‌ଙ୍କୁ ପ୍ରାର୍ଥୀ କରିଛୁ । ମାତ୍ର ଶାସକଦଳ ପକ୍ଷରୁ କେବଳ ଅସତ୍ ଉପାୟରେ ଧନ ଅର୍ଜନ କରିଥିବା ବହୁତ ଲୋକଙ୍କୁ ନିର୍ବାଚନରେ ଲଢାଯାଇଛି ।

ଗତକାଲି ମତଦାନ ସମୟରେ ଝାରସୁଗୁଡ଼ା, କୃଷ୍ଣପ୍ରସାଦ, ବ୍ରହ୍ମଗିରି, କଣାସ ବ୍ଲକ ଏବଂ ରାଜ୍ୟର ବିଭିନ୍ନ ସ୍ଥାନରେ ଶାସକ ଦଳ ଭୋଟ ଅପହରଣ କରିବାକୁ ବୋମାମାଡ଼, ଫାର୍ସାମାଡ଼ ଆଦି ହିଂସାକାଣ୍ଡ ଭିଆଇବା ଘଟଣାରୁ ସ୍ପଷ୍ଟ ହେଉଛି ଯେ, ମୁଖ୍ୟମନ୍ତ୍ରୀ ଏ ରାଜ୍ୟରେ ଗଣତନ୍ତ୍ରକୁ କ୍ରମାଗତ ଭାବେ ହତ୍ୟା କରିି ଚାଲିଛନ୍ତି ।

ର‌୍ୟାଲି ଓ ମିଟିଂରେ ନିର୍ବାଚନ ଆୟୋଗ ଧାର୍ଯ୍ୟ କରିଥିବା ଜନଗହଳିରୁ ଶାସକ ଦଳ ୧୦୦ଗୁଣା ଲୋକ ଜମା କରୁଥିବା ବେଳେ ତାଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ହେଉନି । ଏ ନେଇ ଶ୍ରୀ ରାଉତରାୟ ନିର୍ବାଚନ ଆୟୋଗଙ୍କୁ ଆଚରଣବିଧି ଉଲଙ୍ଘନକାରୀଙ୍କ ଉପରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ନିବେଦନ କରିଛନ୍ତି ।

ପରିଶେଷରେ ଗତକାଲି ମତଦାନ ସମୟରେ ଓଡ଼ିଶାରେ ଦୁଇଜଣ ଗଣମାଧ୍ୟମର ବରିଷ୍ଠ ସାମ୍ବାଦିକଙ୍କୁ ଶ୍ରୀ ସୁମନ୍ତ ସୁନ୍ଦରାୟ ଓ ଶ୍ରୀ ସରୋଜ ମଲ୍ଲିକଙ୍କ ଯେଉଁଭଳି ଭାବରେ ମରଣାନ୍ତକ ଆକ୍ରମଣ କରାଗଲା ସେଥିପ୍ରତି ଶ୍ରୀ ରାଉତରାୟ ଦୃଢ ନିନ୍ଦା କରିଛନ୍ତି । ଆକ୍ରମଣକାରୀଙ୍କ ଉପରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।

ଅନ୍ୟ ପକ୍ଷରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନବୀନ ନିବାସକୁ ଲାଗି ଯେଉଁ ୩ ଏକର ଜାଗାରେ ପଞ୍ଚତାରକା ହୋଟେଲ ଗଢା ଚାଲିଥିଲା, ସେ ଜାଗା ଲିଙ୍ଗରାଜ ମହାପ୍ରଭୁଙ୍କର ହୋଇଥିବାର ଜଣାପଡ଼ିବା ପରେ ମାନ୍ୟବର ସୁପ୍ରିମକୋର୍ଟ ସେଥିରେ ହସ୍ତକ୍ଷେପ କରି ଏକର ପିଛା ୮କୋଟି ଟଙ୍କା ଦାଖଲ କରି ଜାଗା ନେବାକୁ ରାୟ ଦେଇଥିବା ବେଳେ ଏ ରାୟର ପୁନର୍ବିଚାର କରି ଲିଙ୍ଗରାଜଙ୍କ ଜମି ବିକ୍ରି ନହେବା ପାଇଁ ସୁପ୍ରିମ କୋର୍ଟରେ ଆବେଦନ କରାଯିବା ପାଇଁ ଶ୍ରୀ ରାଉତରାୟ କହିଥିଲେ ।

ଆଜି ଜଟଣୀ ଜଣେ ପ୍ରସିଦ୍ଧ ବ୍ୟବସାୟୀ ଶ୍ରୀ ଅନାଥ ପଟ୍ଟନାୟକ ଏହି ସାମ୍ବାଦିକ ସମ୍ମିଳନୀରେ କଂଗ୍ରେସରେ ଯୋଗ ଦେଇଥିଲେ । ଏହି ସାମ୍ବାଦିକ ସମ୍ମିଳନୀରେ ମନୋରଞ୍ଜନ ଦାଶ, ଚିନ୍ମୟ ସୁନ୍ଦର ଦାସ, ଲିଙ୍ଗରାଜ ସାହୁ, ରମେଶ ମହାପାତ୍ର, ମୋହନ ଜେନା ଓ ମିହିର ଆଚାର୍ଯ୍ୟ ପ୍ରମୁଖ ଅଂଶଗ୍ରହଣ କରିଥିଲେ ।

ଭୁବନେଶ୍ବର: ଶୁକ୍ରବାର ଦିନ ହେବ ଓଡିଶା ପଞ୍ଚାୟତ ନିର୍ବାଚନର 2ୟ ପର୍ଯ୍ୟାୟ ଭୋଟ ଗ୍ରହଣ। ତେବେ ଏଥର କୋଭିଡ-୧୯ ଗାଇଡ ଲାଇନ ଅନୁସାରେ ଭୋଟ ଗ୍ରହଣ ହେବ। ସେଥିପାଇଁ ରାଜ୍ୟ ନିର୍ବାଚନ କମିଶନର କେତେକ ନିର୍ଦ୍ଦେଶନାମା ଜାରୀ କରିଛନ୍ତି। ଭୋଟ ଗ୍ରହଣ କେନ୍ଦ୍ରକୁ ଯିବା ପୂର୍ବରୁ ଏହା ଉପରେ ନଜର ପକାଇବା ନିହାତି ଜରୁୁରୀ ଅଟେ। ସେଗୁଡିକ ହେଲା

୧- ଭୋଟ ଗ୍ରହଣ କେନ୍ଦ୍ରକୁ ଯିବା ପୂର୍ବରୁ ମୁହଁରେ ନିଶ୍ଚିତ ମାସ୍କ ପିନ୍ଧିବା ଆବଶ୍ୟକ। ଏଥିସହିତ ଲାଇନରେ ଛିଡା ହେଲେ ଶାରିରୀକ ଦୂରତା ବଜାଇ ରଖିବା ଜରୁରୀ। ସେଠାରେ ମୁତୟନ ପୋଲିସ କର୍ମଚାରୀ ଏହାର ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି। ତେବେ ଯେଉଁମାନେ ମାସ୍କ ଆଣି ନ ଥିବେ ସେମାନଙ୍କୁ ମାସ୍କ ପ୍ରଦାନ କରିବାର ବ୍ୟବସ୍ଥା ମଧ୍ୟ କରାଯାଇଛି।

୨- ବୁଥ ପ୍ରବେଶ ଦ୍ବାରରେ ସାଇନଟାଇଜର ରଖାଯାଇଥିବ। ତାହାକୁ ଲଗାଇ ହାତ ସାଇନଟାଇଜେସନ କରିବାକୁ ପଡିବ।  ଯଦି ପୁଲିଂ ଅଫିସର ଚିହ୍ନଟ ପାଇଁ ଚାହିଁବେ ତେବେ ଭୋଟର ମାସ୍କକୁ ଖସାଇବା ପାଇଁ ଅନୁମତି ପ୍ରଦାନ କରାଯାଇଛି।

୩- ବୁଥ ଭିତରେ ଆପଣଙ୍କ ହାତରେ କାଳି ଲଗାଇବା ପାଇଁ ପୁଲିଂ ଅଫିସରଙ୍କୁ କେତେକ ଗାଇଡ ଲାଇନ ଜାରୀ କରାଯାଇଛି। ସେଥିରେ ଭୋଟରଙ୍କୁ ସ୍ପର୍ଷ ନ କରି ତାଙ୍କ ହାତରେ କାଳି ଲଗାଇବାକୁ କୁହାଯାଇଛି। ଯଦି କେହି ହାତରେ ଗ୍ଲୋବ ପରିଧାନ କରିଛନ୍ତି, ତେବେ ସେ ଗ୍ଲୋବ ବାହାର କରି କାଳି ଲଗାଇବା ବାଧ୍ୟତାମୂଳକ କରାଯାଇଛି।

୪- ବୁଥରେ ଯଦି କୌଣସି କର୍ମଚାରୀଙ୍କ ଜ୍ବର ଦେଖାଦିଏ ତେବେ ସେଠାରେ ତୁରନ୍ତ ତାଙ୍କ ବଦଳରେ ଆଉ ଜଣଙ୍କୁ ନିଯୁକ୍ତି ଦିଆଯିବ। ଏଥିସହିତ ସ୍ଥାନୀୟ ସ୍ବାସ୍ଥ୍ୟ କର୍ମି ଆସି ତାଙ୍କର ସ୍ବାସ୍ଥ୍ୟ ଅବସ୍ଥା ତଦାରଖ କରିବା ପାଇଁ କୁହାଯାଇଛି।

୫- କୋଭିଡ ଆକ୍ରାନ୍ତଙ୍କୁ ମଧ୍ୟ ଭୋଟ ଦେବା ପାଇଁ ଅନୁମତି ପ୍ରଦାନ କରାଯାଇଛି। ତେବେ ସେମାନେ ଭୋଟ ଗ୍ରହଣର ଶେଷ ସମୟକୁ ଆସିବା ପାଇଁ କୁହାଯାଇଛି। ଏଥିରେ ସେ ସ୍ବାସ୍ଥ୍ୟ କର୍ମିଙ୍କ ତତ୍ବାବଧନାରେ ବୁଥ ଭିତରକୁ ପ୍ରବେଶ କରିବେ। ଏଥିସହିତ ସେ କୋଭିଡ ଗାଇଡ ଲାଇନ ଅନୁସାରେ ଆସିବାକୁ ନିର୍ଦ୍ଦେଶ ଦିଆଯାଇଛି।

୬- ପ୍ରତି ଭୋଟର ସେମାନଙ୍କ ପରିଚୟ ପତ୍ର ସାଙ୍ଗରେ ଆଣିବା ପାଇଁ କୁହାଯାଇଛି। ଏଥିରେ ଭୋଟର କାର୍ଡ କିମ୍ବା ଅନ୍ୟ ଯେ କୌଣସି ସରକାରଙ୍କ ସ୍ବକୃତି ପ୍ରାପ୍ତ ପରିଚୟ ପତ୍ର ଆଣିବା ଜରୁରୀ ଅଟେ।

୭- ସମସ୍ତ ବୁଥରେ ତିନୋଟି ଲାଇନ ହେବ। ପୁରୁଷ, ମହିଳା ଏବଂ ଭିନ୍ନକ୍ଷମ ପାଇଁ ଏକ ସ୍ବତନ୍ତ୍ର ଲାଇନ ହେବ। ଏହି ଲାଇନରେ ଶାରୀରିକ ଦୂରତା ବଜାଇ ରଖିବା ପାଇଁ କୁହାଯାଇଛି।

୮- ଯଦି ବୁଥ ଭିତରେ ଭୋଟର କିମ୍ବା କର୍ମଚାରୀଙ୍କ କୌଣସି ସାମାନ୍ୟ ଲକ୍ଷଣ ପରିଲକ୍ଷିତ ହୁଏ ତେବେ ସେଠାରେ ଥିବା ଏକ ସ୍ବତନ୍ତ୍ର ପ୍ରକୋଷ୍ଠକୁ ଯାଇ ବିଶ୍ରାମ କରିବେ। ସେଠାରେ ଥିବା ଭଲ୍ୟୁଣ୍ଟିୟରମାନେ ସ୍ବାସ୍ଥ୍ୟ କର୍ମିଙ୍କୁ ଖବର ଦେବା ପାଇଁ ନିର୍ଦ୍ଦେଶ ଦିଆଯାଇଛି।

ଭୁବନେଶ୍ୱର: ରାଜ୍ୟ ନିର୍ବାଚନ ଆୟୋଗ ପଂଚାୟତ ନିର୍ବାଚନ ପ୍ରଚାରର କଟକଣା କୋହଳପାଇଁ ଯେଉଁ ନିଷ୍ପତି ଗ୍ରହଣ କଲେ ତାହାକୁ କଂଗ୍ରେସ ଦଳ ସ୍ୱାଗତ କରେ କିନ୍ତୁ ୨ ଶାସକ ଦଳ ଦ୍ୱାରା ନିୟମ ଉଲ୍ଲଙ୍ଘନ ପ୍ରତି ନିର୍ବାଚନ ଆୟୋଗ ସଂପୂର୍ଣ୍ଣ ସର୍ତକ ନରହିବା ଏକ ଦୁଃଖଦାୟକ ଓ ପରିତାପର ବିଷୟ ବୋଲି ପିସିସି ସଭାପତି ନିରଞ୍ଜନ ପଟ୍ଟନାୟକ କହିଛନ୍ତି ।

କେନ୍ଦ୍ର ଓ ରାଜ୍ୟସରକାରରେ ଥିବା ବିଜେପି ଓ ବିଜେଡ଼ି ବ୍ୟାପକ ପରିମାଣରେ ଅର୍ଥ ବଳ ପ୍ରୟୋଗ କରିବା ସହ ବାହୁବଳ ତଥା ଶାସନ କଳର ଅପବ୍ୟବହାର କରିବା ଫଳରେ ନିର୍ବାଚନ ମୁକ୍ତ ଏବଂ ଅବାଧ ରହିପାରୁ ନାହିଁ । ନିର୍ବାଚନ ଆୟୋଗ ଶାସକ ଦଳର ଗତିବିଧି ପ୍ରତି ସତର୍କ ଦୃଷ୍ଟି ଦେଉ ନାହାନ୍ତି ।

କରୋନା ମହାମାରୀ ପାଇଁ ନିର୍ବାଚନ ଆୟୋଗ ପ୍ରଚାର ପାଇଁ ୫ଜଣଙ୍କୁ ନେଇ ଘରକୁ ଘର ପ୍ରଚାର ନିୟମ କରିଥିଲେ କିନ୍ତୁ ଶାସକ ଦଳ ଶହ ଶହ ଲୋକ ନେଇ ପ୍ରଚାର କରୁଛନ୍ତି । ସେମାନେ ଖୋଲାଖୋଲି ଆଚରଣବିଧି ଉଲଙ୍ଘନ କରୁଥିବା ବେଳେ ନିର୍ବାଚନ ଆୟୋଗ ନିରବଦ୍ରଷ୍ଟା ସାଜିଛନ୍ତି ।

ତେଣୁ ଗଣତନ୍ତ୍ରର ସୁରକ୍ଷା ଓ ଅବାଧ ଏବଂ ମୁକ୍ତ ନିର୍ବାଚନ କରିବାପାଇଁ ସବୁ ଦଳକୁ ସମାନ ଦୃଷ୍ଟିରେ ଦେଖିବା ସହ ଆଇନ ଉଲଙ୍ଘନଙ୍କକାରୀଙ୍କ ପ୍ରତି ଦୃଢ଼ କାର୍ଯ୍ୟାନୁଷ୍ଠାନ ନେବାପାଇଁ ଶ୍ରୀ ପଟ୍ଟନାୟକ ରାଜ୍ୟ ନିର୍ବାଚନ ଆୟୋଗଙ୍କୁ ଅନୁରୋଧ କରିଛନ୍ତି।