କଟକ: ରାଜ୍ୟରୁ ପୁଣି ଧରା ହୋଇଛି ନକଲି ସିମେଣ୍ଟ କାରଖାନା। ଏହା ସେହି କଟକ ଜଗତପୁର ଶିଳ୍ପାଞ୍ଚଳରୁ ଧରାଯାଇଛି। ଗତକାଲି କଟକ ପୋଲିସର ଏକ ଟିମ ଖବର ପାଇ ଚଢାଉ କରିଥିଲେ। ଏହି ଚଢାଉ ସମୟରେ ସେଠାରେ ବିଭିନ୍ନ ନାମିଦାମୀ କଂପାନୀର ଖାଲି ସିମେଣ୍ଟ ବସ୍ତା ଜବତ କରିଛନ୍ତି। ଏଥିସହିତ ସିମେଣ୍ଟ ମିଶ୍ରଣ ପାଇଁ ବ୍ୟବହାର କରାଯାଉଥିବା ବିଭିନ୍ନ ଉପକରଣ ମଧ୍ୟ ଜବତ କରିଛନ୍ତି।
ସୂଚନା ଅନୁସାରେ ଜଗତପୁରରେ ଦୀର୍ଘ ଦିନ ଧରି ମା ତାରିଣୀ କନଷ୍ଟ୍ରକସନ ନାମରେ ଏକ କଂପାନୀ ଅଛି। ହେଲେ ସେଠାରେ ସିମେଣ୍ଟ ଅପମିଶ୍ରଣ କରାଯାଉଛି ବୋଲି ପୋଲିସକୁ ଖବର ମିଲିଲା। ଏହାପରେ କଟକ ପୋଲିସ ସେଠାରେ ଚଢାଉ କରିଥିଲେ। ସେଠାରୁ ପୋଲିସ ଦୁଇ ଟ୍ରକ ନକଲି ସିମେଣ୍ଟ ଜବତ କରିଛି। ଏଥିସହିତ ଏହାର ମାଲିକ ବିଜୟ ମହାପାତ୍ରଙ୍କୁ ମଧ୍ୟ ପୋଲିସ ଅଟକ ରଖି ପଚରାଉଚୁରା କରୁଛି।
ପୋଲିସର କହିବା କଥା ଯେ, ଏମାନେ ଦୀର୍ଘଦିନ ଧରି କନଷ୍ଟ୍ରକସନ କଂପାନୀ ନାମରେ ଏହି ନକଲି ସିମେଣ୍ଟ ପ୍ରସ୍ତୁତ କରିଆସୁଥିଲେ। ସେମାନେ ବାହାର ରାଜ୍ୟକୁ ଟ୍ରକ ଟ୍ରକ ଏହି ନକଲି ସିମେଣ୍ଟ ପଠାଉଥିଲେ। ଏଥିପାଇଁ କଂପାନୀ ତରଫରୁ ବାହାର ରାଜ୍ୟରେ ବିଭିନ୍ନ ଏଜେଣ୍ଟକୁ ମଧ୍ୟ ନିଯୁକ୍ତି ଦିଆଯାଇଛି। ମୁଖ୍ୟତଃ ନାମିଦାମୀ କଂପାନୀ ବସ୍ତାରେ ଏହି ନକଲି ସିମେଣ୍ଟ ବିକ୍ରି ହେଉଥିବାରୁ ଗ୍ରାହକମାନେ ଜାଣିପାରନ୍ତି ନାହିଁ।
ତେବେ ସବୁଠାରୁ ଆଶ୍ଚର୍ଯ୍ୟର କଥା ହେଲା ସେମାନଙ୍କର ଏହି ନକଲି ସିମେଣ୍ଟ ପ୍ରସ୍ତୁତି ପ୍ରଣାଳୀ। ଏହି କଂପାନୀ ଏଜେଣ୍ଟମାନେ ବିଭିନ୍ନ ସିମେଣ୍ଟ ଗୋଦାମ କିମ୍ବା କନଷ୍ଟ୍ରକସନ କଂପାନୀ ସହିତ ଯୋଗାଯୋଗରେ ଅଛନ୍ତି। ସେମାନଙ୍କର ଗୋଟା ହୋଇଯାଇଥିବା କିମ୍ବା ପରିତ୍ୟକ୍ତ ହୋଇଥିବା ସିମେଣ୍ଟ ବସ୍ତାକୁ ଏମାନେ ମାଗଣା ନେଇ ଆସନ୍ତି।
ଏହି ଗୋଟା ସିମେଣ୍ଟକୁ ସେମାନେ ମେସିନ ସାହାଯ୍ୟରେ ଗୁଣ୍ଡ କରନ୍ତି। ଏହାପରେ ସେଥିରେ କିଛି ଅସଲି ସିମେଣ୍ଟ ମିଶ୍ରଣ କରନ୍ତି। ଏହି ମିଶ୍ରଣ ଏପରି ହୋଇଥାଏ ଯେ କୌଣସି ଗ୍ରାହକଙ୍କ ଘର ତିଆରି ବେଳେ ହଠାତ କିଛି ହେବ ନାହିଁ। ହେଲେ କେତେ ମାସ କିମ୍ବା ବର୍ଷ ପରେ ସେହି ଘରେ କିମ୍ବା ନିର୍ମାଣ କାର୍ଯ୍ୟରେ ଫାଟ ଦେଖାଦେବ।
ତେବେ ଏମାନଙ୍କର ବିକ୍ରି କୌଶଳ ମଧ୍ୟ ଭିନ୍ନ ପ୍ରକାରର ଥିଲା। ଏମାନେ ଶହଶହ ବସ୍ତା କୌଣସି ନିର୍ମାଣ କଂପାନୀକୁ ଦିଅନ୍ତି ନାହିଁ। ଏମାନେ ଅସଲି ସିମେଣ୍ଟ ବସ୍ତାରେ ଏହି ନକଲି ବସ୍ତା ମିଶାଇ ପଠାଇ ଦିଅନ୍ତି। ଏଥିପାଇଁ ଏମାନେ ବିଭିନ୍ନ ସିମେଣ୍ଟ ଡିଲର ସହିତ ଯୋଗାଯୋଗରେ ଅଛନ୍ତି। ପୋଲିସ ଏହି ଚେର ପାଇବା ପରେ ବର୍ତ୍ତମାନ ଏମାନଙ୍କଠାରୁ କେଉଁମାନେ ସିମେଣ୍ଟ ନେଉଥିଲା ତାହାର ଖୋଲତାଡ ଆରମ୍ଭ କରିଛି।