ହେମାଙ୍ଗ ପ୍ରସାଦ ରାଉଳ
କୁକୁଡାଖଣ୍ଡି: ପ୍ରଥମେ ଦୋକନରୁ ବାକିରେ ଖାଇଲେ ପଇସା ମାଗିବାରୁ ସଂଘବଦ୍ଧ ହୋଇ ଆସି ଘରେ ପଶି ହତ୍ୟା କଲେ। ଏମିତି ଚାଞ୍ଚଲ୍ୟକର ଘଟଣା ଘଟିଛି କୁକୁଡାଖଣ୍ଡି ବ୍ଲକ ଦିଗପହଣ୍ଡି ଥାନା ଅନ୍ତଗତ ନୁଆ ଅନନ୍ତେଇ ଗ୍ରାମରେ। ହତ୍ୟାର ଶିକାର ହୋଇଛନ୍ତି ୪୦ ବର୍ଷୀୟ ଦୁଷ୍ମନ୍ତ ବେହେରା।
ଘଟଣାରୁ ପ୍ରକାଶ ଯେ, ରବିବାର ରାତ୍ର ୯ଟା ସମୟରେ ଦୁଷ୍ମନ୍ତ କରିଥିବା ପାନ ଦୋକାନକୁ ଦୁଇ ଜଣ ବ୍ୟକ୍ତି ଯାଇ ପାଣି ଓ ସିଗାରେଟ ମାଗିଥିଲେ। ପଇସା ମାଗିବାରୁ ବାକିରେ ଦେବାକୁ କହିଥିଲେ। ସେଠାରେ ସାମାନ୍ୟ ବଚସା ହୋଇଥିଲା। ପରେ ଦୁଷ୍ମନ୍ତ ଦୋକାନ ବନ୍ଦକରି ଘରକୁ ଚାଲିଯାଇଥିଲେ। ବାକି ମାଗିଥିବା ଦୁଇ ଯୁବକଙ୍କ ସହ ୧୦ ଜଣରୁ ଊର୍ଦ୍ଧ୍ଵ ବ୍ୟକ୍ତି ଆସି ଘରେ ପଶି ଦୁଷ୍ମନ୍ତଙ୍କୁ ଲୁହା ରଡ ଓ ଖଣ୍ଡାରେ ଆକ୍ରମଣ ସହ ପଥର ଛେଚି ଦେଇଥିଲେ।
ଏହା ଦେଖି ତାଙ୍କ ଭାଇ ବିକ୍ରମ ଚୌଧୁରୀ ଛଡାଇବାକୁ ଆସିବାରୁ ତାଙ୍କୁ ମଧ୍ୟ ଦୁର୍ବୃତ୍ତମାନେ ଆକ୍ରମଣ କରିଥିଲେ। ଉଭୟକୁଂ ଛଡାଇବାକୁ ଯାଇ ତାଙ୍କ ମା ମଧ୍ୟ ଦୁର୍ବୃତ୍ତଙ୍କ ଆକ୍ରମଣର ଶିକାର ହୋଇଥିଲେ। ଦୁଇ ଭାଇ ଆହାତ ଅବସ୍ଥାରେ ବ୍ରହ୍ମପୁର ଏମକେସିଜି ମେଡିକାଲରେ ଚିକିତ୍ସିତ ହେଉଥିବା ବେଳେ ଦୁଷ୍ମନ୍ତଙ୍କ ମୃତ୍ୟୁ ଘଟିଥିଲା।
ଏନେଇ ଦିଗପହଣ୍ଡି ଥାନା ଅଧିକାରୀ ବସନ୍ତ ସେଠା, ଚିକିଟି ଏସଡିପିଓ ସୁରେନ୍ଦ୍ର ନାଥ ମୁରମୁ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ କରି ଦୁଇଜଣଙ୍କୁ ଅଟକ ରଖି ପଚରା ଉଚୁରା କରୁଛି। ମା ସାତଭଉଣୀ ମନ୍ଦିର କାମକୁ ନେଇ ଆକ୍ରମଣକାରୀ ଦୁର୍ବୃତ୍ତ ଓ ଦୁଷ୍ମନ୍ତଙ୍କ ମଧ୍ୟରେ ଶତୃତା ଲାଗିରହିଥିଲା। ଦୁଷ୍ମନ୍ତ ଏକ ରାଜନୈତିକ ଦଳର କର୍ମୀ ଥିବା ବେଳେ ଆକ୍ରମଣକାରୀ ଦୁର୍ବୃତ୍ତମାନେ ଉକ୍ତ ଦଳର ହୋଇଥିବା ସୂଚନା ମିଳିଛି।
ପୂର୍ବରୁ ଉକ୍ତ ଅଞ୍ଚଳର ଚାଞ୍ଚଡାପଲ୍ଲୀ ଗ୍ରାମରେ ଜଣେ ଯୁବକ ବଚନ ସ୍ବାଇଁକୁ ତାସ ଖେଳ ଲାଗିଥିବା ବେଳେ ସଂଘବଦ୍ଧ ଆକ୍ରମଣ କରି ମାରିଥିଲେ। ଉକ୍ତ ଘଟଣାରେ ପୋଲିସ ଦୁଇଜଣକୁଂ ଗିରଫ କରିଥିଲା। ପୋଲିସର ପେଟ୍ରୋଲିଂ ବ୍ୟବସ୍ଥା ବଢାଇବା ପାଇଁ ଦାବି କରିଛନ୍ତି।