Tag: ବାଣପୁର

ଚିଲିକା (ସୀତାରାମ ଅଗ୍ରୱାଲ): ଚିଲିକା ନିର୍ବାଚନମଣ୍ଡଳୀରେ ନିର୍ବାଚନୀ ପରବର୍ତ୍ତୀ ହିଂସାକୁ ଦୃଷ୍ଟିରେ ରଖି ଅତିରିକ୍ତ ଫୋର୍ସ ବାଣପୁର ଥାନା ଅଞ୍ଚଳରେ ମୁତୟନ କରାଯାଇଛି। ଆଜି ଖୋର୍ଦ୍ଧା ଏସପିଙ୍କ ନିର୍ଦ୍ଦେଶକ୍ରମେ ଏବଂ ବାଲୁଗାଁ ଏସଡିପିଓଙ୍କ ତତ୍ୱାବଧାନରେ ଦୁଇ ସେକ୍ସନ ସିଏପିଏଫ ବାଣପୁର ଥାନା ଅଞ୍ଚଳରେ ମୁତୟନ କରାଯାଇଛି।

ଆଇଆଇସି ରମେଶ କୁମାର ଦେବତାଙ୍କ ତତ୍ୱାବଧାନରେ ଉକ୍ତ ଫୋର୍ସ ବାଣପୁର ସହରାଞ୍ଚଳ ଓ ଗ୍ରାମାଞ୍ଚଳରେ ଚବିଶ ଘଣ୍ଟା ପାଟ୍ରୋଲିଂ କରିବ। ଯାହାଫଳରେ ସାମ୍ଭାବ୍ୟ ନିର୍ବାଚନୀ ପରବର୍ତ୍ତୀ ହିଂସାକୁ ରୋକାଯାଇପାରିବ।

ଉକ୍ତ ଫୋର୍ସ ସହ ବାଣପୁର ପୋଲିସ ନିରନ୍ତର ପାଟ୍ରୋଲିଂ ଜାରି ରଖିବ ଏବଂ ଜନସାଧାରଣଙ୍କୁ ସଚେତନ ମଧ୍ୟ କରିବ। ଅଞ୍ଚଳରେ ଶାନ୍ତିଶୃଙ୍ଖଳା ବଜାୟ ରଖିବା ପୋଲିସର ପ୍ରଥମ ପ୍ରାଥମିକତା ବୋଲି ଆଇଆଇସି ଶ୍ରୀ ଦେବତା କହିଛନ୍ତି।

ସୂଚନା ଥାଉକି ରାଜ୍ୟରେ ସଦ୍ୟ ନିର୍ବାଚନ ଶେଷ ହୋଇଥିବା ବେଳେ ଗତକାଲି ଫଳାଫଳ ଘୋଷଣା ହୋଇଛି। ତେବେ ଚବିଶ ବର୍ଷ ଧରି କ୍ଷମତାସୀନ ବିଜେଡି ଗାଦିଚ୍ୟୁତ ହୋଇଥିବା ବେଳେ ବିଜେପି ପ୍ରଥମ ଥର ପାଇଁ ସରକାର ଗଢିବାକୁ ଯାଉଛି। ତେବେ ଖୋର୍ଦ୍ଧା ଜିଲ୍ଲାର ଖୋର୍ଦ୍ଧା ଓ ଚିଲିକା ସମ୍ବେଦନଶୀଳ ନିର୍ବାଚନମଣ୍ଡଳୀ ହୋଇଥିବାବେଳେ ଏସପିଙ୍କ ନିର୍ଦ୍ଦେଶକ୍ରମେ ଜିଲ୍ଲାର ସମସ୍ତ ଥାନାକୁ ନିର୍ବାଚନୀ ପରବର୍ତ୍ତୀ ହିଂସା ଏଡାଇବା ପାଇଁ ଅତିରିକ୍ତ ଫୋର୍ସ ଯୋଗାଇଦିଆଯାଇଛି।

ବାଣପୁର (ସୀତାରାମ ଅଗ୍ରୱାଲ): ଯେଉଁ ରକ୍ତ ରଞ୍ଜିତ ପଲଟଣ ପଡ଼ିଆର ଫିରିଙ୍ଗିମୁକ୍ତ ମାଟି ଉପରେ ଛିଡ଼ା ହୋଇ ୧୮୩୬ ମସିହା ଜୁନ୍ ୧ ତାରିଖରେ ବିପ୍ଲବୀ କୃତିବାସ ତିନି ଦିନ ପାଇଁ ବାଣପୁରର ସ୍ଵାଧୀନତା ସଦର୍ପେ ଘୋଷଣା କରିଥିଲେ। ସେହି ଐତିହାସିକ ମାଟି ଉପରେ ଚିଲିକା ସାହିତ୍ୟ ସମାଜ ପାଳନ କରିଛି। ୧୮୮ତମ ବାଣପୁର ମୁକ୍ତି ଦିବସ ସମାରୋହ ଏବଂ ସାରସ୍ଵତ ପ୍ରତିଭାଙ୍କ ସ୍ଵରଚିତ କବିତା “ମୁକ୍ତି ସଂଗୀତ” ରେ ବିପ୍ଳବୀଙ୍କୁ ଅର୍ପଣ କରିଛି ଶତତ ଶ୍ରଦ୍ଧାଞ୍ଜଳି।

ବକ୍ସି ଜଗବନ୍ଧୁଙ୍କ ଡ଼ାକରାରେ ୧୮୧୭ର ପ୍ରଥମ ପାଇକ ବିଦ୍ରୋହ ଭାଟପଡ଼ାଗଡ଼ର ଦଳବେହେରା ଦୀନବନ୍ଧୁ ସାମନ୍ତରାୟ ମହାରଥା ଏବଂ ଅରାଙ୍ଗଗଡ଼ର ଦଳବେହେରା ପିତା ଶ୍ୟାମସୁନ୍ଦରର ପାଟଣାଣିଙ୍କ ମିଳିତ ସହଯୋଗରେ ଘୁମୁଷରର ଶତ ଶତ କନ୍ଧପାଇକଙ୍କ ସହିତବାଣପୁର ପାଇକଙ୍କଫିରିଙ୍ଗି ବିରୋଧି ବିଦ୍ରୋହ ଯୁବ ଅବସ୍ଥାରେ କୃତିବାସଙ୍କୁ ଉଦବୋଧିତ କରିଥିଲା।

ପରବର୍ତ୍ତୀକାଳରେ ୧୮୩୬ରେ ପୁଣି ଫିରିଙ୍ଗିମାନଙ୍କ ଅକଥନୀୟ ଶୋଷଣ କଷଣ ଅତ୍ୟାଚାରକୁ ପ୍ରତିହତ କରିବାପାଇଁ ଅରାଙ୍ଗଗଡର ଶତପାଇକଙ୍କ ସହିତ ସାନସିରେଇପୁର, ବାଁଳୋଇ, ସାହାସପୁର, ଭେଟେଶ୍ଵର, ବୋରିଗାଁ, ବେତୁଲି, ଅଞ୍ଚଳର ସହଶ୍ରାଧିକ ପାଇକମାନଙ୍କୁ ସଂଗଠିତ କରି ଐତିକାସିକ ପଲଟଣ ପଡ଼ିଆରେ ଥିବା ବ୍ରିଟିଶ ବାହିନୀ ଉପରେ ଅତର୍କିତ ଆକ୍ରମଣ ସହିତ ଖଜଣାଖାନାଲୁଟ, ଥାନା ପୋଡ଼ି କରି ବାଣପୁରକୁ ତିନି ଦିନ ପାଇଁ ଫିରିଙ୍ଗି ଶାସନମୁକ୍ତ କରି ଶେଷରେ ଶିଖିମନେଇଙ୍କ ଛଳନାରେ ବ୍ରିଟିଶ ହାତରେ ଧରାପଡ଼ି କଳାପାଣି ଦଣ୍ଡ ଭୋଗି ମାଟି ପାଇଁ ସହୀଦ ହୋଇଥିବାରୁ ସାହିତ୍ୟ ସମାଜ ତରଫରୁ ତାଙ୍କ ପ୍ରତି ଗଭୀର ଶ୍ରଦ୍ଧାଞ୍ଚଳି ଅର୍ପଣ କରାଯାଇଥିଲା।

ସଭାପତି ବାଳମୁକୁନ୍ଦ ଦାସଙ୍କ ପୌରହିତ୍ୟରେ ଆୟୋଜିତ ଏହି ସମାରୋହରେ କବିଶିବ ମିଶ୍ର, ଆଶୁତୋଶ ସାମନ୍ତସିଂହାର, ମଦନ ମୋହନ ମହାପାତ୍ର, ଅଧ୍ୟାପକ ଲକ୍ଷ୍ମୀଧର ସୁବୁଦ୍ଧି, ମୁରଲୀଧର ସାମନ୍ତସିଂହାର, ରାଜେନ୍ଦ୍ର ପ୍ରସାଦ ରଥ,ରଙ୍କ ନାଥ ସେଠୀ, ଶେଷ ଦେବ ମହାରଣା, ମହେଶ୍ଵର ଜେନା, ଦଣ୍ଡପାଣି ବେହେରା, ରବୀନ୍ଦ୍ରନାଥ ମାନସିଂ, ଆନନ୍ଦ ଚନ୍ଦ୍ରସେନାପତି,ଭିକାରୀଚରଣ ପ୍ରଧାନ, ରାକେଶ ସାହୁ ପ୍ରମୁଖ ନିଜ ନିଜ କବିତା ରେ ଓ,ବ୍ୟକ୍ତବ୍ୟରେ ବିପ୍ଲବୀଙ୍କ ପ୍ରତି ଗଭୀର ଶ୍ରଦ୍ଧାଞ୍ଜଳି ଅର୍ପଣ କରିଥିଲେ।  ଆରମ୍ଭରେ ସହୀଦଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରାଯାଇଥିଲା। କବି ରମେଶ ମହାପାତ୍ର ଧନ୍ୟବାଦ ଅର୍ପଣ କରିଥିଲେ।

ବାଣପୁର (ଶୀତାରାମ ଅଗ୍ରୱାଲ): ଗତ ୨୬ ତାରିଖରେ ଯୁକ୍ତ ଦୁଇ ପରୀକ୍ଷା ଫଳ ପ୍ରକାଶ ପାଇଛି। ଉକ୍ତ ପରୀକ୍ଷାରେ ଚଳିତ ବର୍ଷ ମଧ୍ୟ ଛାତ୍ରୀମାନେ ବାଜିମାତ କରିଛନ୍ତି। ତେବେ ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ୍ ଦୁଲଣୀ ଗ୍ରାମର ପିତା ବୀରେନ୍ଦ୍ର କୁମାର ସାହୁ ଓ ମାତା ବିଜୟିନୀ ସାହୁଙ୍କ ଏକମାତ୍ର କନ୍ୟା ରାଜଲକ୍ଷ୍ମୀ ସାହୁ ବ୍ଲକ୍ ରେ ଦ୍ୱିତୀୟ ସ୍ଥାନ ହାସଲ କରିଛନ୍ତି। ଏହି ଖବର ପ୍ରସାରିତ ହେବା ପରେ ରାଜଲକ୍ଷ୍ମୀଙ୍କୁ ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟିବାରେ ଲାଗିଛି।

ରାଜଲକ୍ଷ୍ମୀ ଗୋଦାବରୀଶ ଉଚ୍ଚ ମାଧ୍ୟମିକ ବିଦ୍ୟାଳୟରେ ଯୁକ୍ତ ଦୁଇ କଳାରେ ଅଧ୍ୟୟନ କରୁଥିଲେ। ସେ ସମୁଦାୟ ୬୦୦ ନମ୍ବରରୁ ୫୧୭ ମାର୍କ (୮୬.୧୬%) ରଖି ଉକ୍ତ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି। ସେ ବିଦ୍ୟାଳୟରେ ଦ୍ୱିତୀୟ ସ୍ଥାନ ଅଧିକାର କରିଥିବା ବେଳେ ବାଣପୁର ବ୍ଲକ୍ ରେ ମଧ୍ୟ ଦ୍ୱିତୀୟ ସ୍ଥାନ ଅଧିକାର କରିଥିବାର ସୂଚନା ମିଳିଛି।

ସୂଚନାଯୋଗ୍ୟ ଯେ, ସେ ବାଣପୁର ସରସ୍ବତୀ ଶିଶୁ ବିଦ୍ୟା ମନ୍ଦିରର ପୁରାତନ ଛାତ୍ରୀ ହୋଇଥିବା ବେଳେ ଦଶମ ଶ୍ରେଣୀରେ ମଧ୍ୟ ଶତକଡା ୮୨.୬୬ ପ୍ରତିଶତ ମାର୍କ ରଖି ଉତ୍ତୀର୍ଣ୍ଣ ହୋଇଥିଲେ।

ରାଜଲକ୍ଷ୍ମୀ ଗୋଦାବରୀଶ ବିଦ୍ୟାପୀଠର ଶିକ୍ଷକ ବୀରେନ୍ଦ୍ର କୁମାର ସାହୁ ଓ ମାତା ବିଜୟିନୀ ସାହୁଙ୍କ ଏକମାତ୍ର କନ୍ୟା ଅଟନ୍ତି। ତେବେ ରାଜଲକ୍ଷ୍ମୀ ସଫଳତା ପାଇଁ ସେ ପିତା ମାତାଙ୍କ ସମେତ ତାଙ୍କ ଅଧ୍ୟାପକ ସୁବ୍ରତ କୁମାର ତ୍ରିପାଠୀ ଏବଂ ପାଟପୁରଗ୍ରାମ ଅର୍ନ୍ତଗତ ସରିତା ଶିକ୍ଷା ମନ୍ଦିରର ସମସ୍ତ ଅଧ୍ୟାପକ, ଅଧ୍ୟାପିକା ଓ ସହପାଠୀଙ୍କୁ ଶ୍ରେୟ ଦେଇଛନ୍ତି। ଏଥିପାଇଁ ଦୁଲଣୀଗ୍ରାମବାସୀ ଓ କଲେଜର କର୍ମକର୍ତ୍ତା ତାଙ୍କର ଉନ୍ନତି କାମନା ସହ ଶୁଭେଚ୍ଛା ଜଣାଇଛନ୍ତି।

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ଏକ ଦୁଃଖଦ ଘଟଣା ଘଟିଯାଇଛି। ବଜ୍ରାଘାତରେ ଜଣେ ଯୁବକ ପ୍ରାଣ ହରାଇଥିବା ଖବର ହସ୍ତଗତ ହୋଇଛି।

ସୂଚନା ମୁତାବକ ଗତକାଲି ବିଳମ୍ବିତ ରାତ୍ରିରେ ପ୍ରବଳ ବଜ୍ରପାତ ସହ ବର୍ଷା ହୋଇଥିବା ବେଳେ ବାଣପୁର ଏନଏସି ଦାଶରଥିପୁର ଗ୍ରାମ ହରିଜନ ସାହିର ସ୍ବର୍ଗତ ଗୋଲକ ନାୟକଙ୍କ ପୁତ୍ର ସାଗର ନାୟକ (୩୪)ଙ୍କ ଉପରେ ବଜ୍ରପାତ ହୋଇଥିଲା। ସେ ଘର ବାହାରେ ଶୋଇଥିବା ବେଳେ ବଜ୍ରାଘାତର ଶିକାର ହୋଇଥିଲେ।

ତେବେ ପରିବାରବର୍ଗ ତାଙ୍କୁ ବାଣପୁର ମେଡିକାଲ ନେଇଥିବା ବେଳେ ଡାକ୍ତର ସେଠାରେ ତାଙ୍କୁ ମୃତ୍ ଘୋଷଣା କରିଥିଲେ। ଖବର ପାଇ ବାଣପୁର ପୋଲିସ କେସ ନମ୍ବର ୬/୨୪ ରେ ଏକ ଅପମୃତ୍ୟୁ ମାମଲା ରୁଜୁ କରି ଶବ ବ୍ୟବଚ୍ଛେଦ ପାଇଁ ପଠାଇଦେଇଛି। ଏ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।

ଚିଲିକା (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲାରେ ସାଧାରଣ ନିର୍ବାଚନ ମଇ ୨୫ ତାରିଖରେ ଅନୁଷ୍ଠିତ ହେବାକୁ ଥିବା ବେଳେ ପୋଲିସ ପକ୍ଷରୁ ଏଥିପାଇଁ ଏକାଧିକ ପଦକ୍ଷେପ ନିଆଯାଇଛି। ବିଭିନ୍ନ ସ୍ଥାନରେ ଅସ୍ଥାୟୀ ଚେକ ପୋଷ୍ଟ ନିର୍ମାଣ କରାଯାଇଥିବା ବେଳେ ଜିଲ୍ଲା ପୋଲିସ ପକ୍ଷରୁ ୨୪ ଘଣ୍ଟିଆ ଚେକିଙ୍ଗ ଓ ପାଟ୍ରୋଲିଂ ଜାରି ରହିଛି। ଏହି ପରିପ୍ରେକ୍ଷୀରେ ଆଜି ଖୋର୍ଦ୍ଧା ଏସପି ଅବିନାଶ କୁମାର ବାଣପୁର ଓ ବାଲୁଗାଁ ଥାନା ଅଞ୍ଚଳ ପରିଦର୍ଶନରେ ଆସି ସମସ୍ତ ଚେକ ପୋଷ୍ଟର ବ୍ୟବସ୍ଥା ପରଖିଛନ୍ତି।

ଉକ୍ତ ଚେକ ପୋଷ୍ଟ ଗୁଡିକରେ କିପରି ନାଗରିକ ମାନଙ୍କ ଯାନବାହାନ ତନଖି କରାଯାଇଛି ତାହା ଅନୁଧ୍ୟାନ କରିଥିଲେ ଏସପି। ତତସହିତ ବାଲୁଗାଁ ଓ ବାଣପୁର ଥାନାର ସୀମାନ୍ତବର୍ତ୍ତୀ ଅଞ୍ଚଳ ଯାହା ଗଞ୍ଜାମ ଜିଲ୍ଲାକୁ ସଂଯୋଗ କରୁଛି ଯଥା ଶାଳିଆ ଡ୍ୟାମ ଏବଂ ନାଭାଲ ଫାଣ୍ଡି ଅଞ୍ଚଳ ପରିଦର୍ଶନ କରିବା ସହ ସେଠାର ଏସପି ସୁରକ୍ଷା ବ୍ୟବସ୍ଥା ପରଖିଥିଲେ। ଏପରିକି ଏସପି ଏକାଧିକ ଚେକ ପୋଷ୍ଟରେ କିଛି କିଛି ସମୟ ଅତିବାହିତ କରିଥିଲେ। ଏହି ସମୟରେ ବାଲୁଗାଁ ଏସଡିପିଓ ଶୁଭ୍ରାଂଶୁ ଶେଖର ମିଶ୍ର, ବାଲୁଗାଁ ଆଇଆଇସି ଜୟପ୍ରକାଶ ପରିଡ଼ା ଓ ବାଣପୁର ଆଇଆଇସି ରମେଶ ଚନ୍ଦ୍ର ଦେବତା ଆଦି ଉପସ୍ଥିତ ଥିଲେ।

ବାଣପୁର/ନାଚୁଣୀ (ସୀତାରାମ ଅଗ୍ରୱାଲ): ବାଣପୁର ଅଂଚଳର ଜଣେ ମହିଳା ଯୌତୁକ ଜୁଇରେ ବଳି ପଡିଛନ୍ତି। ଝିଅର ପରିବାର ଲୋକ ଟାଙ୍ଗୀ ଡାକ୍ତରଖାନାରେ ମରି ପଡ଼ିଥିବା ଦେଖି ଶଶୁର ଘର ଲୋକ ତଣ୍ଟି ଚିପି ମାରିଦେଇଥିବା ସନ୍ଦେହ କରି ନାଚୁଣୀ ଥାନାରେ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ ବାଣପୁର ଥାନା ଅନ୍ତର୍ଗତ ମଙ୍ଗଳପୁର ଗ୍ରାମର ବାସୁଦେବ ସ୍ୱାଇଁଙ୍କ ଝିଅ ଲିଜା ସ୍ୱାଇଁ ବୈଦିକ ରୀତିନୀତିରେ ନାଚୁଣୀ ଥାନା ଅଧିନସ୍ଥ ହାରିକୁଣ୍ଡ ବରଡ଼ି ଗ୍ରାମର ସନ୍ତୋଷ ପ୍ରଧାନଙ୍କୁ ୫ବର୍ଷ ପୂର୍ବେ ବିବାହ କରିଥିଲେ। ବିବାହ ସମୟରେ ଶ୍ୱଶୁର ଘରର ଦାବୀ ମୁତାବକ ଏକଲକ୍ଷ ଟଙ୍କା ସୁନା ଅଳଙ୍କାର ସହ ସମସ୍ତ ଆସବାବ ପତ୍ର ଦେଇଥିଲେ।

ଲିଜାଙ୍କର ଏକ ପୁତ୍ର ସନ୍ତାନ ଜନ୍ମ ହେଲା ପରେ ସ୍ୱାମୀ ସନ୍ତୋଷ, ଶାଶୁ ତଅପୋଇ ଏବଂ ନଣନ୍ଦ ଦୀପା ପ୍ରଧାନ ଅଧିକ ଏକ ଲକ୍ଷ ଟଙ୍କା ଦାବୀ କରି ଆସୁଥିଲେ। ଲିଜାଙ୍କ ବାପା ଜଣେ ଗରିବ ଶ୍ରେଣୀର ହୋଇଥିବାରୁ ଟଙ୍କା ଦେବାକୁ ଅକ୍ଷମତା ପ୍ରକାଶ କରି ଝିଅର ଶାଶୁ ଘରକୁ ଆସି ବୁଝାସୁଝା କରିଥିଲେ। କିନ୍ତୁ ଝିଅକୁ ଏକଲକ୍ଷ ଟଙ୍କା ଦାବିକରି ବାରମ୍ବାର ଦାବୀ କରି ଜୀବନରୁ ମାରିଦେବାକୁ ଧମକ ଦେଉଥିବାରୁ ଏକବର୍ଷ ତଳେ ୨୫୦୦୦ଟଙ୍କା ଆଣି ଦେଇଥିଲେ।

ହଠାତ ଆଜି ଝିଅ ମରି ଯାଇଥିବା ଖବର ପାଇ ପରିବାର ଲୋକ ଝିଅ ଘରକୁ ଆସିବାରେ ଘରେ ଝିଅ ନଥିବା ଜାଣିବାକୁ ପାଇଥିଲେ। ପରେ ଟାଙ୍ଗୀ ଡାକ୍ତରଖାନାକୁ ଯାଇ ଝିଅ ମରି ପଡ଼ିଥିବା ଦେଖିବାକୁ ପାଇଥଲେ। କିନ୍ତୁ ଶାଶୁ ଘରର କୌଣସି ଲୋକଙ୍କୁ ସେଠାରେ ଦେଖିବାକୁ ପାଇ ନଥିଲେ। ଏ ନେଇ ନାଚୁଣୀ ଥାନା ଅଧିକାରୀ ମକୋଦ୍ଦମା ରୁଜୁ କରି ତଦନ୍ତ କରୁଥୁବା ବେଳେ ଆସନ୍ତା କାଲି ଶବ ବ୍ୟବଚ୍ଛେଦ ହେବ ବୋଲି ପ୍ରକାଶ କରିଛନ୍ତି।

ବାଣପୁର: ବାଣପୁର ଅଞ୍ଚଳରେ ଏକ ସଡ଼କ ଦୁର୍ଘଟଣା ଘଟିଯାଇଛି, ଯେଉଁଥିରେ ଜଣଙ୍କର ମୃତ୍ୟୁ ହୋଇଥିବା ଖବର ମିଳିଛି। ଘଟଣାରୁ ପ୍ରକାଶ ଆଜି ଅପରାହ୍ନରେ ବାଣପୁର ନିକଟସ୍ଥ ସାନହନ୍ତୁଆଡ ବଡଶଙ୍ଖ ଠାରେ ଏକ ମୋଟର ସାଇକେଲ ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଗୁରୁତର ହୋଇ ଭୁବନେଶ୍ୱର ଏମ୍ସ ଡାକ୍ତରଖାନାକୁ ସ୍ଥାନାନ୍ତର ହୋଇଛନ୍ତି।

ମୃତକ ଜଣକ ଗମ୍ଭାରୀମୁଣ୍ଡା ମହତପଲ୍ଲା ଗ୍ରାମର ଗୌରାଙ୍ଗ ନାୟକଙ୍କ ପୁଅ ବଳରାମ ନାୟକ (୨୦) ହୋଇଥିବା ବେଳେ ଆହତ ଜଣକ ଉକ୍ତ ଗ୍ରାମର ସୁଦର୍ଶନ ନାୟକଙ୍କ ପୁଅ ସୁମନ୍ତ ନାୟକ (୨୨) ବୋଲି ଜଣାପଡିଛି। ଦୁର୍ଘଟଣାର କାରଣ ଅସ୍ପଷ୍ଟ ଥିବାବେଳେ ଖବର ଲେଖାହେଲା ପର୍ଯ୍ୟନ୍ତ ଏ ନେଇ ଥାନାରେ କୌଣସି ଅଭିଯୋଗ ହୋଇନଥିବା ଆଇଆଇସି କହିଛନ୍ତି। ମୃତକଙ୍କ ମୃତଦେହ ବାଣପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ରଖାଯାଇଥିବା ଜଣାଯାଇଛି।

ବାଣପୁର (ସୀତାରାମ ଅଗ୍ରୱାଲ): ଆଜି ଗୋଦାବରିଶ ମହାବିଦ୍ୟାଳୟର ପ୍ରେଖ୍ୟାଳୟରେ ଅଧ୍ୟକ୍ଷ ବିନାୟକ ହୋତାଙ୍କ ସଭାପତିତ୍ୱରେ ବିଦାୟ ନେବାକୁ ଯାଉଥିବା ରାସାୟନିକ ବିଜ୍ଞାନ ବିଭାଗର ଡେମୋନଷ୍ତ୍ରାଟର ବିବୁ୍ଧେନ୍ଦୁ ଦାଶ ଏବଂ ଲାଇବ୍ରାରୀଆନ ବିଜୟକେତନ ଦାଶଙ୍କ ବିଦାୟକାଳୀନ ସମ୍ବର୍ଦ୍ଧନା ସଭା ଅନୁଷ୍ଠିତ ହୋଇଯାଇଛି। ଏହି ସଭାରେ ପ୍ରଶାସନିକ ଅଧିକାରୀ ସୁରପ୍ରତାପ ନରେନ୍ଦ୍ର ସିଂ ବର୍ମା, ସହପ୍ରଶାସନିକ ଅଧିକାରିଣୀ ଡକ୍ତର ସୁଜାତା ମିଶ୍ର, ଯୁକ୍ତ ଦୁଇ କାର୍ଯ୍ୟକାରୀ ଅଧ୍ୟକ୍ଷ ଲକ୍ଷ୍ମୀପ୍ରସାଦ ମିଶ୍ର, ଏଷ୍ଟାବ୍ଲିସମେଣ୍ଟ ଅଧିକାରୀ ଆଦିତ୍ୟ ସାରଥୀ ବେଦମତ୍ତା, ବିବୁ୍ଧେନ୍ଦୁ ଦାଶ ଓ ବିଜୟକେତନ ଦାଶ ମଞ୍ଚାସୀନ ହୋଇଥିଲେ।

ମହାବିଦ୍ୟାଳୟର ଅଧ୍ୟାପକ, ଅଧ୍ୟାପିକା ଓ କର୍ମଚାରୀ ମାନେ ଭlଗନେଇ ବିଦାୟ ନେବାକୁ ଯାଉଥିବା ବିଭୁ ସାର ଓ ବିଜୟ ବାବୁଙ୍କ ଉଦେଶ୍ୟରେ ସ୍ମୃତିଚାରଣ କରିଥିଲେ। ପରିଶେଷରେ ଧନ୍ୟବାଦ ଅର୍ପଣ ସହ ସଭା ସାଙ୍ଗ ହୋଇଥିଲା।

ବାଣପୁର (ସୀତାରାମ ଅଗ୍ରୱାଲ): ଆଜି ଦିବା ୧୧ ଘଟିକା ସମୟରେ ଉପର ମହଲା ପଠନ ଗୃହରେ ଗୋଦାବରୀଶ ମହାବିଦ୍ୟାଳୟର ଅଧ୍ୟକ୍ଷ ବିନାୟକ ହୋତାଙ୍କ ସଭାପତିତ୍ବରେ “ଲିଙ୍ଗଜନିତ ସମ୍ବେଦନଶୀଳତା” ଶୀର୍ଷକ ବିଷୟ ଉପରେ ଏକ ଆଲୋଚନା କାର୍ଯ୍ୟକ୍ରମ ଅନୁଷ୍ଠାନର ମନସ୍ତତ୍ତ୍ଵ ବିଭାଗ ଏବଂ ଆଈ.କ୍ୟୁ. ଏ.ସି ମିଳିତ ଆନୁକୁଲ୍ୟରେ ଅନୁଷ୍ଠିତ ହୋଇଥିଲା।

ଏହି ଆଲୋଚନାରେ ମୁଖ୍ୟ ବକ୍ତା ଭାବେ ଏହି ମହାବିଦ୍ୟାଳୟର ପୂର୍ବତନ ମନସ୍ତତ୍ତ୍ଵ ବିଭାଗ ର ରିଡର ଡଃ. ହରେଶ୍ ଚନ୍ଦ୍ର ମିଶ୍ର ଯୋଗ ଦେଇ ଲିଙ୍ଗ ଜନିତ ସମସ୍ୟା ଓ ବାଛ ବିଚାର ଦୂରେଇ ମହିଳା ସଶକ୍ତିକରଣ ଉପରେ ସାରଗର୍ଭକ ବକ୍ତବ୍ୟ ପ୍ରଦାନ କରିଥିଲେ। ଡଃ. ମିଶ୍ର ତାଙ୍କର ବକ୍ତବ୍ୟ ମାଧ୍ୟମରେ ଉଲ୍ଲେଖ କରିଥିଲେ ଯେ ଗୋଟିଏ ବିରାଟ ହାତୀ ଯେମିତି ଏକ ସରୁ ରସି ଦ୍ବାରା ଗୋଟିଏ ଛୋଟ ଗଛରେ ବନ୍ଧା ହୋଇ ମଧ୍ୟ ଗଛ ଭାଙ୍ଗି ପଳାଇବାକୁ ଚେଷ୍ଟା କରି ନଥାଏ କାରଣ ଶିଶୁ ସମୟରୁ ହାତୀ ଟି ଗଛରେ ବାନ୍ଧି ହୋଇ ରହିବା ଅଭ୍ୟାସ ରେ ଅଭ୍ୟସ୍ତ, ସେହିପରି ମହିଳା ମାନଙ୍କ ଅମାପ ଶକ୍ତି ଥିଲେ ମଧ୍ୟ ସମାଜ ଓ ସଂସ୍କୃତି ଚାରି କାନ୍ଥ ମଧ୍ୟରେ ସୀମିତ ହୋଇ ରହନ୍ତି।

ମନସ୍ତତ୍ତ୍ୱ ବିଭାଗର ମୁଖ୍ୟ ସୁଜିତ କୁମାର ପାଣ୍ଡେ, ଅଜୟ କୁମାର ବେହେରା,  ସ୍ୱାଗତିକା ସାହୁ ଏବଂ ଆଈ.କ୍ୟୁ.ଏ.ସି ସଂଯୋଜିକା ଡଃ. ଋତୁସ୍ମିତା ମିଶ୍ର ଏହି କାର୍ଯ୍ୟକ୍ରମକୁ ପରିଚାଳନା କରିଥିଲେ।

ଏହି ଆଲୋଚନାରେ ମନସ୍ତତ୍ତ୍ୱ ବିଭାଗର ଅଧ୍ୟାପକ ଶ୍ରୀଯୁକ୍ତ ପୁଲିନ୍ ବିହାରି ଜେନା ସ୍ୱାଗତ ଭାଷଣ ପ୍ରଦାନ କରିଥିଲେ, ପ୍ରଶାସନିକ ଅଧିକାରୀ ଡକ୍ଟର ଏସ୍.ପି.ଏନ୍.ଏସ୍. ବର୍ମା ମୁଖ୍ୟବକ୍ତା ଙ୍କ ପରିଚୟ ପ୍ରଦାନ କରିଥିଲେ।

ପରିଶେଷରେ ଅଧ୍ୟାପକ( ଏଲ୍.ଟି) ଡଃ. ଗୁରୁ କିଶୋର ନାୟକ ଧନ୍ୟବାଦ ଅର୍ପଣ କରିଥିଲେ। ଏହି ଆଲୋଚନା ରେ ପ୍ରାୟତଃ ତିନିଶହ ରୁ ଉର୍ଦ୍ଧ୍ଵ ଛାତ୍ର ଛାତ୍ରୀ, ଅଧ୍ୟାପକ , ଅଧ୍ୟାପିକା ଓ କର୍ମଚାରୀ ଯୋଗ ଦେଇଥିଲେ।

ବାଣପୁର (ସୀତାରାମ ଅଗ୍ରୱାଲ): ଆଗାମୀ ସାଧାରଣ ନିର୍ବାଚନରେ ମତଦାତାଙ୍କ ମନରେ ଆତ୍ମବିଶ୍ୱାସ ବଢାଇବା ସହ ଭୟମୁକ୍ତ ନିର୍ବାଚନ ପାଇଁ ଆଜି ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ପୋଲିସର ଫ୍ଲାଗ ମାର୍ଚ୍ଚ ଅନୁଷ୍ଠିତ ହୋଇଯାଇଛି। ଏସପି ଅବିନାଶ କୁମାରଙ୍କ ନିର୍ଦେଶକ୍ରମେ ଏବଂ ବାଲୁଗାଁ ଏସଡ଼ିପିଓ ଶୁଭ୍ରାଂଶୁ ଶେଖର ମିଶ୍ରଙ୍କ ତତ୍ୱାବଧାନରେ ବାଣପୁର ଆଇଆଇସି ରମେଶ ଚନ୍ଦ୍ର ଦେବତାଙ୍କ ନେତୃତ୍ୱରେ ସିଆରପିଅଫ ଯବାନ ଓ ପୋଲିସ କର୍ମଚାରୀ ମାନେ ମିଳିତ ଭାବେ ବାଣପୁର ବଜାରରେ ଫ୍ଲାଗ ମାର୍ଚ୍ଚ କରିଥିଲେ।

ଉକ୍ତ ଫ୍ଲାଗ ମାର୍ଚ୍ଚରେ ଏକ କମ୍ପାନୀ ସିଆରପିଅଫ ଯବାନ ଓ ବାଣପୁର ଥାନାର ସମସ୍ତ କର୍ମଚାରୀ ମାନେ ଭାଗ ନେଇଥିଲେ। ନାଗରିକମାନେ ନିର୍ଭିକ ଭାବେ ଚାପମୁକ୍ତ ହୋଇ ମତଦାନ କରିବା ଉଦ୍ଦେଶ୍ୟରେ ଏହି ଫ୍ଲାଗମାର୍ଚ୍ଚ ପୋଲିସ ପ୍ରଶାସନ ଦ୍ୱାରା ଜାରି ରହିଛି।

ବାଣପୁର (ସୀତାରାମ ଅଗ୍ରୱାଲ): ଆଜି ଦିବା ୧୧ ଘଟିକା ସମୟରେ ଗୋଦାବରୀଶ ମହାବିଦ୍ୟାଳୟର ଅଧ୍ୟକ୍ଷ ବିନାୟକ ହୋତାଙ୍କ ସଭାପତିତ୍ବରେ ଛାତ୍ରଛାତ୍ରୀ ମାନଙ୍କ ପାଇଁ ଉପାଦେୟ ଶିର୍ଷକ “ପରିବର୍ତ୍ତିତ ପରିବେଶ ଓ ପ୍ରଦ୍ୟୋଗ ପରିଚାଳନା” ବିଷୟରେ ଏକ ଆଲୋଚନା ଚକ୍ର ଅନୁଷ୍ଠିତ ହୋଇଯାଇଛି। ଏହା ପାରଳା ମହାରାଜା ଇଂଜିନିୟରିଂ ମହାବିଦ୍ୟାଳୟର ଆସୋସିଏଟ ପ୍ରଫେସର ଡ଼ଃ. ଜ୍ଞାନ ରଞ୍ଜନ ମହାନ୍ତିଙ୍କ ଉଦବୋଧନରେ ଅନୁଷ୍ଠିତ ହୋଇଛି।

ଏହି ପାଠଚକ୍ରକୁ ବାଣିଜ୍ୟ ବିଭାଗ ଅଧ୍ୟାପକ ଜୟନ୍ତ ବିହାରୀ ସଂଯୋଜନା କରିଥିବା ବେଳେ ଅନୁଷ୍ଠାନର ଗୁଣବତ୍ତା ପ୍ରକୋଷ୍ଠର ଅଧିକାରୀ ଡ଼ଃ. ଋତୁସ୍ମିତା ମିଶ୍ରଙ୍କ ଉଦ୍ୟମରେ ଏହି ଆଲୋଚନାଟି ଛାତ୍ରଛାତ୍ରୀ ମାନଙ୍କ ପାଇଁ ଉପାଦେୟ ହୋଇପାରିଥିଲା।

ଏଥିରେ ପ୍ରାୟ ତିନି ଶହରୁ ଉର୍ଦ୍ଧ୍ଵ ଛାତ୍ରଛାତ୍ରୀ ଯୋଗ ଦେଇଥିଲେ। ଅନୁଷ୍ଠାନର ପ୍ରଶାସନିକ ଅଧିକାରୀ ଡଃ. ଏସ୍.ପି.ଏନ୍.ଏସ୍ ବର୍ମା ଧନ୍ୟବାଦ ଅର୍ପଣ କରିଥିଲେ।

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଣପୁର ଥାନା ୧୬ ନଂ ଜାତୀୟ ରାଜପଥ ବେଲପଡା ଛକରେ ଘଟିଛି ଏକ ମର୍ମନ୍ତୁଦ ସଡ଼କ ଦୁର୍ଘଟଣା। ରାସ୍ତା ପାର୍ଶ୍ୱରେ ଛିଡ଼ା ହୋଇଥିବା ଟ୍ରକ୍କୁ ପଛରୁ ଆସୁଥିବା ଏକ ଟ୍ରକ୍ ପିଟିଛି। ଏହି ଦୁର୍ଘଟଣାରେ ଘଟଣାସ୍ଥଳରେ ହେଲପରଙ୍କ ମୃତ୍ୟୁ ହୋଇଥିବା ବେଳେ ଡ୍ରାଇଭରଙ୍କ ଅବସ୍ଥା ଗୁରୁତର ରହିଛି। ବେଲପଡା ଛକରେ ଏକ ମାଲ ବୋଝେଇ ଟ୍ରକ ଛିଡ଼ା ହୋଇଥିଲା।

ଆଜି ଭୋରରୁ ଭୁବନେଶ୍ୱରରୁ ବ୍ରହ୍ମପୁର ଅଭିମୁଖେ ଦ୍ରୁତ ଗତିରେ ଅନ୍ୟ ଏକ ଟ୍ରକ ଯାଉଥିଲା। ବେଲପଡା ଛକରେ ଟ୍ରକ୍ଟି ଭାରସାମ୍ୟ ହରାଇ ଛିଡ଼ା ହୋଇଥିବା ଟ୍ରକକୁ ପଛରୁ ପିଟିଥିଲା।

ଫଳରେ ଦୁର୍ଘଟଣା ଘଟାଇଥିବା ଟ୍ରକ୍ର ସମ୍ମୁଖ ଭାଗ ସମ୍ପୂର୍ଣ୍ଣ ଚୂରମାର ହୋଇ ଯାଇଥିବା ବେଳେ ଘଟଣାସ୍ଥଳରେ ହେଲପରଙ୍କ ମୃତ୍ୟୁ ଘଟିଥିଲା। ଡ୍ରାଇଭରଜଣକ ଫସି ରହିଥିବା ବେଳେ ଖବର ପାଇ ବାଲୁଗାଁ ଅଗ୍ନିଶମ ବାହିନୀ ଓ ବାଣପୁର ଥାନା ପୁଲିସ୍ ପହଞ୍ଚିଥିଲେ। ବହୁ ପରିଶ୍ରମ ପରେ କଟର ସାହାଯ୍ୟରେ ଟ୍ରକକୁ କାଟି ଗୁରୁତର ଡ୍ରାଇଭରଙ୍କୁ ବାହାର କରାଯାଇଛି।

ତାଙ୍କୁ ପ୍ରଥମେ ନିକଟସ୍ଥ ଡାକ୍ତରଖାନା ଓ ପରେ ଭୁବନେଶ୍ୱର ସ୍ଥାନାନ୍ତର କରାଯାଇଛି। ହେଲପରଙ୍କ ମୃତଦେହକୁ ଟ୍ରକ୍ରୁ ବାହାର କରାଯାଇ ବ୍ୟବଚ୍ଛେଦ ପାଇଁ ପଠାଯାଇଛି। ପୁଲିସ୍ ଏହି ଘଟଣାର ତଦନ୍ତ ଆରମ୍ଭ କରିଛି।

ବାଣପୁର (ସୀତାରାମ ଅଗ୍ରୱାଲ): ବାଲୁଗାଁ ବାଣପୁର ରୋଡ଼ ଅନ୍ତର୍ଗତ ଗୋପିକାନ୍ତପୁର ଠାରେ ଏକ ଘରୁ ଦୁର୍ବୁତ୍ତ ମାନେ ଘରେ କେହି ନଥିବାର ସୁଯୋଗ ନେଇ ତାଲା ଭାଙ୍ଗି ଚୋରି କରିଥିବାର ଥାନାରେ ଅଭିଯୋଗ ହୋଇଛି। ସୂଚନା ମୁତାବକ ଗୋପିକାନ୍ତ ପୁର ଗ୍ରାମର ରମେଶ କୁମାର ଦାସ ଭୁବନେଶ୍ୱରରେ ରହୁଥିବା ବେଳେ ଘରେ ଦୁର୍ବୁତ୍ତ ମାନେ କଳାକନା ବୁଲାଇ ଛନ୍ତି। ଗତ ରାତିରେ ତାଲା ଭାଙ୍ଗି ଘରେ ଥିବା ଏକ ମୋଟର ସାଇକେଲ, ପାଣି ମୋଟର ସହ ଆଲମିରା ଭାଙ୍ଗି ଦରକାରୀ କାଗଜପତ୍ର ଏବଂ ବିଭିନ୍ନ ଆସବାବ ପତ୍ର ନେଇଯାଇଥିଲେ।

ଆଜି ସକାଳେ ବାପାଙ୍କ ଠାରୁ ଖବର ପାଇ ଆସି ଘରେ ଦେଖନ୍ତି ଘର କବାଟ ଖୋଲା ଥାଇ ଆସବାବ ପତ୍ର ଏଣେତେଣେ ବିଛାଡି ହୋଇ ପଡିଛି। ଉକ୍ତ ଘଟଣାକୁ ରମେଶଙ୍କ ପତ୍ନୀ କଲ୍ୟାଣୀ ଦାସ ଥାନାରେ ଜଣାଇବା ପରେ ପୋଲିସ ତଦନ୍ତ ଜାରି ରଖିଛି।

ବାଣପୁର: ଆଜି ଓଡ଼ିଶା ରାଜ୍ୟ ଭାରତ ସ୍କାଉଟ ଗାଇଡ୍ ସହାୟତାରେ ଗୋଦାବରୀଶ ମହାବିଦ୍ୟାଳୟର ରୋଭର ରେଞ୍ଜରଙ୍କ ଦ୍ବାରା କଲେଜ ରୋଡ଼ର ଭାଗୀରଥୀ ମଣ୍ଡପ ପାର୍ଶ୍ଵରେ ଏକ ଜଳ ସେବା ଶିବିର ଅନୁଷ୍ଠିତ ହୋଇଯାଇଛି। ଅଧ୍ୟକ୍ଷ ବିନାୟକ ହୋତାଙ୍କ ଉପସ୍ଥିତିରେ ଜଳ ସେଵା କାର୍ଯକ୍ରମ ଅନୁଷ୍ଠିତ ହୋଇ ଯାଇଛି।

ଏହି କାର୍ଯ୍ୟକ୍ରମ ତା.୨୨.୪.୨୦୨୪ ରିଖ ଠାରୁ ୧.୫.୨୦୨୪ ରିଖ ପର୍ଯ୍ୟନ୍ତ ପରିଚାଳିତ ହେବ। ପ୍ରଥମ ଦିନ କାର୍ଯ୍ୟକ୍ରମରେ ଅନୁଷ୍ଠାନର ପ୍ରଶାସନିକ ଅଧିକାରୀ ଏସ୍.ପି.ଏନ୍.ଏସ୍ ବର୍ମା ,+୨ କାର୍ଯ୍ୟ ନିର୍ବାହୀ ଅଧିକାରୀ ଲକ୍ଷ୍ମୀ ପ୍ରସାଦ ମିଶ୍ର, ଆଦିତ୍ୟ ସାରଥୀ ବେଦମତା, କୁମାରୀ ଉତ୍କଳିକା ପାଢୀ ଏବଂ ପ୍ରାକ୍ତନ ରୋଭର ଛାତ୍ର ସୁନିଲ୍ କୁମାର ସ୍ୱାଇଁ, ନିତିଶ୍ କୁମାର ବିଶ୍ବାଳ, ସିତୁନ ମହାପାତ୍ର ଓ ରୋଭର ତୁଷାର, ଅନିରୁଧ ଏବଂ ରେଞ୍ଜର ଚିନ୍ମୟୀ, ମୋନାଲିସା, ବର୍ଷା, ସରିତା, ଗାୟତ୍ରୀ, ଶ୍ରଦ୍ଧାଞ୍ଜଳୀ, ଅନନ୍ୟା, ଇତିଶ୍ରୀ, ଶର୍ମିଷ୍ଠା, ରୂପା, ଇତି, ବିଷ୍ଣୁପ୍ରିୟାଙ୍କ ଉପସ୍ଥିତିରେ ଦିବା ୧୧ ଘଟିକା ଠାରୁ ୨ ଘଟିକା ପର୍ଯ୍ୟନ୍ତ ପ୍ରାୟ ୧୨୦(ଏକ ଶହ କୋଡିଏ) ଲୋକଙ୍କୁ ଦହି ସରବତ ପ୍ରଦାନ କରାଯାଇଛି।

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ଅବକାରୀ ଅଧିକ୍ଷକ ସୁମତି ତ୍ରିପାଠୀଙ୍କ ନିର୍ଦ୍ଦେଶକ୍ରମେ ଆଜି ସକାଳେ ବାଣପୁର ଥାନା ଅଞ୍ଚଳରେ ପୋଲିସ ଏବଂ ଅବକାରୀ ବିଭାଗର ମିଳିତ ଚଢ଼ାଉ କରାଯାଇଛି। ଦାଶରଥିପୁର ଗ୍ରାମ ଏବଂ କୋଷରଡ଼ା ଜଙ୍ଗଲ ଅଞ୍ଚଳରେ ଉକ୍ତ ଚଢ଼ାଉ କରାଯାଇଥିଲା।

ଏହି ସମୟରେ କୋଷରଡ଼ା ଅଞ୍ଚଳରୁ ସମୁଦାୟ ୨୨ ହଜାର ଲିଟର ପୋଚ ଏବଂ ୨୧୦୦ ଲିଟର ଦେଶୀ ମଦ ଜବତ କରାଯାଇ ନଷ୍ଟ କରିଦିଆଯାଇଛି। ଅନୁରୂପ ଭାବେ ଦାଶରଥିପୁର ଗ୍ରାମରୁ ୪୯ ଲିଟର ଦେଶୀ ମଦ ସମେତ ଜଣେ ଅଭିଯୁକ୍ତଙ୍କୁ ଗିରଫ କରାଯାଇଥିବା ଜଣାପଡିଛି। ଉକ୍ତ ଚଢ଼ାଉରେ ଟାଙ୍ଗୀ ରେଞ୍ଜ ଅବକାରୀ ଇନ୍ସପେକ୍ଟର ନାରାୟଣ ଜେନା, ଜିଲ୍ଲା ମୋବାଇଲ ଇନ୍ସପେକ୍ଟର ତପସ୍ୱିନୀ ବରାଳ, ବାଲୁଗାଁ ଅବକାରୀ ଅଧିକାରୀ ସ୍ମିତା ପଣ୍ଡା, ବାଣପୁର ଥାନା ଏଏସଆଇ ଅନିଲ ନାୟକ ଏବଂ ପୋଲିସ ଓ ଅବକାରୀ କର୍ମଚାରୀ ମାନେ ସାମିଲ ଥିଲେ।

ଚିଲିକା (ସୀତାରାମ ଅଗ୍ରୱାଲ): ଖୋର୍ଦ୍ଧାରେ ନୂତନ ଏସପି ଭାବେ ଗତ ଦୁଇ ଦିନ ତଳେ ଅବିନାଶ କୁମାର ଯୋଗଦେବା ପରେ ଜିଲ୍ଲାର ବିଭିନ୍ନ ଥାନା ଅଞ୍ଚଳ ଗସ୍ତକରି ସେଠାକାର ନିର୍ବାଚନ ସୁରକ୍ଷା ବ୍ୟବସ୍ଥା ଏବଂ ଆଇନ ଶୃଙ୍ଖଳା ସ୍ଥିତି ତଦାରଖ ଜାରି ରଖିଛନ୍ତି। ଏହି ପରିପ୍ରେକ୍ଷୀରେ ନୂତନ ଏସପି ଗତକାଲି ବାଲୁଗାଁ ଓ ବାଣପୁର ଥାନା ପରିଦର୍ଶନ କରିଥିଲେ।  ଅପରାହ୍ନରେ ବାଲୁଗାଁ ଥାନା ପହଞ୍ଚିବା ପରେ ଏସପିଙ୍କୁ ବାଲୁଗାଁ ଏସଡିପିଓ ଶୁଭ୍ରାଂଶୁ ଶେଖର ମିଶ୍ର, ବାଲୁଗାଁ ଆଇଆଇସି ଜୟପ୍ରକାଶ ପରିଡ଼ା ଏବଂ ଅନ୍ୟ ସମସ୍ତ ପୋଲିସ କର୍ମଚାରୀ ମାନେ ଗାର୍ଡ ଅଫ ଅନର ପ୍ରଦାନ କରିବା ସହ ସ୍ୱାଗତ ଜଣାଇଥିଲେ।

ଏହି ଅବସରରେ ଏସପି ଶ୍ରୀ କୁମାର ବାଲୁଗାଁ ଥାନା ଏବଂ ଏହାର ସୀମାନ୍ତବର୍ତ୍ତୀ ଅଞ୍ଚଳ ତଥା ଖୋର୍ଦ୍ଧା ଓ ଗଞ୍ଜାମ ଜିଲ୍ଲା ସୀମାରେ ଥିବା ନାଭାଲ ଫାଣ୍ଡି ଅଞ୍ଚଳ ପରିଦର୍ଶନ କରିଥିଲେ।  ସଂନ୍ଧ୍ୟାରେ ନୂତନ ଏସପି ବାଣପୁର ଥାନାରେ ପହଞ୍ଚି ସେଠାର ଆଇନ ଶୃଙ୍ଖଳା ସ୍ଥିତି ପରଖିଥିଲେ।

ଏହି ଅବସରରେ ତାଙ୍କୁ ବାଣପୁର ଆଇଆଇସି ରମେଶ ଚନ୍ଦ୍ର ଦେବତା ଏବଂ ଥାନାର ସମସ୍ତ ପୋଲିସ କର୍ମଚାରୀ ମାନେ ଗାର୍ଡ ଅଫ ଅନର ପ୍ରଦାନ କରିବା ସହ ସ୍ୱାଗତ ଜଣାଇଥିଲେ।  ତେବେ ସାଧାରଣ ନିର୍ବାଚନରେ ପୋଲିସର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ଚଳିତ ନିର୍ବାଚନକୁ ଅବାଧ, ନିରପେକ୍ଷ ଏବଂ ଶାନ୍ତିଶୃଙ୍ଖଳା ଭାବେ ପରିଚାଳନା କରିବା ପାଇଁ ସମସ୍ତ ଅଧିକାରୀଙ୍କୁ ଏସପି ତାଗିଦ କରିଥିଲେ।