Tag: ବିଜେଡି

ଭୁବନେଶ୍ବର: ବର୍ତ୍ତମାନ ଚିଲିକା ନିର୍ବାଚନ ମଣ୍ଡଳୀର ସବୁଠାରୁ ବଡ ଚର୍ଚ୍ଚା ହେଉଛି, ଆଗାମୀ ନିର୍ବାଚନରେ ବିଜେଡିରୁ ବିଧାୟକ ପ୍ରାର୍ଥୀ କିଏ ହେବ। କାରଣ ସମସ୍ତେ ଭାବି ନେଇଛନ୍ତି ଯେ, ବିଧାୟକ ପ୍ରଶାନ୍ତ ଜଗଦେବଙ୍କୁ ଆଉ ଟିକେଟ ମିଳିବ ନାହିଁ। ଯେହେତୁ ସେ ବର୍ତ୍ତମାନ ସୁଦ୍ଧା ଦଳରେ ସାମିଲ ହୋଇ ନାହାଁନ୍ତି, ସେଥିପାଇଁ ଏହି ଆଶଙ୍କା ବୃଦ୍ଧି ପାଇବାରେ ଲାଗିଛି।

ଏପରି ପରିସ୍ଥିତିକୁ ଦେଖି କେତେକ ନୂଆ ପୁରୁଣା ନେତା ବର୍ତ୍ତମାନ ବିଧାୟକ ପ୍ରାର୍ଥୀ ହେବେ ବୋଲି ଆଶା ବାନ୍ଧି ବସିଛନ୍ତି। ସେମାନେ ନିଜ ନିଜ ଚିହ୍ନା ପରିଚୟ ମାଧ୍ୟମରେ ଲବି ମଧ୍ୟ କରୁଥିବାର ଜଣାପଡିଛି। ସବୁଠାରୁ ବଡ ଆଶା ଯିଏ ବାନ୍ଧିଛନ୍ତି ସେ ହେଲେ ପୂର୍ବତନ ବିଧାୟକ ରଘୁନାଥ ସାହୁ। ସେ ଟିକେଟ ପାଇବେ ବୋଲି ଗୋଡ ଟେକି ବସିଛନ୍ତି। ସେପଟେ ଏହି ଅଞ୍ଚଳର ମାନସ ମଙ୍ଗରାଜ ଯେ କି ବର୍ତ୍ତମାନ ରାଜ୍ୟସଭା ସାଂସଦ ଅଛନ୍ତି ସେ ମଧ୍ୟ କୁଆଡେ ଚିଲିକାରୁ ଛିଡା ହେବେ ବୋଲି ଚର୍ଚ୍ଚା ଚାଲିଛି।

ତେବେ ଏହି ତାଲିକା ଛୋଟ ନୁହେଁ କିମ୍ବା ଦୁଇ ବା ତିନି ଜଣ ଭିତରେ ମଧ୍ୟ ସୀମିତ ନାହିଁ। ଏହା ତାଲିକା ଲମ୍ବିବାରେ ଲାଗିଛି। ଆଶ୍ଚର୍ଯ୍ୟର କଥା ନିର୍ବାଚନ ସମୟ ଯେତିକି ଯେତିକି ପାଖେଇ ଆସୁଛି ଏହି ଆଶାୟୀ ତାଲିକା ସେତିକି ବଢିବାରେ ଲାଗିଛି। ତେବେ ଚର୍ଚ୍ଚା ଅନୁସାରେ ଚିଲିକାରେ ବର୍ତ୍ତମାନ ଯେଉଁମାନଙ୍କର ନାମ ବେଶୀ ଆଲୋଚନା ହେଉଛି ସେମାନେ ହେଲେ..

1- ପ୍ରଶାନ୍ତ ଜଗଦ୍ଦେବ, ପୁଣି ଥରେ ଟିକେଟ ପାଇ ପାରନ୍ତି

2-ରଘୁନାଥ ସାହୁ, ପୂର୍ବତନ ବିଧାୟକ

3-ଗୋପୀ ମହାରଣା, ଖୋର୍ଦ୍ଧା ଜିଲ୍ଲା ପରିଷଦ ଉପସଭାପତି

4-ମାନସ ମଙ୍ଗରାଜ, ରାଜ୍ୟସଭା ସାଂସଦ

5- ପ୍ରଭାସ ସୁନ୍ଦରାୟ, ଖୋର୍ଦ୍ଧା ଜିଲ୍ଲା ବିଜେଡି ଉପସଭାପତି  ( ସ୍ତ୍ରୀ ଜିଲ୍ଲା ପରିଷଦ ସଦସ୍ୟା)

6- ସ୍ବାଗତିକା ଜଗଦ୍ଦେବ, ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ପତ୍ନୀ

ତେବେ ଏହି ତାଲିକାର କିନ୍ତୁ ଶେଷ ନାହିଁ। ଗତ ପଞ୍ଚାୟତ ଓ ପୌର ନିର୍ବାଚନରେ ଯେଉଁମାନେ ଜିତିଛନ୍ତି ସେମାନଙ୍କ ମଧ୍ୟରୁ ଅର୍ଦ୍ଧାଧିକ ବଡ ଆଶାୟୀ ହୋଇ ରହିଛନ୍ତି। ଏପରିକି ଯେଉଁମାନେ ହାରିଛନ୍ତି ସେମାନଙ୍କର ଆଶା ମଧ୍ୟ ମଉଳି ନାହିଁ। ତେବେ କମ ଚର୍ଚ୍ଚାରେ ଆସୁଥିବା ନାମ ମଧ୍ୟରେ ଯେଉଁମାନେ ଅଛନ୍ତି ସେମାନେ ହେଲେ

1- ମିଟୁ ନାୟକ, ବାଣପୁର ଏନଏସି ଅଧ୍ୟକ୍ଷ

2-ମନୋଜ ପ୍ରଧାନ, ବିଧାୟକ ପ୍ରତିନିଧି ଏବଂ ପୂର୍ବତନ ସରପଞ୍ଚ

3-ଉତ୍ପଳ ପାଇକରାୟ, ପୂର୍ବତନ ଜିଲ୍ଲା ପରିଷଦ ସଦସ୍ୟ

4- ସନ୍ତୋଷ କୁମାର ଦେବ, ପାରିକୂଦ ରାଜା

ଏତିକି ନୁହେଁ ଆହୁରି ଅନେକ ସରପଞ୍ଚ, ଜିଲ୍ଲାପରିଷଦ ସଦସ୍ୟ ଏହି ଆଶାୟୀ ତାଲିକାରେ ଅଛନ୍ତି, ଯାହା ସମସ୍ତଙ୍କ ନାମ ଲେଖିବା ସମ୍ଭବ ନୁହେଁ।

ହେଲେ ସବୁଠାରୁ ଆଶ୍ଚର୍ଯ୍ୟର ଘଟଣା ହେବ ଯେ ଏହି ନିର୍ବାଚିତ ପ୍ରତିନିଧୀମାନଙ୍କ ମଧ୍ୟରୁ ଯଦି କେହି ବିଧାୟକ ଟିକେଟ ପାଏ ତେବେ ଅନ୍ୟମାନେ ଅସନ୍ତୁଷ୍ଠ ହୋଇ ବିରୋଧ କରିବା ନିଶ୍ଚିତ। କାରଣ ଚିଲିକାରେ ବର୍ତ୍ତମାନ ଶୀର୍ଷ ନେତା କେହି ନ ଥିବାରୁ ଏମାନଙ୍କ ମଧ୍ୟରେ ତାଳମେଳ ରହୁ ନାହିଁ। ସମସ୍ତେ ଜଣେ ଜଣେ ବଡ ନେତା ବୋଲି ନିଜକୁ ଭାବୁଛନ୍ତି। ଉପରେ ଉପରେ ସମସ୍ତେ ଭଲ, ହେଲେ ଭିତର ଭିତରେ କିଏ କାହାକୁ ଦେଖିପାରୁ ନାହାଁନ୍ତି।

ତେବେ ଚିଲିକାକୁ ନେଇ ବିଜେଡି ଦଳ ତରଫରୁ ଏ ପର୍ଯ୍ୟନ୍ତ କୌଣସି ସଙ୍କେତ ବା ଆଭାସ ମିଳିପାରି ନାହିଁ। ପ୍ରକୃତରେ କିଏ ଚିଲିକାର ବିଜେଡି ମଙ୍ଗ ଧରିବା ତାହା ଏକ କୁହେଳିକା ଭିତରେ ରହିଛି। ହେଲେ ସବୁବେଳେ ମାଷ୍ଟର ଷ୍ଟ୍ରୋକ ଖେଳୁଥିବା ବିଜେଡି, ଠିକ ନିର୍ବାଚନ ସମୟରେ ଚର୍ଚ୍ଚାରେ ନ ଥିବା ବ୍ୟକ୍ତିଙ୍କୁ ଟିକେଟ ଦେବାର ସମ୍ଭାବନାକୁ ମଧ୍ୟ କେବେ ଏଡାଇ ହେବ ନାହିଁ।

ଭୁବନେଶ୍ବର: ଆଜି ବିଜୁ ଜନତା ଦଳ ତାହାର ଖୋର୍ଦ୍ଧା ଜିଲ୍ଲାର ନୂଆ କର୍ମକର୍ତ୍ତାଙ୍କ ନାମ ଘୋଷଣା କରିଛି। ଦଳର ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସ୍ବୀକୃତି ପରେ ଦଳ ତରଫରୁ ଏହି ବିଜ୍ଞପ୍ତି ପ୍ରକାଶ କରାଯାଇଛି। ସେହି ଅନୁସାରେ ପୂର୍ବପରି ଖୋର୍ଦ୍ଧା ଜିଲ୍ଲା ବିଜେଡି ସଭାପତି ଭାବେ ବିଭୂତି ବଳବନ୍ତରାୟଙ୍କୁ ପୁଣି ନିଯୁକ୍ତି ଦିଆଯାଇଛି।

ଏହି ନୂଆ ବିଜ୍ଞପ୍ତି ଅନୁସାରେ ରାମଚନ୍ଦ୍ର ମହାପାତ୍ରଙ୍କୁ ଉପଦେଷ୍ଠା ଭାବେ ନିଯୁକ୍ତି ଦିଆଯାଇଛି। ସେହିପରି ଏହି ନୂଆ ନିଯୁକ୍ତିରେ 39 ଜଣ ଉପସଭାପତି ରହିଛନ୍ତି।

ସେହିପରି 33 ଜଣଙ୍କୁ ସାଧାରଣ ସଂପାଦକ ଭାବେ ନିଯୁକ୍ତି ଦିଆଯାଇଛି। ଏହି ନୂଆ ନିଯୁକ୍ତି ବିଜେଡି 42 ଜଣଙ୍କୁ ସଂପାଦକ ଭାବେ ନେଇଛି। ଏ ନେଇ ପୂର୍ବରୁ ଯେଉଁ ବିଜ୍ଞପ୍ତି ବାହାରିଥିଲା ତାହାକୁ ବାତିଲ କରି ନୂଆକୁ କାର୍ଯ୍ୟକାରୀ କରାଗଲା ବୋଲି କୁହାଯାଇଛି।

ଭୁବନେଶ୍ଵର: ଓଡ଼ିଶାରେ ବିରୋଧୀଦଳ ବିଜେପି ନିର୍ଲଜ୍ଜ ଭାବେ ବାରମ୍ବାର ମିଛ କହି ଚାଲିଛି। ମିଛର ଆଶ୍ରୟ ନେଇ ବିରୋଧୀଦଳ ନେତା ଓଡ଼ିଶାବାସୀଙ୍କୁ ଅପମାନିତ କରୁଛନ୍ତି। କିନ୍ତୁ ମିଛକୁ ରଣନୀତି କରି ବିରୋଧୀଦଳ କେବେବି ଲୋକଙ୍କ ଭରସା ଜିତି ପାରିବ ନାହିଁ। ଆଜି ବିରୋଧୀଦଳ ନେତା ଜୟନାରାୟଣ ମିଶ୍ରଙ୍କ ମନ୍ତବ୍ୟର ଏଭଳି ଜବାବ ଦେଇଛି ବିଜୁ ଜନତା ଦଳ।

ଆଜି ଏକ ସାମ୍ବାଦିକ ସମ୍ମିଳନୀରେ ବିଜେଡି ମୁଖପାତ୍ର ଡ. ଲେନିନ ମହାନ୍ତି କହିଛନ୍ତି, ଜୟନାରାୟଣ ମିଶ୍ର ବିରୋଧୀଦଳ ନେତା ନୁହନ୍ତି, ସେ ଜଣେ ଓଡ଼ିଶା ବିରୋଧୀ ନେତା। ସେ ଯେଉଁଭଳି ଟିପ୍ପଣି ଦେଉଛନ୍ତି, ଏଥିରୁ ସ୍ପଷ୍ଟ ଯେ ଜଣେ ଓଡ଼ିଆ ହୋଇ ମଧ୍ୟ ସେ ଓଡ଼ିଶାର ଉନ୍ନତି ଚାହାନ୍ତି ନାହିଁ। ଓଡ଼ିଶାବାସୀଙ୍କ ପ୍ରତି ତାଙ୍କର କୌଣସି ଦରଦ ନାହିଁ। ବିଧାନସଭା ଭିତରେ ହେଉ କି ବାହାରେ; ସଦାବେଳେ କେବଳ ହୀନ ରାଜନୈତିକ ଉଦ୍ଦେଶ୍ୟ ରଖି ସେ ମନ୍ତବ୍ୟ ଦିଅନ୍ତି ଏବଂ ଓଡ଼ିଶାକୁ ନିଂଦିତ କରିବାର କୌଣସି ସୁଯୋଗ ହାତଛଡ଼ା କରନ୍ତି ନାହିଁ। ଓଡ଼ିଶା ବିଜେପିକୁ ଆମେ କହିବାକୁ ଚାହୁଁ; ଆପଣ ନିର୍ଲଜ୍ଜ ଭାବେ ମିଛ କହୁଛନ୍ତି। ମାତ୍ର ବାରମ୍ବାର ଯେତେ ମିଛ କହିଲେ ମଧ୍ୟ ମିଛ କେବେ ସତ ପାଲଟିଯିବ ନାହିଁ। ଓଡ଼ିଶାବାସୀ ସବୁ ଜାଣନ୍ତି ଏବଂ ଯଥେଷ୍ଟ ସଚେତନ ଅଛନ୍ତି।

ଆପଣ ଏଭଳି ବାରମ୍ବାର ମିଛ କହି ଚାଲିଥିବାରୁ ଲୋକଙ୍କ ବିଶ୍ଵାସ ଜିତିବାରେ ସମର୍ଥ ହେଉ ନାହାନ୍ତି। ଆମେ ମଧ୍ୟ ଏହା ବିଶ୍ବାସ କରୁ ଯେ ଗଣତନ୍ତ୍ରରେ ସୁସ୍ଥ ବିରୋଧୀଦଳର ଆବଶ୍ୟକତା ରହିଛି। ମାତ୍ର ମିଛ କେବେବି ଏକ ସୁସ୍ଥ ବିରୋଧୀଦଳର ରଣନୀତି ହୋଇପାରିବ ନାହିଁ। ବିରୋଧୀଦଳ ନେତା ହେଉଛନ୍ତି ଓଡ଼ିଶାରେ ଅରାଜକତାର ପ୍ରତୀକ। ଆଇନର ଫାଶରୁ ମୁକୁଳିବା ପାଇଁ ସେ କେବଳ କାର୍ଯ୍ୟାନୁଷ୍ଠାନକୁ ବିଳମ୍ବ କରିବାର କୌଶଳ ଆପଣେଇଛନ୍ତି ବୋଲି ଡ. ମହାନ୍ତି କହିଛନ୍ତି।

ଭୁବନେଶ୍ୱର: ଓଡିଶା ବିଜେପି ମୁଖପାତ୍ର ଶ୍ରୀମତୀ ଲେଖାଶ୍ରୀ ସାମନ୍ତସିଂହାର ୨୦୧୪ ରେ ଖୋଲାଖୋଲି ଭାବେ ନବୀନ ନିବାସକୁ ଆସି ୨୦୧୪ ନିର୍ବାଚନ ପାଇଁ ବିଜେଡି ଟିକେଟ ମାଗିଥିଲେ। ୨୦୧୯ ରେ ସେ ପୁନର୍ବାର ଲୁଚିଛପି ନବୀନ ନିବାସ ଆସି ବିଜେଡି ପାର୍ଟି ଟିକେଟ ମାଗିଥିଲେ। ଆମେ ଜାଣୁ ସେ ପୁଣି ୨୦୨୪ ରେ ଲୁଚିଛପି ଆସି ବିଜେଡି ପାର୍ଟି ଟିକେଟ ମାଗିବେ ବୋଲି କହିଛନ୍ତି ବିଜେଡି ପ୍ରବକ୍ତା ଇପ୍ସିତା ସାହୁ।

ବିଜେପି ସାମ୍ବାଦିକ ସମ୍ମିଳନୀର ଜବାବରେ ବିଜେଡି ପ୍ରବକ୍ତା ସୁଶ୍ରୀ ସାହୁ କହିଛନ୍ତି ଯେ ଲେଖାଶ୍ରୀ ଜଣେ ଆତ୍ମ-ଘୋଷିତ ତଦନ୍ତକାରୀ ଅଧିକାରୀ ଏବଂ ଫରେନସିକ୍ ବିଶେଷଜ୍ଞ ଯାହାଙ୍କୁ ତାଙ୍କ ଦଳର କିଛି ଲୋକ ମାମଲାର ତଦନ୍ତ ଉପରେ ଆଲୋଚନା କରିବାକୁ ନିୟୋଜିତ କରିଛନ୍ତି। ସେ ଘଟଣା ସଂକ୍ରାନ୍ତରେ କିଛି ନବୁଝି ନସୁଝି ମତ ରଖନ୍ତି। ତେଣୁ ସେ ଲୋକଙ୍କ ଆଖିରେ ସବୁବେଳେ ଜୋକର ହୋଇଥାନ୍ତି।

ଜଣେ ମହିଳା ଭାବରେ ତାଙ୍କୁ କ’ଣ ତାଙ୍କ ବରିଷ୍ଠ ଦଳର ବିଧାୟକ ତଥା ବିରୋଧୀ ଦଳର ନେତା ଶ୍ରୀ ଜୟନାରାୟଣ ମିଶ୍ର ଜଣେ କର୍ତ୍ତବ୍ୟରତ ମହିଳା ପୋଲିସ ଅଧିକାରୀଙ୍କୁ ଯେଭଳି ମାଡ ମାରିଲେ ତାହା ଦିଶୁ ନାହିଁ କି ବୋଲି ସୁଶ୍ରୀ ସାହୁ ପ୍ରଶ୍ନ କରିଛନ୍ତି। ସେ ଏ ବିଷୟରେ ଚୁପ୍ ରହିଛନ୍ତି କାରଣ ସେ ଭୟ କରୁଛନ୍ତି ଯେ ତାଙ୍କୁ ମଧ୍ୟ ଶ୍ରୀ ଜୟ ନାରାୟଣ ମିଶ୍ର ଚପଲରେ ମାରି ପାରନ୍ତି ଯେପରି ସେ ଓଡିଶା ବିଜେପି ରାଜ୍ୟ ସଭାପତି ଶ୍ରୀ ସମୀର ମହାନ୍ତିଙ୍କୁ ମାରିଥିଲେ।

ଗଣମାଧ୍ୟମ ଆଗରେ ଏପରି ପୂର୍ବ ପ୍ରସ୍ତୁତ କାହାଣୀ ଉପସ୍ଥାପନ କରିବା ପୂର୍ବରୁ ଆମେ ତାଙ୍କୁ ପୋଲିସର କିଛି ତଦନ୍ତ ଏବଂ ଫରେନସିକ୍ ପାଠ୍ୟକ୍ରମ ପଢିବା ଲାଗି ଅନୁରୋଧ ସହିତ ପୋଲିସକୁ ତାହାର ତଦନ୍ତ ଏବଂ ନ୍ୟାୟପାଳିକାକୁ ସେମାନଙ୍କର କାର୍ଯ୍ୟ କରିବାକୁ ଅନୁମତି ଦିଅନ୍ତୁ ବୋଲି ବିଜେଡି ପ୍ରବକ୍ତା ସୁଶ୍ରୀ ସାହୁ କହିଛନ୍ତି।

ଭୁବନେଶ୍ବର: ରାଜ୍ୟରେ ପୁଣି ଥରେ ସ୍ବତନ୍ତ୍ର ପ୍ୟାହା ରାଜନୀତି ଜୋର ଧରିଛି। ବିଗତ ଦିନରେ ଏହାକୁ ନେଇ ବହୁ ତୁମ୍ବି ତୋଫାନ ହୋଇଛି। ଏପରିକି ବିଜେଡି ଦିଲ୍ଲୀରେ ମଧ୍ୟ ଆନ୍ଦୋଳନ କରିଛି। ହେଲେ ଗତକିଛି ବର୍ଷ ଏହି ସ୍ବତନ୍ତ୍ର ପ୍ୟାହା ରାଜନୀତି ଥମିଯାଇଥିବା ବେଳେ ଏବେ ହଠାତ ଏହା ଉପରକୁ ଉଠି ଆସିଛି। ଫଳରେ ବିଜେପି ଉପରେ ବିଜେଡିର ଆକ୍ରମଣ ଆରମ୍ଭ ହୋଇଯାଇଛି।

ଓଡିଶା ଗସ୍ତରେ ଆସିଥିବା କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ସାମ୍ବାଦିକ ସମ୍ମିଳନୀ ପରେ ଏହି ପ୍ରସଂଗ ପୁଣି ଥରେ ଉଦଜିବୀତ ହୋଇପଡିଛି। ସାମ୍ବାଦିକ ସମ୍ମିଳନୀରେ ସୀତାରମଣ କହିଥିଲେ ଯେ ଓଡିଶା ନୁହେଁ କୌଣସି ରାଜ୍ୟକୁ ଆଉ ସ୍ବତନ୍ତ୍ର ପ୍ୟାହା ପ୍ରଦାନ କରାଯିବ ନାହିଁ। ସାମ୍ବାଦିକଙ୍କ ପ୍ରଶ୍ନର ଉତ୍ତରରେ ସୀତାରମଣ ଏହାକୁ ରୋକଠୋକ ମନା କରିଦେଇଥିଲେ।

ଏହାପରେ ବିଜେଡିର ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ ବା ବବି ଦାସ ଏକ ଟୁଇଟ କରି ବିଜେପିର ମୁଖା ଖୋଲିଦେଲେ। ବବି ବିଜେପିର ନିର୍ବାଚନ ଇସ୍ତାହାର ଉନମୋଚନର ଏକ ଫଟୋ ପୋଷ୍ଟ କରି ଦଳର ପ୍ରତିଶୃତିକୁ ମନେ ପକାଇଛନ୍ତି।

ସେ କହିଛନ୍ତି “ଇସ୍ତାହାରରେ ଓଡିଶାକୁ ସ୍ୱତନ୍ତ୍ର ରାଜ୍ୟ ମାନ୍ୟତା ମିଳିବ ବୋଲି ରାଜ୍ୟବାସୀଙ୍କୁ ପ୍ରତିଶ୍ରୁତି ଦେଇଥିଲେ। କିନ୍ତୁ ବିଡ଼ମ୍ବନା ହେଲା, ମାନ୍ୟବର କେନ୍ଦ୍ର ଅର୍ଥମନ୍ତ୍ରୀ ଓଡ଼ିଶା ମାଟିରେ ଠିଆ ହୋଇ ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ମାନ୍ୟତା ଦେବାକୁ ରୋକଠୋକ୍ ମନା କରିଦେଲେ । ଏହା ଓଡ଼ିଶାବାସୀଙ୍କୁ ଚକିତ ଏବଂ କ୍ଷୁବ୍ଧ କରିଛି।’

ବବି ଆହୁରି କହିଛନ୍ତି ଯେ, “ଓଡ଼ିଶା ବିଜେପିକୁ ମୁଁ ଆହ୍ଵାନ କରୁଛି, ରାଜ୍ୟବାସୀ ଆପଣଙ୍କୁ ୮ଜଣ ସାଂସଦ ଦେଇଛନ୍ତି। ୩ଜଣ କେନ୍ଦ୍ରମନ୍ତ୍ରୀ ବି ଅଛନ୍ତି। ତେଣୁ ରାଜ୍ୟବାସୀଙ୍କୁ ଦେଇଥିବା ପ୍ରତିଶ୍ରୁତି ପାଳନ କରନ୍ତୁ। ମାଟି ପାଇଁ ପାର୍ଟି ଆଗରେ ମୁଣ୍ଡ ନ ନୁଆଁଇ ଓଡ଼ିଶାର ହକ୍ ପାଇଁ ଲଢ଼ନ୍ତୁ। ପ୍ରତିଶ୍ରୁତି ଦେଇ ଧୋକା ଦେଲେ, ଓଡ଼ିଶାବାସୀ କେବେ କ୍ଷମା ଦେବେ ନାହିଁ।”

ପ୍ରଣବ ପ୍ରକାଶ ଏକ ସିରିଜ ଟୁଇଟ କରି ଉଲ୍ଲେଖ କରିଛନ୍ତି ଯେ, ଓଡିଶାକୁ ସ୍ବତନ୍ତ୍ର ରାଜ୍ୟ ପ୍ୟାହା ପାଇଁ ବିଜେଡି ତାହାର ସଂଗ୍ରାମ ଜାରୀ ରଖିବ। ସେ ଟୁଇଟରେ କହିଛନ୍ତି “କେନ୍ଦ୍ର ସରକାର ଭଲ ଭାବେ ଜାଣନ୍ତି-ବାତ୍ୟା, ବନ୍ୟା, ମରୁଡ଼ି ଭଳି ପ୍ରାକୃତ୍ରିକ ବିପର୍ଯ୍ୟୟ ଓଡ଼ିଶାର ଚିରସହଚର ସାଜିଥିବାରୁ ସବୁବର୍ଷ ଓଡ଼ିଶାବାସୀ ପ୍ରଭୂତ କ୍ଷତି ସହି ଆସୁଛନ୍ତି। ସେ ଦୃଷ୍ଟିରୁ ସ୍ଵତନ୍ତ୍ର ରାଜ୍ୟ ମାନ୍ୟତା ପାଇବା ଆମର ହକ୍। ଏଥିପାଇଁ ବିଜେଡି ଯେଉଁ ସଂଗ୍ରାମ ଜାରି ରଖିଛି, ଆଗାମୀଦିନରେ ତାକୁ ଆହୁରି ଶାଣିତ କରିବ।”

ଏହାକୁ ନେଇ ବର୍ତ୍ତମାନ ରାଜ୍ୟ ରାଜନୀତି ବେଶ ସରଗରମ ହୋଇଯାଇଛି।

ଭୁବନେଶ୍ୱର : ସେଲଫି ଅଭିଯାନ ପରିବର୍ତ୍ତେ ମହିଳା ସଶକ୍ତିକରଣ ପାଇଁ ଓଡିଶା ବିଜେପି ସଂସଦରେ ମହିଳା ସଂରକ୍ଷଣ ବିଲ୍ ପ୍ରସଙ୍ଗ ନେଇଥାନ୍ତା ଭଲ ହୋଇଥାନ୍ତା। ଏହା କହିଛନ୍ତି ବିଜେଡି ମୁଖପାତ୍ର ଶ୍ରୀମତୀ ଶ୍ରୀମୟୀ ମିଶ୍ର।

ବିଜେପିର ସେଲଫି ଅଭିଯାନ ଉପରେ ଗଣମାଧ୍ୟମକୁ ଶ୍ରୀମତୀ ମିଶ୍ର କହିଛନ୍ତି ଯେ ଉଜ୍ୱଳା ଯୋଜନାରେ ୯୦ ଲକ୍ଷ ମହିଳା ୨୦୨୧-୨୨ ମସିହାରେ ସିଲିଣ୍ଡର ରିଫିଲ କରିପାରି ନ ଥିଲେ ଏବଂ ସେମାନେ ଯନ୍ତ୍ରଣା ଭୋଗିଥିଲେ।

କେନ୍ଦ୍ର ଦ୍ୱାରା ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା ବନ୍ଦ ହେବା କାରଣରୁ ଓଡିଶାର ଏକ କୋଟିରୁ ଅଧିକ ମହିଳା ପ୍ରତି ମାସରେ ଅତିରିକ୍ତ ଭାବେ ମୁଣ୍ଡପିଛା ପାଉଥିବା ୫ କିଲୋଗ୍ରାମ ମାଗଣା ଚାଉଳରୁ ବଞ୍ଚିତ ହେବେ। କେନ୍ଦ୍ର ଓଡିଶାରୁ ବଳକା ଚାଉଳ ଉଠାଉନଥିବାରୁ ଏବଂ ଧାନ କ୍ରୟ ପରିମାଣ ହ୍ରାସ ଯୋଗୁଁ ମହିଳା କୃଷକ ଏବଂ କୃଷକ ପରିବାରରେ ଥିବା ମହିଳା ସଦସ୍ୟମାନେ ଏହାର ଫଳ ଭୋଗିବେ।

କେନ୍ଦୁ ପତ୍ର ଉପରେ ୧୮% ଜିଏସଟି ଲାଗୁ ଯୋଗୁଁ ଜୀବିକା ପାଇଁ କେନ୍ଦୁ ପତ୍ର ସଂଗ୍ରହ କରୁଥିବା ପ୍ରାୟ ୮ ଲକ୍ଷ ଆଦିବାସୀ ମହିଳା କ୍ଷତିଗ୍ରସ୍ତ ହେଉଛନ୍ତି। ସେଲଫି ଅଭିଯାନ କରିବା ପରିବର୍ତ୍ତେ ଯଦି ମହିଳାଙ୍କ ସହ ଜଡିତ ଏହି ପ୍ରକୃତ ପ୍ରସଙ୍ଗକୁ ଓଡ଼ିଶା ବିଜେପି ଉଠାନ୍ତା ତେବେ ରାଜ୍ୟର ମହିଳାଙ୍କ ମଙ୍ଗଳ ହୁଅନ୍ତା ବୋଲି ଶ୍ରୀମତୀ ମିଶ୍ର କହିଛନ୍ତି।