Tag: ବ୍ରହ୍ମପୁର

ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଭିଡିଓ କନ୍‌ଫରେନ୍‌ସିଂ ଜରିଆରେ ବ୍ରହ୍ମପୁରରେ ଦୁଇଟି କୋଭିଡ ହସ୍‌ପିଟାଲ ଉଦ୍‌ଘାଟନ କରିଛନ୍ତି। ଏହି ଅବସରରେ ମୁଖ୍ୟମନ୍ତ୍ରୀ କହିଥିଲେ ଗଞ୍ଜାମ ଜିଲ୍ଲାରେ ସଂକ୍ରମଣ ହାର କ୍ରମାଗତ ଭାବରେ କମୁଛି। ଗଞ୍ଜାମରେ ଆରୋଗ୍ୟ ହାର ଜାତୀୟ ହାର ଠାରୁ ଅଧିକ ରହିଛି ଏବଂ ଜିଲ୍ଲାର ୮୫ ପ୍ରତିଶତ ଗ୍ରାମାଞ୍ଚଳ ସବୁଜ ଅଞ୍ଚଳରେ ରହିଛି। କିନ୍ତୁ ଯେପର୍ଯ୍ୟନ୍ତ ଟୀକା ବା ନିର୍ଦ୍ଦିଷ୍ଟ ଚିକିତ୍ସା ପଦ୍ଧତି ନ ବାହାରିଛି ଏହି ମହାମାରୀ ବିରୁଦ୍ଧରେ ଫଳପ୍ରଦ ଲଢେଇର ଏକମାତ୍ର ଉପାୟ ହେଉଛି ମାସ୍କର ବ୍ୟବହାର, ସାମାଜିକ ଦୂରତ୍ବ ଓ ସରକାରଙ୍କ କୋଭିଡ ନିୟମାବଳୀର ପାଳନ କରିବା ଏବେ ନିତାନ୍ତ ଅପରିହାର୍ଯ୍ଯ। ତେଣୁ ବର୍ତ୍ତମାନ ପରିସ୍ଥିତିରେ ଆତ୍ମସନ୍ତୋଷର କୌଣସି ସ୍ଥାନ ନାହିଁ ବୋଲି କହିଛନ୍ତି ମୁଖ୍ୟମନ୍ତ୍ରୀ।

ଜନସାଧାରଣ କୋଭିଡ ନିୟମାବଳୀକୁ ହାଲକା ଭାବରେ ନ ନେଇ ଏହାର ଗୁରୁତ୍ବକୁ ଭଲ ଭାବରେ ବୁଝନ୍ତୁ। ନିଜର ଏବଂ ନିଜ ପରିବାରର ସୁରକ୍ଷା ଦୃଷ୍ଟିରୁ ସବୁ କୋଭିଡ ନିୟମକୁ କଡାକଡି ଭାବରେ ପାଳନ କରିବା ପାଇଁ ମୁଖ୍ୟମନ୍ତ୍ରୀ ଜନସାଧାରଣଙ୍କୁ  ଏହି ଅବସରରେ ନିବେଦନ କରିଥିଲେ। ଗହଳି ନ ଯିବା ପାଇଁ ମଧ୍ୟ ମୁଖ୍ୟମନ୍ତ୍ରୀ ଜନସାଧାରଣଙ୍କୁ ପରାମର୍ଶ ଦେଇଥିଲେ।

ମୁଖ୍ୟମନ୍ତ୍ରୀ କହିଥିଲେ ଯେ ଅନଲକ-୩ ପରେ ଦେଶର ହଟସ୍ପଟ ଅଞ୍ଚଳରୁ   ଆମର ଭାଇଭଉଣୀମାନେ ଘରକୁ ଫେରିଛନ୍ତି। ଆମର କୋଭିଡ ଯୋଦ୍ଧା ମାନଙ୍କର ତ୍ୟାଗ, ନିଷ୍ଠା ଏବଂ ଗଞ୍ଜାମର ଜନସାଧାରଣଙ୍କର ସହଯୋଗ ଯୋଗୁ ଗଞ୍ଜାମ ଜିଲ୍ଲା ଏହି ମହାମାରୀ ବିରୁଦ୍ଧରେ ସଫଳତାର ସହ ଲଢେଇ ଜାରି ରଖିଛି। ଏଥିପାଇଁ ଜିଲ୍ଲା ପ୍ରଶାସନକୁ ଏବଂ ଗଞ୍ଜାମର ଜନସାଧାରଣଙ୍କୁ ମୁଖ୍ୟମନ୍ତ୍ରୀ ଧନ୍ୟବାଦ ଜଣାଇଥିଲେ। କରୋନା ମହାମାରୀ କବଳରୁ ଲୋକମାନଙ୍କ ଜୀବନରକ୍ଷା ନିମନ୍ତେ ସରକାର ସବୁପ୍ରକାର ଉଦ୍ୟମ ଜାରି ରଖିଛନ୍ତି ବୋଲି ମୁଖ୍ୟମନ୍ତ୍ରୀ ରାଜ୍ୟର ପ୍ରତିବଦ୍ଧତା ପ୍ରକାଶ କରିଥିଲେ।

ଏହି କାର୍ଯ୍ୟକ୍ରମରେ ଯୋଗ ଦେଇ ବାଚସ୍ପତି ଶ୍ରୀ ସୂର୍ଯ୍ୟନାରାୟଣ ପାତ୍ର ସାମାଜିକ ଦୂରତ୍ବ ନିୟମକୁ କଡାକଡି ଭାବରେ ପାଳନ କରିବାକୁ ଗୁରୁତ୍ବ ଦେଇଥିଲେ। ବ୍ରହ୍ମପୁରର ଏହି ଦୁଇଟି ହସ୍‌ପିଟାଲ ଜିଲ୍ଲାର ରୋଗୀଙ୍କୁ ଉପଯୁକ୍ତ ଚିକିତ୍ସା ଯୋଗାଇ ଦେବାରେ ସହାୟକ ହେବ ବୋଲି ଜଂଗଲ ଓ ପରିବେଶ ମନ୍ତ୍ରୀ ଶ୍ରୀ ବିକ୍ରମ କେଶରୀ ଆରୁଖ ଆଶାପ୍ରକାଶ କରିଥିଲେ। ଅନ୍ୟମାନଙ୍କ ମଧ୍ୟରେ ବ୍ରହ୍ମପୁରର ସାସଂଦ ଶ୍ରୀ ଚନ୍ଦ୍ରଶେଖର ସାହୁ, ବ୍ରହ୍ମପୁର ବିଧାୟକ ଶ୍ରୀ ବିକ୍ରମ ପଣ୍ଡା ଯୋଗ ଦେଇଥିଲେ। ଗଞ୍ଜାମ ଜିଲ୍ଲାପାଳ ସ୍ବାଗତ ଭାଷଣ ଦେଇଥିଲେ। ବ୍ରହ୍ମପୁର ମ୍ୟୁନିସ୍‌ପାଲ କମିଶନର ଧନ୍ୟବାଦ ଅର୍ପଣ କରିଥିଲେ।

ଏହି କାର୍ଯ୍ୟକ୍ରମରେ ମୁଖ୍ୟ ଶାସନ ସଚିବ, ମୁଖ୍ୟମନ୍ତ୍ରୀ କାର୍ଯ୍ୟାଳୟର ମୁଖ୍ୟ ଉପଦେଷ୍ଟା, ଉନ୍ନୟନ କମିଶନର, ଅତିରିକ୍ତ ସ୍ବାସ୍ଥ୍ୟ ବିଭାଗର ଅତିରିକ୍ତ ମୁଖ୍ୟ ଶାସନ ସଚିବ, ଅତିରିକ୍ତ ମୁଖ୍ୟ ଶାସନ ସଚିବ ତଥା ସ୍ବତନ୍ତ୍ର ରିଲିଫ କମିଶନର, ମୁଖ୍ୟମନ୍ତ୍ରୀଙ୍କ ସଚିବ (୫-ଟି) ଏବଂ ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।

ସୂଚନାଯୋଗ୍ୟ ଯେ ବ୍ରହ୍ମପୁରର କନିଷି ଠାରେ ଥିବା ଅମିତ୍‌ ହସ୍‌ପିଟାଲରେ କଟକର ଅଶ୍ବିନୀ ହସ୍‌ପିଟାଲ ପକ୍ଷରୁ ଏହି ୧୫୦ ଶଯ୍ୟାବିଶିଷ୍ଟ କୋଭିଡ ହସ୍‌ପିଟାଲ ସ୍ଥାପନ କରାଯାଇଥିବାବେଳେ ଏଥିରେ ୨୪ଟି ଆଇସିୟୁ ବେଡ୍ ରହିଛି। ସେହିପରି ଏମକେସିଜି ହସ୍‌ପିଟାଲର ଶିଶୁ ୱାର୍ଡରେ ନୂଆ କୋଭିଡ ହସ୍‌ପିଟାଲ ଆରମ୍ଭ କରାଯାଇଛି । ଏଥିରେ ମଧ୍ୟ ୧୫୦ଟି ଶଯ୍ୟା ରହିଛି ଏବଂ ୨୪ଟି ଆଇସିୟୁ ବେଡ୍ ଅଛି। ପୂର୍ବରୁ ବ୍ରହ୍ମପୁରର ଶିତଳାପଲ୍ଲୀଠାରେ ଟାଟା କୋଭିଡ ହସ୍‌ପିଟାଲରେ ଚିକିତ୍ସା ଜାରି ରହିଛି।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଦୁର୍ଘଟଣାରେ ଆହତ ଜଣେ ଯୁବକଙ୍କୁ ଆଜି ଗଂଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ଉଦ୍ଧାର କରି ମେଡ଼ିକାଲ୍ ନେବାରେ ସହାୟତା କରିଥିଲେ। ଆଜି ଜଣେ ଯୁବକ ବ୍ରହ୍ମପୁର ଆଡ଼ୁ ଆନ୍ଧ୍ରା ପଟକୁ ଯାଉଥିବାବେଳେ କନିଷି ଛକ ନିକଟରେ ଦୁର୍ଘଟଣାରେ ଶିକାର ହୋଇଥିଲେ। ସେ ରାସ୍ତାରେ ରକ୍ତାକ୍ତ ଅବସ୍ଥାରେ ପଡ଼ିଥିବାବେଳେ ଜିଲ୍ଲାପାଳ ଉକ୍ତ ରାସ୍ତା ଦେଇ ଯାଉଥିଲେ। ସେ ଆହତ ଯୁବକଙ୍କୁ ଦେଖିବା କ୍ଷଣି ଗାଡ଼ିରୁ ଓହ୍ଲାଇ ତୁରନ୍ତ ମେଡ଼ିକାଲ୍ ପଠାଇବା ବ୍ୟବସ୍ଥା କରିଥିଲେ। ଆହତ ଯୁବକର ବର୍ତ୍ତମାନ ସୁଦ୍ଧା ପରିଚୟ ମିଳିପାରିନାହିଁ।

ହେମାଙ୍ଗ ପ୍ରସାଦ ରାଉଳ

ବ୍ରହ୍ମପୁର: ବ୍ରହ୍ମପୁରରେ ଗତକାଲି ଆମ୍ବୁଲାନସ ରୋଗୀ ନନେବାରୁ ଜଣକ ମୃତ୍ୟୁ ଘଟଣା ମନରୁ ନ ଲିଭିଲା ବେଳେ ଆଜି ଡ଼ାକ୍ତରଙ୍କ ଅବହେଳାରୁ ଆଉ ଜଣଙ୍କର ମୃତ୍ୟୁ ଘଟିଛି। ଆଉ ଏକ ହୃଦୟ ବିଦାରକ ତଥା ମାନବିକତାହୀନ ଘଟଣା ଆଜି ଘଟିଯାଇଛି। ଏମ୍‌କେସିଜି ମେଡ଼ିକାଲ୍‌ରେ କାଜୁଆଲ୍‌ଟିରେ ଜନୈକ ବ୍ୟକ୍ତି ଚିକିତ୍ସା ସୁବିଧା ନ ପାଇ ଛଟପଟ ହୋଇ ମୃତ୍ୟୁବରଣ କରିବା ଭଳି ଏକ ଦୁଃଖଦାୟକ ତଥା ମାନବିକହୀନ ଘଟଣା ଆଜି ସହରରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। ଯେତେ ମାଠିବୁ ମାଠ ନୀତିରେ ଚାଲିଛି ସ୍ୱାସ୍ଥ୍ୟ ବ୍ୟବସ୍ଥା।

ଘଟଣାରୁ ପ୍ରକାଶ ଯେ ତିନିଦିନ ତଳେ ଆମ୍ବପୁଆ ନିକଟସ୍ଥ ପ୍ରମୋଦ ଚନ୍ଦ୍ର ବେହେରା (୫୦)ଙ୍କୁ ସାମାନ୍ୟ ଜ୍ୱର ହୋଇଥିଲା। କିନ୍ତୁ ତା’ ପୂର୍ବରୁ ସେ ମଧୁମେହ ରୋଗ ଏବଂ ଉଚ୍ଚରକ୍ତଚାପରେ ପୀଡ଼ିତ ଥିଲେ। କରୋନା ଭୟରେ ସେ ଗତକାଲି ସ୍ଥାନୀୟ ସିଟି ହସ୍‌ପିଟାଲ୍‌କୁ ଯାଇ କୋଭିଡ଼୍ ଟେଷ୍ଟ କରିଥିଲେ। ତାଙ୍କ ରିପୋର୍ଟ ନେଗେଟିଭ୍ ଆସିଥିଲା। କିନ୍ତୁ ଆଜି ସକାଳେ ହଠାତ୍ ସେ ଗୁରୁତର ହୋଇପଡ଼ିଥିଲେ ଏବଂ ନାକରୁ ସାମାନ୍ୟ ରକ୍ତସ୍ରାବ ହୋଇଥିଲା। ଏହାଦେଖିବା ପରେ ସଂଗେ ସଂଗେ ତାଙ୍କ ସ୍ତ୍ରୀ, ତାଙ୍କ ଶଳା ବ୍ରହ୍ମପୁର ଏମ୍‌କେସିଜି କାଜୁଆଲ୍‌ଟିକୁ ନେଇ ଆସିଥିଲେ। ୧୧ଟା ବେଳେ ସେମାନେ ତାଙ୍କୁ କାଜୁଆଲଟିକୁ ଆଣିଥିବାବେଳେ ୪୦ରୁ ୪୫ମିନିଟ୍‌ ବିତିଯାଇଥିଲେ ବି ତାଙ୍କୁ କେହି ଡାକ୍ତର ଦେଖିବା ତ ଦୂରର କଥା କେହି ତାଙ୍କ ନିକଟକୁ ଆସିନଥିଲେ। ତେବେ ଗଣମାଧ୍ୟମର କିଛି ବ୍ୟକ୍ତି ଫୋନ କରିବା ପରେ ଡାକ୍ତର ପହଞ୍ଚି ତାଙ୍କୁ ମୃତ ଘୋଷଣା କରିଥିଲେ।

ଏହା ହେଉଛି ବ୍ରହ୍ମପୁର ଏମ୍‌କେସିଜିର ସ୍ୱାସ୍ଥ୍ୟସେବା। ପ୍ରତ୍ୟେକ ଦିନ ଏହିଭଳି ଘଟଣା ଘଟିଯାଉଥିଲେ ମଧ୍ୟ ନା’ ଜିଲ୍ଲା ପ୍ରଶାସନ ନା’ ମେଡ଼ିକାଲ୍ କର୍ତ୍ତୃପକ୍ଷ ଗୁରୁତର ଭାବେ ନେଉଥିବା ଦୃଷ୍ଟିଗୋଚର ହୋଇପାରୁନାହିଁ। ଟଳି ପଡ଼ୁଛନ୍ତି ଗୋଟିଏ ପରେ ଗୋଟିଏ ନିରୀହ ପ୍ରାଣୀ। ସୂଚନାଥାଉକି ପ୍ରମୋଦ ଚନ୍ଦ୍ର ବେହେରା ଗଜପତି ଜିଲ୍ଲା ମୋହନା ସାଉଥ୍‌କୋ ଚନ୍ଦ୍ରଗିରି ଅଂଚଳର ଜଣେ ଲାଇନ୍ ମ୍ୟାନ। ଏହି ଖବର ପ୍ରସାରିତ ହେବା ପରେ ଚନ୍ଦ୍ରଗିରି ଅଂଚଳରେ ଶୋକର ଛାୟା ଖେଳିଯାଇଛି। କାରଣ ସେ ଜଣେ ନିହାତି ଭଦ୍ର ଏବଂ କର୍ତ୍ତବ୍ୟନିଷ୍ଠ କର୍ମଚାରୀ ଭାବେ ଉକ୍ତ ଅଂଚଳରେ ତାଙ୍କର ସୁନାମ ଥିଲା।

ତେବେ ଜିଲ୍ଲାପାଳ ସ୍ୱାସ୍ଥ୍ୟସେବା ଠିକ୍ ଅଛି ବୋଲି ଯେଉଁ ଭିଡ଼ିଓ ମାଧ୍ୟମରେ ବାର୍ତ୍ତା ପ୍ରଦାନ କରୁଛନ୍ତି ଏହି ଘଟଣା ପରେ ତାହା ହାସ୍ୟାସ୍ପଦ। ଜିଲ୍ଲାପାଳ ସ୍ୱାସ୍ଥ୍ୟସେବା ଠିକ୍ ଥିବା ନେଇ ଯେଉଁ ତଥ୍ୟ ଦେଉଛନ୍ତି ତାହା କେବଳ କାଗଜ କଲମରେ ସୀମିତମାତ୍ର। ଏକ ବିଶ୍ୱସ୍ତ ସୂତ୍ରରୁ ମିଳିଥିବା ଖବର ଅନୁସାରେ କାଜୁଆଲ୍‌ଟି ଏବଂ ଆଇସୋଲେସନ୍ ୱାର୍ଡ଼ରେ ଦୈନିକ ୨୦ରୁ ଉର୍ଦ୍ଧ୍ୱ ରୋଗୀଙ୍କ ମୃତ୍ୟୁ ହେଉଛି। ସମସ୍ତ ମୃତ୍ୟୁ କରୋନା ଜନିତ କି ନୁହେଁ, ତାହାର ପ୍ରମାଣ ନାହିଁ। କରୋନା ଆକ୍ରାନ୍ତ ହୁଅନ୍ତୁ ଅଥବା ସାଧାରଣ ରୋଗୀ ଅନ୍ୟ କୌଣସି କାରଣରୁ ଗୁରୁତର ହୋଇ ମେଡ଼ିକାଲରେ ପହଞ୍ଚିଲେ ଡାକ୍ତରମାନେ ତାଙ୍କୁ ଅଛୁଆଁ କରୁଛନ୍ତି। ଡାକ୍ତରମାନଙ୍କର ଏପରି କାର୍ଯ୍ୟ କୌଣସି ସଭ୍ୟ ସମାଜରେ ଗ୍ରହଣୀୟ ନୁହେଁ। ଗଞ୍ଜାମ ଏମ୍‌କେସିଜିରେ ଚାଲିଥିବା ଏପ୍ରକାର ଅବ୍ୟବସ୍ଥା ବିଷୟରେ ଜିଲ୍ଲା ପ୍ରଶାସନ ଧ୍ୟାନ ଦେବାକୁ ସାଧାରଣରେ ଦାବି ହେଉଛି।

ବ୍ରହ୍ମପୁର : ବ୍ରହ୍ମପୁରର ବଡ଼ବଜାର ଗଣେଶ ମାର୍କେଟ କମ୍ପଲେକ୍ସ ସିଲ୍‌ କରାଯାଇଛି । ଲକ୍‌ଡାଉନ୍‌ରେ ଖୋଲା ରହିଥିବାର ପ୍ରଶାସନ ସିଲ୍‌ କରିଛି । ଜିଲ୍ଲାରେ ଗତକାଲିଠାରୁ ଆସନ୍ତା 30 ତାରିଖ ପର୍ଯ୍ୟନ୍ତ ଲକ୍‌ଡାଉନ୍‌ କରାଯିବ । ଏହି ସମୟରେ କେବଳ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲିବାକୁ ଅନୁମତି ରହିଛି । ସେହିପରି ସକାଳ 7ଟାରୁ ଅପରାହ୍ନ 12ଘଟିକା ପର୍ଯ୍ୟନ୍ତ ଦୋକାନ ଖୋଲାଯାଇପାରିବ ବୋଲି ନିର୍ଦ୍ଦେଶ ରହିଛି । ଜିଲ୍ଲାରେ ବସ୍‌, ଅଟୋ ଆଦି ଚଳାଚଳ ଉପରେ କଟକଣା ଜାରି କରାଯାଇଛି ।

ସୂଚନାଯୋଗ୍ୟ, ଜିଲ୍ଲାରେ ଆକ୍ରାନ୍ତଙ୍କ ସଂଖ୍ୟା ବଢୁଥିବାବେଳେ ମୃତ୍ୟୁସଂଖ୍ୟା 6କୁ ବୃଦ୍ଧି ହୋଇଛି । ଆକ୍ରାନ୍ତଙ୍କ ସଂଖ୍ୟାକୁ ଦେଖି ଜିଲ୍ଲା ପ୍ରଶାସନ ଏପରି ନିଷ୍ପତ୍ତି ଗ୍ରହଣ କରିଛନ୍ତି ।

ବ୍ରହ୍ମପୁର: ସର୍ଟ ସର୍କିଟ୍‌ରୁ ଘରେ ନିଆଁ ଲାଗି ୩ଜଣଙ୍କ ମୃତ୍ୟୁ ଘଟିଛି। ଗଞ୍ଜାମ ଜିଲ୍ଲାରେ ଏହି ଅଭାବନୀୟ ଘଟଣା ଘଟିଛି। ମୃତକଙ୍କ ମଧ୍ୟରେ ବ୍ରହ୍ମପୁର କୋ-ଅପରେଟିଭ୍ ସୋସାଇଟି ବ୍ୟାଙ୍କର ସଭାପତି ଅଲେଖ ଚୌଧୁରୀ, ତାଙ୍କର ଶଳା ଓ ତାଙ୍କ ଘରେ କାମ କରୁଥିବା ଜଣେ ବ୍ୟକ୍ତି ଅଛନ୍ତି। ଘର ଭିତରୁ ତିନିଜଣଙ୍କୁ ମୁମୂର୍ଷୁ ଅବସ୍ଥାରେ ଉଦ୍ଧାର କରାଯାଇ ତାଙ୍କୁ ଏମ୍‌କେସିଜିରେ ଭର୍ତ୍ତି କରାଯାଇଥିଲା । ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଛନ୍ତି । ସୂଚନା ଅନୁସାରେ, ଗତକାଲି ବିଳମ୍ବିତ ରାତିରେ ଗୋଷାଣୀ ନୂଆଗାଁ ପାଣିଗ୍ରାହୀ ପେଣ୍ଠସାହିରେ ଥିବା ଅଲେଖଙ୍କ ଘରେ ଏହି ଅଗ୍ନିକାଣ୍ଡ ଘଟିଥିଲା। କୌଣସି କାରଣରୁ ସର୍ଟ ସର୍କିଟ୍‌ରୁ ଘରେ ନିଆଁ ଲାଗିଥିଲା । ତିନିଜଣ ଗୋଟିଏ ଘରେ ଶୋଇଥିବାବେଳେ ଏହି ଅଭାବନୀୟ ଘଟଣା ଘଟିଥିଲା। ନିଆଁ ଲାଗି ଯିବା ଫଳରେ ସମସ୍ତେ ଶ୍ୱାସରୁଦ୍ଧ ହୋଇଯାଇଥିଲେ ବୋଲି ଜଣାପଡ଼ିଛି।

ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର୍‌: ବ୍ରହ୍ମପୁରକୁ ସ୍ୱଚ୍ଛ ପରିମଳ ଓ ପ୍ରଦୂଷଣ ମୁକ୍ତ ପରିବେଶ କରିବାର କେତେ କେତେ ସ୍ୱପ୍ନ ଓ ସଂକଳ୍ପ ଫିକା ପଡ଼ିଯିବା ପରେ ଚକ୍ରବର୍ତ୍ତୀ ସିଂ ରାଠୋର ମହାନଗର କମିଶନର ସାହେବ ସାନିଟେସନ ଫୋରମ୍ ଗଠନ କରି ନିଜ ଦାୟିତ୍ୱ ଅନ୍ୟମାନଙ୍କ କାନ୍ଧରେ ଲଦିଦେଇ କର୍ତ୍ତବ୍ୟପରାୟଣତାର ଏକ ବାହାଦୁରୀ ନେବାର ଯେଉଁ ପ୍ରୟାସ କରିଛନ୍ତି ଏହା ଅତ୍ୟନ୍ତ ହାସ୍ୟାସ୍ପଦ। ବ୍ରହ୍ମପୁର ସିଟି ସାନିଟେସନ ଫୋରମ୍ ଇଂରାଜୀରେ ଶୁଣିବାକୁ ଯେତିକି ଭଲ ଲାଗୁଛି ଆବର୍ଜନା ସଫା କରିବା ନାମରେ ଦଳେ ବିଚାରବନ୍ତ ମଣିଷଙ୍କୁ ଗୋଟାଗୋଟି କରି ପ୍ରତିମାସରେ ଦୁଇଟି ବୈଠକ ହେଉଛି କିନ୍ତୁ ଗାଁ ପରିମଳ ଧୋବା ତୁଠରୁ ନ୍ୟାୟରେ ପ୍ରତି ସ୍ଥାନ, ପ୍ରତି ବଜାର ଓ ବସ୍‌ଷ୍ଟାଣ୍ଡରେ ପରିମଳର ନଗ୍ନ ରୂପ ଦେଖିବାକୁ ମିଳୁଛି।

ଆଜିକାଲି ଗଣ ଓ ଗଣମାଧ୍ୟମରେ ବିଶେଷ ଭାବରେ ସହର ବିକାଶ ଚିନ୍ତାକରି ଅପର୍ଯ୍ୟାପ୍ତ ଆନନ୍ଦ ପାଉଥିବା ମାତ୍ର ହାତଗଣତି ମଣିଷଙ୍କ ମଧ୍ୟରୁ ସଂକଳ୍ପ ଅଧ୍ୟକ୍ଷ ଇ. ତେଜେଶ୍ୱର ରାଓ, ଆର୍ଯ୍ୟଭଟ୍ଟର ମୁଖ୍ୟ ତଥା ‘ଫୋରମ୍ ଫର ଗଂଜାମ’ର ଆବାହକ ସୁଧୀର ରାଉତ, ଶିକ୍ଷକମାନଙ୍କ ନେତା ଶ୍ୟାମସୁନ୍ଦର ଖାଡ଼ଙ୍ଗାଙ୍କଠାରୁ ନେଇ ପରିବେଶପ୍ରେମୀ ମାନଓ କୁମାର ପାତ୍ର, ମହିଳା ସମାଜସେବୀ ସବିତା ସାହୁକାର, ସ୍ୱରାଜ ସୁବୁଦ୍ଧି ପରି କିଛି ଲୋକଙ୍କ ହାତରେ ସାନିଟେସନ ଫୋରମ୍‌ର ଭାଗ୍ୟ ସହ ସହର ପରିମଳର ଭାଗ୍ୟ ଭିତରେ ଅନେକ ବ୍ୟବଧାନ। କାରଣ ଏଇ ସୀମିତ ସଂଖ୍ୟକ ମଣିଷମାନେ ଆଜିକାଲି ବେଶ୍ ତତ୍ପରତା ପ୍ରକାଶ କରି ଅନେକ ମୂଲ୍ୟବାନ କାର୍ଯ୍ୟ ପାଇଁ ଅଣ୍ଟା ଭିଡ଼ିଛନ୍ତି। ଯଦି ଏଇମାନେ କେତେ ଦିନ କେତେ ଲୋକଙ୍କୁ ସାନିଟେସନ୍‌ର ବାର୍ତ୍ତା ଦେବେ।

ପ୍ରଥମତଃ ଭାଷାକୁ ମାରିଦେଇ ଇଂରାଜୀରେ ବ୍ରହ୍ମପୁର ସାନିଟେସନ ଫୋରମ୍‌ର ପରିକଳ୍ପନା ବିଚାର କରିଲା କିଏ? ଏହା ଏକ ପ୍ରାଥମିକ ପ୍ରଶ୍ନ। ଓଡ଼ିଆ ଭାଷାର ସୁରକ୍ଷା ପାଇଁ ଅନେକ ଆନ୍ଦୋଳନ ଚାଲିଛି ଏପରିକି ବ୍ରହ୍ମପୁର ସହରରେ ମଧ୍ୟ ଏକ ଆନ୍ଦୋଳନ ଭାଷା ସୁରକ୍ଷା ପାଇଁ ମୁଣ୍ଡ ଟେକିଥିଲା। ସୁତରାଂ ବ୍ରହ୍ମପୁର ସ୍ୱଚ୍ଛ ପରିମଳ ସଂଗଠନ ଟିଏ ଗଠିତ ହୋଇଥିଲେ ଶ୍ରୁତିମଧୁର ହୋଇଥାନ୍ତା। ଆଜିକାଲି ଫୋରମ୍ ନାମର ଚାହିଦାବେଶୀ। ଫୋରମ୍ କରି ନିଜ ସ୍ୱାର୍ଥ ଓ ନିଜର ପ୍ରଶସ୍ତିଗାନ କରୁଥିବା ଲୋକଙ୍କୁ ଏକଜୁଟ କରି ସାହିତ୍ୟ, ସଂସ୍କୃତି, କଳା, ପରିବେଶ, ସମାଜସେବାର ଅନେକ ନେତା ତିଆରି ହୁଅନ୍ତି କିନ୍ତୁ ଏମାନଙ୍କ ମହତ୍ତ୍ୱ ଆକାଂକ୍ଷା ବିଚାର ଶେଷରେ ବନ୍ଧା ପଡ଼ିଯାଏ ମାନପତ୍ର, ଉପଢ଼ୌକନ ଓ ଫୁଲତୋଡ଼ାରେ। ବୋଧହୁଏ ବ୍ରହ୍ମପୁର ସାନିଟେସନ ଫୋରମ୍‌ର ଧର୍ମ ପାଳନ କରୁଥିବା କିଛି ମଣିଷ ମନରେ ଏପରି ମିଠା ସ୍ୱପ୍ନ ଯେ ନଥିବ କିଏବା କହିବ?

ବ୍ରହ୍ମପୁର ସାନିଟେସନ ଫୋରମ୍‌ର ମିଠା ଚାଖିବାକୁ ଯାଇ ଆମେ ଏକ ଅନୁସନ୍ଧାନମୂଳକ ରିପୋର୍ଟ ପ୍ରକାଶ କରୁଛୁ। ଏଇ ଫୋରମ୍ କେବଳ ଏକ ପ୍ରହେଳିକା। କବିଙ୍କ ଭାଷାରେ ତୃଷାର୍ତ୍ତ ଶ୍ରାବଣ ବା ଅମାବାସ୍ୟାର ଚନ୍ଦ୍ର। ବ୍ରହ୍ମପୁରକୁ ଆବର୍ଜନା କୁଣ୍ଡରେ ଥୋଇ ଦଳେ ପଦାଧିକାରୀ ନିଜ ଉତ୍ତର ଦାୟିତ୍ୱରୁ ଖସିଯାଇ ତଥାକଥିତ ଆତ୍ମଡ଼ିଣ୍ଡିମ ପ୍ରଚାର ପ୍ରସାରରେ ସହର ବିକାଶଧାରାରେ ନାମ ଯୋଡ଼ିଥିବା ମଣିଷଙ୍କୁ ଡ଼କାଇ ତାଙ୍କ କାନ୍ଧରେ ବନ୍ଧୁକ ଥୋଇ ଗୁଲଗୁଲା ଖାଇବାରେ ମହାନଗର କମିଶନର ସିଦ୍ଧହସ୍ତ।

ବ୍ରହ୍ମପୁର ଆଜି ହତଶ୍ରୀ। ରାସ୍ତାଘାଟ ଓ ଡ଼୍ରେନର ବ୍ୟବସ୍ଥା ଶହେ ପ୍ରତିଶତ ଦାରୁଣ ରୂପର ସ୍ୱାକ୍ଷର ବହନ କରୁଥିବାବେଳେ ହଜାର ହଜାର ପାଇଖାନା ରୂପ ନେଉଥିବା ମୁକ୍ତ ଡ଼୍ରେନ୍ ଗୁଡ଼ିକରେ ସକାଳୁ ସକାଳୁ ମହମହ ହୋଇ ମଳ ଦୁର୍ଗନ୍ଧ ବାସୁଥିବା ବେଳେ ମଳାସୁରକୁ ମହାନଗର ମନେ ପକାଇ ଅରଣ୍ୟ ରୋଦନ କାହିଁକି? ହେଲ୍‌ପଲାଇନ୍ ସ୍ୱଚ୍ଛ ଆପ୍ ମାଧ୍ୟମରେ କିଏ ଜଣାଇବ କାହାକୁ, ଶୁଣିବ କିଏ? ବ୍ରହ୍ମପୁର ସହର ପରିମଳ ଓ ପର୍ଯ୍ୟାବରଣ ସାନିଟେସନ ଫୋରମ ଯଦି ସୁଧାରିଦେବ କରୋନାର ଆତ୍କ ମଣିଷ ମନରୁ ଲିଭିଯିବ। କିଛି ଅବସରବାଦୀ ମଣିଷଙ୍କ ପାଇଁ ଫୋରମ୍ ଗଠନ କରିବା ମଧ୍ୟ ଏକ ନିତିଦିନିଆ ଘଟଣା।

ମିଡ଼ିଆରେ ଚିତ୍ର ଛପାଇ ନାମ ଦେଖାଇ କୌଣସି ସମ୍ମାନ ଓ ସମ୍ବର୍ଦ୍ଧନାର ସ୍ୱପ୍ନିଳ ଦୁନିଆରେ ମସଗୁଲ ଚିତ୍ର ଦେଖୁଥିବା ଚରିତ୍ରଙ୍କୁ ତିଆରି କରିବାରେ ଯଦିଚ ଗଣମାଧ୍ୟମର ଶ୍ରେୟ ଯିବ ତଥାପି ଗଣମାଧ୍ୟମର ଅନୁସନ୍ଧାନ ମୂଳକ ରିପୋର୍ଟ ଟିଏ ଫୁଟି ଉଠିଲେ ଏପରି ଫୋରମ୍ ଗୁଡ଼ିକର ବାସ୍ତବତା କେତେ ସହରବାସୀ ଅନୁଭବ କରନ୍ତେ। ଏଇ ସହର କେବଳ ବୁଢ଼ୀ ଠାକୁରାଣୀ ଭରସାରେ ଚାଲିଚି। ଏକ ପ୍ରକାର ଅଭିଭାବକ ଶୂନ୍ୟ ସହର ବ୍ରହ୍ମପୁରରେ ବ୍ରହ୍ମପୁର ସ୍ୱାସ୍ଥ୍ୟ, ପରିମଳ, ପରିବେଶ, ରାସ୍ତାଘାଟ ଶ୍ରୀହୀନ। ସେପଟେ ଫୋରମ୍‌ଗୁଡ଼ିକ ବକ୍ଷ ବିସ୍ତାର କରି ବିକାଶ ଚିତ୍ର ଭିତରେ ଦେଖୁଛନ୍ତି ଦିବା ସ୍ୱପ୍ନ ଏକ ବିଡ଼ମ୍ବନା।

ବ୍ରହ୍ମପୁର ସାନିଟେସନ ଫୋରମ୍ ଗଠନ ପାଇଁ ଆହୁତ ହୋଇଥିଲା ବୈଠକ। ଯୋଗଦେଇଥିଲେ ସ୍ୱେଚ୍ଛାସେବୀ ସଂଗଠନ, ବୁଦ୍ଧିଜୀବୀ, ସମାଜସେବୀ ଓ ଗଣମାଧ୍ୟମ। ଲକ୍ଷ୍ୟଥିଲା ପରିମଳ ମୁକ୍ତ ସ୍ୱଚ୍ଛ ସହର ବ୍ରହ୍ମପୁର। ତା’ପର ଦିନ ସୁଧୀର ରାଉତଙ୍କ କାନ୍ଧରେ ବ୍ରହ୍ମପୁର ସାନିଟେସନ ଫୋରମ୍ ରଖିଦେଇ ନୂଆ ନୂଆ ସଦସ୍ୟଙ୍କୁ ନେଇ ମାସିକ ଓ ପାକ୍ଷିକ ବୈଠକ ପାଇଁ ନୀତି ମଧ୍ୟ ନିର୍ଦ୍ଧାରଣ କରାଗଲା। ଗୋଟିଏ ବୈଠକରେ ସଦସ୍ୟଙ୍କ ଉପସ୍ଥିତିରେ ଆବାହକଙ୍କ ଅଧ୍ୟକ୍ଷତାରେ ଓ ଅନ୍ୟ ବୈଠକ ସରକାରୀ ବାବୁଙ୍କ ଅଧ୍ୟକ୍ଷତାରେ କିନ୍ତୁ ଯେତିକି ପୁରୁଣା ହେଲା ୩ ମାସ ଭିତରେ ବ୍ରହ୍ମପୁର ସାନିଟେସନ ଫୋରମ୍‌ର ପ୍ରକୃତ ତଥ୍ୟ ପଦାକୁ ଆସିଲା। ଏଇ ଫୋରମ୍ ଆଜି ମୋବାଇଲ୍ ଯନ୍ତ୍ର ନିୟନ୍ତ୍ରଣରେ ପରି ମନେହୁଏ। ସୁଧୀର ରାଉତ, ଇଟି ରାଓଙ୍କ ମାର୍ଗଦର୍ଶନରେ ସ୍ୱଚ୍ଛ ଆପ୍ ସାହାରା କରି ସ୍ୱଚ୍ଛ ବ୍ରହ୍ମପୁରର ପରିକଳ୍ପନା କିନ୍ତୁ ଏହାର ବାସ୍ତବ ଚିତ୍ର ଭିନ୍ନ ଧରଣର। ସଦସ୍ୟମାନେ ଏକ ପ୍ରକାର ନିଜେ ସଚେତନ ରହି ଅନ୍ୟକୁ ସଚେତନତାର ବାର୍ତ୍ତା ଦେବାକୁ ସ୍ୱଚ୍ଛ ଆପ୍ ସ୍ୱର ସହ ସ୍ୱର ମିଶାଇବାକୁ ସଦସ୍ୟଙ୍କୁ ଆହ୍ୱାନ ଦେଲେ କିନ୍ତୁ ଏଇ ସ୍ୱଚ୍ଛ ଆପ୍ ଯେ ବ୍ରହ୍ମପୁର ପରିମଳକୁ ସୁଧାରି ଏକ ସ୍ୱଚ୍ଛ ପର୍ଯ୍ୟାବରଣର ଭବ୍ୟ ସୁନ୍ଦର ସହର ଭେଟିଦେବ ଏହା ସଂପୂର୍ଣ୍ଣ ଭୁଲ ପ୍ରମାଣିତ।

ସହରରେ ସକାଳୁ ସକାଳୁ ଗାଡ଼ି ବୁଲୁଛି। କୁଢ଼ କୁଢ଼ ଅଳିଆ ଆବର୍ଜନାର କୁଣ୍ଡଧରି। ସେପଟେ ବିଚ ରାସ୍ତା ମଝିରେ ମାଛ ମାଂସର ବଜାର ମେଲାଇ ପୁତି ଗନ୍ଧମୟ ପରିବେଶରେ ଲୋକଙ୍କୁ ଅତିଷ୍ଠ କରିବାକୁ ବାଧ୍ୟ କରାଯାଉଛି। ବ୍ରହ୍ମପୁର ସହରରେ ମାଛ ମାଂସ ବଜାର ରାଜପଥରେ କୁଢ଼ କୁଢ଼। ଏହା ସହ ମଦ ଦୋକାନ ଆଗରେ ମଦୁଆଙ୍କ ଭିଡ଼ ଦୌରାତ୍ମ୍ୟ। ଏଇ ନିକଟରେ ଜିଲ୍ଲାପାଳ ଦୁଇତିନୋଟି ମଦ ଦୋକାନକୁ ଦଣ୍ଡିତ କରିଛନ୍ତି। ଏଇ ସହରର ପ୍ରକୃତ ରୂପଆଗରେ ବ୍ରହ୍ମପୁର ସାନିଟେସନର ବିଚାର ସ୍ୱଚ୍ଛତାର ଅମଳିନ ବାର୍ତ୍ତା ଦେବ କିପରି ବୋଲି ବୁଦ୍ଧିଜୀବୀଙ୍କ ମନରେ ପ୍ରଶ୍ନ।

ସହରସାରା ସ୍ୱଚ୍ଛତାର ବାର୍ତ୍ତା ଦେବାକୁ କିଏ କେଉଁ ରୂପରେ ପ୍ରୟାସ କରୁଛନ୍ତି ଅନ୍ୟପଟରେ ସହରବାସୀ ସଂପୂର୍ଣ୍ଣ ଗାଁଟିଏ କରିଦେବା ପରି ନିଜ ନିଜ ଦୁଆର ମୁହଁକୁ ଆବର୍ଜନା କୁଣ୍ଡରେ ପରିଣତ କରି ଚାଲିଛନ୍ତି। ପଲିଥିନ ଯେପରି ଚାଦର ଉପରେ ସହର। ଏବେବି ପଲିଥିନ ଓ ଜରି କାଗଜରେ ଡ଼୍ରେନ୍ ଗୁଡ଼ିକ ରୁଦ୍ଧି ହୋଇ ରହିଛନ୍ତି। ସାମାନ୍ୟ ବର୍ଷାରେ ଏଇ ଭିତରୁ ଯେଉଁ ଦୁର୍ଗନ୍ଧ ବାହାରୁଛି ଏଇ ସ୍ଥାନରୁ ଆଉ ଏକ କରୋନା ପରି ରାକ୍ଷସ ଜନ୍ମ ଏ ସହରରେ ନନେବ କିଏ ବା କହିବ?