ନୂଆଦିଲ୍ଲୀ: କେନ୍ଦ୍ର ମନ୍ତ୍ରୀ ସ୍ମୃତି ଇରାନୀ ଏକ ୟୁଟ୍ୟୁବ ଚ୍ୟାନେଲକୁ ଦେଇଥିବା ସାକ୍ଷାତକାରରେ ସୁଶାନ୍ତ ସିଂ ରାଜପୁତଙ୍କୁ ସ୍ମରଣ କରି ଭାବପ୍ରବଣ ହୋଇଛନ୍ତି। ସେ କହିଛନ୍ତି ଯେ, ତାଙ୍କ ବନ୍ଧୁ ସୁଶାନ୍ତ ତାଙ୍କୁ ଅତି କମରେ ଥରେ ହେଲେ ବି ଫୋନ କରିଥାନ୍ତେ। ସ୍ୱର୍ଗତ ଅଭିନେତାଙ୍କୁ ସ୍ମରଣ କରି ସ୍ମୃତି ଇରାନୀ ବହୁତ ଭାବପ୍ରବଣ ହୋଇଥିଲେ। ଇରାନୀ ନିଜ ୟୁଟ୍ୟୁବ୍ କାର୍ଯ୍ୟକ୍ରମରେ କହିଥିଲେ ଯେ, ଯେଉଁ ଦିନ ସୁଶାନ୍ତଙ୍କ ଦେହାନ୍ତ ହୋଇଥିଲା, ମୁଁ ଏକ ଭିଡିଓ କନଫରେନ୍ସରେ ଥିଲି। କିନ୍ତୁ ମୁଁ ଏହାକୁ ସଂପୂର୍ଣ୍ଣ କରିପାରିନଥିଲି। ମୁଁ ଭାବିଲି ଯେ, ସେ ମୋତେ କାହିଁକି ଫୋନ କଲେ ନାହିଁ? ସେ ଥରେ ଫୋନ କରିବାର ଥିଲା। ମୁଁ ତାଙ୍କୁ ମଧ୍ୟ କହିଥିଲି ଯେ, ତୁମେ ନିଜକୁ ଶେଷ କରିବା ଉଚିତ୍ ନୁହେଁ।
ପୂର୍ବତନ ଟିଭି ଅଭିନେତା ଇରାନୀ କହିଛନ୍ତି ଯେ, ସେ ସୁଶାନ୍ତ ସିଂ ରାଜପୁତଙ୍କୁ ଜାଣିଥିଲେ। କାରଣ ସେମାନଙ୍କ ସେଟ୍ ବେଳେବେଳେ ମୁମ୍ବାଇର ସମାନ ସ୍ଥାନରେ ଥିଲା। ୨୦୧୩ ଚଳଚ୍ଚିତ୍ର ‘କୋଇ ପୋ ଚେ’ ରେ ସୁଶାନ୍ତ ସିଂ ରାଜପୁତଙ୍କ ସହ କାମ କରିଥିବା ଅଭିନେତା ଅମିତ ସାଧଙ୍କ ବିଷୟରେ ଇରାନୀ କହିଛନ୍ତି ଯେ, “ମୁଁ ଅମିତଙ୍କ ବିଷୟରେ ତୁରନ୍ତ ଚିନ୍ତା ଅନୁଭବ କଲି। ମୁଁ ଅମିତଙ୍କୁ ଫୋନ କରିଥିଲେ ଏବଂ ସେ କିପରି ଅଛନ୍ତି ବୋଲି ପଚାରିଥିଲି।
ସ୍ମୃତି ଇରାନୀ କହିଛନ୍ତି ଯେ, ଅଭିନେତା ଅମିତ ବହୁତ ବିବ୍ରତ ଥିଲେ। ସେ ତାଙ୍କୁଙ୍କୁ କହିଥିଲେ ଯେ, ସୁଶାନ୍ତ କ’ଣ କରିଦେଲା? ମୁଁ ଆଉ ରହିବାକୁ ଚାହେଁ ନାହିଁ। ସ୍ମୃତି ଇରାନୀ କହିଛନ୍ତି ଯେ, ଯେତେବେଳେ ମୁଁ ଅମିତଙ୍କୁ ଅଧିକ ପ୍ରଶ୍ନ ପଚାରିଲି, ସେ ବିରକ୍ତ ହେଲେ ଏବଂ ସେ ପଛକୁ ଫେରି କହିଲେ, କଣ ଆପଣଙ୍କର ଅନ୍ୟ କୌଣସି କାମ ନାହିଁ? ପରେ ଅମିତ ଏବଂ ଇରାନୀ ପ୍ରାୟ ୬ ଘଣ୍ଟା ଧରି ଏହି ପ୍ରସଙ୍ଗରେ କଥା ହୋଇଥିଲେ।
ଉଲ୍ଲେଖନୀୟ ଯେ, ଜୁନ୍ ୨୦୨୦ ରେ ମୁମ୍ବାଇରେ ଥିବା ତାଙ୍କ ଫ୍ଲାଟରେ ୩୪ ବର୍ଷୀୟ ସୁଶାନ୍ତ ସିଂ ରାଜପୁତଙ୍କ ମୃତଦେହ ମିଳିଥିଲା। ତେବେ ଶବ ବ୍ୟବଚ୍ଛେଦ ଆଧାରରେ ମୁମ୍ବାଇ ପୋଲିସ ଏହାକୁ ଆତ୍ମହତ୍ୟା ବୋଲି ଘୋଷଣା କରିଥିଲା। ପରେ କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଏହି ମାମଲା ଦାୟର କରିଥିଲା। ସୁଶାନ୍ତ ସିଂ ରାଜପୁତଙ୍କ ପିତା ତାଙ୍କ ପୁଅର ତତ୍କାଳୀନ ଗର୍ଲଫ୍ରେଣ୍ଡ ତଥା ଅଭିନେତ୍ରୀ ରିୟା ଚକ୍ରବର୍ତ୍ତୀ ଏବଂ ତାଙ୍କ ପରିବାର ତାଙ୍କୁ ଆର୍ଥିକ ତଥା ମାନସିକ ସ୍ତରରେ ହଇରାଣ କରିଥିବାରୁ ସେ ଆତ୍ମହତ୍ୟା କରିଥିବା ଅଭିଯୋଗ କରିଥିଲେ।
ଅଭିନେତ୍ରୀ ଚକ୍ରବର୍ତ୍ତୀଙ୍କୁ ଅଭିନେତାଙ୍କ ପାଇଁ ଡ୍ରଗ୍ସ ବ୍ୟବସ୍ଥା ଅଭିଯୋଗରେ ସେପ୍ଟେମ୍ବର ୨୦୨୦ ରେ ନାର୍କୋଟିକ୍ସ କଣ୍ଟ୍ରୋଲ୍ ବ୍ୟୁରୋ ଗିରଫ କରିଥିଲା। ଏକ ମାସ ପରେ ତାଙ୍କୁ ଜାମିନରେ ମୁକ୍ତ କରାଯାଇଥିଲା। ତେବେ ସୁଶାନ୍ତ ସିଂ ରାଜପୁତଙ୍କ ପିତାଙ୍କ ଦ୍ୱାରା କରାଯାଇଥିବା ସମସ୍ତ ଅଭିଯୋଗକୁ ନିରର୍ଥକ ବୋଲି ରିୟା ଚକ୍ରବର୍ତ୍ତୀ କହିଛନ୍ତି।
